Lēsoni 86

ʻAlamā 25–26

Talateú

Hili hono fakaʻauha e kolo ko ʻAmonaihaá, naʻe lahi e ngaahi tau ʻa e kau Leimaná mo e kau Nīfaí pea naʻe tuli ai kinautolu. ʻI he faingataʻaʻia ʻa e kau Leimaná ʻi he lahi e mole honau kakaí, naʻa nau tuku hifo ʻenau ngaahi mahafu taú, fakatomala, pea kau fakataha mo e kau ʻAnitai-Nīfai-Līhaí. ʻI he fakaʻosi ʻe he ngaahi foha ʻo Mōsaiá mo honau kāingá ʻenau ngāue fakafaifekau taʻu ʻe 14 ʻi he lotolotonga ʻo e kau Leimaná, naʻe fakafetaʻi ʻa ʻĀmoni ki he ʻEikí mo fakahaaʻi ʻene houngaʻia koeʻuhí ko e tāpuaki ʻo ʻenau hoko ko e ngaahi meʻangāue ʻi he toʻukupu ʻo e ʻOtuá ke ʻomai ʻa e ongoongoleleí ki he kau Leimaná.

Ngaahi Fokotuʻu ki hono Akoʻí

ʻAlamā 25:1–12

ʻOku fakahoko e ngaahi kikite ʻa ʻApinetai mo ʻAlamaá

Kimuʻa ke kamata e kalasí, hiki ʻa e saati ko ʻení he palakipoé:

Kikité	Ko hono Fakahoko ʻo e Kikité
ʻAlamā 9:12. Ko e hā naʻe kikiteʻi ʻe ʻAlamā ki he kakai ʻo ʻAmonaihaá?	ʻAlamā 25:1–2 (vakai foki, ʻAlamā 16:2–3, 9–11)
Mōsaia 17:14–19. Ko e hā ne kikiteʻi ʻe ʻApinetai ʻe hoko ki he hako ʻo e Tuʻi ko Noá mo ʻene kau taulaʻeikí?	ʻAlamā 25:4–9

Tohiʻi e foʻi lea ko e falala he palakipoé. Kole ki he kau akó ke nau fakahingoa ha kakai ʻe niʻihi ʻoku tau faʻa falala ki ai. (ʻOku kau he ngaahi tali leleí ʻa e ʻEikí, kau palōfitá, mātuʻá, kau faiakó, mo e kau faiako sīpotí.) Fehuʻi ki he kau akó:

• Ko e hā ʻoku faingofua ange ai ke falala ki ha niʻihi fakafoʻituitui kae ʻikai ki ha niʻihi kehe?

• Ko hai ʻoku faingofua taha kiate koe ke ke falala ki aí ʻi he kakai kotoa ʻo e māmaní he ʻaho ní?

Talaange ki he kau akó ʻoku ʻi he ʻAlamā 25 ha fakamoʻoni ʻe fakahoko maʻu pē ʻa e folofola ʻa e ʻEikí ki Heʻene kau palōfitá. Fakamatalaʻi ange ʻe fakaʻaongaʻi ʻe he kau akó ʻa e saati he palakipoé ke nau ako e kikite ʻe ua ʻa e kau palōfita ʻo e Tohi ʻa Molomoná pea mo hono fakahoko ʻo e ngaahi kikite ko iá. Kole ki he kau akó ke nau hiki ʻa e sātí ʻi heʻenau pepa akó pe tohinoa ako folofolá. ʻI he kōlomu ʻuluakí, ʻai ke nau hiki e tali ki he ngaahi fehuʻí, ʻo fakaʻaongaʻi ʻa e ngaahi maʻuʻanga tokoni fakafolofola kuo ʻoangé. ʻI he kōlomu hono uá, ʻai ke nau tohi ʻo kau ki hono fakahoko ʻo e ngaahi kikité. Fakaafeʻi e kau akó ke nau lipooti e meʻa ʻoku nau ʻiló.

Fakaafeʻi ha tokotaha ako ke ne lau leʻolahi ʻa e ʻAlamā 25:11–12. Kole ki he toenga ʻo e kalasí ke nau muimuiʻi lolotonga hono laú, ʻo kumi e meʻa naʻe pehē ʻe Molomona naʻe hoko ʻi he ngaahi lea ʻa ʻApinetaí. Mahalo te ke fie maʻu ke fakaʻilongaʻi ʻe he kau akó ʻa e kupuʻi lea “naʻe fakamoʻoniʻi ʻa e ngaahi lea ko iá” ʻi he veesi 12.

• ʻOku ʻuhinga ki he hā ʻa e kupuʻi lea “naʻe fakamoʻoniʻi ʻa e ngaahi lea ko iá?

Mahalo te ke fie maʻu ke fokotuʻu ange ki he kau akó ke nau hiki ʻa e T&F 1:38 ʻi heʻenau folofolá ofi ki he ʻAlamā 25:12. Fakaafeʻi ha tokotaha ako ke ne lau leʻolahi ʻa e Tokāteline mo e Ngaahi Fuakava 1:38. Kole ki he kalasí ke nau muimuiʻi lolotonga hono laú, ʻo kumi ha kupuʻi lea ʻoku tatau mo e kupuʻi lea “naʻe fakamoʻoniʻi ʻa e ngaahi lea ko iá.” (“ʻE fakahoko kotoa.”)

• Ko e hā ʻoku tau ako mei he ʻAlamā 25:1–12 kau ki he ngaahi kikite mo e ngaahi talaʻofa ʻa e kau palōfitá? (Hiki ʻa e moʻoni ko ʻení he palakipoé: ʻE fakahoko kotoa ʻa e ngaahi lea fakalaumālie ʻa e kau palōfitá.)

Fakamahinoʻi ange ʻoku fakahaaʻi ʻe he ngaahi sīpinga ʻi he sātí, ʻe fakahoko kotoa ʻa e ngaahi meʻa ne fakatokanga ki ai ʻa e kau palōfitá, ki he kau angahalá. ʻOku vahevahe foki ʻe he kau palōfitá ʻa e ngaahi talaʻofá kiate kinautolu ʻe tafoki ki he ʻEikí. ʻE fakahoko kotoa foki e ngaahi talaʻofa ko ʻení. Ke tokoniʻi e kau akó ke nau ʻilo hono fakaʻaongaʻi ʻo e tefitoʻi moʻoni ko ʻení ʻi heʻenau moʻuí, lau ʻa e lea ko ʻeni ʻa e Kau Palesitenisī ʻUluakí mei he Ki Hono Fakamālohia ʻo e Toʻu Tupú. Kole ki he kau akó ke nau fakafanongo ki he ngaahi talaʻofa maʻanautolu ʻoku nau tauhi ʻa e ngaahi tuʻunga moʻui ʻoku ʻi heʻenau kiʻi tohitufá.

“ʻE tokoniʻi kimoutolu ʻe he ngaahi tuʻunga moʻui ʻi he kiʻi tohitufá ni ʻi he ngaahi fili ko ia ʻoku mou lolotonga fai he taimi ní pea mo ia te mou fakahoko he kahaʻú. ʻOku mau palōmesi atu ka mou tauhi e ngaahi fuakava kuo mou fakahokó pea mo e ngaahi tuʻunga moʻuí ni, ʻe tāpuakiʻi kimoutolu ʻaki e takaua ʻo e Laumālie Māʻoniʻoní, ʻe tupu mālohi ange hoʻomou tuí mo e fakamoʻoní, pea ʻe tupulaki ʻa hoʻomou fiefiá” (Ki Hono Fakamālohia ʻo e Toʻu Tupú [kiʻi tohitufa, 2011], ii).

• Ko e hā e palōmesi ʻa e Kau Palesitenisī ʻUluakí?

• Ko e fē e taimi kuó ke mamata kuo fakahoko ai e ngaahi palōmesi ko ʻení?

ʻAlamā 25:13–17

ʻOku fakatomala ʻa e kau Leimana tokolahi mo nau kau fakataha mo e kau ʻAnitai-Nīfai-Līhaí

Kole ki ha tokotaha ako ke ne lau leʻolahi ʻa e ʻAlamā 25:13–14. Kole ki he kalasí ke nau muimuiʻi lolotonga hono laú, ʻo kumi e meʻa naʻe fai ʻe he kau Leimana tokolahi hili ʻenau fakatokangaʻi he ʻikai ke nau lava ʻo ikunaʻi e kau Nīfaí.

• Ko e hā e meʻa ʻokú ke saiʻia ai he ngaahi tōʻonga ʻa e kau Leimaná?

ʻAi ke lau fakalongolongo ʻe he kau akó ʻa e ʻAlamā 25:17, ʻo kumi e ngaahi ongo naʻe maʻu ʻe he ngaahi foha ʻo Mōsaiá kau ki he ola lelei ʻenau ngāue ki he kau Leimaná.

• Naʻe hoko fēfē e ola lelei ʻo e ngāue ʻa e ngaahi foha ʻo Mōsaiá ko ha sīpinga ʻo hono fakamoʻoniʻi e folofola ʻa e ʻEikí? (Kapau ʻoku fie maʻu tokoni e kau akó ki hono tali ʻo e fehuʻi ko ʻení, ʻai ke nau sio ki he Mōsaia 28:5–7 mo e ʻAlamā 17:11.)

ʻAlamā 26

ʻOku fiefia ʻa ʻĀmoni ʻi he ngaahi ʻaloʻofa ʻa e ʻEikí kiate ia mo hono kāingá pea pehē ki he kau Leimaná

Fakaʻaliʻali ha ngaahi meʻangāue ʻe niʻihi (hangē ko ha hāmala, meʻa fakamaʻu sikalu, sipana, peni pe penivahevahe, polosi vali, helekosi, komipiuta, mo ha meʻalea). Fakamatalaʻi ange ko e foʻi lea ʻe taha ki he meʻangāué ko e nāunau.

• Ko e hā ha ngaahi meʻa ʻe niʻihi ʻe lava ke fai ʻe ha tangata tufunga pe tangata tā valivlai taukei ʻaki ʻa e meʻangāue totonú?

• ʻOkú ke pehē ko e hā e ʻuhinga ke hoko ha taha ko ha meʻangāue ʻi he toʻukupu ʻo e ʻEikí?

Fakaafeʻi ha niʻihi tokosiʻi ʻo e kau akó ke nau taufetongi hono lau leʻolahi ʻa e ʻAlamā 26:1–5, 12. Kole ki he kalasí ke nau feinga ke ʻilo ʻa e ngaahi founga ne hoko ai ʻa ʻĀmoni mo ʻene kaungā ngāue fakafaifekaú ko ha meʻangāue ʻi he toʻukupu ʻo e ʻOtuá.

• Ko e hā naʻe ikunaʻi ʻe he ʻEikí ʻo fakafou ʻia ʻĀmoni mo ʻene kaungā ngāue fakafaifekaú?

• ʻE anga fēfē haʻo toe fakalea ʻa e ʻAlamā 26:12? ʻOku fakafekauʻaki fēfē ʻe ʻĀmoni ʻa e lea ʻi he veesi ko ʻení mo e hoko ko ha meʻangāue ʻi he toʻukupu ʻo e ʻEikí?

Fakaafeʻi e kau akó ke nau lau fakalongolongo ʻa e ʻAlamā 26:11, 13, 16, ʻo kumi e tuʻo lahi ʻo e ʻasi ʻa e ongo foʻi lea ko e fiefia (joy) mo e fiefia (rejoice). Mahalo te ke fie maʻu ke fokotuʻu ange ke fakaʻilongaʻi ʻe he kau akó ʻa e ongo foʻi leá ni ʻi heʻenau folofolá. Fakaafeʻi ha tokotaha ako ke ne lau leʻolahi ʻa e ʻAlamā 26:13–16, pea kole ki he kalasí ke nau kumi e ngaahi ʻuhinga naʻe ʻai ʻe ʻĀmoni ki heʻene fiefiá.

• Ko e hā naʻe fiefia ai ʻa ʻĀmoní?

• Ko e hā e ngaahi tefitoʻi moʻoni ʻoku lava ke tau ako mei he ngaahi vēsí ni? (Mahalo ʻe talamai ʻe he kau akó ha ngaahi tefitoʻi moʻoni kehekehe. Mahalo ʻe hoko ʻa e tefitoʻi moʻoni ko ʻení ko ha fakamatala fakanounou ia ʻo ʻenau ngaahi fakamatalá: ʻOku tau aʻusia e fiefiá ʻi heʻetau ngāue faivelenga ki he ʻEikí mo ʻEne fānaú. Mahalo te ke fie maʻu ke hiki e tefitoʻi moʻoni ko ʻení he palakipoé.)

• ʻOkú ke pehē ko e hā ʻoku tau aʻusia ai ʻa e fiefiá he taimi ʻoku tau ʻi he ngāue ai ʻa e ʻEikí?

Hiki ʻa e ngaahi maʻuʻanga tokoni fakafolofola mo e ngaahi fehuʻi ko ʻení ʻi he palakipoé. (Fakakaukau ke hiki kinautolu kimuʻa he kamata e kalasí.) Vahe e kau akó ke nau tauhoa. Kole ki he hoa takitaha ke nau fili mo lau ha taha ʻo e ngaahi potufolofolá pea aleaʻi e ngaahi tali ki he fehuʻi ʻoku ʻomai fakataha mo iá.

ʻAlamā 26:17–20. Ko e faʻahinga kakai fēfē nai ʻa ʻĀmoni mo hono ngaahi tokouá kimuʻa pea nau toki uluí?

ʻAlamā 26:23–25. Fakatatau ki he meʻa naʻe tala ʻe he kau Nīfaí kia ʻĀmoni mo hono kāingá, naʻe anga fēfē e kau Leimaná kimuʻa pea nau toki uluí?

ʻOange ha taimi ki ha kau ako tokosiʻi ʻe niʻihi ke nau fakamatalaʻi ʻenau ngaahi tali ki he fehuʻi ko ʻení. Fakaafeʻi e kau akó ke nau lau fakalongolongo ʻa e ʻAlamā 26:23–29, pea ʻai ke ʻilo ʻa e ngaahi faingataʻa naʻe fehangahangai mo ʻĀmoni mo hono ngaahi tokouá ʻi heʻenau ngāue ki he ʻEikí mo e kau Leimana.

• ʻOkú ke pehē ko e fē ʻi he ngaahi faingataʻa ko ʻení ʻe ala fehangahangai mo e kau faifekaú he ʻaho ní?

• Fakatatau ki he ʻAlamā 26:27, 30, ko e hā e meʻa naʻá ne fakaʻaiʻai ʻa ʻĀmoni mo hono kaungāfaifekaú ke hokohoko atu ʻenau ngāué? (Ko e fakafiemālie mo e ngaahi talaʻofa mei he ʻEikí ke “tau lava nai ʻo hoko ko ha founga ke fakahaofi ai ha laumālie.”)

Kole ki he kau akó ke nau lau fakalongolongo ʻa e ʻAlamā 26:31–34, ʻo kumi e ngaahi ola ʻe niʻihi ʻo e ngaahi ngāue ʻa e ngaahi foha ʻo Mōsaiá. Hili ʻenau maʻu ha taimi feʻunga ke lau iá, kole ange ke nau vahevahe e meʻa kuo nau ʻiló.

Fakaafeʻi ha tokotaha ako ke ne lau leʻolahi ʻa e ʻAlamā 26:35–37. Kole ki he kalasí ke nau muimuiʻi hono laú, ʻo fakalaulauloto ki he ngaahi ʻuhinga ʻoku nau maʻu ke fiefia ai ʻi he ngaahi lelei ʻa e ʻOtuá.

• Ko e hā e ngaahi pōpoaki ʻokú ke ʻilo ʻi he ngaahi vēsí ni?

Fakamahinoʻi ange ko e taha ʻo e ngaahi pōpoaki lahi ʻi he ngaahi vēsí ni ʻoku pehē ʻoku manavaʻofa ʻa e ʻEikí kiate kinautolu kotoa ʻoku fakatomala mo tui ki Hono huafá. Ke tokoniʻi e kau akó ke nau ongoʻi e moʻoni mo e mahuʻinga ʻo e tefitoʻi moʻoni ko ʻení, lau ʻa e lea ko ʻeni ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Ko e ngaahi tohi ʻoku haʻu meiate kinautolu kuo nau fakahoko ha ngaahi fehalaaki fakamamahí. ʻOku nau fehuʻi mai, ʻʻE lava nai ke fakamolemoleʻi au?’

Ko e talí ko e ʻio!

“ʻOku akoʻi kitautolu ʻe he ongoongoleleí ʻoku lava ke tau maʻu ʻa e fiemālie mei hono fakamamahiʻí mo e ongoʻi halaiá ʻi he fakatomalá. Tuku kehe ʻa kinautolu ʻoku vaivai ki he fakamalaʻiá hili ʻenau ʻilo hono kakató, ʻoku ʻikai ha ʻulungaanga, ʻikai ha maʻunimā, ʻikai ha angatuʻu, ʻikai ha faiangahala, ʻikai ha faihia ʻe fakaʻatā mei he talaʻofa ʻo e fakamolemole kakató” (“The Brilliant Morning of Forgiveness,” Ensign, Nov. 1995, 19).

Fai ha fakamoʻoni ki he mālohi ʻo e Fakaleleí ke fakaʻatā hono fakamolemoleʻi ʻo e ngaahi angahalá, lahi pe siʻisiʻi, maʻanautolu ʻoku tui kia Sīsū Kalaisí mo fakatomalá. Fai foki ha fakamoʻoni ki he fiefia ʻoku hoko mai ki heʻetau moʻuí he taimi ʻoku tau hoko ai ko e ngaahi meʻangāue ʻi he toʻukupu ʻo e ʻEikí.

Fakakaukau Tokoni Fakafaiako

ʻAlamā 26:1–37. “ʻUhinga ke tau fiefia”

Ke tokoniʻi e kau akó ke mahino kiate kinautolu ʻa e fiefia ʻoku hoko mai mei he fakatomalá mo e fakamolemolé, lau ʻa e talanoa ko ʻeni naʻe fai ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻI ʻEpeleli ʻo e 1847, naʻe taki ʻe Pilikihami ʻIongi ʻa e ʻuluaki konga ʻo e kau paioniá mei Uinitā Kuatasi. ʻI he taimi tatau, naʻe ngaʻunu māmālie atu e faʻahinga naʻe hao moʻui ʻi he Kulupu Touná (Donner Party) kuo fuʻu vaivai honau ivi fakaesinó, ʻi ha maile ʻe tahaafe onongeau ki he fakahihifo ʻo e tahifo ʻo e ʻOtumoʻunga Siela Nevatá ki he Teleʻa Sakalamenó.

“Ne maʻu kinautolu ʻe ha afā sinou ʻo ha faʻahitaʻu momoko fakaʻulia ʻi he tumutumu ʻo e moʻungá. ʻOku ʻikai ke faʻa fai ha tui ki ai ʻo ka moʻui ha taha ʻi ha ngaahi ʻaho, uike mo e ngaahi māhina ʻo taʻe kai, mo ha mamahi ne ʻikai mafakamatalaʻi.

“Ko e taha ʻo kinautolu ko e kiʻi tamasiʻi taʻu hongofulu mā nima ko Sione Pulini. ʻI he pō 24 ʻo ʻEpelelí, naʻá ne luelue ki he Faama ʻa Sionesoní. Hili ha ngaahi taʻu naʻá ne tohi ʻo pehē:

“‘Naʻe fuoloa e poʻulí he taimi ne mau aʻu ai ki he Faama ʻa Sionesoní, ko ia ko e fuofua taimi ne u mamata ai ki aí naʻe fuʻu pongipongia. Naʻe lelei pē e ʻeá, naʻe lanu mata e musié, naʻe hiva e manupuná mei he funga ʻakaú, pea ko e ngataʻanga ia ʻo e fonongá. Naʻe ʻikai ke u meimei tui naʻá ku kei moʻui.

“‘ʻOku hangē e meʻa ne u sio ki ai he pongipongi ko iá naʻe faitaaʻi pē ʻi hoku ʻatamaí. Kuo mole e ngaahi meʻa lahi naʻe hokó mei he manatú, ka ʻoku ou sio maʻu pē ki he ʻapitanga ofi ki he Faama Sionesoní.’ [“Pioneer Memories,” naʻe ʻikai ke paaki, ʻo hangē ko hono lau ʻi he “The Americanization of Utah,” fakamafola fakatelevīsone ʻa e PBS.]

“ʻNe u puputuʻu ʻi heʻene fakamatala ʻkuo mole e ngaahi meʻa lahi naʻe hokó mei he manatú.’ Naʻe anga fēfē e mole mei hono ʻatamaí ʻa e ngaahi māhina lahi ʻo e faingataʻaʻia lahi faufaua mo e mamahí? Naʻe fetongi fēfē ʻe he fakapoʻuli tuʻu ʻo e faʻahitaʻu momoko ko iá ʻaki e pongipongi fisifisimuʻa ko ia ʻe tahá?

“ʻI heʻeku toe fakakaukau loto lahi ange ki aí, ne u pehē naʻe ʻikai ke fakapuputuʻu. Kuó u mamata ki ha ngaahi meʻa tatau ʻoku hoko ki he kakai kuó u ʻiló. Kuó u mamata ki ha taha kuó ne nofo ʻi ha faʻahitaʻu momoko lōloa ʻo e ongoʻi halaiá mo e fiekaia fakalaumālié ʻoku hā mai meiate ia ʻa e pongipongi ʻo e fakamolemolé.

“ʻI he hoko mai ʻa e pongipongi ko iá, naʻa nau ʻilo ʻa e meʻá ni:

“‘Vakai, ko ia kuó ne fakatomala mei heʻene ngaahi angahalá, ʻoku fakamolemoleʻi ia, pea ko au ko e ʻEikí ʻoku ʻikai te u toe manatu ki ai’ [T&F 58:42]” (“The Brilliant Morning of Forgiveness,” Ensign, Nov. 1995, 18).

Hili hono lau e talanoa ko ʻení, kole ki he kau akó ke nau fakamatala ki ha taimi kuo nau mamata ai ki ha taha kuo fakatomala pea ʻoku hoko mai e fiefia ki heʻene moʻuí. (Fakamanatu ki he kau akó ʻoku ʻikai fie maʻu ke nau vahevahe ha meʻa ʻoku pelepelengesi pe ʻikai fakahāhāholo.)