Lēsoni 35
2 Nīfai 25
Talateú
Ke hokohoko atu hono fakamamafaʻi ʻo e mahuʻinga e ngaahi kikite ʻa ʻIsaiá, naʻe fakamatala ʻa Nīfai ko e tokotaha kotoa ʻokú ne maʻu ʻa e laumālie ʻo e kikité ʻe mahino pea houngaʻia ʻi he ngaahi lea ʻa ʻIsaiá. Naʻá ne vahevahe ʻa e taumuʻa ʻo ʻene tohí: “ke fakalotoʻi ʻa ʻemau fānaú mo homau kāingá foki, ke nau tui kia Kalaisi, mo fakalelei ki he ʻOtuá” (2 Nīfai 25:23). Naʻá ne fakaafeʻi e taha kotoa ke tui kia Sīsū Kalaisi pea “hū kiate ia ʻaki ʻa e kotoa [honau] mālohí, ʻatamaí, mo e iví, pea mo [honau] laumālié kotoa” (2 Nīfai 25:29).
Ngaahi Fokotuʻu ki hono Akoʻí
2 Nīfai 25:1–8
ʻOku akoʻi ʻe Nīfai ʻe lava ke mahino kiate kitautolu ʻa e ngaahi lea ʻa ʻIsaiá ʻi heʻetau maʻu ʻa e laumālie ʻo e kikité
Fakaʻaliʻali ha foʻi loka ʻe ʻikai lava fakaava taʻe ʻi ai ha kī (pe tā ha fakatātā ʻo ha foʻi loka mo ha kī ʻi he palakipoé). Fakamahinoʻi ko e taimi ʻoku fie maʻu ai ʻe he kakaí ke tauhi ha koloa mahuʻinga ke malu, ʻoku nau faʻa lokaʻi ia. Mahalo te nau tauhi e foʻi kī pē ʻe taha ki he loká, pea ʻoange ha tatau ʻo e kií ki hanau kaungāmeʻa falalaʻanga pe mēmipa ʻo e fāmilí.
Fakamatalaʻi ne ʻilo ʻe Nīfai ʻoku “ʻaonga lahi” e ngaahi kikite ʻa ʻIsaiá (2 Nīfai 25:8). Neongo iá, naʻe ʻikai ke ne fufuuʻi ia. Naʻá ne talanoa foki ki he kī maʻá ha taha pē ʻokú ne fie fakaava ʻa e ʻuhinga ki he ngaahi lea ʻa ʻIsaiá. Fakaafeʻi ha tokotaha ako ke ne lau ʻa e ʻuluaki sētesi ʻi he 2 Nīfai 25:4. Kole ki he kalasí ke nau kumi ʻa e kií ke mahino kiate kinautolu e ngaahi lea ʻa ʻIsaiá.
-
Ko e hā e kī naʻá ke maʻú? (“Ko e laumālie ʻo e kikité.”)
Lau ʻa e fakamatala ko ʻeni mei he Fakahinohino ki he Folofolá ke tokoni ki he kau akó ke mahino ʻa e ʻuhinga ʻo e maʻu e “laumālie ʻo e kikité”:
“ʻOku kau ki he kikité ʻa e ngaahi folofola pe ngaahi tohi ʻoku faka-ʻOtua hono tupuʻangá, ʻa ia ʻoku maʻu ʻe ha taha ʻi he fakahā mei he Laumālie Māʻoniʻoní. Ko e fakamoʻoni ʻo Sīsuú ko e laumālie ia ʻo e kikité (Fakahā 19:10). ʻOku lava ke kau ha kikite ki he kuohilí, lolotongá, pe ko e kahaʻú. Ko e taimi ko ia ʻoku kikite ai ha taha, ʻokú ne lea ai pe tohi ʻa e meʻa ʻoku finangalo ʻa e ʻOtuá ke ne ʻiloʻí, koeʻuhi ko haʻane lelei ʻaʻana pe ko ha lelei ʻa e kakai kehé. ʻOku lava ʻe he kakai fakafoʻituituí ʻo maʻu ha kikite pe fakahā ʻo kau ki heʻenau moʻui pē ʻanautolú” (Fakahinohino ki he Ngaahi Folofolá, “Kikité, Kikiteʻi,” scriptures.lds.org).
Tokoni ki he kau akó ke nau ʻilo ʻe tupulaki ʻenau mahino ki he ngaahi lea ʻa ʻIsaiá ʻi heʻenau (1) fekumi ki he tataki ʻa e Laumālie Māʻoniʻoní mo (2) maʻu ha fakamoʻoni kia Sīsū Kalaisi mo ha holi ke ako kiate Ia. ʻI heʻenau fai ʻeni ki he ngaahi lea ʻa ʻIsaiá, ʻo fekumi maʻu pē ki he ngaahi founga ʻoku fakamoʻoniʻi ai ʻe heʻene ngaahi kikité ʻa e Fakamoʻuí, te nau lava ʻo ako ʻa e meʻa ʻoku fie maʻu ʻe he ʻOtuá ke nau ʻiló, ki heʻenau leleí mo e lelei ʻa e niʻihi kehé.
Fakamahinoʻi ne vahevahe ʻe Nīfai ha ngaahi fakakaukau kehe te ne lava ke fakamaama ʻetau mahino ki he ngaahi lea ʻa ʻIsaiá. Kole ki he kau akó ke lau fakalongolongo e 2 Nīfai 25:1, pea fekumi ki he ʻuhinga ne faingataʻa ai ke mahino ki he tokolahi ʻo e kakai ʻo Nīfaí e ngaahi lea ʻa ʻIsaiá.
-
Ko e hā naʻá ke maʻú? (Naʻe ʻikai te nau ʻilo “ki he anga ʻo e kikite ʻi he kau Siú.”)
-
Fakatatau ki he meʻa kuó ke lau kau ki he ngaahi lea ʻa ʻIsaiá, ko e hā ha ngaahi anga ʻe niʻihi ʻo e ngaahi kikite ʻa e kau Siu ʻo onoʻahó? (Mahalo ʻe kau he ngaahi talí, ne fakaʻaongaʻi ʻe ʻIsaia mo e kau palōfita kehé ha ngaahi fakatātā mo e lea fakapunake.)
-
ʻI hoʻo lau ʻa e ngaahi lea ʻa ʻIsaiá, ko e hā ʻoku tokoni ai ke ʻilo ki he founga fakakikite ko ʻení?
Fakamatalaʻi ʻoku ʻi he 2 Nīfai 25:5–6 ha fakakaukau ʻe taha ʻe ala tokoni. Fakaafeʻi ha tokotaha ako ke lau leʻolahi ʻa e ngaahi veesi ko ʻení. Kole ki he kalasí ke nau fekumi ki he ngaahi meʻa naʻe aʻusia ʻe Nīfai ʻo tokoni kiate ia ke mahino ʻa e ngaahi lea ʻa ʻIsaiá.
-
Ko e hā ʻokú ke fakakaukau ai ne tokoni kia Nīfai ʻa ʻene nofo ʻi Selusalemá? Fakatatau ki he meʻa naʻá ke lau ʻi he ngaahi lea ʻa ʻIsaiá, ʻokú ke pehē ko e hā ne lelei ai kia Nīfai ke “mamata ki he ngaahi meʻa ʻa e kau Siú” pea ke “ʻilo ai ki he ngaahi potu takatakai” ʻi Selusalemá?
-
Ko e hā te tau lava ʻo fai ke maʻu ha ʻilo lahi ange ki he ngaahi meʻá ni? (Te tau lava ako e ʻulungaanga fakafonuá, hisitōliá mo e tuʻunga fakasiokālafi ʻo ʻIsileli ʻi onoʻahó.)
Lau ki he kau akó e 2 Nīfai 25:7–8. ʻI hoʻo laú, fakamahinoʻi ʻe mahuʻinga ʻaupito ʻa e ngaahi kikite ʻa ʻIsaiá kiate kitautolu ʻi heʻetau mamata ki heʻene hokó. Ke fakamahinoʻi ʻa e moʻoni ko ʻení, fehuʻi ange:
-
ʻI he ngaahi ʻaho siʻi kuohilí, ko e hā ha ngaahi kikite ne tau ako ʻoku ʻosi hoko? (Mahalo ʻe manatuʻi ʻe he kau akó e kikite kau ki he Temipale Sōlekí [vakai, 2 Nīfai 12:2–3], ko e ʻaloʻi ʻo Sīsū Kalaisí [vakai, 2 Nīfai 19:6], mo Siosefa Sāmita [vakai, 2 Nīfai 21:1, 10].) Ko e hā e ngaahi founga ʻoku ʻuhingamālie ai e ngaahi kikité ʻi hoʻo vakai ʻoku hokó?
Ke fakaʻosi e konga ko ʻeni e lēsoní, fakahaaʻi hoʻo lotofalala ʻe lava ʻo tupulaki ʻa e mahino ki he kau akó ʻa e ngaahi lea ʻa ʻIsaiá ʻi heʻenau fekumi ki he laumālie ʻo e kikité. Fakamahinoʻi ʻe lava ʻo fakamaama ʻenau ʻiló ʻi hono ako e founga kikite ʻa e kau Siu ʻo onoʻahó mo e ʻulungaanga fakafonuá, hisitōliá mo e tuʻunga fakasiokālafi ʻo ʻIsileli ʻo onoʻahó.
2 Nīfai 25:9–19
ʻOku kikiteʻi ʻe Nīfai ʻa hono fakamoveteveteʻi mo e tānaki fakataha ʻo e kau Siú
Fakamatala fakanounou e 2 Nīfai 25:9–19 ʻi hoʻo pehē ne kikite ʻa Nīfai kau ki he kau Siú mo honau fonua tupuʻanga ʻi Selusalemá mo e ngaahi ʻēlia takatakaí. Naʻá ne pehē ʻe foki e kau Siu ne puke pōpula ki Papiloné ki he “fonua ʻo honau tofiʻá” hili hono fakaʻauha ʻo Selusalemá (vakai, 2 Nīfai 25:9–11). ʻE ʻi honau lotolotongá ʻa Sīsū Kalaisi ko e Mīsaiá, ka ʻe siʻaki Ia ʻe ha tokolahi pea tutuki Ia (vakai, 2 Nīfai 25:12–13). Hili e pekia mo e Toetuʻu ʻa e Fakamoʻuí, ʻe toe fakaʻauha ʻa Selusalema pea ʻe fakamoveteveteʻi ʻa e kau Siú mo fakamamahiʻi ʻe he ngaahi fonua kehé (vakai, 2 Nīfai 25:14–15). ʻE fakaʻau pē ʻo nau tui kia Sīsū Kalaisi mo ʻEne Fakaleleí, pea ʻe toe fakahaofi kinautolu ʻe he ʻEikí “mei honau tuʻunga mole mo tō ki laló” (vakai, 2 Nīfai 25:16–19).
2 Nīfai 25:20–30
ʻOku fakamoʻoniʻi ʻe Nīfai ʻa Sīsū Kalaisi
Kole ki he kau akó ke nau fakakaukau pe ko e hā haʻanau tali ki ha taha ʻokú ne pehē ʻoku ʻikai tui ʻa e Kau Māʻoniʻoni ʻi he Ngaahi ʻAho Kimui Ní kia Sīsū Kalaisi. Mahalo te ke fehuʻi ki ha toko taha pe toko ua ako ke vahevahe nounou ha aʻusia ne nau maʻu ʻi ha poleʻi ʻe ha niʻihi kehe ʻenau tui kia Sīsū Kalaisí. ʻI he lau mo fevahevaheʻaki ʻe he kau akó ʻa e 2 Nīfai 25:20–30, fakaafeʻi kinautolu ke fekumi ki he ngaahi potufolofola te nau lava ʻo vahevahe ʻi ha tuʻunga pehē.
Kole ki he kau akó ke fakaʻilongaʻi ʻa e “hala totonú” ʻi he 2 Nīfai 25:28–29. Hili ʻenau maʻu ʻa e “hala totonú ke tui kia Kalaisi pea ʻikai fakaʻikaiʻi ia,” tohiʻi ʻi he palakipoé ʻUhinga ʻoku hoko ai ʻa e tui kia Sīsū Kalaisí ko e hala totonú.Pea kole ki he kau akó ke nau fekumi ʻi he 2 Nīfai 25:20, 23–26, pea fekumi ki he ngaahi ʻuhinga ʻoku hoko ai ʻa e tui kia Sīsū Kalaisí ko e hala totonú. Fakaafeʻi kinautolu ke tohi ʻenau ngaahi talí ʻi he palakipoé ʻi lalo he taumuʻa kuó ke tohí. ʻE ala kau e ngaahi meʻa ko ʻení he ngaahi talí:
ʻOku fakafou ʻa e fakamoʻuí ʻia Sīsū Kalaisi pē.
ʻE lava ke fakahaofi kitautolu ʻi he ʻaloʻofa hili e meʻa kotoa te tau lava faí koeʻuhí ko Sīsū Kalaisi.
ʻE lava ke maʻu ʻa e fakamolemole ʻo ʻetau ngaahi angahalá ʻi he Fakalelei ʻa e Fakamoʻuí.
Fakaafeʻi ha tokotaha ako ke lau leʻolahi e 2 Nīfai 25:23 mo e 2 Nīfai 10:24. Fakamahinoʻi ʻoku kau ʻi he ngaahi veesi ko ʻení e foʻi lea ko e fakalelei, ko hono ʻuhingá ke ʻomi e kakaí pe ngaahi meʻá ke fenāpasi pe felotoi.
-
ʻOku poupouʻi kitautolu ʻi he ongo veesi ko ʻení fakatouʻosi ke tau fakalelei mo e ʻOtuá. ʻOkú ke pehē ko e ʻuhinga ʻeni ki he hā?
Fakamatalaʻi ʻoku ʻi he ongo veesi ko ʻení fakatouʻosi e foʻi lea ko e ʻaloʻofa. Ko e ʻaloʻofá ko ha meʻaʻofa ia mei he Tamai Hēvaní ʻo fakafou ʻi Hono ʻAlo ko Sīsū Kalaisí. Ko tefitoʻi ʻuhinga ʻo e foʻi lea ko e ʻaloʻofá,ʻi hono ngāue ʻaki ʻi he folofolá ko ha mālohi ke fakahoko mo e faitoʻo fakalaumālie ʻoku maʻu ʻi he ʻaloʻofa mo e ʻofa ʻa Sīsū Kalaisí.
-
Ko e hā ʻoku akoʻi ʻe he 2 Nīfai 10:24 mo e 25:23 ʻo kau ki he fekauʻaki ʻa e ʻaloʻofá mo ʻetau ngaahi ngāué?
Fakaafeʻi e kau akó ke fakahoko e meʻa kuo nau akó ʻaki hono tohi e ngaahi tali ki he fehuʻi ko ʻení ʻi heʻenau tohinoa ako folofolá pe tohi fakamatala fakakalasí. Mahalo te ke fie maʻu ke tohi e fehuʻí ʻi he palakipoé.
-
Ko e hā ʻene ʻuhinga kiate koe ʻo e fakahaofi ʻi he ʻaloʻofá?
Ke tokoni ke mahino ki he kau akó ʻa e fakamatala ʻa Nīfai ʻi he 2 Nīfai 25:24–25 naʻe kamata ke ʻikai toe tauhi ʻe he kakaí ʻa e fonó, fakamatalaʻi ko ʻene ʻuhinga ki he fono ʻa Mōsesé. Naʻe kei fai ʻi he taimi ʻo Nīfaí ʻa e tauhi ki he fonó mo hono founga fakahokó, ouaú, fakatātaá, mo e ngaahi fekaú, kau ai e tamateʻi ʻo e fanga monumanú. Naʻe ʻiloʻi ʻe Nīfai mo e niʻihi kehé ʻe fakakakato ʻa e fonó ʻi he Fakalelei ʻa Sīsū Kalaisí. Hili ʻa e Fakaleleí, ne ʻikai kei fie maʻu ʻa e kau ākonga ʻa e Fakamoʻuí ke tauhi ʻa e fono ʻa Mōsesé. Ka naʻe hokohoko atu e kau Nīfai faivelengá e talangofua ki he fonó ʻi he taimi ko ʻení, pea ʻiloʻi foki ʻe fakafetongi ʻa e fono lolotongá ʻi ha ʻaho.
ʻI he pehē ʻe Nīfai kuo kamata ke mate ʻa e fonó kiate ia mo e niʻihi kehé, ko ʻene ʻuhingá ʻe ʻikai fakahaofi kinautolu ʻe he fonó. Naʻa nau tauhi ʻa e fonó he naʻa nau fie talangofua pea ne nau ʻilo ʻoku tataki ʻe he fonó kinautolu kia Sīsū Kalaisi, ʻa ia te ne ʻomai kinautolu ki he fakamoʻuí.
-
Ko e hā te tau lava ke ako mei he 2 Nīfai 25:23–26 ʻo kau ki he ngaahi ʻuhinga ʻoku fie maʻu ai ke tau tauhi ʻa e ngaahi fekaú?
-
Ko e hā te ke fai ke “lea ʻia Kalaisi” mo “fiefia ʻia Kalaisi”? 2 Nīfai 25:26). Ko e hā te ke fai ke tokoni ki he niʻihi kehé ke nau tui kia Kalaisi?
Kole ki ha kau akó ke vahevahe ʻa e ngaahi potufolofola ne nau maʻú ʻa ia ʻe tokoni kiate kinautolu ke tali ʻa e pehē ʻoku ʻikai tui ʻa e Kau Māʻoniʻoni ʻi he Ngaahi ʻAho Kimui Ní kia Sīsū Kalaisí. Kole ange ke nau fakamatala ki he ʻuhinga ʻoku nau saiʻia ai he ngaahi potufolofola ko iá.
Fakahaaʻi hoʻo fakamoʻoni ki he ngaahi moʻoni kuó ke aleaʻi he ʻaho ní. Mahalo te ke fie maʻu ke ʻoange ki he kau akó e faingamālie ke fai ha fakamoʻoni ki he ngaahi moʻoni ko ʻení.
Fakataukei Folofolá—2 Nīfai 25:23, 26
Fakatokangaʻi ange: Fakakaukau ke ngāue ʻaki e ngaahi founga ko ʻeni ki he akoʻí lolotonga e konga fakaʻosi ʻo e lēsoni ko ʻení. Kapau ʻe ʻikai maʻu hao taimi ke fakaʻaongaʻi ʻa e fakakaukau ko ʻení ʻi he lēsoní, te ke ala fakaʻaongaʻi ia ʻi ha lēsoni ʻe taha ko hano toe fakamanatu.
Ke tokoni ki he kau akó ke ako maʻuloto e 2 Nīfai 25:26, ko e taha ʻo e ngaahi veesi ʻi he potufolofola fakataukei folofola ko ʻení, tohiʻi ʻeni ʻi he palakipoé:
Lea
Fiefia
Malanga
Kikite
Tohi
Ke ʻilo ʻe heʻemau fānaú …
Tupuʻanga …
Ha fakamolemole …
Fakaafeʻi e kau akó ke fakaʻaongaʻi e foʻi lea tokoni ʻi he palakipoé ke lau maʻuloto e 2 Nīfai 25:26. Hili hono toutou lau e vēsí, ʻeke pe ʻoku ʻi ai ha taha ʻi he kalasí ʻe loto ke ʻahiʻahi lau maʻuloto ʻa e vēsí. Pea toki fakaafeʻi e toenga ʻo e kau akó ke lau maʻuloto fakataha e vēsí ʻo ʻikai sio ki he palakipoé. Ke fakaʻosí, mahalo te ke fie fokotuʻu ange ʻoku ʻi ai ha mahuʻinga ʻi he fakafanongo tokanga ki he feinga ʻa e mātuʻá, kau takí, mo e kau faiakó ke fakalotoʻi kitautolu ke tau falala ki he Fakamoʻuí.
ʻOange ha laʻipepa ke takitaha e kau akó. Fakaafeʻi e kau akó ke fai ha tohi ki heʻenau fānau he kahaʻú ʻo poupouʻi kinautolu ke uho ʻaki ʻenau moʻuí ʻa Sīsū Kalaisi. Mahalo ʻe fie maʻu ʻe he kau akó ke faʻo ʻenau tohí heʻenau folofolá ke tauhi ki he kahaʻú.
Ngaahi Fakamatala Fakamahino mo e Puipuituʻá
2 Nīfai 25:23. Ko e tokāteline ʻo e ʻaloʻofá
“‘Ko e tefitoʻi fakakaukau ʻo e foʻi lea [ʻaloʻofá] ko ha founga fakalangi ʻo ha tokoni pe mālohi ʻoku foaki mai ʻo fakafou ʻi he ʻaloʻofa lahi mo e ʻofa ʻa Sīsū Kalaisí.
“Fakafou ʻi he ʻaloʻofa ʻa e ʻEiki ko Sīsuú, ʻa ia ne fakahoko ʻi heʻene feilaulau fakaleleí, ʻe fokotuʻu hake ʻa e faʻahinga ʻo e tangatá ʻi he moʻui taʻe-faʻa-maté, ʻo maʻu ʻe he tokotaha kotoa hono sino mei he faʻitoká ʻi ha tuʻunga ʻo e moʻui ʻo taʻe ngatá. ʻOku fakafou mai ʻe he ʻEikí ʻEne ʻaloʻofá ki he fakafoʻituituí, ʻo makatuʻunga ʻi he tui ki he Fakalelei ʻa Sīsū Kalaisí mo e fakatomala mei heʻenau ngaahi angahalá, ke maʻu ai ha ivi mo ha tokoni ke fai ai ha ngaahi ngāue lelei naʻe ʻikai ke nau mei lava ke fai kapau naʻe tuku ke fai pē ia ʻe kinautolu. Ko e ʻaloʻofa ko ʻení ko ha faʻahinga ivi ia ʻokú ne ʻai ke malava e kakai tangata mo fafiné ʻo puke maʻu e moʻui taʻengatá mo e hakeakiʻí hili ʻenau fakahoko honau lelei tahá.
“ʻOku fie maʻu ʻe he laumālie kotoa ʻa e ʻaloʻofa fakalangí ko e nunuʻa ʻo e hinga ʻa ʻĀtamá pehē foki ki he ngaahi vaivai mo e tō nounou ʻa e tangatá. Neongo iá, ʻe ʻikai feʻunga ʻa e ʻaloʻofá taʻe kau ai e ngāue kakato ʻa e tokotaha ko iá. Hangē ko e fakamatala ʻoku pehē, ‘ʻOku ʻi he ʻaloʻofá ʻa homau fakamoʻuí, ʻo ka hili ʻemau fai ʻa e meʻa kotoa pē ʻe ala faí’ (2 Nīfai 25:23). Ko e moʻoni ʻoku malava ʻa e fakamoʻuí ʻi he ʻaloʻofa ʻa Sīsū Kalaisí” (Bible Dictionary, “Grace”).
Naʻe pehē ‘a ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Ko ʻeku fakamoʻoni kiate kimoutolu ʻoku tau haó, maʻu ʻa e melinó, fiefiá mo e malu ʻoku tau fekumi ki aí ʻi hono tali mo tui fakamātoato ki he moʻui mo e misiona ʻo Sīsū Kalaisí, ko e ʻAlo ʻo e ʻOtua Māfimafí. ʻI heʻetau moʻui ʻaki ʻEne ngaahi akonakí, ʻoku tau siʻaki ai ʻetau ngaahi angahalá, tau fakatomala, pea tau fai kotoa e meʻa te tau lavá ke haʻu kiate Ia ʻi he laumālie moʻoni ʻo ha ākonga, pea ʻilo lelei ʻoku fakafou ʻi Heʻene ʻaloʻofá ʻa hotau fakamoʻuí hili e meʻa kotoa ʻoku tau ala faí. Pea ʻi heʻetau foaki kātoa mo kakato ʻetau moʻuí kia Kalaisí ʻoku tau haó, maʻu ʻa e melinó, fiefia mo e malú ʻiate Ia” (ʻi he “Latter-day Counsel,” Ensign, June 2001, 74).
2 Nīfai 25:26. “ʻOku mau fiefia ʻia Kalaisi”
Naʻe fakamatala ʻa Palesiteni Kōtoni B. Hingikelī ʻoku fakaʻatā ʻe he ʻilo ʻoku maʻu ʻi hono Toe Fakafoki mai ʻo e Ongoongoleleí ke tau fiefia moʻoni ʻi hotau Fakamoʻuí:
“ʻOku tokolahi ha kau fakaanga ki hotau Siasí. ʻOku nau pehē ʻoku ʻikai te tau tui ki he Kalaisi ko ia ʻoku tui ki ai ʻa e māmani Kalisitiané. ʻOku moʻoni hano konga ʻo ʻenau laú. ʻOku ʻikai makatuʻunga ʻetau tuí, mo ʻetau ʻiló ʻi he talatukufakaholo fakakuongamuʻá, ko e ngaahi tui ia naʻe maʻu tuʻunga ʻi ha ʻilo ʻoku fakangatangtá pea tupu mei ha ngaahi lāulea taʻe fakangatangata ʻa ha kakai ʻi heʻenau feinga ke fakaʻuhingaʻi ʻa e Kalaisi kuo toetuʻú. ʻOku tupu ʻa ʻetau tuí, mo ʻetau ʻiló mei he fakamoʻoni ʻa ha palōfita ʻi he kuonga ko ʻení ʻa ia naʻá ne mamata kiate ia, ʻa e ʻOtua maʻongoʻonga ʻo e ʻunivēsí mo Hono ʻAlo ʻOfaʻanga, ko e Sīsū Kalaisi kuo toe tuʻú. Naʻá Na folofola mai kiate ia. Naʻá Ne fakataufolofola kiate Kinaua. Naʻá ne fakamoʻoni fakahāhā, ʻi he lea fakapapau, mo mahinongofua ʻo kau ki he meʻa-hā-mai mahuʻinga ko iá. Ko ha meʻa-hā-mai ia ki he ʻOtua Māfimafí pea mo e Huhuʻi ʻo e māmaní, naʻe nāunauʻia lahi ange ia ʻi he faʻa ʻiló, ka naʻe fakapapauʻi mo fakamahinoʻi pau ʻa e ʻilo naʻe maʻu aí. Ko e ʻilo ia ʻoku makatuʻunga ʻi he kelekele loloto ʻo e fakahā fakaonopōní, ʻo hangē ko e lau ʻa Nīfaí, ʻoku tau ‘lea ʻia Kalaisi, ʻoku [tau] fiefia ʻia Kalaisi, ʻoku [tau] malanga ʻia Kalaisi, pea [tau] kikite ʻia Kalaisi pea ʻoku [tau] tohi ʻo fakatatau mo [ʻetau] ngaahi kikité, koeʻuhí ke ʻiloʻi ʻe [heʻetau] fānaú ki he tupuʻanga ʻa ia te [tau] lava ke sio ki ai koeʻuhi ke maʻu ai ha fakamolemole ʻo [ʻetau] ngaahi angahalá’ (2 Nīfai 25:26)” (“ʻOku Tau Hanga Hake Kia Kalaisi,” Liahona,Siulai 2002, 102).