Mga Taga Colosas–I Kay Timoteo (Unit 26)

Materyal sa Paghahanda para sa Home-Study Teacher

Buod ng mga Daily Home-Study Lesson

Ang sumusunod na buod ng mga pangyayari, doktrina, at alituntunin na natutuhan ng mga estudyante sa pag-aaral nila ng Mga Taga Colosas–I Kay Timoteo (unit 26) ay hindi nilayong ituro bilang bahagi ng iyong lesson. Ang lesson na iyong itinuturo ay nakatuon lamang sa ilan sa mga doktrina at alituntuning ito. Sundin ang mga pahiwatig ng Banal na Espiritu habang iniisip mo ang mga pangangailangan ng iyong mga estudyante.

Day 1 (Mga Taga Colosas)

Sa kanyang sulat sa mga Banal sa Colosas, itinuro ni Pablo na si Jesucristo ang Manunubos, ang panganay sa mga espiritung anak ng Ama sa Langit, ang Tagapaglikha ng lahat ng bagay, ang namumuno sa Simbahan, at ang unang nabuhay na mag-uli. Natutuhan din ng mga estudyante na maaari tayong makipagkasundo sa Diyos sa pamamagitan ng Pagbabayad-sala ni Jesucristo kung magpapatuloy tayo na nakabaon at matibay sa ating pananampalataya. Gayundin, sa pamamagitan ng pagiging matatag at nakasandig kay Jesucristo, makakaiwas tayo na mailigaw ng mga makamundong pilosopiya at tradisyon.

Day 2 (I Mga Taga Tesalonica)

Sa sulat na ito sa mga Banal sa Tesalonica, pinuri sila ni Pablo dahil sa kanilang katapatan at itinuro sa kanila ang tungkol sa Ikalawang Pagparito ng Panginoon. Habang pinag-aaralan ang sulat na ito, natutuhan ng mga estudyante ang mga sumusunod na katotohanan: Sa pagtuturo natin ng ebanghelyo ni Jesucristo gamit ang salita at kapangyarihan ng Diyos, matutulungan natin ang iba na maging mga tagasunod ng Panginoon at ng Kanyang mga lingkod. Maibabahagi natin ang ebanghelyo sa pamamagitan ng ating halimbawa. Ang matatapat na Banal na namatay na bago ang Ikalawang Pagparito ay mabubuhay na mag-uli sa muling pagdating ni Cristo. Ang matatapat na Banal na nabubuhay kapag naganap ang Ikalawang Pagparito ay iaangat upang salubungin si Jesucristo sa Kanyang pagdating. Kung tayo ay matapat at mapagbantay sa mga tanda bago ang Ikalawang Pagparito ni Jesucristo, magiging handa tayo para sa Kanyang muling pagdating.

Day 3 (II Mga Taga Tesalonica)

Sa pag-aaral ng sulat na ito ni Pablo sa mga Banal sa Tesalonica, na naglinaw ng mga katotohanan tungkol sa Ikalawang Pagparito ni Jesucristo, natutuhan ng mga estudyante na kung buong katapatan nating titiisin ang mga pagsalungat at paghihirap nang may tiyaga at pananampalataya, tayo ay mapapabilang sa mga karapat-dapat sa kaharian ng Diyos. Itinuro ni Pablo na sa Ikalawang Pagparito ni Jesucristo, ang mabubuting tao ay magpapahinga at ang masasama ay lilipulin. Itinuro rin ni Pablo na magkakaroon ng apostasiya bago ang Ikalawang Pagparito ni Jesucristo. Natutuhan din ng mga estudyante na iniutos sa atin na umasa sa sariling kakayahan at tumulong sa iba.

Day 4 (I Kay Timoteo)

Mula sa sulat na ito ni Pablo para kay Timoteo, isang batang priesthood leader sa Efeso, natutuhan ng mga estudyante na ang mga lider sa priesthood ay may responsibilidad na tiyakin na ang totoong doktrina at tamang gawain ang itinuturo. Natutuhan din nila na ang pag-ibig sa salapi ay nagiging sanhi ng kasamaan at apostasiya. Sa kabilang banda, kung magtitiwala tayo sa buhay na Diyos at kung mayaman tayo sa paggawa ng mabuti, matatamo natin ang buhay na walang hanggan.

Pambungad

Sumulat si Pablo kay Timoteo, isang priesthood leader sa Efeso, at pinayuhan siya na maging uliran o halimbawa ng mga nagsisisampalataya.

Mga Mungkahi sa Pagtuturo

Paalala: Sa unit na ito, pinag-aralan ng mga estudyante ang scripture mastery passage na II Mga Taga Tesalonica 2:1–3. Maaari ninyong pag-aralang muli ng mga estudyante ang mga talatang ito sa pamamagitan ng pagpapabuod sa kanila ng mga katotohanan na itinuturo ng mga talatang ito. Upang tulungan ang mga estudyante na maisaulo ang bahagi ng mga talatang ito, maaari mong ipabigkas sa kanila nang ilang beses ang talata 3.

I Kay Timoteo 4

Inilarawan ni Pablo ang mga katangian ng isang matapat na lingkod ni Jesucristo

Magdala ng paper clip, tali, tape, at isang magnet sa klase. I-tape ang isang dulo ng tali sa mesa at itali ang isa pang dulo nito sa paper clip. Ilapit ang magnet sa paper clip nang hindi ito idinidikit sa paper clip. Dapat na sumunod ang paper clip sa magnet dahil sa nakahihilang lakas nito. Iikot ang magnet upang maipakita kung paano nito napagagalaw ang paper clip.

Kung ang paper clip ay sumisimbolo sa isang tao, ano naman ang sinisimbolo ng magnet?

Ipaisip sa mga estudyante kung paano sila naging magnet na nakakaimpluwensya sa iba. Sabihin sa mga estudyante na alamin ang isang alituntunin sa pag-aaral nila ng I Kay Timoteo 4 na nagtuturo sa atin kung paano maging isang mabuting impluwensya sa buhay ng ibang tao.

Ibuod ang I Kay Timoteo 4:1–11 na ipinapaliwanag na nagpropesiya si Pablo na sa “mga huling panahon” (talata 1), ang ilang miyembro ay lalayo sa pananampalataya at susunod sa mga maling turo at gawain, tulad ng “[pagbabawal sa] pagaasawa” (talata 3). Pinayuhan ni Pablo si Timoteo na kandiliin (pangalagaan) ng totoong doktrina ang mga Banal.

Ipabasa nang tahimik sa mga estudyante ang I Kay Timoteo 4:12, na inaalam kung ano ang ipinayo ni Pablo kay Timoteo na maging pagkatao nito. Ipaliwanag na ang salitang pananalita sa talatang ito ay tumutukoy sa pag-uugali at asal. Sabihin sa mga estudyante na ibahagi ang kanilang nalaman.

Ano sa palagay ninyo ang kahulugan ng maging “uliran ng mga nagsisisampalataya”? (Maaari mong imungkahi sa iyong mga estudyante na markahan ang pariralang ito sa kanilang mga banal na kasulatan.)
Sa ipinayo ni Pablo, anu-ano ang mga paraan para maging uliran (halimbawa) si Timoteo sa mga nagsisisampalataya? (Ilista sa pisara ang mga sagot ng mga estudyante.)

Ipabasa nang malakas sa isang estudyante ang I Kay Timoteo 4:13–16. Sabihin sa klase na sumabay sa pagbasa na inaalam ang karagdagang ipinayo ni Pablo na makatutulong kay Timoteo para maging halimbawa sa mga nagsisisampalataya.

Ano pa ang karagdagang ipinayo ni Pablo na makatutulong kay Timoteo para maging halimbawa sa mga nagsisisampalataya?
Ayon sa talata 15, bakit sinabi ni Pablo kay Timoteo na pagnilayan ang mga doktrinang itinuro ni Pablo at lubusang ibigay ang sarili sa pamumuhay ng mga ito? (Upang makita ng iba kung paano nakatulong kay Timoteo ang paggawa ng mga ito.)
Ayon sa mga itinuro ni Pablo sa talata 16, ano ang maaaring maging resulta kung magsusumikap tayong maging mga halimbawa ng mga sumasampalataya kay Jesucristo? (Gamit ang mga salita ng mga estudyante, isulat sa pisara ang isang alituntunin na tulad ng sumusunod: Kung magiging mga halimbawa tayo ng mga sumasampalataya kay Jesucristo, makatutulong tayo na makapagbigay ng kaligtasan sa ating sarili at sa iba.)
Paano nakatutulong na makapagbigay ng kaligtasan sa iba ang pagiging isang halimbawa ng isang sumasampalataya at sumusunod kay Jesucristo?

Sabihin sa mga estudyante na pag-aralang muli ang nakalista sa pisara at isipin ang mga paraan kung paano naging “uliran ng mga nagsisisampalataya” si Timoteo (I Kay Timoteo 4:12). Sabihin sa klase na magbigay ng mga paraan na maaaring maging halimbawa sa bawat aspetong ito ang isang tao.

Maaari mong ipanood ang isa sa mga sumusunod na video: “No Cussing Club” (4:57) o “The Lost Purse” (2:40). Ang video na ito ay makukuha sa LDS.org. Sabihin sa mga estudyante na alamin ang mga paraan na naging halimbawa sa mga nagsisisampalataya kay Jesucristo ang binatilyo o ang dalagita sa video.

Kailan naging isang uliran ng mga nagsisisampalataya sa isa sa mga paraan na binanggit ni Pablo ang isang tao para sa inyo? (Maaari ka ring magbahagi ng isang karanasan sa iyong buhay.)

Sabihin sa mga estudyante na sumulat sa kanilang notebook o scripture study journal ng isang mithiin kung paano sila magiging uliran o halimbawa ng mga nagsisisampalataya kay Jesucristo at ng sa gayon ay makatulong na makapagbigay ng kaligtasan sa iba at sa kanilang sarili.

Susunod na Unit (II Kay Timoteo 1–Sa Mga Hebreo 4)

Sabihin sa mga estudyante na pag-isipan ang ilan sa mga hamon ng pagiging isang disipulo ni Jesucristo ngayon. Ipaliwanag din na sa pagpapatuloy ng kanilang pag-aaral sa mga itinuro ni Pablo sa susunod na linggo, malalaman nila ang mga katotohanan na tutulong sa kanila na manatiling tapat sa kabila ng mga paghihirap at pang-uusig.