Lesson 126

Mga Taga Colosas

Pambungad

Itinuro ni Pablo ang tungkol sa kadakilaan ni Jesucristo (higit na kagalingan, kataasan, o kahusayan) at nagbabala laban sa maling doktrina. Hinikayat niya ang mga Banal sa Colosas na ilagak o ituon ang kanilang pag-iisip sa mga bagay na nasa itaas (o sa langit) at linangin o sikaping taglayin ang mga katangian ni Cristo sa kanilang mga sarili. Tinuruan din sila ni Pablo na maging magiliw at matalino sa kanilang pakikipag-ugnayan sa iba.

Mga Mungkahi sa Pagtuturo

Mga Taga Colosas 1–2

Itinuro ni Pablo ang tungkol sa kadakilaan ni Jesucristo at nagbabala laban sa maling doktrina.

Paggamit ng pisara

Maihahanda ang mga estudyante na matuto at mahikayat na magkaroon ng makabuluhang partisipasyon sa pamamagitan ng epektibong paggamit ng pisara o whiteboard habang nagtuturo. Mas nakikinabang sa ganitong aktibidad ang mga estudyante na mas natututo kapag may nakikita. Sa pisara, maaaring gumawa ang titser ng balangkas ng mga pangunahing punto o alituntunin ng lesson, diagram ng isang doktrina, gumuhit ng mapa, gumawa ng mga flow chart o magdrowing ng mga larawan ng mga bagay na makikita sa mga banal na kasulatan, at gumawa ng marami pang ibang aktibidad na makapagpapabuti pa sa pag-aaral.

I-drowing ang sumusunod na larawan sa pisara.

• Kung isang malakas na buhawi ang dumating, alin sa mga punong ito ang mas malamang na tutumba? Bakit?

Ipabasa nang malakas sa isang estudyante ang sumusunod na pahayag ni Elder Neil L. Andersen ng Korum ng Labindalawang Apostol. Sabihin sa klase na pakinggan kung ano ang mga buhawing iyon na dapat tayong mag-ingat.

“Ang mas nakapag-aalala kaysa mga ipinropesiyang lindol at digmaan [sa mga huling araw] ay ang mga espirituwal na buhawi na maaaring bumunot sa inyo mula sa inyong mga espirituwal na pundasyon at ilapag ang inyong kaluluwa sa mga sitwasyong hindi ninyo sukat-akalain, na kung minsan ay halos hindi ninyo namamalayan na naalis na pala kayo sa inyong pundasyon” (“Mga Espirituwal na Buhawi,” Ensign o Liahona, Mayo 2014, 18).

• Ano ang ilang halimbawa ng mga espirituwal na buhawi na maaaring bumunot o maglayo sa atin mula sa ating pananampalataya kay Jesucristo? (Maaari mong ipasulat sa mga estudyante ang kanilang mga sagot sa pisara, malapit sa drowing ng buhawi.)

• Bakit mas nakakabagabag ang mga espirituwal na buhawing ito kaysa sa mga pisikal na suliranin, gaya ng lindol o digmaan?

Sabihin sa mga estudyante na isipin kung anong mga espirituwal na buhawi ang maaaring nakaaapekto sa kanila.

Ipaliwanag na sumulat si Pablo sa mga miyembro ng Simbahan sa Colosas (na tinatawag na mga taga-Colosas) matapos malaman ang tungkol sa mga impluwensya at maling turo na nagbabantang bunutin sila mula sa kanilang pananampalataya kay Jesucristo. (Ipahanap sa mga estudyante ang Laodicea, na malapit sa kanluran ng Colosas, sa Mga Mapa sa Biblia, blg. 13, “Ang mga Paglalakbay ni Apostol Pablo Bilang Misyonero,” sa Gabay sa mga Banal na Kasulatan.) Sabihin sa mga estudyante na alamin sa pag-aaral nila ng Mga Taga Colosas kung paano hinangad ni Pablo na palakasin ang pananampalataya ng mga miyembro kay Cristo . Hinangad din niya para sa kanila ang mga pagpapala ng pagkakaroon ng matatag na pananampalataya kay Cristo.

Ibuod ang Mga Taga Colosas 1:1–11 na ipinapaliwanag na pagkatapos batiin ang mga Banal sa Colosas, kinilala ni Pablo ang kanilang katapatan at ipinaliwanag na nagdadala ang ebanghelyo ng mga bunga, o pagpapala, sa buhay ng mga tumatanggap nito at ipinamumuhay ito. Pagkatapos ay nagturo sa kanila si Pablo ng tungkol kay Jesucristo.

Sabihin sa ilang estudyante na magsalitan sa pagbasa nang malakas ng Mga Taga Colosas 1:12–19. Sabihin sa klase na tahimik na sumabay sa pagbasa, na inaalam ang mga katotohanang itinuro ni Pablo tungkol kay Jesucristo. (Maaari mong ipaliwanag na ang mga salitang “di nakikita” sa talata 15 ay isinalin mula sa salitang Griyego na aoratos, na ang ibig sabihin rin ay “hindi matanaw.” Pansinin na sinabi sa Sa Mga Hebreo 11:27 na nakita ni Moises “niyaong di nakikita,” na ang ibig sabihin ay karaniwang hindi nakikita [tignan din sa D at T 67:11].)

• Ano ang itinuro ni Pablo tungkol kay Jesucristo? (Gamit ang mga salita ng mga estudyante, isulat ang sumusunod na katotohanan sa pisara sa ilalim ng punong may malalim na ugat: Si Jesucristo ang Manunubos, ang panganay sa mga espiritung anak ng Ama sa Langit, ang Tagapaglikha ng lahat ng bagay, ang namumuno sa Simbahan, at ang unang nabuhay na mag-uli.)

• Sa inyong palagay, bakit mahalagang malaman at paniwalaan ang mga katotohanang ito tungkol kay Jesucristo? Paano mapalalakas ang ating pananampalataya sa Kanya ng pagkakaalam at paniniwala sa mga katotohanang ito?

Balikan ang salitang Manunubos sa pahayag na nasa pisara, at ipaliwanag na ipinaalala ni Pablo sa mga Banal sa Colosas kung bakit kailangan nila ng Manunubos.

Ipabasa nang malakas sa isang estudyante ang Mga Taga Colosas 1:20–22. Sabihin sa klase na tahimik na sumabay sa pagbasa, na inaalam ang itinuro ni Pablo sa mga Banal sa Colosas tungkol sa pangangailangan nila sa isang Manunubos.

• Ayon sa talata 21, paano nangahihiwalay o lumalayo ang isang tao mula sa Diyos?

• Ano ang kahulugan ng salitang pakipagkasunduin sa talata 20? (Magkaunawaan o maging magkatugma.)

• Ayon sa talata 20 at 22, paano tayo pinakipagkasundo ni Jesucristo sa Diyos? (Ipaliwanag na ang mga katagang “pinapayapa niya sa pamamagitan ng dugo sa kaniyang krus” ay tumutukoy sa Pagbabayad-sala ni Jesucristo.)

Ipaliwanag na ang pagpapala ng pakikipagkasundo sa Diyos ay may kondisyon. Isulat sa pisara ang sumusunod na parirala: Maaari tayong makipagkasundo sa Diyos sa pamamagitan ng Pagbabayad-sala ni Jesucristo kung …

Ipabasa nang malakas sa isang estudyante ang Mga Taga Colosas 1:23. Sabihin sa klase na tahimik na sumabay sa pagbasa, na inaalam kung ano ang kinakailangan upang makipagkasundo sa Diyos.

• Ano ang kailangan nating gawin upang makipagkasundo sa Diyos?

• Ano ang ibig sabihin para sa atin ng “mamamalagi sa pananampalataya, na nababaon at matitibay”? (Manatiling matatag sa ating pananampalataya kay Jesucristo.)

• Batay sa mga natutuhan natin mula sa talata 23, paano ninyo kukumpletuhin ang pahayag sa pisara? (Gamit ang mga salita ng mga estudyante, kumpletuhin ang alituntunin sa pisara na tulad ng sumusunod: Maaari tayong makipagkasundo sa Diyos sa pamamagitan ng Pagbabayad-sala ni Jesucristo kung magpapatuloy tayo na nakabaon at matibay sa ating pananampalataya.)

Ituon ang atensyon ng mga estudyante sa drowing sa pisara, at itanong:

• Sino ang kilala ninyong tulad ng puno na may malalim na mga ugat—nakabaon at matibay sa kanyang pananampalataya kay Cristo?

• Paano naging isang pagpapala sa inyo ang kanyang halimbawa?

Ipabasa nang tahimik sa mga estudyante ang Mga Taga Colosas 2:4, 8, na inaalam ang mga espirituwal na buhawi na nagbabantang bumunot sa mga Banal sa Colosas.

• Ano ang mga espirituwal na buhawi na nagbabantang bumunot sa mga Banal sa Colosas? (Ipaliwanag na may itinurong ilang pilosopiya at tradisyon ang ilang tao na nagtatangkang balewalain ang kahalagahan ni Jesucristo.)

• Bakit ang paniniwala sa mga maling turo, kabilang na ang mga turo na bumabalewala sa kahalagahan ni Jesucristo, ay nagiging dahilan ng madaling paghina ng espirituwalidad ng isang tao?

Ipabasa nang malakas sa isang estudyante ang Mga Taga Colosas 2:5–7. Sabihin sa klase na tahimik na sumabay sa pagbasa, na inaalam ang ipinayo ni Pablo na tutulong sa mga Banal na makaiwas sa panliligaw ng mga makamundong pilosopiya at tradisyon.

• Ano ang itinuturo ng Mga Taga Colosas 2:5–7 na makatutulong sa atin na makaiwas sa panliligaw ng mga mali at makamundong pilosopiya, mga turo ng relihiyon, o tradisyon? (Maaaring gumamit ang mga estudyante ng sarili nilang mga salita sa pagtukoy ng alituntunin na tulad ng sumusunod: Sa pagiging matatag at nakasalig kay Jesucristo, makakaiwas tayo sa panliligaw ng mga makamundong pilosopiya at tradisyon.)

Isulat ang sumusunod na mga tanong sa pisara:

Ano ang pinaniniwalaan ninyong pinakaimportanteng bagay na magagawa natin para maging matatag at nakasalig kay Jesucristo? Bakit ninyo pinaniniwalaang importante ang bagay na ito?

Hatiin ang mga estudyante sa mga grupo na may tigtatatlo o tig-aapat na katao. Sabihin na ang bawat isa ay magpapaliwanag sa kanilang grupo ng mga sagot nila sa mga tanong sa pisara. Pagkatapos ng sapat na oras, ipaulat sa ilang mga estudyante ang mga natutuhan nila mula sa mga miyembro ng grupo.

Sabihin sa mga estudyante na muling isipin ang mga personal na espirituwal na buhawi na pinagnilayan nila sa simula ng klase. Ipasulat sa kanilang notebook o scripture study journal kung ano ang gagawin nila upang manatiling matatag at nakasalig kay Jesucristo at para makaiwas na mabunot ng mga espirituwal na buhawi.

Mga Taga Colosas 3–4

Hinikayat ni Pablo ang mga taga-Colosas na ilagak o ituon ang kanilang pag-iisip sa mga bagay na nasa itaas (o sa langit) at maging matalino

Ibuod ang Mga Taga Colosas 3–4 na ipinapaliwanag na pinayuhan ni Pablo ang mga Banal sa Colosas na tumigil sa kasamaan at linangin at sikaping taglayin ang mga katangian ni Jesucristo. Hinikayat din niya sila na maging madasalin at matalino, lalo na sa kanilang pakikipag-ugnayan sa mga hindi Kristiyano. Pagkatapos ay binanggit niya ang pagbati ng ilan sa mga kasama niyang lingkod, kabilang si Lucas.

Magbahagi ng iyong patotoo tungkol sa mga katotohanang tinalakay sa lesson na ito.

Komentaryo at Pinagmulang Impormasyon

Mga Taga Colosas 1:15, 18. Si Jesucristo ang Panganay na Anak

Ang mga katagang “panganay ng lahat ng mga nilalang” (Mga Taga Colosas 1:15) ay nagpapatotoo na si Jesucristo ang panganay sa lahat ng mga espiritung anak ng Ama sa Langit. Pinagtibay ng Unang Panguluhan:

“Sa mga espiritung anak ni Elohim [Diyos Ama] ang panganay noon at ngayon ay si Jehova o Jesucristo at ang lahat ng iba pa ay nakababata” (“The Father and the Son: A Doctrinal Exposition by the First Presidency and the Quorum of the Twelve Apostles,” Ensign, Abr. 2002, 18).

Ang katagang “panganay sa mga patay” sa talata 18 ay nangangahulugang si Jesucristo ang unang tao sa mundong ito na nabuhay na mag-uli. Tinawag din Siya na “pangunahing bunga ng mga nangatutulog” (I Mga Taga Corinto 15:20).

Mga Taga Colosas 1:16–17 Sa pamamagitan ni Jesucristo “nilalang ang lahat na mga bagay”

Ipinaliwanag ni Elder Dallin H. Oaks ng Korum ng Labindalawang Apostol na si Jesucristo ang Tagapaglikha at ang may kapangyarihang mamahala sa lahat ng Kanyang nilalang:

“Sa ilalim ng pamamahala at ayon sa plano ng Diyos Ama, si Jesucristo ang Lumikha, ang pinagmulan ng liwanag at buhay ng lahat ng bagay. Sa pamamagitan ng makabagong paghahayag, nagkaroon tayo ng patotoo ni Juan, na nagpatotoo na si Jesucristo ay ‘ang ilaw at ang Manunubos ng sanlibutan; ang Espiritu ng katotohanan, na pumarito sa daigdig, sapagkat ang daigdig ay ginawa niya, at sa kanya ang buhay ng mga tao at ang ilaw ng mga tao.

“‘Ang mga daigdig ay ginawa niya; ang mga tao ay ginawa niya; lahat ng bagay ay ginawa niya, at sa pamamagitan niya at sa kanya’ (D at T 93:9–10)” (“The Light and Life of the World,” Ensign, Nob. 1987, 63; tingnan din sa Juan 1:1–3; Sa Mga Hebreo 1:2; D at T 76:24; Moises 1:33).

Mga Taga Colosas 2:9. “Ang buong kapuspusan ng pagka Diyos”

Nagsasalita tungkol kay Jesucristo, nagpatotoo si Pablo, “sa kaniya’y nananahan ang buong kapuspusan ng pagka Diyos.” Tinutukoy sa mga katagang ito na si Jesucristo ay tunay na Diyos at nagtataglay ng buong kapangyarihan ng pagkadiyos (tingnan din sa Mateo 28:18).

Mga Karagdagang Ideya sa Pagtuturo

Mga Taga Colosas 3. Hinikayat ni Pablo ang mga taga-Colosas na ilagak o ituon ang kanilang pag-iisip sa mga bagay na nasa langit

Idrowing sa pisara ang mga sumusunod na larawan, na may sapat na laki para masulatan ng mga estudyante ang loob nito. Isulat ang Hubarin sa ibabaw ng isang drowing, at isulat ang Isuot sa ibabaw ng isa pang drowing.

Ipaliwanag na sa nakatala sa Mga Taga Colosas 3:1–4, pinayuhan ni Pablo ang mga Banal na ituon ang kanilang pag-iisip sa mga bagay sa langit kaysa sa mga bagay sa mundo at itinuro na si Jesucristo ay magpapakita sa kaluwalhatian sa Kanyang Ikalawang Pagparito.

• Kung kayo ay naroon kapag nagpakita sa kaluwalhatian ang Tagapagligtas, anong kasuotan ang gusto mong isuot?

• Ano sa palagay mo ang magiging mas mahalaga kaysa sa kasuotan mo?

Ipaliwanag na sa Mga Taga Colosas 3:5–15, itinuro ni Pablo sa mga Banal sa Colosas kung ano ang dapat nilang “layuan” o hubarin (talata 8) at kung ano ang dapat nilang “[ibihis]” o isuot (talata 10) bilang mga disipulo ni Jesucristo. Hatiin sa dalawang grupo ang klase, at ipabasa sa unang grupo ang Mga Taga Colosas 3:5–9, na inaalam ang itinuro ni Pablo na dapat layuan. Ipabasa sa isa pang grupo ang Mga Taga Colosas 3:10–15, na inaalam kung ano ang sinabi ni Pablo na dapat nating isuot. (Maaaring kailangan mong ibigay ang kahulugan ng mga sumusunod: pakikiapid [seksuwal na imoralidad], masamang pita [pagnanasang seksuwal], at masasamang nasa [masasamang hangarin].)

Pagkatapos ng sapat na oras, sabihin sa ilang estudyante na isulat sa loob ng angkop na drowing sa pisara ang sinabi ni Pablo na dapat nilang layuan (hubarin) o isuot.

Ituon ang atensyon ng mga estudyante sa drowing na may nakasulat na “Hubarin,” at itanong:

• Ano sa palagay ninyo ang kahulugan ng layuan ang mga bagay na ito?

• Ano kaya ang mararamdaman ng isang taong nakagawa ng mga kasalanang ito at hindi nagsisi kung kapiling niya ang Tagapagligtas? (Tingnan din sa Mormon 9:3–4.)

Ituon ang atensyon ng mga estudyante sa drowing na may nakasulat na “Isuot,” at itanong:

• Ano kaya ang mararamdaman ng isang tao na nagbihis o nagkaroon ng mga katangiang ito kung kapiling niya ang Tagapagligtas?

• Habang nagkakaroon ang isang tao ng mga katangiang ito, sino ang nagiging katulad nila? (Si Jesucristo [tingnan sa Mga Taga Colosas 3:10]. Isulat sa pisara ang sumusunod na alituntunin: Habang nilalayuan natin ang kasamaan at nagsisikap na magkaroon ng mga katangian ni Jesucristo, tayo ay nagiging mga bagong indibidwal na katulad Niya.)

• Paano natin malilinang at sisikaping taglayin ang mga katangiang ito ni Jesucristo sa ating mga sarili?

Sabihin sa mga estudyante na isipin ang isang kakilala nila na nagsisikap na magkaroon ng mga katangian ni Jesucristo. Maaari mong ipabahagi sa ilang mga estudyante kung paano nalinang at tinaglay ng taong ito ang mga katangiang iyon.

Sabihin sa mga estudyante na isipin ang mga kasalanan na kailangan nilang layuan at kung ano ang mga katangian ni Jesucristo na kailangan nilang taglayin. Sabihin sa mga estudyante na gumawa ng mga mithiin na layuan ang partikular na kasalanan at sikaping magkaroon ng mga katangian ni Cristo. Ipasulat sa mga estudyante ang kanilang mga mithiin sa kanilang scripture study journal o sa isang papel.

Ipaliwanag na ayon sa nakatala sa Mga Taga Colosas 3:16–25, nagbigay si Pablo sa mga Banal sa Colosas ng mga tagubilin na makatutulong sa kanila na maging mas katulad ni Cristo at magkaroon ng higit na kapayapaan sa kanilang buhay.

Mga Taga Colosas 4:16. Tinagubilinan ni Pablo ang mga Banal sa Colosas na basahin ang isang sulat na mula sa Laodicea

Ipaliwanag na sa panahon ni Pablo, binabasa nang malakas sa mga kongregasyon ng mga sangay ng Simbahan ang mga sulat ni Pablo sa kanila. Ang sulat mula sa isang sangay ay pinapasa minsan sa iba pang sangay upang mas maraming mga miyembro ang makarinig ng mga turo at payo ni Pablo. Ipabasa nang malakas sa isang estudyante ang Mga Taga Colosas 4:16. Sabihin sa klase na sumabay sa pagbasa, na inaalam ang dalawang magkaibang sulat na isinulat ni Pablo. Ipabahagi sa mga estudyante ang kanilang nalaman.

Ipaliwanag na ang Biblia ay naglalaman ng sulat ni Pablo sa mga taga-Colosas, ngunit ang sulat na nagmula sa Laodicea na binanggit ni Pablo ay nawala at hindi na matatagpuan sa Biblia ngayon, kasama ng iba pang mga sulat ni Pablo (tingnan sa I Mga Taga Corinto 5:9; Mga Taga Efeso 3:3). Ipinapakita nito na ang Biblia ngayon ay hindi na naglalaman ng lahat ng banal na kasulatan na isinulat ng mga propeta at mga apostol ng Panginoon.