1 ៖ ថ្ងៃទី 2
ផែនការនៃសេចក្តីសង្រ្គោះ
សេចក្តីផ្តើម
ព្រះវរបិតាសួគ៌របស់យើងបានប្រទានដល់យើងដែលជាកូនចៅរបស់ទ្រង់នូវផែនការមួយដែលក្នុងគោលបំណងដើម្បីដឹកនាំយើងទាំងអស់គ្នាទៅកាន់សុភមង្គល និងភាពតម្កើងឡើងដ៏អស់កល្បជានិច្ច ។ ដង្វាយធួននៃព្រះយេស៊ូវគ្រីស្ទគឺជាផ្នែកដ៏សំខាន់នៃផែនការរបស់ទ្រង់ ។ ដង្វាយធួនឈ្នះលើឥទ្ធិពលនៃការធ្លាក់ និង ធ្វើឲ្យយើងអាចប្រែចិត្ត ហើយនិងជ្រះស្អាតពីអំពើបាបរបស់យើង ដូច្នេះយើងអាចមានសេចក្តីអំណរនៅជីវិតនេះ និង ភាពអស់កល្បជានិច្ច ។
មេរៀននេះនឹងផ្តល់ឲ្យអ្នកនូវសេចក្តីសង្ខេបមួយអំពីផែនការនៃសេចក្តីសង្គ្រោះរបស់ព្រះវរបិតាសួគ៌ ។ វាអាចជួយអ្នកឲ្យមើលឃើញអំពីរបៀបដែលសេចក្តីពិតទាំងឡាយនៃដំណឹងល្អដែលអ្នកនឹងរៀននៅឆ្នាំនេះមានទាក់ទងនឹងគ្នាទៅវិញទៅមក និង ទាក់ទងទៅនឹងគោលបំណងរបស់អ្នកនៅលើផែនដីនេះ ។ នៅពេលដែលការយល់ដឹងរបស់អ្នកអំពីផែនការនៃសេចក្តីសង្គ្រោះរីកចម្រើន នោះសេចក្តីជំនឿរបស់អ្នកទៅលើព្រះ និង ព្រះរាជ្យបុត្រារបស់ទ្រង់ គឺព្រះយេស៊ូវគ្រីស្ទក៏នឹងកើនឡើង ហើយលទ្ធភាពដើម្បីបំពេញចំណែករបស់អ្នកនៅក្នុងផែនការនេះនឹងរីកចម្រើនផងដែរ ។ ផែនការនៃសេចក្តីសង្គ្រោះគឺជា « ភាពពេញលេញនៃដំណឹងល្អនៃព្រះយេស៊ូវគ្រីស្ទ ដែលត្រូវបានរៀបចំឡើងដើម្បីនាំមកនូវ ភាពអមតៈ និង ជីវិតដ៏នៅអស់កល្បជានិច្ចរបស់កូនចៅមនុស្ស ។ វាមានទាំងការបង្កបង្កើត ការធ្លាក់ និង ដង្វាយធួនដែលភ្ជាប់មកជាមួយនូវក្រិតវិន័យទាំងអស់ដែលព្រះបានប្រទានមក ពិធីបរិសុទ្ធ និង គោលលទ្ធិទាំងឡាយ ។ ផែនការណ៍នេះអាចធ្វើឲ្យមនុស្សទាំងអស់ត្រូវបានតម្កើងឡើង និង រស់នៅជារៀងរហូតជាមួយនិងព្រះ » ( សេចក្តីណែនាំដល់បទគម្ពីរទាំងឡាយ « ផែនការណ៏នៃសេចក្តីប្រោសលោះ » scriptures.lds.org) ។
ផែនការណ៍នេះជួយយើងឲ្យយល់អំពីគោលបំណងនៃមតភាពរបស់យើង
ផែនការនៃសេចក្តីសង្គ្រោះរបស់ព្រះវរបិតាសួគ៌របស់យើងឆ្លើយនូវសំណួរជាច្រើនដែលជួនកាលមនុស្សភាគច្រើនបានមាននៅក្នុងជីវិតរស់ពួកគេ ។ តើអ្នកធ្លាប់បានពិចារណាអំពីសំណួរដូចជា ៖ « តើខ្ញុំបានមកពីទីណា ? » « ហេតុអ្វីខ្ញុំនៅទីនេះ ? » « តើខ្ញុំនឹងទៅកន្លែងណាបន្ទាប់ពីជីវិតនេះ ? »
ពីមុនយើងបានកើតមកនៅលើផែនដីនេះ យើងបានរស់នៅក្នុងទីវត្តមាននៃព្រះវរបិតាសួគ៌ក្នុងនាមជាកូនខាងវិញ្ញាណរបស់ទ្រង់ ។ យើងពិតជាកូនចៅរបស់ទ្រង់ ហើយទ្រង់ស្រលាញ់យើង ។ ផែនការនៃសេចក្តីសង្គ្រោះរបស់ទ្រង់គឺជាផ្លូវសម្រាប់យើងម្នាក់ៗដើម្បីប្រែក្លាយដូចជាទ្រង់ ហើយរីករាយជាមួយនឹងពរជ័យទាំងអស់របស់ទ្រង់ ។ យើងយល់ ហើយបានទទួលយកផែនការនេះ មុនយើងមកកាន់ផែនដីនេះ ។
ព្រះគម្ពីរមរមនបានដើរតួនាទីយ៉ាងសំខាន់ក្នុងការជួយយើងឲ្យយល់ដឹងអំពីផែនការនៃសេចក្តីសង្គ្រោះ ។ ពួកព្យាការីក្នុងព្រះគម្ពីរមរមនបានប្រើប្រាស់ ពាក្យផ្សេងៗគ្នាជាច្រើននៅពេលនិយាយសំដៅទៅរកផែនការណ៍នេះ ។
-
សូមអានខគម្ពីរទាំងនេះដែលបានកត់ត្រាខាងក្រោម ហើយកំណត់ឈ្មោះទាំងឡាយដែលត្រូវបានប្រើសម្រាប់ផែនការនៃសេចក្តីសង្គ្រោះរបស់ព្រះវរបិតាសួគ៌នៅក្នុងខគម្ពីរនិមួយៗ ។ នៅក្នុងសៀវភៅកត់ត្រាការសិក្សាព្រះគម្ពីររបស់អ្នក សូមសរសេរឈ្មោះឲ្យនៅក្បែរនឹងសេចក្តីយោងនៃបទគម្ពីរ ។ សម្រាប់ឈ្មោះដំបូងគឺត្រូវបានកំណត់ដោយអ្នក ។
-
នីហ្វៃទី2 9:6 « ផែនការប្រោសប្រណីនៃព្រះដ៏បង្កបង្កើតដ៏មហិមា »
-
ពាក្យទាំងឡាយដូចជា ប្រោសប្រណី ការដោះលែង សេចក្តីសង្គ្រោះ សុភមង្គល និង ការប្រោសលោះ គូសបញ្ជាក់អំពីគោលលទ្ធិថា ផែនការនៃព្រះវរបិតាសួគ៌គឺត្រូវបានរៀបចំឡើងដើម្បីនាំមកនូវ សេចក្តីសង្គ្រោះ និង សុភមង្គលដ៏នៅអស់កល្បជានិច្ចដល់កូនចៅរបស់ទ្រង់ ។
-
សូមឆ្លើយចំពោះសំណួរខាងក្រោមនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកដូចតទៅ ៖ តើការដឹងថា ព្រះវរបិតាសួគ៌មានផែនការមួយសម្រាប់សុភមង្គល និង ការតម្កើងឡើងរបស់អ្នក ធ្វើឲ្យមានភាពខុសគ្នាយ៉ាងដូចម្តេចនៅក្នុងជីវិតរបស់អ្នក ?
តួនាទីនៃសិទ្ធិជ្រើសរើស និង ការធ្លាក់របស់ អ័ដាម និង អេវ៉ានៅក្នុងផែនការនៃសេចក្តីសង្គ្រោះ
អ័ដាម និង អេវ៉ា គឺជាកូនចៅដំបូងរបស់ព្រះ ដែលបានមកកាន់ផែនដីនេះ ។ ទ្រង់បានដាក់ពួកគេក្នុងសួនច្បារអេដែន ហើយបានប្រទានឲ្យពួកគេនូវសិទ្ធិជ្រើសរើស—« ជាសមត្ថភាព និង ឯកសិទ្ធិ… ដើម្បីជ្រើសរើស ហើយដើម្បីប្រព្រឹត្តដោយខ្លួនឯង » ( សេចក្តីណែនាំដល់បទគម្ពីរទាំងឡាយ « សិទ្ធិជ្រើសរើស » scriptures.lds.org ) ។ ទ្រង់បានបញ្ជាពួកគេមិនឲ្យបរិភោគផ្លែឈើនៃការដឹងល្អ និងអាក្រក់ឡើយ ។ ការគោរពប្រតិបត្តិតាមព្រះបញ្ញត្តិនេះមានន័យថា ពួកគេអាចបន្តរស់នៅក្នុងសួនច្បារនេះ តែពួកគេមិនអាចរីកចម្រើនដោយការទទួលបទពិសោធន៍ផ្ទុយគ្នាក្នុងជីវិតរមែងស្លាប់ឡើយ ។ ពួកគេមិនអាចស្គាល់ភាពរីករាយព្រោះតែពួកគេមិនអាចមានបទពិសោធន៍នៃការសោកសៅ និងការឈឺចាប់ ។
សូមអាន នីហ្វៃទី2 2:17–20 ហើយរកមើលសម្រាប់អ្វីដែលបានកើតឡើងចំពោះ អ័ដាម និង អេវ៉ាបន្ទាប់ពីពួកគេជ្រើសរើសមិនគោរពតាមព្រះបញ្ញត្តិរបស់ព្រះ ។ សូមពិពណ៌នានៅក្នុងចន្លោះដែលបានផ្តល់ឲ្យនូវអ្វីដែល អ័ដាម និង អេវ៉ាបានជ្រើសរើសដើម្បីធ្វើ និង ឥទ្ធិពលពីរដែលកើតមកពីជម្រើសនោះ—ដែលជាទូទៅសំដៅទៅលើការធ្លាក់—ដែលបានមានមកលើពួកគេ ៖
សូមអាន នីហ្វៃទី2 2:22–26 ហើយរកមើលលទ្ធផលជាច្រើនទៀតដែលកើតមកពីជម្រើសដែល អ័ដាម និង អេវ៉ាបានធ្វើ ។ សូមគូសចំណាំនូវសេចក្តីពិតបន្ថែមនៅក្នុងព្រះគម្ពីររបស់អ្នក ដែលអ្នករៀនអំពីឥទ្ធិពលនៃការធ្លាក់ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមបញ្ចប់កថាខណ្ឌនេះដោយការពិពណ៌នាអំពីឥទ្ធិពលទាំងឡាយនៃការធ្លាក់របស់ អ័ដាម និង អេវ៉ាដោយខ្លួនអ្នកផ្ទាល់ ។ សូមបញ្ចូលទាំងគំនិតអំពីជម្រើសទាំងឡាយ សិទ្ធិសេរីភាព រាងកាយសាច់ឈាម សេចក្តីស្លាប់កូនចៅ និង អំពើបាប ។
« ព្រោះតែអំពើរំលងរបស់ អ័ដាម និង អេវ៉ា ទើបខ្ញុំក៏ស្ថិតនៅក្នុងស្ថានភាពធ្លាក់ ហើយ … »
តួនាទីនៃដង្វាយធួនរបស់ព្រះយេស៊ូវគ្រីស្ទនៅក្នុងផែនការនៃសេចក្តីសង្គ្រោះ
អំពើបាប និង សេចក្តីស្លាប់បំបែកយើងចេញពីទីវត្តមានរបស់ព្រះវរបិតារបស់យើងដែលគង់នៅឋានសួគ៌ ។ យើងមិនអាចត្រឡប់ទៅវត្តមានរបស់ព្រះបានទេបើគ្មានជំនួយដ៏ទេវភាពនោះ ។ យើងត្រូវតែយល់អំពីតួនាទីរបស់ព្រះយេស៊ូវគ្រីស្ទ និង ដង្វាយធួនរបស់ទ្រង់នៅក្នុងផែនការនៃសេចក្តីសង្គ្រោះដើម្បីយើងអាចមានសេចក្តីជំនឿលើទ្រង់ និង ធ្វើតាមផែនការរបស់ទ្រង់ ។ សូមសិក្សាក្នុង ម៉ូសាយ 3:17–19 សូមរកមើលឃ្លាទាំងឡាយដែលពិពណ៌នាអំពីរបៀបដែលដង្វាយធួននៃព្រះយេស៊ូវគ្រីស្ទឈ្នះលើឥទ្ធិពលនៃការធ្លាក់ ហើយជួយយើងឲ្យទទួលបាននូវសុភមង្គល និងអាចត្រឡប់ទៅកាន់ព្រះវរបិតាសួគ៌របស់យើងវិញ ។ សូមសង្ខេបខគម្ពីរទាំងនេះដោយពាក្យសំដីរបស់អ្នកផ្ទាល់ ៖
គោលការណ៍មួយដែលយើងរៀនគឺ ៖ ព្រះយេស៊ូវគ្រីស្ទគឺជាអង្គដែលសំខាន់បំផុតនៅក្នុងផែនការនៃសេចក្តីសង្គ្រោះ ហើយដង្វាយធួនរបស់ទ្រង់ គឺជាអ្វីដែលធ្វើឲ្យផែនការមានដំណើរការបានសម្រាប់កូនចៅរបស់ទ្រង់ទាំងអស់ ។
-
សូមអានវគ្គគម្ពីរតាមលំដាប់លំដោយនេះ ៖ នីហ្វៃទី2 2:8,ម៉ូសាយ 3:7–11,16:4–8,អាលម៉ា 34:9,15–16, មរមន 9:13–14 ។ នៅក្នុងសៀវភៅកត់ត្រាការសិក្សាព្រះគម្ពីររបស់អ្នក សូមសរសេរកថាខណ្ឌមួយដែលនឹងពន្យល់នូវអ្វីដែលពួកគេបង្រៀនអំពីតួនាទីដ៏សំខាន់នៃដង្វាយធួនរបស់ព្រះយេស៊ូវគ្រីស្ទនៅក្នុងផែនការនៃសេចក្តីសង្គ្រោះ ។ អ្នកអាចនឹងគូសបន្ទាត់ពីក្រោមឃ្លាទាំងឡាយដែលមានអត្ថន័យចំពោះអ្នក ។
ទំនួលខុសត្រូវរបស់យើងនៅក្នុងផែនការនៃសេចក្តីសង្គ្រោះ
ព្រះវរបិតាសួគ៌របស់យើងបានប្រទានដល់យើងនូវផែនការដ៏ឥតខ្ចោះរបស់ទ្រង់ដើម្បីនាំមកនូវសុភមង្គលដ៏នៅអស់កល្បជានិច្ច និង ការតម្កើងឡើងជាមួយទ្រង់ និង ជាមួយមនុស្សជាទីស្រលាញ់របស់យើង ។ ព្រះយេស៊ូវគ្រីស្ទបានបំពេញតួនាទីរបស់ទ្រង់នៅក្នុងផែនការនេះ ដោយយកឈ្នះលើសេចក្តីស្លាប់ ហើយធ្វើឲ្យយើងឈ្នះលើអំពីបាប និង ត្រឡប់ទៅរស់នៅជាមួយព្រះវរបិតាសួគ៌របស់យើងម្តងទៀត ។ ទោះជាយ៉ាងណាក៏ដោយ ការនេះមិនបានលុបបំបាត់ទំនួលខុសត្រូវរបស់យើងនៅក្នុងផែនការនេះទេ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរ ទំនួលខុសត្រូវមួយចំនួនរបស់ខ្ញុំ ក្នុងផែនការនៃសេចក្តីសង្គ្រោះ និង កត់នូវអ្វីដែលខគម្ពីរនិមួយៗបង្រៀនអំពីទំនួលខុសត្រូវផ្ទាល់ខ្លួនរបស់យើងដើម្បីអញ្ជើញអំណាចនៃដង្វាយធួនឲ្យមកកាន់ជីវិតរបស់យើង ហើយចូលរួមទាំងស្រុងសម្រាប់ពរជ័យនៃសេចក្តីសង្គ្រោះដូចខាងក្រោម ៖
ព្រះគម្ពីរទាំងនេះអាចជួយយើងឲ្យយល់ឃើញថា នៅពេលយើងជ្រើសរើសដើម្បីរស់នៅតាមដំណឹងល្អនៃព្រះយេស៊ូវគ្រីស្ទ និង ធ្វើតាមផែនការរបស់ព្រះ នោះយើងរៀបចំខ្លួនដើម្បីទទួលជីវិតដ៏នៅអស់កល្បជានិច្ចតាមរយៈដង្វាយធួននៃព្រះយេស៊ូវគ្រីស្ទ ។
-
ឧបមាថា អ្នកត្រូវបានស្នើសុំឲ្យឡើងនិយាយនៅព្រះវិហារអំពីផែនការនៃសេចក្តីសង្គ្រោះ ។ ការប្រើនូវអ្វីដែលអ្នកបានរៀនពីព្រះគម្ពីរដែលមានក្នុងកិច្ចការដាក់ឲ្យធ្វើខាងលើ សូមសរសេរក្នុងសៀវភៅកត់ត្រាការសិក្សាព្រះគម្ពីររបស់អ្នកពីអ្វីដែលអ្នកនឹងនិយាយ អំពីទំនួលខុសត្រូវរបស់យើងនៅក្នុងផែនការនៃព្រះវរបិតាសួគ៌ ។
សូមពិចារណាអំពីអ្វីដែលអ្នកអាចធ្វើ ដើម្បីបំពេញទំនួលខុសត្រូវរបស់អ្នកឲ្យកាន់តែប្រសើរនៅក្នុងផែនការនៃព្រះវរបិតាសួគ៌ និង ដើម្បីអញ្ជើញអំណាចនៃព្រះអង្គសង្គ្រោះមកកាន់ជីវិតអ្នក ។ សូមពិចារណាដើម្បីចែកចាយគំនិតរបស់អ្នកជាមួយឪពុកម្តាយ បងប្អូនបង្កើត ឬមិត្តស្និតស្នាលរបស់អ្នក ។
ផែនការនៃសេចក្តីសង្គ្រោះផ្តល់នូវចម្លើយ និង ការដឹកនាំ
ការយល់ដឹងអំពីផែនការនៃសេចក្តីសង្គ្រោះ អាចដឹកនាំអ្នកនៅពេលធ្វើការសម្រេចចិត្ត និងការស្វែងរកចម្លើយនានាសម្រាប់សំណួរដែលអ្នក ឬអ្នកដទៃអាចនឹងជួប ។
-
នៅក្នុងសៀវភៅកត់ត្រាការសិក្សាព្រះគម្ពីររបស់អ្នក សូមឆ្លើយនឹងសំណួរមួយនៃសំណួរទាំងឡាយខាងក្រោមដោយការប្រាប់អំពីរបៀបដែលការយល់ដឹងអំពីផែនការនៃសេចក្តីសង្គ្រោះផ្តល់នូវការដឹកនាំ និង ចម្លើយទាំងឡាយ ៖
-
តើការដឹងថាអ្នកពិតជាបុត្រា ឬបុត្រីរបស់ព្រះបានជះឥទិ្ធពលលើអារម្មណ៍នៃតម្លៃខ្លួនអ្នកយ៉ាងដូចម្តេច ?
-
តើអ្នកនឹងឆ្លើយតបយ៉ាងណាចំពោះនរណាម្នាក់ដែលនិយាយថា « វាគឺជាជីវិតរបស់ខ្ញុំ—ហើយខ្ញុំនឹងធ្វើអ្វីដែលខ្ញុំចង់ធ្វើ » ?
-
តើការយល់ដឹងអំពីផែនការនៃសេចក្តីសង្គ្រោះ អាចជួយមនុស្សម្នាក់ឲ្យយកឈ្នះលើអារម្មណ៍ដែលគិតថា ជីវិតគឺគ្រាន់តែសម្រាប់ជាការសប្បាយ និង បំពេញតាមចំណងនៃការសប្បាយផ្ទាល់ខ្លួនឯងដោយរបៀបណា ?
-
តើអ្នកអាចប្រើចំណេះដឹងពីផែនការនៃសេចក្តីសង្គ្រោះ ដើម្បីជួយមនុស្សម្នាក់ដែលកំពុងតែជួបនូវឧបសគ្គទាំងឡាយ ហើយដែលមានអារម្មណ៍ថា វាគឺដោយសារតែព្រះមិនស្រលាញ់គាត់ ឬ នាងដោយរបៀបណា ?
-
ការយល់ដឹងពីផែនការនៃសេចក្តីសង្គ្រោះ អាចជួយអ្នកឲ្យគោរពតាមព្រះបញ្ញត្តិទាំងឡាយរបស់ព្រះ ដោយសារតែវាពន្យល់អំពីមូលហេតុ ដែលយើងគប្បីគោរពតាមព្រះបញ្ញត្តិទាំងនោះ ( សូមមើល អាលម៉ា 12:32) ។
-
សូមអាន នីហ្វៃទី2 22:25 សូមសង្ខេបពីគោលបំណងនៃផែនការនៃសេចក្តីសង្គ្រោះ ដោយការឆ្លើយនូវសំណួរខាងក្រោមនៅក្នុងសៀវភៅកត់ត្រាការសិក្សាព្រះគម្ពីររបស់អ្នក ៖ តើផែនការនៃសេចក្តីសង្គ្រោះបាននាំសេចក្តីអំណរមកកាន់អ្នក និងគ្រួសាររបស់អ្នកតាមរបៀបណាខ្លះ ?
-
សូមសរសេរអ្វីដែលនៅខាងក្រោមនេះ នៅខាងក្រោមកិច្ចការថ្ងៃនេះ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សាមេរៀនអំពី « ផែនការនៃសេចក្តីសង្គ្រោះ » ហើយបានបញ្ចប់វានៅ ( កាលបរិច្ឆេទ ) ។
សម្រាប់សំណួរ គំនិត និង ការយល់ដឹងបន្ថែមទៀត ខ្ញុំចង់ចែកចាយជាមួយគ្រូរបស់ខ្ញុំ ៖