Ang mga Fariseo at mga eskriba ay dumaing tungkol sa pakikisalamuha ng Tagapagligtas sa mga maniningil ng buwis at mga makasalanan. Tumugon ang Tagapagligtas sa kanila sa pagbibigay ng talinghaga ng nawawalang tupa, ng nawawalang barya, at ng alibughang anak.
Ibinigay ni Jesus ang talinghaga ng nawawalang tupa at ng nawawalang isang putol na pilak o barya
Simulan ang klase sa pagtatanong sa mga estudyante kung nawalan na sila ng isang bagay na mahalaga sa kanila.
Ano ang handa ninyong gawin para mahanap ito? Bakit?
Ano sa palagay ninyo ang ibig sabihin ng espirituwal na “nawawala” ang isang tao? (Tulungan ang mga estudyante na maunawaan na ito ay maaaring tumukoy sa mga taong hindi pa natatanggap ang ipinanumbalik na ebanghelyo ni Jesucristo o hindi kasalukuyang namumuhay ayon sa mga turo ng ebanghelyo.)
Sabihin sa klase na mag-isip ng isang taong kakilala nila na maaaring espirituwal na nawawala. Sabihin sa kanila na pagnilayan ang nadarama nila tungkol sa taong ito.
Ipaliwanag na ang Lucas 15 ay naglalaman ng mga turo ng Tagapagligtas tungkol sa mga taong espirituwal na nawawala. Sabihin sa mga estudyante na hanapin ang mga katotohanan sa Lucas 15 tungkol sa nadarama ng Ama sa Langit sa mga taong espirituwal na nawawala at ang mga responsibilidad natin sa kanila.
Ipabasa nang malakas sa isang estudyante ang Lucas 15:1–2. Sabihin sa klase sa tahimik na sumabay sa pagbasa, na inaalam kung sino ang nagsilapit kay Jesus at ano ang dinaing ng mga Fariseo at mga eskriba tungkol dito.
Sino ang mga nagsilapit sa Tagapagligtas? Bakit nangagbulung-bulungan o dumaing ang mga Fariseo at mga eskriba?
Ano ang ipinapakita ng pagbubulung-bulungan na ito tungkol sa mga Fariseo at mga eskriba?
Ipaliwanag na nagsalita sa kanila ang Tagapagligtas sa pagbibigay ng tatlong talinghaga: isa ay tungkol sa nawawalang tupa, ang isa ay tungkol sa nawawalang isang putol na pilak o barya, at ang isa pa ay tungkol sa nawawalang anak. Ang mga talinghagang ito ay nilayong magbigay ng pag-asa sa mga makasalanan gayundin upang kondenahin ang pagpapaimbabaw at pagmamalinis ng mga eskriba at mga Fariseo. Sabihin sa mga estudyante na pansinin kung bakit ang paksa sa bawat talinghaga ay tungkol sa pagkawala at kung paano ito nakita.
Isulat sa pisara ang sumusunod na chart o ibigay ito sa mga estudyante bilang handout. Pagpartner-partnerin ang mga estudyante, at sabihin sa isang estudyante na pag-aralan ang Lucas 15:3–7 at sa isa namang estudyante ang Lucas 15:8–10. Ipabasa sa mga estudyante ang naka-assign na mga talinghaga sa kanila, na inaalam ang mga sagot sa mga tanong na nasa kaliwang column. (Ang pangatlong talinghaga ay tatalakayin kalaunan sa lesson.)
Pagkatapos ng sapat na oras, sabihin sa mga estudyante na ipaliwanag ang naka-assign na talinghaga sa kanila, at sabihin sa kanilang mga kapartner ang mga sagot nila sa mga tanong na nasa chart. Kapag tapos na ang mga magkakapartner sa bawat grupo, papuntahin ang ilan sa pisara at isulat sa chart ang kanilang mga sagot o (kung hindi mo isinulat ang chart sa pisara) ipabahagi ang kanilang mga sagot sa klase.
Ano ang kaibhan ng pagkawala ng tupa sa pagkawala ng isang putol na pilak o barya? (Ang tupa ay nawala nang hindi sinadya, samantalang ang putol na pilak o barya ay nawala dahil sa kapabayaan ng may-ari nito [tingnan sa David O. McKay, sa Conference Report, Abr. 1945, 120, 121–22].)
Ayon sa talata 7 at 10, ano ang kinakatawan ng nahanap na isang putol na pilak o barya at tupa? (Kumakatawan ang mga ito sa isang makasalanan na nagsisi at bumaling sa Diyos.)
Ano ang ating responsibilidad sa mga nawawala, kahit ano pa ang dahilan ng kanilang pagkawala?
Isulat ang sumusunod na hindi kumpletong pahayag sa pisara: Kapag tinulungan natin ang iba na magkaroon ng hangaring magsisi, …
Batay sa reaksyon ng mga taong nahanap ang mga nawawala, ano ang idurugtong ninyo para makumpleto ang pahayag na nasa pisara? (Dapat matukoy ng mga estudyante ang alituntuning tulad ng sumusunod: Kapag tinulungan natin ang iba na magkaroon ng hangaring magsisi, nagagalak tayo at natutuwa ang kalangitan. Kumpletuhin ang nakasulat na alituntunin sa pisara. Maaari mong anyayahan ang mga estudyante na isulat ang alituntuning ito sa kanilang mga banal na kasulatan sa tabi ng Lucas 15:1–10.)
Paano ninyo o ng isang taong kilala ninyo tinulungan ang isang taong espirituwal na nawawala na magkaroon ng hangaring magsisi o lumapit sa Ama sa Langit? Kailan kayo tinulungan ng isang tao? (Paalalahanan ang mga estudyante na huwag magbahagi ng anumang napakapersonal o napakapribadong bagay.)
Itinuro ni Jesus ang talinghaga ng alibughang anak
Sabihin sa mga estudyante na isiping mabuti ang sumusunod na sitwasyon: Isang dalagita ang nakagawa ng mabibigat na kasalanan at hindi na nagdarasal at nagsisimba. Nakadama siya ng pagnanais na simulan ang pagdarasal at pagsunod sa mga pamantayan ng Panginoon, pero nag-alala siya na baka ayaw na Niya na bumalik siya.
Sabihin sa mga estudyante na isipin kung may kilala sila na parang ganito ang sitwasyon. Ipaliwanag na ang pangatlong talinghaga sa Lucas 15 ay kuwento tungkol sa isang alibugha (ibig sabihin ay maaksaya at maluho) na anak, sa kanyang nakatatandang kapatid, at sa kanilang ama. Sabihin sa mga estudyante na alamin ang mga katotohanan sa pag-aaral nila ng talinghagang ito na makatutulong sa mga taong nakadarama na wala na silang pag-asa at hindi na makababalik pa.
Hatiin ang mga estudyante sa mga grupo na may tigtatatlong katao. Bigyan ang bawat grupo ng isang kopya ng sumusunod na chart. Ipabasa nang malakas sa mga magkakagrupo ang Lucas 15:11–32. Mag-assign ng isang estudyante na pag-isipan ang talinghaga mula sa pananaw ng alibughang anak, ang pangalawang estudyante naman ay pag-iisipan ito mula sa pananaw ng ama, at ang pangatlong estudyante ay pag-iisipan ito mula sa pananaw ng nakatatandang kapatid.
Matapos magbasa ang mga estudyante, sabihin sa kanila na pag-usapan nilang magkakagrupo ang mga tanong sa handout.
Manwal ng Bagong Tipan para sa Seminary Teacher—Lesson 53
Ang Alibughang Anak
Ano ang nakatulong sa iyo para magising ka sa iyong pagkakamali, o matanto ang kalunus-lunos na kalagayan na kinasadlakan mo?
Ano ang inaasahan mong magiging reaksyon ng iyong ama sa iyong pagbabalik?
Ano kaya ang maiisip at madarama mo kapag malugod kang tinanggap ng iyong ama?
Ang Ama
Ano kaya ang maiisip at madarama mo habang wala ang iyong bunsong anak?
Bakit malugod mo pa ring tatanggapin ang iyong alibughang anak gaya ng ginawa mo?
Nang maghinanakit ang iyong panganay na anak sa malugod na pagtanggap mo sa kanyang bunsong kapatid, paano mo siya tinulungan na maunawaan ang ginawa mo?
Ang Nakatatandang Kapatid
Ano kaya ang maiisip at madarama mo habang wala ang iyong kapatid?
Bakit mahirap para sa iyo na magalak sa pagbabalik ng iyong kapatid?
Anong mga pagpapala ang natanggap mo sa pagiging tapat sa iyong ama?
Sabihin sa mga estudyante kung ano ang ilalagay nila sa pangatlong column (Lucas 15:11–32) na nasa chart sa pisara o sa unang handout. Isulat sa pisara ang mga sagot ng estudyante, o sabihin sa mga estudyante na isulat ang kanilang mga sagot sa kanilang mga handout.
Bakit nawawala ang alibughang anak? (Kumpara sa tupa at isang putol na pilak o barya, nawala ang alibughang anak dahil sa pagrerebelde nito.)
Sa pagkaunawang ang ama sa talinghagang ito ay kumakatawan sa Ama sa Langit, ano ang matututuhan natin tungkol sa pagtugon ng Ama sa Langit sa mga taong bumabalik sa Kanya sa pamamagitan ng pagsisisi? (Dapat matukoy ng mga estudyante ang alituntuning tulad ng sumusunod: Kung babalik tayo sa Ama sa Langit sa pamamagitan ng pagsisisi at paghingi ng tawad sa Kanya, Siya ay magagalak at malugod tayong tatanggapin. Isulat sa pisara ang alituntuning ito.)
Paano makatutulong ang alituntuning ito sa mga taong nakadarama na sila ay espirituwal na nawawala?
Ipabasa nang malakas sa isang estudyante ang sumusunod na pahayag ni Elder Jeffrey R. Holland ng Korum ng Labindalawang Apostol:
Larawan
Elder Jeffrey R. Holland
“Ang nakaaantig na larawan ng sabik at nagmamahal na ama ng binatang ito na patakbong sinalubong siya at pinaghahagkan ay isa sa mga tagpong nakakabagbag-damdamin at puno ng pagkahabag sa lahat ng banal na kasulatan. Ito ay nagsasabi sa bawat anak ng Diyos, alibugha o anupaman, na talagang nais ng Diyos na makabalik tayo nang ligtas sa Kanyang piling” (“The Other Prodigal,” Ensign, Mayo 2002, 62).
Ipaalala sa mga estudyante ang nakatatandang kapatid.
Bakit kaya nagalit ang nakatatandang kapatid?
Ipabasa nang malakas sa isang estudyante ang sumusunod na pahayag ni Elder Holland, at sabihin sa klase na pakinggan kung bakit nagalit ang nakatatandang kapatid.
Larawan
Elder Jeffrey R. Holland
“Ang anak na ito ay hindi gaanong galit sa pagbalik ng kanyang kapatid ngunit sa pagiging masaya ng kanyang mga magulang dahil dito. Dahil akala niya ay hindi siya pinahahalagahan at marahil medyo naawa sa kanyang sarili, ang masunuring anak na ito—at talaga namang masunurin siya—ay saglit na nakalimot na hindi niya kailanman naranasan ang marumihan o magdalamhati, matakot o masuklam sa sarili. Sandali niyang nalimutan na lahat ng bisiro sa rantso ay sa kanya at gayon din ang lahat ng kasuotan sa damitan at lahat ng singsing sa taguan. Sandali niyang nalimutan na ang kanyang katapatan ay nagantimpalaan at palaging gagantimpalaan. …
“… Kailangan pa niyang maging mahabagin at maawain, na napakahalagang katangian upang makita na ang pagbabalik na ito ng kanyang kapatid ay hindi upang makipagkumpetensya sa kanya. Kapatid niya ito. …
“Ang bunsong kapatid na ito ay talagang naging bilanggo—bilanggo ng kasalanan, kahangalan, at namahay na parang isang baboy. Ngunit bilanggo rin ang nakatatandang kapatid. Hindi pa siya nakaaalis sa kanyang sariling bilangguan. Siya ay talagang nakadarama ng matinding pagkainggit” (“The Other Prodigal,” 63).
Ayon kay Elder Holland, bakit nagalit ang nakatatandang kapatid?
Ano ang kailangan nating alalahanin kapag nakita natin na kinaaawaan at pinagpapala ng Diyos ang mga yaong nagsisisi at nagbalik sa Kanya?
Anong alituntunin ang matututuhan natin mula sa talinghagang ito tungkol sa pagiging mas katulad ng ating Ama sa Langit? (Dapat matukoy ng mga estudyante ang alituntuning tulad ng sumusunod: Magiging mas katulad tayo ng ating Ama sa Langit sa pagpapakita ng pagkahabag at kagalakan kapag nagsisi ang ibang tao.)
Rebyuhin ang mga alituntuning natutuhan ng mga estudyante mula sa mga talinghaga sa Lucas 15. Sabihin sa mga estudyante na ipaliwanag kung paano kaya nila magagamit ang mga alituntuning ito upang sabihan ang mga Fariseo at mga eskriba na dumaing o bumulung-bulong nang sumalo si Jesus sa pagkain sa mga makasalanan.
Ipaalala sa mga estudyante ang tungkol sa tao na pag-iisipan nila sa simula ng klase na maaaring espirituwal na nawawala. Hikayatin sila na mapanalanging pag-isipan kung paano nila matutulungan ang taong iyon na magsisi at mas mapalapit sa Ama sa Langit. Sabihin sa mga estudyante na isulat sa kanilang notebook o scripture study journal ang kanilang sagot sa sumusunod na tanong:
Ano ang isang paraan na magagamit ninyo ang inyong natutuhan sa araw na ito?
Ang mga talinghagang nakatala sa Lucas 15 ay ang tugon ng Tagapagligtas sa mga Fariseo at mga eskriba matapos Siyang kutyain ng mga ito sa pagkain at pag-inom na kasalo ang mga makasalanan. Makikita sa kontekstong ito na ang mga talinghagang ito ay hindi lamang naglalaman ng mga salita na nagbibigay ng pag-asa para sa mga makasalanang nagsisisi kundi isa ring matinding pananalita laban sa pagmamalinis. Ang matinding pananalitang ito ay makikita sa pahayag ng Tagapagligtas na higit na natutuwa ang langit sa isang makasalanang nagsisi kaysa sa 99 na taong matutuwid na hindi kailangang magsisi. Ang pagbanggit ng Tagapagligtas sa “taong matutuwid na di nangagkakailangang magsipagsisi” (Lucas 15:7) ay hindi nagpapahiwatig na hindi kailangang magsisi ng mga Fariseo at mga eskriba. Sa halip, angkop na ipinapakita nito ang palalong pagpapahalaga sa sarili ng mga Fariseo at mga eskriba at ang hindi nila pagtanggap na kailangan nilang magsisi. Ang isa pang matinding pananalita sa gayong pag-uugali ay maaaring makita sa ikinilos ng nakatatandang kapatid sa talinghaga ng alibughang anak. Tulad ng mga Fariseo at mga eskriba na bumulung-bulong nang tanggapin ni Jesus ang mga makasalanan, ang nakatatandang kapatid sa talinghaga ay nagalit at nagmalinis sa halip na mahabag nang malugod na tanggapin ng kanyang ama ang alibughang kapatid.
Lucas 15:1–32. Ang tupa, isang putol na pilak o barya, at ang alibughang anak ay nangawala sa magkakaibang paraan
Nagsalita si Pangulong David O. McKay tungkol sa mga dahilan kung bakit nawawala ang ilan:
“Nais kong tukuyin ang mga kundisyon na nag-ambag sa pagkawala [ng tupa, ng isang putol na pilak o barya, at ng alibughang anak]. …
“Itatanong ko sa inyo ngayong gabi, paano nawala ang tupang iyon? Hindi siya suwail. Kung ikukumpara ninyo, ang tupa ay naghahanap ng ikabubuhay sa mabuting paraan, ngunit maaaring dahil sa kahangalan, marahil di-sinasadya, naganyak ito sa mapanghalinang bukirin, sa mas luntiang damuhan hanggang sa makalabas ito sa kawan at mawala.
“Mayroon din tayo sa Simbahan, mga kabataang lalaki at babae, na napapalayo sa kawan sa ganap na lehitimong mga paraan. Naghahanap sila ng tagumpay, tagumpay sa negosyo, tagumpay sa kanilang mga propesyon, at kalaunan ay napapalayo na sila sa Simbahan at nahiwalay na nang tuluyan sa kawan; nalimutan nila ang kahulugan ng tunay na tagumpay, marahil dahil sa kahangalan, o marahil hindi sinasadya, at sa ilang sitwasyon, marahil kusang-loob na ginawa ito. Hindi nila nakikita kung ano ang bumubuo sa tunay na tagumpay. …
“Sa [talinghaga ng nawawalang isang putol na pilak o barya] hindi kasalanan ng nawala ang pagkawala nito mismo. Ang pinagkatiwalaan ng isang putol na pilak o baryang iyon, dahil sa kawalang-ingat o kapabayaan, ay naiwaglit o naihulog ito. May kaibhan ang pagkawala nito, at ito ay isang uri sa tatlong uri ng talinghaga, na sa palagay ko ay angkop sa atin ngayong gabi. Responsibilidad natin hindi lamang ang mga putol na pilak o barya, kundi buhay na mga kaluluwa ng mga bata, mga kabataan, at matatanda. Mga responsibilidad natin sila. Ilan sa kanila ang maaaring pagala-gala ngayong gabi dahil sa kapabayaan ng mga guro sa ward. …
“[Tungkol sa alibughang anak:] Ang pangyayari rito ay sinadya, pinili, pinag-isipan. Dito ay may pagsuway sa awtoridad. At ano ang ginawa niya? Inubos niya ang kanyang kabuhayan sa magulong pamumuhay, sinayang niya ang kanyang mana sa mga patutot o mga imoral na babae. Ganyan sila nawawala.
“Ang mga kabataang nagsisimulang magpatangay sa kanilang pagnanasa at silakbo ng damdamin ay nasa pabulusok na daan patungong apostasiya gaya ng tiyak na pagsikat ng araw sa silangan. Hindi lamang ako nagsasalita para sa mga kabataan; sinumang lalaki o babae na nagsisimula nang tumahak sa landas ng kawalan ng pagpipigil, ng imoral na pamumuhay ay inihihiwalay ang kanyang sarili mula sa kawan tulad ng gabi na tiyak na kasunod ng umaga” (sa Conference Report, Abr. 1945, 120, 121–22, 123).
Lucas 15:1–32. Ang mga talinghaga ng nawawalang tupa, ng nawawalang isang putol na pilak o barya, at ng alibughang anak
Isinulat ni Elder James E. Talmage ng Korum ng Labindalawang Apostol:
Ang tatlong talinghaga … ay nagkakaisa sa pagpapakita ng kagalakan ng kalangitan sa pagkakaligtas ng isang kaluluwa na minsang napabilang sa mga nawawala, kahit ang kaluluwang iyon ay gaya ng isang tupang naligaw sa malayo, gaya ng isang putol na pilak o baryang nahulog dahil sa kapabayaan ng tagapag-ingat nito, o gaya ng isang anak na kusang inihiwalay ang sarili sa tahanan at sa langit. Hindi naman sinasabing ang isang taong nagkasala at nagsisi ay mas pahahalagahan kaysa sa mabuting tao na hindi nagpatangay sa kasalanan. … Bagama’t talagang hindi kasiya-siya ang kasalanan, ang nagkasala ay mahalaga pa rin sa paningin ng Ama, dahil sa posibilidad na magsisi siya at bumalik sa kabutihan. Ang pagkawala ng isang kaluluwa ay talagang tunay at napakalaking kawalan sa Diyos. Nasasaktan at nagdadalamhati Siya dahil dito, sapagkat nais Niya na wala ni isa mang mapahamak” (Jesus the Christ, Ika-3 edisyon [1916], 461).
“Sinabi ni Propetang Joseph Smith (1805–44) na ang isang kahulugan ng talinghaga ay ‘kumakatawan ang isandaang tupa sa mga Saduceo at Fariseo’ at dahil hindi nila tinanggap at sinunod ang mga turo ng Tagapagligtas, Siya ay lalabas sa kawan upang maghanap ng ‘ilang tao, o isang maralitang maniningil ng buwis na kinamumuhian ng mga Fariseo at mga Saduceo.’ Kapag nahanap niya ang ‘tupa na nawawala’ na magsisisi at tatanggapin Siya, sila ay ‘magkakatuwa sa langit’ (sa History of the Church, 5:262). Ang kahulugang ito ay makatutulong sa atin na maunawaan na ang mga salita ng Tagapagligtas ay isang pagpapaalala na tulungan ang mga Fariseo at mga eskriba na matanto nila na kinakailangan nilang magsisi, sapagkat iniutos ng Panginoon sa ‘lahat ng tao saanman na magsisi’ (D at T 133:16; tingnan din sa Mga Taga Roma 3:23; I Ni Juan 1:8; D at T 18:9, 42)” (New Testament Student Manual [Church Educational System manual, 2014], 168–69).
Tinutukoy ang talinghaga ng alibughang anak, sinabi ni Pangulong Gordon B. Hinckley:
“Hinihiling ko sa inyo na basahin ang talinghaga. Dapat itong paulit-ulit na basahin ng lahat ng magulang. Angkop ito sa lahat ng tahanan, at sa buong sangkatauhan, sapagkat hindi ba’t tayong lahat ay alibughang anak na kailangang magsisi at humingi ng mahabaging pagpapatawad ng ating Ama sa Langit at pagkatapos ay sundin ang Kanyang halimbawa?” (“Of You It Is Required to Forgive,” Ensign, Hunyo 1991, 5).
Sinabi rin ni Pangulong Hinckley:
“May ilan sa ating mga miyembro … na lumuluha dahil sa hirap at dusa at kalungkutan at pangamba. Tayo ay may malaking tungkulin na lapitan at tulungan sila, bigyang-sigla sila, pakainin sila kung sila ay nagugutom, pangalagaan ang kanilang mga espiritu kung sila’y nauuhaw sa katotohanan at kabutihan. …
“… May mga taong aktibo at puno ng patotoo noon sa Simbahan ngunit ngayon ay nanlamig na. Marami sa kanila ang gustong bumalik ngunit hindi nila alam kung paano gawin ito. Kailangan nila ng mga kaibigan na lalapit at tutulong sa kanila. Sa kaunting pagsisikap, marami sa kanila ang maaaring muling maibalik sa piging ng hapag ng Panginoon.
“Mga kapatid, umaasa ako, dumadalangin ako, na bawat isa sa atin … ay magpapasiyang hanapin ang mga taong nangangailangan ng tulong, na nasa mapanganib at mahirap na kalagayan, at bigyang-sigla sila sa diwa ng pagmamahal tungo sa Simbahan, kung saan naroon ang malalakas na kamay at mapagmahal na mga puso na malugod na tatanggap sa kanila, na aalo sa kanila, magtataguyod sa kanila, at maghahatid sa kanila sa maligaya at kapaki-pakinabang na buhay” (“Reach with a Rescuing Hand,” Ensign, Nob. 1996, 86).