73-р хичээл: Алма 6–7

73-р хичээл

Алма 6–7

Оршил

Алма Зарахемла дахь Сүмийг эмх цэгцэнд оруулсныхаа дараа Гидеон хот руу явжээ. Тэрээр тэндхийн хүмүүсийг Зарахемлагийн хүмүүсээс илүү итгэлтэйг олж мэдсэн. Тиймээс түүний захиас Зарахемлад өгсөн захиасаас нь өөр байлаа. Тэрээр хүмүүсийг Их Эзэнд найдахаа үргэлжлүүлж, Түүний Цагаатгалыг амьдралдаа хэрэгжүүлэхийг урамшуулан дэмжжээ. Аврагч Өөр дээрээ үхэл болон бидний нүглүүдийг авсан, Өөр дээрээ бидний өвдөлт, зовлон зүдгүүр, өвчнүүд болон сул талуудыг авсан бөгөөд бидэнд хэрхэн туслахаа Тэрээр мэддэг гэдгийг Алма гэрчилсэн.

Заах зөвлөмж

Алма 6

Алма Зарахемла дахь Сүмийг эмх цэгцэнд оруулсныхаа дараа Гидеон хот руу явсан нь

Хичээл эхлэхээс өмнө нэг суралцагчийг сүмд явах хүч чармайлтынхаа төлөө адислагдсанаа мэдэрсэн арга замуудын талаар товч хуваалцахаар бэлтгэхэд урь. Хичээлээ эхлэхэд энэ суралцагчаас ангийн өмнө гарч, бэлтгэсэн захиасаа хуваалцахыг хүс. Та ч бас сүмд явснаараа хэрхэн адислагдсан тухайгаа хуваалцаж болно.

Алма 6-г Алма болон санваарын бусад удирдагч Зарахемла дахь Сүмийг хэрхэн хүчирхэгжүүлснийг заадаг хэмээн тайлбарлаж танилцуул.

Нэг суралцагчаас Алма 6:4–6-г чанга уншихад урь. Зарахемла дахь Сүмийн гишүүд Бурханыг мэдэхгүй хүмүүст юу хийснийг хайж олохын тулд хамтдаа уншихыг суралцагчдаас хүс. Суралцагчдыг сурсан зүйлээ хуваалцахад урь.

Дараах үнэнийг самбар дээр бич: Сүм бүх хүний сайн сайхны төлөө байгуулагдсан юм. Энэхүү үнэн тэдний амьдралд хэрхэн нөлөөлж болох талаар бодоход нь суралцагчдад туслахын тулд асуу:

Сүм өнөөдөр Бурханыг мэддэггүй хүмүүсийг хэрхэн адисалж чадна гэж та боддог вэ?

Суралцагчдыг Бурханы тухай илүү сайн мэдэх хэрэгтэй байгаа хэн нэгний тухай бодоход урь. Энэ хүн нь манай Сүмийн гишүүн эсвэл өөр сүмийн гишүүн байж болно. Бид Сүмийн гишүүд учраас олон адислал хүлээж авдгийг гэрчлээд, суралцагчдыг адислалуудаа гэрчилж, бусадтай хуваалцахыг урихад урамшуулан дэмж.

Aлмa 7:1–13

Алма Есүс Христийн ирэлтийн тухай бошиглосон нь

Суралцагчдыг хоёр хоёроор нь бүлэг болго. Бүлэг бүрээс дараах асуултын хариултыг ярилцахыг хүс:

Таны сэтгэлийг ирээдүйн ямар үйл явдлууд онцгой хөдөлгөдөг вэ?

Суралцагчдад энэ асуултын хариултыг ярилцах тодорхой хугацаа өгсний дараа цөөн суралцагчаас хариултаа бусадтайгаа хуваалцахыг хүс. Тэгээд Алма Зарахемла дахь Сүмийг эмх цэгцэнд оруулсныхаа дараа Гидеон хот руу явсныг тайлбарла. Тэрээр тэнд байсан хүмүүст ирээдүйд болох олон зүйлийг болон “тэд бүгдээс илүү чухал” (Алма 7:7) нэгэн зүйл буйг ярьжээ. Тэрээр ирээдүйд болох энэ үйл явдлын учир ирэх адислалуудын төлөө бэлтгэхэд нь хүмүүст туслах зарчмуудыг заасан.

Нэг суралцагчийг Алма 7:3–6-г чанга уншихад урь. Алма Гидеоны хүмүүсийн талаар ямар найдлагатай байсныг хайж олохыг суралцагчдаас хүс. Тэгээд өөр нэг суралцагчаас Алма 7:18–19-ийг чанга уншихыг хүс. Алма Гидеоны хүмүүсийн талаар сүнслэг өдөөлтөөр юу сурч мэдсэнийг дүрслэн хэлэхийг суралцагчдаас хүс.

Алма 7:7, 9–10-ыг дор бүрнээ чимээгүй уншихдаа хүмүүс мэдэх нь хамгийн чухал хэмээн Алмагийн мэдэрсэн үйл явдлыг хайж олоход суралцагчдыг урь.

Алмад өгүүлснээр, ирэх аливаа бүгдээс “илүү чухал [байсан] нэгэн зүйл” нь юу байсан бэ? Аврагчийн ирэлт нь яагаад бүх цаг үеийн хамгийн чухал үйл явдал гэж та бодож байна вэ?
Алма яагаад аль хэдийн итгээд, хүчтэй гэрчлэлтэй болсон хүмүүст наманчлах ёстой гэж хэлсэн гэж та бодож байна вэ?

Алма дараа нь Есүс Христийн ирэлт нь яагаад хүн төрөлхтний түүхэн дэх хамгийн чухал үйл явдал болох тухай заасныг тайлбарла. Алма 7:11–13-ыг ээлж дараалан чанга уншихад цөөн суралцагчийг урь. Үлдсэн суралцагчдыг унших хэсгийг дагаж харан, Аврагч бидний төлөө Өөр дээрээ юу авсныг мэдэхэд урь. (Та халамжлах нь тайтгарал өгөх, хэн нэгэнд туслахаар явах гэсэн үг гэдгийг тайлбарлах хэрэгтэй байж магад.)

Алма 7:11–13 нь төгс эзэмших судрын хэсэг гэдгийг хэл. Та суралцагчдад энэ судрын хэсгийг амархан олж болохын тулд тодруулж судар дээрээ тэмдэглэгээ хийхийг санал болгож болно.

Суралцагчдын хариултуудыг гарчиг бичдэгийн адилаар самбарын дээд хэсэгт жагсаан бич. Хариултуудад өвчин эмгэг, зовлон зүдгүүр, уруу таталт, үхэл, сул дорой байдал (сул талууд эсвэл чадваргүй байх) болон гэм нүгэл орж болно.

Та суралцагчдад Алма 7:11 дээрх “бүх төрлийн” гэсэн хэллэгийг тэмдэглэхийг санал болгож болно. Самбар дээр бичсэн нөхцөл байдал тус бүрд жишээ хэлэхийг тэднээс хүс. Суралцагчдыг жишээ хэлэхэд тэдгээрийг холбогдох гарчгуудын дор бич. (Жишээлбэл, хорт хавдар гэдэг үгийг өвчин эмгэг гэдэг гарчгийн доор хөгжлийн бэрхшээлийг сул дорой байдлын доор бичиж болно.)

Нэг суралцагчаас Далын ахлагч Брүс С.Хафэны хэлсэн дараах үгсийг уншихыг хүс.

“Цагаатгал зөвхөн нүгэлтнүүдэд зориулагдаагүй” (“Beauty for Ashes: The Atonement of Jesus Christ,” Ensign, 1990 оны 4-р сар, 7). Та энэ үгсийг самбар дээр бичээд, суралцагчдыг судар дээрээ Алма 7:11–13-ын хажууд бичихийг хүсэж болно.

Алма 7:11–13-т уншсан зүйл дээрээ үндэслэн, ахлагч Хафэн “Цагаатгал зөвхөн нүгэлтнүүдэд зориулагдаагүй” гэж хэлсэн нь юу гэсэн утгатай гэж та бодож байна вэ?

Дараах үнэнийг самбар дээр бич: Есүс Христ биднийг нүгэл, үхлээс авраад, мөнх бус байдлын сорилтуудыг ялахад бидэнд туслахын тулд зовж шаналсан юм.

Аврагчийн Цагаатгалд хэрхэн найдахаа ойлгоход нь суралцагчдад туслахын тулд Арванхоёр Төлөөлөгчийн Чуулгын ахлагч Жэффри Р.Холландын хэлсэн дараах үгсийг унш.

Зураг

Ахлагч Жэффри Р.Холланд

“Та тамхи, мансууруулах бодис— мөрийтэй тоглоом эсвэл орчин цагийн сүйрүүлэгч тахал болсон порнографт донтох нүгэл хилэнцтэй тэмцэж байна уу? … Та өөрийгөө эрэгтэй хүн үү, эмэгтэй хүн үү гэдэг тал дээр, эсвэл өөрийгөө хүндлэх нь чухам юу болох тухайд эргэлздэг үү? Танд—эсвэл хайртай хэн нэгэнд тань—өвчин зовлон, сэтгэл санааны дарамт эсвэл үхэл тулгараад байна уу? Эдгээр асуудлаа шийдэхийн тулд танд ямар ч алхмуудыг хийх хэрэгтэй байлаа гэхэд эхлээд Есүс Христийн сайн мэдээнд ир. Тэнгэрийн амлалтуудад итгэ. …

“Бурханы нигүүлсэнгүй мөн чанарт найдах нь Христийн заасан сайн мэдээний гол цөм нь юм. Аврагчийн Цагаатгал бидний мөрөн дээрээс гэм нүглийн ачаа дарамтыг төдийгүй бас урам хугаралт, гуниг харуусал, өвчин эмгэг, цөхрөл гутралын ачаа дарамтыг авсныг би гэрчилж байна. [Aлмa 7:11–12-ыг үзнэ үү.] Энэхүү тусламжид найдах нь өөрсдийгөө нүглээс хол хөндий байлгаж, авралынхаа төлөө ажиллах шалтгаан болоод эрч хүчийг бидэнд бүр эхлэлээс өгч, бидэнд тусалсаар ирсэн юм” (“Broken Things to Mend,” Ensign эсвэл Лиахона, 2006 оны 5-р сар, 70–71)

Алма 7:11–13-ыг ойлгох нь сорилтуудтай тулгарах үед бидэнд хэрхэн тусалж чадах вэ?

Бид Есүс Христийн Цагаатгалаар дамжуулан тусламж ба хүч чадлыг хүлээн авч болох зарим арга замыг дүрслэхийн тулд дараах нөхцөлүүдийг унш. Нөхцөл бүрийг уншсаны дараа Есүс Христ Өөрийн Цагаатгалаар дамжуулан ийм сорилттой учирсан хүнд хэрхэн тусалж болох тухай тайлбарлахыг суралцагчдаас хүс.

Залуу эмэгтэй автомашины осолд орсноос зүүн хөл нь мэдээгүй болжээ.
Залуу эрэгтэй өөрийн хийсэн зарим буруу сонголтоосоо ичиж байна. Тэр сэтгэлээр унаж, өөрийгөө хэрэггүй хүн гэж бодож байна.
Залуу эрэгтэйн эцэг саяхан нас барж, тэр ээжтэйгээ шинэ хотод нүүж иржээ. Түүнд гунигтай байгаагаас гадна ганцаардаж, бүх зүйл хэрхэн дахин зөв болохыг олж харахгүй байв.

Цагаатгалын хүч болон энэхүү хүч хэрхэн тусалж болох тухай гэрчлэлээ хуваалц. Тэгээд суралцагчдад дараах асуултуудын нэгэнд хариулан дэвтэртээ эсвэл судар судлах тэмдэглэлдээ бичих хэдэн минутын хугацаа өг. (Та хичээл эхлэхээс өмнө эдгээр асуултыг самбар дээр бичих буюу асуултууд бичсэн тараах материалуудыг бэлтгэх, эсвэл суралцагчид өөрсдөө бичихийн тулд удаан уншиж өгөхийг хүсч болно.)

Цагаатгал хэзээ танд болон таны мэдэх хэн нэгэнд Алма 7:11–13-т дурдагдсан арга замуудын аль нэгээр нь тусалсан бэ?
Та сорилтуудтай тулгарах үедээ Цагаатгалд найдаж болохын тулд юу хийх вэ?

Цөөн суралцагчаас бичсэн зүйлээ бусадтай хуваалцахыг хүс. (Тэдэнд хэт хувийн эсвэл өөрсдийнхөө аливаа нууц зүйлийг хуваалцах шаардлагагүйг сануул.)

Алма 7:14–27

Алма Бурханы хаант улсад хүрэх замаа үргэлжлүүлэхэд хүмүүсийг урамшуулан дэмжсэн нь

Суралцагчдад Алма Гидеон дахь хүмүүсийн сүнсний нөхцөлийг хэрхэн дүрсэлснийг сануулахын тулд нэг суралцагчийг Алма 7:19-ийг чанга уншихад урь. Хүмүүс “Бурханы хаант улс тийш удирдах зам дээр” байсныг онцлон хэл. Алма тэднийг зам дээрээ үлдэхэд нь туслахыг хүссэн гэдгийг тайлбарла.

Бид сайн мэдээний зарчмуудаар амьдарснаар Бурханы хаант улс руу хөтлөх замыг дагадаг гэдгийг харахад нь суралцагчдад туслахын тулд самбар дээр зам зур. Замын эхэнд Мөнх бус байдал гэж бич.Замын төгсгөлд Бурханы хаант улс гэж бич. Суралцагчдыг хоёр хэсэг болго. Нэг хэсгээс Алма 7:14–16-г, нөгөө хэсгээс Алма 7:22–24-ийг судлахыг хүс. Бид Бурханы хаант улс руу хөтлөх замыг дагахын тулд юу хийх хэрэгтэй болон өөрсдөө ямар хүмүүс болох хэрэгтэйг хайж олохыг хэсгүүдээс хүс.

Суралцагчдад унших хангалттай хугацаа өгсний дараа тэднээс хэдийг нь самбарын өмнө гарч ирэхэд урь. Тэднээс Бурханы хаант улс руу хөтөлдөг өөрсдийн олж мэдсэн үйлдлүүд болон зан чанаруудыг замын дагуу бичихийг хүс. Та суралцагчдаас замын дагуу бичигдсэн зарим үйлдэл болон зан чанарууд тэдний хувьд юу гэсэн үг болохыг асууж болно. Та бас тэд энэ замыг амьдралдаа хэрхэн дагаж болох талаар бодохыг тэднээс хүсэж болно. Бид итгэлээр амьдарвал “Бурханы хаант улс тийш удирдах зам дээр байдаг” (Алма 7:19) гэдгийг гэрчил.

Төгс эзэмших судар—Алма 7:11–13

Алма 7:11–13 нь их урт төгс эзэмших судрын хэсэг учир энэ нь суралцагчдад чээжлэхэд хэцүү байж болно. Гэвч Алмагийн үг хэл Цагаатгалын хүч болон түүний өргөн цар хүрээг амьдралынхаа туршид санахад нь суралцагчдад тусалж чадах онцгой үгсийг агуулдаг. Тэдэнд эдгээр түлхүүр үгсийг чээжлэхэд нь туслахын тулд Алма 7:11–13-ын шүлгүүдийг тэдний өмнө самбар дээр бичээд дараах түлхүүр үгсийг гарч ирэх бүрд зай үлдээ: өвчин эмгэг, зовлон зүдгүүр, уруу таталтууд, үхэл, сул дорой талууд, гэм нүгэл, зөрчил. (Жишээлбэл: Та Алма 7:11-ийг бичиж байгаа бол: “Мөн тэрээр бүх төрлийн … мөн … мөн … тэвчих болно” гэж эхэлнэ. )

Алма 7:11–13-ыг ангиараа чанга унших үед орхигдсон үгсийг суралцагчдаар нөхүүл. Та үүнийг хэдэн удаа хийсний дараа суралцагчдаас, хэрэв тэд тусдаа хуудас цаас гаргаж тэдний төлөө Аврагч Өөр дээрээ үүрсэн зүйлсийг илэрхийлсэн үгсийг бичиж чадах эсэхийг асуу. Суралцагчдыг сорилттой тулгарах үедээ “чөлөөлөлтийн хүчинд” илүү их итгэлтэй байж чадахын тулд Есүс Христ тэдний төлөө хийсэн зүйлсийг ямагт санаж байхад урь.

Тайлбар: Та дараагийнхаа хичээлийн эхний хэдэн минутыг суралцагчид Аврагчийн хязгааргүй Цагаатгалын талаарх түлхүүр үгсийг санаж байгаа эсэхийг мэдэхэд зориулж болно.

Тайлбар болон нөхцөл байдлын талаарх мэдээлэл

Алма 6:6. “Бурханыг үл мэдэгчдийн” өмнөөс мацаг барьж, залбирах нь

Сүмийн гишүүнчлэл Бурханы бүх хүүхдүүдэд зориулагдсан адислал гэдгийг чухалчлахын тулд та Арванхоёр Төлөөлөгчийн чуулгын ахлагч Жэффри Р.Холландын дараах үгсийг уншиж болно:

“Бүх хүмүүс номлогчдын төлөө залбирдаг. Үүрд ийм байх болтугай. Бид мөн ийм сүнсээр бас номлогч нартай уулзаж байгаа (эсвэл уулзах хэрэгтэй байгаа) хүмүүсийн төлөө залбирах ёстой. Зарахемла дахь гишүүд Бурханы Сүмд нэгдээгүй байгаа хүмүүсийн төлөө “мацаг барих болон хүчирхэг залбиралд нэгдэхээр” [Алма 6:6] зарлиг болгогдсон билээ. Бид бас ингэж чадна.

“Бид бас өөрсдийнхөө номлогчийн туршлагын төлөө өдөр бүр залбирч болно. Ийм зүйлсийн төлөө бурханлаг удирдамжийн дагуу залбир. Таны хүсч байгаа номлогчийн боломжууд нь танд байгаа тэрхүү зүйлийг аль хэдийнээс хүсэн хүлээж байгаа хэн нэгний зүрх сэтгэлд бэлтгэгдсэн байгаа. ‘Учир нь дэлхий даяар … мөн тэд үүнийг хаанаас олохыг мэддэггүйн улмаас гагцхүү үнэнээс хол байдаг нь олон буй’ [С ба Г 123:12.][С ба Г 123:12]. Тэд таныг олж болохын төлөө залбир! Тэгээд анхааралтай бай, учир нь амьдралдаа өлсгөлөнг мэдэрч буй хүмүүс та нарын дэлхийд үй олноороо бий (“Witnesses unto Me,” Ensign, 2001 оны 5-р сар, 15).

Алма 7:1–5. Гидеоны нутаг дахь хүмүүс

Алма 7-д Гидеоны хөндийд байдаг Гидеон хотод амьдардаг, “Нихорын гараар илдэнд хөнөөгдсөн тэр хүний нэрээр … нэрлэгдсэн” хүмүүст зориулсан Алмагийн сургаалууд байдаг (Алма 6:7). Гидеон бол Лимхайн хүмүүсийг боолчлолоос чөлөөлөхөд Бурханы мутар дахь зэмсэг болсон, Есүс Христийн итгэлтэй шавь юм. Тэрээр Бурханы үгээр Нихорын сургаалтай үхэн үхтлээ тэмцсэн билээ (Мозая 22:3–9; Алма 1:7–9-ийг үзнэ үү). Энэхүү итгэлтэй хүний нэрийг авч яваа газарт амьдарч байгаа хүмүүс мөн итгэлтэй байлаа (Алма 7:17–20, 26-г үзнэ үү). Алма тэдний итгэлтэйг, мөн үнэн болон амьд Бурханыг шүтэхээр сонгосныг мэдсэн учраас тэдэнд ариун үгсээр баяртайгаар ярих боломжтой байсан (Алма 7:6-г үзнэ үү). Тэдний итгэлтэй байдал нь тэднийг Есүс Христ “тэдний сул дорой байдлуудынх нь дагуу халамжлахын” тулд “тэр өөрийн хүмүүсийн шаналал мөн өвчнүүдийг өөр дээрээ авч” мөн “өөрийн хүмүүсийн нүглүүдийг өөр дээрээ авах” Цагаатгалын талаарх Алмагийн хүчтэй сургамжийг хүлээн авахад бэлтгэсэн байж болно (Aлма 7:11–13).

Aлмa 7:10. Есүс “Иерусалимд” төрсөн

Ерөнхийлөгч Жозеф Фийлдинг Смит Аврагчийн төрсөн газрыг Алмагийн тунхагласнаар ийн тайлбарласан:

“Библид бичигдсэн аливаа үнэнтэй харшилдах эсвэл зөрчилдөх зүйл Мормоны Номонд байхгүй. Алмагийн хэлснийг анхааралтай уншихад, Есүсийг Иерусалимд төрсөн гэж тунхаглах ямар ч бодол түүнд байгаагүйг харж болно. Алма илүү сайн мэдэж байсан. Иосеф Смит болон түүнтэй хамтран Мормоны Номыг авчирсан хүмүүс ч бас мэдэж байсан. Алма “тэр бидний эцэг өвгөдийн хот болох Иерусалимд” гэж хэлсэн бол дэлхийд бүх өөрчлөлтийг хийх байсан. Тэгвэл бид түүнийг алдаа гаргасан байна гэж хэлэх байсан. Алма алдаа гаргаагүй бөгөөд түүний хэлсэн нь үнэн юм.

“Доктор. Хью Нибли 1957 онд санваартнуудад зориулсан Мормоны Номонд хүрэхүй хэмээх судалгааны 8-р Хичээл, хуудас 85-д энэ асуудлын талаар

“‘… Мормоны Номыг дайрч довтлогчдын дуртай шүүрч авдаг сэдвүүдийн нэг бол Алма 7:10 дахь Аврагч “бидний эцэг өвгөдийннутаг болох Иерусалимд” төрсөн гэдэг үгс юм” гэж өгүүлсэн. Энд Иерусалим нь “бидний эцэг өвгөдийн нутаг дахь” хот биш, харин энэ бол тэнд байдаг нутаг юм. Христ Иерусалим хотоос 10 км орчим хол орших тосгонд төрсөн. Энэ тосгон Иерусалим хотын дотор байгаагүй, харин эртний хүмүүс өөрсдөдөө байгуулсан “Иерусалимын нутаг байлаа” (Answers to Gospel Questions, эмхэтгэсэн Бага Жозеф Фийлдинг Смит, 5-р боть (1957-66), 1:174].)

Aлмa 7:11–13. “Бүх төрлийн өвчин мөн зүдгүүрүүд мөн уруу таталтууд”

Тэргүүн Зөвлөлийн Ерөнхийлөгч Хэнри Б.Айринг Аврагчийн Цагаатгалын учир бидний хүлээн авах тайтгарлын талаар дараах ойлголтыг санал болгосон юм.

“Тэрээр биднийг хэрхэнэмчилж, бидэнд туслахыг сайн мэддэг, Аврагчийн тайтгаруулах хүчний тухай тодорхой өгүүлсэн. Мормоны Номонд Түүний тайтгаруулах хүчний тодорхой баталгааг өгдөг. Энэхүү баталгаанд итгэх нь залбирах, ажиллах, тусламж хүлээх зэрэгт тэсвэр тэвчээрийг бий болгодог. Тэрээр бидэнд илчлэлтээр болон энгийн байдлаар хэрхэн туслахыг мэддэг ч туршлагаараа сургадаг юм” (“Бэрхшээл,” Ensign эсвэл Лиахона, 2009 оны 5-р сар, 24).

Арванхоёр Төлөөлөгчийн чуулгын ахлагч Даллин Х.Өүкс Аврагч бидэнд тулгараад байгаа ямар ч төрлийн сорилтуудад туслах чадвартай хэмээн заасан билээ:

“Олон хүмүүс хүнд ачаа үүрдэг. Зарим нь хайртай нэгнээсээ хагацах буюу хөгжлийн бэрхшээлтэй болсон нэгнээ асрах хэрэгтэй болдог. Зарим нь гэр бүл салалтаас болж, сэтгэл зүрх нь шархалсан байдаг. Зарим нь мөнхийн гэрлэлтийг хүсэн хүлээж байдаг. Зарим хүмүүс архи, тамхи, мансууруулах бодис эсвэл порнограф зэрэг донтуулдаг бодис болон дадал зуршлын эрхшээлд орсон байдаг. Зарим хүмүүс бие махбодын болон сэтгэцийн эмгэгтэй байдаг. Зарим хүмүүс ижил хүйстэндээ сэтгэл татагдах гаж буруу хүсэлтэй болсон байдаг. Зарим хүмүүс сэтгэл санааны гүн хямралд орж, өөрийгөө голох аймшигт мэдрэмжтэй болсон байдаг.

“Их Эзэн Есүс Христийн эдгээх хүч нь бидний ачааг авч хаяна уу, эсвэл эцсээ хүртэл тэвчиж үүнтэйгээ амьдрах явцад биднийг хүчирхэгжүүлнэ үү … ямартай ч мөнх бус байдлын бүхий л зовлон зүдгүүр бидэнд байх болно” (“He Heals the Heavy Laden,” Ensign эсвэл Лиахона, 2006 оны 11-р сар, 6, 8).

Арванхоёр Төлөөлөгчийн чуулгын ахлагч Жэффри Р.Холланд бидэнд туслах Христийн энэрэнгүй сэтгэл болон чадварын тухай ийн бичжээ:

“Христ хамгийн хүнд хэцүү цагт бидэнд хэрхэн тусалж, биднийг хэрхэн хүчирхэгжүүлэхийг мэдэхийн тулд мөнх бус бүх хүмүүсийн туулахаар дуудагдсан тэрхүү туршлагыг өөрийн биеэр туулсан юм. Тэрбээр бидний хүн нэг бүрийн үүрч яваа хамгийн хүнд ачааг мэддэг. Тэрбээр бидний хүлцэн тэвчдэг хамгийн нийтлэг бөгөөд хамгийн зовиуртай өвдөлтийг мэддэг. Тэрбээр биднийг дэмжин туслахын тулд иймэрхүү бүхий л уй гашуугаас доогуурт бууж ирсэн юм. Бидний төлөө Түүний зовж шаналаагүй, өөрийн хүчирхэг бөгөөд нигүүлсэнгүй мөрөн дээр тавиагүй тийм зовлон шаналал, харуусал, уй гашуу гэж дэлхийд байхгүй” (Christ and the New Covenant: The Messianic Message of the Book of Mormon [1997], 223–24).