Хиламан 1–9 (22-р хэсэг)

Гэрээр заах багшид зориулсан ашиглах материал

Өдөр бүр гэрээр судлах хичээлийн тойм

Суралцагчид Хиламан 1–9 (22-р хэсэг)-ийг судлан, суралцсан сургаал ба зарчмуудын дараах тойм нь таны хичээлийн заавал заах ёстой хэсэг биш болно. Таны зааж байгаа хичээл эдгээр сургаал ба зарчмуудын зөвхөн цөөхөн хэд дээр төвлөрдөг. Суралцагчдын хэрэгцээ юу болох талаар эргэцүүлэхдээ Ариун Сүнсний өдөөлтийг дага.

1 дэх өдөр (Хиламан 1–2)

Суралцагчид нифайчуудын дундах улс төрийн зөрчилдөөн, аллагуудын талаар болон леменчүүд Зарахемла хотыг эзэлсэн тухай суралцах үедээ зөрчилдөөн нь хуваан сарниулагч бөгөөд биднийг дайсны нөлөөнд өртөмтгий болгодог гэдгийг мэдэж авсан. Тэд мөн нууц хуйвалдаанууд нийгмийг сүйрэлд хүргэдэг гэдгийг мэдсэн.

2 дахь өдөр (Хиламан 3–4)

Аврагчийг дагадаг, номхон даруу нифайчууд маш их мөрдлөг хавчлагыг хэрхэн тэвчин туулсан талаар суралцсанаар бид дарамт хавчлага, зовлон зүдгүүрийг хайхралгүй, даруухнаар Бурхандаа хандан, зүрх сэтгэлээ Түүнд тавих аваас Есүс Христэд итгэх итгэл маань өсч нэмэгдэнэ гэдгийг мэдэж авсан. Суралцагчид нифайчуудын бардамнал өсөх тусам леменчүүдэд Нифайн нутгийн хагасыг олж авах боломжийг олгосон гэдгийг мэдэж авснаар бардамнал ба гэм нүгэл биднийг Их Эзэний Сүнснээс холдуулж, өөрсдийнх нь хүчинд орхидог гэдгийг сурсан юм.

3 дахь өдөр (Хиламан 5)

Суралцагчид өөрийн хөвгүүд болох Нифай, Лихай хоёрт өгсөн Хиламаны зөвлөмжөөс суралцан, хэрэв бид Есүс Христ дээр сууриа барих юм бол Сатан бидний дээр хүчийг олж чадахгүй гэдгийг мэдсэн. Бурханы хүчээр дамжуулан өөрсдийн итгэл болон Нифай, Лихай нарын номлолын хүчин чармайлтаар олон лемен хүн наманчилсан. Биднийг Есүс Христэд итгэлээ хөгжүүлж, нүглээ наманчлах үед Ариун Сүнс зүрх сэтгэлийг маань амар амгалан, баяр баясгалангаар дүүргэдэг гэдгийг суралцагчид сурсан.

4 дэх өдөр (Хиламан 6–9)

Бид Их Эзэний үгсэд итгэж, дуулгавартай байх аваас Тэрээр Өөрийн Сүнсийг бидний дээр цутгадгийг суралцагчид мэдэж авсан. Нифай гэм нүгэлтэй нифайчуудад тэдний гэм нүглийн үр дагавруудыг анхааруулсан ба хэрэв бид нүглээ наманчлахаас татгалзах юм бол бид Их Эзэний хамгаалалт ба мөнх амьдралын адислалуудыг алдах болно гэдгийг онцлон хэлсэн юм. Нифайн үгсийг сонссоны дараа зарим хүн түүний төлөө зогссон. Хэрэв бид хилэнцтийн эсрэг зогсох аваас түүний амжилтыг саатуулж чадна гэдгийг суралцагчид мэдсэн болно. Нифай хүмүүст олон бошиглогч Аврагчийг гэрчилснийг сануулсан ба бид Есүс Христ дээр анхаарлаа төвлөрүүлж, Түүнд итгэх итгэлээ хөгжүүлэх аваас мөнх амьдралыг хүлээн авах болно гэдгийг заасан. Хиламан 7–9 дээр цэдэглэгдсэн Нифайн сургаалуудаас суралцагчид бошиглогчдын үгс биелэгддэгийг мэдэж авсан.

Оршил

Зөрчилдөөн, гэм нүгэл өсөн нэмэгдэх зуур Нифай хөвгүүддээ тэдний итгэлийн суурь Есүс Христ дээр байх ёстойг заасан. Наманчлал болон Их Эзэний бошиглогчдын үгсийг сонсох тухай Нифайн сургаалууд нь хүмүүсийн аз жаргалд нэн чухал зүйл болсон билээ.

Заах зөвлөмж

Хиламан 1–5

Зөрчилдөөн, гэм нүглүүдийн учир нифайчууд зовж шаналж байсан; олон лемен хүн Нифай, Лихай хоёрын номлосон сайн мэдээнд хөрвөгдсөн

Суралцагчдаас яагаад бусад нь нурж унаж байхад зарим барилга байгууламж урт удаан хугацаа өнгөрсөн ч байсаар байдгийг асуу. Дараа нь дараах асуултыг асуу: Барилга байгууламж яагаад бат бөх суурьтай байх нь чухал вэ?

Нэг суралцагчаас Хиламан 5:12-ыг чангаар уншихыг хүс. Энэ нь төгс эзэмших судар учир хэсэг суралцагчаас чээжээр хэлэхэд урь. Тэд үүнийг бүрэн чээжлээгүй байсан ч тэдний хичээхийг урамшуулан дэмж. Дараа нь дараах асуултуудыг асуу:

Хэрэв бид амьдралаа Есүс Христийн суурин дээр тавих юм бол энэ шүлэгт юу амлагдсан бэ? (Суралцагчдын хариултад хэрэв бид өөрсдийн суурийг Есүс Христ дээр барих аваас Сатан бидний дээр хүчгүй байх болно гэсэн санаа орсон байх ёстой.)
Та нар өөрсдийнхөө амьдралыг Есүс Христийн суурин дээр барихын тулд юу хийсэн бэ?

Суралцагчдыг Аврагчийн тухай тэдний гэрчлэл уруу таталтуудыг сөрөн зогсох эсвэл зовлон зүдгүүрийг даван туулахад нь хэрхэн тусалсан талаар хуваалцахад урь. Амьдралаа Есүс Христийн суурин дээр барьсан учраас сүнслэг хүчийг хүлээн авсан тухай гэрчлэлээ хуваалц. Өөрсдийнхөө амьдралыг Христийн хадан дээр илүү сайн барих нэг буюу түүнээс олон арга замын талаар бодоход урамшуулан дэмж.

Хиламан 6–7

Нифайчууд илүү их гэм нүгэлтэй болсон үед леменчүүд илүү зөв шударга болсон; Нифай гэм нүгэлтэй нифайчуудад номлож, тэдэнд наманчлахыг зарлигладаг

Суралцагчдад леменчүүд наманчилж, сайн мэдээнд хүчтэйгээр өсч хөгжиж байхад нифайчууд гэм нүгэлд амьдарч байсан ба тэднээс Ариун Сүнс холдон зайлсныг сануул. Суралцагчдаас сонголтуудынх нь учир Сүнс тэднээс холдсоныг мэдэрсэн мөчийнхээ талаар бодохыг хүс.

Нифай өөрийн хүмүүсийн байдлыг хараад “зүрх нь цээжин дотроо харамслаар тэлэв” гэснийг тайлбарла (Хиламан 7:6). Тэр өөрийн цэцэрлэгийн цамхаг дээр гарч, хүмүүсийн гэм нүгэлд харамсан залбирсан. Олон түмэн Нифайг тойрон цугларахад тэрээр боломжийг ашиглан тэдэнд заадаг.

Нэг суралцагчийг цамхаг дээрх Нифайг төлөөлөн самбарын өмнө гарахад урь. Түүнийг Хиламан 7:15–22, 26–28-ыг чангаар унших үед ангийнхнаас шүлгүүдийг даган гүйлгэн харахыг хүс. Шүлгийг уншихын өмнө ангийнхныг хоёр хэсэг болгон хуваарил. Нэг хэсгийг нифайчуудын нүглүүдийн талаар Нифай юу заасан, нөгөө хэсгийг хэрэв нифайчууд наманчлахгүй бол ямар үр дагаврууд ирэхийг Нифай гэрчилсэн болохыг олж тодруулахыг хүс. Дараа нь суралцагчдаас олж мэдсэн зүйлээ мэдээлэхийг хүс.

Суралцагчдын хариултыг сонссоны дараа үүнээс суралцаж болох зарчмуудыг мэдэгдэхийг тэднээс хүс. Суралцагчид олон зарчмыг хуваалцаж болох ч тэд хэрэв бид нүглээ наманчлахаас татгалзах юм бол Их Эзэний хамгаалалт ба мөнх амьдралын адислалуудаа алдах болно гэдгийг илэрхийлэх ёстой.

Суралцагчдад энэ зарчмыг ойлгоход нь туслахын тулд тэднийг дараах нөхцөл байдлууд дахь хүмүүс ямар үр дагаварт хүрэхийг тайлбарла: (1) Нэгэн залуу эрэгтэй порнографын донтолтод автсанаа наманчлахаас татгалзсан. (2) Нэгэн залуу эмэгтэйн хамгийн дээд хүсэл нь эцэг эхийнхээ үгээс зөрж олонд нэртэй, алдар цуутай хүн болохыг хүсэх явдал юм. (3) Нэгэн залуу эрэгтэй судруудаас суралцаж, залбирч, бошиглогчдын удирдамжийг сонссон ч түүнийг үйлдэхээс татгалзжээ.

Суралцагчид Их Эзэний хүчийг амьдралдаа улам бүрэн бүтнээр нь байлгаж болохын тулд ямар нэгэн наманчлах шаардлагатай зүйл байгаа эсэхийн талаар нухацтай бодохыг тэднээс хүс.

Хиламан 8

Бүх бошиглогч Есүс Христийг гэрчилдэг болохыг Нифай заадаг

Самбар дээр хүлээн авах бa үгүйсгэх гэсэн үгсийг бич. Суралцагчдаас энэ хоёр үгийн ялгааг тайлбарлахыг хүс. Нэг суралцагчийг Хиламан 8:13-ыг уншихад урьж, хүмүүс юуг үгүйсгэсэн гэж Нифай хэлснийг олж мэдэхийг ангийнхнаас хүс. Олж мэдсэн зүйлээ тэмдэглэхийг тэднээс хүсч болно.

Мосе ба гуулин могой зургийг үзүүл (62202; Сайн мэдээний зургийн ном [2009], дугаар 16). Тэднийг Хиламан 8:14–15-ыг уншиж, Мосе Аврагчийн талаар юу заасныг олуул. Олж мэдсэн зүйлээ танилцуулахыг тэднээс хүс. Дараа нь дараах асуултыг асуу:

Аврагчид итгэх итгэлээ хөгжүүлэх ямар арга замууд байдаг вэ?
“Гэмшсэн сэтгэлтэй” байх гэдэг юу гэсэн утгатай вэ? (Даруу номхон, наманчлалтай, Их Эзэний тааллыг хүлээн авдаг.) Аврагчийг эрэлхийлэхэд маань энэ зан төлөв яагаад чухал вэ?
Аврагчийн Цагаатгалын талаар мэдэх нь хилэнцтийг эсэргүүцэх мөн нүглээ наманчлахад маань хэрхэн туслах вэ?

Суралцагчдаас энэ шүлгүүдээс суралцаж болох зарчмыг хэлэхийг хүс. Суралцагчид янз бүрийн үгсийг ашиглаж болох ч хэрэв бид Есүс Христ дээр төвлөрч, Түүнд итгэх итгэлээ хөгжүүлэх аваас мөнх амьдралыг хүлээн авах болно гэдгийг илэрхийлэх ёстой.

Нэг суралцагчаас Хиламан 8:16-г чангаар уншихад урьж, ангийнхныг Аврагчийн номлолын талаар өөр хэн заасныг олж тодруулахыг хүс. Суралцагчдаар Хиламан 8:17–22 дээрээс Есүс Христийг гэрчилсэн бусад бошиглогчийн нэрсийг олуул. Суралцагчдыг эртний болоод өнөөгийн бошиглогчид Аврагчийн номлол ба Цагаатгалын золиослолыг хэрхэн гэрчилсэн талаар бодоход урь.

Суралцагчдыг Аврагчийн Цагаатгал тэдний амьдралд ямар утга учиртай болох талаарх гэрчлэлээ хуваалцахад урь. Мөн гэрчлэлээ хуваалц.

Дараагийн хэсэг (Хиламан 10–16)

Суралцагчдаас Их Эзэнээс хүссэн тэдний аливаа зүйлийг Тэрээр биелүүлнэ гэж амласан хэмээн төсөөлөхийг хүс. Нифай маш их итгэлтэй байсан тул Их Эзэн энэ амлалтыг түүнтэй хийж, түүнд лацдан холбох хүчийг өгсөн. Суралцагчдыг Хиламан 10–11-ийг энэ долоо хоногт судалж, Нифай Их Эзэний өгсөн хүчийг өөрийн хүмүүст туслахад ашигласан арга замуудыг олохыг урамшуулан дэмж. Мөн тэднийг Хиламан 13–16 дээрх Лемен хүн Самуелын бошиглолоос Есүс Христийн төрөлтийн хэчнээн бэлгэ тэмдэг байгааг олж тогтоохыг хүс.