Si Ezra Thayre ay inatasang manirahan at magtrabaho, kasama si Joseph Smith Sr., sa bukirin ni Frederick G. Williams sa Kirtland, Ohio. Tumulong din si Brother Thayre sa pagbabayad sa ilang pagkakautang sa lupain. Noong Hunyo 1831, sila ni Thomas B Marsh ay tinawag na magmisyon sa Missouri (tingnan sa D at T 52:22). Dahil sa kapalaluan at kasakiman, hindi handang umalis si Brother Thayre kasama ni Brother Marsh. Sa paghahayag na nakatala sa Doktrina at mga Tipan 56, na natanggap noong Hunyo 15, pinawalang-saysay ng Panginoon ang pagtawag kay Brother Thayre at nagtalaga ng bagong kompanyon para kay Brother Marsh. Nagbabala ang Panginoon laban sa kapalaluan at itinuro sa mga Banal na mas marami Siyang ilalaan para sa kanila na higit pa sa lupain at salapi.
Pinawalang-bisa ng Panginoon ang tawag sa misyon ni Ezra Thayre at sinabihan siyang magsisi
Itanong sa mga estudyante kung may kakilala silang tao na isinakripisyo ang isang mahalagang bagay upang masunod ang isa sa mga kautusan ng Panginoon. (Maaaring kasama sa mga halimbawa ang isang taong nagsakripisyo para sumapi sa Simbahan, magmisyon, o masunod ang mga pamantayan ng Simbahan.) Ipabahagi sa ilang estudyante ang kanilang mga halimbawa.
Ipaliwanag na noong Hunyo 1831, tinawag ng Panginoon si Ezra Thayre na magmisyon sa Missouri kasama ni Thomas B. Marsh. Ang mga problema ni Brother Thayre sa mga ari-arian at salapi ang dahilan kung bakit hindi siya handang umalis samantalang handa nang umalis si Brother Marsh, kaya pumunta si Brother Marsh kay Joseph Smith para itanong kung ano ang dapat gawin. Nang magtanong ang propeta sa Panginoon, sinagot siya ng Panginoon sa paghahayag na nakatala sa Doktrina at mga Tipan 56.
Ipabasa nang malakas sa isang estudyante ang Doktrina at mga Tipan 56:1–2. Sabihin sa klase na tahimik na sumabay sa pagbasa at alamin kung ano ang sinabi ng Panginoon sa mga hindi sumusunod sa Kanyang mga kautusan.
Ano ang sinabi ng Panginoon sa mga taong hindi sumusunod sa Kanyang mga kautusan?
Isulat sa pisara ang sumusunod na hindi kumpletong pahayag: Upang maligtas, dapat tayong …
Sabihin sa mga estudyante na kumpletuhin ang pahayag ayon sa talata 2. Maaaring iba-iba ang mga salitang gamitin ng mga estudyante, ngunit dapat nilang matukoy ang sumusunod na alituntunin: Upang maligtas, dapat tayong magpasan ng ating krus, sundin ang Tagapagligtas, at sumunod sa Kanyang mga kautusan. (Kumpletuhin ang alituntunin sa pisara.)
Anong mga kautusan ang ibinigay ng Panginoon na kakailanganin ninyong magpasan ng inyong krus at magsakripisyo para maging masunurin? (Matatagpuan ang ilang halimbawa sa Para sa Lakas ng mga Kabataan.)
Anong mga pagpapala ang natanggap o matatanggap ninyo dahil pinili ninyong maging masunurin?
Itanong kung paano magagawa ng mga tao sa mga sumusunod na halimbawa na pasanin ang kanilang mga krus at sumunod sa mga kautusan ng Panginoon:
Isang binatilyo ang malapit nang sumapit sa edad na maaari na siyang magmisyon. Nag-aalala siya sa lahat ng maiiwan niya kapag siya ay nasa misyon na.
Alam ng isang dalagita na ang mga kabataan sa kanyang ward ay bibisita sa templo ilang buwan na lang, pero wala siyang temple recommend. Mayroong isang bagay sa buhay niya ngayon na humahadlang sa kanya para tumanggap nito.
Ipaliwanag na kung pipiliin nating huwag magpasan ng ating krus, maaaring mawala sa atin ang pagkakataong pagpalain ang iba at tumanggap ng mga pagpapala para sa ating sarili. Ipabasa nang malakas sa isang estudyante ang Doktrina at mga Tipan 56:3–5. Sabihin sa klase na alamin ang nangyari dahil hindi pa handa si Ezra Thayre na pumunta sa Missouri. Bago magbasa ang mga estudyante, maaari mong ipaliwanag na ang ibig sabihin ng salitang pinawawalang-bisa ay binabawi o kinakansela.
Ano ang nawala kay Ezra Thayre dahil hindi pa siya handang umalis? (Nawalan siya ng pagkakataong maglingkod sa misyon gayundin ang matanggap ang mga pagpapala na maaaring maging bunga niyon.)
Ayon sa talata 4, ano ang magagawa ng Panginoon sa mga kautusang ibinibigay Niya? (Tulungan ang mga estudyante na matukoy ang sumusunod na alituntunin: Ang Panginoon ay maaaring magbigay o magpawalang-bisa ng kautusan kung nakikita Niya na makabubuti iyon.)
Tanungin ang mga estudyante kung may maiisip sila na mga halimbawa mula sa mga banal na kasulatan o sa kasaysayan ng Simbahan na nagbigay ng utos ang Panginoon at pagkatapos ay pinawalang-bisa iyon. Ang sumusunod ay ilang halimbawa:
Matapos bigyan ng Panginoon ng mas mataas na batas si Moises at ang kanyang mga tao, ang mga anak ni Isarel ay naghimagsik at nagsimulang sambahin ang isang ginintuang guya. Dahil dito, ibinigay sa kanila ng Panginoon ang mas mababang batas. (Tingnan sa Exodo 32–34; Pagsasalin ni Joseph Smith, Exodo 34:1–2; D at T 84:23–27.)
Sa panahon ng mortal na ministeryo ng Tagapagligtas, isinugo lamang Niya ang mga Apostol sa mga kabilang sa sambahayan ni Israel (tingnan sa Mateo 10:5). Hindi nagtagal matapos ang Pagkabuhay na Mag-uli ng Tagapagligtas, sinabi niya sa mga Apostol na ipangaral ang ebanghelyo sa mga tao sa lahat ng mga bansa (tingnan sa Mateo 28:19).
Sa dispensasyong ito iniutos ng Panginoon sa ilan sa mga naunang Banal na mag-asawa nang higit sa isa. Mahirap para kay Propetang Joseph Smith at sa maraming iba pang mga lider ng Simbahan ang kautusang ito, ngunit sinunod nila ito. Matapos makatanggap ng paghahayag, inilabas ni Pangulong Wilford Woodruff ang Manipesto, na tinanggap ng Simbahan na may kapangyarihan at may bisa noong Oktubre 6, 1890. Ito ang tumapos sa ginagawang maramihang pagpapakasal sa Simbahan (tingnan sa Opisyal na Pahayag 1).
Ibuod ang Doktrina at mga Tipan 56:6–7 na ipinapaliwanag na binago rin ng Panginoon ang mga tawag sa misyon nina Selah J. Griffin at Newel Knight. Ipaalala sa mga estudyante na dahil sa mga suliraning idinulot ni Leman Copley sa Thompson, Ohio, iniutos sa mga Banal mula sa Colesville na lumipat sa Missouri. Itinanong nila kay Propetang Joseph Smith kung maaari bang si Newel Knight ang mamuno sa kanila sa pag-alis, tulad noong mamuno siya sa kanila nang lisanin nila ang Colesville. Bago ang mga suliraning ito, si Newel Knight ay tinawag na maglingkod kasama ni Selah J. Griffin (tingnan sa D at T 52:32), kaya iniutos ng Panginoon kay Selah J. Griffin na pumalit kay Ezra Thayre bilang kompanyon ni Thomas B. Marsh at si Newel Knight naman ang makakasama ng mga Banal mula sa Colesville.
Ipabasa nang malakas sa isang estudyante ang Doktrina at mga Tipan 56:8–11. Sabihin sa klase na tahimik na sumabay sa pagbasa at alamin ang iniutos ng Panginoon na gawin ni Ezra Thayre matapos mapawalang-bisa ang kanyang tawag sa misyon.
Ano ang sinabi ng Panginoon na mangyayari kung magsisisi si Ezra Thayre? Ano ang mangyayari kung hindi siya magsisisi?
Ipaliwanag na pinili ni Ezra na magsisi, at pagkaraan ng pitong buwan muli siyang tinawag na maglingkod bilang missionary kasama si Thomas B. Marsh (tingnan sa D at T 75:31).
Binalaan ng Panginoon ang mga Banal laban sa kasakiman at kapalaluan ng puso
Sabihin sa mga estudyante na kunwari ay may kaibigan sila na nagkasala at nababalisa. Lumapit sa kanila ang kaibigang ito at nagtanong, “Ano ang kailangan kong gawin para makapagsisi?” Bigyan ang mga estudyante ng oras na makapag-isip na mabuti at sumagot. Matapos silang sumagot, ipabasa nang malakas sa isang estudyante ang Doktrina at mga Tipan 56:14–15. Sabihin sa klase na tahimik na sumabay sa pagbasa at alamin ang mga pag-uugali at pagkilos na hadlang para mapatawad ang ating mga kasalanan.
Ayon sa Doktrina at mga Tipan 56:14–15, anong mga pag-uugali at pagkilos ang hadlang para mapatawad ang ating mga kasalanan?
Ano sa palagay ninyo ang ibig sabihin ng pariralang “naghangad ng payo sa sarili ninyong pamamaraan”? Ano ang ibig sabihin ng pariralang “ang inyong mga puso ay hindi nasisiyahan”? (Ibig sabihin nito ay hindi nakukuntento sa kung ano ang mayroon ka.)
Ano ang matututuhan natin mula sa mga talata 14 at 15 tungkol sa kailangang gawin para makapagsisi at makatanggap ng kapatawaran? (Maaaring iba-ibang alituntunin ang matukoy ng mga estudyante, ngunit tiyaking mabigyang-diin ang sumusunod na katotohanan: Kasama sa pagsisisi ang pagsunod sa payo ng Panginoon at pagwaksi ng masasamang hangarin. Maaari mong ipasulat sa mga estudyante ang katotohanang ito sa kanilang banal na kasulatan sa tabi ng Doktrina at mga Tipan 56:14–15.)
Bakit kailangan ang pagsunod at pagwaksi ng masasamang pag-uugali para tunay na makapagsisi?
Ipaliwanag na ang pagsisisi ay hindi lang tungkol sa pagsunod sa mga hakbang na gagawin kundi kailangan dito ng lubos na pagbabago ng puso—isang tapat na pangakong susundin ang Panginoon at iwawaksi ang lahat ng masama. Nang matanggap ang paghahayag na ito, makikita na ang pagkamakasarili at kapalaluan ang humahadlang kay Ezra Thayre sa pagsunod sa payo ng Panginoon.
Paano nakakaapekto ang kapalaluan ng isang tao sa kanyang kakayahang magkaroon ng nagsisising puso?
Sabihin sa mga estudyante na basahin ang Doktrina at mga Tipan 56:16–17 kasama ang isang kapartner. Sabihin sa isang kapartner na alamin kung paano makikita ang hindi nagsisising puso sa isang taong mayaman. Sabihin sa isa pang kapartner na alamin kung paano makikita ang hindi nagsisising puso sa isang taong maralita. Maaari mong imungkahi na markahan nila ang kanilang nalaman. Sabihin sa mga estudyante na ipaliwanag ang natuklasan nila sa kanilang mga kapartner at pagkatapos ay pag-usapan nila ang mga sumusunod na tanong (maaari mong isulat sa pisara ang mga ito):
Anong mga pagkakatulad ang nakita ninyo sa mga hindi nagsisising puso ng mayayaman at mga maralita?
Bakit parehong may kasakimang taglay ang mayayaman at mga maralita?
Sabihin sa mga estudyante na isipin kung kailan nila nakita ang ganitong pag-uugali sa sariling buhay nila o sa buhay ng kanilang mga kakilala.
Ipabasa nang malakas sa isang estudyante ang Doktrina at mga Tipan 56:18. Sabihin sa klase na tahimik na sumabay sa pagbasa at hanapin ang mga salitang naglalarawan sa mga puso ng mga taong pagpapalain.
Ayon sa talata 18, ano ang dapat na katangian ng ating mga puso? Ano ang ibig sabihin ng magkaroon ng bagbag na puso? Ano naman ang nagsisising espiritu? (Ang mga katagang ito ay nagsasaad ng kapakumbabaan at pagpapasakop sa Panginoon.)
Kung ang ating mga puso ay sakim o palalo, paano tayo mababago?
Patuloy na ipabasa sa mga estudyante ang Doktrina at mga Tipan 56:19–20 kasama ang kanilang mga kapartner. Sabihin sa klase na alamin ang mga pagpapalang ipinangako ng Panginoon sa mga taong may mapagkumbabang puso. Maaari mong imungkahi sa kanila na markahan ang nalaman nila.
Isulat sa pisara ang sumusunod na hindi kumpletong pahayag: Ang mga taong may mapagkumbabang puso ay …
Ayon sa mga talata 18–20, anong pagpapala ang kukumpleto sa pangangusap na nasa pisara? (Habang tinutukoy ng mga estudyante ang mga pagpapalang binanggit sa mga talatang ito, isulat ang mga ito sa pisara. Maaaring kailangan mong ipaliwanag na ang salitang panggantimpala ay tumutukoy sa pagbibigay ng gantimpala sa mabubuting gawa at parusa sa masasamang gawa.)
Ipaliwanag na sa ilalim ng batas ng paglalaan, ang bahaging ibinigay sa isang tao o pamilya ayon sa kanilang mga kalagayan ay tinawag na “mana” (D at T 57:7). Malamang na sa naunang pagsasagawa ng batas na ito, ilan sa mga Banal, tulad ni Ezra Thayre, ay labis na naghangad na matanggap ang kanilang “mana.”
Isulat sa pisara ang mga salitang Aking Mana sa tabi ng mga pagpapalang nakalista sa pisara.
Mula sa isinulat natin, paano ninyo ibubuod ang mga pagpapalang inilalaan ng Panginoon para sa mga mapagkumbabang puso? (Maaaring gumamit ang mga estudyante ng ibang mga salita, ngunit tiyaking matutukoy nila ang sumusunod na alituntunin: Ang mga taong may mapagkumbabang puso ay mamanahin ang lupa.)
Paano maikukumpara ang mga pagpapalang inilarawan sa talata 18–20 sa mga ari-arian at salapi na labis na hinahangad ni Ezra Thayre at ng iba pang mga naunang Banal?
Patotohanan ang mga pagpapala, o “mana” na inilaan ng Panginoon para sa atin kapag tinalikuran natin ang kasamaan at matapat na sumusunod sa Kanyang mga kautusan.
Nagsalita si Pangulong Ezra Taft Benson tungkol sa inaasahang pagsasakripisyo ng mga kabataang lalaki ng anumang mahalaga para makapagmisyon:
Larawan
Pangulong Ezra Taft Benson
“Hinggil sa misyon, sinabi ni Pangulong [Spencer W.]Kimball, ‘Napakamakasarili at walang malasakit ang isang kabataang lalaki na sumapit sa hustong gulang at nag-uukol ng kanyang panahon sa paghahanda para sa kanyang mga gagawin sa buhay at sa kanyang trabaho ngunit ayaw paglingkuran ang kanyang Tagapaglikha sa pinakamahalagang paglilingkod na ito sa buong mundo’ (Regional Representatives’ seminar, 30 Set. 1977). …
“Mga kabataang lalaki, ang pahayag na ito ni Pangulong Kimball ay dapat na maging personal na sawikain ninyo: “Bawat LDS na lalaki na karapat-dapat ay dapat magmisyon” (Ensign, Mayo 1974, p. 87). Hinihiling namin na magsakripisyo kayo. Iyan ang tawag natin dito dahil wala tayong mas mainam na maitatawag dito. Ito ay isang pamumuhunan. Maging kabilang dito, ang pinakamahalagang paglilingkod sa buong mundo. Huwag umiwas sa responsibilidad. Huwag sadyang tumutol. Inaanyayahan namin kayong sumama sa hukbo … na parami nang parami bawat araw. Ang gawain ninyo ay ipahayag ang mensahe ng Panunumbalik sa buong mundo. Makatitiyak kayo na pagkakatiwalaan namin kayo at mahal namin kayo. Inaasahan naming gagawin ninyo ang misyong iyan” (“This Is a Day of Sacrifice,” Ensign, Mayo 1979, 33).
Ipinaliwanag ni Pangulong Boyd K. Packer ng Korum ng Labindalawang Apostol ang dahilan kung bakit binabago kung minsan ng Panginoon ang tagubilin na ibinibigay sa Simbahan. Hinikayat ni Pangulong Packer ang mga miyembro na magtiwala sa paghahayag na ibinibigay sa mga Apostol at tanggapin ang mga pagbabago sa mga ginagawa at mga pamamaraan ayon sa pagkakahayag sa mga ito:
Larawan
Pangulong Boyd K. Packer
“Ang mga pagbabago sa organisasyon o pamamaraan ay nagpapatunay na patuloy ang paghahayag. Bagama’t hindi nababago ang mga doktrina, ang mga pamamaraan ay maaaring maiba. …
“Ang plano para sa ebanghelyo ay inihayag nang taludtod sa taludtod, tuntunin sa tuntunin, kaunti rito at kaunti roon. At dagdag pa rito: ‘Naniniwala kami na maghahayag pa Siya ng maraming dakila at mahahalagang bagay hinggil sa Kaharian ng Diyos.’ (Saligan ng Pananampalataya 1:9.)
“May mga pagbabagong gagawin sa hinaharap tulad noon. Kung ang mga Kapatid ay gumagawa man ng mga pagbabago o sinasalungat ang mga ito ay nakasalalay nang lubos sa mga tagubiling natatanggap nila sa pamamagitan ng mga paghahayag na itinatag sa simula.
“Ang mga doktrina ay hindi binabago at walang hanggan; ang mga organisasyon, programa, at pamamaraan ay babaguhin ayon sa tagubilin Niya na may-ari ng simbahang ito. …
“At sa huli, ang ibinigay ay nangyayari dahil sinabi ito ng Panginoon, ‘maging sa pamamagitan ng sarili [Niyang] tinig o sa tinig man ng [Kanyang] mga tagapaglingkod, ito ay iisa.’ (D at T 1:38.) Alam natin ang Kanyang tinig kapag Siya ay nangungusap” (“Revelation in a Changing World,” Ensign, Nob. 1989, 15, 16).
Binigyang-diin ni Elder D. Todd Christofferson ng Korum ng Labindalawang Apostol ang ibinubunga ng ganap na pagbabago ng puso sa pamamagitan ng pagsisisi:
Larawan
Elder D. Todd Christofferson
“Kinakailangan sa pagsisisi ang tapat na layunin at kahandaang patuloy na magsikap na madaig ang kasalanan, kahit mahirap. Ang pagtatala ng mga hakbang sa pagsisisi ay maaaring makatulong sa iba, ngunit maaari ding humantong sa pagsisising walang tunay na hangarin o pagbabago. Ang tunay na pagsisisi ay hindi paimbabaw. …
“Dahil sa pananampalataya sa mahabaging Manunubos, at sa Kanyang kapangyarihan, ang kawalang-pag-asa ay nauuwi sa pag-asam. Nagbabago ang puso at hangarin ng tao, at ang kasalanang minsang naging kaakit-akit ay naging kasuklam-suklam. Ang determinasyong iwaksi at talikdan ang kasalanan at iwasto ang nagawang pinsala, nang lubos sa abot ng makakaya, ay naroon na sa pusong iyon na nagbago na. Ang determinasyong ito kalaunan ay humahantong sa tipan na sundin ang Diyos. Matapos magawa ang tipang iyan, ang Espiritu Santo, na sugo ng banal na biyaya, ay magdadala ng kapanatagan at kapatawaran” (“Ang Banal na Kaloob na Pagsisisi” Ensign o Liahona, Nob. 2011, 40).
Ang sumusunod na pahayag ni Elder Joseph B. Wirthlin ng Korum ng Labindalawang Apostol ay nagtuturo ng alituntunin ng kapupunan, na kabilang sa pangakong gantimpala mula sa Panginoon:
Larawan
Elder Joseph B. Wirthlin
“Pinupunan ng Panginoon ang bawat kawalan ng matatapat. Ang ninakaw mula sa mga taong nagmamahal sa Panginoon ay idaragdag sa kanila sa sarili Niyang paraan. Kahit hindi ito mangyari sa panahong nais natin, malalaman ng matatapat na bawat luha ngayon ay papalitan kalaunan ng maka-isandaang ulit na luha ng kagalakan at pasasalamat” (“Anuman ang Mangyari, Gustuhin Ito,” Ensign o Liahona, Nob. 2008, 28).