Ngaahi Fokotuʻu ki he Ngaahi ʻAho Feliliuakí

Ko e fakahinohino ki he vave hono akoʻi ʻe he kau faiako fakaʻahó ʻoku makatuʻunga ʻi he uike ʻe 36 pē ʻaho ako ʻe 180 ʻi he taʻu. ʻOku ʻoatu ʻe he tohi lēsoni ko ʻení ha ngaahi lēsoni fakaʻaho ʻe 160, ʻo ʻatā ai ha ʻaho ʻe 20 ʻoku ʻikai ʻoatu ha nāunau fakalēsoni ki ai. ʻOku totonu ke fakaʻaongaʻi fakapotopoto e ʻaho “feliliuakí” ko ʻeni ʻe 20 ki ha ngaahi taumuʻa mo ha ʻekitivitī mahuʻinga, kau ai ʻa e ngaahi meʻa ko ʻení:

1. Ko Hono liliu ʻo e ngaahi lēsoni fakaʻahó. Mahalo naʻa fie maʻu ke ke tuku ha taimi lahi ange ʻi ha lēsoni ʻe fie maʻu ha taimi lahi ke akoʻi ai. Mahalo naʻa fie maʻu ke ke fakaʻaongaʻi e ngaahi fakakaukau tokoni fakafaiako ʻoku ʻasi ʻi he fakaʻosinga ʻo ha ngaahi lesoni ʻe niʻihi pē tuku taimi ke tali ʻa e ngaahi fehuʻi ʻa e kau akó fekauʻaki mo ha ngaahi veesi folofola pē kaveinga ʻo e ongoongoleleí. Te ke lava leva ʻi he ngaahi ʻaho feliliuakí ke ke fakaʻaongaʻi e ngaahi faingamālie ko iá kae kei tauhi pē ʻa e taimitēpile ʻo e vave hono akoʻí pea fakahoko ʻi he ngaahi ʻaho feliliuakí ʻa e ngaahi faingamālie ko ʻení ke fakahoko ʻa e fekau kuo fai kiate koe ke akoʻi hokohoko ʻa e folofolá.

2. Taukei ʻi he ngaahi potufolofola mahuʻinga mo e Ngaahi Tefitoʻi Tokāteliné. Mahalo naʻa fie maʻu ke ke fakaʻaongaʻi ʻa e ngaahi ʻekitivitī fakamanatu ki he ngaahi veesi fakataukei folofola ʻoku ʻi he tohi lēsoní mo e fakamatala fakalahi ki he tohí. Te ke lava ʻo faʻu mo ha toe ngaahi ʻekitivitī fakamanatu ʻo e fakataukei folofolá ʻoku feʻunga mo e fie maʻu pau mo e meʻa ʻoku saiʻia ai ʻa e kau ako ʻi hoʻo kalasí. Te ke toe lava foki ʻo fakaʻaongaʻi ha konga ʻo e ʻaho feliliuakí ki ha ngaahi ʻekitivitī ʻe tokoni ki he kau akó ke fakamanatu pea fakaloloto ʻenau mahino ki he Ngaahi Tefitoʻi Tokāteliné.ʻI he kamata ʻo e taʻú, te ke lava ʻo fakaʻaongaʻi ha ʻaho feliliuaki ke fakahoko hano Vakaiʻi ʻa e Ngaahi Tefitoʻi Tokāteliné (VNTT) ʻa ia kuo ʻosi faʻu ke tokoni ki he kau faiakó ke vakaiʻi ʻa e tuʻunga ʻo e mahino, tui, ʻiloʻi hono fakaʻaongaʻí, pea lava ke fakamatalaʻi ʻa e ngaahi tefitoʻi tokāteline ʻa e Siasí. Ke kumi ʻa e Vakaiʻi ʻo e Ngaahi Tefitoʻi Tokāteliné mo ha toe sivi ʻi he uepisaiti ʻa e S&I (si.lds.org), kumi ʻaki e foʻi lea mahuʻinga ko e assessment. ʻOku tokoni e līpooti VNTT ki he kau faiako kuo nau fai e siví ke vakaiʻi fakaʻauliliki e fie maʻu ʻa e kau akó pea liliu e akoʻí ke feau lelei ange e ngaahi fie maʻu ko iá.

3. Fakamanatu ʻa e ngaahi nāunau ki muʻá. ʻE tokoni ke toutou vakaiʻi ʻe he kau akó ʻa e ngaahi meʻa kuo nau ako ʻi he ngaahi lēsoni kimuʻá pē mei ha tohi folofola pau. Te ke lava ʻo ʻoange ki he kau akó ha faingamālie ke fakamatalaʻi ha foʻi moʻoni mei ha lēsoni kimuʻa mo vahevahe ʻa e founga kuo tākiekina ai ʻenau moʻuí ʻe he foʻi moʻoni ko iá. Te ke lava ʻo faʻu pē fakahoko ha sivi pē ʻekitivitī fakaako ʻe famanatau ai ʻa e nāunau ki muʻá.

4. Fakaʻatā ki ha mālōlō ne fakataimitēpileʻi. ʻE lava ke hanga ʻe he ngaahi ʻekitivitī fakaakó pe fakatahá, meʻa fakakoló, ʻeá, mo ha ngaahi taimi mālōlō kehe ʻo kaniseli pē fakanounou ʻa e taimi kalasí he taimi ʻe niʻihi. ʻE lava ke fakaʻaongaʻi e ngaahi ʻaho feliliuakí ki he ngaahi mālōlō peheé.