មេរៀនទី ២៧ ៖ ថ្ងៃទី ៤
គោលលទ្ធិ និង សេចក្តីសញ្ញា ១២៨:១២-២៥
សេចក្តីផ្តើម
មេរៀននេះមាននូវផ្នែកទាំងអស់នៃសំបុត្រដែលព្យាការីយ៉ូសែប ស្ម៊ីធ បានសរសេរឲ្យពួកបរិសុទ្ធនៅដើមខែ កញ្ញា ឆ្នាំ ១៨៤២ ។ នៅក្នុងផ្នែកនៃសំបុត្រនេះ ព្យាការីបង្រៀនអំពីសេចក្តីសង្គ្រោះរបស់អ្នកនៅរស់ និង មរណជន ។ លោកក៏បានលើកទឹកចិត្តពួកបរិសុទ្ធឲ្យស្មោះត្រង់ចំពោះកិច្ចការរបស់ខ្លួនសម្រាប់មរណជន ហើយបង្ហាញសេចក្តីអំណររបស់លោកនៅក្នុងការស្តារឡើងវិញនៃដំណឹងល្អផងដែរ ។
គោលលទ្ធិ និង សេចក្ដីសញ្ញា ១២៨:១២-១៨
យ៉ូសែប ស៊្មីធ បង្រៀនអំពីសេចក្តីសង្គ្រោះរបស់អ្នកនៅរស់ និង មរណជន ។
សូមនឹកស្រមៃថាអ្នកកំពុងចូលរួមការសម្ពោធបើកឲ្យប្រើប្រាស់ព្រះវិហារបរិសុទ្ធជាមួយមិត្តម្នាក់ដែលមិនមែនជាសមាជិកសាសនាចក្រ ។ នៅពេលអ្នកដើរកាត់កន្លែងធ្វើពិធីបុណ្យជ្រមុជទឹក មិត្តរបស់អ្នកបានសួរថា « ហេតុអ្វីបានជាអ្នកធ្វើពិធីបុណ្យជ្រមុជទឹកឲ្យអ្នកស្លាប់ ? » មិត្តរបស់អ្នកសួរទៀតថា « តើពិធីបុណ្យជ្រមុជទឹកជំនួសឲ្យអ្នកស្លាប់នេះមាននៅក្នុងព្រះគម្ពីរប៊ីបដែរឬទេ ? »
នៅពេលអ្នកសិក្សាមេរៀនសម្រាប់ថ្ងៃនេះ អ្នកនឹងរកឃើញគោលការណ៍ដែលអាចជួយអ្នកឲ្យឆ្លើយតបនឹងសំណួរទាំងនេះ ។
អ្នកអាចនឹកចាំពីមេរៀនមុនៗថា នៅក្នុងខែ កញ្ញា ឆ្នាំ ១៨៤២ ព្យាការីយ៉ូសែប ស្ម៊ីធ បានលាក់ខ្លួនពីក្រុមមនុស្សដែលតាមចាប់ខ្លួនលោកដោយខុសច្បាប់ ។ កាលកំពុងលាក់ខ្លួននោះ លោកបានសរសេរសំបុត្រមួយទៅកាន់ពួកបរិសុទ្ធ ។ នៅក្នុងសំបុត្រនោះ លោកបានបង្រៀនពួកគេអំពីពិធីបុណ្យជ្រមុជទឹកជំនួសឲ្យអ្នកស្លាប់ ។
សូមអាន គោលលទ្ធិ និង សេចក្តីសញ្ញា ១២៨:១២-១៣ ដោយស្វែងរកអ្វី ដែលយ៉ូសែប ស្ម៊ីធ បានបង្រៀន អំពីនិមិត្តរូបនៃពិធីបុណ្យជ្រមុជទឹក ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរពាក្យពីរបីបន្ទាត់ដោយពន្យល់ពីរបៀបដែលអ្នកអាចប្រើការបង្រៀននៅក្នុង ខ ១២–១៣ ដើម្បីជួយមនុស្សម្នាក់ឲ្យយល់ពីហេតុផលដែលពិធីបុណ្យជ្រមុជទឹកត្រូវធ្វើឡើងដោយការជ្រមុជទៅក្នុងទឹក ។
នៅពេលអ្នកអាន គោលលទ្ធិ និង សេចក្តីសញ្ញា ១២៨:១៤ សូមកត់ចំណាំពីរបៀបដែល យ៉ូសែប ស្ម៊ីធ បានគូសបញ្ជាក់ពីសារៈសំខាន់នៃការរក្សាកំណត់ត្រាដែលអាចទទួលយកបាននៅចំពោះព្រះអម្ចាស់ទាក់ទិននឹងកិច្ចការនៃសេចក្ដីសង្គ្រោះសម្រាប់អ្នកស្លាប់ ។
សូមសិក្សា គោលលទ្ធិ និង សេចក្តីសញ្ញា ១២៨:១៥ ដោយរកមើលហេតុផលដែលយើងធ្វើពិធីបុណ្យជ្រមុជទឹកជំនួសឲ្យអ្នកស្លាប់ ។
នៅក្នុង ខទី ១៥ ឃ្លាថា « ពួកគេក៏មិនអាចបានល្អឥតខ្ចោះ ក្រៅពីយើងដែរ »មានន័យថា ដូនតារបស់យើងដែលបានចែកឋានដោយគ្មានដំណឹងល្អពុំអាចរីកចម្រើនឆ្ពោះទៅរកភាពល្អឥតខ្ចោះបានឡើយរហូតដល់ពិធីបរិសុទ្ធនៃសេចក្ដីសង្គ្រោះនៃដំណឹងល្អត្រូវបានធ្វើឡើងជំនួសឲ្យពួកគេ ។
សូមអានព័ត៌មានខាងក្រោមនេះ ដោយគូសចំណាំលើឃ្លាដែលគូសបញ្ជាក់ពីរបៀបដែលអ្នកអាចជួយពួកជីដូនជីតារបស់អ្នកដែលបានចែកឋានទៅដោយពុំបានទទួលដំណឹងល្អ ។
« ជីដូនជីតាដែលស្លាប់របស់អ្នករស់នៅកន្លែងមួយដែលហៅថា ពិភពវិញ្ញាណ ។ នៅទីនោះពួកគេមានឱកាសដើម្បីស្តាប់ និង ទទួលយកដំណឹងល្អនៃព្រះយេស៊ូវគ្រីស្ទ ។ ទោះជាយ៉ាងណាក៏ដោយ ពួកគេមិនអាចទទួលពិធីបរិសុទ្ធនៃដំណឹងសម្រាប់ខ្លួនពួកគេឡើយ ហើយពួកគេពុំអាចរីកចម្រើនឡើងលើកលែងតែមានមនុស្សដទៃទៀតផ្តល់ពិធីបរិសុទ្ធទាំងនេះសម្រាប់ពួកគេ ។
« ឯកសិទ្ធិ និង ទំនួលខុសត្រូវរបស់អ្នកគឺត្រូវផ្តល់អំណោយនេះដល់ពួកគេដោយការស្វែងរកពួកគេ ហើយធានាថាពិធីបរិសុទ្ធទាំងនេះត្រូវបានធ្វើឡើងជំនួសពួកគេនៅក្នុងព្រះវិហារបរិសុទ្ធ ។ បន្ទាប់មក ពួកគេអាចជ្រើសរើសថាព្រមទទួលយកកិច្ចការដែលបានធ្វើនេះឬក៏ អត់ » ( Member’s Guide to Temple and Family History Work [ ឆ្នាំ ២០០៩ ] ទំព័រ ២ ) ។
-
សូមមើល គោលលទ្ធិ និង សេចក្តីសញ្ញា ១២៨:១៥ ឡើងវិញ ដោយរកមើលហេតុផលមួយទៀតដែលយើងធ្វើពិធីបុណ្យជ្រមុជទឹកជំនួសឲ្យអ្នកស្លាប់ ។ យោងតាមអ្វីដែលអ្នកបានរៀន សូមបំពេញគោលលទ្ធិដូចតទៅ ៖ សេចក្តីសង្គ្រោះរបស់ជីដូនជីតាយើងដែលបានចែកឋានទៅគឺ ចំពោះសេចក្ដីសង្គ្រោះរបស់យើង ។
នៅពេលអ្នកបន្តសិក្សា គោលលទ្ធិ និង សេចក្តីសញ្ញា ១២៨ សូមពិចារណាពីហេតុផលដែលការធ្វើកិច្ចការពង្សប្រវត្តិ និង កិច្ចការព្រះវិហារបរិសុទ្ធជំនួសឲ្យជីដូនជីតារបស់យើងដែលបានចែកឋានទៅគឺជារឿងដ៏ចាំបាច់ចំពោះសេចក្ដីសង្គ្រោះរបស់យើង ។
សូមអាន គោលលទ្ធិ និង សេចក្តីសញ្ញា ១២៨:១៦–១៧ ដោយរកមើលការបង្រៀនមកពីសាវកម្នាក់នៅក្នុងព្រះគម្ពីរសញ្ញាថ្មី និងព្យាការីម្នាក់នៅក្នុងព្រះគម្ពីរសញ្ញាចាស់ ។ ហេតុអ្វីបានជាការដឹងថា ព្រះគម្ពីរមានបញ្ចូលនូវការបង្រៀនអំពីកិច្ចការជំនួសឲ្យអ្នកស្លាប់ជារឿងដ៏មានប្រយោជន៍ ?
តើអ្នកធ្លាប់មើលច្រវ៉ាក់ដែកឲ្យជិតនឹងភ្នែកដែរឬទេ ? ដើម្បីធ្វើច្រវ៉ាក់មួយដ៏រឹងមាំតំណនីមួយៗត្រូវបានភ្ជាប់គ្នាដោយគ្មានមុខតំណបន្ទាប់ពីបានភ្ជាប់នឹងតំណមួយទៀត ។
សូមអាន គោលលទ្ធិ និង សេចក្តីសញ្ញា ១២៨:១៨ ដោយរកមើលរបៀបដែលតំណនៃច្រវ៉ាក់មួយទាក់ទងនឹងការបង្រៀនរបស់ព្យការី យ៉ូសែប ស្ម៊ីធ អំពីបុណ្យជ្រមុជទឹកជំនួសឲ្យអ្នកស្លាប់ ។ ( សូមចងចាំថា គ្រាកាន់កាប់ត្រួតត្រា មួយគឺជាពេលដែលព្រះអម្ចាស់បើកសម្ដែងគោលលទ្ធិ ពិធីបរិសុទ្ធ និង បព្វជិតភាពរបស់ទ្រង់ [ សូមមើល Bible Dictionary « Dispensations »] ។ នៅក្នុងខគម្ពីរនេះពាក្យថា កូនៗ សំដៅលើពួកយើង ហើយពាក្យថា ឪពុក សំដៅលើជីដូនជីតារបស់យើង ) ។
អ្នកអាចនឹងចង់សរសេរគោលលទ្ធិដូចតទៅនៅក្នុងព្រះគម្ពីររបស់អ្នកក្បែរ ខ ១៨ ៖ ពិធីបុណជ្រមុជទឹកជំនួសឲ្យអ្នកស្លាប់ជួយតភ្ជាប់យើងទៅនឹងជីដូនជីតាយើងសម្រាប់ភាពដ៏នៅអស់កល្បជានិច្ច ។
ក្រៅពីបុណ្យជ្រមុជទឹក ពិធីបរិសុទ្ធនៃសេចក្តីសង្គ្រោះផ្សេងទៀត—ពិធីបញ្ជាក់ ការតែងតាំងបព្វជិតភាពមិលគីស្សាដែក ( សម្រាប់បុរស ) ពិធីអំណោយទានពិសិដ្ឋនៃព្រះវិហារបរិសុទ្ធ និង ពិធីបរិសុទ្ធនៃការផ្សារភ្ជាប់—ក៏សំខាន់ដើម្បីធ្វើឲ្យតំណនៃការផ្សារភ្ជាប់គ្នារវាងជីដូនជីតារបស់យើង និង ខ្លួនយើងបានរឹងមាំផងដែរ ។
ដើម្បីបង្កើនការយល់ដឹងរបស់អ្នកអំពីសេចក្ដីពិតនៅក្នុង គោលលទ្ធិ និង សេចក្តីសញ្ញា ១២៨ សូមសិក្សាសេចក្ដីថ្លែងការណ៍ដូចតទៅមកពីប្រធានយ៉ូសែប ហ្វីលឌីង ស៊្មីធ ៖
« សមាជិកសាសនាចក្រមួយចំនួនធ្លាប់ងឿងឆ្ងល់ពីអត្ថន័យនៃប្រសាសន៍របស់ព្យាការីដែលថ្លែងថា យើងពុំអាចធ្វើឲ្យល្អឥតខ្ចោះដោយគ្មានជីដូនជីតារបស់យើងបានឡើយ ។ តើមនុស្សម្នាក់ដែលគោរពព្រះបញ្ញត្តិរបស់ព្រះអម្ចាស់ ជាអ្នកដែលស្មោះត្រង់ ហើយមានភក្ដីភាពនឹងមិនទទួលបានភាពល្អឥតខ្ចោះទេឬ ? ពិតណាស់ គាត់ត្រូវផ្ដល់ឯកសិទ្ធិដូចគ្នាទៅដល់ជីដូនជីតារបស់គាត់ដែលបានចែកឋានទៅដោយសារត្រូវតែមានអង្គការគ្រួសារមួយ ជាអង្គភាពក្រុមគ្រួសារមួយ ហើយជំនាន់នីមួយៗត្រូវតែផ្សារភ្ជាប់ជាមួយនឹងច្រវ៉ាក់ដែលបានទៅមុន ដើម្បីនាំនូវភាពល្អឥតខ្ចោះនៅក្នុងអង្គភាពគ្រួសារ ។ ដូច្នេះនៅទីបំផុត យើងនឹងក្លាយជាគ្រួសារដ៏ធំមួយជាមួយនឹងអ័ដាម ដែលជាមេ មៃឃើល មេទ័ពពួកទេវតា ធ្វើជាអធិបតីលើពូជពង្សរបស់លោក » ( Doctrines of Salvation,comp ។ Bruce R. McConkie, 3 vols. [១៩៥៤–៥៦] ២:១៧៥ ) ។
យោងតាម គោលលទ្ធិ និង សេចក្តីសញ្ញា ១២៨:១៨ ហេតុអ្វីបានជាការធ្វើជាផ្នែកមួយនៃតំណមនុស្សដែលបានតភា្ជប់គ្នា ឬបានផ្សារភ្ជាប់នឹងគ្នាមានសារៈសំខាន់ ?
សេចក្ដីថ្លែងការណ៍ដូចតទៅអាចជួយអ្នកឲ្យយល់ពីបណ្ដាសារអ្វីដែលនៅក្នុង ខ ១៨ សំដៅទៅលើ ៖
ប្រធាន យ៉ូសែប ហ្វីលឌីង ស៊្មីធ បានថ្លែង ៖« បើសិនគ្មានតំណភ្ជាប់គ្នារវាងពួកឪពុក និងកូនៗ—ដែលជាកិច្ចការសម្រាប់មនុស្សស្លាប់ទេ—នោះយើងទាំងអស់គ្នានឹងត្រូវកំទេចចោល ហើយកិច្ចការរបស់ព្រះទាំងមូលនឹងបរាជ័យ និង ត្រូវកំទេចចោលសូន្យឈឹង » (Doctrines of Salvation២:១២២ ) ។
អែលឌើរអិល ថម ភែរី ក្នុងកូរ៉ុមនៃពួកសាវកដប់ពីរនាក់បានបង្រៀន ៖ « គ្រួសារដ៏នៅអស់កល្បជានិច្ចគឺជាកត្តាដ៏សំខាន់ចំពោះដំណឹងល្អនៃព្រះអង្គសង្គ្រោះរបស់យើង ។ វាគ្មានហេតុផលដែលទ្រង់ត្រូវត្រឡប់មកផែនដីវិញដើម្បីដឹកនាំ ហើយគ្រងរាជនៅលើនគរទ្រង់ឡើយ លើកលែងតែក្រុមគ្រួសារដ៏នៅអស់កល្បជានិច្ចត្រូវបានស្ថាបនាឡើងសម្រាប់កូនចៅរបស់ព្រះវរបិតានៃយើងដែលគង់នៅស្ថានសួគ៌ ។ នៅពេលយើងយល់ពីតួនាទីដ៏អស់កល្បជានិច្ចរបស់គ្រួសារ នោះការចិញ្ចឹមបីបាច់ និង ការបង្កើតចំណងក្រុមគ្រួសារដ៏រឹងមាំគឺជារឿងដ៏សំខាន់បំផុត » ( « Youth of the Noble Birthright » Ensign ខែ វិច្ឆិកា ឆ្នាំ ១៩៩៨ ទំព័រ ៧៤ ) ។
-
គោលលទ្ធិ និង សេចក្ដីសញ្ញា ១២៨:១៩-២៥
យ៉ូសែប ស៊្មីធ បង្ហាញពីសេចក្តីអំណរនៅក្នុងស្តារឡើងវិញនៃដំណឹងល្អ ហើយលើកទឹកចិត្តដល់ពួកបរិសុទ្ធឲ្យស្មោះត្រង់ នៅពេលពួកគេធ្វើកិច្ចការសម្រាប់សេចក្តីសង្គ្រោះដល់មរណជន
សូមគិតអំពីពេលមួយ ដែលអ្នកមានភាពរីករាយដោយបានឮដំណឹងដ៏ល្អ ។ នៅពេលអ្នកបានឮពីរឿងនេះ តើអ្នកចង់ចែកចាយវានឹងអ្នកដទៃដែរឬទេ ? ហេតុអ្វី ?
សូមអាន គោលលទ្ធិ និង សេចក្ដីសញ្ញា ១២៨:១៩ ។ ពាក្យ ដំណឹងល្អ នៅក្នុងខនេះគឺជាពាក្យមួយទៀតសម្រាប់ ដំណឹង ។ សូមរកមើលដំណឹងល្អដែលព្យាការី យ៉ូសែប ស្ម៊ីធ បានថ្លែងថា យើងនឹងបានទទួល ។
តើដំណឹងល្អរបស់ព្រះយេស៊ូវគ្រីស្ទគឺជាសំឡេងរីករាយសម្រាប់ទាំងអ្នករស់ និង មរណជនយ៉ាងដូចម្តេច ?
នៅក្នុង គោលលទ្ធិ និង សេចក្តីសញ្ញា ១២៨:២០–២១ យើងអានអំពីបទពិសោធន៍មួយចំនួនដែលព្យាការី យ៉ូសែប ស្ម៊ីធ មានជាមួយនឹងសារទូតសួគ៌ា នៅពេលដំណឹងល្អត្រូវបានស្ដារឡើងវិញតាមរយៈលោក ។
សេចក្តីពិតមួយដែលយើងរៀនពីខគម្ពីរទាំងនេះគឺថា កូនសោ អំណាច និង សិទ្ធិអំណាចនៃគ្រាកាន់កាប់ត្រួតត្រាកាលពីមុនត្រូវបានស្ដារឡើងវិញនៅក្នុងគ្រាកាន់កាប់ត្រួតត្រានៃកំណត់កាលដ៏ពោរពេញ ។ សូមពិចារណាអំពីការសរសេរសេចក្ដីពិតនេះនៅក្នុងព្រះគម្ពីររបស់អ្នក ឬ ក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
ប្រធាន យ៉ូហាន ថេលើរ បានមានប្រសាសន៍ ៖ « បើសិនអ្នកសួរយ៉ូសែបពីលក្ខណៈរបស់អ័ដាម នោះលោកនឹងប្រាប់អ្នកភ្លាម លោកនឹងប្រាប់អ្នកពីទំហំ និង រូបរាង ព្រមទាំងអ្វីៗទាំងអស់ពីអ័ដាម ។ អ្នកអាចសួរលោកពីលក្ខណៈរបស់ ពេត្រុស យ៉ាកុប និង យ៉ូហាន នោះលោកអាចប្រាប់អ្នកបានទាំងអស់ ។ ហេតុអ្វី ? ដោយសារលោកបានឃើញពួកគេ » ( នៅក្នុង Teachings of Presidents of the Church: Joseph Smith [ ឆ្នាំ ២០០៧ ] ទំព័រ ១០៣) ។
-
គោលលទ្ធិ និង សេចក្ដីសញ្ញា ១២៨:២២-២៣ មានការបង្ហាញពីសេចក្តីអំណរដែលព្យាការីយ៉ូសែប ស្ម៊ីធ មានដោយសារកូនសោនៃបព្វជិតភាពត្រូវបានស្តារឡើងវិញ ហើយដោយសារពួកបរិសុទ្ធអាចជួយសង្គ្រោះដល់មរណជន ។ នៅពេលអ្នកសិក្សាខគម្ពីរទាំងនេះ អ្នកគួរគូសចំណាំឃ្លាទាំងឡាយដែលមានន័យចំពោះអ្នក ។
សូមអាន គោលលទ្ធិ និង សេចក្តីសញ្ញា ១២៨:២៤ ដោយរកមើលការបូជាមួយដែលព្យាការីបានណែនាំដល់ពួកបរិសុទ្ធឲ្យថ្វាយដល់ព្រះអម្ចាស់ ។ តើអ្នកអាចធ្វើអ្វីខ្លះ ដើម្បីរួមចំណែកនៅក្នុង « បញ្ជី » នេះ ?
សូមពិចារណាពីសេចក្ដីពិតដូចតទៅនេះ ៖ នៅពេលយើងធ្វើកិច្ចការពង្សប្រវត្តិ ហើយទទួលពិធីបរិសុទ្ធនៃព្រះវិហារបរិសុទ្ធសម្រាប់ជីដូនជីតារបស់យើង នោះយើងធ្វើការថ្វាយដង្វាយដោយសុច្ចរិតដល់ព្រះអម្ចាស់ហើយ ។ នៅពេលអ្នកគិតអំពីសេចក្ដីពិតនេះ សូមអានសេចក្ដីថ្លែងការណ៍ដូចតទៅ ដែលអែលឌើរ ដេវីឌ អេ បែដណា ក្នុងកូរ៉ុមនៃ ពួកសាវកដប់ពីរនាក់បានរៀបរាប់ពីតួនាទីរបស់អ្នកនៅក្នុងកិច្ចការនៃសេចក្ដីសង្គ្រោះរបស់មរណជន ៖
« មានអ្នករាល់គ្នាជាច្រើនប្រហែលជាគិតថាកិច្ចការពង្សប្រវត្តិគឺត្រូវតែធ្វើឡើងដោយពួកមនុស្សវ័យចំណាស់ ។ ប៉ុន្តែ ខ្ញុំដឹងថាគ្មានការកំណត់អាយុណាមួយបានរៀបរាប់នៅក្នុងព្រះគម្ពីរ ឬសេចក្ដីណែនាំណាមួយដែលបានប្រកាសដោយពួកអ្នកដឹកនាំសាសនាចក្រដោយបានដាក់កំហិតនូវការបម្រើដល់សំខាន់នេះទៅលើមនុស្សវ័យចំណាស់ឡើយ ។ អ្នកគឺជាបុត្រាបុត្រីនៃព្រះ ជាកូនចៅនៃសេចក្ដីសញ្ញា និងជាអ្នកស្ថាបនានគរ ។ អ្នកពុំត្រូវចាំរហូតអ្នកមានអាយុគ្រប់គ្រាន់ដើម្បីបំពេញទំនួលខុសត្រូវរបស់អ្នកក្នុងការជួយដល់កិច្ចការនៃសេចក្ដីសង្គ្រោះសម្រាប់គ្រួសារមនុស្សឡើយ ។…
« វាមិនមែនជាការចៃដន្យទេ ដែលកម្មវិធីស្រាវជ្រាវពង្សប្រវត្តិ…ឧបករណ៍ទាំងឡាយដទៃទៀតត្រូវបង្កើតឡើងនៅចំពេលដែលមនុស្សវ័យក្មេងមានការចេះដឹងយ៉ាងទូលំទូលាយអំពីបច្ចេកវិជ្ជាព័ត៌មាន និង ទំនាក់ទំនងនោះ ។… ជំនាញ និង ភាពឆ្លាតវៃក្នុងចំណោមពួកយុវវ័យជាច្រើនរបស់យើងសព្វថ្ងៃនេះ រៀបចំដើម្បីចូលរួមចំណែកជួយដល់កិច្ចការនៃសេចក្តីសង្រ្គោះ ។
« ខ្ញុំសូមអញ្ជើញយុវជននៃសាសនាចក្រឲ្យរៀន ហើយមានបទពិសោធន៍ពីវិញ្ញាណនៃអេលីយ៉ា ។ ខ្ញុំសូមលើកទឹកចិត្តអ្នកឲ្យសិក្សា ស្វែងរកជីដូនជីតារបស់អ្នក ហើយត្រៀមខ្លួនរបស់អ្នកដើម្បីធ្វើបុណ្យជ្រមុជទឹកជំនួសនៅក្នុងព្រះដំណាក់នៃព្រះអម្ចាស់ សម្រាប់ញាតិសន្តានដែលស្លាប់ របស់អ្នក ( សូមមើល គ. និង ស. ១២៤:២៨–៣៦ ) ។ យើងខ្ញុំសូមជម្រុញអ្នកឲ្យជួយមនុស្សដទៃស្វែងរកពង្សប្រវត្តិរបស់ពួកគេ » ( « The Hearts of the Children Shall Turn » Ensign ឬ Liahona ខែវិច្ឆិកា ឆ្នាំ ២០១១ ទំព័រ ២៦-២៧ ) ។
-
-
ផែនការរបស់ខ្ញុំដើម្បីរកឈ្មោះជីដូនជីតាដែលត្រូវការពិធីបរិសុទ្ធនៃព្រះវិហារបរិសុទ្ធ ៖
-
ផែនការរបស់ខ្ញុំដើម្បីសម្រេចកិច្ចការព្រះវិហារបរិសុទ្ធសម្រាប់ជីដូនជីតារបស់ខ្ញុំ ៖ ( ប្រសិនបើអាចធ្វើបាន សូមដាក់ផែនការមួយដើម្បីទៅព្រះវិហារបរិសុទ្ធទទួលពិធីបុណ្យជ្រមុជទឹក និង ពិធីបញ្ជាក់ជំនួសជីដូនជីតាដែលអ្នកបានរកឃើញ ) ។
-
-
ខ្ញុំបានសិក្សា គោលលទ្ធិ និង សេចក្តីសញ្ញា ១២៨:១២-២៥ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖