Դաս 74

Հովհաննես 14

Նախաբան

Զատկի ընթրիքից հետո Հիսուսն ուսուցանեց Իր Առաքյալներին, թե ինչպես վերադառնալ Երկնային Հոր մոտ և ինչպես սեր ցուցաբերել Փրկչի հանդեպ: Այնուհետև Հիսուսը խոստացավ Առաքյալներին, որ կուղարկի նրանց մի ուրիշ Մխիթարիչ:

Ուսուցման առաջարկներ

Հովհաննես 14․1-14

Փրկիչն ուսուցանում է Իր Առաքյալներին, թե ինչպես վերադառնալ Երկնային Հոր մոտ

Եթե հնարավոր է, ցուցադրեք ձեր քաղաքի քարտեզը և հրավիրեք ուսանողներին որոշել իրենց ներկայիս գտնվելու տեղը դրա վրա: Քարտեզի վրա մատնացույց արեք մեկ այլ վայր, որը ծանոթ է ուսանողներին: Խնդրեք նրանց թղթի մի կտորի վրա գրել, թե ինչպես կարող են հասնել իրենց ներկա տեղից այդ տեղը: Հրավիրեք մեկ կամ երկու ուսանողների ասել, թե ինչ են գրել:

Գրատախտակին գրեք Սելեստիալ Արքայության: Հարցրեք ուսանողներին, թե ինչ ուղղություններ կտային մեկին, ով կցանկանար իմանալ, թե ինչպես հասնել սելեստիալ արքայություն:

Խնդրեք ուսանողներին Հովհաննես 14 գլուխն ուսումնասիրելիս փնտրեն մի ճշմարտություն, որը կօգներ նրանց իմանալ, թե ինչպես վերադառնալ Երկնային Հոր մոտ և մտնել սելեստիալ արքայություն:

Որպեսզի օգնեք ուսանողներին հասկանալ Հովհաննես 14 գլխի համատեքստը, հիշեցրեք նրանց, որ Փրկիչն Իր Առաքյալների հետ նշում էր Զատկի տոնը Երուսաղեմում, վերին սենյակում: Զատկի ընթրիքից հետո Հիսուսն ասաց Իր աշակերտներին, որ շուտով լքելու է նրանց (տես Հովհաննես 13.33):

Հանձնարարեք մի քանի ուսանողների հերթով բարձրաձայն կարդալ Հովհաննես 14․1-5 հատվածները: Խնդրեք դասարանի անդամներին հետևել, տեսնելով, թե ինչ ուսուցանեց Հիսուսն Իր Առաքյալներին, որպեսզի մխիթարի նրանց:

• Ի՞նչ ուսուցանեց Հիսուսն Իր Առաքյալներին, որպեսզի մխիթարի նրանց:

• Ձեր կարծիքով, ի՞նչ է նշանակում «Իմ Հօր տանը շատ բնակարաններ կան» արտահայտությունը 2 հատվածում:

Հանձնարարեք որևէ ուսանողի բարձրաձայն կարդալ Մարգարե Ջոզեֆ Սմիթի հետևյալ խոսքը.

«Իմ Հոր տանը շատ բնակարաններ կան» [նախադասությունը] … պետք է լինի՝ «Իմ Հոր թագավորությունում շատ թագավորություններ կան», որպեսզի դուք լինեք Աստծո ժառանգները և իմ ժառանգակիցները: … Կան բնակարաններ նրանց համար, ովքեր հնազանդվում են սելեստիալ օրենքին, և կան այլ բնակարաններ նրանց համար, ովքեր չեն համապատասխանում օրենքին՝ ամեն մարդ ըստ իր կարգի» (Եկեղեցու Նախագահների ուսմունքները. Ջոզեֆ Սմիթ [2007], 219):

Կարող եք առաջարկել, որ ուսանողները գրեն թագավորություն և թագավորություններ բառերն իրենց սուրբ գրություններում՝ տանը և բնակարաններ բառերի վերևում՝ Հովհաննես 14.2 հատվածում:

• Հովհաննես 14.1–4 հատվածներում, ո՞ր ուսմունքները կարող էին մխիթարող լինել Առաքյալների համար:

• Համաձայն 5 հատվածի՝ ինչպե՞ս արձագանքեց Թովմասը Փրկչի այն ասածին, թե Իր Առաքյալները գիտեն Երկնային Հոր թագավորության ճանապարհը:

Հրավիրեք ուսանողներից մեկին բարձրաձայն կարդալ Հովհաննես 14.6 հատվածը, և դասարանին խնդրեք տեսնել, թե ինչ պատասխանեց Հիսուսը Թովմասի հարցին:

Հովհաննես 14.6 սուրբ գրությունների սերտման հատված է: Սուրբ գրությունների սերտման հատվածներն ուսումնասիրելիս ուսանողները կավելացնեն իերնց հասկացողությունը հիմնական վարդապետությունների վերաբերյալ և պատրաստ կլինեն ուսուցանել դրանք մյուսներին։ Դուք կարող եք առաջարկել, որ ուսանողները նշեն սուրբ գրությունների սերտման հատվածները տարբերակիչ ձևով, որպեսզի կարողանան հեշտությամբ գտնել այն: Հղում արեք դասի վերջում գտնվող Ուսուցման մտքերին, որպեսզի օգնեք ուսանողներին սերտել այդ հատվածները:

• Ինչպե՞ս Հիսուսը պատասխանեց Թովմասի հարցին:

Գրատախտակին նկարեք մի ճանապարհ: Ճանապարհի մի ծայրում գրեք Մենք, մյուս ծայրում գրեք Երկնային Հոր Թագավորություն: Գրեք Ճանապարհ ճանապարհի տակ և նշեք, որ այս արտահայտությունը վերաբերում է այն ուղուն, որը տանում է մի տեղից դեպի մյուսը:

• Ի՞նչ առումով է Փրկիչը՝ Ճանապարհ: (Ուսանողները կարող են ասել, որ Փրկիչը ցույց է տալիս մեզ, թե ինչպես ապրենք, որպեսզի նմանվենք Աստծուն, և թե ինչպես արժանանանք Երկնային Հոր ներկայությունում ապրելուն։)

Գրատախտակին «Ճանապարհի» տակ գրեք Ճշմարտություն և Կյանք:

• Ի՞նչ առումներով է Հիսուսը Քրիստոսը Ճշմարտություն: (Նա բոլոր ճշմարտությունների աղբյուրն է և կատարյալ ձևով ապրել է այդ ճշմարտություններով։)

• Ի՞նչ առումներով է Հիսուսը Կյանք: (Նա հնարավոր է դարձնում մեզ համար, որ հաղթահարենք ֆիզիկական մահը և հարություն առնենք անմահ ֆիզիկական մարմիններով և հաղթահարենք հոգևոր մահը՝ հավերժական կյանք ձեռք բերելու համար: Նա է «լույս, որը բոլոր բաների մեջ է, որը կյանք է տալիս բոլոր բաներին» [ՎևՈւ 88.13]։)

Գրատախտակին նկարված ճանապարհի տակ գրեք Հիսուս Քրիստոսն է՝ «Ճանապարհ» բառի կողքին:

• Քննարկվածի հիման վրա, ինչպես կամփոփեք Փրկչի խոսքերի նշանակությունը, որ «ոչ ով չի գալիս Հօր մօտ, եթէ ոչ ինձանով» (Հովհաննես 14.6): (Չնայած ուսանողները կարող են օգտագործել տարբեր խոսքեր, նրանք պետք է բացահայտեն հետևյալ ճշմարտությունը. Միայն Հիսուս Քրիստոսի Քավության միջոցով և հետևելով Նրա ուղուն մենք կարող ենք մտնել Երկնային Հոր թագավորությունը:)

• Ի՞նչ կպատահի, եթե մենք փորձենք հետևել մի ուղով, որը Փրկչի ուղին չէ:

Հանձնարարեք մի ուսանողի բարձրաձայն կարդալ Յոթանասունից Երեց Լորենս Ե. Քորբրիջի հետևյալ խոսքը: Դասարանի անդամներին խնդրեք լսել, թե ինչ կպատահի, եթե փորձենք հետևել մի ուղու, որը Փրկչի ուղին չէ:

«Կա միայն մեկ ճանապարհ դեպի երջանկություն և ինքնակայացում: Նա է Ճանապարհը: Յուրաքանչյուր այլ ճանապարհ, ցանկացած այլ ճանապարհ, ինչպիսին էլ որ լինի, անմտություն է: …

… Մենք կարող ենք կամ հետևել Տիրոջը և օժտվել Նրա զորությամբ ու ունենալ խաղաղություն, լույս, ուժ, գիտելիք, վստահություն, ուղղություն, սեր և ուրախություն, կամ կարող ենք գնալ որևէ այլ ճանապարհով, ցանկացած այլ ճանապարհով, ինչպիսին էլ այն լինի, և գնալ միայնակ, առանց Նրա աջակցության, առանց Նրա զորության, առանց ուղղության, խավարի, խառնաշփոթի, կասկածի, վշտի ու հուսահատության մեջ: Եվ ես հարցնում եմ, ո՞ր ճանապարհն է ավելի հեշտ: …

Կա միայն մեկ ճանապարհ դեպի երջանկություն և ինքնակայացում: Հիսուս Քրիստոսն է ճանապարհը» («Ճանապարհը» Ensign կամ Լիահոնա, նոյ. 2008, 34, 36):

• Ըստ Երեց Քորբրիջի, ի՞նչ կպատահի, եթե մենք չհետևենք Փրկչի ուղուն:

• Ի՞նչ կպատահի, եթե հետևենք Փրկչի ուղուն:

Ուսանողներին խնդրեք խորհել փորձառությունների մասին, որ նրանք ունեցել են՝ երբ օրհնվել են Փրկչի ուղուն հետևելով: Հրավիրեք մի քանիսին` կիսվել իրենց փորձառություններով:

Ամփոփեք Հովհաննես 14.7–14 հատվածները, բացատրելով, որ Փրկիչն ուսուցանել է Իր Առաքյալներին, որ երկիր գալու Իր նպատակներից մեկը՝ Իր խոսքերի ու գործերի միջոցով բացահայտելն է Երկնային Հոր ճշմարիտ բնույթը: Նա նաև խոստացավ Իր Առաքյալներին, որ նրանք զորություն կունենան մեծ գործեր կատարելու:

Հովհաննես 14.15–31

Հիսուսն ուսուցանում է Իր Առաքյալներին, թե ինչպես սեր ցուցաբերել Իր հանդեպ

Խնդրեք ուսանողներին մտածել մեկի մասին, ում սիրում են:

• Ինչպե՞ս եք ցույց տալիս ձեր սերը այդ մադու նկատմամբ:

Հրավիրեք մի ուսանողի բարձրաձայն կարդալ Հովհաննես 14.15 հատվածը, և խնդրեք դասարանին տեսնել, թե Հիսուսն ի՞նչ ասաց Իր Առաքյալներին, որ անեն, որպեսզի ցույց տան իրենց սերը Իր հանդեպ:

Հովհաննես 14.15-ը սուրբ գրությունների սերտման հատված է: Սուրբ գրությունների սերտման հատվածներն ուսումնասիրելը կօգնի ուսանողներին լավացնել հիմնական վարդապետությունների ըմբռնումը և պատրաստ լինել ուսուցանել դրանք ուրիշներին։ Դուք կարող եք առաջարկել, որ ուսանողները նշեն սուրբ գրությունների սերտման հատվածները տարբերակիչ ձևով, որպեսզի կարողանան հեշտությամբ գտնել դրանք: Հղում կատարեք դասի վերջում տրված ուսուցանման համար գաղափարներին, որպեսզի օգնեք ուսանողներին` սերտել այս հատվածները:

• Ելնելով նրանից, թե Հիսուսն ինչ ուսուցանեց Իր Առաքյալներին՝ ի՞նչ կարող ենք մենք անել, որպեսզի ցույց տանք մեր սերը Հիսուս Քրիստոսի հանդեպ: (Ուսանողները պետք է ասեն հետևյալ ճշմարտությունը. Մենք ցույց ենք տալիս մեր սերը Հիսուս Քրիստոսի հանդեպ պահելով Նրա պատվիրանները:)

Դասարան բերեք մի քանի թղթե ժապավեններ, որոնց վրա գրված կլինեն պատվիրաններ՝ (ինչպես օրինակ, հնազանդվել Իմաստության Խոսքին, վճարել տասանորդը, և սուրբ պահել Հանգստության օրը): Հրավիրեք մի քանի ուսանողների կանգնել դասարանի առաջ: Հրահանգեք ամեն մեկին վերցնել թղթի մի ժապավեն, կարդալ պատվիրանը բարձրաձայն, և բացատրել, թե այդ պատվիրանը պահելով ինչպես կարող ենք ցույց տալ մեր սերը Հիսուս Քրիստոսի հանդեպ: Այնուհետև խնդրեք նրանց վերադառնալ իրենց տեղերը:

Հրավիրեք ուսանողներին խորհել, թե որքա՞ն լավ են իրենք ցույց տալիս իրենց սերը Փրկչի հանդեպ՝ պահելով Նրա պատվիրանները: Քաջալերեք նրանց նպատակ դնել՝ ցույց տալու իրենց սերը Փրկչի հանդեպ, ավելի լավ պահելով պատվիրաններից մեկը կամ մեկից ավել, որոնք հնարավոր է դժվար են իրենց համար:

Հանձնարարեք որևէ ուսանողի բարձրաձայն կարդալ Հովհաննես 14.16–17, 26 հատվածները։ Խնդրեք դասարանի անդամներին հետևել, փնտրելով Իր Առաքյալներին տված Տիրոջ խոստումը:

• Ի՞նչ խոստացավ Փրկիչն Իր Առաքյալներին:

Բացատրեք, որ «ուրիշ Մխիթարիչ» արտահայտությունը հատված 16-ում վերաբերում է Սուրբ Հոգուն: Քանի որ Իր մահկանացու ծառայության ժամանակ Փրկիչը մխիթարիչ էր Իր Առաքյալների համար, Նա կոչեց Սուրբ Հոգին ուրիշ Մխիթարիչ:

• Համաձայն Հովհաննես 14.16–17, 26 հատվածների, Սուրբ Հոգին ի՞նչ կարող է անել մեզ համար: (Իրենց խոսքերով պատմելով ուսանողները պետք է հասկանան հետևյալ ճշմարտությունը. Սուրբ Հոգին կարող է մխիթարել մեզ, ուսուցանել մեզ բոլոր բաները, և բերել բոլոր բաները մեր հիշողության մեջ:)

Հրավիրեք ուսանողներին գրել հետևյալ հարցերի պատասխաններն իրենց տետրերում կամ սուրբ գրությունների ուսումնասիրության օրագրերում.

• Ե՞րբ եք զգացել, որ Սուրբ Հոգին մխիթարել է ձեզ։ Ե՞րբ եք զգացել, որ Նա ուսուցանել է ձեզ։ Ե՞րբ է Նա օգնել ձեզ, որ բաներ հիշեք:

Բավարար ժամանակից հետո հրավիրեք մի քանի կամավորների` կիսվել իրենց գրածով:

Հրավիրեք մի քանի ուսանողների հերթով բարձրաձայն կարդալ Հովհաննես 14.18–23 հատվածները:

• Համաձայն 21 և 23 հատվածների, ինչպե՞ս մենք կօրհնվենք, եթե պահենք պատվիրանները: (Չնայած ուսանողները կարող են օգտագործել տարբեր խոսքեր, նրանք պետք է հասկանան հետևյալ սկզբունքը. Եթե մենք պահենք պատվիրանները, Երկնային Հայրը և Հիսուս Քրիստոսը մեզ հետ կլինեն:)

• Ձեր կարծիքով, ի՞նչ է նշանակում, որ Երկնային Հայրը և Հիսուս Քրիստոսը կլինեն մեզ հետ: (Սա վերաբերում է Երկնային Հոր և Հիսուս Քրիստոսի անձնապես հայտնվելուն [տես ՎևՈւ 130.3]:)

Բացատրեք, որ Մարգարե Ջոզեֆ Սմիթը սովորեցրել է, որ մինչ Սուրբ Հոգին կոչվում է առաջին Մխիթարիչ, Հիսուս Քրիստոսը երկրորդ Մխիթարիչն է: Որպեսզի ստանանք Նրան որպես Երկրորդ Մխիթարիչ, մենք նախ պետք է հավաքք զարգացնենք Նրա հանդեպ, ապաշխարենք, մկրտվենք, ստանանք Սուրբ Հոգին և ձգտենք արդարակյաց լինել ու ծառայել Աստծուն: Եթե անենք այս բաները, ի վերջո «Հիսուս Քրիստոս անձը կայցելի [մեզ], կամ Նա կհայտնվի [մեզ] ժամանակ առ ժամանակ, …և երկինքների տեսլականները կբացվեն [մեզ], և Տերը կուսուցանի [մեզ] դեմ առ դեմ» (in History of the Church, 3:380–81): Խոստումը կիրականանա համաձայն Տիրոջ կամքի և ժամանակի (տես ՎևՈւ 88.68):

Հրավիրեք ուսանողներին մտքում կարդալ Հովհաննես 14.27հատվածը, փնտրելով Փրկչի ուղերձը Իր Առաքյալներին:

• Ինչպե՞ս է հատված 27-ի Փրկչի ուղերձը վերաբերում այս դասին մեր հայտնաբերած սկզբունքներին:

• Ո՞րն է տարբերությունը՝ Փրկչի առաջարկած խաղաղության և աշխարհի առաջարկած խաղաղության միջև:

Ամփոփեք Հովհաննես 14.28–30 և Ջոզեֆ Սմիթի Թարգմանություն, Հովհաննես 14.30 (հատված 30, ծանոթագրություն ա) բացատրելով, որ Հիսուսն ասել է Իր Առաքյալներին, որ պետք է ուրախանան, քանի որ Նա շուտով հեռանալու է իրենց մոտից և վերադառնալու է Երկնային Հոր մոտ: Նա նաև ասաց, որ Սատանան զորություն չունի Նրա վրա, քանի որ Նա հաղթել է աշխարհին: Հիսուսն ասաց Առաքյալներին, որ Սատանան կարող դեռ ազդել նրանց վրա, քանի որ նրանք դեռ չեն ավարտել իրենց աշխատանքը երկրի վրա:

Հրավիրեք ուսանողներին մտքում կարդալ Հովհաննես 14.31 հատվածը, տեսնելով, թե Փրկիչն ինչ էր ցանկանում, որ աշխարհն իմանար:

• Ի՞նչ էր Փրկիչը ցանկանում, որ աշխարհն իմանար:

• Ինչպե՞ս էր Փրկիչը ցույց տալիս Իր սերը Երկնային Հոր հանդեպ:

Եզրափակեք, հրավիրելով ուսանողներին վկայել, թե այս դասի սկզբունքներն ինչպես կօգնեն նրանց, երբ փորձում են վերադառնալ Աստծո ներկայությունը՝ սելեստիալ արքայությունում:

Սուրբ գրությունների սերտման հատված՝ Հովհաննես 14․6:

Օգնեք ուսանողներին անգիր սովորել Հովհաննես 14.6 հատվածը, կարող եք օգտագործել այս ձեռնարկի վերջում տրված հավելվածի գաղափարներից որևէ մեկը:

Սուրբ գրությունների սերտման հատված՝ Հովհաննես 14․15:

Որպեսզի օգնեք ուսանողներին անգիր սովորել Հովհաննես 14.15 հատվածը, հրավիրեք նրանց գրել այա մի թղթի վրա: Խնդրեք նրանց այնքան կրկնել այս հատվածը մինչև որ մտապահեն: Այնուհետև թող դնեն այդ թուղթը այնպիսի մի տեղ, որտեղ այն կհիշեցնի նրանց իրենց սերը ցույց տալ Տիրոջ հանդեպ՝ պահելով Նրա պատվիրանները:

Բացատրական և պատմական տեղեկություն

Հովհաննես 14.6: «Ես եմ ճանապարհը, եւ ճշմարտությունը եւ կեանքը»

Տասներկու Առաքյալների Քվորումից Երեց Բրյուս Ռ․ Մակքոնկին բացատրել է Հովհաննես 14.6 հատվածի կարևորությունը և թե ինչպես է Հիսուս Քրիստոսը՝ «ճանապարհը, եւ ճշմարտությունը եւ կեանքը»:

«Նա է Ճանապարհը, քանի որ նրանով և նրա միջոցով է փրկությունը գալիս, «ոչ ով չի գալիս Հօր մօտ, եթէ ոչ ինձանով», - ասել է Նա: (Հովհաննես 14.6) «Նա է Ճշմարտությունը, քանի որ Նա այդ սուրբ հատկանիշի մարմնավորումն ու անձնավորումն է: (Ալմա 5:48) Եվ Նա է Կյանքը, քանի որ Նրանում է կենտրոնանում կյանքի լույսը, առանց Նրա և Նրա զորության չի կարող լինել գոյությունը, եթե Նա հեռացնի կյանքի լույսը, մահն անմիջապես հաղթանակ կկնքի, և առանց Նրա չէր լինի ոչ նախամահկանացու կյանքը, ոչ էլ հավերժական կյանքը՝ անվերջ փառքի մեջ» (Mormon Doctrine, 2nd ed. [1966], 832):

Հովհաննես 14.9–12: «Ինձ տեսնողը Հօրը տեսավ»

Նախագահ Ջոզեֆ Ֆ. Սմիթը բացատրել է Փրկչի այս խոսքերի նշանակությունը. «Ինձ տեսնողը Հօրը տեսավ».

«Հիսուս Քրիստոսը՝ Աստծո Որդին, Իր Հոր «էության նկարագիրն է» (Եբրայեցիս 1.3): Նա քայլեց երկրի վրա որպես մարդկային էակ, որպես կատարյալ մարդ, և ի պատասխան Իրեն տրված հարցին, ասաց. «Ինձ տեսնողը Հորը տեսավ» (Հովհաննես 14.9): Սա միայն պետք է լուծի խնդիրը, բավարարելով ամեն խորհրդածող և ակնածալից միտքը։ Եզրակացությունն անվիճարկելի է՝ եթե Աստծո Որդին Իր Հոր էության նկարագիրն է (այսինքն նմանությունը), ապա Նրա Հայրը մարդու տեսքով է, քանզի այդպիսին էր Աստծո Որդին, ոչ միայն Իր մահկանացու կյանքում, այլ նախքան Իր մահկանացու ծնունդը և Իր հարությունից հետո։ Այդ տեսքով էին Հայրն ու Որդին, որպես երկու անձնավորություններ, հայտնվել Ջոզեֆ Սմիթին, երբ լինելով տասնչորսամյա պատանի նա ստացավ իր առաջին տեսիլքը» (Եկեղեցու Նախագահների ուսմունքները. Ջոզեֆ Ֆ. Սմիթ [1998], 334):

Հովհաննես 14.12: «Եւ նորանցից էլ ավելի մեծ բաներ կգործէ. որովհետև ես իմ Հօր մոտ եմ գնում»

Գուցե շփոթված զգանք, կարդալով, որ նրանք, ովքեր հավատում են Հիսուս Քրիստոսին, կանեն ավելի մեծ գործեր, քան Նա է արել: Այնուամենայնիվ, Lectures on Faith-ում բացատրվում է, որ այս հատվածն ավելի լավ է հասկացվում, երբ զուգահեռ է անցկացվում Հովհաննես 17.20–24 հատվածներում պարունակվող Փրկչի ուսմունքների հետ.

«Բոլոր այդ խոսքերը միասին պարզ են դարձնում պատմությունը փառավորված սրբերի վիճակի մասին, ինչպես որ լեզուն կարող է փոխանցել՝ Հիսուսի արած գործերը նրանք պետք է անեն և դեռ ավելի մեծ գործեր, քան նրանք, որոնք Նա էր արել, երբ նրանց հետ էր, որովհետև Նա գնաց Հոր մոտ: Նա չի ասում, որ նրանք պետք է ժամանակին անեն այդ գործերը, բայց նրանք պետք է անեն ավելի մեծ գործեր, քանի որ Նա գնացել է Հոր մոտ: … Ավելի մեծ գործերը, որոնք պետք է անեին նրանք, ովքեր հավատացել են Նրա անվանը, պետք է արվեն հավերժության մեջ, ուր Նա գնում էր և որտեղ նրանք պետք է տեսնեն Նրա փառքը» (Lectures on Faith [1985], 77–78):

Հովհաննես 14.16–23, 26; 15.26; 16.7 «Մխիթարիչը» և Սուրբ Հոգու և Հիսուս Քրիստոսի տիտղոսն է։

Մարգարե Ջոզեֆ Սմիթը բացատրել է.

«Խոսվել է երկու Մխիթարիչների մասին: Մեկը Սուրբ Հոգին է, նույնը, որ տրվել էր Պենտեկոստեի օրը, և որ բոլոր սրբերը ստանում են հավատքից, ապաշխարությունից և մկրտությունից հետո: …

Մյուս Մխիթարիչը, որի մասին խոսում են, մեծ հետաքրքրություն է վայելում, և թերևս, այս սերնդից մի քանիսի կողմից է միայն հասկացվել: Այն բանից հետո, երբ մարդը հավատք է դրսևորում Քրիստոսի հանդեպ, ապաշխարում է իր մեղքերից, մկրտվում է իր մեղքերի թողության համար և ստանում է Սուրբ Հոգին (ձեռնադրմամբ), որը առաջին Մխիթարիչն է, ապա թույլ տվեք, որ նա շարունակի խոնարհեցնել իրեն Աստծո առաջ` ունենալով քաղց ու ծարավ արդարակեցության համար, ապրելով Աստծո յուրաքանչյուր խոսքով, և Տերը շուտով կասի նրան՝ Որդիս, դու վեհացում կստանաս։ Երբ Տերը հիմնովին ստուգի նրան և գտնի, որ մարդը վճռական է ծառայելու Իրեն բոլոր վտանգների ժամանակ, ապա մարդն իր կոչումը և ընտրությունը հաստատ է դարձնում, ապա նա արտոնություն կունենա ստանալու մյուս Մխիթարիչին, որին Տերը խոստացել է սրբերին, ինչի մասին գրված է Սուրբ Հովհաննեսի վկայության մեջ՝ 14 գլխի 12-27 հատվածներում» (in History of the Church, 3:380):

Տասներկու Առաքյալների Քվորումից Երեց Բրյուս Ռ. Մակքոնկին բացատրել է Սուրբ Հոգու դերը որպես Մխիթարիչ.

«Քանի դեռ Հիսուսը նրանց հետ էր, Նա նրանց Մխիթարիչն էր, Նա խաղաղություն էր հաղորդում նրանց հոգիներին: Նրանք, ովքեր ծանրաբեռնված են եղել չարչարանքներով ու տառապանքներով ու աշխարհի դժվարություններով, եկել են Նրա մոտ և հանգիստ գտել իրենց հոգիների համար: Նա մխիթարել է այրի կնոջը և հայր է եղել հայրազուրկի համար: Նրա խոսքերը բարձրացրել են հավատացող հոգիները դեպի պարզության և խաղաղության նոր բարձունքներ: Այժմ, Նա հեռանում է, սակայն կուղարկի մեկ ուրիշ Մխիթարիչ՝ Սուրբ Հոգուն, հավատարիմների հետ ընդմիշտ մնալու համար:

Այսպիսով, բոլոր մարդկանց համար, բացի այն մի քանիսից, ովքեր լսել են Նրա ձայնը մահկանացիության ժամանակ, Սուրբ Հոգին առաջին Մխիթարիչն է: Աստվածագլխի այս անդամը խաղաղություն է հաղորդում արդարների հոգիներին բոլոր ժամանակներում: Սուրբ Հոգին «Աստծո պարգևն է բոլոր նրանց, ովքեր ջանասիրաբար փնտրում են իրեն, ինչպես ժամանակներում հին, այնպես էլ այն ժամանակ, երբ նա իրեն հայտնի կդարձնի մարդկանց զավակներին» (1 Նե. 10.17), և, ինչպես նաև գալիք ժամանակներում: Նա ճշմարտության Հոգին է, ինչպես և Քրիստոսը, բայց աշխարհը չի կարող ստանալ Սուրբ Հոգին, որովհետև Հոգին չի բնակվում անմաքուր տաղավարներում» (Mortal Messiah, 4 vols. [1979–81], 4:74–75):

Հովհաննես 14.26: Սուրբ Հոգին տարբեր է Քրիստոսի Լույսից

Նախագահ Ջոզեֆ Ֆիլդինգ Սմիթը բացատրել է Սուրբ Հոգու և Քրիստոսի Լույսի միջև տարբերությունը.

«Սուրբ Հոգին չպետք է շփոթել Հոգու հետ, որը լցնում է տարածության անսահմանությունը և որը ներկա է ամենուրեք: Այս մյուս Հոգին [Քրիստոսի Լույսը] անդեմ է և չունի չափեր, ոչ էլ ծավալ, այն գալիս է Հոր և Որդու ներկայությունից և բոլոր բաներում է: Մենք պետք է խոսենք Սուրբ Հոգու մասին որպես անձի, որպես «նա», իսկ այս մյուս Հոգու՝ որպես «այն», թեև երբ մենք խոսում ենք Սուրբ Հոգու զորության կամ պարգևի մասին, կարող ենք պատշաճորեն ասել «այն»:

«… Սուրբ Հոգին, ինչպես մեզ ուսուցանվել է ժամանակակից հայտնությամբ, Աստվածագլխի երրորդ անդամն է և Հոգու անձնավորություն: Այս եզրերն օգտագործվում են որպես հոմանիշներ՝ Աստծո Հոգի, Տիրոջ Հոգի, Ճշմարտության Հոգի, Սուրբ Հոգի, Մխիթարիչ. բոլորը վերաբերում են Սուրբ Հոգուն: Նույն եզրերը լայնորեն օգտագործվում են Հիսուս Քրիստոսի Հոգու դեպքում, որը նաև կոչվում է Ճշմարտության Լույս, Քրիստոսի Լույս, Աստծո Հոգի և Տիրոջ Հոգի, միևնույն ժամանակ, դրանք առանձին ու տարբեր բաներ են: Շփոթությունը մեծ է մեզ մոտ, որովհետև մենք դա հստակ չենք պահել մեր մտքերում» (Doctrines of Salvation, comp. Bruce R. McConkie, 3 vols. [1954–56], 1:49–50):