Leksyon 110

Helaman 8–9

Pasiuna

Human gipamahayag ni Nephi nga ang mga tawo kinahanglang maghinulsol o malaglag, ang hiwi nga mga maghuhukom miagni og daghang tawo sa pagbatok kaniya. Ang pipila maisugon nga nanalipud kaniya. Si Nephi mitudlo nga ang mga tawo nga misalikway sa iyang pagsaksi misalikway usab sa mga pagpamatuod sa tanang propeta nga nag-una kaniya, diin tanan sila mipamatuod kang Jesukristo. Isip usa ka pagpamatuod nga siya propeta, si Nephi mitagna nga ang labaw nga maghuhukom gipatay. Dihang napamatud-ang tinuod ang mga gipanulti ni Nephi, ang ubang tawo midawat niya isip propeta.

Mga Sugyot alang sa Pagtudlo

Helaman 8:1–10

Ang hiwi nga mga maghuhukom misulay sa pag-agni sa mga tawo sa pagbatok ni Nephi

• Unsa ang pipila ka mga impluwensya nga misulay sa pag-aghat kaninyo sa dili pagtuo sa pulong sa mga propeta?

Samtang hisgutan sa mga estudyante kini nga pangutana, paghangyo og usa ka estudyante nga isulat sa pisara ang ilang mga tubag. Dapita ang mga estudyante sa pagpangita og mga panabut o ideya kon unsay angay nilang buhaton kon mag-atubang sila og mga impluwensya sama sa mabasa nila sa Helaman 8 karon.

Pahinumdumi ang mga estudyante nga si Nephi maisugon nga mihatud sa mensahe sa paghinulsol ngadto sa iyang katawhan (tan-awa sa Helaman 7). Dapita ang pipila ka mga estudyante nga magpuli-puli sa pagbasa og kusog gikan sa Helaman 8:1–6. Hangyoa ang klase sa pagsunod, nga ilhon unsay reaksyon sa mga maghuhukom sa gitudlo ni Nephi. Mahimo nimong ipasabut nga pipila sa mga maghuhukom mga sakop usab sa tinago nga pundok ni Gadianton.

• Unsa ang mensahe sa mga maghuhukom ngadto sa mga tawo? (Gisulayan nila ang pag-agni sa mga tawo aron masuko ni Nephi.)

• Sumala sa Helaman 8:4, nganong dili man mosilot ni Nephi ang mga maghuhukom?

Hangyoa ang mga estudyante sa paghunahuna kon unsay ilang buhaton kon dunay tawo nga mosulay sa pag-agni kanila nga ibaliwala ang pulong sa mga propeta.

Pahibaloa ang mga estudyante nga ang ubang mga tawo namulong batok sa mga ideya sa mga maghuhukom. Hangyoa ang usa ka estudyante sa pagbasa og kusog sa Helaman 8:7–9. Ipasabut nga, sama sa ubang mga tawo nga naa sa pundok, mahimo kitang mopadungog sa atong mga tingog sa pagsuporta sa propeta, bisan og ang kadaghanan dili ganahan niini.

• Duna bay higayon sa inyong kinabuhi dihang gipadungog ninyo ang inyong tingog sa pagsuporta sa buhi nga propeta, bisan og ang kadaghanan dili ganahan sa iyang gipangtudlo? Unsay nahimo nga kalainan niini sa imong kinabuhi? Sa unsang paagi kini nakaimpluwensya sa uban?

Hangyoa ang mga estudyante sa pagbasa sa hilum nga paagi sa Helaman 8:10, nga mangita kon sa unsang paagi nakahimo og kalainan ang mga pulong niining mga tawhana.

• Unsa nga kalainan ang nahimo niini dihang ang ubang tawo misuporta sa propeta? Ngano kaha nga importante man nga kini atong buhaton karon?

Dapita ang usa ka estudyante sa pagbasa sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

Elder M. Russell Ballard

“Kinahanglang hinumduman nato ang pamahayag ni Edmund Burke: ‘Ang bugtong ra nga butang nga gikinahanglan aron magmadaugon ang dautan mao nga ang buotang mga tawo walay buhaton.’ [Gikuha gikan sa John Bartlett, comp., Familiar Quotations, 15th ed. (1980), ix.] Gikinahanglan nga atong ipadungog ang atong mga tingog uban sa nagpakabana nga mga lumulupyo sa tibuok kalibutan sa pagsupak sa bag-ong mga hilig. Kinahangalang atong sultihan ang mga sponsor sa makadaot nga media nga napuno na ta. Kinahanglan nga atong suportahan ang mga programa ug mga produkto nga positibo ug makabayaw. Ang pag-apil uban sa atong mga silingan ug mga higala kinsa adunay susama nga mga kabalaka, atong madala ang mensahe niadtong responsable” (“Ipadungog Nato ang Atong mga Tingog,” Ensign o Liahona, Nob. 2003, 18).

• Unsaon man nato sa pagbatok ang mga impluwensya nga mosulay sa pag-agni kanato sa pagbatok sa pulong sa mga propeta?

• Unsa ang pipila ka tukma nga mga paagi sa pagpadungog sa atong mga tingog batok sa dautang mga impluwensya ug pabor sa mga pulong sa mga propeta?

Dapita ang mga estudyante sa paghisgot mahitungod sa usa ka panahon dihang sila o tawo nga ilang nailhan mibarug batok sa ingon niana nga mga impluwensya.

Helaman 8:11–24

Si Helaman mitudlo nga ang tanang propeta mipamatuod kang Jesukristo

Dapita ang usa ka estudyante sa pagbasa og kusog sa Helaman 8:13. Hangyoa ang klase sa pagsunod ug sa pag-ila kon unsay giingon ni Nephi nga gilimud sa mga tawo. Pakit-a ang mga estudyante sa litrato nga Moises ug ang Tumbaga [Brass] nga Bitin (Libro sa mga Hulagway sa Ebanghelyo [2009], nu. 16). Dapita sila sa pagbasa sa Helaman 8:14–15 ug sa pag-ila kon unsay gitudlo ni Moises mahitungod sa Manluluwas.

Moses and the Brass Serpent

• Unsa ang pipila ka paagi nga ang tawo “motan-aw sa Anak sa Dios uban sa hugot nga pagtuo”?

• Ang pagbaton og “mahinulsulon nga espiritu,” sigun sa gipahayag sa Helaman 8:15, mao ang kamapainubsanon, kamahinulsulon, ug madawaton sa kabubut-on sa Ginoo. Ngano nga kining kinaiyaha mahinungdanon man samtang motan-aw kita sa Manluluwas?

• Sa unsang paagi ang pagkahibalo sa misyon sa Manluluwas makatabang sa atong pagbatok sa dautan?

Hatagi og panahon ang mga estudyante sa pagpamalandong

Ipangutana ang maayo kaayong pagkahimo nga mga pangutana nga makapaaghat sa hunahuna. Ang uban nga pangutana tingali magkinahanglan nga ang mga estudyante mogahin og panahon sa pagpamalandong sa dili pa sila motubag. Niana nga sitwasyon, mahimo kang moingon nga, “Palihug hunahunaa sa makadiyot ang inyong itubag, ug dayon pangayoon nako ang mga tubag.”

Dapita ang mga estudyante sa pagsulti og balik sa gitudlo diha sa Helaman 8:15, gamit ang kaugalingon nilang mga pulong. Sama pananglit, mahimo silang moingon nga kon kita mag-focus kang Jesukristo ug mogamit og hugot nga pagtuo Kaniya, makadawat kita og kinabuhing dayon.

Hangyoa ang usa ka estudyante sa pagbasa og kusog sa Helaman 8:16. Dapita ang klase sa pagsunod, sa pag-ila kon si kinsa pa ang mitudlo sa mensahe nga giphayag diha sa Helaman 8:15. Dayon hangyoa ang mga estudyante sa pagpangita og dali sa Helaman 8:17–22 sa ngalan sa ubang mga propeta kinsa mipamatuod kang Kristo. Dapita ang mga estudyante sa paghunahuna sa daghang mga pagpamatuod bahin ni Jesukristo nga ilang nabasa o nadungog gikan sa karaang mga propeta ug sa ulahing adlaw nga mga propeta.

Ipasabut nga daghang mga tawo ang misalikway ni Nephi ug sa iyang mensahe. Dapita ang mga estudyante sa pagbasa sa Helaman 8:24–26 ug sa pag-ila sa mga sangputanan nga giatubang sa mga Nephite tungod kay ilang gisalikway ang pagpamatuod sa mga propeta.

• Ngano kaha nga kadtong padayon nga milimud sa kamatuoran ug mibatok sa Dios nag-atubang man og ingon kagrabe nga mga sangputanan?

• Kanus-a ang mensahe sa usa ka propeta nakatabang nimo nga makaduol sa Ginoo?

Dapita ang mga estudyante sa paghunahuna kon sa unsang paagi mapalambo nila ang ilang mga paningkamot nga makaduol sa Manluluwas. Awhaga sila sa pag-focus og usa ka paagi nga ilang mapalambo sulod sa sunod nga semana.

Helaman 8:25–9:41

Gitagna ni Nephi nga ang labaw nga maghuhukom gipatay

I-summarize ang Helaman 8:25–28 pinaagi sa pagpasabut nga isip usa ka pamatuod nga ang mga tawo anaa sa kahimtang sa pagpakasala ug nga si Nephi namulong sa pulong sa Dios, si Nephi mipadayag nga ang labaw nga maghuhukom gipatay. Ipares-pares ang mga estudyante. Dapita ang matag pares sa pag-imagine nga mga detective sila sa kaso aron sa pagtino kon si kinsa ang mipatay sa labaw nga maghuhukom. Isulat sa pisara ang mosunod nga mga pangutana o ilakip kini sa handout para sa matag pares.

Unang Adlaw sa Imbestigasyon:

1. Dihang lima ka tawo ang nag-imbestigar sa pangangkon ni Nephi, unsay ilang nakita? Nganong nangatumba man sila sa yuta? (Tan-awa sa Helaman 9:1–5.)

2. Kinsa ang gisuspetsahan sa mga tawo nga maoy mga mamumuno og mipatay? (Tan-awa sa Helaman 9:7–9.)

Ikaduhang Adlaw sa Imbestigasyon:

3. Kinsa ang gibuhian? (Tan-awa sa Helaman 9:10–13, 18.)

4. Kinsa ang giakusahan? (Tan-awa sa Helaman 9:16–17, 19.)

5. Unsa nga dugang impormasyon ang gipaambit ni Nephi? (Tan-awa sa Helaman 9:25–36.)

6. Kinsa ang mipatay o mamumuno? (Tan-awa sa Helaman 9:37–38.)

Dapita ang managpares sa pagpangita sa mga tubag sa mga pangutana 1 ug 2. Kon duna pa silay igong panahon, pangutan-a:

• Dihang nadiskubrihan sa lima ang gipatay nga labawng maghuhukom, unsay ilang gituohan? Unsay ilang gikahadlokan? (Tan-awa sa Helaman 9:5.)

Dapita ang managpares sa pagtubag sa nahibilin nga mga pangutana aron makompleto ang ilang imbestigasyon. Dayon ipangutana:

• Sumala ni Nephi, unsa man kuno ang isulti ni Seantum human siya motug-an sa iyang sala? (Tan-awa sa Helaman 9:36.)

• Sumala sa Helaman 9:39–41, ngano nga ang ubang mga tawo mituo man ni Nephi?

Dapita ang mga estudyante sa pag-summarize kon unsay ilang nakat-unan gikan sa Helaman 9 mahitungod sa mga pulong sa mga propeta. Mahimo nga lain-lain ang masulti sa mga estudyante, apan siguroa nga ilang mahibaloan ang mosunod nga baruganan: Ang mga pulong sa mga propeta matuman. Sa pagsuporta niini nga kamatuoran, mahimo nimong ipabasa sa mga estudyante ang Doktrina ug mga Pakigsaad 1:37–38.

• Unsa nga mga kasinatian ang nakalig-on sa imong pagpamatuod nga kita dunay tinuod nga mga propeta sa kalibutan karon?

Tapusa pinaagi sa imong pagpamatuod nga ang mga pulong sa mga propeta matuman.

Komentaryo ug Background nga Impormasyon

Helaman 8:14–15. “Ang tumbaga [brass] nga bitin”

Dihang misulti si Nephi bahin ni Moises nga mipaisa sa “tumbaga nga bitin,” ang gipasabut niya mao ang panahon dihang ang mga anak sa Israel gihugpaan sa “bitin nga mapintas” (tan-awa sa Numeros 21:6–9; timan-i nga ang pulong nga tumbaga nagpasabut nga brass). Ang sinugdanan sa kasamok sa Israelite mao nga namulong sila og dautan batok sa Dios ug sa Iyang propeta (tan-awa sa Numeros 21:5). Kadtong mitan-aw sa tumbaga nga bitin nangaayo, ug kadtong mipili nga dili motan-aw nangamatay (tan-awa sa Numeros 21:9; 1 Nephi 17:41).

Sama niadtong mga Israelite, daghan sa mga tawo sa kapanahunan ni Nephi namulong batok sa Dios ug sa Iyang propeta. Dihang si Nephi nag-refer sa istorya bahin sa tumbaga nga bitin, gihatagan niya og gibug-aton nga ang iyang katawhan “motan-aw sa Anak sa Dios uban sa hugot nga pagtuo” ug mabuhi (Helaman 8:15; tan-awa usab sa Juan 3:14–15, diin ang gipasabut ni Jesukristo mismo mao ang tumbaga nga bitin isip simbolo sa Iyang umaabut nga Paglansang). Dayon gipahinumduman ni Nephi ang mga tawo nga ang tanang mga propeta mipamatuod kang Kristo (tan-awa sa Helaman 8:16–23).

Dugang nga Ideya sa Pagtudlo

Helaman 7–9. Pagpasalida sa Video

Imbis mogamit sa investigation activity sa leksyon, mahimo nimong ipasalida ang video nga giulohan og “The Pride Cycle,” nga naghulagway sa istorya nga naa sa Helaman 7–9 ug sa ikaduhang pipila ka bersikulo sa Helaman 10. Ang video anaa sa Book of Mormon DVD Presentations 1–19 (54011) ug sa LDS.org.