Laipelí
Lēsoni 34: 2 Nīfai 21–24

Lēsoni 34

2 Nīfai 21–24

Talateú

Ko e lahi taha ʻo e ngaahi kikite ʻa ʻIsaia ʻi he Tohi ʻa Molomoná ʻoku fekauʻaki ia mo e ngaahi ʻaho fakaʻosí. Naʻá ne kikite ʻo kau ki hono toe Fakafoki mai ʻo e ongoongoleleí, Palōfita ko Siosefa Sāmitá, Hāʻele ʻAngauá, mo hono fakaʻauha ʻo e kakai koví. Naʻá ne tomuʻa mamata ʻe hanga ʻe he ʻEikí ʻo “fokotuʻu ha fuka maʻá e ngaahi puleʻangá” ke tānaki ʻa Hono kakaí ʻi he kuonga fakaʻosí (vakai, 2 Nīfai 21:11–12). Ne fakamoʻoni foki ʻa ʻIsaia ʻe ikunaʻi ʻe he ʻEikí ʻa Sētane pea kamata ʻa e Nofotuʻí, ko ha taimi ʻo e melino mo e fiefia.

Ngaahi Fokotuʻu ki hono Akoʻí

2 Nīfai 21:1–5, 10–12

ʻOku mamata ʻa ʻIsaia ki hono Toe Fakafoki mai ʻo e ongoongolelei ʻa Sīsū Kalaisí ʻi he kuonga fakaʻosí

Fakaʻaliʻali ʻa e fakatātā ʻo e Hā ʻa Molonai kia Siosefa Sāmita ʻi Hono Lokí (62492 900; Tohi Fakatātā ʻo e Ongoongoleleí [2009], fika 91). Falamatalaʻi ange ko e taimi ne fuofua hā ai ʻa Molonai kia Siosefa Sāmitá, “naʻá ne lau mo e vahe hono hongofulu mā taha ʻo e tohi ʻa ʻIsaiá, ʻo pehē ʻoku vave hono fakamoʻoniʻí” (Siosefa Sāmita—Hisitōlia 1:40). Ko e kikite ko ia ʻi he tohi ʻaʻIsaia 11 ʻoku toe maʻu foki ia ʻi he 2 Nīfai 21.

ʻOku hā ʻa Molonai kia Siosefa Sāmita

Fakaafeʻi e kau akó ke nau lau fakalongolongo ʻa e 2 Nīfai 21:1. ʻAi ke nau tokanga ki he kupuʻi lea ko ia ko “ʻa ha tokotoko mei he tefito ʻo Sesé.” Fakaafeʻi leva kinautolu ke nau lau fakalongolongo ʻa e 2 Nīfai 21:10. ʻAi ke nau tokanga ki he kupuʻi lea ko ia ko e “aka ʻo Sesé.” Mahalo te ke fie fokotuʻu ange ke fakaʻilongaʻi ʻe he kau akó ʻa e ongo kupuʻi leá ni. Fakamatalaʻi ange ne maʻu ʻe he Palōfita ko Siosefa Sāmitá ha fakahā ʻo kau ki he ongo kupuʻi leá ni. Fakaafeʻi e kau akó ke nau kumi hake ki heTokāteline mo e Ngaahi Fuakava 113:1–6. Lau leʻolahi ʻa e veesi ko ʻení. Kimuʻa pea lau iá, kole ki he kau akó ke nau lau fakataha mo koe pea kumi ʻa e ʻuhinga ʻo e ngaahi kupuʻi leá. ʻE lava ke ke tohi ʻa e ngaahi ʻuhingá ni ʻi he palakipoé ʻo hangē ko ʻene hā atu ʻi laló. Mahalo te ke fie poupouʻi e kau akó ke nau hiki e ngaahi ʻuhingá ni ʻi heʻenau folofolá.

Tefito ʻo Sesé—Sīsū Kalaisi

Tokotokó—ko ha tamaioʻeiki ʻa Kalaisi “ʻa ia kuo hilifaki ki ai ha mālohi lahi”

Aka ʻo Sesé—ko ha tokotaha ʻi he kuonga fakaʻosí te ne maʻu ʻa e lakanga fakataulaʻeikí pea mo e “ngaahi kī ʻo e puleʻangá”

Kole ange ki ha tokotaha ako ke ne lau ʻa e lea ko ʻeni ne fai ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke nau fakafanongo ke ʻilo pe ko hai ʻa e “tokotoko” mo e “aka ʻo Sesé.”

“ʻOku tau hala nai ʻi heʻetua pehē ko e palōfita ʻoku lau ki ai hení ko Siosefa Sāmita, ʻa ia ne ʻomi ki ai e lakanga fakataulaʻeikí, pea maʻu ʻa e ngaahi kī ʻo e puleʻangá, peá ne fokotuʻu ʻa e fuka ki hono tānaki ʻo e kakai ʻa e ʻEikí ʻi hotau kuonga fakakosipelí? ʻOku ʻikai ko ia foki ʻa e ‘tamaioʻeiki ʻi he toʻukupu ʻo Kalaisí, ʻa ia ko ha hako ʻo Sese pea pehē kia ʻIfalemi, pe ʻo e fale ʻo Siosefá, ʻa ia ʻoku tuku ki ai ha mālohi lahi’?” (The Millennial Messiah: The Second Coming of the Son of Man [1982], 339–40).

Fakaafeʻi ha tokotaha ako ke ne lau ʻa e 2 Nīfai 21:10, 12. Kole ki he kalasí ke nau kumi e ngaahi foʻi lea mo e kupuʻi lea ʻoku fekauʻaki mo Siosefa Sāmita pea mo hono toe Fakafoki Mai ʻo e ongoongoleleí mo e Siasi ʻo e ʻEikí. Kimuʻa ʻi hono kole ange ki he tokotaha akó ke ne lau iá, mahalo te ke fie maʻu ke fakamanatu kiate kinautolu ʻoku ʻuhinga e foʻi lea ko e fuká ki ha tuʻunga, pe feituʻu ʻoku fakaʻaongaʻi ke fakataha ki ai ko ha fakaʻilonga ke fakataha mai (vakai lēsoni 32).

  • ʻOku fakahoko fēfē ʻe he ngāue ʻa Siosefa Sāmitá ʻa e kikite kau ki he aka ʻo Sesé?

  • ʻOku founga fēfē ʻetau tānaki fakataha he ʻahó ni ko e kāingalotu ʻo e Siasí? ʻOku founga fēfē ʻetau puke hake ha fuka ke tokoni ke ʻilo ʻe he niʻihi kehé ʻa e feituʻu ke tānaki ki aí?

Fakamoʻoni kuo toe fakafoki mai ʻe he ʻEikí ʻEne ongoongoleleí mo Hono Siasí ʻi he Palōfita ko Siosefa Sāmitá pea ʻoku lolotonga tānaki fakataha ki ai Hono kakaí ʻi he ngaahi ʻaho fakaʻosí.

2 Nīfai 21:6–9; 22

ʻOku fakamatalaʻi ʻe ʻIsaia ʻa e Nofotuʻí

Kole ki he kau akó ke nau fakakaukauloto ki ha fehuʻi ange ʻe ha nau kaungāmeʻa ko ha mēmipa ʻo ha siasi kehe ki heʻenau tui kau ki he Nofotuʻí. ʻAi ke nau ako fakalongolongo ʻa e 2 Nīfai 21:6–9 mo e 22:1–6, pea fekumi ki ha ngaahi moʻoni te nau lava ke vahevahe ʻi ha faʻahinga fetalanoaʻaki pehē. Fakaafeʻi kinautolu ke nau hiki ʻenau ngaahi fakakaukaú ʻi heʻenau ngaahi tohinoa ako folofolá pe tohi fakamatala fakakalasí. Ke tokoniʻi kinautolu ke aleaʻi e meʻa naʻa nau ʻiló, ʻeke ha konga pe kotoa ʻo e ngaahi fehuʻi ko ʻení:

  • Ko e hā ʻoku fokotuʻu mai ʻe he fakamatala ʻi he 2 Nīfai 21:6–8 ʻo kau ki he ngaahi tuʻunga ʻo e māmaní lolotonga e Nofotuʻí?

  • Fakatatau ki he 2 Nīfai 21:9, ko e hā e meʻa ka hoko ai ʻa e māmaní ko e feituʻu ʻo e melino lolotonga e Nofotuʻí? (Tokoniʻi e kau akó ke mahino ʻe hoko ʻa e māmaní ko ha feituʻu ʻo e melino lolotonga e Nofotuʻí koeʻuhí he ʻe fonu ia ʻi he ʻilo ki he ʻEikí.)

  • ʻE tokoniʻi fēfē kitautolu ʻe he ʻilo ki he ʻEikí ke tau moʻui melino ange he taimí ni?

  • ʻOku fakamatalaʻi ʻe ʻIsaia ʻi he 2 Nīfai 22:1–6, ʻa e laumālie ʻo e lotu ʻe maʻu ʻe he kakaí lolotonga ʻa e Nofotuʻí. Te tau fakatupulaki fēfē ʻa e tōʻonga tatau he ʻahó ni?

  • Ko e hā ha ngaahi tafaʻaki ʻo e Nofotuʻí te ke fie maʻu ʻi hoʻo moʻuí he taimí ni? (Poupouʻi e kau akó ke nau fakalaulauloto ki he meʻa te nau lava ʻo fai ke maʻu ha konga ʻo e ngaahi tāpuaki ko ʻení ʻi heʻenau moʻuí.)

2 Nīfai 23–24

ʻOku akoʻi ʻe ʻIsaia ʻe fakaʻauha ʻa e kau faiangahalá pea ʻe ʻaloʻofa ʻa e ʻEikí ki Hono kakaí

Fakamatalaʻi ange ʻoku kikiteʻi ʻe ʻIsaia ʻi he 2 Nīfai 23, ʻa hono fakaʻauha ʻo Papiloné pea fakafehoanaki ia ki he fakaʻauha ʻo e kau angahalá ʻi he Hāʻele ʻAngaua ʻa e Fakamoʻuí. Fakaafeʻi e kau akó ke nau lau ʻa e fakamatala ki he “Pēpeli, Papilone” ʻi he Fakahinohino ki he Ngaahi Folofolá. Fakamatalaʻi ʻoku ʻuhinga fakalūkufua e foʻi lea Papiloné ʻi he ngaahi veesi folofola ʻe niʻihi ki he faiangahala ʻa e māmaní. Naʻe kikiteʻi ʻe ʻIsaia ʻe hoko ʻa e fuʻu fakaʻauha lahi ki he kau faiangahala ʻi Papiloné pea ʻi he ngaahi ʻaho fakaʻosí.

Ke tokoni ki he kau akó ke nau ʻiloʻi ʻa e ngaahi nunuʻa ʻo e kau faiangahalá ʻi he ngaahi ʻaho fakaʻosí, ʻai ke nau lau fakalongolongo ʻa e 2 Nīfai 23:1, 5–9, 11, 15, 19, mo e 22.

Fakamatalaʻi ange naʻe ʻuhinga ʻa ʻIsaia ki he hinga ʻa Lusifā, pe Sētané ko ha fakatātā ʻe taha e founga hono fakaʻauha ʻo e kau faiangahalá. Fakaafeʻi ha tokotaha ako ke ne lau leʻolahi ʻa e 2 Nīfai 24:12–16.

  • Ko e hā ʻa e ngaahi kupuʻi lea ʻi he ngaahi veesi ko ʻení ʻoku nau fakahaaʻi ʻa e angakovi ʻa Sētané?

  • ʻOku fakamatalaʻi fēfē ʻe he 2 Nīfai 24:16 ʻetau ongo kau kia Sētané kapau te tau malava ʻo sio ki hono tuʻunga totonú?

Fakaafeʻi ha tokotaha ako ke lau ʻa e lea ko ʻeni ʻa Palesiteni ʻEselā Tafu Penisoní:

“ʻI he fakataha lahi he maama fakalaumālié, naʻe tō ʻa Lusifā ‘ko e foha ʻo e pongipongí’ koeʻuhí ko e hīkisiá (2 Nīfai 24:12–15; vakai foki T&F 76:25–27; Mōsese 4:3.) … Naʻe ʻoatu ʻe Lusifā ʻene fokotuʻutuʻú ʻi he fakataha lahi he maama fakalaumālié ke fehangahangai mo e palani ʻa e Tamaí ʻa ia ne hoko ai ʻa Sīsū Kalaisi ko ha taukapó. (Vakai, Mōsese 4:1–3.) Naʻá ne fakaʻānaua ke fakalāngilangiʻi lahi ange ia ʻi ha toe niʻihi kehe. (Vakai, 2 Nīfai 24:13.) Ko hono fakanounoú ko ʻene holi ʻi he hīkisiá ke toʻo e ʻOtuá mei hono taloní. (Vakai, T&F 29:36; 76:28.)” (“Beware of Pride,” Ensign, May 1989, 4–5).

Tataki e tokanga e kau akó ki he folofola ʻa e ʻEikí ʻi he fakaʻosinga ʻo e 2 Nīfai 23:22: “Te u ʻaloʻofa ki hoku kakaí, ka ʻe ʻauha ʻa e kau fai angahalá.” Mahalo te ke fie poupouʻi e kau akó ke fakaʻilongaʻi ʻa e fakamatala ko ʻení ʻi heʻenau folofolá. (Fakatokangaʻi ange ʻoku ʻikai ʻasi ʻa e sētesi fakaʻosi ʻi he veesi ko ʻení ʻi he veesi fakafehoanaki ʻi he tohi ʻa ʻIsaiá ʻi he Paaki ʻa Kingi Sēmisí ʻo e Tohi Tapú. ʻOku mahino mai ʻoku ʻi he ʻū lauʻi peleti palasá ha ngaahi fakamatala ʻoku ʻikai ke ʻi he Tohi Tapú.)

  • ʻOkú ke pehē ʻoku ʻuhinga ki he hā ʻa e ʻi he lotolotonga ʻo e kakai ʻa e ʻEikí?

Kole ki ha kau ako tokolahi ke lau leʻolahi e 2 Nīfai 24:1–7, 24–27, ʻo nau fetongitongi ʻi hono lau ha veesi ʻe taha pe ua. Fakaafeʻi e kalasí ke nau fekumi ki he ngaahi talaʻofa ʻa e ʻEikí ki Hono kakaí. Poupouʻi kinautolu ke fevahevaheʻaki ʻenau ngaahi fakakaukaú. Mahalo te ke fakakaukau ke hiki ʻe ha tokotaha ako e ngaahi fakakaukaú ni ʻi he palakipoé.

  • Ko e hā ʻa e pōpoaki ʻi he ngaahi veesi ko ʻení maʻanautolu ʻoku faingataʻaʻia koeʻuhí ko e faiangahala ʻa e niʻihi kehé?

  • Ko e hā ʻa e fakamoʻoni ʻo e fiefia mo e ʻamanaki lelei ʻokú ke mamata ki ai ʻi he ngaahi veesi ko ʻení?

Fakapapauʻi ʻoku mahino ki he kau akó ʻe ʻaloʻofa ʻa e ʻEikí ki Hono kakaí, ka ʻe fakaʻauha ʻa e kau faiangahalá. Tokoni ki he kau akó ke mahino ʻoku fakahaaʻi ʻe he kikite ʻa ʻIsaia ʻi he 2 Nīfai 21–24 ʻa e taha ʻo e ngaahi tefitoʻi pōpoaki ʻo e Tohi ʻa Molomoná—ʻe tāpuekina ʻa e talangofuá pea ʻe fakaʻauha ʻa e faiangahalá. Fakamoʻoni te tau lava ʻo moʻui ʻi he angatonu pea tuʻumālie ʻi he ʻahó ni ʻi heʻetau hanga atu ki he Nofotuʻí.