Talateu ki he Ngaahi Tefitoʻi Tokāteliné
Ko e Ngaahi Tefitoʻi Tokāteline ʻeni ʻoku totonu ke fakaʻilongaʻi makehe he seminelí :
-
Toluʻi ‘Otuá
-
Palani ʻo e fakamoʻuí
-
Fakalelei ʻa Sīsū Kalaisí
-
Kuonga Fakakosipelí, Hē mei he Moʻoní, mo Hono Fakafoki Mai ʻo e Ongoongoleleí
-
Kau palōfitá mo e maʻu fakahaá
-
Lakanga fakataulaʻeikí mo e ngaahi kī ‘o e lakanga fakataulaʻeikí
-
Ngaahi ouaú mo e ngaahi fuakavá
-
Malí mo e fāmilí
-
Ngaahi fekaú
Ko e kau faiakó ke tokoniʻi ʻa e kau akó ke feinga ke ʻilo, tui, fakamatala, pea fakaʻaongaʻi ʻa e ngaahi tefitoʻi tokāteline ʻo e ongoongoleleí ʻi he ʻenau ako ʻa e ngaahi folofolá. ʻI hono fai ʻení ʻe tokoniʻi ʻa e kau akó ke fakamālohia ʻenau ngaahi fakamoʻoní pea fakatupulaki ʻenau houngaʻia he ongoognolelei kuo toe fakafoki mai ʻa Sīsū Kalaisí. Ko hono ako ʻa e Ngaahi Tefitoʻi Tokāteliné ʻe tokoni ki he kau akó ke lelei ange ʻenau teuteu ke moʻuiʻaki ʻa e ongoongoleleí pea akoʻi ʻa e ngaahi moʻoni mahuʻinga ko ʻení ki he niʻihi kehé. Ko e ngaahi lēsoni ʻi he tohi ko ʻení naʻe fokotuʻutuʻu ʻo fakakaukauʻi ai ʻa e Ngaahi Tefitoʻi Moʻoní. ʻOku mahuʻinga ke ʻiloʻi ko e ngaahi tokāteline mahuʻinga ʻo e ongoongoleleí ʻe fakamamafaʻi ʻi he tohí ni, neongo ʻoku ʻikai ke lisi atu he Ngaahi Tefitoʻi Tokāteliné.
Ko hono akoʻi ʻo e ngaahi tefitoʻi tokāteline ʻo e ongoongoleleí ʻoku hoko ia ʻi hoʻo ako ʻa e ngaahi folofolá fakaʻaho mo e kau akó pea ʻi hoʻo tokoniʻi kinautolu ke taukei he ngaahi veesi folofola mahuʻingá. ʻOku totonu ke ʻoua te ke toe afe mei hono ako fakahokohoko ʻo e folofolá ke fakamamafa ʻi he ngaahi tokāteliné. ʻOku totonu ke ke tokanga kiate kinautolu ʻi he ʻenau tupulaki ʻi he lēsoni ʻoku akó pea ʻi hoʻo tokoniʻi ʻa e kau akó ke taukei ʻi he ngaahi tefitoʻi veesi folofolá. Ko e sīpingá, ʻi hoʻo akoʻi ʻa e foʻi moʻoni ko ia ko e “kau palōfitá ʻoku nau fakatokanga ki he angahalá pea akoʻi ʻa e hakeakiʻi fou ʻia Sīsū Kalaisi” ʻi he 1 Nīfai 1, te ke lava ke fakahā ki he kau akó ko e moʻoni ʻe lava ke ne tokoniʻi kinautolu ke mahino ʻa e Ngaahi Tefitoʻi Tokāteline ʻo e “kau palōfita mo e fakahā.” Te ke fie ʻeke ki he kau akó ke fakamatalaʻi ʻa ʻenau ʻilo ki he kau palōfita mo e fakahā. ʻI he ako ʻa e kau akó ki he ngaahi veesi fakataukei folofolá 2 Nīfai 25:23, 26, te ke lava ʻo tokoniʻi kinautolu ke ʻilo ko e ngaahi veesi ʻokú ne fakahā ʻa e founga ʻe taha ʻoku fakahoko ʻe he kau palōfitá honau fatongia ke akoʻi ʻa e fakamoʻui ʻia Sīsū Kalaisí. Tupulaki ʻi he mahino, tui, mo e moʻuiʻaki ʻa e Ngaahi Tefitoʻi Tokāteliné ko ha founga ʻoku hoko ʻi he taʻu ʻe fā ʻo e seminelí pea hokohoko atu he toenga ʻo e moʻui ʻa e kau akó.
Te ke fie ʻoange ki he kau akó ha lisi ʻo e Ngaahi Tefitoʻi Tokāteliné.
Vakaiʻi ʻo e Ngaahi Tefitoʻi Tokāteliné
Ko ha Vakaiʻi ʻo e Ngaahi Tefitoʻi Tokāteliné kuo ʻosi faʻu ia ke tokoniʻi ʻa e kau faiakó ʻaki ʻa e ngaahi fakamatala te nau lava ʻo fakaʻaongaʻi ke lelei ange hono tāpuakiʻi ʻa e moʻui ʻa e kau akó. ʻOku mau fokotuʻu ki he kau faiakó ke tokangaʻi ʻa e vakaiʻi ko ʻení ke fai he ʻuluaki uike ʻo e kalasí pea mo e ofi ki he fakaʻosi ʻa e taʻú. Ke kumi ʻa e Vakaiʻi ʻa e Ngaahi Tefitoʻi Tokāteliné mo e ngaahi vakaiʻi kehé ʻi he uepisaiti ʻa e S&I (si.lds.org), kumi ʻo fakaʻaongaʻi ʻa e tefitoʻi lea vakaiʻi
Ko e kau faiako ʻoku nau ʻave ʻa e ola ʻenau vakaiʻi ʻa e kau akó ki he ʻofisi S&I Office of Research ʻe maʻu ʻenau līpooti ʻe tokoni kiate kinautolu ke fakaleleiʻi ʻenau faiakó ke lelei ange ʻene fetaulaki mo e fiemaʻu ʻa e kau akó. Hangē ko ʻení, kapau ʻoku ʻasi he olá ʻoku ʻikai mahino ki he kau akó ʻa e tokāteline ʻo e fakatomalá, ʻe ʻi ai ʻa e ngaahi lēsoni he silapā ʻe kumi ke ʻiloʻi te ne tokoniʻi ʻa e kau akó ke mahino ʻa e tokāteline ko ʻení. ʻI hono lotua ʻe he kau faiakó hono fakaʻaongaʻi ʻa e fakamatala ko ʻení ʻi hono akoʻi fakahokohoko ʻa e folofolá, ʻe mateuteu lelei ngae ʻetau kau talavoú mo e taautaha kei talavoú ke fakahoko ʻa e Taumuʻa ʻa e Seminelí mo e Lēsoní Fakalotú.