គោលលទ្ធិ និង សេចក្ដីសញ្ញា ៤៥:១–១៥

សេចក្ដីផ្ដើម

សាសនាចក្របានបន្តរីកចម្រើននៅទីក្រុង ខឺតឡង់ រដ្ឋ អូហៃអូ ហើយការប្រឆាំង និង សេចក្ដីរាយការណ៍ក្លែងក្លាយអំពីសាសនាចក្រក៏បានកើនឡើងដែរ ។ វិវរណៈដែលមានចែងនៅក្នុង គោលលទ្ធិ និង សេចក្តីសញ្ញា ៤៥ត្រូវបានទទួលក្នុងខែ មិនា ឆ្នាំ ១៨៣១ បាននាំសេចក្ដីអំណរដល់ពួកបរិសុទ្ធ នៅពេលពួកគេបានប្រឈមមុខនឹងសេចក្ដីលំអៀងនៅក្នុងមូលដ្ឋាន ។ អ្នកនឹងសិក្សា គោលលទ្ធិ និង សេចក្តីសញ្ញា ៤៥ ជាពីរមេរៀន ។ នៅក្នុងផ្នែកទីមួយនៃវិវរណៈនេះ ព្រះយេស៊ូវគ្រីស្ទ បានថ្លែងទីបន្ទាល់អំពីតួនាទីរបស់ទ្រង់ ក្នុងនាមជាព្រះរាជបុត្រានៃព្រះ ។ ទ្រង់ក៏បានមានព្រះបន្ទូលអំពីទីក្រុងរបស់ ហេណុក ផងដែរ ។

គោលលទ្ធិ និង សេចក្ដីសញ្ញា ៤៥:១-៥

ព្រះយេស៊ូវគ្រីស្ទ ថ្លែងទីបន្ទាល់អំពីតួនាទីរបស់ទ្រង់ ក្នុងនាមជាព្រះរាជបុត្រានៃព្រះ

នៅពេលអ្នកជួបប្រទះនឹងឧបសគ្គ ឬ ការសម្រេចចិត្តដ៏លំបាកមួយ តើអ្នកនឹងទៅរកនរណាឲ្យផ្ដល់ដំបូន្មានដល់អ្នក ? តើលក្ខណៈសម្បត្តិបែបណាខ្លះ ដែលបុគ្គលនោះត្រូវមាន ដែលផ្ដល់នូវទំនុកចិត្តដល់អ្នក ក្នុងការចែកចាយអារម្មណ៍របស់អ្នក ហើយស្ដាប់តាមដំបូន្មានរបស់គាត់ ?

យើងមុខជាចង់ស្ដាប់តាមបុគ្គល ដែលយើងមានអារម្មណ៍ថាបានយកចិត្តទុកដាក់ចំពោះយើងដោយផ្ទាល់ និង ជាបុគ្គលដែលធ្លាប់មានជោគជ័យក្នុងបញ្ហានោះ ដោយប្រើដំបូន្មានដែលគាត់ផ្ដល់ឲ្យនេះ ។ វិវរណៈដែលមានកត់ត្រានៅក្នុង គោលលទ្ធិ និង សេចក្តីសញ្ញា ៤៥ បានកើតឡើងនៅចំគ្រា ដែលពួកបរិសុទ្ធថ្ងៃចុងក្រោយ និង មនុស្សដទៃទៀត បានស្ដាប់ និង អានសារលិខិតដែលទាស់នឹងសាសនាចក្រ ។ សូមអានសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ៤៥ រួចស្វែងរកស្ថានភាពនានា ដែលពួកបរិសុទ្ធបានជួបប្រទះ ពេលដែលព្រះអម្ចាស់បានប្រទានវិវរណៈនេះដល់ពួកគេ ។

សូមកត់ចំណាំពាក្យ ចូរប្រុងស្ដាប់ នៅក្នុង គោលលទ្ធិ និង សេចក្តីសញ្ញា ៤៥:១ ។ អ្នកអាចនឹងចង់គូសចំណាំវាទុក ។ ការប្រុងស្ដាប់តាមនរណាម្នាក់ មានន័យថាការស្ដាប់តាមដោយប្រុងប្រយ័ត្ន ហើយវាក៏អាចរួមមានទាំងការស្ដាប់តាម និង ការគោរពប្រតិបត្តិតាមផងដែរ ។ នៅពេលយើងស្ដាប់ព្រះអម្ចាស់យ៉ាងពិតប្រាកដ នោះយើងនឹងធ្វើតាមឱវាទ និងព្រះបញ្ញត្តិរបស់ទ្រង់។ នៅដើមដំបូងនៃវិវរណៈនេះ ព្រះអម្ចាស់បានធ្វើការប្រកាសអំពីតួនាទីរបស់ទ្រង់មួយចំនួន និង កិច្ចខ្នះខ្នែងទ្រង់ក្នុងការជួយដល់យើង ។ នៅពេលយើងអានសេចក្ដីប្រកាសទាំងនេះ យើងអាចរកឃើញមូលហេតុ ដែលយើងត្រូវស្ដាប់តាមព្រះបន្ទូលទ្រង់ ។ សូមរកមើលពាក្យ ចូរស្ដាប់តាម និង ស្ដាប់ នៅក្នុងខគម្ពីរ ដែលអ្នកសិក្សានៅក្នុងមេរៀនថ្ងៃនេះ ។

សូមអាន គោលលទ្ធិ និង សេចក្តីសញ្ញា ៤៥:១ដោយស្វែងរកអ្វី ដែលព្រះអម្ចាស់បានមានព្រះបន្ទូល អំពីព្រះអង្គទ្រង់ ។ អ្នកអាចនឹងចង់គូសចំណាំនូវអ្វីដែលអ្នករកឃើញ ។

តើការដឹងថា ព្រះយេស៊ូវគ្រីស្ទគឺជាអង្គបង្កបង្កើតផែនដី ដែលជាកន្លែងយើងត្រូវបានបញ្ជូនមកនេះ ជួយយើងឲ្យស្ដាប់តាមអ្វីដែលទ្រង់មានព្រះបន្ទូលយ៉ាងដូចម្ដេចដែរ ?

សូមអាន គោលលទ្ធិ និង សេចក្តីសញ្ញា ៤៥:២-៣រួចស្វែងរកមូលហេតុបន្ថែម ដែលយើងត្រូវស្ដាប់តាមព្រះអង្គសង្គ្រោះ ។ សូមកត់ចំណាំពីភាពបន្ទាន់នៅក្នុង ខទី ២ ។ យើងគួរតែស្ដាប់តាមព្រះអង្គសង្គ្រោះ កាលនៅមានពេលធ្វើតាមអ្វីដែលទ្រង់មានព្រះបន្ទូល ។

គោលលទ្ធិ និង សេចក្តីសញ្ញា ៤៥:៣ បង្រៀនយើងថា ព្រះយេស៊ូវគ្រីស្ទ គឺជាអ្នកគាំទ្រយើងជាមួយនឹងព្រះវរបិតាដែលគង់នៅស្ថានសួគ៌ ។ សូមកត់ចំណាំពាក្យ ជា នៅក្នុង គោលលទ្ធិ និង សេចក្តីសញ្ញា ៤៥:៣ ។ តើអ្នកយល់អំពីភាពខុសគ្នារវាងការនិយាយថា « ព្រះយេស៊ូវគ្រីស្ទ នឹងធ្វើជា អ្នកគាំទ្ររបស់យើង » និង « ព្រះយេស៊ូវគ្រីស្ទ ជា អ្នកគាំទ្ររបស់យើង » ដែរឬទេ ? ព្រះអង្គសង្គ្រោះពុំត្រឹមតែអង្វរជំនួសរឿងក្ដីរបស់យើងនៅឯការជំនុំជម្រះចុងក្រោយនោះទេ ទ្រង់ថែមទាំងឈរជាអ្នកគាំទ្រជារៀងរាល់ថ្ងៃទៀតផង នៅពេលយើងអធិស្ឋានទៅកាន់ព្រះវរបិតាសួគ៌ ប្រែចិត្ត ហើយព្យាយាមធ្វើឲ្យមានព្រះវិញ្ញាណបរិសុទ្ធគង់នៅជាមួយយើង ។ សូមពិចារណាថាតើអ្នកត្រូវការព្រះយេស៊ូវគ្រីស្ទ ឲ្យធ្វើជាអ្នកគាំទ្រអ្វីខ្លះ នៅក្នុងជីវិតប្រចាំថ្ងៃរបស់អ្នក ។

ដើម្បីជួយអ្នកឲ្យយល់ពាក្យ អ្នកគាំទ្រ និង ទំនាក់ទំនងនៃអ្នកគាំទ្រជាមួយនឹងជនជាប់ចោទ សូមគូសបន្ទាត់ដោយផ្គូផ្គងតួនាទីនៃបុគ្គលនៅខាងឆ្វេង ទៅនឹងអត្ថន័យដ៏ត្រឹមត្រូវនៅខាងស្ដាំ ។

ចុងចោទ	បុគ្គលរូបនេះ ត្រូវគេសង្ស័យថា បានប្រព្រឹត្តបទឧក្រិដ្ឋ ។
ចៅក្រម	បុគ្គលរូបនេះ ការពាររឿងក្ដីឲ្យគេ ។
មេធាវី	បុគ្គលរូបនេះ ស្ដាប់សាក្សី ហើយសម្រេចក្ដីស្របទៅតាមច្បាប់ ។

សូមស្រមៃថា អ្នកបានប្រព្រឹត្តខុសច្បាស់ ហើយត្រូវគេនាំទៅឈរនៅចំពោះមុខចៅក្រម ។ តើអ្នកនឹងមានអារម្មណ៍យ៉ាងណា ? ហេតុអ្វីបានជាអ្នកមានអំណរគុណ ចំពោះមេធាវី ដែលបានការពារក្ដីឲ្យអ្នក ?

សូមអាន គោលលទ្ធិ និង សេចក្តីសញ្ញា ៤៥:៤–៥ដោយស្វែងរករបៀបដែលព្រះយេស៊ូវគ្រីស្ទ បំពេញតួនាទីរបស់ទ្រង់ ក្នុងនាមជាអ្នកគាំទ្រ និង អង្វរឲ្យមានសេចក្ដីសង្គ្រោះដល់យើង ។ រួចសូមឆ្លើយសំណួរខាងក្រោមនេះដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. ហេតុអ្វីបានជាព្រះយេស៊ូវគ្រីស្ទ មានលក្ខណៈសម្បត្តិគ្រប់គ្រាន់ដើម្បីធ្វើជាអ្នកគាំទ្រយើង ?
2. តើព្រះអង្គសង្គ្រោះ បានទូលសុំឲ្យព្រះវរបិតាសួគ៌ទតមើលអ្វី ?

អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានថ្លែងទីបន្ទាល់អំពីចំណាប់អារម្មណ៍របស់ ព្រះអង្គសង្គ្រោះ ចំពោះស្ថានភាពបច្ចុប្បន្ន ក៏ដូចជាការជំនុំជម្រះចុងក្រោយរបស់យើងថា ៖ « ខ្ញុំមានអំណរគុណជាពិសេស ហើយវាមានសារៈសំខាន់ខ្លាំងណាស់ចំពោះខ្ញុំ ដែលខ្ញុំត្រូវអធិស្ឋានទៅកាន់បល្ល័ង្កនៃព្រះគុណនៅគ្រប់គ្រា និង គ្រប់កាលៈទេសៈ ដើម្បីឲ្យព្រះវរបិតាសួគ៌ខ្ញុំស្ដាប់ឮការទូលសុំរបស់ខ្ញុំ ដើម្បីឲ្យព្រះអង្គគាំទ្ររបស់ខ្ញុំ ជាអង្គគ្មានអំពើបាប ដែលបានបង្ហូរព្រះលោហិតរបស់ទ្រង់ នឹងទូលអង្វរសម្រាប់រឿងក្ដីរបស់ខ្ញុំ ។ ( សូមមើល គ. និង ស. ៤៥:៣–៥ ) ។ ខ្ញុំពឹងផ្អែកទាំងស្រុងទៅលើការប្រព្រឹត្តបែបនោះចំពោះព្រះ ដែលទ្រង់ប្រទានដល់កូនចៅទាំងអស់របស់ទ្រង់ ដ្បិតទ្រង់ពិតជាមិនរើសមុខអ្នកណាទេ ហើយអស់អ្នកណាដែលទូលសុំ នោះនឹងបានទទួល » ( I Know in Whom I Have Trusted,” Ensignខែ ឧសភា ឆ្នាំ ១៩៩៣ ទំព័រ ៨៣ ) ។

របៀបដែលព្រះយេស៊ូវអង្វរជំនួសយើង មានសភាពខុសពីមេធាវីនៅក្នុងតុលាការ ដែលអនុវត្តច្បាប់របស់មនុស្ស ព្រោះទ្រង់បានបង់ថ្លៃការជាប់ទោសចំពោះអំពើបាបស្រេចទៅហើយ ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើអ្នកមានអារម្មណ៍ដូចម្ដេច អំពីព្រះយេស៊ូវគ្រីស្ទ ក្នុងការដែលទ្រង់គឺជាអង្គគាំទ្ររបស់អ្នក ហើយមិនត្រឹមតែទូលអង្វរសម្រាប់រឿងក្ដីរបស់អ្នកប៉ុណ្ណោះទេ ថែមទាំងបង់ថ្លៃការជាប់ទោសចំពោះអំពើបាបរបស់អ្នកទៀតផងនោះ ។
2. តើអ្នកមានអារម្មណ៍ថា ព្រះអង្គសង្គ្រោះមានព្រះទ័យឲ្យអ្នកធ្វើអ្វីខ្លះឲ្យបានកាន់តែប្រសើរជាងមុន ដើម្បីមកឯទ្រង់ ហើយទទួលយកទ្រង់ធ្វើជាអង្គគាំទ្ររបស់អ្នក ?

គោលលទ្ធិ និង សេចក្ដីសញ្ញា ៤៥:៦-១០

ព្រះអង្គសង្គ្រោះអញ្ជើញមនុស្សទាំងអស់ ឲ្យមកធ្វើសេចក្ដីសញ្ញាដ៏នៅអស់កល្បអស់កាលជានិច្ចជាមួយទ្រង់

សូមសិក្សា គោលលទ្ធិ និង សេចក្តីសញ្ញា ៤៥:៦-១០ដោយស្វែងរកមូលហេតុនានា ដែលព្រះអង្គសង្គ្រោះបានប្រទានឲ្យយើង ដើម្បីស្ដាប់តាមទ្រង់ ។

សេចក្តីសញ្ញាដ៏នៅអស់កល្បអស់កាលជានិច្ចរបស់ព្រះអម្ចាស់ ដែលបានថ្លែងនៅក្នុង ខទី ៩–១០គឺជា « ភាពពោរពេញនៃដំណឹងល្អនៃព្រះយេស៊ូវគ្រីស្ទ ។… វាមានសភាពអស់កល្បអស់កាលជានិច្ច ក្នុងន័យដែលថា វាគឺជាសេចក្ដីសញ្ញារបស់ព្រះ ហើយត្រូវបានរីករាយក្នុងគ្រាកាន់កាប់ត្រួតត្រានៃដំណឹងល្អគ្រប់ជំនាន់ ដែលមនុស្សមានឆន្ទៈដើម្បីទទួលយកវា » ( Guide to the Scriptures, New and Everlasting Covenant,”scriptures.lds.org) ។

សូមកត់ចំណាំនៅក្នុង គោលលទ្ធិ និង សេចក្តីសញ្ញា ៤៥:៩ ថា ព្រះយេស៊ូវគ្រីស្ទ បានបញ្ជូនសេចក្ដីសញ្ញាដ៏នៅអស់កល្បអស់កាលជានិច្ច « ដើម្បីធ្វើជាពន្លឺដល់មនុស្សលោក ហើយដើម្បីធ្វើជាបមាណីយដល់រាស្ត្រ [ របស់ទ្រង់ ] … ហើយដើម្បីធ្វើជាសារទូតនៅចំពោះព្រះភក្ត្រ [ របស់ទ្រង់ ] ដើម្បីរៀបចំផ្លូវថ្វាយ [ ទ្រង់ ] » ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើអ្នកគិតថា វាមានអត្ថន័យដូចម្ដេច ដើម្បី « មក … រក » សេចក្តីសញ្ញានោះចុះ ( គ. និង ស. ៤៥:១០ ) ?
2. តើអ្នកធ្លាប់បានឃើញដំណឹងល្អគឺជាពន្លឺ ឬ ជាបមាណីយដល់មនុស្សដទៃ តាមរបៀបណាខ្លះ ?
3. តើសេចក្ដីសញ្ញាដ៏នៅអស់កល្បអស់កាលជានិច្ច ឬ ភាពពោរពេញនៃដំណឹងល្អនៃព្រះយេស៊ូវគ្រីស្ទ ជួយរៀបចំផ្លូវសម្រាប់ការយាងមកជាលើកទីពីររបស់ព្រះអម្ចាស់ តាមរបៀបណា ?

គោលលទ្ធិ និង សេចក្ដីសញ្ញា ៤៥:១១-១៥

ព្រះអង្គសង្គ្រោះមានព្រះបន្ទូលអំពី ហេណុក និង រាស្ត្ររបស់លោក

សូមអាន គោលលទ្ធិ និង សេចក្ដីសញ្ញា ៤៥:១១ដោយស្វែងរកការណ៍ ដែលព្រះអម្ចាស់ចែកចាយដល់អ្នកទាំងឡាយណា ដែលស្ដាប់តាមទ្រង់ ។

ព្រះអម្ចាស់បានមានព្រះបន្ទូលថា រាស្ត្រមួយចំនួនបានហៅទ្រង់ថា « ព្រះនៃលោកហេណុក » ( គ. និង ស. ៤៥:១១ ) ។ ហេណុកគឺជាព្យាការីដ៏ឆ្នើម ដែលបានរស់នៅពីមុនជំនាន់លោកណូអេ និង សម័យនៃការជន់លិច ។ ផែនដីនៅជំនាន់របស់លោកហេណុក បានគ្របដណ្ដប់ទៅដោយអំពើទុច្ចរិត គឺដូចជាជំនាន់នៃយាងមកវិញជាលើកទីពីររបស់ព្រះអង្គសង្គ្រោះដែរ ប៉ុន្តែ លោកហេណុកបានដឹកនាំក្រុមប្រជារាស្ត្រសុចរិត ដែលបានរស់នៅក្នុងទីក្រុងមួយឈ្មោះថា ទីក្រុង ស៊ីយ៉ូន ។ នៅទីបំផុត ប្រជារាស្ត្រទីក្រុង ស៊ីយ៉ូន ត្រូវបាន « បែកចេញពីផែនដី » ឬ ត្រូវបានលើកឡើងទៅឯស្ថានសួគ៌ ដោយព្រោះតែសុចរិតភាពរបស់ពួកគេ ( សូមមើល គ. និង ស. ៤៥:១២ ម៉ូសេ ៧:៦៩ ) ។

សូមអាន គោលលទ្ធិ និង សេចក្ដីសញ្ញា ៤៥:១២ដោយស្វែងរក ថាតើទីក្រុង ស៊ីយ៉ូន ត្រូវបានរក្សាទុកសម្រាប់អ្វី ។

គោលលទ្ធិ និង សេចក្តីសញ្ញា ៤៥:១២–១៤ បង្រៀនយើងថា ព្រះអម្ចាស់បានទទួលប្រជារាស្ត្រទីក្រុង ស៊ីយ៉ូន ឡើងទៅឯទ្រង់ ហើយថាទ្រង់នឹងរក្សាពួកគេទុក « រហូតដល់ថ្ងៃនៃសេចក្ដីសុចរិតនឹងមកដល់ » ។ នៅថ្ងៃនោះ ហេណុក និង រាស្ត្ររបស់លោក នឹងត្រឡប់មកផែនដីវិញ ដើម្បីជួបជាមួយរាស្ត្ររបស់ព្រះអម្ចាស់នៅទីក្រុង យេរ៉ូសាឡិមថ្មី ដែលក៏នឹងត្រូវបានហៅថា ទីក្រុង ស៊ីយ៉ូន ដែរ ( សូមអាន ម៉ូសេ ៧:៦២–៦៤ ) ។ ព្យាការីទាំងអស់បានទន្ទឹងរង់ចាំថ្ងៃនោះ ។ ដោយសារតែអំពើទុច្ចរិតនៃប្រជាជនដែលរស់នៅលើផែនដី ទើបថ្ងៃនោះមិនទាន់បានមកដល់នៅឡើយទេ ទោះជាយ៉ាងណាក៏ដោយ បុរសដ៏បរិសុទ្ធជាច្រើនដែលបានទន្ទឹងរង់ចាំថ្ងៃនោះ នឹងបានឃើញថ្ងៃនោះជាប្រាកដ ។

សូមអាន គោលលទ្ធិ និង សេចក្ដីសញ្ញា ៤៥:១៥ ។ បន្ទាប់មកសូមមើលត្រឡប់ទៅ គោលលទ្ធិ និង សេចក្តីសញ្ញា ៤៥:១–១៤ រួចពិចារណាអំពីតួនាទី ឬ លក្ខណៈសម្បត្តិរបស់ព្រះអង្គសង្គ្រោះ ដែលជួយអ្នកឲ្យមានបំណងស្ដាប់តាមទ្រង់ ។ សូមពន្យល់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីមូលហេតុដែលតួនាទី ឬ លក្ខណៈសម្បត្តិរបស់ព្រះអង្គសង្គ្រោះនោះ ជួយអ្នកឲ្យមានបំណងស្ដាប់តាមទ្រង់ ។

គោលការណ៍មួយ ដែលអ្នកអាចរៀនចេញពីខគម្ពីរទាំងនេះនៅក្នុង គោលលទ្ធិ និង សេចក្ដីសញ្ញា ៤៥ គឺថា ការរៀនអំពីព្រះអង្គសង្គ្រោះ និង អំពីអ្វីដែលទ្រង់បានធ្វើសម្រាប់យើង អាចបង្កើនបំណងប្រាថា្នយើងឲ្យស្ដាប់តាមទ្រង់ ។ ព្រះអម្ចាស់បានណែនាំអំពីព្រះអង្គទ្រង់ ហើយបានអញ្ជើញពួកបរិសុទ្ធឲ្យស្ដាប់តាមទ្រង់ ដោយសារតែមានភាពសំខាន់នៅក្នុងខគម្ពីរដែលនៅសល់ទាំងប៉ុន្មាននៅក្នុង គោលលទ្ធិ និង សេចក្តីសញ្ញា ៤៥ ។

សូមអាន គោលលទ្ធិ និង សេចក្តីសញ្ញា ៤៥:១៥–១៦ដោយស្វែងរកអ្វី ដែលព្រះអម្ចាស់បានមានព្រះបន្ទូលប្រាប់ថា ទ្រង់នឹងថ្លែង ហើយព្យាករ ។ តើអ្នកអាចរៀបចំខ្លួនអ្នកយ៉ាងដូចម្ដេច ដើម្បីស្ដាប់តាមព្រះបន្ទូលរបស់ព្រះអម្ចាស់ នៅពេលអ្នកសិក្សាខគម្ពីរដែលនៅសល់ទាំងប៉ុន្មាននៅក្នុង គោលលទ្ធិ និង សេចក្តីសញ្ញា ៤៥ ដែលមាននៅក្នុងមេរៀនបន្ទាប់ ?

សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា គោលលទ្ធិ និង សេចក្តីសញ្ញា ៤៥:១-១៥ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖