56-р хичээл
Лук 18–21
Оршил
Есүс Христ мөнх бус амьдралдаа хамгийн сүүлийн удаа Иерусалим руу аялахдаа Өөрийн сайн мэдээг зааж, хүмүүсийн дунд гайхамшгуудыг үйлджээ. Тэрээр Иерусалим руу ялгуусан байдалтай орж, ариун сүмийг дахин цэвэрлэж, тэнд хүмүүст заажээ.
Заах зөвлөмж
Лук 18–21
Аврагч Иерусалим орох замдаа заав
Суралцагчид Матай, Маркийг судалж байхдаа Лук 18–21-д цэдэглэгдсэн олон үйл явдлын тухай аль хэдийн ойлгож авсан гэдгийг тэдэнд тайлбарла. Эдгээр үйл явдлын хоёрыг нь давтахын тулд дараах зургуудыг үзүүл: Христ ба залуу баян захирагч (Сайн мэдээний уран зургийн цуглуулга [2009], д. 48; мөн LDS.org-ийг үзнэ үү) мөн Ялгуусан байдалтай орсон нь (Сайн мэдээний уран зургийн цуглуулга, д. 50). Суралцагчдыг эдгээр түүхийг ангийнханд товч ярьж өгөөд, түүхүүдээс сурсан зүйлээсээ юу санаж байгаагаа тайлбарлахад урь.
Хэрэв суралцагчдад тэдгээр түүхийг санахад тусламж хэрэгтэй байвал та Лук 18–21-ийн дараах товч дүгнэлтийг ашиглаж болно. (Тэмдэглэл: Суралцагчдад энэ хичээлийн үйл явдлууд Аврагчийн амьдралын аль үед тохиолдсоныг ойлгоход туслахын тулд та суралцагчдад энэ гарын авлагын хавсралт дахь Есүс Христийн мөнх бус амьдралыг цухас харвал хүснэгтийг харуул.)
Есүс Христ мөнх бус амьдралдаа хамгийн сүүлийн удаа Иерусалим руу аялахдаа хэд хэдэн сургаалт зүйрлэл зааж, олон хүнийг эдгээжээ. Тэрээр залуу баян захирагчийг бүх зүйлээ ядууст өгч, Түүнийг дагахад урив. Тэрээр сохор хүнийг эдгээв. Тэрээр доог тохуурхлыг үл тоон, Иерихо дахь татвар хураагчдын ахлагчийнд зоог идэв.
Тэрээр Иерусалимд ирээд, хурсан олны магтах хашхиралдаан дунд хот руу илжиг унан орж ирэв. Тэрээр мөнгө солигчдыг дахин ариун сүмээс хөөн гаргаж, тэнд хүмүүст заан, ахлах тахилч, хуулийн багш нарын асуултуудад хариулжээ. Тэрээр ариун сүмийн эрдэнэсийн сан руу хоёр жижиг зэс зоосоо хийсэн бэлэвсэн эмэгтэйг магтав. Мөн Тэрээр шавь нартаа Хоёр дахь ирэлтийн талаар заав.
Энэ хичээлээр суралцагчдын судлах ихэнх түүх Лукийн сайн мэдээн дэх өвөрмөц түүх гэдгийг тайлбарла.
Суралцагчдыг эдгээр түүхийг судлахад бэлтгэхийн тулд дараах асуултуудыг самбар дээр бич. Үүнд:
Хүний ямар ямар үйлдэл Их Эзэнд чин сэтгэлээсээ ойртохыг хүсэж байгааг нь илэрхийлж болох вэ?
Түүний ямар зан байдал өршөөгдөж, Их Эзэний тусламжийг хүлээн авахыг чин сэтгэлээсээ хүсэж байгааг харуулах вэ?
Суралцагчдыг Лукийн бичээсүүд дэх дараах түүхүүдийг судлахдаа эдгээр асуултыг бодож үзэхэд урь.
Дараах судрын эшлэлүүдийг самбар дээр бич: Лук 18:1–8; Лук 18:9–14; Лук 18:35–43; Лук 19:1–10. Эдгээр судрын хэсэг нь Аврагчийн мөнх бус амьдралдаа хамгийн сүүлчийн удаа Иерусалим руу хийсэн аяллаас авсан сургаалт зүйрлэл, үйл явдлуудыг багтаадаг болохыг тайларла.
Суралцагч бүрд самбар дээр бичигдсэн судрын эшлэлүүдээс нэгийг оноож өг эсвэл ангийг дөрвөн бүлэгт хуваарилаад, бүлэг бүрд самбар дээрх судрын эшлэлүүдээс нэгийг оноож өгөх талаар бодож үз. Суралцагч бүрийг эсвэл бүлэг бүрийг дааж авсан судрын хэсгээ уншаад, үүнд агуулагдаж байгаа түүх эсвэл сургаалт зүйрлэлийг жүжигчлэн тоглохоор бэлтгэхэд урь. (Хэрэв та суралцагчдыг бүлэг болгож хуваарилаагүй бол түүх бүрийг ангиараа жүжигчлэн тоглох талаар бодож үз. Хэрэв та эдгээр түүхийг жүжигчлэн тоглохыг сонгоогүй бол суралцагчдыг өөрсдөд нь хуваарилагдсан эшлэлийг дараах асуултуудыг ашиглан бие даан судлаад, дараа нь нэг нэгэндээ сурсан зүйлээ заахад урьж болно.) Анги эсвэл бүлэг бүр дэх нэг суралцагч өгүүлэгч болж, ангийнхныг эсвэл бүлгийг жүжигчлэн тоглож байх хооронд судрын түүхийг уншиж өгөх хэрэгтэй гэдгийг тайлбарла. Аврагчид хүндэтгэлтэй хандахын тулд Лук 18:35–43 мөн Лук 19:1–10-ыг жүжигчлэн тоглож байгаа суралцагчдад Есүс Христийг төлөөлөн жүжигчлэн тоглохгүй байхыг зааварла. Өгүүлэгчид Есүсийн үгсийг уншихыг зааварлаж, жүжигчдээс Түүнийг тэнд байгаа мэт хариулж ярихыг хүс.
Бүлгүүдийг бэлтгэх хооронд дараах асуултуудыг хамтдаа ярилцаад, үйл явдлыг жүжигчлэн тоглосныхоо дараа ангийнханд хариултаа хуваалцахад бэлтгэхэд урь. (Эдгээр асуултыг самбар дээр бичих юм уу тараах материал болгон тараах тухай бодож үз.)
-
Энэ түүхэн дэх гол дүр (бэлэвсэн эмэгтэй, татвар хураагч, сохор хүн эсвэл Закхай) юу хүссэн бэ?
-
Гол дүр нь хүссэн зүйлээ чин сэтгэлийнх байсан гэдгийг харуулсан юуг хийсэн бэ?
-
Гол дүрийн итгэлтэй үйлдлийн ачаар юу тохиолдсон бэ?
-
Та нар уг түүхээс ямар зарчим эсвэл сургаалыг тодорхойлж чадах вэ?
Хангалттай хугацаа өгсний дараа ангийнхнаас эсвэл бүлэг бүрээс өгүүлэгчийг шүлгүүдийг унших хооронд түүхүүдээ жүжигчлэн тоглоход урь. Ангийнхныг харж эсвэл судраас дагаж уншиж байх хооронд суралцагчдаас түүх бүр Их Эзэнд итгэх итгэлээ хөгжүүлэх талаар юу зааж байгааг бодож үзэхийг хүс. Жүжиглэсэн тоглолт бүрийн дараа ангийнхнаас эсвэл бүлэг бүрээс өмнөх асуултуудад хариулахыг хүс. Тэднээс тодорхойлсон зарчмууд эсвэл сургаалуудаа самбар дээр жагсааж бичихийг хүс.
Бүлгүүдийг асуултуудад хариулсны дараа дараах асуултуудыг тавь. Үүнд:
-
Та нар гол дүр бүрийн үйлдлээс ямар адил төстэй зүйлийг олж харсан бэ? (Тэд бүгдээрээ хүссэн зүйлээ авахыг хичээхдээ тууштай байж, чин сэтгэлээ харуулсан.)
-
Эдгээр түүх нь Их Эзэнд итгэх итгэлээ хөгжүүлэх талаар бидэнд юу зааж байна вэ?
-
Та нар гол дүр бүрийн үйлдлийнхээ үр дүнд хүлээн авсан зүйлээс ямар адил төстэй зүйл олж харсан бэ? (Бүгдээрээ тусламж эсвэл нигүүлсэл хүлээн авсан.)
Суралцагчдаас түүхүүд дэх адил төстэй зүйлүүдээс нэг зарчим тодорхойлохыг хүс. Суралцагчид өөр өөрөөр хэлж болох ч Хэрэв бид Их Эзэнд итгэх итгэлээ хөгжүүлэхдээ чин сэтгэлээсээ, тууштай байвал Түүний нигүүлслийг хүлээн авч чадна хэмээх зарчмыг олж тогтоосон эсэхийг бататга. Энэ зарчмыг самбар дээр бич.
Нэг суралцагчийг Арванхоёр Төлөөлөгчийн Чуулгын ахлагч Дэвид А.Бэднарийн хэлсэн дараах үгийг чанга уншихад урь. Ангийнхнаас хүмүүсийн Их Эзэнд итгэх итгэлээ хөгжүүлж байна гэдгийг юу харуулдаг болохыг олж мэдэхийг хүс.
“Үнэн итгэл нь Их Эзэн Есүс Христэд төвлөрч, үргэлж зөв шударга үйлдэл рүү хөтөлдөг” (“Ask in Faith,” Ensign эсвэл Lиахона, 2008 оны 5-р сар, 95).
Суралцагчдыг хичээлийн эхэнд самбар дээр бичсэн асуултууд руу хандуул. Суралцагчдаас хажуудаа сууж байгаа суралцагчтайгаа уг асуултуудын хариултыг ярилцахыг хүс.
-
Бид өнөөдөр ямар ямар арга замаар Бурханд итгэх итгэлээ хөгжүүлж болох вэ?
Нэг суралцагчийг ахлагч Бэднарийн хэлсэн дараах үгийг чанга уншихад уриад, ангийнхнаас Их Эзэний нигүүлслийг мэдрэх гэдэг нь юу гэсэн үг болохыг олж сонсохыг хүс.
“Их Эзэний нигүүлсэл нь Их Эзэн Есүс Христээс ирдэг мөн Түүгээр дамжин, Түүний ачаар ирдэг маш хувийн шинжтэй адислал, хүч чадал, хамгаалалт, баталгаа, удирдамж, өгөөмөр сэтгэл, тайтгарал, дэмжлэг, сүнсний бэлгүүд юм” (“The Tender Mercies of the Lord,” Ensign эсвэл Liahona, 2005 оны 5-р сар, 99).
Суралцагчдыг хичээлийн дэвтэр эсвэл судрын тэмдэглэл дээрээ дараах асуултуудад хариулж бичихэд урь. (Та асуултуудыг самбар дээр бичиж болно.)
-
Та нар эсвэл та нарын таньдаг хэн нэгэн ямар ямар арга замаар Есүс Христэд итгэх итгэлээ хөгжүүлж байсан бэ? Та нар эсвэл тэд үр дүнд нь юу мэдэрсэн бэ?
-
Та нар ямар ямар арга замаар Их Эзэний тусламж, нигүүлслийг амьдралдаа авахыг хүсдэг тухайгаа бодож үз. Та нар Их Эзэний нигүүлслийг хүлээн авахын тулд Түүнд итгэх итгэлээ хөгжүүлэх юуг хийх вэ?
Хүсэж байвал, цөөн суралцагчийг бичсэн зүйлээ хуваалцахад урь. Хэт хувийн шинжтэй зүйлээ хуваалцахгүй байхыг тэдэнд сануул. Та уг зарчимтай холбоотой туршлагаа хуваалцаж, үүний үнэний талаар гэрчилж болно.
Тайлбар ба нөхцөл байдлын тухай мэдээлэл
Лук 18:1–8. Цөхрөлтгүй гуйсаар буй бэлэвсэн эмэгтэй, шударга бус шүүгч хоёр
“Лук цөхрөлтгүй гуйсаар буй бэлэвсэн эмэгтэй, шударга бус шүүгч хоёрын сургаалт зүйрлэлийн гол захиас нь ‘сэтгэл алдрахгүйгээр байнга залбирах ёстой’ гэсэн (Лук 18:1) явдал юм хэмээн заажээ. ‘Сэтгэл алдрахгүйгээр’ хэмээн орчуулагдсан грек үг нь сэтгэлээр унах, тэвчээр алдрах, залхах гэсэн утгатай. Уг сургаалт зүйрлэлд, шударга бус байдлыг залруулж өгөхийг шүүгчээс цөхрөлтгүй гуйсан бэлэвсэн эмэгтэй бууж өгөхгүйгээр залбирахыг харуулсан юм. Арванхоёр Төлөөлөгчийн Чуулгын ахлагч Жэффри Р.Холланд:
“‘Ганцаардмал, хүйтэн хөндий, хүнд хэцүү цаг үе ирэх үед бид тэвчээртэй байж, үргэлжлүүлэн, цөхрөлтгүй байх ёстой. Энэ бол цөхрөлтгүй гуйсаар буй бэлэвсэн эмэгтэйн сургаалт зүйрлэл дэх Аврагчийн захиас юм. … Тэрхүү хаалгыг тогшсоор бай. Гуйсаар бай. Тэр хооронд Бурхан та нарын гуйлтуудыг сонсож, зовлон шаналлыг мэдэж байдаг гэдгийг сана. Тэр бол таны Эцэг бөгөөд та Түүний хүүхэд’ гэж заажээ (‘Lessons from Liberty Jail,’ Ensign, 2009 оны 9-р сар, 30).
“Цөхрөлтгүй байдал нь сайн мэдээний суурь зарчим болох итгэл, найдвар дээр үндэслэдэг. Цөхрөлтгүй байдал нь бидний үйлдэл Их Эзэний адислалуудыг амьдралд маань авчрах болно хэмээх итгэлийг маань тусган харуулдаг” (Шинэ Гэрээний суралцагчийн гарын авлага [Сүмийн боловсролын системийн гарын авлага, 2014], 177).
Лук 18:9–14. Фарисайчууд ба татвар хураагчдын тухай сургаалт зүйрлэл
Ерөнхийлөгч Ховард В.Хантэр фарисай хүний болон татвар хураагчийн залбирлын ялгааг тайлбарлахдаа:
“Энэ хоёр хүний залбиралд үүнээс агуу ялгаа байх боломжтой юу? Фарисай хүн бусад хүнийг бүдүүлэг гэж үзсэн учраас өөрийгөө тэднээс дээр гэж итгэн, зайдуу зогсжээ. Татвар хураагч өөрийгөө зохисгүй гэж бодсон учир мөн адил зайдуу зогсов. Фарисай хүн өөрөөсөө өөр хэнийг ч бодоогүй ба бусад бүх хүнийг нүгэлтэн гэж үзсэн юм. Харин татвар хураагч бусад бүх хүнийг зөв шударга, өөрийгөө нүгэлтэн гэж үзжээ. Фарисай хүн Бурханаас юу ч гуйгаагүй ба өөрийн шударга байдалд найджээ. Татвар хураагч Бурханы нигүүлслийг мөн нүглүүдийнхээ өршөөлийг гуйжээ
… Фарисай нь биш, харин татвар хураагч хэмээн үзэн ядагдаж байсан тэрбээр ‘зөвтгөгдөн гэртээ харив’. (Лук 18:14.) Өөрөөр хэлбэл, Их Эзэн түүнийг өршөөгдсөн буюу зөвтгөгдсөн хэмээн хэлжээ. …
Даруу байдал нь жинхэнэ гэгээнтнүүдийн эзэмшдэг бурханлаг зан чанар юм. Бардам хүн яагаад унадаг шалтгааныг ойлгоход амархан. Тэр зөвхөн өөртөө итгээд хангалуун байдаг. … Бардам хүн өөрийгөө Бурханаас тусгаарлаж, тэгэх үедээ цаашдаа гэрэлд амьдрахаа больдог. …
Өөрийгөө өргөмжлөгч нь дорд болгогдох бөгөөд өөрийгөө дорд болгогч нь өргөмжлөгддөг болохыг түүх гэрчилдэг. Хөл хөдөлгөөнтэй гудамж бүрд фарисайчууд бас татвар хураагчид байдаг. Тэдний нэг нь бид ч байж болох юм” гэсэн байна (“The Pharisee and the Publican,” Ensign, 1984 оны 5-р сар, 65–66).
Лук 18:35–43. Сохор хүнийг эдгээсэн нь
Бартимай хэмээх сохор хүний итгэл, тууштай байдал өчнөөн олон хүн түүнийг дуугүй байхыг анхааруулсан ч гэсэн Есүс Христийг хэрхэн дуудсаар байснаас харагддаг (Марк 10:47–48-ыг үзнэ үү).
Лук 18:1–8, 35–43. Цөхрөлтгүй итгэх нь
Арванхоёр Төлөөлөгчийн Чуулгын ахлагч Дэвид А.Бэднар итгэлийнхээ сорилтуудын явцад цөхрөлтгүй байхын ач холбогдлын жишээг хуваалцсан юм.
“Хэдэн жилийн өмнө нэгэн гэр бүл Европоос Нэгдсэн Улс руу аялжээ. Тэднийг хүрэх газартаа ирсний дараахан арван гурван настай хүү нь өвдөв. Эхлээд эцэг эх нь удаан нислэгээс болж ядарснаас гэдэс дотор нь хямарсан гэж бодоод, аяллаа цааш үргэлжлүүлжээ.
Цаг өнгөрөх тусам хүүгийн бие улам дордсоор байлаа. Шингэний дутагдал нь ихэссээр байв. Эцэг нь санваарын адислал өгсөн боловч даруй сайжирсангүй.
Хэдэн цагийн дараа ээж нь хүүгийнхээ хажууд өвдөглөөд, Тэнгэрлэг Эцэгт хүүхдийнхээ сайн сайхны төлөө залбирчээ. Тэд гэрээсээ хол, таньж мэдэхгүй улсад байсан ба эмнэлгийн тусламж хэрхэн хүлээн авахаа ч мэдэхгүй байлаа.
Ээж нь хүүгээсээ хамт залбирахыг хүсэж байгаа эсэхийг асуужээ. Тэрээр ирэх ёстой адислалуудыг зөвхөн хүлээгээд суух нь хангалттай биш гэдгийг мэдэж байв. Тэд үргэлжлүүлэн үйлдэх хэрэгтэй байлаа. Тэрээр хүүгийнх нь хүлээн авсан адислал хүчинтэй хэвээрээ байгааг тайлбарлаад, эртний төлөөлөгчдийн ‘Эзэнд, итгэлийг маань өсгөөч’ (Лук 17:5) хэмээн гуйсан шиг дахин залбирч гуйхыг санал болгов. Залбирал нь санваарын хүчинд итгэж найдах болно хэмээх тунхаглал, хэрэв адислал Бурханы таалалтай нийцэж байвал үр өгөөжтэй байлгахад шаардлагатай аливаа зүйлийг цөхрөлтгүй хийх амлалтыг багтаасан байлаа. Тэднийг ийнхүү энгийнээр залбирсны дараахан хүүгийн бие сайжирч эхэлжээ.
Ээж, хүү хоёрын итгэлтэй үйлдэл амлагдсан санваарын хүчийг урин авчрахад тусалсан байна. … Арвангурван настай хүүгийн эдгэрсэн нь итгэлээ харуулсны дарааг хүртэл ирээгүй ба ‘тэдний залбирлууд дахь итгэлийнх нь дагуу’ (С ба Г 10:47) гүйцэлджээ” (“Ask in Faith,” Ensign эсвэл 2008 оны 4-р сарын Ерөнхий чуулган, 96).
Лук 19:1–10. Татвар хураагчдын ахлагч Закхай
Закхайн талаар илүү их мэдээлэл авахыг хүсвэл Шинэ Гэрээний суралцагчийн гарын авлага ([Cүмийн Болосролын Системийн гарын авлага, 2014], 177-г үзнэ үү).