Lesson 34

Marcos 1

Pambungad

Si Juan Bautista ay nangaral ng “bautismo ng pagsisisi sa ikapagpapatawad ng mga kasalanan” (Marcos 1:4). Matapos binyagan ni Juan si Jesus, ang Tagapagligtas ay nagsimulang mangaral ng ebanghelyo at gumawa ng mga himala sa pamamagitan ng banal na kapangyarihan at awtoridad. Siya ay nagpaalis ng mga karumal-dumal na espiritu at nagpagaling ng isang ketongin. Ang Kanyang katanyagan ay lumaganap sa buong Galilea.

Mga Mungkahi sa Pagtuturo

Marcos 1:1–20

Sinimulan ni Jesus ang Kanyang ministeryo

Ilang araw bago magklase, hilingin sa dalawang estudyante na maikling ibahagi sa klase ang kanilang patotoo kay Jesucristo. Pagkatapos ng debosyonal, anyayahan ang dalawang estudyanteng ito na ibahagi ang kanilang patotoo tungkol sa Tagapagligtas. Pagkatapos nito, itanong sa klase:

• Bakit mahalagang makarinig ng patotoo mula sa iilang tao kaysa sa iisang tao lamang?

• Sa inyong palagay, bakit mahalagang pag-aralan ang patotoo ni Marcos ngayong napag-aralan na ninyo ang patotoo ni Mateo?

Ipabasa nang mabilis at tahimik sa mga estudyante ang Marcos 1:1–4, 9–11, na hinahanap ang pangyayari kung saan sinimulan ni Marcos ang kanyang tala tungkol sa buhay ng Tagapagligtas.

• Ano ang pangyayaring iyon kung saan sinimulan ni Marcos ang kanyang tala?

Ipaliwanag na ang tala ni Marcos tungkol sa buhay ng Tagapagligtas ay naiiba kay Mateo. Ito ay sinimulan at inilahad nang mabilis, na binibigyang-diin ang pagiging Diyos ng Tagapagligtas sa pagtutuon sa Kanyang mga gawain at himala. Maaaring naisulat ni Marcos ang kanyang tala batay sa nalaman niya mula kay Apostol Pedro.

Ibuod ang Marcos 1:12–20 na ipinapaliwanag na matapos mag-ayuno ni Jesus nang 40 araw, Siya ay tinukso ng diyablo. Siya rin ay nangaral ng pagsisisi sa Galilea at inanyayahan ang Kanyang mga disipulo na sumunod sa Kanya. (Paalala: Ang mga talang ito ay naituro nang detalyado sa mga lesson sa Mateo 4.)

Marcos 1:21–39

Si Jesus ay nagpaalis ng mga demonyo at nagpagaling ng mga maysakit

Isulat sa pisara ang mga katagang Teritoryo ng Kaaway at tanungin ang mga estudyante kung ano ang mga panganib na maaaring kaharapin ng isang sundalo na nasa teritoryo ng kaaway.

Ipabasa nang malakas sa isang estudyante ang sumusunod na pahayag ni Pangulong Boyd K. Packer ng Korum ng Labindalawang Apostol:

“Kayong mga kabataan ay lumalaki sa teritoryo ng kaaway.

“Nalaman natin mula sa mga banal na kasulatan na nagkaroon ng digmaan sa langit at na si Lucifer ay naghimagsik at, kasama ang kanyang mga alagad ay, ‘inihagis sa lupa’ [Apocalipsis 12:9]. Determinado siyang sirain ang plano ng ating Ama sa Langit at hangad na kontrolin ang isipan at kilos ng lahat ng tao” (“Payo sa Kabataan,” Ensign o Liahona, Nob. 2011, 16).

• Sa paanong paraan natutulad ang ating buhay dito sa lupa sa pagiging naroroon sa teritoryo ng kaaway?

Sabihin sa mga estudyante na itaas ang kanilang mga kamay kung nakadama na sila ng takot dahil sa masasamang impluwensya at tukso na nakapaligid sa kanila. Habang pinag-aaralan ng mga estudyante ang Marcos 1:21–39, sabihin sa kanila na alamin ang katotohanan na makatutulong sa kanila kapag naharap sila sa masasamang impluwensya at tukso.

Ipabasa nang malakas sa isang estudyante ang Marcos 1:21–22. Sabihin sa klase na tahimik na sumabay sa pagbasa, na inaalam ang ginawa ni Jesus sa Capernaum at ang reaksyon ng mga Judio.

• Bakit nangagtaka ang mga Judio sa mga itinuro ng Tagapagligtas?

• Ano sa palagay ninyo ang ibig sabihin ng nagturo si Jesus “tulad sa may kapamahalaan”? (Marcos 1:22).

Ipaliwanag na ang mga eskriba ay itinuturing na mga eksperto sa batas ni Moises. Madalas nilang banggitin ang mga dating eksperto sa batas kapag sila ay nangaral (tingnan sa New Testament Student Manual [Church Educational System manual, 2014], 103). Sa kabaliktaran, si Jesus ay nangaral nang may kapangyarihan at awtoridad ng Kanyang Ama at bilang ang dakilang Jehova na nagbigay ng batas ni Moises (nilinaw sa Joseph Smith Translation, Matthew 7:37 na si Jesus ay “nagturo sa kanila nang may awtoridad mula sa Diyos, at hindi nang may awtoridad na mula sa mga eskriba” ).

Ipabasa nang tahimik sa mga estudyante ang Marcos 1:23–26, o ipanood sa klase ang video na “Jesus Heals a Possessed Man” (1:48) mula sa The Life of Jesus Christ Bible Videos, na makukuha sa LDS.org. Sabihin sa klase na alamin ang nangyari nang magturo si Jesus sa sinagoga. Sabihin sa mga estudyante na ibahagi ang nalaman nila. Ipaliwanag na ang “karumaldumal na espiritu” ay tumutukoy sa masamang espiritu.

• Ano ang alam ng karumal-dumal na espiritu tungkol kay Jesus?

• Paano nalaman ng karumal-dumal na espiritu kung sino si Jesus? (Ang masasamang espiritu na naghahangad na mag-angkin ng pisikal na katawan ay mga alagad ni Lucifer. Kasama nila noon ang Ama sa Langit at si Jesucristo bago sila napalayas sa langit.)

• Kung naroon kayo noon sa sinagoga, ano kaya ang maiisip ninyo tungkol kay Jesus?

Ipabasa nang malakas sa isang estudyante ang Marcos 1:27–28. Sabihin sa klase na tahimik na sumabay sa pagbasa, na inaalam ang reaksyon ng mga tao pagkatapos makitang pinaalis ni Jesus ang karumal-dumal na espiritu mula sa lalaki.

• Ano ang reaksyon ng mga tao?

• Ano ang itinuturo nito sa atin tungkol sa kapangyarihan ng Tagapagligtas? (Dapat matukoy ng mga estudyante ang katotohanang tulad ng sumusunod: Ang Tagapagligtas ay may kapangyarihan sa diyablo at sa kanyang mga alagad.)

• Paano makatutulong sa atin ang pagkaalam sa katotohanang ito kapag nakadarama tayo ng takot dahil sa masasamang impluwensya at tukso na nakapaligid sa atin?

Ipabasa sa isang estudyante ang sumusunod na pahayag ni Pangulong James E. Faust ng Unang Panguluhan:

“Sinabi ni [Joseph Smith], ‘Ang masasamang espiritu ay may mga hangganan, limitasyon, at batas na namamahala sa kanila’ [sa History of the Church, 4:576]. Kaya hindi lubos na malakas ang kapangyarihan ni Satanas at ng kanyang mga anghel. …

“… Ang mga gawain ni Satanas ay maaaring pigilan ng lahat ng mga yaong lumalapit kay Cristo sa pamamagitan ng pagtupad sa mga tipan at ordenansa ng ebanghelyo” (“Serving the Lord and Resisting the Devil,” Ensign, Set. 1995, 6, 7).

• Ayon kay Pangulong Faust, ano ang magagawa natin para makatanggap ng higit na lakas upang mapaglabanan ang masama?

• Ayon sa talata 28, anong nangyari matapos paalisin ng Tagapagligtas ang masamang espiritu?

Ibuod ang Marcos 1:29–39 na ipinapaliwanag na pinagaling ng Tagapagligtas ang lagnat ng biyenang babae ni Pedro, pinagaling ang maraming iba pang maysakit, at nagpaalis ng maraming demonyo. Si Jesus ay patuloy na nangaral sa Galilea.

Marcos 1:40–45

Pinagaling ni Jesus ang isang ketongin

Ipabasa nang mabilis at tahimik sa mga estudyante ang Marcos 1:40, na inaalam kung sino ang lumapit sa Tagapagligtas habang patuloy Siyang nangangaral sa Galilea. Sabihin sa mga estudyante na ibahagi ang nalaman nila. Papuntahin ang isang estudyante sa harapan ng klase. Sabihin sa mga estudyante na kunwari ay may ketong ang estudyanteng nasa harapan nila.

Ipaliwanag na ang ketong ay isang malubhang sakit na tumatama sa balat, mga ugat, mata, buto, at paa. Kapag hindi nagamot, humahantong ito sa isang masakit na kamatayan. Noong unang panahon, pinaniniwalaan na ang sinumang madikit sa mga taong may ketong ay mahahawa nito. Ituro ang estudyante na nakatayo sa harapan ng klase at itanong:

• Kung si (pangalan ng estudyante) ay isang ketongin na nabuhay noong unang panahon, paano kaya siya tatratuhin?

Ipaliwanag na para maprotektahan ang kalusugan at kapakanan ng komunidad, sapilitang pinatitira sa labas ng bayan ang mga ketongin. Iniutos ng batas sa kanila na humiyaw sila ng “Karumaldumal!” para balaan ang sinumang lalapit sa kanila (tingnan sa Bible Dictionary, “Leper”; Levitico 13:44–46). Ipasadula sa ilang estudyante ang tagpong ito na kunwari ay nadaanan nila ang estudyanteng gumaganap na ketongin. Habang naglalakad sila, sabihin sa estudyanteng gumaganap na ketongin na sumigaw ng “Karumal-dumal! Karumal-dumal!” Itanong sa mga estudyanteng naglalakad ang magiging reaksyon nila sa sitwasyong ito. Pagkatapos ay paupuin ang mga estudyante.

• Paano makakaapekto sa inyong buhay ang pagkakasakit ng ketong?

Sabihin sa mga estudyante na isipin na kunwari ay mga ketongin sila sa panahon ni Jesucristo. Itanong kung ano ang gagawin nila kung nakita nilang palapit ang Tagapagligtas.

• Ayon sa Marcos 1:40, ano ang ginawa ng ketongin nang makita niya ang Tagapagligtas? (Ipaliwanag na ang ibig sabihin ng salitang namamanhik ay nagmamakaawa o nagsusumamo.)

• Paano ipinakita ng ketongin ang kanyang pananampalataya kay Jesucristo? Paano ipinapakita ng mga katagang “kung ibig mo” ang pananampalataya ng ketongin?

Ipabasa nang tahimik sa mga estudyante ang Marcos 1:41–42, na inaalam ang ginawa ng Tagapagligtas sa pagsusumamo ng lalaki.

• Ano ang nagpahanga sa inyo sa ginawa ng Tagapagligtas sa pagsusumamo ng lalaki?

• Kung kayo ang ketongin, ano ang ibig sabihin sa inyo ng mahipo ng Tagapagligtas? Bakit?

• Paano kaya mababago ang buhay ninyo kung pinagaling ni Jesucristo ang inyong ketong?

Isulat sa pisara ang sumusunod na pahayag: Maaaring ihalintulad ang ketong sa kasalanan.

Para matulungan ang mga estudyante na maunawaan kung paano maaaring ihalintulad ang ketong sa kasalanan (tingnan sa Levitico 14), ipabasa nang malakas sa isang estudyante ang sumusunod na pahayag ni Elder Bruce R. McConkie ng Korum ng Labindalawang Apostol:

“Ang ketong sa panahon ng Biblia, bukod pa sa kahindik-hindik na epekto nito sa katawan, ay itinuturing na simbolo ng kasalanan at karumihan, nagpapahiwatig na tulad ng matinding sakit na ito na kinakain at sinisira ang pisikal na katawan, gayon din naman ang kasalanan na kinakain at sinisira ang espirituwal na bahagi ng tao” (The Mortal Messiah, 4 na tomo. [1979–81], 2:45).

• Sa paanong paraan maihahalintulad ang ketong sa kasalanan? (Sa paghahalintulad ng ketong sa kasalanan, tiyakin na nauunawaan ng mga estudyante na ang sakit ay hindi naman nangangahulugan na sanhi ng kasalanan.)

Ipabasa muli nang malakas sa isang estudyante ang Marcos 1:40–42, at sa pagkakataong ito ay ihalili ang salitang makasalanan sa salitang ketongin at ang salitang kasalanan sa salitang ketong. Sabihin sa klase na tahimik na sumabay sa pagbasa, na inaalam kung paano natin maihahalintulad ang paggaling ng ketongin na ito sa pagiging malinis mula sa kasalanan.

Paghahalintulad ng mga banal na kasulatan sa ating sarili

Ang ibig sabihin ng paghahalintulad ng mga banal na kasulatan sa ating sarili ay pagkumpara nito sa sarili nating buhay. Kapag nakita ng mga estudyante ang pagkakatulad ng sarili nilang mga karanasan sa mga nakatala sa mga banal na kasulatan, mas matutukoy nila ang mga doktrina at mga alituntunin ng ebanghelyo. Mas makikita rin ng mga estudyante kung paano nila maipamumuhay ang mga doktrina at mga alituntuning ito.

• Kapag binasa ninyo sa ganitong paraan ang mga talatang ito, anong mga salita ang nagpapahiwatig na napatawad ang kasalanan?

• Paano natin maihahalintulad ang ginawa ng ketongin para maging malinis mula sa sakit na ketong sa kinakailangan nating gawin para maging malinis mula sa kasalanan?

• Anong alituntunin ang matututuhan natin sa paghahalintulad sa pagpapagaling ng ketongin sa pagiging malinis mula sa kasalanan? (Maaaring iba-iba ang mga sagot ng mga estudyante, ngunit dapat nilang matukoy ang sumusunod na alituntunin: Kapag nanampalataya tayo at lumapit sa Tagapagligtas, kahahabagan Niya tayo at lilinisin mula sa ating mga kasalanan. Gamit ang mga isinagot ng mga estudyante, isulat sa pisara ang alituntuning ito.)

• Paano tayo mananampalataya at lalapit sa Tagapagligtas upang mapatawad Niya tayo sa ating mga kasalanan?

Sabihin sa mga estudyante na isiping muli ang buhay ng ketongin bago at pagkatapos siyang mapagaling.

• Paanong nagpapabago ng buhay ng isang tao ang paglapit kay Jesucristo para malinis mula sa kasalanan?

• Kailan kayo nakakita ng isang tao na nagbago ang buhay matapos malinis mula sa kasalanan sa pamamagitan ng Pagbabayad-sala ni Cristo? (Sabihin sa mga estudyante na huwag banggitin ang mga pangalan ng mga tao o ang nagawa nilang mga kasalanan noon.)

Sabihin sa mga estudyante na isiping mabuti kung anong mga kasalanan ang kailangang malinis sa kanila. Anyayahan ang mga estudyante na lumapit sa Tagapagligtas nang nananampalataya sa Kanya sa pamamagitan ng pagdarasal, pagsisisi, at pagsunod upang sila ay malinis Niya. Maaari mong ibahagi ang patotoo mo tungkol sa naglilinis na kapangyarihan ng Pagbabayad-sala ng Tagapagligtas.

Sabihin sa ilang estudyante na magsalitan sa pagbasa nang malakas sa Marcos 1:43–45. Sabihin sa klase na alamin ang mga tagubiling ibinigay ng Tagapagligtas sa ketongin. Sabihin sa mga estudyante na ibahagi ang nalaman nila.

Ipaliwanag na inutos sa batas ni Moises na dapat ipakita ng mga taong gumaling sa sakit na ketong ang kanilang sarili sa isang saserdote ng templo at mag-alay ng sakripisyo.

• Ano ang ginawa ng lalaki pagkatapos siyang bilinan ng Tagapagligtas na huwag sabihin sa iba ang nangyari?

• Ano ang nangyari dahil ipinagsabi ng lalaki ang kanyang paggaling?

Maaari mong tapusin ang lesson sa pagtatanong sa mga estudyante kung ano ang pinakahinangaan nila sa mga ginawa ni Jesucristo na nakatala sa Marcos 1.

Komentaryo at Pinagmulang Impormasyon

Marcos 1:24–25. Bakit inutos ng Tagapagligtas sa mga demonyo na “tumahimik [sila]”?

Itinuro ni Elder Bruce R. McConkie ng Korum ng Labindalawang Apostol na “palaging hindi pinahihintulutan [ni Jesus] ang [mga demonyo] na magpatotoo sa kanyang kabanalan at pagkadiyos. Ang patotoong nagdudulot ng pagbabalik-loob ay nagmumula sa Diyos, hindi kay Lucifer. Kung hindi sinaway ni Jesus ang mga karumal-dumal na espiritu, o hinayaan Niyang magpatotoo sila tungkol sa Kanya (bagama’t totoo ito), ang mga Judio ay lalong magkakaroon ng katwiran sa kanilang maling paratang sa Kanya na, ‘Mayroon siyang demonio, at siya’y nauulol; bakit ninyo siya pinakikinggan?’ (Juan 10:20.)” (Doctrinal New Testament Commentary, 3 tomo. [1965–73], 1:168).

Marcos 1:40. Ketong

Inilarawan ng isang komentarista ng Biblia ang nakapipinsalang epekto ng ketong gaya ng sumusunod:

“Ang mga sintomas at mga epekto ng sakit na ito ay karima-rimarim. May pamamaga at pagnanana o paglalangib ito, kasama ang pagbabago sa kulay ng buhok … mula sa kanyang likas na kulay ay nagiging dilaw ito; pagkatapos ay makikita ang impeksyon hindi lamang sa ibabaw ng balat, o lumilitaw ang laman sa pamamaga. … Natatanggal ang mga kuko, ang mga gilagid ay lumulubog, at ang mga ngipin ay nabubulok at natatanggal; mabaho ang hininga, nabubulok ang ilong; maaaring maagnas ang mga daliri, kamay, paa, o ang mga mata. Ang kagandahan ng tao ay naglalaho dahil sa pagkabulok” (Charles F. Deems, The Light of the Nations [1884], 185).

Marcos 1:40–42. Sa pamamagitan ng Pagbabayad-sala ng Tagapagligtas, tayo ay malilinis mula sa kasalanan.

Itinuro ni Elder Shayne M. Bowen ng Pitumpu:

“Ang Pagbabayad-sala ni Jesucristo ay para sa bawat isa sa atin. Walang hanggan ang Kanyang Pagbabayad-sala. Angkop ito sa lahat, kahit sa inyo. Malilinis, maisasaayos muli at mapapabanal nito kahit kayo. Ito ang kahulugan ng walang hanggan—buo, lubos, lahat, walang katapusan. Itinuro ni Pangulong Boyd K. Packer: ‘Walang gawi, adiksyon, paghihimagsik, paglabag, apostasiya, krimen na hindi sakop ng pangako ng lubos na kapatawaran. Iyan ang pangako ng Pagbabayad-sala ni Cristo’ (“The Brilliant Morning of Forgiveness,” Ensign, Nob. 1995, 20)” (“Malilinis, Maisasaayos Muli, at Mapapabanal ng Pagbabayad-sala ang ating Buhay,” Ensign o Liahona, Nob. 2006, 34).