Apocalipsis 12–22 (Unit 32)

Mga Materyal sa Paghahanda para sa Home-Study Teacher

Buod ng mga Daily Home-Study Lesson

Ang sumusunod na buod ng mga pangyayari, doktrina, at alituntunin na natutuhan ng mga estudyante sa pag-aaral nila ng Apocalipsis 12–22 (unit 32) ay hindi nilayong ituro bilang bahagi ng iyong lesson. Ang lesson na iyong itinuturo ay nakatuon lamang sa ilan sa mga doktrina at mga alituntuning ito. Sundin ang mga pahiwatig ng Espiritu Santo habang iniisip mo ang mga pangangailangan ng iyong mga estudyante.

Day 1 (Apocalipsis 12–13)

Sa pag-aaral ng mga estudyante ng pangitain ni Juan tungkol sa dragon at sa babae na may kasamang anak, nalaman nila na si Satanas, na sinasagisag ng dragon, ay naghahangad na wasakin ang Simbahan at kaharian ng Ama sa Langit at ni Jesucristo. Ang digmaang ito ay nagsimula sa buhay bago ang buhay sa mundong ito. Nalaman ng mga estudyante na madadaig natin ang impluwensya ni Satanas sa pamamagitan ng Pagbabayad-sala ng Tagapagligtas at sa pananatiling tapat sa ating mga patotoo sa ebanghelyo.

Day 2 (Apocalipsis 14–16)

Mula sa pangitain ni Juan tungkol sa nakita niyang pagbalik ng isang anghel sa mundo sa mga huling araw, nalaman ng mga estudyante na ang isang dahilan kung bakit ipinanumbalik ng Diyos ang ebanghelyo ni Jesucristo ay upang ihanda ang mga naninirahan sa lupa para sa Ikalawang Pagparito ni Jesucristo. Nalaman din nila ang sumusunod: Kung mamumuhay tayo nang matwid, pagpapalain tayo sa ating mga ginawa at makapagpapahinga mula sa ating mga gawain matapos tayong mamatay. Kung tayo ay mapagbantay at espirituwal na handa, magiging handa tayo sa Ikalawang Pagparito ni Jesucristo.

Day 3 (Apocalipsis 17–19)

Nalaman ng mga estudyante na sa mga huling araw, madadaig ni Jesucristo ang kasamaan ng daigdig. Nalaman din nila na ang paghiwalay ng ating sarili mula sa kasamaan ng daigdig ay makatutulong sa atin na maiwasan ang kasalanan at ang mga paghahatol na darating sa masasama sa mga huling araw. Nang inihalintulad ng mga estudyante ang pagpapakasal sa Ikalawang Pagparito, nalaman nila na kung tayo ay malinis at matwid, magiging handa tayo sa pagparito ng Panginoong Jesucristo.

Day 4 (Apocalipsis 20–22)

Mula sa mga huling kabanata ng pangitain ni Juan, nalaman ng mga estudyante ang mga sumusunod na katotohanan: Hahatulan tayo ng Diyos mula sa mga aklat na naisulat ayon sa ating mga gawa. Ang Diyos ay mananahan kasama ang Kanyang mga tao at aaliwin o papanatagin sila, at hindi na sila daranas pa ng kamatayan, kalungkutan, o pasakit. Kung susundin natin ang mga kautusan ng Panginoon, matatanggap natin ang lahat ng pagpapala ng Pagbabayad-sala ni Jesucristo at makapapasok sa kahariang selestiyal.

Pambungad

Nakita ni Apostol Juan sa pangitain ang mga kaganapang mangyayari kaagad bago at sa panahon ng paghahari ni Jesucristo sa milenyo. Nakita rin niya ang huling digmaan sa pagitan ni Satanas at ng mga puwersa ng Diyos sa pagtatapos ng Milenyo at nakita ang Huling Paghuhukom, na hahatulan ng Diyos ang lahat ng tao ayon sa mga aklat na naisulat.

Mga Mungkahi sa Pagtuturo

Apocalipsis 20:1–6

Nakita ni Juan sa pangitain ang mga mangyayari kaagad bago at sa panahon ng paghahari ni Jesucristo sa milenyo

Sabihin sa mga estudyante na isipin ang isang paligsahan o kumpetisyon (tulad ng sa sining o isport) na nilahukan nila kahit alam nilang matatalo sila. Pagkatapos ay sabihin sa kanila na isipin ang paglahok nila sa isang paligsahan o kumpetisyon dahil alam nilang mananalo sila.

Paano binabago ng inaasahan ninyo sa paligsahan o kumpetisyon ang paraan ng pagsasagawa ninyo nito?
Bakit kaya sumusuko na ang mga tao kapag naiisip nilang matatalo sila? Kailan ninyo naisip na matatalo kayo pero nanalo pala kayo?

Ipaliwanag sa mga estudyante na sa pag-aaral nila ng Apocalipsis 20, madaragdagan ang nalalaman nila tungkol sa digmaan sa pagitan ng mabubuti at masasama at ang huling kahihinatnan ng digmaan. Sabihin sa kanila na alamin sa pag-aaral nila ng Apocalipsis 20 ang mga katotohanan na maghihikayat sa kanila na manatiling tapat sa Tagapagligtas sa digmaang ito.

Ipabasa nang malakas sa isang estudyante ang Apocalipsis 20:1–3. Sabihin sa klase na tahimik na sumabay sa pagbasa, na inaalam kung ano ang mangyayari kay Satanas sa Milenyo.

Ano ang mangyayari kay Satanas sa Milenyo?
Ayon sa talata 3, ano ang hindi magagawa ni Satanas dahil siya ay nakagapos?

Ipabasa nang malakas sa isang estudyante ang Apocalipsis 20:4–6. Sabihin sa klase na tahimik na sumabay sa pagbasa, na inaalam kung sino ang nakita ni Juan na hinahatulan.

Ayon sa talata 4, sino ang nakita ni Juan na hinahatulan?
Anong gantimpala ang natanggap ng mga taong ito dahil sa kanilang katapatan?
Saan sila mabibilang sa panahon ng Milenyo? (Sa Unang Pagkabuhay na Mag-uli.)
Anong alituntunin ang matututuhan natin mula sa Apocalipsis 20:4–6 tungkol sa mga pagpapala na matatanggap natin kung tapat tayo kay Jesucristo? (Maaaring iba-iba ang sagot ng mga estudyante ngunit tiyaking matutukoy nila ang alituntuning tulad ng sumusunod: Kung tapat tayo kay Jesucristo, magkakaroon tayo ng bahagi sa Unang Pagkabuhay na Mag-uli at maghaharing kasama si Cristo sa Milenyo.)

Ipaliwanag na ang Unang Pagkabuhay na Mag-uli ay nagsimula sa Pagkabuhay na Mag-uli ni Jesucristo at kasama ang mga mabubuti na namatay bago ang Pagkabuhay na Mag-uli ni Cristo (tingnan sa Mosias 15:21–25; Alma 40:16–20). Ang karamihan sa mabubuti na namatay matapos ang Pagkabuhay na Mag-uli ni Cristo ay mabubuhay na mag-uli sa Ikalawang Pagparito ni Jesucristo (tingnan sa Bruce R. McConkie, Mormon Doctrine, ika-2 ed. [1966], 639; James E. Talmage, The Articles of Faith, ika-12 ed. [1924], 385). Ang mga yaong babangon sa Unang Pagkabuhay na Mag-uli ay kinabibilangan ng “lahat ng propeta, at lahat ng yaong naniwala sa kanilang mga salita” (Mosias 15:22), ang mga namatay nang walang kaalaman at hindi “naipahayag ang kaligtasan sa kanila” (Mosias 15:24; tingnan din sa D at T 45:54), at ang maliliit na bata na namatay bago ang edad ng pananagutan (tingnan sa Mosias 15:25; Moroni 8:4–24). Ang masasama at hindi nagsisi ay hindi mabubuhay na muli hanggang sa Ikalawang Pagkabuhay na Mag-uli, na mangyayari sa pagtapos ng Milenyo (tingnan sa D at T 76:85).

Paano makatutulong sa inyo ang kaalamang magkakaroon kayo ng bahagi sa Unang Pagkabuhay na Mag-uli at maghaharing kasama ni Jesucristo sa Milenyo na maging tapat sa panahong ito sa digmaan laban sa kasamaan?

Magpatotoo na ang mga mananatiling tapat ay magiging bahagi ng Unang Pagkabuhay na Mag-uli at maghaharing kasama ng Tagapagligtas sa panahon ng Milenyo.

Apocalipsis 20:7–11

Nakita ni Juan ang huling digmaan sa pagitan ni Satanas at ng mga puwersa ng Diyos sa katapusan ng Milenyo

Isulat sa pisara ang sumusunod na di-kumpletong pahayag: Sa katapusan ng Milenyo …

Ipabasa nang malakas sa isang estudyante ang Apocalipsis 20:7–10. Sabihin sa klase na tahimik na sumabay sa pagbasa, na inaalam ang mga pangyayaring inilarawan ni Juan na magaganap sa katapusan ng Milenyo.

Papuntahin ang ilang estudyante sa pisara at ipasulat ang nalaman nila. Pagkatapos ay itanong ang mga sumusunod:

Anong mga pangyayari ang inilarawan ni Juan? (Ipaliwanag na ang mga pangalang Gog at Magog sa talata 8 ay tumutukoy sa puwersang gagamitin ni Satanas sa katapusan ng Milenyo upang makidigma sa kahuli-hulihang pagkakataon laban sa mga tao ng Panginoon [tingnan sa D at T 88:110–114].)
Pagkatapos ng digmaang ito, ano ang mangyayari sa diyablo at sa kanyang mga alagad? (Pagkatapos sumagot ang mga estudyante, kumpletuhin ang pahayag na nasa pisara para mabasa ito nang ganito: Sa katapusan ng Milenyo, dadaigin ng puwersa ng Diyos si Satanas at ang kanyang mga alagad.)
Bakit mahalagang maunawaan natin ang huling kahihinatnan ng digmaan sa pagitan ng Diyos at ni Satanas?

Apocalipsis 20:12–15

Nakita ni Juan ang Huling Paghuhukom

Ipaliwanag na bilang bahagi ng plano ng kaligtasan ng Ama sa Langit, bawat taong nabuhay sa mundong ito ay tatayo sa harapan ng Diyos upang hatulan. Itanong sa mga estudyante kung ano sa palagay nila ang mangyayari sa Huling Paghuhukom.

Ano kaya ang maiisip at madarama ninyo kapag nakatayo kayo sa harapan ng Diyos upang hatulan?

Ipabasa nang malakas sa isang estudyante ang Apocalipsis 20:12–13. Sabihin sa klase na tahimik na sumabay sa pagbasa, na inaalam kung paano tayo hahatulan ng Diyos.

Anong katotohanan ang matututuhan natin mula sa talata 12 tungkol sa kung paano tayo hahatulan? (Maaaring iba-iba ang sagot ng mga estudyante, ngunit tiyaking matutukoy nila ang sumusunod na katotohanan: Hahatulan tayo ng Diyos mula sa mga aklat na naisulat ayon sa ating mga gawa.)
Anong mga aklat ang nakita ni Juan? (Ang mga banal na kasulatan, mga rekord ng Simbahan na nagtatala ng mga nakapagliligtas na ordenansa at marahil ng iba pang gawain, at ang aklat ng buhay [tingnan sa 2 Nephi 29:10–11; D at T 128:6–7; Gabay sa mga Banal na Kasulatan, “Aklat ng Buhay”].)
Ano pa ang natutuhan ninyo tungkol sa Huling Paghuhukom? (Paalala: Sa Unit 32: Day 4, assignment 3, nakakita ang mga estudyante ng mga karagdagang banal na kasulatan na nagtuturo tungkol sa Huling Paghuhukom.)

Ipaliwanag na inihayag ng Panginoon kay Propetang Joseph Smith na bukod pa sa ating gawain, tayo ay hahatulan ayon sa mga hangarin ng ating puso (tingnan sa D at T 137:9; tingnan din sa Alma 41:3–5).

Paano makaiimpluwensya sa mga gusto ninyong gawin ang kaalamang hahatulan tayo ayon sa mga hangarin ng ating puso?

Magpatotoo tungkol sa doktrinang ito at kung paano ito nakaimpluwensya sa inyong mga pagpili o pagpapasiya.

Ipabasa nang malakas sa isang estudyante ang Apocalipsis 22:14. Sabihin sa klase na tahimik na sumabay sa pagbasa at alalahanin ang alituntuning natutuhan nila mula sa talatang ito sa pag-aaral nila sa kanilang tahanan.

Anong alituntunin ang natutuhan ninyo sa talatang ito? (Kung susundin natin ang mga kautusan ng Panginoon, matatanggap natin ang lahat ng pagpapala ng Pagbabayad-sala ni Jesucristo at makapapasok sa kahariang selestiyal. Isulat sa pisara ang alituntuning ito.)
Bakit angkop na katotohanan ito sa pagtatapos natin ng pag-aaral ng Bagong Tipan?

Maaari mong anyayahan ang mga estudyante na ibahagi ang ilan sa mga katotohanang nakaimpluwensya sa kanila sa pag-aaral nila ng Bagong Tipan sa taong ito. Anyayahan ang sinuman na nagnanais na ibahagi ang kanilang patotoo sa mga katotohanang ito at sa kabanalan ng Panginoong Jesucristo.

Hikayatin ang mga estudyante na patuloy na mag-aral ng mga banal na kasulatan araw-araw. Kung mag-e-enroll sila sa seminary sa susunod na taon o naghahandang magmisyon, sabihin sa kanila na simulan na ngayon ang pagbabasa ng Aklat ni Mormon.