គោលលទ្ធិ និង សេចក្តីសញ្ញា ២៨

បុព្វកថា

នៅចន្លោះខែ មេសា និង ខែ កញ្ញា ឆ្នាំ ១៨៣០ សមាជិកសាសនាចក្រមួយចំនួនបានយល់ច្រឡំអំពីគោលការណ៍ទាំងឡាយ ដែលគ្រប់គ្រងវិវរណៈក្នុងសាសនាចក្រ ។ ការយល់ច្រឡំទាំងនេះ បានបង្កើតបានជាឧបសគ្គចំពោះព្យាការី យ៉ូសែប ស៊្មីធ ។ ក្នុងវិវរណៈដែលមាននៅក្នុង គោលលទ្ធិ និង សេចក្តីសញ្ញា ២៨ ព្រះអម្ចាស់បានបើកសម្ដែងសេចក្ដីពិត ដែលបានផ្ដល់ជាដំណោះស្រាយចំពោះឧបសគ្គទាំងនោះ ។

គោលលទ្ធិ និង សេចក្ដីសញ្ញា ២៨:១-៧

ព្រះអម្ចាស់ពន្យល់ថា វិវរណៈដើម្បីគ្រប់គ្រងលើសាសនាចក្រទ្រង់ គឺត្រូវបានប្រទានតាមរយៈព្យាការីរបស់ទ្រង់ដែលបានតែងតាំង ។

មានឧទាហរណ៍ជាច្រើននៅលើលោកនេះអំពីការណ៍ដែលក្លែងត្រាប់តាមការណ៍ទាំងឡាយដែលត្រឹមត្រូវ ពិតប្រាកដ និង ប្រសើរជាង ។ តើនៅពេលណា ដែលវាអាចនឹងធ្វើឲ្យមានការខូចខាត ក្នុងការដែលធ្វើកំហុសតាមការណ៍ក្លែងក្លាយ ដោយយល់ថាវាជាអ្វីដែលពិតនោះ ?

ភាពក្លែងក្លាយខាងវិញ្ញាណគឺជាគ្រោះថ្នាក់ដ៏កាចសាហាវមួយ ។ អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ បានព្រមានថា ៖ « អារក្សគឺជាបិតានៃសេចក្ដីកុហក ហើយវាអន្ទះអន្ទែងក្នុងការធ្វើឲ្យកិច្ចការរបស់ព្រះមានភាពស្មុគស្មាញ ដោយភាពក្លែងក្លាយដ៏ឈ្លាសវៃរបស់វា » ( Two Lines of Communication,” Ensignឬ លីអាហូណាខែ វិច្ឆិកា ឆ្នាំ ២០១០ ទំព័រ ៨៤ ) ។

សូមអានសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ២៨ នៅក្នុងព្រះគម្ពីររបស់អ្នក ។ នៅពេលអ្នកអាន សូមស្វែងរកភាពក្លែងក្លាយដែលសាតាំងបានប្រើ ដើម្បីបញ្ឆោតសមាជិកមួយចំនួននៅជំនាន់ដំបូងនៃសាសនាចក្រ ។ អ្នកអាចនឹងចង់គូសចំណាំនូវអ្វីដែលអ្នករកឃើញ ។

ដោយសារតែហាក់បីដូចជាឃើញមានភាពស្រដៀងគ្នារវាងការប្រកាសរបស់ ហៃរាំ ភេច អំពីការទទួលបានវិវរណៈតាមរយៈត្បូង និងរបៀបដែលពួកគេបានគិតថា ព្រះបានបើកសម្ដែងសេចក្ដីពិតទៅដល់ព្យាការី យ៉ូសែប ស៊្មីធ នោះសមាជិកសាសនាចក្រ រួមបញ្ចូលទាំង អូលីវើរ ខៅឌើរី ផងដែរនោះ អាចទំនងជាជឿទៅលើវិវរណៈក្លែងក្លាយ ដែលសាតាំងបានបង្ហាញដល់ ហៃរាំ ភេច ។ នៅពេលអ្នកសិក្សាអំពីព្រះបន្ទូលរបស់ព្រះអម្ចាស់មានបន្ទូលទៅកាន់ អូលីវើរ នៅក្នុង គោលលទ្ធិ និង សេចក្តីសញ្ញា ២៨ សូមស្វែងរកសេចក្ដីពិតដ៏មានសារៈសំខាន់ ដែលអាចការពារអ្នកពីការយល់ខុសដោយភាពក្លែងក្លាយ និង ការក្លែងបន្លំរបស់សាតាំង ។

សូមអាន គោលលទ្ធិ និង សេចក្តីសញ្ញា ២៨:១-៥ ។ សេចក្ដីពិតដ៏មានសារៈសំខាន់ ដែលយើងរៀនគឺថា ប្រធាននៃសាសនាចក្រ គឺជាបុគ្គលតែម្នាក់គត់ ដែលអាចទទួលបានវិវរណៈសម្រាប់សាសនាចក្រទាំងមូល ។ អ្នកអាចនឹងចង់សរសេរគោលការណ៍នេះ ក្បែរខគម្ពីរទាំងនេះនៅលើគែមនៃព្រះគម្ពីររបស់អ្នក ។

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរខាងក្រោមនេះ ៖
1. តើការស្គាល់ពីគោលការណ៍នេះ អាចជួយសមាជិកសាសនាចក្រ ចៀសឲ្យផុតពីការបំភាន់បានយ៉ាងដូចម្ដេច ?
2. តើមានភាពខុសគ្នាដូចម្ដេចខ្លះ រវាងការទទួលខុសត្រូវរបស់ អូលីវើរ ខៅឌើរី ក្នុងនាមជាអែលឌើរទីពីរក្នុងសាសនាចក្រ និង ការទទួលខុសត្រូវរបស់ យ៉ូសែប ស៊្មីធ ក្នុងនាមជាប្រធាននៃសាសនាចក្រ ?

មិនយូរប៉ុន្មានពីមុនព្រះអម្ចាស់បានប្រទានវិវរណៈដែលមាននៅក្នុង គោលលទ្ធិ និង សេចក្តីសញ្ញា ២៨ មានការណ៍មួយបានកើតឡើង ដែលបង្ហាញពីការដែល អូលីវើរ ខៅឌើរី ពុំបានយល់ច្បាស់អំពីភាពខុសគ្នារវាងការទទួលខុសត្រូវរបស់គាត់នៅក្នុងសាសនាចក្រ និង តួនាទីរបស់ យ៉ូសែប ស៊្មីធ ក្នុងនាមជាព្យាការី និង ជាប្រធាននៃសាសនាចក្រ ។

កាលកំពុងរស់នៅ ភូមិហារម៉ូនី រដ្ឋផែនសីលវេញ៉ា យ៉ូសែប ស៊្មីធ បានទទួលសំបុត្រមួយច្បាប់ពី អូលីវើរ ខៅឌើរី ដែលរស់នៅ ភូមិហ្វាយែត រដ្ឋនូវ យ៉ោក ។ ព្យាការីបានកត់ត្រាថា ៖

« គាត់បានសរសេរមកប្រាប់ខ្ញុំថា គាត់បានឃើញថាមានភាពខុសឆ្គងមួយនៅក្នុងព្រះបញ្ញត្តិ [ ក្នុងវិវរណៈដែលសព្វថ្ងៃនេះមានចែងនៅក្នុង គោលលទ្ធិ និង សេចក្ដីសញ្ញា កណ្ឌទី ២០] ហើយបានបន្ថែមថា ៖ ‹ ខ្ញុំបញ្ជាលោកនៅក្នុងព្រះនាមនៃព្រះ ឲ្យលុបពាក្យពេចន៍ទាំងនោះចេញ ដើម្បីកុំឲ្យមានឧបាយកល្បផ្នែកសង្ឃកើតមានឡើងក្នុងចំណោមពួកយើង ! ›

« រំពេចនោះ ខ្ញុំបានសរសេរតបទៅគាត់វិញ ដោយបានសួរគាត់ថាតាមរយៈសិទ្ធិអំណាចអ្វី ដែលគាត់បានលើកដាក់នៅលើខ្លួន ដើម្បីបញ្ជាខ្ញុំឲ្យកែប្រែ ឬ លុបចោល បន្ថែម ឬ បន្ថយ ចេញពីវិវរណៈ ឬ ព្រះបញ្ញត្តិដែលទទួលបានពីព្រះដ៏មានគ្រប់ព្រះចេស្ដាយ៉ាងដូច្នេះ ។

« ប៉ុន្មានថ្ងៃក្រោយមក ខ្ញុំបានទៅជួបគាត់ និង ក្រុមគ្រួសាររបស់លោក វិតមើរ ហើយខ្ញុំបានឃើញគ្រួសារនោះកំពុងមានគំនិតព្រួយបារម្ភចំពោះពាក្យពេចន៍ទាំងនោះ… ហើយវាមិនមែនជាការប្រឹងប្រែងដ៏តិចតួច និង មិនសូវស្វិតស្វាញក្នុងការបញ្ចុះបញ្ចូលពួកគេ ឲ្យយល់ឲ្យបានច្បាស់ទៅលើប្រធានបទនេះនោះទេ ។ ទោះជាយ៉ាងណាក៏ដោយ…នៅទីបំផុត… ខ្ញុំសម្រេចបានជោគជ័យមិនត្រឹមតែជាមួយក្រុមគ្រួសារ វិតមើរ នោះទេ គឺថែមទាំងធ្វើឲ្យ អូលីវើរ ខៅឌើរី ទទួលស្គាល់ថា ពួកគេពិតជាមានគំនិតខុសឆ្គងប្រាកដមែន » ( នៅក្នុង History of the Church ១:១០៥ ) ។

សូមអាន គោលលទ្ធិ និង សេចក្តីសញ្ញា ២៨:៦-៧ រួចស្វែងរកការណែនាំ ដែលព្រះអម្ចាស់បានប្រទានដល់ អូលីវើរ ខៅឌើរី ។ ខទី ៦ ជួយយើងឲ្យយល់ថា នៅក្នុងសាសនាចក្រនៃព្រះយេស៊ូវគ្រីស្ទ សមាជិកម្នាក់ៗ ពុំទទួលបានវិវរណៈ ដើម្បីណែនាំដល់នរណាម្នាក់ដែលធ្វើជាអធិបតីលើពួកគេឡើយ ។

ព្យាការី យ៉ូសែប ស៊្មីធ បានបង្រៀនថា ៖ « វាមានសភាពខុសស្រឡះពីរបៀបរបស់ព្រះចំពោះសមាជិកសាសនាចក្រ ឬ មនុស្សគ្រប់គ្នា ដើម្បីទទួលបានការណែនាំសម្រាប់អ្នកដែលមានសិទ្ធិអំណាច ដែលមានតំណែងខ្ពស់ជាងខ្លួន ហេតុដូច្នេះហើយ អ្នកនឹងឃើញមានភាពខុសឆ្គងក្នុងការស្ដាប់តាមបង្គាប់ពួកលោក ប៉ុន្តែ ប្រសិនបើបុគ្គលណាម្នាក់មានការនិមិត្ត ឬ ការយាងមកជួបរបស់សារទូតពីសា្ថនសួគ៌ វាត្រូវតែជាប្រយោជន៍ និង សេចក្ដីណែនាំសម្រាប់ខ្លួនគេផ្ទាល់ ដ្បិត គោលការណ៍គ្រឹះ ការគ្រប់គ្រង និង គោលលទ្ធិនៃសាសនាចក្រ ត្រូវបានប្រទានឲ្យនៅក្នុងកូនសោទាំងឡាយនៃនគរស្រេចទៅហើយ » (ការបង្រៀនរបស់ប្រធានសាសនាចក្រ ៖ យ៉ូសែប ស្ម៊ីធ [ ឆ្នាំ ២០០៧ ] ទំព័រ ១៩៧–៩៨) ។

សូមឆ្លើយសំណួរដូចតទៅនេះដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖ តើការយល់ដឹង និង ការធ្វើតាមគោលការណ៍ទាំងឡាយនៃការគ្រប់គ្រងការទទួលបានវិវរណៈនៅក្នុងសាសនាចក្រ ជួយអ្នកឲ្យទ្រទ្រង់ ហើយគាំទ្រថ្នាក់ដឹកនាំសាសនាចក្ររបស់យើងយ៉ាងដូចម្ដេច ?

គោលលទ្ធិ និង សេចក្ដីសញ្ញា ២៨:៨-១០

ព្រះអម្ចាស់ត្រាស់ហៅ អូលីវើរ ខៅឌើរី ឲ្យផ្សព្វផ្សាយដំណឹងល្អទៅកាន់ពួកសាសន៍លេមិន

សូមមើលទៅតួនាទី និង ការហៅដែលមាននៅក្នុងបញ្ជីខាងក្រោម រួចគូសរង្វង់លើអ្នកទាំងឡាយណា ដែលអ្នកគិតថាមានសិទ្ធិទទួលបានវិវរណៈដើម្បីជួយពួកគេបំពេញការទទួលខុសត្រូវរបស់ខ្លួន ។

ឪពុកម្ដាយ	អ្នកមានសិទ្ធិអំណាចទូទៅ	គ្រូបង្រៀន ឬ សួរសុខទុក្ខតាមផ្ទះ	ប៊ីស្សព ឬ ប្រធានសាខា
គ្រូបង្រៀនថ្នាក់សាលាថ្ងៃអាទិត្យ	អ្នកផ្សព្វផ្សាយសាសនា	ប្រធានកូរ៉ុមគ្រូ ឬ ម៉ៃម៉េត	ប្រធានសមាគមសង្រ្គោះ

យើងអាចស្វែងយល់អំពីបុគ្គល ដែលមានសិទ្ធិទទួលបានវិវរណៈ ដើម្បីជួយក្នុងការបំពេញការទទួលខុសត្រូវខ្លួនចេញពីអ្វីដែលព្រះអម្ចាស់បានមានព្រះបន្ទូលប្រាប់ អូលីវើរ ខៅឌើរី នៅក្នុង គោលលទ្ធិ និង សេចក្តីសញ្ញា ២៨:៨–១០ ។ សូមអានខគម្ពីរទាំងនេះ រួចស្វែងរកការណ៍ដែលព្រះអម្ចាស់បានត្រាស់ហៅ អូលីវើរ ឲ្យធ្វើ ។

នៅក្នុងព្រះគម្ពីរមរមរន វាក្យសព្ទ ពួកសាសន៍លេមិន សំដៅទៅលើក្រុមមនុស្សដ៏ជាក់លាក់មួយក្រុម ដែលមួយចំនួនជាប់ខ្សែស្រឡាយរបស់លេមិន ដែលជាកូនប្រុសច្បងរបស់លីហៃ ។ វាក្យសព្ទ ពួកសាសន៍លេមិន នៅក្នុង គោលលទ្ធិ និង សេចក្តីសញ្ញា ២៨:៨ សំដៅទៅលើពួកអាមេរិកាំងជនជាតិដើម ដែលរស់នៅលើព្រំដែនប៉ែកបច្ចឹមនៃសហរដ្ឋ ដែលមួយចំនួនអាចជាប់ខ្សែស្រឡាយរបស់ប្រជាជននៅក្នុងព្រះគម្ពីរមរមរន ។

សូមគូសចំណាំការសន្យា និង ឱវាទ ដែលព្រះអម្ចាស់បានប្រទានដល់ អូលីវើរ នៅក្នុង គោលលទ្ធិ និង សេចក្តីសញ្ញា ២៨:៨ ដែលនឹងជួយយើងឲ្យស្គាល់បុគ្គល ដែលមានសិទ្ធិទទួលបានវិវរណៈ ដើម្បីជួយពួកគេបំពេញការទទួលខុសត្រូវរបស់ខ្លួន ។

ព្រះអម្ចាស់បានមានព្រះបន្ទូលប្រាប់ អូលីវើរ ខៅឌើរី ថា គាត់អាចទទួលបានវិវរណៈ ដើម្បីជួយខ្លួនគាត់ក្នុងកិច្ចការផ្សព្វផ្សាយសាសនា ។ គោលលទ្ធិ និង សេចក្តីសញ្ញា ២៨:៨ ជួយយើងឲ្យយល់ថា យើងអាចនឹងទទួលបានវិវរណៈសម្រាប់ជាប្រយោជន៍ផ្ទាល់ខ្លួន និង ដើម្បីជួយយើងបំពេញការហៅ និង ការចាត់តាំងដែលបានប្រគល់ដល់យើង ។

អ្នកអាចគូសរង្វង់លើតួនាទី និង ការហៅនីមួយៗ ដែលមាននៅក្នុងបញ្ជី នៅពេលចាប់ផ្ដើមនៃកណ្ឌនេះ ព្រោះបុគ្គលម្នាក់ៗទាំងនោះ មានសិទ្ធិទទួលបានវិវរណៈក្នុងការបំពេញការទទួលខុសត្រូវរៀងៗខ្លួន ។ តើអ្នកគិតថា បុគ្គលទាំងនេះទទួលបានវិរណៈដើម្បីជាគុណប្រយោជន៍សម្រាប់នរណា ? តើការទទួលបានវិវរណៈសម្រាប់បុគ្គលទាំងឡាយណាដែលពួកគេមានការទទួលខុសត្រូវលើនោះ ជួយពួកគេយ៉ាងដូចម្ដេច ?

សូមគិតអំពីរបៀបដែលវិវរណៈអាចជួយអ្នកក្នុងជីវិតផ្ទាល់ខ្លួន ឬ ក្នុងការហៅ ឬ ការចាត់តាំងដែលអ្នកមាននៅក្នុងសាសនាចក្រ ។

ប្រធាន ប៊យដ៏ ឃេ ផាកកឺ ក្នុងកូរ៉ុមនៃពួកសាវកដប់ពីរនាក់ បានព្រមានថា វិវរណៈផ្ទាល់ខ្លួនពុំមែនមានដើម្បីឲ្យបុគ្គលម្នាក់ទទួលបានវិវរណៈ ទៅដឹកនាំបុគ្គលម្នាក់ទៀត ដែលធ្វើជាអធិបតីលើបុគ្គលនោះ ហើយផ្ដល់ដំបូន្មានអំពីវិវរណៈផ្ទាល់ខ្លួនដែលគាត់មាននោះទេ ៖

« វិវរណៈកើតឡើងតាមរបៀបដ៏ត្រឹមត្រូវនៅក្នុងសាសនាចក្រ ។ យើងអាចទទួលបានវិវរណៈផ្ទាល់ខ្លួន ។ ទោះជាយ៉ាងណាក៏ដោយ លើកលែងតែយើងត្រូវបានញែកចេញក្នុងតំណែងជាអធិបតីមួយចំនួន បើមិនដូច្នោះទេ យើងនឹងមិនអាចទទួលបានវិវរណៈចំពោះអ្វីដែលមនុស្សដទៃគួរតែធ្វើឡើយ ។

« វិវរណៈក្នុងសាសនាចក្រ កើតមានដល់អ្នកទាំងឡាយដែលត្រូវបានហៅ បានគាំទ្រ បានតែងតាំង ឬបានញែកចេញដោយត្រឹមត្រូវ ។…

« បទពិសោធន៍ខាងវិញ្ញាណមិនប្រក្រតីមួយ គួរតែពុំត្រូវបានចាត់ទុកថាជាការហៅផ្ទាល់ខ្លួនដើម្បីដឹកនាំមនុស្សដទៃឡើយ ។ វាគឺជាភាពជឿជាក់របស់ខ្ញុំថា បទពិសោធន៍នៃលក្ខណៈសម្បត្តិពិសេស ពិសិដ្ឋ គឺជារឿងផ្ទាល់ខ្លួន ហើយគួរតែត្រូវបានរក្សាទុកសម្រាប់ខ្លួនឯង ។

« ការណ៍មួយចំនួនរំខានដល់ដំណើរការនៃវិវរណៈខ្លាំងបំផុត នៅពេលអ្នកដែលយល់ច្រឡំ ហើយគិតថាពួកគេត្រូវបានរើសឲ្យណែនាំមនុស្សដទៃ កាលពួកគេពុំត្រូវបានរើសទាល់តែសោះនោះ » ( Revelation in a Changing World,” Ensignខែ វិច្ឆិកា ឆ្នាំ ១៩៨៩ ទំព័រ ១៤–១៥ ) ។

គោលលទ្ធិ និង សេចក្ដីសញ្ញា ២៨:១១-១៦

ព្រះអម្ចាស់ណែនាំ អូលីវើរ ខៅឌើរី ឲ្យកែតម្រូវ ហៃរាំ ភេច ហើយជួយផ្សះផ្សាសានាចក្រឡើងវិញ

សូមអានសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ២៨ ឡើងវិញ ។ បន្ទាប់មក សូមអានការណែនាំរបស់ព្រះអម្ចាស់ទៅដល់ អូលីវើរ ខៅឌើរី នៅក្នុង គោលលទ្ធិ និង សេចក្តីសញ្ញា ២៨:១១–១៤ ។ តើ អូលីវើរ ត្រូវបានបញ្ជាឲ្យធ្វើអ្វី ដើម្បីជួយដោះស្រាយបញ្ហាជាមួយ ហៃរាំ ភេច ?

ចេញពី គោលលទ្ធិ និង សេចក្តីសញ្ញា ២៨:១១–១៤ យើងរៀនថា ថ្នាក់ដឹកនាំសាសនាចក្រមានការទទួលខុសត្រូវ ដើម្បីកែតម្រូវអ្នកទាំងឡាយណាដែលកំពុងដឹកនាំមនុស្សដទៃឲ្យដើរផ្លូវខុស ។ សូមកត់ចំណាំឃ្លា « អ្នកត្រូវនាំ ហៃរាំ ភេច ជាបងប្អូនរបស់អ្នក ដោយមានតែអ្នក ហើយនឹងគាត់ » ( គ. និង ស. ២៨:១១ ) ។ ការណ៍នេះបង្រៀនថា ការកែតម្រូវគួរតែត្រូវបានធ្វើឡើងដោយសម្ងាត់ និង ប្រុងប្រយ័ត្ន ។

គោលលទ្ធិ និង សេចក្តីសញ្ញា ២៨:១៣ ក៏បង្រៀនផងដែរថា អ្វីៗគ្រប់យ៉ាងនៅក្នុងសាសនាចក្រនៃព្រះយេស៊ូវគ្រីស្ទ ត្រូវតែធ្វើឡើងដោយមានសណ្ដាប់ធ្នាប់ ។

សូមអាន គោលលទ្ធិ និង សេចក្តីសញ្ញា ២៨:១៥-១៦ ដើម្បីសិក្សាអំពីឱវាទចុងក្រោយ ដែលព្រះអម្ចាស់បានប្រទានដល់ អូលីវើរ ខៅឌើរី ។ មិនយូរប៉ុន្មានបន្ទាប់ពី ព្យាការី យ៉ូសែប ស៊្មីធ បានទទួលវិវរណៈនៅក្នុង គោលលទ្ធិ និង សេចក្តីសញ្ញា ២៨ នោះមានសន្និសីទមួយត្រូវបានរៀបចំឡើង ។ យ៉ូសែប ស៊្មីធ បានសរសេរថា « ប្រធានបទអំពីត្បូងដែលបានលើកឡើងពីដំបូងនោះ ត្រូវបានពិភាក្សា ហើយបន្ទាប់ពីការស្រាវជ្រាវយ៉ាងល្អិតល្អន់ បងប្រុស [ ហៃរាំ ] ភេច ក៏ដូចជាសមាជិកក្នុងសាសនាចក្រទាំងមូលដែលមានវត្តមាន បានប្រកាសបដិសេធត្បូងដែលបាននិយាយដល់នោះ និង ការណ៍គ្រប់យ៉ាងដែលទាក់ទងនឹងវា ដើម្បីជាការស្កប់ចិត្ត និង សុភមង្គលដល់យើង » ( នៅក្នុង History of the Church ១:១១៥ ) ។

ដើម្បីជួយអ្នកអនុវត្តគោលការណ៍ និង គោលលទ្ធិទាំងឡាយដែលបានបង្រៀននៅក្នុង គោលលទ្ធិ និង សេចក្ដីសញ្ញា ២៨ សូមអានសេចក្ដីថ្លែងខាងក្រោមនេះ បន្ទាប់មក សរសេរសេចក្ដីពិតសំខាន់ៗ ដែលអ្នករៀនចេញពីមេរៀននៅថ្ងៃនេះ ដែលអ្នកមានអារម្មណ៍ថាគួរអនុវត្តល្អបំផុត ។ សេចក្ដីពិតទីមួយត្រូវបានឆ្លើយសម្រាប់ជាឧទាហរណ៍ដល់អ្នក ។
1. អ្នកកំពុងរៀបចំដើម្បីឡើងនិយាយក្នុងការប្រជុំសាក្រាម៉ង់ ហើយបានរកឃើញខគម្ពីរ ប្រសាសន៍ដកស្រង់ និង ដំណើររឿងជាច្រើនដែលអ្នកអាចបញ្ចូលទៅក្នុងការឡើងនិយាយរបស់អ្នក ។ អ្នកពុំប្រាកដថាត្រូវប្រើប្រាស់មួយណា ឬ ត្រូវនិយាយអ្វីនោះទេ ។
  
  គោលការណ៍ ៖ យើងអាចនឹងទទួលបានវិវរណៈសម្រាប់ជាប្រយោជន៍ផ្ទាល់ខ្លួន និង ដើម្បីជួយយើងបំពេញការហៅ និង ការចាត់តាំងដែលបានប្រគល់ដល់យើង ។
2. អ្នកទទួលបានសារអេឡិចត្រូនិកមួយ ដែលប្រកាសថាមានព័ត៌មានស្ដីពីការយាងមកជាលើកទីពីររបស់ព្រះយេស៊ូវគ្រីស្ទ ។ ទោះជាយ៉ាងណាក៏ដោយ ព័ត៌មាននោះពុំស្របទៅនឹងការបង្រៀនរបស់ព្យាការីដែលកំពុងរស់នៅឡើយ ។
3. មិត្តភក្ដិម្នាក់មិនសូវសប្បាយចិត្តនឹងប៊ីស្សពរបស់នាង ដែលគាត់ទើបតែបានហៅប្រធានថ្នាក់យុវនារីថ្មីម្នាក់នៅក្នុងវួដរបស់នាង ។ មិត្តភក្ដិរបស់អ្នកមានអារម្មណ៍ថា មនុស្សផ្សេងទៀតគួរតែត្រូវបានហៅឲ្យធ្វើកិច្ចការនេះ ។
4. បងស្រីរបស់អ្នកបានដើរលេងជាគូជាមួយនឹងសមាជិកសាសនាចក្រម្នាក់ ។ គាត់បានប្រាប់នាងថា ក្នុងនាមជាអ្នកកាន់បព្វជិតភាពម្នាក់ គាត់ទទួលបានវិវរណៈថា នាងគួរតែរៀបការជាមួយគាត់ ។ ទោះជាយ៉ាងណាក៏ដោយ នាងបានអធិស្ឋានអំពីការសម្រេចចិត្តនេះ ហើយពុំទាន់បានទទួលចម្លើយច្បាស់លាស់មួយឡើយ ផ្ទុយទៅវិញ នាងមានអារម្មណ៍ថាច្របូកច្របល់ក្នុងចិត្ត និង ត្រូវគេដាក់សម្ពាធលើ ។
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា គោលលទ្ធិ និង សេចក្តីសញ្ញា ២៨ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖