Lesson 4: Pag-aaral ng mga Banal na Kasulatan

Lesson 4

Pag-aaral ng mga Banal na Kasulatan

Pambungad

Ang lesson na ito ay tutulong sa mga estudyante na maunawaan ang kahalagahan ng pag-aaral ng mga banal na kasulatan araw-araw at pagbabasa ng buong Bagong Tipan bilang bahagi ng pag-aaral na ito. Maaari ding matutuhan ng mga estudyante ang mga paraan upang mapagbuti pa nila ang pag-aaral ng mga banal na kasulatan.

Mga Mungkahi sa Pagtuturo

Ang kahalagahan ng epektibong pag-aaral ng mga banal na kasulatan araw-araw

Bigyan ang bawat estudyante ng kopya ng sumusunod na survey. Sabihin sa mga estudyante na pag-isipan ang mga pahayag at lagyan ng marka ang kanilang mga sagot sa scale. Tiyakin sa mga estudyante na hindi mo ipasasabi sa kanila ang kanilang mga sagot.

Matapos masagutan ng mga estudyante ang survey na ito, hikayatin silang pag-isipan sa oras ng lesson kung paano nila mas pagbubutihin pa ang pag-aaral nila ng mga banal na kasulatan.

Ipabasa nang malakas sa isang estudyante ang sumusunod na pahayag ni Elder David A. Bednar ng Korum ng Labindalawang Apostol:

“Ang mga banal na kasulatan ay naglalaman ng mga salita ni Cristo at imbakan ng tubig na buhay na nasa atin na at makaiinom tayo ng marami. …

“Sa karaniwang gawain sa bawat araw, maraming tubig ang nawawala sa ating katawan. Ang pagkauhaw ay reaksyon ng mga selula ng katawan, at ang tubig sa ating katawan ay dapat sapat araw-araw. Walang saysay ang paminsan-minsang ‘punuin’ ng tubig ang ating katawan, at magdanas ng dehydration sa matagal na panahon. Ang ganoong bagay ay totoo rin sa espirituwal. Ang espirituwal na pagkauhaw ay nangangailangan ng tubig na buhay. Ang palagiang pagdaloy ng tubig na buhay ay lalong mahalaga kaysa paminsan-minsang pag-inom” (“A Reservoir of Living Water” [Church Educational System fireside, Peb. 4, 2007], 1, 7, broadcast.lds.org).

Anong alituntunin ang matututuhan natin kay Elder Bednar tungkol sa matatanggap natin mula sa pag-aaral ng mga banal na kasulatan araw-araw? (Dapat matukoy ng mga estudyante ang alituntuning tulad nito: Kapag araw-araw tayong nag-aaral ng mga banal na kasulatan, natatanggap natin ang “tubig na buhay” na kailangan natin. Isulat sa pisara ang alituntuning ito.)

Ang kahalagahan ng mga banal na kasulatan sa ating panahon

Upang matulungan ang mga estudyante na maunawaan ang kahalagahan ng mga banal na kasulatan sa ating panahon, maaari mong ipanood sa kanila ang video na “The Blessings of Scripture” (3:04), na makukuha sa LDS.org. Sa video na ito, inilarawan ni Elder D. Todd Christofferson ng Korum ng Labindalawang Apostol ang sakripisyong ginawa ng isang tao para mabasa ng mas marami pang tao ang Biblia. Kung ipapanood mo ang video, maaari mong i-pause matapos magtanong si Elder Christofferson ng, “Ano ang naunawaan nila na dapat din nating maunawaan?” (time code 1:56) para tanungin ang mga estudyante kung paano nila sasagutin ang tanong na ito. Pagkatapos ay ituloy ang panonood ng video. Pagkatapos ng video, magpatuloy sa lesson sa talatang nagsisimula sa, “Matapos ang video …”

Kung hindi mo ipinanood ang video, papuntahin ang apat na estudyante sa harapan ng klase at ipabasa ang mga sumusunod na bahagi ng mensaheng ibinigay ni Elder Christofferson.

1. “Noong Oktubre 6, sa taong 1536, isang kaawa-awang lalaki ang inilabas mula sa isang bartolina sa Vilvorde Castle malapit sa Brussels, Belgium. Halos isa’t kalahating taon na nag-isa ang lalaki sa madilim at mapanglaw na selda. Ngayong nasa labas na ng pader ng kastilyo, ang bilanggo ay itinali sa isang poste. Nabigkas pa niya nang malakas ang huling dasal niya, ‘Panginoon! buksan po Ninyo ang mga mata ng hari ng England,’ at pagkatapos siya ay ibinigti. Kaagad na sinunog ang kanyang katawan. Sino ang lalaking ito, at ano ang kasalanan niya … ?” (“Ang Biyaya ng Banal na Kasulatan,” Ensign o Liahona, Mayo 2010, 32).

2. “Ang pangalan niya ay William Tyndale, at ang krimeng nagawa niya ay ang pagsalin at paglathala ng Biblia sa wikang Ingles.

“… Sa mainitang pakikipagtalo sa isang paring tutol sa paglalagay ng banal na kasulatan sa mga kamay ng karaniwang tao, sumumpa si Tyndale na, ‘Kung pahahabain pa ng Diyos ang aking buhay, tutulungan ko ang batang nag-aararo na mas marami pang malaman sa mga Banal na Kasulatan kaysa sa iyo!’ …

“Si William Tyndale ay hindi ang una, ni ang huli, sa mga taong mula sa maraming bansa at wika na nagsakripisyo, maging hanggang kamatayan, upang ilabas ang salita ng Diyos mula sa kadiliman. … Ano ang nalaman nila tungkol sa kahalagahan ng mga banal na kasulatan na kailangan din nating malaman? Ang mga tao noon sa ika-16 na siglo sa England, na nagbayad ng malalaking halaga at nanganib ang mga buhay sa pagkakaroon ng Biblia, ano ang naunawaan nila na dapat din nating maunawaan?” (“Ang Biyaya ng Banal na Kasulatan,” 32).

Itanong sa klase:

Sa palagay ninyo, bakit nagsakripisyo nang gayon kalaki ang mga tao para mabasa ang mga banal na kasulatan?

Patuloy na ipabasa sa pangatlong estudyante ang pahayag ni Elder Christofferson

3. “Noong panahon ni Tyndale, ang kamangmangan sa mga banal na kasulatan ay laganap dahil walang mabasang Biblia ang mga tao, lalo na sa wikang mauunawaan nila. Ngayon ang Biblia at iba pang banal na kasulatan ay nariyan lang, pero dumarami pa rin ang walang alam sa banal na kasulatan dahil hindi binubuklat ng mga tao ang mga aklat. Dahil dito, nalimutan nila ang mga bagay na alam ng kanilang mga lolo’t lola” (“Ang Biyaya ng Banal na Kasulatan,” 33).

Itanong sa klase:

Sa palagay ninyo, bakit may ilang tao na hindi nagbabasa ng mga banal na kasulatan tulad ng nararapat nilang gawin?

Patuloy na ipabasa sa pang-apat na estudyante ang pahayag ni Elder Christofferson.

4. “Pag-isipan ang dami ng ating biyaya sa pagkakaroon ng Banal na Biblia at mga 900 karagdagang mga pahina ng banal na kasulatan, kabilang ang Aklat ni Mormon, ang Doktrina at mga Tipan, at ang Mahalagang Perlas. … Tiyak na kaakibat ng pagpapalang ito ay sinasabi sa atin ng Panginoon na ang palagiang pagbaling sa mga banal na kasulatan ay higit na kailangan ngayon” (“Ang Biyaya ng Banal na Kasulatan,” 35).

Pagkatapos ng video (o pagkatapos basahin ng pang-apat na estudyante ang pahayag ni Elder Christofferson), sabihin sa mga estudyante na ipaliwanag ang pinaniniwalaan nilang sinabi ni Elder Christofferson tungkol sa pangangailangan nating pag-aralan ang mga banal na kasulatan. Matapos sumagot ang mga estudyante, isulat ang sumusunod na katotohanan sa pisara: Mas kailangan natin ngayon ang mga banal na kasulatan kaysa noon.

Sa palagay ninyo, bakit mas kailangan natin sa panahong ito ang mga banal na kasulatan kaysa noon?

Upang matulungan ang mga estudyante na maunawaan kung paano makatutulong sa atin ang pag-aaral ng mga banal na kasulatan sa ating panahon, ipaliwanag na si Apostol Pablo ay sumulat ng isang liham kung saan inilarawan niya ang ilang kalagayan ng mundo sa mga huling araw. Ipabasa nang malakas sa isang estudyante ang II Kay Timoteo 3:1–5, 13. Sabihin sa klase na tahimik na sumabay sa pagbasa, na inaalam ang ilan sa mga kasalanan at pag-uugali na magiging karaniwan at laganap sa ating panahon. (Maaari mong tulungan ang mga estudyante na mabigyang-kahulugan ang mahihirap na salita at mga kataga sa mga talatang ito.)

Ano ang ilan sa mga kasalanan at pag-uugali na nakasaad sa mga talatang ito na nakita ninyo sa ating lipunan ngayon?

Ipabasa nang malakas sa isang estudyante ang II Kay Timoteo 3:14–17. Hilingin sa klase na alamin kung paano tayo makahahanap ng kaligtasan sa mapanganib na panahong ito.

Paano tayo makahahanap ng kaligtasan sa mapanganib na panahong ito?

Isulat sa pisara ang sumusunod na di-kumpletong pahayag: Kapag pinag-aralan natin ang mga banal na kasulatan, makatatanggap tayo ng …

Ayon sa II Kay Timoteo 3:15–17, anong mga pagpapala ang makakamtan natin kapag pinag-aralan natin ang mga banal na kasulatan at ipinamuhay ang mga turo nito? (Matapos sumagot ng mga estudyante, kumpletuhin ang pahayag sa pisara para ganito ang kalabasan: Kapag pinag-aralan natin ang mga banal na kasulatan, makatatanggap tayo ng karunungan, pagwawasto, at tagubilin na aakay sa atin tungo sa kaligtasan.)

Ipaliwanag na ang pahayag sa pisara ay halimbawa ng isang alituntunin. Ang mga alituntunin at doktrina ng ebanghelyo ni Jesucristo ay mahalaga at di-nagbabagong mga katotohanan na nagbibigay ng patnubay sa ating buhay. Ang isa sa mahahalagang layunin ng mga banal na kasulatan ay ituro ang mga doktrina at mga alituntunin ng ebanghelyo. Magagawa nating mas makabuluhan ang ating personal na pag-aaral ng mga banal na kasulatan sa pamamagitan ng paghahanap ng mga doktrina at mga alituntunin, pag-iisip sa mga kahulugan nito, at pagsasabuhay ng mga ito.

Muling tukuyin ang alituntunin na isinulat mo sa pisara.

Sa inyong palagay, ano ang ibig sabihin ng makatatanggap tayo ng karunungan, pagwawasto, at tagubilin kapag pinag-aralan natin ang mga banal na kasulatan?
Kailan ninyo nadama na nakatanggap kayo ng karunungan, pagwawasto, at tagubilin dahil pinag-aralan ninyo ang mga banal na kasulatan? (Maaari ka ring magbahagi ng iyong sariling karanasan.)

Pagbabasa ng Bagong Tipan araw-araw

Ipaliwanag na ang isa sa mga inaasahan sa seminary course na ito ay babasahin ng mga estudyante ang buong Bagong Tipan. Kailangan ito para makatanggap ng diploma sa seminary.

Ipaliwanag na ang pagbabasa ng buong Bagong Tipan ay mangangailangan ng matibay na determinasyon ngunit sulit ang gagawing pagsisikap na ito. Para mailarawan ito, magpakita ng dalawang transparent na baso na puno ng tubig (o soft drink). Anyayahan ang dalawang estudyante na tumayo malapit sa mga baso. Bigyan ng straw ang isang estudyante. Bigyan naman ang isa pang estudyante ng pitong straw na magkakasamang nakatali. Sabihin sa kanila na ubusin nang mabilis ang tubig hangga’t kaya nila gamit ang straw o mga straw. (Ang estudyanteng gamit ang isang straw ay dapat tuluy-tuloy na mainom ang tubig at unang makaubos nito; ang isa namang estudyante ay dapat mahirapan sa pagsipsip ng tubig gamit ang mga straw.) Paupuin ang dalawang estudyante, at itanong sa klase:

Paano ninyo maiuugnay ang aktibidad na ito sa ating mithiing mabasa ang buong Bagong Tipan bilang bahagi ng pag-aaral na ito? (Ang estudyanteng may pitong straw ay parang isang taong nagsisikap basahin nang minsanan lang ang malaking bahagi ng mga banal na kasulatan. Ang estudyanteng may gamit ng isang straw ay tulad ng isang taong nagbabasa ng maliit na bahagi araw-araw.)

Upang matulungan ang mga estudyante na makita kung paano nila mababasa ang buong Bagong Tipan sa pamamagitan ng palagiang pagbabasa ng maliliit na bahagi, ipahati sa kanila ang bilang ng mga pahina sa Bagong Tipan (404 na pahina sa Latter-day Saint edition ng King James Version ng Biblia) sa bilang ng kabuuang araw ng pasok hanggang sa matapos ang klase. Halimbawa, kung ang Bagong Tipan ay ituturo sa isang school year na may 280 araw, kailangang makapagbasa ang mga estudyante ng mga 1.5 pahina bawat araw para matapos ito sa katapusan ng klase.

Patotohanan ang mga pagpapalang darating sa mga estudyante kapag masigasig nilang pinag-aralan ang Bagong Tipan. Ang mga estudyante ay tatanggap ng karunungan, pagwawasto, at tagubilin mula sa mga banal na kasulatan at ng patnubay ng Espiritu Santo.

Muling tukuyin ang mga alituntunin na nasa pisara, at patotohanan na sa pag-aaral ng mga banal na kasulatan araw-araw, makakamtan ng mga estudyante ang mga pagpapalang binanggit ni Pablo sa II Kay Timoteo 3:15–17. Hikayatin ang mga estudyante na gumawa ng mithiing maglaan ng oras araw-araw para sa personal na pag-aaral ng mga banal na kasulatan at pagbabasa ng buong Bagong Tipan. Ipasulat sa mga estudyante ang kanilang mga mithiin sa kanilang scripture study journal.

Komentaryo at Pinagmumulang Impormasyon

Dumarating ang mga pagpapala kapag nag-aaral tayo ng mga banal na kasulatan araw-araw

Sinabi ni Elder D. Todd Christofferson ng Korum ng Labindalawang Apostol:

“Ginagamit ng Diyos ang banal na kasulatan para iwasto ang maling kaisipan, mga maling tradisyon, at kasalanan at mga pinsalang dulot nito. Siya ay mapagmahal na magulang na magliligtas sa atin sa walang-saysay na pagdurusa at pighati at kasabay nito ay tutulungan tayong makamit ang ating banal na potensiyal. …

“Sa huli, ang pangunahing layunin ng lahat ng banal na kasulatan ay puspusin ang ating mga kaluluwa ng pananampalataya sa Diyos Ama at sa Kanyang Anak na si Jesucristo” (“Ang Biyaya ng Banal na Kasulatan,” Ensign o Liahona, Mayo 2010, 33–34).

Itinuro ni Sister Julie B. Beck, dating Relief Society general president:

“Kung hindi pa ninyo nakakagawiang mag-aral ng banal na kasulatan araw-araw, simulan ito ngayon at patuloy na mag-aral upang maging handa sa inyong mga responsibilidad sa buhay na ito at sa kawalang-hanggan. …

“… Ang susi sa pagtuklas ng mahalagang kaalaman ay ang patuloy na pag-aaral. … Ang mga banal na kasulatan ay nagpapatotoo tungkol kay Cristo (tingnan sa Juan 5:39). Ang mga ito ay nagsasabi sa atin ng lahat ng bagay na dapat nating gawin (tingnan sa 2 Nephi 32:3). Ang mga ito ay ‘makapag[pa]padunong sa [atin] sa ikaliligtas [natin]’ (II Kay Timoteo 3:15)

“… Sa pamamagitan ng inyong nakagawiang araw-araw na pagbabasa ng banal na kasulatan, kayo ay ‘naaakay na maniwala sa mga banal na kasulatan, oo, sa mga propesiya ng mga banal na propeta, na nasusulat’ (Helaman 15:7). Kayo ang magiging mga ina [at mga ama] at lider na tutulong na ihanda ang susunod na henerasyon sa kaalaman at patotoo sa ebanghelyo” (“Ang Aking Kaluluwa ay Nalulugod sa mga Banal na Kasulatan,” Ensign o Liahona, Mayo 2004, 107–9).

Ang himala ng Banal na Biblia

Sa isang mensahe sa pangkalahatang kumperensya na may pamagat na “Ang Himala ng Banal na Biblia” (Ensign o Liahona, Mayo 2007, 80–82), itinuro ni Elder M. Russell Ballard ng Korum ng Labindalawang Apostol ang kahalagahan ng Banal na Biblia at kinilala ang mga pagsisikap ng mga Kristiyanong martir at reformers na tumulong upang mabasa ng lahat ang Biblia. Hinikayat niya tayo na magpasalamat para sa Banal na Biblia at magpatotoo na “hindi nagkataon lamang na napasaatin ang Biblia ngayon” (“Ang Himala ng Banal na Biblia,” 80).

Mga Karagdagang Ideya sa Pagtuturo

Mga paraan at kasanayan sa pag-aaral ng mga banal na kasulatan

Upang matulungan ang mga estudyante na maunawaan ang mga paraan at kasanayan na magpapaibayo ng pag-aaral nila ng mga banal na kasulatan, maaari mo silang bigyan ng kopya ng sumusunod na handout at talakayin ito sa kanila:

Mga Paraan at Kasanayan sa Pag-aaral ng mga Banal na Kasulatan

Manwal ng Bagong Tipan para sa Seminary Teacher—Lesson 4

Ipalit ang pangalan: Para matulungan ka na maiugnay ang mga doktrina at alituntunin mula sa mga banal na kasulatan sa iyong buhay, ipalit ang iyong pangalan sa pangalang nasa mga banal na kasulatan. Subukang gamitin ang kasanayang ito sa pag-aaral ng banal na kasulatan sa pangalan ni Pedro sa Mateo 16:15–17.

Sanhi at epekto: Para matulungan ka na matukoy ang mga alituntunin ng ebanghelyo sa mga banal na kasulatan, hanapin ang “kung–sa gayon” at “dahil–samakatwid” na mga pahayag na may pasubali o may kundisyon. Subukang gamitin ang kasanayang ito sa Mateo 6:14–15.

Mga listahan sa mga banal na kasulatan: Ang mga banal na kasulatan ay kadalasang naglalaman ng mga listahan ng mga bagay-bagay tulad ng mga tagubilin o babala. Kapag may nakita kang listahan, lagyan ng numero ang bawat bagay na nakalista rito. Subukang gamitin ang kasanayang ito sa Mga Taga Galacia 5:22–23.

Paghahambing: Ang mga banal na kasulatan ay madalas maghambing ng mga ideya, pangyayari, at tao. Ang mga paghahambing na ito ay nagbibigay-diin sa mga alituntunin ng ebanghelyo. Tingnan ang mga paghahambing na nasa iisang talata, sa mga kabanata, at sa iba pang mga kabanata at aklat. Subukang gamitin ang kasanayang ito sa Mateo 5:14–16.

Ilarawan sa isip: Maghanap ng mga detalye na makatutulong sa iyo na mailarawan sa iyong isip ang mga ito habang nagbabasa ka. Isipin na kunwari ay naroon ka sa isang pangyayari. Ito ay magpapalakas sa iyong patotoo tungkol sa katotohanan ng nabasa mo sa mga banal na kasulatan. Subukang gamitin ang kasanayang ito sa Mateo 8:23–27.

Simbolismo: Ang mga salitang katulad, gaya, o inihalintulad sa ay makatutulong sa iyo sa pagtukoy ng mga simbolo. Alamin ang ibig sabihin ng simbolo sa pamamagitan ng pagsasaliksik at pag-iisip nang mabuti sa mga katangian nito. Ang mga tulong sa pag-aaral ng mga banal na kasulatan tulad ng mga footnote, Bible Dictionary o Gabay sa mga Banal na Kasulatan ay makatutulong sa iyo na mabigyang-kahulugan ang ilang simbolo. Subukang gamitin ang kasanayang ito sa Mateo 13:24–30.

Mga cross-reference: Kadalasan, naipapaliwanag o nalilinaw ng isang talata sa banal na kasulatan ang isang parirala o konsepto na nasa ibang talata. Iugnay ang mga talata sa isa’t isa sa pamamagitan ng paggamit ng Gabay sa mga Banal na Kasulatan para matulungan na malaman ang kahulugan ng talata sa mga banal na kasulatan. Gamitin ang kasanayang ito sa pagbabasa ng Juan 10:16 at 3 Nephi 15:21. Paano nakatulong ang pagbabasa ng 3 Nephi 15:21 upang mas maunawaan ninyo ang ibig sabihin ng Juan 10:16?

Pagninilay: Ang pagninilay ay pag-iisip nang malalim, pagtatanong, at pagsusuri sa nalaman at natutuhan mo. Ang pagninilay ay tumutulong sa atin na maunawaan ang kailangan nating gawin para maipamuhay ang mga alituntunin ng ebanghelyo. Pagnilayan kung paano mo maipamumuhay ang mga katotohanan sa Sa Mga Hebreo 12:9.

Pagsasabuhay: Kapag natukoy at nalaman mo ang mga doktrina at mga alituntuning matatagpuan sa mga banal na kasulatan, magkakaroon ka ng mas malalim na kaalaman sa pamamagitan ng pagsasabuhay sa mga katotohanang natuklasan mo. Sinabi ng Tagapagligtas, “Kung ang sinomang tao ay nagiibig gumawa ng kalooban [ng Ama sa Langit], ay makikilala niya ang turo, kung ito’y sa Dios, o kung ako’y nagsasalita na mula sa aking sarili” (Juan 7:17). Maghanap ng mga pagkakataon na magamit ang natutuhan mo habang pinag-aaralan mo ang mga banal na kasulatan.

Mga tool o kasangkapan para sa epektibong pag-aaral ng mga banal na kasulatan

Magdispley o magdrowing sa pisara ng ilang kasangkapang kagaya ng nakadrowing sa ibaba. Tanungin sa mga estudyante kung anong uri ng siyentipiko ang gagamit ng mga kasangkapang ito.

Anong uri ng siyentipiko ang gagamit ng mga kasangkapang ito? (Maaaring kasama sa mga sagot ang mga archaeologist, paleontologist, o geologist.)
Ano ang ginagawa ng mga archaeologist? (Pinag-aaralan ng mga archaeologist ang mga labi ng mga nakaraang kultura. Kadalasan ay kinapapalooban ito ng pagsasaliksik at paghuhukay para sa mga iningatang artifact na makatutulong sa atin na maunawaan ang nakaraan.)
Kung kayo ay isang archaeologist, kailan ninyo gagamitin ang piko o pala sa paghuhukay? Kailan ninyo gagamitin ang maliit na brush?

Ipaliwanag na tulad ng archeologist na gumagamit ng espisipikong kasangkapan para matulungan sila na mahanap at maingat na mahukay ang mahahalagang artifact, may magagamit tayong mga kasangkapan na tutulong sa pag-aaral natin ng mga banal na kasulatan.

Ano ang ilan sa mga tool na magagamit natin para matulungan tayo sa pag-aaral ng mga banal na kasulatan?

Ipabuklat sa mga estudyante ang Gabay sa mga Banal na Kasulatan at ipahanap ang mga pangalan ng ilan sa mga tool na magagamit natin sa pag-aaral ng mga banal na kasulatan. Sabihin sa mga estudyante na magreport tungkol sa nahanap nila.

Ipaliwanag na ang mga resources na ito, gayon din ang mga footnote at chapter summary sa mga LDS edition ng mga banal na kasulatan, ay mahahalagang mga tool na makatutulong sa atin na maunawaan ang konteksto at nilalaman ng mga banal na kasulatan. (Ipaliwanag na ang konteksto ay naglalaman ng background o mga pangyayari sa kasaysayan at impormasyon sa mga talata na nauugnay sa pinag-aaralang mga banal na kasulatan.)

Paano ninyo magagamit ang bawat isa sa mga tool na ito para matulungan kayong maunawaan ang konteksto at nilalaman ng mga banal na kasulatan? (Maaari mong tulungan sandali ang mga estudyante na maunawaan kung paano magagamit ang bawat tool sa pag-aaral nila ng mga banal na kasulatan.)
Paano nakatutulong sa inyo ang pag-unawa sa mga kahulugan ng mga salita at sa mga pangyayari sa kultura at kasaysayan para matukoy at makilala ang mga doktrina at alituntunin?

Upang makapagbigay ng halimbawa kung paano gamitin ang mga tool sa pag-aaral ng mga banal na kasulatan para matuklasan ang mga doktrina at alituntunin, ipabasa sa mga estudyante ang Mateo 7. Ipaliwanag na ang Mateo 7 ay naglalaman ng mga salita ni Jesucristo sa Kanyang mga disipulo sa isang bundok at bahagi ng tinatawag na Sermon sa Bundok.

Ipabasa nang malakas sa isang estudyante ang Mateo 7:1–2. Sabihin sa klase na tahimik na sumabay sa pagbabasa, na inaalam ang mga doktrina at alituntunin sa mga talatang ito. Maaari mong imungkahi na markahan nila ang mga salita o kataga na nagtuturo ng mahahalagang katotohanan. Hikayatin ang mga estudyante na gamitin ang mga seleksyon mula sa Pagsasalin ni Joseph Smith na matatagpuan sa Gabay sa mga Banal na Kasulatan upang matulungan silang maunawaan ang mga talatang ito. Maaari mong ituro na makakakita rin sila ng mga piling pagsasalin mula sa Pagsasalin ni Joseph Smith sa Gabay sa mga Banal na Kasulatan. Ipaliwanag na ang Pagsasalin ni Joseph Smith ay inspiradong pagsasalin, o rebisyon, ng King James Version ng Biblia.

Anong mga alituntunin ang natukoy ninyo sa mga talatang ito? (Isulat sa pisara ang mga sagot ng mga estudyante. Ang isang alituntunin na maaaring matukoy nila ay kung matwid ang paghatol natin, tayo ay hahatulan sa gayon ding paraan.)
Paano nakatulong sa inyo ang Pagsasalin ni Joseph Smith para matukoy ang mga alituntuning ito?
Paano nakatulong sa inyo ang pag-unawa sa background at nilalaman ng mga talatang ito para matukoy ang alituntuning ito?

Ibahagi ang iyong patotoo tungkol sa mga banal na kasulatan at ang kahalagahan ng paggamit ng mga tool, paraan, at kasanayan sa pag-aaral ng mga banal na kasulatan para madagdagan ang ating pag-unawa sa mga ito.