Lēsoni 54
Mōsaia 4
Talateú
Naʻe fakatomala ʻa e kakaí mo nau maʻu ha fakamolemole ʻo ʻenau ngaahi angahalá ʻi hono ueʻi kinautolu ʻe he ngaahi akonaki ʻa e Tuʻi ko Penisimaní. Naʻa nau “fonu ʻi he fiefia” mo ha “fiemālie ʻo e konisēnisí” (Mōsaia 4:3). Naʻe hoko atu hono akoʻi kinautolú ʻe he Tuʻi ko Penisimaní, mo tokoni ke mahino kiate kinautolu ʻa e meʻa kuo pau ke nau fai ke “tauhi maʻu ai pē ha fakamolemole ʻo [ʻenau] ngaahi angahalá” (Mōsaia 4:12). Naʻá ne fakafehoanaki kinautolu ki ha kau kolekole, ʻoku fakafalala honau fakamoʻuí ki he ʻOtuá. Naʻe toe fakatokanga foki kiate kinautolu fekauʻaki mo e fakatuʻutāmaki ʻo e taʻe tokanga ki heʻenau ngaahi fakakaukaú, leá, mo ʻenau ngaahi angafaí.
Ngaahi Fokotuʻu ki hono Akoʻí
Mōsaia 4:1–8
Naʻe maʻu ʻe he kakai ʻo e Tuʻi ko Penisimaní ha fakamolemole ʻo ʻenau ngaahi angahalá pea naʻa nau fonu ʻi he fiefia mo e melino
Kole ki he kau akó ke nau fakakaukau loto ki he fehuʻi ko ʻení:
-
Te tau lava fēfē nai ʻo ʻilo kuo fakamolemoleʻi ʻetau ngaahi angahalá?
Lau ʻa e fakamatala ko ʻeni naʻe fai ʻe Palesiteni Hāloti B. Lií:
“Ka hokosia e taimi kuó ke ʻosi fakahoko kotoa ai e meʻa ke fakatomala mei hoʻo ngaahi angahalá, tatau ai pē pe ko hai koe, pe ko e fē ha feituʻu pē ʻokú ke ʻi ai, pea kuó ke ʻosi fai ha ngaahi fakalelei mo ha totongi huhuʻi ki he lelei taha ʻokú ke lavá; kapau ko ha meʻa ia te ne uesia ho tuʻunga ʻi he Siasí pea kuó ke ʻosi ʻalu ki he kau maʻu mafai totonú, te ke fie maʻu leva ʻa e tali fakamahino pe kuo tali ia ʻe he ʻEikí pe ʻikai. Kapau te ke feinga peá ke maʻu ha nonga ʻi ho konisēnisí, te ke lava ʻi he fakaʻilonga ko iá ʻo ilo kuo tali ʻe he ʻEikí hoʻo fakatomalá” (“Stand Ye in Holy Places,” Ensign, July 1973, 122).
Fakamanatu ki he kau akó naʻe vahevahe ʻe he Tuʻi ko Penisimaní ha ngaahi lea ʻa ha ʻāngelo fekauʻaki mo e founga ke maʻu ai ha fakamolemole ʻo e ngahi angahalá. Te ke lava ʻo fakamanatu ange kiate kinautolu ʻa e ngaahi lea pau ʻa e ʻāngeló fekauʻaki mo e tangata fakakakanó ʻi heʻene hoko ko e fili ki he ʻOtuá pea mo e ngaahi nunuʻa ʻoku tuʻunuku mai kiate kinautolu ʻoku mate kae teʻeki fakatomalaʻi ʻenau ngaahi angahalá (vakai, Mōsaia 3:19, 23–27).
Kole ki he kau akó ke nau lau fakalongolongo ʻa e Mōsaia 4:1–2, ʻo kumi ha ngaahi kupuʻi lea ʻoku nau tala ʻa e founga naʻe fai ʻe he kakai ʻo e Tuʻi ko Penisimaní ki he ngaahi lea ʻa e ʻāngeló. ʻAi ha niʻihi ke nau vahevahe ʻa e ngaahi kupuʻi lea ne nau maʻú. Kapau ʻe fie maʻu tokoni ʻa e kau akó ke mahino ʻa e kupuʻi lea “tuʻunga fakakakanó,” fakamatalaʻi ange ko e foʻi lea fakakakanó ko e fehangahangai ia ʻo e fakalaumālié. ʻOku ʻuhinga ia ki heʻetau ngaahi holi fakamāmaní kae ʻikai ko ʻetau ngaahi holi fakalaumālie ke ʻunu ʻo ofi ange ki he ʻEikí. Te ke lava ʻo kole ki he kau akó ke nau lau ʻa e ʻAlamā 41:11 pea nau toki fakamatalaʻi ʻa e kupuʻi lea “tuʻunga fakakakanó” ʻaki e lea ʻanautolu pē. Fakaafeʻi ke nau lau ʻa e Hilamani 12:4–8, ke tokoni ke mahino ki he kau akó ʻa e kupuʻi lea “siʻi hifo ʻi he efu ʻo e kelekelé.” Hili ia peá ke toki kole ange ke nau fakamatala ʻi heʻenau lea ʻanautolu pē ʻa e founga ʻe ui ai ha taha ʻoku ʻikai ke ne tali ke muimui ʻi he faleʻi ʻa e ʻEikí ʻoku siʻi hifo ʻi he efu ʻo e kelekelé. Fakapapauʻi ʻoku mahino kiate kinautolu ʻoku ʻikai lau ʻe he Tamai Hēvaní ʻEne fānaú ʻoku nau siʻi hifo ʻi he efu ʻo e kelekelé.
Fakamahino ange ko e taimi ʻoku ʻilo ai ʻe he kakaí honau tuʻunga angahalaʻiá, ʻoku nau fakatomala, pea fakahaaʻi ʻenau tui kia Sīsū Kalaisi mo ʻEne Fakaleleí. Fakaafeʻi ha tokotaha ako ke ne lau leʻo lahi ʻa e Mōsaia 4:3. Kole ki he kalasí ke nau tokanga makehe ki he founga ne ʻilo ai ʻe he kakaí kuo fakamolemoleʻi ʻenau ngaahi angahalá.
-
Fakatatau mo e Mōsaia 4:3, ko e hā ʻa e ngaahi ongo ʻoku maʻu ʻe kinautolu kuo fakamolemoleʻi ʻe he ʻEikí?
-
Naʻe maʻu ʻe he kakaí ha fakamolemole ʻo ʻenau ngaahi angahalá koeʻuhí ko e “fuʻu tui [lahi] naʻa nau maʻu kia Sīsū Kalaisí.” Ko e hā ʻa e ngaahi meʻa naʻa nau fai naʻá ne fakamahinoʻi ʻenau tuí? (Vakai, Mōsaia 4:1–2.)
-
Fakamatalaʻi ʻi hoʻo lea pē ʻaʻaú, ko e hā te tau lava ʻo ako mei he Mōsaia 4:1–3 fekauʻaki mo hono maʻu ha fakamolemole ʻo ʻetau ngaahi angahalá? (Ko e taha ʻo e ngaahi talí ko e taimi ʻoku tau tui ai kia Sīsū Kalaisi mo fakatomala fakamātoató, ʻoku tau maʻu leva ha fakamolemole ʻo ʻetau ngaahi angahalá. Mahalo te ke fie fakaafeʻi ʻa e kau akó ke nau fakaʻilongaʻi ha ngaahi foʻi lea mahuʻinga pe ngaahi kupuʻi lea ʻi he Mōsaia 4:1–3 ʻoku nau fakamamafaʻi e tefitoʻi moʻoni ko ʻení.)
Lau ʻa e fakamatala ko ʻeni naʻe fai ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻokú ne fakamatalaʻi nounou e meʻa kuo pau ke tau fai ke maʻu ha fakamolemole ʻo ʻetau ngaahi angahalá:
“ʻI he taimi ʻoku tau vete moʻoni ai ʻetau ngaahi angahalá, pea fakafoki ʻa e meʻa te tau lavá kiate ia naʻa tau fakalaveaʻí, pea siʻaki ʻetau ngaahi angahalá ʻaki ʻetau tauhi e ngaahi fekaú, ʻoku tau fou atu ʻi he founga te tau maʻu ai ʻa e fakamolemolé. ʻE ʻalu pē taimí, mo ʻetau ongoʻi ʻa e mole atu ʻo e mafatukituki ʻetau mamahí, pea toʻo atu ʻa e ongoʻi halaiá mei hotau lotó’ (ʻAlamā 24:10) pea ʻomai ʻa e ʻfiemālie ʻo e konisēnisí’ (Mōsaia 4:3).
“Kiate kinautolu ʻoku fakatomala moʻoni ka ʻoku hangē ʻoku teʻeki ke nau ongoʻi tauʻatāiná: mou hokohoko atu hono tauhi e ngaahi fekaú. ʻOku ou palōmesi atu, ʻe hoko mai e tauʻatāiná ʻo fakatatau ki he finangalo ʻo e ʻEikí. ʻOku fie maʻu ʻi he fai fakamoʻuí [ha] taimi” (“Fakatomala … Koeʻuhí Ke u Fakamoʻui ʻa Kimoutolu,” Ensign pe Liahona, Nōvema 2009, 42).
Fakaafeʻi ʻa e kau akó ke nau tohi ʻi heʻenau tohinoa ki he ako folofolá pe pepa akó fekauʻaki mo e meʻa ne nau ako kau ki he fakatomalá ʻi heʻenau aleaʻi ʻa e Mōsaia 4:1–3. Kole ange foki ke nau tohi fekauʻaki mo e founga te nau lava ai ʻo fakaʻaongaʻi ʻenau tui kia Sīsū Kalaisí ʻi heʻenau kumi ha fakamolemole ki heʻenau ngaahi angahalá.
Fakamalaʻi ange naʻe hanga ʻe he Tuʻi ko Penisimaní ʻi he hili ʻene mamata ki he tōʻonga fakakaukau ʻo e fakatomala ʻa e kakaí, ʻo fakamanatu ange ʻa ʻenau fakafalala ki he ʻEikí. Kole ki ha kau ako ke nau taufetongi ʻi hono lau leʻo lahi ʻo e Mōsaia 4:4–8. Kole ki he kalasí ke nau kumi ʻa e ngaahi meʻa naʻe fie maʻu ʻe he Tuʻi ko Penisimaní ke mahino ki hono kakaí ʻi he hili ʻenau maʻu e fakamolemole ʻo ʻenau ngaahi angahalá.
-
Fakatatau mo e ngaahi veesi ko ʻení, ko e hā ʻa e “ngaahi founga ʻoku toki [lava ai ʻo] fakamoʻui [kitautolú]”?
Ka hili e tali ʻa e kau akó ki he fehuʻi ko ʻení, fakaafeʻi ke nau fakamanatu fakalongolongo ʻa e Mōsaia 4:4–8, ʻo kumi ha ngaahi kupuʻi lea ʻoku nau fakamatalaʻi ʻa e kakai ʻoku nau maʻu e fakamoʻuí. Mahalo te ke fie fokotuʻu ange ke nau fakaʻilongaʻi ʻa e ngaahi kupuʻi lea ko ʻení. Fakakaukau ke fai ange ngaahi fehuʻi ko ʻení:
-
ʻOkú ke pehē ʻoku ʻuhinga ki he hā ʻa e “faivelenga ʻi hono tauhi e ngaahi fekau [ʻa e ʻEikí]”?
-
Ko e hā ha ngaahi tōʻonga ʻoku nau fakafōtunga kuo “falala [ha taha] ki he ʻEikí”?
-
Ko e hā ha ngaahi founga kuó ke mamata ai ki he “angalelei ʻa e ʻOtuá” mo Hono “mafimafi taʻe hano tataú”?
Fakamahino ange ʻoku fie maʻu ʻe he fakatomalá mo e talangofuá ha ngāue lahi ange ʻi heʻetau tafaʻakí. Neongo pe ko e hā ha lahi ʻo ʻetau ngāué, ka he ʻikai ke tau lava ʻo maʻu ha fakamolemole ʻo ʻetau ngaahi angahalá pea mo e meʻaʻofa ʻo e fakamoʻuí taʻe kau ai e Fakalelei ʻa Sīsū Kalaisí.
Mōsaia 4:9–30
Ko hono akoʻi ʻe he Tuʻi ko Penisimaní ʻa e founga ke kei maʻu ai pē ha fakamolemole ʻo e ngaahi angahalá
Tohiʻi ʻa e kei maʻu ai pē ha fakamolemole ʻo ʻetau ngaahi angahalá ʻi he palakipoé. Fakahoko ange ki he kau akó, ʻi he hili ko ia hono maʻu ʻe he kakaí e fakamolemole ki heʻenau ngaahi angahalá, ne akoʻi kinautolu ʻe he Tuʻi ko Penisimaní he founga ke nau pukepuke, pe tauhi ai, ʻa e tuʻunga maʻa mo haohaoa ko iá.
-
Ko e hā ʻoku toe mahuʻinga ai ʻeni ke tau ʻiló?
Fakaafeʻi ʻa e kau akó ke nau fakatotolo fakalongolongo ʻi he Mōsaia 4:9–11, ʻo kumi ʻa e meʻa kuo pau ke tau fai ke kei maʻu ai pē ha fakamolemole ʻo ʻetau ngaahi angahalá. Ka ʻosi ha taimi feʻunga, pea ʻai ʻa e kau akó ke nau vahevahe ʻa e meʻa kuo nau maʻú. Fakakaukau ke hiki ʻenau ngaahi talí ʻi he palakipoé. ʻE ala kau ʻi he ngaahi talí ʻa e fie maʻu ke tau manatuʻi e māfimafi ʻo e ʻOtuá, fakavaivaiʻi ʻa kitautolu, lotu fakaʻaho, pea mo tuʻu maʻu ʻi he tuí.
Fakakaukau ke fai ange e ngaahi fehuʻi ko ʻení ke tokoni ki he kau akó ʻi hono fakalahi ʻo ʻenau mahinó pea mo fakaʻaongaʻi ʻa e meʻa kuo nau laú:
-
Naʻe akoʻi ʻe he Tuʻi ko Penisimaní kuo pau ke tau “tui ki he ʻOtuá” (Mōsaia 4:9). Naʻe toe lea foki fekauʻaki mo hono ʻahiʻahiʻi e ʻofa ʻa e ʻOtuá mo manatuʻi maʻu pē “māfimafi ʻo e ʻOtuá” (Mōsaia 4:11). Ko e hā ha ngaahi aʻusia kuó ne tokoniʻi koe ke ke ʻiloʻi ʻoku moʻoni mo māfimafi ʻa e ʻOtuá pea ʻoku ʻofa kiate koe?
-
ʻOku tokoniʻi fēfē ʻe he manatu ki he mālohi, lelei, angalelei mo e ʻofa ʻa e ʻOtuá, ʻa ʻetau loto fiemālie ke talangofua kiate Iá?
Lau leʻo lahi ʻa e Mōsaia 4:12 ki he kau akó. Kole ange ke nau feingta ke ʻiloʻi ʻi he veesi ko ʻení ʻa e ngaahi tāpuaki ʻoku maʻu ʻe kinautolu ʻoku nau fai e meʻa ʻoku akoʻi ʻi he Mōsaia 4:5–11.
Fakamatalaʻi ange ʻoku ʻi he Mōsaia 4:13–16 hono fakamatalaʻi ʻe he Tuʻi ko Penisimaní ʻa e kakai ʻoku nau maʻu maʻu pē ha fakamolemole ʻo ʻenau ngaahi angahalá. Vahevahe ʻa e kalasí ki ha kulupu ʻe tolu. Kole ki he kulupu ʻuluakí ke nau fakatotolo ʻi he Mōsaia 4:13, kulupu uá ke nau fakatotolo ʻi he Mōsaia 4:14–15, pea kulupu tolú ke nau fakatotolo ʻi he Mōsaia 4:16. ʻAi ke takitaha lau ʻe he kau akó kotoa ʻa e veesi naʻe vahe angé pe lau fakatāutaha ʻa e ngaahi vēsí pea feinga ke ʻiloʻi ʻa e faʻahinga tōʻonga fakakaukau mo e ngaahi ʻulungaanga naʻe fakamatalaʻi ʻe he Tuʻi ko Penisimaní ʻoku ʻiate kinautolu ʻoku feinga ke maʻu maʻu ai pē ha fakamolemole ʻo ʻenau ngaahi angahalá.
Ka hili ha taimi feʻunga, fakaafeʻi ʻa e kau akó ke nau lipooti e meʻa ne nau maʻú. ʻI heʻenau fai iá, fakamamafaʻi ange ʻa e foʻi moʻoni ko ia kapau te tau fakavaivaiʻi kitautolu ʻi he ʻao ʻo e ʻOtuá mo feinga ke fakatupulaki e ngaahi ʻulungaanga faka-Kalaisí, te tau lava ʻo maʻu maʻu ai pē ha fakamolemole ʻo ʻetau ngaahi angahalá. Tokoni ki he kau akó ke nau fakaʻaongaʻi ʻa e meʻa ʻoku nau akó ʻaki haʻo fai ange ha taha pe fakatouʻosi e ongo fehuʻi ko ʻení ʻi he taimi ʻoku ʻasi hake ai ha tōʻonga fakakaukau pe ʻulungaanga leleí:
-
ʻOkú ke pehē ko e hā ʻoku ʻaonga ai ʻa e tōʻonga fakakaukau (pe ʻulungaanga lelei) ko ʻení ʻi hono pukepuke maʻu ai pē ha fakamolemole ʻo ʻetau ngaahi angahalá?
-
Ko e fē ha taimi naʻá ke mamata ai ʻi ha sīpinga ʻo e tōʻonga fakakaukau (pe ʻulungaanga lelei) ko ʻení?
Naʻe fakaʻaongaʻi ʻe he Tuʻi ko Penisimaní ha talafakatātā mahino ʻe lava ke ne tokoniʻi ʻa e kau akó ke nau fakahoungaʻi ʻa e ngaahi tāpuaki kuo nau maʻu mei he ʻEikí pea mo fakaʻaiʻai kinautolu ke nau fakatupulaki ʻa e ngaahi ʻulungaanga lelei ne nau ako ʻi he Mōsaia 4:13–16. Kole ki he kau akó ke nau lau fakalongolongo ʻa e Mōsaia 4:16–23.
-
Fakatatau mo e Tuʻi ko Penisimaní, ʻoku tau hoko fēfē kotoa ko ha kau paea [kolekole]?
-
ʻE tokoni fēfē ʻa e mahino ko ʻení ke tau ʻofa lahi ange ai ki he kakai kehé?
-
Ko e hā ha faleʻi ʻoku fai ʻe he Tuʻi ko Penisimaní kiate kinautolu ʻoku ʻikai ke nau lava ʻo foaki ki he kau paeá, pe ko kinautolu ʻoku siʻi haʻanau meʻa ke foakí ʻi he Mōsaia 4:24–26?
-
ʻI he Siasí he ʻahó ni, ʻokuu tokoni fēfē he ʻahó ni ʻa e foaki ʻaukaí kiate kitautolu ke tau muimui ai ʻi he faleʻi he Mōsaia 4:26? ʻE lava fēfē ke kau ʻa e toʻu tupú ʻi he foaki ʻaukaí? (ʻE ala kau ʻi he ngaahi talí ʻa ʻenau lava ke aʻukaí, lava ha niʻihi ke tokoni he paʻanga ʻaukaí, pea ʻoku tānaki ʻe he kau maʻu Lakanga Taulaʻeiki Faka-ʻĒloné ʻi ha ngaahi feituʻu ʻe niʻihi ʻo e māmaní ʻa e ngaahi foaki ʻaukaí mei he kāingalotu ʻo e uōtí pe koló.)
Fakamahino ange ʻe faʻa faingataʻa he taimi ʻe niʻihi ke palanisi ʻa ʻetau moʻuí ʻi he ngaahi meʻa lelei kotoa kuo kole mai ke tau faí. ʻAi ke lau leʻo lahi ʻe ha tokotaha ako ʻa e Mōsaia 4:27.
-
ʻOkú ke pehē ʻoku ʻuhinga ki he hā ke fai ʻa e meʻa kotoa pē ʻi he “fakapotopoto mo e māú”?
-
ʻE tokoni fēfē atu nai ʻa e faleʻi ko ʻení?
Fakaafeʻi ha tokotaha ako ke ne lau leʻo lahi ʻa e Mōsaia 4:29–30. Fakamahino ange ko e Mōsaia 4:30 ko ha potufolofola fakataukei folofolá. Te ke lava ʻo poupouʻi ʻa e kau akó ke nau fakaʻilongaʻi ʻa e fakamatala ko ʻení ʻi ha founga makehe koeʻuhí ke nau lava ʻo maʻu ngofua ia.
-
Ko e hā ʻa e fekauʻaki ʻa ʻetau ngaahi fakakaukaú, leá, mo ʻetau ngaahi ngāué? Ko e hā te tau lava ʻo fai ke tokangaʻi ai kitautolu? Ko e hā ha ngaahi founga te tau lava ai ʻo fetokoniʻaki?
Fakakaukau ke tukuange ki he kau akó ha ngaahi miniti siʻi ke nau tohi ai ʻi heʻenau tohinoa ki he ako folofolá fekauʻaki mo e founga ʻe tokoni ange ai ʻa e ngaahi tefitoʻi moʻoni he Mōsaia 4:9–30 ʻi heʻenau feinga ke tauhi maʻu ha fakamolemole ʻo ʻenau ngaahi angahalá. Fakamoʻoni ki he ʻofa ʻa e ʻEikí kiate kinautolu takitaha pea mo ʻEne finangalo ke nau fakatomala mo tauhi maʻu ha fakamolemole ʻo ʻenau ngaahi angahalá.
Fakataukei folofola—Mōsaia 4:30
Lau ʻa e fakamatala ko ʻeni naʻe fai ʻe Palesiteni ʻĒsela Tafu Penisoní ke tokoni ke ʻilo ʻe he kau akó ʻa e fekauʻaki ʻa e ngaahi fakakaukaú, leá, pea mo e ngaahi ngāué ʻa ia ʻoku fakamatalaʻi he Mōsaia 4:30:
“Fakakaukau maʻa. ʻOku ʻikai fakahoko ʻe kinautolu ʻoku nau fakakaukau maʻá ha ngaahi toʻonga ʻuli. ʻOku ʻikai ngata pē ʻi hoʻo haʻisia ʻi he ʻao ʻo e ʻOtuá ki hoʻo ngaahi tōʻongá ka ki hoʻo mapuleʻi hoʻo ngaahi fakakaukaú. Ko ia, moʻui ke ʻoua naʻá ke momou ʻo mā kapau ʻe huluʻi hoʻo ngaahi fakakaukaú mo hoʻo ngaahi tōʻongá ʻi ha lā ʻi homou falelotú. ʻOku kei moʻoni pē lea motuʻa ko ia, ʻokú ke tūtuuʻi ʻa e ngaahi fakakaukau pea utu ʻa e ngaahi tōʻonga, ʻokú ke tūtuuʻi ʻa e ngaaahi tōʻonga peá ke utu ʻa e ʻulungaanga, ʻokú ke tūtuuʻi ʻa e ʻulungaanga, pea ʻokú ke utu ʻa e natula, pea ʻoku puleʻi ʻe ho natulá ho ikuʻanga taʻengatá. ‘Ko e fakakaukau ʻa ha tangata ko ia ai pē ia’” (ʻi he Conference Report, Oct. 1964, 60; toʻo mei he Lea Fakatātā 23:7).
Fakamatalaʻi ange he ʻikai ke lava ʻa e māmá mo e fakapoʻulí ke nofoʻia ha feituʻu tatau ʻi ha taimi tatau. ʻOku tekeʻi ʻe he māmá ʻa e fakapoʻulí. Hangē ko ʻení, ʻoku fakaafeʻi ʻe he ngaahi fasi ʻoku tāú, ngaahi ʻata ʻoku langaki moʻuí, ngaahi ʻekitivitī leleí, mo e ngaahi fakakaukau mo e ngaahi lea maʻá ʻa e Laumālié ki heʻetau moʻuí kae tekeʻi atu ʻa e ngaahi fakakaukau taʻe-feʻungá mei hotau ʻatamaí. Tokoni ke mahino ki he kau akó te nau lava ʻo fakafepakiʻi ʻa e fakapoʻulí ʻaki haʻanau fakafonu ʻenau moʻuí ʻaki e māmá.
-
Ko e hā te tau lava ʻo fai ke tauhi ke maʻa ʻetau ngaahi fakakaukaú, ngaahi leá, pea mo ʻetau ngaahi ngāué?
Poupouʻi ʻa e kau akó ke nau fokotuʻu ha ngaahi palani pau ke fakafonu ʻenau moʻuí ʻaki e māmá. Mahalo te ke fie tuku ange ke hiki ʻenau ngaahi palaní ʻi heʻenau tohinoa ki he ako folofolá.