ការពន្លឿនកិច្ចការនៃសេចក្ដីសង្គ្រោះ

បុព្វកថា

តាំងពីការចាប់ផ្ដើមនៃការស្ដារឡើងវិញ កិច្ចការនៃព្រះអម្ចាស់បានពង្រីកទៅទូទាំងពិភពលោក ។ យើងរស់នៅក្នុងជំនាន់មួយ ដែលព្រះអម្ចាស់កំពុងពន្លឿនកិច្ចការរបស់ទ្រង់ ។ អ្នកមានធនធាន និង ឱកាសជាច្រើនដើម្បីចូលរួមចំណែកក្នុងការពន្លឿនកិច្ចការរបស់ព្រះអម្ចាស់ ។

ព្រះអម្ចាស់កំពុងពន្លឿនកិច្ចការរបស់ទ្រង់

តើមានមូលហេតុបែបណាខ្លះដែលមនុស្សអាចនឹងពន្លឿន ឬបង្កើនល្បឿនការងារនោះ ? សូមអានគោលលទ្ធិ និងសេចក្ដីសញ្ញា ៨៨:៧៣ស្វែងរកមើលនូវអ្វីដែលព្រះអម្ចាស់បានមានបន្ទូលថា ទ្រង់នឹងពន្លឿន ( សូមមើលផងដែរយ៉ាកុប ៥:៦១-៦២, ៧០-៧១) ។

យោងទៅលើ គោលលទ្ធិ និង សេចក្ដីសញ្ញា ៨៨:៧៣អែលឌើរ រ័សុល អិម ណិលសុន នៃកូរ៉ុមនៃពួកសាវកដប់ពីរនាក់ បានមានប្រសាសន៍ថា « ពេលវេលានៃការពន្លឿននោះ គឺជាពេលឥឡូវនេះហើយ » (Thus Shall My Church Be Called »Ensign ខែ ឧសភា ឆ្នាំ ១៩៩០ ទំព័រ ១៧ ) ។

យើងរស់នៅក្នុងជំនាន់មួយ ដែលព្រះអម្ចាស់កំពុងពន្លឿនកិច្ចការរបស់ទ្រង់ ។ តាមរយៈការពន្លឿនកិច្ចការរបស់ទ្រង់ ព្រះអម្ចាស់លើកកម្ពស់ ហើយបន្ថែមល្បឿនកិច្ចខិតខំរបស់ទ្រង់ដើម្បីនាំមកនូវសេចក្ដីសង្គ្រោះដល់មនុស្សលោក ។

សូមឆ្លើយសំណួរដូចខាងក្រោម ដាក់នៅក្នុងសៀវភៅកំណត់ហេតុសិក្សាព្រះគម្ពីររបស់អ្នក ៖ តើអ្នកធ្វើជាសាក្សីថា ព្រះអម្ចាស់កំពុងពន្លឿនកិច្ចការរបស់ទ្រង់ របៀបណា ?

អំឡុងពេលការបម្រើរបស់ប្រធាន ស្ពែនស៊ើរ ដបុលយូ ឃឹមបឹល ក្នុងនាមជាប្រធានសាសនាចក្រ ព្រះអម្ចាស់បានពន្លឿនកិច្ចការរបស់ទ្រង់ ។ ឧទាហរណ៍ កិច្ចការផ្សព្វផ្សាយសាសនាបានពង្រីក ហើយសាសនាចក្របានបោះពុម្ពកំណែថ្មីនៃព្រះគម្ពីរ ។ នៅពេលលោកលើកទឹកចិត្តដល់សមាជិកសាសនាចក្រឲ្យឆ្ពោះទៅមុខ នោះប្រធាន ឃឹមបឹល បានមានប្រសាសន៍ថា សាសនាចក្រ « បានបង្អង់នៅត្រង់កន្លែងខ្លះយូរល្មមគ្រប់គ្រាន់ហើយ ។ ចូរយើងបន្ដការធ្វើដំណើររបស់យើងឆ្ពោះទៅមុខ ហើយឡើងទៅលើ » ( « Let Us Move Forward and Upward » Ensign ខែ ឧសភា ឆ្នាំ ១៩៧៩ ទំព័រ ៨២ ) ។ លោកក៏បានបង្រៀនផងដែរថា « យើងត្រូវតែពង្រីកការបោះជំហានរបស់យើង ហើយត្រូវតែធ្វើវាឥឡូវនេះ » (Always a Convert Church: Some Lessons to Learn and Apply This Year, » Ensign ខែកញ្ញា ឆ្នាំ ១៩៧៥ ទំព័រ ៣ ) ។

នៅពេលសមាជិកសាសនាចក្រ « ពង្រីកការបោះជំហានរបស់ពួកគេ » នោះពួកគេបង្កើនកិច្ចខិតខំរបស់ពួកគេដើម្បីចូលរួមក្នុងកិច្ចការរបស់ព្រះអម្ចាស់ ។ ឧទាហរណ៍ ពួកគេធ្វើការកាន់តែមានភាពឧស្សាហ៍ព្យាយាមដើម្បីចែកចាយដំណឹងល្អ សិក្សាព្រះគម្ពីរ ហើយធ្វើកិច្ចការព្រះវិហារបរិសុទ្ធ និងកិច្ចការពង្សប្រវត្តិ ។

ការពន្លឿនកិច្ចការផ្សព្វផ្សាយសាសនា

ប្រធាន ស្ពែនស៊ើរ ដបុលយូ ឃឹមបឹល បានប្រាប់ពួកបរិសុទ្ធថា ព្រះអម្ចាស់បានរៀបចំដើម្បីបើកទ្វាសម្រាប់ពួកគេឲ្យចែកចាយដំណឹងល្អ រួមទាំងនៅក្នុងជាតិសាសន៍ដែលពុំអនុញ្ញាតឲ្យមានកិច្ចការផ្សព្វផ្សាយសាសនាផងដែរ ។ ទោះជាយ៉ាងណាក៏ដោយ លោកក៏បានមានប្រសាសន៍ថា ពួកបរិសុទ្ធចាំបាច់ត្រូវត្រៀមខ្លួនឯងដើម្បីទទួលយកឱកាសនោះផងដែរ ។ ប្រធាន ឃឹមបឹលក៏បានថ្លែងទីបន្ទាល់ថា បើយុវជនគ្រប់រូបត្រៀមខ្លួនបម្រើបេសកកម្មពេញម៉ោង នោះព្រះអម្ចាស់នឹងបើកទ្វារ ហើយផ្ដល់មធ្យោបាយមួយសម្រាប់កិច្ចការផ្សព្វផ្សាយសាសនា ដើម្បីចេញទៅពេញពិភពលោកទាំងមូល ៖

« ខ្ញុំគិតអំពីជាតិសាសន៍ជាច្រើនដែលនៅពុំទាន់បានទំនាក់ទំនង ។ ខ្ញុំដឹងថា ពួកគេមានវាំងនន [ ការដាក់កំហិតទប់ទល់នឹងឥទ្ធិពលពីខាងក្រៅ ] ដូចជាវាំងននដែក និងវាំងននឬស្សី ។ ខ្ញុំដឹងថាវាលំបាកខ្លាំង ដោយសារយើងបានខិតខំបញ្ចេញសមត្ថភាពខ្លះហើយ ។…

« ប៉ុន្តែខ្ញុំអាចមើលឃើញថា វាគ្មានហេតុផលល្អទេ ដែលព្រះអម្ចាស់នឹងបើកទ្វារ ដែលយើងពុំបានត្រៀមខ្លួនដើរចូលទៅនោះ ។ ហេតុអ្វីក៏ទ្រង់គប្បីបំបាក់វាំងននដែក ឬវាំងននឬស្សី ឬវាំងននផ្សេងទៀត បើយើងពុំត្រៀមខ្លួនដើម្បីដើរចូលផងនោះ ? (« When the World Will Be Converted, » Ensign ខែ តុលា ឆ្នាំ ១៩៧៤ ទំព័រ ៥, ៧ ) ។

សមាជិកនៃសាសនាចក្របានធ្វើតាមការទូន្មានរបស់ប្រធាន ឃឹមបឹល ហើយបានត្រៀមខ្លួនដើម្បីចែកចាយដំណឹងល្អ ។ អំឡុងការដឹកនាំរបស់ប្រធាន ឃឹមបឹល នោះចំនួនអ្នកផ្សព្វផ្សាយសាសនាពេញម៉ោង បានកើនឡើងច្រើនជាង ៥០ ភាគរយ ។ នៅចុងឆ្នាំ ១៩៨០ និងដើមឆ្នាំ ១៩៩០ រដ្ឋាភិបាលអាល្លឺម៉ង់ខាងកើត ប្រទេសជាតិទាំងឡាយនៅក្នុងសហភាពសូវៀតពីដើម និងប្រទេសជាតិនានាឯទៀត ជាទីកន្លែងដែលកិច្ចការផ្សព្វផ្សាយសាសនាត្រូវបានដាក់កំហិតពីមុននោះ បានចាប់ផ្ដើមអនុញ្ញាតឲ្យអ្នកផ្សព្វផ្សាយសាសនាចូលទៅចែកចាយដំណឹងល្អនៅក្នុងប្រទេសទាំងនេះ ។ ការព្យាករណ៍របស់ប្រធាន ឃឹមបឹល ត្រូវបានបំពេញ ហើយវាបន្ដបំពេញនៅពេលកិច្ចការផ្សព្វផ្សាយសាសនាបានពង្រីកកាន់តែធំ ។

នៅពេលប្រធាន ឃឹមបឹល បានលើកទឹកចិត្តដល់សមាជិកសាសនាចក្រឲ្យពង្រីកការបោះជំហានរបស់ពួកគេ នោះលោកបានបញ្ជាក់អំពីទំនួលខុសត្រូវមួយរបស់យុវជនគ្រប់រូបក្នុងសាសនាចក្រ ៖ « សំណួរត្រូវបានសួរជាញឹកញាប់ ៖ តើយុវជនគ្រប់រូបគួរបំពេញបេសកកម្មឬទេ ? ហើយចម្លើយត្រូវបានប្រទានឲ្យដោយព្រះអម្ចាស់ ។ គឺ ‹ ពិតមែនហើយ › ។ យុវជនគ្រប់រូបគប្បីបំពេញបេសកកម្ម » (« When the World Will Be Converted » ទំព័រ ៨ )។

ចាប់តាំងពីពេលនោះមក ពួកព្យាការីបានបន្ដលើកទឹកចិត្តយុវជនដែលសក្ដិសម និងមានសមត្ថភាពគ្រប់រូប ឲ្យបម្រើបេសកកម្មពេញម៉ោង ។ ពួកព្យាការីក៏ស្វាគមន៍ដល់យុវនារីឲ្យបម្រើបេសកកម្មពេញម៉ោងផងដែរ បើពួកគេមានបំណងចង់ធ្វើ ។ នៅខែតុលា ឆ្នាំ ២០១២ ប្រធាន ថូម៉ាស អេស ម៉នសុន បានប្រកាសអំពីការផ្លាស់ប្ដូរអាយុដែលតម្រូវឲ្យចេញផ្សព្វផ្សាយសាសនា ដោយអនុញ្ញាតឲ្យយុវជនចាប់ផ្ដើមការបម្រើផ្សព្វផ្សាយសាសនានៅវ័យ ១៨ ឆ្នាំ ហើយយុវនារីនៅវ័យ ១៩ ឆ្នាំ. យុវជនគ្រប់រូប គួរតែត្រៀមខ្លួនដើម្បីបម្រើបេសកកម្មពេញម៉ោង ហើយរក្សាខ្លួនឲ្យមានភាពសក្ដិសមដើម្បីបម្រើ ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. ហេតុអ្វីក៏យុវជនគ្រប់រូបគប្បីត្រៀមខ្លួនបម្រើបេសកកម្មពេញម៉ោងយ៉ាងដូច្នេះ ?
2. តើការត្រៀមខ្លួនសម្រាប់បេសកកម្មនាពេលឥឡូវនេះ អាចជួយអ្នករួមចំណែកក្នុងកិច្ចការរបស់ព្រះអម្ចាស់យ៉ាងដូចម្ដេច ?
3. តើអ្នកគិតថា ការផ្លាស់ប្ដូរចំពោះតម្រូវការអាយុសម្រាប់ការចេញផ្សព្វផ្សាយសាសនាពេញម៉ោងដ៏បំផុសគំនិត បានរួមចំណែកចំពោះការពន្លឿនកិច្ចការរបស់ព្រះអម្ចាស់យ៉ាងដូចម្ដេច ?

កំណែថ្មីនៃព្រះគម្ពីរ

តើអ្នកនឹងនិយាយអ្វីខ្លះ បើមិត្តជិតស្និតម្នាក់របស់អ្នកនិយាយមកកាន់អ្នកថា « ខ្ញុំចង់ខិតទៅកាន់តែជិតព្រះ ។ តើខ្ញុំគួរតែធ្វើយ៉ាងដូចម្តេច ? »

សូមអានសេចក្ដីថ្លែងការណ៍ដូចខាងក្រោមដោយប្រធាន ស្ពែនស៊ើរ ដបុលយូ. ឃឹមបឹល ៖ « ខ្ញុំយល់ឃើញថា នៅពេលខ្ញុំមិនសូវចាប់អារម្មណ៍ក្នុងការទំនាក់ទំនងទាំងឡាយរបស់ខ្ញុំជាមួយនឹង ព្រះដ៏ទេវភាព ហើយនៅពេលដែលវាហាក់បីដូចជាបង្ហាញថា គ្មានត្រចៀកដ៏ទេវភាពណាកំពុងស្តាប់ និង គ្មានសម្លេងដ៏ទេវភាពណាកំពុងនិយាយ ពេលនោះហើយដែលធ្វើឲ្យខ្ញុំកាន់តែឃ្លាតឆ្ងាយទៅៗ ។ ប្រសិនបើខ្ញុំផ្តោតយកចិត្តទុកដាក់ទាំងស្រុងលើព្រះគម្ពីរ នោះផ្លូវឆ្ងាយនឹងត្រូវបានបង្រួញ ហើយជីវភាពខាងវិញ្ញាណនឹងត្រឡប់មកវិញ » (Teachings of Presidents of the Church: Spencer W. Kimball[ឆ្នាំ ២០០៦ ] ទំព័រ ៦៧ ) ។

សូមអាន គោលលទ្ធិ និង សេចក្តីសញ្ញា ១:៦, ២៤-៣០ រួចប្រាប់ថា ហេតុអ្វីព្រះអម្ចាស់សព្វព្រះទ័យឲ្យពួកអ្នកដឹកនាំបោះពុម្ពវិវរណៈ ។ តើព្រះគម្ពីរអាចជួយយើងពង្រីកជំហានរបស់យើង ហើយរួមចំណែកក្នុងការពន្លឿនកិច្ចការរបស់ព្រះអម្ចាស់យ៉ាងដូចម្ដេច ?

នៅដើមឆ្នាំ ១៩៧០ អ្នកដឹកនាំសាសនាចក្រទទួលស្គាល់ពីតម្រូវការ ដែលសមាជិកសាសនាចក្រត្រូវចេះបទគម្ពីរឲ្យបានកាន់តែស្ទាត់ជំនាញ ហើយឲ្យមានកំណែថ្មីនៃព្រះគម្ពីរប៊ីបជាបទដ្ឋានមួយដើម្បីសិក្សា និងបង្រៀន ។ នៅឆ្នាំ ១៩៧៩ បន្ទាប់ពីរយៈពេលជាច្រើនឆ្នាំនៃកិច្ចខិតខំ ដ៏បំផុសគំនិត និងឧស្សាហ៍ព្យាយាម នោះសាសនាចក្រ បានបោះពុម្ពកំណែថ្មីនៃព្រះគម្ពីរប៊ីបរបស់ស្តេចជេមស៍ អិល.ឌី.អេស ជាផ្លូវការជាភាសាអង់គ្លេស ។ កំណែថ្មីនៃគម្ពីរប៊ីបនេះ មាននូវជំនួយការសិក្សាដ៏ច្រើន ដែលពុំធ្លាប់មានពីមុន រួមមានទាំងលេខយោងជាមួយនឹងសេចក្ដីយោងបទគម្ពីរ និងជំនួយដទៃៗទៀតត្រូវបានពង្រីកកាន់តែច្រើន ហើយបានកែលម្អដើមជំពូក ដកស្រង់ចេញមកពីការបកប្រែរបស់យ៉ូសែប ស្ម៊ីធ Topical Guide និង Bible Dictionary ។ នៅឆ្នាំ ១៩៨១ សាសនាចក្របានបោះពុម្ពកំណែថ្មី នៃបណ្ដុំព្រះគម្ពីរទាំងបីជាភាសាអង់គ្លេស-- ព្រះគម្ពីរមរមន គោលលទ្ធិ និង សេចក្ដីសញ្ញា និង មុក្ដាដ៏មានតម្លៃមហិមា-- ដែលរួមមានទាំងការកែលម្អលេខយោង ដើមជំពូក ផែនទី និងមាតិកា ។ នៅឆ្នាំ ២០០៩ សាសនាចក្របានបោះពុម្ពកំណែថ្មីនៃព្រះគម្ពីរប៊ីបនៃ វីណា វ៉ាឡេរ៉ា អិល.ឌី.អេស ជាភាសាអេស្ប៉ាញ ។

សូមអានសេចក្ដីថ្លែងការណ៍ដូចខាងក្រោមដោយប្រធាន ប៊យដ៏ ឃេ ផាកកឺ នៃកូរ៉ុមនៃពួកសាវកដប់ពីរនាក់ ដែលបានធ្វើឡើង នៅរយៈពេលមួយឆ្នាំ បន្ទាប់ពីបានចេញបណ្ដុំព្រះគម្ពីរទាំងបីជាភាសាអង់គ្លេសនៅឆ្នាំ ១៩៨១ ។ ចូររកមើលរបៀបដែលលោកបានមើលឃើញជាមុនថា កំណែថ្មីនៃព្រះគម្ពីរទាំងនេះ នឹងប្រទានពរដល់ជីវិតជាច្រើន ហើយរំកិលកិច្ចការរបស់ព្រះឆ្ពោះទៅមុខ ។

« រយៈពេលជាច្រើនឆ្នាំបានកន្លងផុតទៅ ព្រះគម្ពីរទាំងនេះនឹងបង្កើតផលជាជំនាន់នៃពួកគ្រីស្ទានស្មោះត្រង់ជាបន្ដបន្ទាប់ ដែលស្គាល់ព្រះអម្ចាស់ព្រះយេស៊ូវគ្រីស្ទ ហើយដែលចង់គោរពតាមព្រះទ័យទ្រង់ ។

« … វិវរណៈ នឹងបើកសម្ដែងដល់ពួកគេ ដែលគ្មានវិធីណាផ្សេងឡើយនៅក្នុងប្រវត្តិសាស្ត្រនៃពិភពលោក ។… ពួកគេនឹងអភិវឌ្ឍចំណេះវិជ្ជានៃដំណឹងល្អ លើសហួសជីដូនជីតារបស់ពួកគេអាចសម្រេចបានទៅទៀត ។ ពួកគេនឹងមានទីបន្ទាល់ថា ព្រះយេស៊ូវគឺជាព្រះគ្រីស្ទ ហើយអាចប្រកាសអំពីទ្រង់ និងការពារទ្រង់ » ( « Scriptures » Ensign ខែ វិច្ឆិកា ឆ្នាំ ១៩៨២ ទំព័រ ៥៣ ) ។

ព្រះគម្ពីរថ្លែងទីបន្ទាល់ថា ព្រះយេស៊ូវគឺជាព្រះគ្រីស្ទ ។ ការសិក្សាបទគម្ពីរអាចជួយយើងទទួលបានទីបន្ទាល់អំពី ព្រះយេស៊ូវគ្រីស្ទ ហើយជួយបំពេញជីវិតរបស់យើងដោយព្រះវិញ្ញាណបរិសុទ្ធ ។ កិច្ចខិតខំដ៏អស្ចារ្យ បានមាន និងបន្ដធ្វើឡើងដើម្បីផ្ដល់ឲ្យសមាជិកសាសនាចក្រនូវព្រះគម្ពីរ ហើយផ្តល់ជំនួយសម្រាប់ការសិក្សាជាភាសាកំណើតរបស់ពួកគេ ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. ហេតុអ្វីក៏ការសិក្សាព្រះគម្ពីរប្រចាំថ្ងៃសំខាន់ ?
2. តើការសិក្សាព្រះគម្ពីរផ្ទាល់ខ្លួនរបស់អ្នក បានជួយអ្នក ឲ្យជួយក្នុងកិច្ចការរបស់ព្រះអម្ចាស់យ៉ាងដូចម្ដេច ?

ការពន្លឿនកិច្ចការព្រះវិហារបរិសុទ្ធ និងកិច្ចការពង្សប្រវត្តិ

ការសាងសង់ព្រះវិហារបរិសុទ្ធបានកើនឡើងយ៉ាងច្រើនក្រៃលែង នៅក្រោមការដឹកនាំរបស់ប្រធាន ហ្គរដុន ប៊ី ហ៊ិងគ្លី ។ នៅក្នុងឆ្នាំ ១៩៩៥ នៅពេលដែលមានព្រះវិហារបរិសុទ្ធតិចជាង ៥០ កំពុងដំណើរការ នៅទូទាំងពិភពលោក លោកបានមានប្រសាសន៍ ៖ « ខ្ញុំមានបំណងប្រាថ្នាដ៏ខ្លាំងមួយថា ព្រះវិហារបរិសុទ្ធមួយ ត្រូវតាំងឡើងនៅក្នុងកន្លែងមួយដែលពួកបរិសុទ្ធថ្ងៃចុងក្រោយនៅទូទាំងពិភពលោកអាចចូលរួមបានដោយសមហេតុផល ។… … កិច្ចការកំពុងឆ្ពោះទៅមុខយ៉ាងលឿនតាមដែលយើងអាចធ្វើទៅបាន ។ វាគឺជាការអធិស្ឋានដ៏ខ្ជាប់ខ្ជួនរបស់ខ្ញុំសុំឲ្យវាអាចត្រូវបានពន្លឿនល្បឿនឡើង ដើម្បីឲ្យប្រជាជនរបស់យើងកាន់តែច្រើននាក់អាចចូលទៅក្នុងដំណាក់ដ៏ពិសិដ្ឋរបស់ព្រះអម្ចាស់បានកាន់តែងាយស្រួល » (Of Missions, Temples, and Stewardship » Ensignខែ វិច្ឆិកា ឆ្នាំ ១៩៩៥ ទំព័រ ៥២, ៥៣ ) ។

សូមអាន គោលលទ្ធិ និង សេចក្តីសញ្ញា ១២៨:១៥, ១៧ដោយស្វែងរកមើលនូវទំនួលខុសត្រូវដែលយើងមានចំពោះជីដូនជីតារបស់យើង ។ អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានថ្លែងគោលការណ៍ដូចខាងក្រោម ៖យើងមានទំនួលខុសត្រូវដែលភ្ជាប់ជាមួយសេចក្តីសញ្ញា ដើម្បីនឹងស្រាវជ្រាវស្វែងរកដូនតារបស់យើង ហើយធ្វើពិធីបរិសុទ្ធនៃការសង្គ្រោះក្នុងដំណឹងល្អដល់ពួកលោក » (The Hearts of the Children Shall Turn » EnsignឬLiahonaខែ វិច្ឆិកា ឆ្នាំ ២០១១ ទំព័រ ២៥ ) ។

សំណង់ព្រះវិហារបរិសុទ្ធ និងការរីកចម្រើននៃកិច្ចការពង្សប្រវត្តិ គឺជាភស្ដុតាងដែលព្រះកំពុងពន្លឿនកិច្ចការរបស់ទ្រង់ នៅផ្នែកម្ខាងទៀតនៃវាំងនន ។

សូមអានសេចក្ដីថ្លែងការណ៍ដូចខាងក្រោមដោយអែលឌើរ បែដណា រួចរកមើលរបៀបដែលអ្នកអាចចូលរួមក្នុងកិច្ចការរបស់ព្រះអម្ចាស់ ៖ « វាមិនមែនជាការចៃដន្យទេដែលកម្មវិធី FamilySearch និងឧបករណ៍ទាំងឡាយដទៃទៀតត្រូវបង្កើតឡើងនៅចំពេលដែលមនុស្សវ័យក្មេង មានការចេះដឹងយ៉ាងទូលំទូលាយ អំពីបច្ចេកវិជ្ជាព័ត៌មាន និងបណ្តាញទំនាក់ទំនងទាំងនោះ។ ម្រាមដៃរបស់អ្នកត្រូវបានបង្រៀនឲ្យវាយសារ ដើម្បីបង្កើនល្បឿន និងជំរុញកិច្ចការរបស់ព្រះអម្ចាស់--ពុំគ្រាន់តែជាទំនាក់ទំនងបានឆាប់ជាមួយមិត្តរបស់អ្នកប៉ុណ្ណោះទេ ។ ជំនាញ និងសមត្ថភាព ដែលជាភស្ដុតាងនៅក្នុងចំណោមមនុស្សវ័យក្មេងជាច្រើនសព្វថ្ងៃនេះ គឺជាការឲរៀបចំមួយដើម្បីរួមចំណែកក្នុងកិច្ចការនៃសេចក្ដីសង្គ្រោះ » (« The Hearts of the Children » ទំព័រ ២៦ ) ។

សូមឆ្លើយសំណួរដូចខាងក្រោមនៅក្នុងសៀវភៅកំណត់ហេតុសិក្សាព្រះគម្ពីររបស់អ្នក ៖ តើបទពិសោធន៍វិជ្ជមានអ្វីខ្លះដែលអ្នកមាន នៅក្នុងការធ្វើកិច្ចការពង្សប្រវត្តិរបស់អ្នក ឬការទៅព្រះវិហារបរិសុទ្ធដើម្បីចូលរួមក្នុងពិធីបរិសុទ្ធសម្រាប់មរណជន ?

ទំនួលខុសត្រូវរបស់យើងក្នុងការជម្រុញកិច្ចការឲ្យឆ្ពោះទៅមុខ

នៅពេលអ្នកអានសេចក្ដីថ្លែងការណ៍ខាងក្រោមនេះដោយ ដេវីឌ ប៊ី ហេត នៃកូរ៉ុមនៃពួកសាវកដប់ពីរនាក់ គូសចំណាំពរជ័យមួយដែលមានចំពោះយើងម្នាក់ៗ ៖

« បងប្អូនប្រុសស្រី ព្រះអម្ចាស់កំពុងបើកផ្លូវ ហើយធ្វើឲ្យមានលទ្ធភាពដើម្បីពង្រីកកិច្ចការរបស់ទ្រង់នៅទូទាំងពិភពលោក ហើយនោះជាពរជ័យមួយសម្រាប់យើងទាំងអស់គ្នា-- ដែលបុគ្គលម្នាក់ៗត្រូវចូលរួមចំណែក--តាមរបៀបផ្ទាល់ខ្លួន ។…

« តើមាននរណាក្រៅពីពួកព្យាការីនៃព្រះ អាចមើលឃើញជាមុនអំពីអព្ភូតហេតុនៃការរីកចម្រើនយ៉ាងលឿននៃកិច្ចការរបស់ព្រះអម្ចាស់ ? ពិតណាស់ ដូចដែលព្រះអម្ចាស់បានប្រាប់ជាមុននៅក្នុងកណ្ឌ ៨៨ អំពី គោលលទ្ធិ និង សេចក្ដីសញ្ញា នោះទ្រង់កំពុងពន្លឿនកិច្ចការរបស់ទ្រង់តាមពេលវា ( សូមមើលគ និង ស ៨៨:៧៣)» («Missionary Work—Our Responsibility » Ensignខែ វិច្ឆិកា ឆ្នាំ ១៩៩៣, ទំព័រ ៦១, ៦២ ) ។

យើងអាចត្រូវបានប្រទានពរនៅក្នុងការចូលរួមចំណែកនៅក្នុងការពន្លឿនកិច្ចការរបស់ព្រះអម្ចាស់ ។ ចូរពិចារណាអំពីឱកាសទាំងឡាយ ដែលអ្នករួមចំណែកដើម្បីពន្លឿនកិច្ចការរបស់ព្រះអម្ចាស់ ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើមានវិធីមួយចំនួនណាខ្លះ ដែលអ្នកអាចរួមចំណែកដើម្បីពន្លឿនដល់កិច្ចការរបស់ព្រះអម្ចាស់ ?
2. តើពរជ័យអ្វីខ្លះដែលអ្នកបានទទួលពិសោធន៍ នៅពេលអ្នកបានចូលរួមក្នុងការពន្លឿនកិច្ចការរបស់ព្រះអម្ចាស់ ?
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សាមេរៀនអំពី « ការពន្លឿនកិច្ចការនៃសេចក្ដីសង្គ្រោះ » ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និងការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖