មេរៀនទី ១៧ ៖ ថ្ងៃទី ៤
គោលលទ្ធិ និង សេចក្តីសញ្ញា ៨២-៨៣
បុព្វកថា
វិវរណៈដែលមាននៅក្នុង គោលលទ្ធិ និង សេចក្តីសញ្ញា ៨២ ត្រូវបានទទួលនៅថ្ងៃទី ២៦ ខែ មេសា ឆ្នាំ ១៨៣២ អំឡុងការប្រជុំក្រុមប្រឹក្សាពួកសង្ឃជាន់ខ្ពស់ និង ពួកអែលឌើរនៃសាសនាចក្រនៅក្រុង អ៊ីនឌីប៉ែនដែនស៍ ឃុំចាកសុន រដ្ឋ មិសសួរី ។ នៅក្នុងវិវរណៈនេះ ព្រះអម្ចាស់បានអត់ទោសដល់ពួកបងប្អូនប្រុស ពីកំហុសរបស់ពួកគាត់ ហើយបានព្រមានពួកគាត់កុំឲ្យប្រព្រឹត្តបាបបន្តទៀត ។ ព្រះអម្ចាស់ក៏បានណែនាំពួកបងប្អូនប្រុសទាំងនេះនៅរដ្ឋ មិសសួរី ផងដែរ ស្ដីពីរបៀបគ្រប់គ្រងកិច្ចការអាណាចក្រនៃទីក្រុង ស៊ីយ៉ូន ។ បួនថ្ងៃក្រោយមក ព្យាការី យ៉ូសែប ស៊្មីធ បានទទួលវិវរណៈ ដែលមានកត់ត្រានៅក្នុង គោលលទ្ធិ និង សេចក្តីសញ្ញា ៨៣ជាវិវរណៈដែលព្រះអម្ចាស់បានណែនាំ ដល់ថ្នាក់ដឹកនាំសាសនាចក្រស្ដីពីរបៀបមើលថែស្រីមេម៉ាយ និង កូនកំព្រា ។
គោលលទ្ធិ និង សេចក្តីសញ្ញា ៨២:១-៧
ព្រះអម្ចាស់ព្រមានដល់អ្នកទាំងឡាយណា ដែលទទួលបានច្រើនពីទ្រង់
សូមគិតអំពីគ្រាដែលអ្នកបានមានការខ្វែងគំនិតជាមួយមិត្តភក្ដិ ឬ សមាជិកគ្រួសារ ដែលនៅទីបំផុតត្រូវបានដោះស្រាយ ។ តើអ្នកបានមានអារម្មណ៍ដូចម្ដេច បន្ទាប់ពីបានដោះស្រាយការខ្វែងគំនិតនោះហើយ ?
អស់រយៈពេលបីបួនខែ អារម្មណ៍គ្រោតគ្រាតកើតឡើងរវាង ស៊ីឌនី រិកដុន នៅរដ្ឋ អូហៃអូ និង ប៊ីស្សព អែតវឺត ប៉ាទ្រិច នៅរដ្ឋ មិសសួរី ។ ក្នុងខែ មេសា ឆ្នាំ ១៨៣២ ព្យាការី យ៉ូសែប ស៊្មីធ និង ថ្នាក់ដឹកនាំដទៃទៀតនៃសាសនាចក្រ បានធ្វើដំណើរទៅកាន់រដ្ឋ មិសសួរី ដើម្បីគោរពប្រតិបត្តិតាមការបញ្ជារបស់ព្រះអម្ចាស់ថា ពួកលោកត្រូវ « អង្គុយប្រឹក្សាជាមួយពួកបរិសុទ្ធ ដែលនៅក្រុងស៊ីយ៉ូន » ( គ. និង ស. ៧៨:៩ ) ។ កាលពួកលោកបានធ្វើដំណើរទៅដល់ នោះការប្រជុំក្រុមប្រឹក្សានៃពួកសង្ឃជាន់ខ្ពស់ និង ពួកអែលឌើរនៃសាសនាចក្រ ត្រូវបានធ្វើឡើង ។ នៅចន្លោះសម័យប្រជុំពេលព្រឹក និង ពេលរសៀលនៃសន្និសីទ ស៊ីឌនី រិកដុន និង អែតវឺត ប៉ាទ្រិច បានដោះស្រាយការខ្វែងគំនិតរបស់ពួកគាត់ ។ វិវរណៈនៅក្នុង គោលលទ្ធិ និង សេចក្ដីសញ្ញា ៨២ ត្រូវបានទទួលនៅអំឡុងសម័យប្រជុំពេលរសៀល ។
សូមអាន គោលលទ្ធិ និង សេចក្តីសញ្ញា ៨២:១ដោយស្វែងរកអ្វី ដែលព្រះអម្ចាស់បានមានព្រះបន្ទូលប្រាប់ ស៊ីឌនី រិកដុន និង វិល្លាម ប៉ាទ្រិច អំពីការដោះស្រាយការខ្វែងគំនិតរបស់ពួកគាត់ ។
ដោយផ្អែកទៅលើអ្វី ដែលអ្នករៀននៅក្នុង ខទី ១សូមបំពេញគោលការណ៍ដូចតទៅនេះ ដែលប្រាប់អំពីទំនាក់ទំនងរវាងការអត់ទោសដល់មនុស្សទូទៅ និង ការទទួលបានការអត់ទោសពីព្រះអម្ចាស់ ៖ គឺជាផ្នែកមួយដ៏ចាំបាច់នៃការទទួលបានការអត់ទោស ពីព្រះអម្ចាស់ចំពោះអំពើបាបរបស់យើង ។ ( សូមប្រៀបធៀបទៅនឹង គ. និង ស. ៦៤:៩-១១ ) ។
ទោះជាព្រះអម្ចាស់បានប្រទានការអត់ទោសនៅពេលនេះក្ដី ក៏ទ្រង់បានប្រទានការព្រមានមួយដល់ពួកគាត់ផងដែរ ។ សូមអាន គោលលទ្ធិ និង សេចក្តីសញ្ញា ៨២:២ដោយស្វែងរកការព្រមាន ដែលព្រះអម្ចាស់បានប្រទានដល់ពួកបរិសុទ្ធទាំងនេះ ។
នៅពេលសមាជិកសាសនាចក្របានផ្លាស់ទីលំនៅទៅកាន់រដ្ឋ មិសសួរី ពួកគាត់ជាច្រើននាក់ពុំបានគោរពប្រតិបត្តិតាមដំបូន្មានរបស់ថ្នាក់ដឹកនាំនៃសាសនាចក្រឡើយ ហើយខ្លះទៀតបានបដិសេធមិនរស់នៅតាមក្រឹត្យវិន័យនៃការថ្វាយ ។ ជាលទ្ធផល សមាជិកសាសនាចក្រទាំងនោះមួយចំនួន បានធ្វើកំហុសដោយសេចក្ដីច្រណែន លោភៈ និង មិនព្រមបំពេញករណីយកិច្ចរបស់ខ្លួន ។
សូមអាន គោលលទ្ធិ និង សេចក្តីសញ្ញា ៨២:៣–៤ដោយស្វែងរកមូលហេតុ ដែលសេចក្ដីជំនុំជម្រះរបស់ព្រះអម្ចាស់ នឹងធ្លាក់ទៅលើអស់អ្នកដែលបន្តប្រព្រឹត្តបាប ។
-
សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក នូវគោលការណ៍មួយ ដែលព្រះអម្ចាស់បានបង្រៀននៅក្នុង គោលលទ្ធិ និង សេចក្ដីសញ្ញា ៨២:៣ ។ បន្ទាប់មក សូមឆ្លើយសំណួរដូចតទៅនេះ ៖ តើអ្នកគិតថា ហេតុអ្វីបានជាអ្នកទាំងឡាយដែលបានទទួលច្រើនពីព្រះអម្ចាស់ ក៏នឹងត្រូវទាមទារជាច្រើនវិញដែរ ?
-
-
តើអ្នកគិតថា ព្រះអម្ចាស់មានព្រះទ័យរំពឹងឲ្យអ្នកធ្វើដូចម្ដេច ជាមួយនឹងពរជ័យនេះ ? ( ឧទាហរណ៍ បើអ្នកទទួលស្គាល់ថាអ្នកត្រូវបានប្រទានពរឲ្យមានសេចក្ដីពិតនៃដំណឹងល្អនៅក្នុងជីវិតអ្នក ការរំពឹងទុកមួយអាចជា ការដែលអ្នកចែកចាយសេចក្ដីពិតទាំងនេះជាមួយមនុស្សទូទៅ ) ។
-
តើអ្នកអាចចាប់ផ្ដើមធ្វើអ្វីខ្លះ ដើម្បីបំពេញតាមការរំពឹងទុកនោះ ?
-
នៅក្នុង គោលលទ្ធិ និង សេចក្តីសញ្ញា ៨២:៥–៦ព្រះអម្ចាស់បានព្រមានពួកបរិសុទ្ធថា អាណាចក្រ និង អំណាចរបស់សាតាំងនៅលើផែនដីនេះ កំពុងតែពង្រីកឡើង ។ សូមអាន គោលលទ្ធិ និង សេចក្តីសញ្ញា ៨២:៧ដោយស្វែងរកការព្រមានបន្ថែម ដែលព្រះអម្ចាស់បានប្រទានឲ្យដល់សមាជិកនៃសាសនាចក្រទាំងនេះ ស្ដីពីអំពើបាប ។ យើងរៀនចេញពីខគម្ពីរនេះថា វាចាំបាច់ដែលត្រូវរលាស់ចោលអំពើបាបទាំងឡាយរបស់យើង ព្រោះបើយើងប្រព្រឹត្តបាបម្ដងទៀតបន្ទាប់ពីបានប្រែចិត្តហើយ នោះអំពើបាបពីដើមរបស់យើង នឹងវិលមកវិញ ។
-
គោលលទ្ធិ និង សេចក្តីសញ្ញា ៨២:៨-២៤
ព្រះអម្ចាស់បញ្ជាបុរសប្រាំបួននាក់ ឲ្យបង្កើតសហគ្រាសមួយដើម្បីគ្រប់គ្រង កិច្ចការអាណាចក្រនៃសាសនាចក្រ
សូមគិតអំពីស្ថានភាពមួយនៅពេលដែលអ្នក ឬ មនុស្សម្នាក់ដែលអ្នកស្គាល់ ត្រូវការឲ្យគេអះអាងថា ព្រះរក្សាការសន្យារបស់ទ្រង់ ។ អំឡុងពេលការប្រជុំក្រុមប្រឹក្សាពួកសង្ឃជាន់ខ្ពស់ និង ពួកអែលឌើរនៅរដ្ឋ មិសសួរី នោះព្រះអម្ចាស់បានប្រទានការសន្យាអះអាងដល់អ្នកទាំងឡាយ ដែលគោរពប្រតិបត្តិតាមព្រះបញ្ញត្តិទ្រង់ ។ នៅពេលអ្នកបន្តការសិក្សាអំពី គោលលទ្ធិ និង សេចក្តីសញ្ញា ៨២សូមស្វែងរកគោលការណ៍នានា ដែលអាចផ្ដល់ការអះអាងទៅដល់មនុស្សម្នាក់ ដែលស្ថិតនៅក្នុងស្ថានភាព ដូចដែលអ្នកបានគិតខាងលើនេះ ។
សូមអាន គោលលទ្ធិ និង សេចក្តីសញ្ញា ៨២:៨–៩ដោយស្វែងរកអ្វី ដែលព្រះអម្ចាស់បានមានព្រះបន្ទូលប្រាប់នៅក្នុងការប្រជុំក្រុមប្រឹក្សានេះ ថាទ្រង់នឹងប្រទាន ។ អ្នកអាចនឹងចង់គូសចំណាំ មូលហេតុដែលព្រះអម្ចាស់ប្រទានព្រះបញ្ញត្តិថ្មីនេះដល់ពួកគាត់ ។ សូមពិចារណាថាតើមូលហេតុទាំងនេះ អាចអនុវត្តចំពោះរាល់ព្រះបញ្ញត្តិដែលព្រះអម្ចាស់បានប្រទានដល់យើងយ៉ាងដូចម្ដេច ។
-
-
សូមបញ្ចប់គោលការណ៍ដូចតទៅនេះ ៖ បើយើងគោរពប្រតិបត្តិតាមព្រះអម្ចាស់ នោះទ្រង់នឹង …
-
សូមពិចារណាអំពីបទពិសោធន៍នានា ដែលអ្នកបានមាន ដែលបង្ហាញថាគោលការណ៍នេះពិត រួចសរសេរអំពីបទពិសោធន៍មួយក្នុងចំណោមបទពិសោធន៍ទាំងនោះ ។
-
នៅពេលអ្នកបានរៀននៅក្នុង គោលលទ្ធិ និង សេចក្តីសញ្ញា ៧៨ព្រះអម្ចាស់បានបញ្ជាថ្នាក់ដឹកនាំសាសនាចក្រនៅទីក្រុង ខឺតឡង់ រដ្ឋ អូហៃអូ ឲ្យបង្កើតសហគ្រាសមួយ ដែលជាសមាគមការងារសាសនាចក្រ ត្រូវបានស្គាល់ថាជា សហគ្រាសសាមគ្គីភាព ។ ធនធានដែលបានមកពីប្រតិបត្តិការការងារនៃសហគ្រាសនេះ ត្រូវប្រើប្រាស់ដើម្បីមើលថែមនុស្សទាល់ក្រ ហើយធ្វើហិរញ្ញប្បទានសម្រាប់សេចក្ដីត្រូវការទាំងឡាយរបស់សាសនាចក្រ ។ ដូចមានកត់ត្រានៅក្នុង គោលលទ្ធិ និង សេចក្តីសញ្ញា ៨២:១១, ១៥–១៧ព្រះអម្ចាស់បានបញ្ជាថ្នាក់ដឹកនាំសាសនាចក្រនៅរដ្ឋ មិសសួរី ឲ្យចូលរួមក្នុងសហគ្រាសសាមគ្គីភាពនេះ ដោយសេចក្ដីសញ្ញា ។
សូមអាន គោលលទ្ធិ និង សេចក្តីសញ្ញា ៨២:១២ដោយស្វែងរកគោលបំណងនៃសហគ្រាសសាមគ្គីភាពនេះ ។ នៅពេលអ្នកអាន វាអាចនឹងជួយអ្នកឲ្យនឹកឃើញថា កណីយកិច្ចមួយរបស់ប៊ីស្សព គឺត្រូវជួយបំពេញសេចក្ដីត្រូវការខាងសាច់ឈាមនៃសមាជិកសាសនាចក្រ ។
សូមអាន គោលលទ្ធិ និង សេចក្តីសញ្ញា ៨២:១៤, ១៨–១៩ដោយស្វែងរកពាក្យ និង ឃ្លាដែលពន្យល់បន្ថែមអំពីមូលហេតុ ដែលព្រះអម្ចាស់បានបញ្ជាថ្នាក់ដឹកនាំសាសនាចក្រ ឲ្យបង្កើតសហគ្រាសរួបរួមឡើង ។ អ្នកអាចនឹងចង់គូសចំណាំពាក្យ ឬ ឃ្លាដែលអ្នករកឃើញ ។
ដូចមានកត់ត្រានៅក្នុង គោលលទ្ធិ និង សេចក្តីសញ្ញា ៨២:២០–២៤ព្រះអម្ចាស់បានបញ្ចប់វិវរណៈនេះ ដោយការព្រមានថ្នាក់ដឹកនាំសាសនាចក្រឲ្យមានចិត្តស្មោះត្រង់ចំពោះសេចក្ដីសញ្ញា ដែលពួកគាត់បានធ្វើក្នុងនាមជាសមាជិកនៃសហគ្រាសសាមគ្គីភាព ។
ចំណេះចំណានខគម្ពីរ—គោលលទ្ធិ និង សេចក្តីសញ្ញា ៨២:១០
គោលលទ្ធិ និង សេចក្ដីសញ្ញា ៨២:១០ គឺជាវគ្គចំណេះចំណានខគម្ពីរ ។ សូមព្យាយាមទន្ទេញវា ដោយការសូត្រម្ដងហើយម្ដងទៀតចំនួនបីបួនដង ។ បន្ទាប់ពីអ្នកបានទន្ទេញវាចាំហើយ សូមសូត្រវាឲ្យសមាជិកគ្រួសារ ឬ មិត្តភក្ដិស្ដាប់ ហើយចែកចាយអំពីអ្វីដែលអ្នកបានមានបទពិសោធន៍ ដែលបានបញ្ជាក់ប្រាប់ដល់អ្នកថា ព្រះអម្ចាស់ពិតជារក្សាការសន្យារបស់ទ្រង់ចំពោះយើង នៅពេលយើងធ្វើតាមអ្វីដែលទ្រង់បញ្ជា ។
-
គោលលទ្ធិ និង សេចក្តីសញ្ញា ៨៣
ព្រះអម្ចាស់បើកសម្ដែងរបៀប ដែលត្រូវមើលថែដល់ស្រីមេម៉ាយ និង កូនកំព្រា
បួនថ្ងៃបន្ទាប់ពីបានទទួលវិវរណៈនៅក្នុង គោលលទ្ធិ និង សេចក្តីសញ្ញា ៨២ព្យាការី យ៉ូសែប ស៊្មីធ បានទទួលវិវរណៈអំពីរបៀបបំពេញសេចក្ដីត្រូវការខាងសាច់ឈាមរបស់ពួកបរិសុទ្ធ ។ សូមអាន គោលលទ្ធិ និង សេចក្តីសញ្ញា ៨៣:១ដោយស្វែងរកថាតើវិវរណៈនេះ សំដៅទៅលើសេចក្ដីត្រូវការរបស់នរណា ។
ដើម្បីយល់អំពីកណ្ឌនេះ សូមរំឭកថា ពួកបរិសុទ្ធជាច្រើនបានរស់នៅតាមក្រឹត្យវិន័យនៃការថ្វាយ ហើយបានទទួល « កេរមរតក » ឬ ទ្រព្យសម្បត្តិពីសាសនាចក្រ ។ នៅក្នុងវិវរណៈនេះ ព្រះអម្ចាស់បានបើកសម្ដែងអ្វីដែលនឹងកើតឡើងចំពោះកេរមរតកគ្រួសារ បើស្វាមី ឬ ឪពុកបានទទួលមរណភាព ។
សូមអាន គោលលទ្ធិ និង សេចក្តីសញ្ញា ៨៣:២-៣ដោយស្វែងរកសេចក្ដីណែនាំពីព្រះអម្ចាស់ អំពីការមើលថែដល់ស្ត្រី ដែលស្វាមីរបស់ពួកគេបានស្លាប់ ។ ( វាអាចនឹងជួយអ្នក ក្នុងការដឹងថា នៅពេលនោះ ស្ត្រីភាគច្រើនពឹងផ្អែកទៅលើការផ្គត់ផ្គង់ខាងសាច់ឈាមពីស្វាមីរបស់ខ្លួន ។ « ត្រូវបានទទួលការរាប់អាននៅក្នុងសាសនាចក្រ » មានន័យថា ដោយសារតែអ្នកផ្គត់ផ្គង់របស់ភរិយាបានស្លាប់ទៅហើយនោះ សាសនាចក្រនឹងបំពេញសេចក្ដីត្រូវការរបស់នាង ) ។ រួចសូមអាន គោលលទ្ធិ និង សេចក្តីសញ្ញា ៨៣:៤–៦ដោយស្វែងរករបៀប ដែលសាសនាចក្រមើលថែកូនកំព្រា និង ស្រីមេម៉ាយ ។
-
-
ខ្ញុំបានសិក្សា គោលលទ្ធិ និង សេចក្តីសញ្ញា ៨២-៨៣ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖