Lesona 2

Mandalina ny Soratra masina

Fampidirana

Hanampy ireo mpianatra hanana fahatakarana lalina momba ireo tanjon’ny soratra masina ity lesona ity. Hanampy azy ireo ihany koa handalina ny soratra masina amim-pahamatorana kokoa izany. Tafiditra ao anatin’izany ireo asa atao manditra ny fianarana mikasika ny fahatakarana ny hevitra fototra sy ny toe-javatra miseho ao amin’ny soratra masina, ny famantarana sy ny fanakarana ireo fotopampianarana sy fitsipika, ary ny fampiharana ireo fotopampianarana sy fitsipika eo amin’ny fiainantsika. Rehefa mihatsara ny fahaizan’ireo mpianatra mandalina ny soratra masina, dia hitombo ny fitiavan’izy ireo ny soratra masina, ary hitombo tahaka izany koa ny fahatakarany ny filazantsara. Mitadiava fomba handinihana indray ireo fahalalana ato amin’ity lesona ity mandritra ny taona.

Sosokevitra enti-mampianatra

Ahoana no fomba hanombohantsika ny fandalinana soratra masina ao amin’ny seminera?

Soraty eo amin’ny solaitrabe ity fanambarana nataon’ny Filoha Thomas S. Monson manaraka eto ity alohan’ny hiatombohan’ny fotoam-pianarana. (Hita ao amin’ny pejy faha 107 ao amin’ny Tatitry ny Fihaonambe ny Ôktôbra 1970 izany fanambarana izany.)

“Ny tanjon’ny fampianarana ny filazantsara dia … tsy ny ’handraraka toy ny rano ny fahalalana’ ao an-tsain’ireo mpianatra. … Ny hitaona ny tsirairay hieritreritra, sy hahatsapa, ary avy eo dia hanao zavatra mikasika ny fiainana ny fitsipiky ny filazantsara no tanjona” (Ny Filoha Thomas S. Monson).

Asao hamaky mafy ny fanambarana ny mpianatra iray.

• Raha miainga amin’io fanambarana io, inona no tokony ho tanjoko amin’ny maha mpampianatra seminera anareo ny tenako? Inona no tokony ho tanjonareo amin’ny maha mpianatra seminera anareo?

Lazao amin’ny mpianatra fa hahafantatra fomba ahafahana “mieritreritra, sy mahatsapa, ary avy eo dia hanao zavatra mikasika ny fiainana ny fitsipiky ny filazantsara” izay ampianarina ao anatin’ny soratra masina izy ireo ao anatin’ity lesona ity.

Manakatra ny hevitra fototra sy ny toe-javatra miseho ao amin’ny soratra masina

Hazavao fa ny zavatra iray azon’ny mpianatra atao mba hanatsarana ny fandalinany soratra masina dia ny mianatra mikasika ny hevitra fototra sy ny toe-javatra miseho ao amin’ny tantara ary ny fanambarana ao amin’ny soratra masina. Mazàna ny hevitra fototra sy ny toe-javatra miseho dia antsoina hoe votoatin’ny tantara.

Asao hamaky ity torohevitra manaraka avy amin’ny Filoha Thomas S. Monson ity ny mpianatra iray:

Filoha Thomas S. Monson

Fantaro ireo lesona ampianarin’ny soratra masina. Hianaro ny hevitra fototra sy ny toe-javatra miseho ao anatin’ireo fanoharana nataon’ilay Mpampianatra sy ny fampitandreman’ireo mpaminany. Ianaro toy ny miantefa aminao izy ireo, satria izany tokoa no izy” (“Be Your Best Self,” Ensign na Liahona, Mey 2009, 68).

Ampahatsiahivo fa ny fahazoana ny hevitra fototra sy ny toe-javatra miseho dia afaka manampy antsika hahatakatra ireo fampianarana ao amin’ny soratra masina. Manome fahalalana izay manazava sy mitondra fahatakarana lalina ireo tantara, sy ireo fotopampianarana, ary ireo fitsipika ao amin’ny lahatsoratry ny soratra masina izany.

Soraty eny amin’ny solaitrabe ireto fanontaniana manaraka ireto:

• Iza no miteny ao amin’ireo andinin-tsoratra masina ireo?

• Miresaka amin’iza izy?

• Inona no mitranga eto amin’ ity tantara ity?

Hazavao fa afaka manampy antsika hahazo ny votoatin’ny fampianarana na ny tantara ao amin’ny soratra masina ireo fanontaniana ireo.

Angataho hizara izay nataony mba hahatakarana tsara kokoa ny hevitra fototra sy ny toe-javatra miseho ao amin’ireo andian-tsoratra masina ireo ny mpianatra. Soraty eny amin’ny solaitrabe ny sasany amin’ireo hevitra ireo.

Mety hilaza fomba toy ny mikaroka ny dikan’ireo teny sarotra na tsy mahazatra, mandinika ireo lahatsoratra manodidina, mamaky ireo sasin-teny eo am-piandohan’ny toko sy fizarana, na mikaroka ireo fanovozan-kevitra eny amin’ny farany ambanin’ny pejy ho fanazavana ary ireo soratra masina mifandray ireo mpianatra. Ataovy izay ahazoana antoka fa voatonona ireo fahaiza-manao zavatra ireo raha tsy voalazan’ny mpianatra.

Asao hamaky mafy ny 3 Nefia 17:1–10 ny mpianatra iray mba hamolavolana fomba iray ahatakarana ny votoatin’ny soratra masina. Angataho ny mpianatra mba hanaraka, hitady ny valin’ireo fanontaniana nosoratanao eo amin’ny solaitrabe. Amporisiho ihany koa izy ireo hijery ny famintinana ny toko mba hahitana famaritana haingana ny ao anatin’izany.

• Iza no mitantara ilay tantara ao amin’ny andininy 1, 5–6, sy 9–10? Môrmôna

• Iza no miteny ao amin’ny tantara? Iza no mandray ny hafatra?

• Inona no niseho talohan’ireo zava-nitranga ao amin’ity tantara ity? (Jereo ny sasin-tenin’ny toko 3 Nefia 8–16.) Ahoana no fiantraikan’ny fahalalanao mikasika ity hevitra fototra ity amin’ny fahatakaranao hoe nahoana no tian’ny olona hijanona maharitraritra miaraka aminy ny Tompo? (Jereo ny 3 Nefia 17:21.) Inona no fahagagana nitranga rehefa avy nilaza izy fa hijanona? (Jereo ny 3 Nefia 17:21.)

Mamantatra sy Manakatra ireo fotopampianarana sy fitsipika

Hamafiso fa vonona kokoa ny hamantatra sy hahazo ireo fotopampianarana sy fitsipika voarakitra ao amin’ny tantara ao amin’ny soratra masina ny mpianatra rehefa mahazo ny hevitra fototra sy ny toe-javatra miseho ao anatiny izy ireo. Asao hamaky mafy ity famaritana ny fitsipiky ny filazantsara manaraka eto ity, izay nozarain’ny Loholona Richard G. Scott ao amin’ny Kôlejin’ny Apôstôly Roambinifolo ny mpianatra iray:

“Fahamarinana marihitra, natao anaty fonosana mba ho ampiasaina amin’ny toe-javatra maro samihafa ireo fitsipika” (“Acquiring Spiritual Knowledge,” Ensign, Nov. 1993, 86).

Hazavao fa ireo fotopampianarana sy ireo fitsipika dia fahamarinan’ny filazantsaran’i Jesoa Kristy izay maharitra mandrakizay sy tsy miova, izay manoro lalana eo amin’ny fiainantsika. Ireo no lesona tian’ireo mpaminany fahiny hianarantsika avy amin’ireo trangan-javatra, sy tantara, ary toriteny noraketin’izy ireo ao amin’ny soratra masina. Asehoy fa nampiasa fehezanteny toy ny hoe “dia toy izany no ahazoantsika mahita” ireo mpanoratra sasany ao amin’ny soratra masina” (jereo ny Helamàna 3:27–29) na teny toy ny hoe noho izany (jereo ny Almà 32:16) mba hanoroana avy hatrany ireo fotopampianarana sy ireo fitsipika. Na izany aza, dia maro ireo fotopampianarana sy fitsipika tsy voalaza mivantana tahaka izany ao amin’ny soratra masina. Ho solon’izany, dia hita taratra sy aseho amin’ny alalan’ny fiainan’ireo izay ao amin’ny soratra masina ireo fahamarinana ireo.

Mba hanampiana ireo mpianatra hamantatra ireo fotopampianarana sy fitsipika tsy voalaza mivantana, dia tolory hevitra izy ireo fa rehefa mamaky, dia afaka mametraka fanontaniana amin’ny tenany ihany toy izao manaraka izao: Inona no hafatra tsoahina avy amin’ity tantara ity? Inona no lesona tian’ny mpanoratra mba hosintonintsika avy amin’ity tantara ity? Inona avy ireo fahamarinana ampianarina ao amin’ity ampahan-tsoratra masina ity? Ataovy lisitra eny amin’ny solaitrabe ireo fanontaniana ireo.

Asaivo miverina ao amin’ny 3 Nefia 17:1–10 ireo mpianatra mba hanampiana azy ireo hanazatra tena amin’ny famantarana ireo fotopampianarana sy ireo fitsipika. Mametraha fanontaniana:

• Inona no azontsika ianarana mikasika ny fahazoana ny teniny, avy amin’ny fampianaran’ny Mpamonjy ao amin’ny 3 Nefia 17:2–3?

• Inona avy ireo fahamarinana azontsika ianarana mikasika ny Mpamonjy avy ao amin’ny 3 Nefia 17:5–7?

• Nanolo-tena ny hanasitrana ny olona ny Mpamonjy, ho setrin’ny finoana lehibe nananan’izy ireo. Inona avy ireo fitsipika hitanao ao amin’ny 3 Nefia 17:8–9 mikasika ny fikatsahana ireo fitahiana avy amin’ny Tompo? (Iray amin’ireo fitsipika mety ho hitan’ireo mpianatra ny hoe mamaly ny faniriana marina ananantsika mba hanakaiky azy bebe kokoa ny Tompo.)

Raha mbola misy fotoana azo omena ireo mpianatra hanaovany fampiharana amin’ny famantarana ireo fotopampianarana sy ireo fitsipika, dia asao hitady ny tantara tiany indrindra ao amin’ny soratra masina izy ireo. Asaivo mamantatra ireo fitsipika nianarany avy amin’ireo tantara ireo ny mpianatra. Avy eo dia asao hizara ireo tantarany sy ireo fitsipika nianarany izy ireo.

Mampihatra ireo fotopampianarana sy fitsipika

Hoy ny Filoha Boyd K. Packer, ao amin’ny Kôlejin’ny Apôstôly Roambinifolo:

“Rehefa takatra ny fotopampianarana marina dia manova ny toetra sy ny fitondrantena. Hanatsara haingana kokoa ny fitondrantenanao ny fandalinana ny fotopampianaran’ ny filazantsara noho ny fandalinana ny momba ny fitondrantena mba ho entina hanatsarana ny fitondrantena.” … Izay no antony hanantitranterantsika mafy ny fandalinana ireo fotopampianaran’ny filazantsara” (“Little Children,” Ensign, Nôv. 1986, 17).

Hazavao fa mahafantatra misimisy kokoa mihoatra ny famaritana ireo teny isika rehefa mahatakatra fotopampianarana na fitsipika iray. Fantatsika ny lanjan’ilay fotopampianarana na fitsipika eo amin’ny fiainantsika. Rehefa mahafantatra fotopampianarana na fitsipika iray isika ary mahatakatra izany, dia afaka mampihatra izany eo amin’ny fiainana. Hazavao fa mampihatra isika rehefa manao zavatra mikasika ireo fitsipika izay nianarantsika. Hanana fahafahana lehibe hahatsapa ny Fanahy Masina hanamafy ny fahamarinan’ireo fitsipika ireo ny mpianatra izay mandray andraikitra eo anatrehan’izany fitsipika izany (jereo ny 2 Nefia 32:5; Môrônia 10:5). Izany no tena tombontsoa avy amin’ny fahalalana azo avy amin’ny fandalinana soratra masina. Ampio ireo mpianatra hahita fa tokony ny hanatsara ny ezaka ataony hiaina ny filazantsara sy ny hanakaiky bebe kokoa an’Andriamanitra ny iray amin’ireo tanjony fototra, rehefa mandalina soratra masina izy ireo—na ao an-trano, na any am-piangonana, na any amin’ny kilasin’ny seminera, na manao ny Mon Progrès Personnel na ny Devoir Envers Dieu, na any amin’ny toerana hafa—.

Amporisiho ireo mpianatra hivavaka mba hangataka ny fanampian’ny Fanahy Masina mandritra ny fandalinan’izy ireo manokana, mba hanampiana azy ireo hahatakatra sy hampihatra ireo fitsipika vao hitany tao amin’ny soratra masina. Amporisiho ihany koa izy ireo hametra-panontaniana toy izao manaraka izao rehefa mandalina: Inona no tian’ny Tompo hataoko amin’ity fahalalana ity? Inona no fiovana azon’izany entina eo amin’ny fiainako? Inona no azoko atomboko na azoko ajanona amin’izao fotoana izao mba hiainako ny fiainako amin’ny fomba tsaratsara kokoa? Ahoana no ahatsara kokoa ny fiainako raha manao izany aho? (Soraty eny amin’ny solaitrabe ny sasany amin’ireo fanontaniana ireo na izy rehetra. Tolory hevitra ihany koa ireo mpianatra hanoratra ireo fanontaniana ireo ao amin’ny diary fandalinany soratra masina mba hahafahany manovo fahalalana matetika avy amin’izany.)

Ho famaranana, dia zarao tsiroaroa ireo mpianatra. Asaivo mifampizara ireo fitsipika nianarany androany tao amin’ny 3 Nefia 17:1–10 izy ireo. Amporisiho izy ireo mba hiresaka mikasika izay nataony mba hampitomboana ny fahatakarany ireo fitsipika sy izay ho ataony mba hampiharana izay nianarany sy izay tsapany. Angataho izy ireo mba hiresaka mikasika ny fomba ahafahan’ny fampiharana ireo fitsipika ireo manova ny fiainany.

Hevitra Fanampiny Enti-mampianatra

Mamantatra ireo fotopampianarana sy fitsipika

Adikao eo amin’ny solaitrabe ity tabilao manaraka ity mba hanampiana ireo mpianatra hanazatra tena hamantatra ireo fotopampianarana sy fitsipika, ary amporisiho izy ireo handika izany ao amin’ny diary fandalinany soratra masina. Asaivo vakian’ny mpianatra ireo andinin-tsoratra masina ary asaivo soratany ireo hafatra fototra avy amin’ireo andinin-tsoratra masina tsirairay avy.

Andinin-tsoratra masina	Ny hafatra fototra ao amin’ity andinin-tsoratra masina ity (lazao amin’ny teninao manokana)
1 Nefia 2:16
1 Nefia 19:23
2 Nefia 32:3

Rehefa ampy tsara ny fotoana nandalinany, dia asaivo mizara ireo hafatra hitany ny mpianatra. Angataho ny mpianatra mba hanoratra ny iray amin’ireo fitsipika ireo, amin’ny alalan’ny fanarahana ity lamina ity: Raha toa … aho, dia . Ohatra: Raha toa ka mangataka amin’ Andriamanitra am-pinoana aho, dia afaka manalefaka ny foko Izy ary manampy ahy hino (jereo ny 1 Nefia 2:16). Asaivo zarain’izy ireo amin’ny namany izay nosoratany rehefa nahavita izy ireo. Angataho koa izy ireo mba hanazava hoe nahoana izany no manan-danja aminy. Asao ny mpianatra iray na roa hizara amin’ny mpiara-mianatra rehetra ny fomba hivoaran’ny fandalinan’izy ireo ny soratra masina rehefa mahay mamantatra sy mahatakatra ireo fotopampianarana sy fitsipiky ny filazantsara izy ireo.

Fahaiza-manao sy fomba enti-mandalina ny soratra masina

Hanampy ireo mpianatra amin’ny fandalinany soratra masina ireto fahaiza-manao manaraka ireto. Nampidirina ato anatin’ity boky torolalana ity izy ireo mba ho toy ny mpampahatsiahy.

Famaritana ireo teny: Tsy mahazatra antsika ny sasany amin’ireo teny ampiasain’ireo mpaminany. Afaka manampy antsika hahalala ny famaritana ireo teny sy hamantatra ireo teny mitovy hevitra amin’ireo teny ireo ny Torolalana ho an’ny soratra masina, sy ireo fanovozan-kevitra eny amin’ny farany ambanin’ny pejy ao amin’ny soratra masina, ary ny rakibolana tsotra. Ohatra: ny teny hoe Mesia ao amin’ny 1 Nefia 10:4–17.

Fanoloana anarana: Soloy amin’ny anaranao ireo anarana ao amin’ny soratra masina mba hanampy anao hampihatra ny soratra masina eo amin’ny fiainanao. Ohatra: 1 Nefia 1:1.

Fampifandraisana ny soratra masina: Ampifandraiso ireo andinin-tsoratra masina mba hampazava ny teny sy hahazoana azy. Ohatra: Azonao soratana eo amin’ny sisin’ny pejy tsy misy soratra eo akaikin’ny 3 Nefia 12:28 ny hoe jereo ny FF 42:23.

Antony sy vokany: Jereo ireo fifandraisana eo amin’ny raha-dia sy satria-noho izany. Ohatra: 2 Nefia 1:9.

Teny manan-danja: Ireo teny na andian-teny toy ny indro, noho izany, satria, na dia teo aza izany, na ary dia toy izany dia fanasana mba hiato ary hitady ireo hafatra manan-danja. Ohatra: Helamàna 6:35–36.

Lisitry ny soratra masina: Matetika ireo Mpaminany no manome lisitry ny fampitandremana sy ny zava-tsarotra. Asio tarehimarika ny zavatra tsirairay tanisaina rehefa mahita lisitra ianao. Ohatra: Almà 26:22.

Toe-javatra miseho: Fantaro hoe iza no miteny, iza ilay na ireo olona hiresahany, momba ny inona ny zavatra resahiny, ary oviana sy taiza no nitranga ilay trangan-javatra ao amin’ireo tantara ao amin’ny soratra masina. Ohatra: Ny toe-javatra miseho ho an’ny Almà 32:21–43 dia hita ao amin’ny Almà 31:1, 6–11 sy 32:1–6.

Fifanoherana: Matetika no ahitana hevitra, na trangan-javatra, na olona mifanohitra ao amin’ny asasoratr’ireo mpaminany. Manamafy ireo fitsipiky ny filazantsara ireo fifanoherana ireo. Jereo ireo zavatra mifanohitra ao anatin’ireo andinin-tsoratra masina tsirairay, na ireo toko sy fizarana, ary manerana ireo toko sy ireo boky. Ohatra: 2 Nefia 2:27; Almà 48:1–17.

Fakana sary an-tsaina: Tadiavo ireo antsipirian-javatra izay afaka manampy anao hamorona sary ao an-tsaina rehefa mamaky ianao. Alaivo sary ao an-tsaina hoe ao anatin’ny trangan-javatra iray ianao. Ohatra: Enôsa 1:1–8.

Tandindona: Ireo teny toy ny sahala, toy, na sahala amin’ny dia manampy hamantarana ireo tandindona. Takaro ny hevitr’ireo tandindona amin’ny alalan’ny famantarana ny karazany ary amin’ny alalan’ny fisaintsainana mikasika ny toetrany. Afaka manampy antsika hanazava ny tandindona sasany ireo fanovozan-kevitra eny amin’ny farany ambanin’ny pejy, sy ny Rakibolan’ny Baiboly, ary ny Topical Guide. Ohatra: Helamàna 8:14–15, Tafiditra ao ihany koa ireo fanovozan-kevitra eny amin’ny farany ambanin’ny pejy miaraka amin’ireo andinin-tsoratra masina ireo.

Fisaintsainana: Mahafaoka ny fieritreretana, ny fandinihina lalina, ny fametrahana fanontaniana, ary ny fandrefesana izay zavatra hainao sy izay nianaranao ny fisaintsainana lalina. Mazàna, dia manampy antsika hahatakatra izay tokony hataontsika mba hampihatra ny fitsipiky ny filazantsara ny fisaintsainana.

Fandalinana ny soratra masina

Misafidiana toerana iray izay tsy mahazatra ny mpianatra eo amin’ny sarintany. Asao ireo mpianatra haka sary an-tsaina hoe handeha hanao dia maharitra any amin’ny toerana lavitra be iray. Lazao azy ireo ny anaran’ny toerana handehanana, fa aza aseho azy ireo ilay sarin-tany ary aza fariparitana amin’izy ireo ny momba ilay toerana.

• Karazam-pitaterana toy ny inona no horaisinao? Inona avy no entana ho entinao? Inona avy ireo zavatra handraisanao anjara rehefa tonga any ianao?

Ho sahirana ny mpianatra hanome valinteny mifanaraka amin’ireo fanontaniana ireo. Asehoy azy ireo ilay toerana eo amin’ny sarintany na hazavao ny toerana misy azy. Resadresaho amin’izy ireo ny momba ilay toerana. Ary avy eo dia apetraho indray ireo fanontaniana napetrakao teo aloha.

• Inona no fiantraikan’ny fahafantaranao ny toerana haleha eo amin’ny fomba hiomananao hanao ilay dia?

• Mety azo heverina ve ny hahatongavanao any amin’io toerana io raha tsy fantatrao hoe aiza no misy azy?

Hazavao fa ny fahafantarana fotsiny ny toerana haleha ao anatin’ny dia iray dia misy fiantraikany lehibe eo amin’ny safidy ataontsika mikasika izay hoentintsika sy ny fomba handehana mankany, ary mitovy amin’izany ihany koa ny hoe ny fahafantarana ny tanjona kasaina amin’ny fandalinana ny filazantsara dia misy fiantraikany lehibe eo amin’ny fomba fandalinantsika ny soratra masina ao amin’ny kilasin’ny seminera isan’andro—sy eo amin’izay tombontsoa azontsika avy amin’izany.

Ampahatsiahivo ireo mpianatra fa mianatra ny filazantsara amin’ny alalan’ny fandalinana ny soratra masina isan’andro isika ao amin’ny kilasin’ny seminera. Asao hamaky ity hevi-baovao manaraka avy amin’ny Filoha Marion G. Romney ity ny mpianatra iray: Angataho ny mpianatra mba hihaino tanjona manan-danja iray ho an’ny fandalinana ny soratra masina:

“Tsy afaka tena mandalina marina tokoa ny filazantsara ny olona iray raha tsy manohy mianatra ireo fitsipiky ny filazantsara satria nosoratana mba hitahiry ireo fitsipika ho an’ny tombontsoantsika ny soratra masina” (“The Message of the Old Testament” [Fihaonambe ho an’ny DFF mikasika ny Testamenta Taloha, Aogositra. 17, 1979], 3, si.lds.org).

• Araka ny voalazan’ny Filoha Romney, inona no antony nanoratana ny soratra masina?

• Inona no maha samy hafa ny fianarana soratra masina amin’ny fianarana mba hiatrehana fanadinana any an-tsekoly?

Ampahatsiahivo fa tsy hianatra fotsiny ihany mikasika ireo zava-mitranga ao amin’ny soratra masina no tanjon’ny fandalinana ny soratra masina fa ny hahita sy hiaina ireo fahamarinana ao amin’ny filazantsara izay nezahin’ireo mpanoratra soratra masina mba hampianarina antsika. Antsoina hoe fotopampianarana sy fitsipika ireo fahamarinana ireo.

Adikao eny amin’ny solaitrabe ity sary manaraka ity alohan’ny hiantombohan’ny fotoam-pianarana mba hanampiana ireo mpianatra hahatakatra ny dikan’ny hoe fotopampianarana sy fitsipika ary mba hanehoana ny anjara andraikitra lehibe indrindra tanan’ny fotopampianarana sy ny fitsipika eo amin’ny fandalinana ny soratra masina:

Olona mifanalavitra

Hazavao fa maneho ireo mpaminany ilay olona eo amin’ny ankavia ary ireo olona hafa ao amin’ny soratra masina. Maneho ny tsirairay avy amintsika ilay olona eo amin’ny ankavanana. Mba hamaritana tsara kokoa izany, dia angataho ny mpianatra iray hanonona anaran’olona ao amin’ny Bokin’ny Môrmôna (toa an’i Nefia na i Amôna) ary soraty eo ambanin’ilay sary eo amin’ny ankavia ny anaran’ilay olona. Avy eo dia azonao soratana eo ambanin’ilay sary eo amin’ny ankavanana ny anaran’ny mpianatra iray. Tondroy ilay banga na ilay faritra mampisaraka eo anelanelan’ireo sary.

• Inona avy ireo zavatra sasantsasany tsy mampitovy ny fiainantsika amin’ny an’ny olona hafa ao amin’ny soratra masina izay mahatonga ny soratra masina ho sarotra takarina na ampifandraisina amin’ny fiainantsika? (Mety hiteny zavatra toy ny fahasamihafan’ny fomba fiainana, ny kolontsaina, ny fiteny, ary ny jeôgrafia ireo mpianatra.)

Asao hanampy tetezana amin’ny sary eo amin’ny solaitrabe ny mpianatra iray ary hanisy anarana hoe fotopampianarana sy fitsipika eo amin’izany.

Olona ampifandraisin’ny tetezana

Lazao amin’ireo mpianatra fa fahamarinana ao amin’ny filazantsara izay maharitra mandrakizay ary tsy miovaova ireo fotopampianarana sy fitsipika. Marina izy ireo tamin’ny fotoana nanoratana ny soratra masina, ary manampy antsika hanakaiky bebe kokoa ny Tompo sy handray fanapahan-kevitra feno fahendrena izy ireo rehefa ampiharintsika eo amin’ny fiainantsika. Araka ny hita eo amin’ny sary, dia mampifandray ireo vanim-potoana ireo sy manisy tetezana eo amin’ilay faritra banga ny fotopampianarana sy fitsipika.

Hazavao fa ity dingan’ny fandalinana ny soratra masina ity dia misy lafin-javatra telo manan-danja: (1) manakatra ny votoatin’ny tantara na ireo hevitra fototra, ny fizotran’ny tantara, sy ireo zava-mitranga ao amin’ny soratra masina, (2) mamantatra sy manakatra ireo fotopampianarana sy fitsipika, ary (3) mampihatra ireo fahamarinana ireo eo amin’ny fiainantsika. Ampio an’ireo lafin-javatra telo amin’ny fandalinana soratra masina ireo eo amin’ilay sary eny amin’ny solaitrabe, araka izay hita eto ambany:

Olona ampifandraisin’ny tetezana