Mateo 23:1–26:30 (Unit 6)

Mga Materyal sa Paghahanda para sa Home-Study Teacher

Buod ng mga Daily Home-Study Lesson

Ang sumusunod na buod ng mga pangyayari, doktrina, at alituntunin na natutuhan ng mga estudyante sa kanilang pag-aaral ng Mateo 23:1–26:30 (unit 6) ay hindi nilayong ituro bilang bahagi ng iyong lesson. Ang lesson na itinuturo mo ay nakatuon lamang sa ilan sa mga doktrina at alituntuning ito. Sundin ang mga pahiwatig ng Espiritu Santo habang iniisip mo ang mga pangangailangan ng iyong mga estudyante.

Day 1 (Mateo 23)

Napag-aralan ng mga estudyante ang pagkondena ni Jesus sa mga pinunong Judio at natutuhan na maaari nating piliing sundin ang batas ng Diyos kahit nakikita nating nagkukunwaring mabait lang ang iba. Natutuhan din nila na kung tatangkain nating magmataas sa iba, tayo ay ibababa, at kung tayo ay magpapakumbaba at maglilingkod sa iba, tayo ay itataas ng Panginoon. Natutuhan din nila na kung sisikapin nating magkaroon ng malinis na kalooban, makikita ito sa pagpili natin, at kung tayo ay handang magpatipon sa Tagapagligtas, makatatanggap tayo ng Kanyang pangangalaga at proteksyon.

Day 2 (Mateo 24)

Mula sa pagtalakay ng Tagapagligtas tungkol sa Kanyang Ikalawang Pagparito, natutuhan ng mga estudyante ang sumusunod: Kung tayo ay mananatiling matatag at hindi madadaig, tayo ay maliligtas. Bago mangyari ang Ikalawang Pagparito ni Jesucristo, ang mga hinirang ng Panginoon ay matitipon at ang ebanghelyo ay ipapangaral sa buong mundo. Kung pahahalagahan natin ang salita ng Panginoon, hindi tayo malilinlang. Tanging ang Ama sa Langit lamang ang nakaaalam kung kailan magaganap ang Ikalawang Pagparito ng Tagapagligtas. Kung aabangan natin ang mga palatandaan at susundin ang mga utos ng Panginoon, magiging handa tayo para sa Ikalawang Pagparito ng Tagapagligtas.

Day 3 (Mateo 25)

Sa pag-aaral ng mga estudyante ng talinghaga ng sampung dalaga, natutuhan nila na hindi tayo maaaring manghiram ng espirituwal na paghahanda mula sa iba at na naghahanda tayo sa Ikalawang Pagparito sa pamamagitan ng pagpapalakas ng ating patotoo at pagbabalik-loob sa pamamagitan ng araw-araw na paggawa ng mabuti. Natutuhan din nila na para maging handa sa pagdating ng Panginoon at maging karapat-dapat na manatili sa Kanyang kinaroroonan, dapat natin Siyang makilala. Maikling pinag-aralan ng mga estudyante ang talinghaga ng mga talento at natutuhan na ang takot ay maaaring humadlang sa atin sa paggamit ng mga kaloob at kakayahang ibinigay sa atin ng Panginoon, at kung hindi natin paghuhusayin at gagamitin ang ating mga espirituwal na kaloob para sa kabutihan, mawawala ang mga ito.

Day 4 (Mateo 26:1–30)

Nang mapag-aralan ng mga estudyante ang mga huling araw ng mortal na ministeryo ni Jesucristo, nalaman nila na noong marinig ng mga disipulo ni Jesucristo ang salita ng Panginoon, sinuri nila ang kanilang buhay upang makita kung paano ito naaangkop sa kanila. Nalaman nila na ang mga sagisag ng sakramento ay kumakatawan sa katawan at dugo ni Jesucristo, na inialay Niya para sa atin at na pinasimulan ni Jesucristo ang sakramento upang maalala natin Siya at ang Pagbabayad-sala Niya para sa ating mga kasalanan. Natutuhan din nila na kapag tayo ay nagsisi at tumanggap ng sakramento nang may tunay na layunin, maaari tayong tumanggap ng kapatawaran sa ating mga kasalanan.

Pambungad

Nang ituro ni Jesucristo sa Kanyang mga disipulo ang Kanyang Ikalawang Pagparito habang nasa Bundok ng mga Olibo, ikinuwento niya ang talinghaga ng mga talento.

Mga Mungkahi sa Pagtuturo

Mateo 25:14–30

Itinuro ni Jesucristo sa Kanyang mga disipulo ang talinghaga ng mga talento

Bago magklase, maglagay ng limang barya sa isang panig ng kuwarto at ng dalawang barya sa kabilang panig. Maglagay ng walo pang barya sa bulsa mo.

Para simulan ang lesson, papuntahin sa harapan ng klase ang tatlong estudyante para tulungan kang isadula ang talinghaga na itinuro ni Jesucristo sa Kanyang mga disipulo bilang bahagi ng Kanyang tagubilin patungkol sa Kanyang Ikalawang Pagparito.

Ipabasa nang malakas sa isang estudyante ang Mateo 25:14–18. Sabihin sa klase na tahimik na sumabay sa pagbasa, na inaalam ang tinanggap ng bawat alipin at ano ang ginawa niya rito.

Ano ang ibinigay ng panginoon sa bawat alipin? (Ipaliwanag na ang mga talento sa talinghagang ito ay halaga ng pera. Ilabas ang walong barya sa iyong bulsa, at magbigay ng lima sa unang estudyante, ng dalawa sa pangalawang estudyante, at ng isa sa pangatlong estudyante.)
Ano ang ginawa ng bawat alipin sa perang ibinigay sa kanila?

Sabihin sa estudyanteng may limang barya na kunin ang karagdagang limang barya sa kabilang panig ng silid. Sabihin sa estudyanteng may dalawang barya na kunin ang karagdagang dalawang barya sa kabilang panig ng silid. Sabihin sa isang estudyanteng may isang barya na itago o ibaon kunwari ang barya.

Sabihin sa mga estudyante na ibalik sa iyo ang mga barya at magsiupo na. Isulat sa pisara ang sumusunod na mga bahagi ng talinghaga (na wala pa ang mga interpretasyon sa mga panaklong):

Ang panginoon ng mga alipin (Ang Panginoong Jesucristo).

Ang mga alipin (Ang mga disipulo ng Panginoon)

Mga talento (Ang mga kaloob at kakayahang ibinigay ng Panginoon sa Kanyang mga disipulo)

Ano ang maaaring katawanin ng mga bahagi ng talinghaga? (Kung kailangan, tulungan ang mga estudyante na matukoy kung sino at ano ang isinasagisag ng mga bahagi. Isulat sa pisara ang mga interpretasyon sa tabi ng mga bahagi. Ipaliwanag na ilan sa mga kaloob at kakayahang mayroon tayo sa buhay natin sa mundo ay natanggap at napaunlad bago tayo isilang sa mundo. Maaari nating piliing patuloy na paunlarin ang mga kaloob na iyon at ang iba pa sa buhay sa mundo.)
Ayon sa Mateo 25:15, bakit binigyan ng panginoon ng iba’t ibang halaga ng pera ang bawat alipin? (Matapos sumagot ang mga estudyante, ipaliwanag na ang mga katagang “ayon sa kanikaniyang kaya” ay nagpapahiwatig na ang Diyos ay nagbibigay sa bawat isa sa atin ng mga kaloob at kakayahan ayon sa ating mga kalagayan. Ang bawat tao ay pinagkalooban ng espirituwal na kaloob mula sa Diyos [tingnan sa D at T 46:11]. Ipaliwanag na hindi nasusukat sa dami ng talento natin ang halaga natin bilang tao.)

Basahin nang malakas ang mga sumusunod na tanong, at anyayahan ang mga estudyante na pag-isipan ang mga ito:

Sa palagay ninyo, sinong alipin ang pinaka nakakatulad ninyo: ang isang binigyan ng limang talento, dalawang talento, o isang talento? Bakit?

Ipabasa nang malakas sa isang estudyante ang Mateo 25:19–21. Sabihin sa klase na tahimik na sumabay sa pagbasa, at alamin ang sinabi ng Tagapagligtas sa alipin na tumanggap ng limang talento.

Ano ang sinabi ng panginoon sa unang alipin?

Ipaliwanag na ang ibig sabihin ng “pamamahalain kita sa maraming bagay” at ng “pumasok … sa kagalakan ng iyong panginoon” (Mateo 25:21) ay ang pag-abot ng ating banal na potensyal at pagtanggap ng buhay na walang hanggan sa piling ng Ama sa Langit.

Anong alituntunin ang matututuhan natin sa halimbawa ng unang alipin? (Ang sumusunod ay isang alituntunin na maaaring matukoy ng mga estudyante: Kung matapat nating gagamitin ang mga kaloob at kakayahang ibinigay sa atin ng Panginoon, maaabot natin ang ating potensyal at tatanggap ng buhay na walang hanggan.)
Ano ang ilang halimbawa ng kung paano natin matapat na magagamit ang mga kaloob at kakayahang ibinigay sa atin ng Panginoon?

Ipaliwanag na maaaring magreklamo ang pangalawang alipin nang makita niyang tumanggap ng limang talento ang unang alipin samantalang siya ay dalawa lang. Sa halip, matapat niyang ginamit ang mga talentong ibinigay sa kanya.

Ipabasa nang malakas sa isang estudyante ang Mateo 25:22–23. Sabihin sa klase na tahimik na sumabay sa pagbasa, na inaalam ang sinabi ng panginoon sa alipin na tumanggap ng dalawang talento.

Ano ang sinabi ng panginoon sa alipin na tumanggap ng dalawang talento?
Kahit magkaiba ang halagang ibinigay ng panginoon sa una at pangalawang alipin, bakit sa palagay ninyo pareho lang ang tinanggap nilang tugon mula sa kanilang panginoon?
Anong alituntunin ang matututuhan natin sa karanasan ng lalaking binigyan ng dalawang talento? (Maaaring iba-iba ang sagot ng mga estudyante ngunit dapat nilang matukoy ang sumusunod na alituntunin: Pagpapalain tayo ng Panginoon kung matapat nating gagamitin ang mga kaloob at kakayahang ibinigay Niya sa atin, gaano man ito karami o anuman ang mga ito. Gamit ang mga salita ng mga estudyante, isulat sa pisara ang alituntuning ito.)

Sabihin sa klase na isipin kung nadama na ba nila minsan na mas maraming kaloob o kakayahan ang iba kaysa sa kanila. Ituro ang alituntuning isinulat mo sa pisara.

Paano makatutulong sa atin ang pag-alaala sa alituntuning ito kapag sa pakiramdam natin ay mas marami o mas maganda ang mga kaloob ng iba kaysa sa atin?

Ipabasa nang malakas sa isang estudyante ang sumusunod na pahayag ni Elder Quentin L. Cook ng Korum ng Labindalawang Apostol:

“Ang humusay sa ating mga talento ay ang pinakamainam na sukatan ng ating pag-unlad. … Ang ikumpara ang ating mga pagpapala sa iba ay tiyak na magpapawala ng ating kagalakan. Hindi maaari na habang nagpapasalamat tayo ay naiinggit din tayo. Kung talagang gusto nating mapasaatin ang Espiritu ng Panginoon at matuwa at sumaya, dapat tayong magalak sa ating mga pagpapala at magpasalamat” (“Rejoice!” Ensign, Nob. 1996, 29, 30.

Paano natin matutuklasan ang mga kaloob at kakayahang ibinigay sa atin ng Panginoon?

Bigyan ng papel ang bawat estudyante at ipasulat ang pangalan nila sa itaas. Sabihin sa kanila na ipasa ang kanilang papel sa katabi nila. Sabihin sa mga estudyante na isulat ang isang kaloob o kakayahang nakikita nila sa tao na nakasulat ang pangalan sa papel. Sabihin sa kanila na ituloy ang pagpapasa ng mga papel paikot sa silid at pagsulat ng mga kaloob at kakayahang naobserbahan nila.

Makalipas ang ilang minuto, ipabalik na sa mga estudyante ang mga papel sa orihinal na may-ari. Bigyan ng oras ang mga estudyante na mabasa ang mga kaloob at kakayahang nakikita sa kanila ng iba. Pagkatapos ay sabihin sa kanila na isulat sa papel nila ang sagot sa sumusunod na tanong:

Sa anong paraan ninyo magagamit ang isa sa mga kaloob ninyo para paunlarin ang gawain ng Panginoon?

Ipaliwanag na kasama sa talinghaga ng mga talento ang mga babala tungkol sa mga kaloob at kakayahang ibinigay sa atin. Anyayahan ang ilang estudyante na magsalitan sa pagbasa nang malakas ng Mateo 25:24-30. Sabihin sa klase na tahimik na sumabay sa pagbasa, na inaalam ang sinabi ng panginoon sa alipin na nagtago ng talento. Pagkatapos basahin ang talata 27, ipaliwanag na ang ibig sabihin ng pakinabang ay tubo (kinita mula sa pamumuhunan o pagpapahiram ng pera).

Bakit itinago ng huling alipin ang kanyang talento? Ano ang naging tugon ng panginoon sa piniling gawin ng alipin?
Kahit wala siyang naiwala sa pera ng kanyang panginoon, ano ang mali sa ginawa ng alipin?
Sa palagay ninyo, ano kaya ang naging tugon ng panginoon sa alipin kung nagbalik ito ng dalawang talento?

Anyayahan ang mga estudyante na magpatotoo sa mga alituntuning tinalakay nila. Hikayatin silang gamitin ang kanilang mga kaloob at kakayahan para maisulong pa ang gawain ng Panginoon.

Susunod na Unit (Mateo 26:31–Marcos 3)

Ipaliwanag na sa susunod na linggo, pag-aaralan ng mga estudyante nang detalyado ang Pagbabayad-sala ni Jesucristo, na nagsimula sa Kanyang pagdurusa sa Halamanan ng Getsemani at nagpatuloy sa di-makatarungang paglilitis, pangungutya, paghampas, at kamatayan sa pamamagitan ng pagpapako sa krus, at nagwakas sa Kanyang maluwalhating Pagkabuhay na Mag-uli.