Lēsoni 64
Mōsaia 23–24
Talateú
Hili e hola ʻa ʻAlamā mo hono kakaí mei he kau tau ʻa e Tuʻi ko Noá, naʻa nau langa ha kolo māʻoniʻoni. Neongo ne nau ului ki he ongoongoleleí, ka ne nau foua ha ngaahi meʻa fakamamahi mo ha ngaahi faingataʻa. Naʻe tuku pōpula kinautolu ʻe he kau Leimaná. Ko e taimi naʻe tui ai mo kātaki ʻa ʻAlamā mo hono kakaí, ne fakamaʻamaʻa leva ʻe he ʻEikí ʻenau ngaahi kavengá pea aʻu ʻo fakatauʻatāinaʻi kinautolu mei he nofo pōpulá. (Fakatokangaʻi ange ʻoku kātoi ʻi he Mōsaia 23–24 ʻa e meimei vahaʻataimi tatau ʻi he Mōsaia 19–22.)
Ngaahi Fokotuʻu ki hono Akoʻí
Mōsaia 23:1–20
Ko e tokoniʻi ʻe he ʻEikí ʻa ʻAlamā mo hono kakaí ke nau hao mei he kau tau ʻa e Tuʻi ko Noá ʻo fokotuʻu ha kolo māʻoniʻoni
Fakaʻaliʻali ki he kau akó ʻa e fakatātā ʻo e Fai Papitaiso ʻa ʻAlamā ʻi he Ngaahi Vai ʻo Molomoná (62332; Tohi Fakatātā ʻo e Ongoongoleleí [2009], fika 76). Fakaafeʻi ha taha ako ke ne fakamatala ki he kalasí ʻa e meʻa ʻokú ne ʻilo fekauʻaki mo e tangata ʻokú ne papitaiso ʻa e tangata ʻe tahá ʻi he fakatātaá. (Kapau ʻoku faingataʻa ki he kau akó ke nau tali, mahalo te ke fie fokotuʻu ange ke nau lau ʻa e fakamatala nounou ki he Mōsaia 18 ke fakamanatu kiate kinautolu ʻa e fakamatala ʻo ʻAlamā mo hono kakaí ʻi he Ngaahi Vai ʻo Molomoná.)
Vahevahe ʻa e kau akó ke nau tauhoa. Fakaafeʻi ʻa e ngaahi hoá takitaha ke nau taufetongi ʻi hono lau ʻo e Mōsaia 23:1–5, 19. Kole ange ke nau kumi ʻa e ngaahi kupuʻi lea ʻoku fakahaaʻi ai hono tāpuakiʻi ʻe he ʻEikí ʻa ʻAlamā mo hono kakaí ʻi heʻenau fakatomala mo fili ke moʻui māʻoniʻoní. (Mahalo naʻá ke fie fokotuʻu ange ke nau fakaʻilongaʻi ʻa e ngaahi kupuʻi lea ko ʻení.) Kole ki he kau akó ke nau fakamatalaʻi ʻa e meʻa ne nau maʻú.
Fakaafeʻi ʻa e kau akó ke nau sio ki he fakatātā ʻoku ʻasi ai ʻa e vakai fakalūkufua ki he ngaahi fononga ʻi he Mōsaia 7–24. Fakahinohinoʻi kinautolu ke nau tā ʻa e fonua ko Heilamí ʻi heʻenau fakatātaá ʻi he feituʻu totonú. Toe ʻai foki ke nau tā ha foʻi tao mei he Ngaahi Vai ʻo Molomoná ki he fonua ko Heilamí, pea nau fakahingoa ʻa e foʻi taó “Ko e mavahe ʻa ʻAlamā mo hono kakaí.” (Ke maʻu kakato ʻa e fakatātaá, vakai ki he fakamatala fakalahi ʻi he ngataʻanga ʻo e tohi lēsoni ko ʻení.)
Vakai Fakalūkufua ki he Ngaahi Fononga ʻi he Mōsaia 7–24
Fakamatalaʻi nounou ange ʻoku tau lau ʻi he Mōsaia 23:6–14, naʻe ʻikai ke tali ʻe ʻAlamā ʻa e kole ʻa e kakaí ke ne hoko ko honau tuʻí. Fakaafeʻi ha taha ako ke ne lau leʻo lahi ʻa e Mōsaia 23:9–10, 12. Kole ki he kalasí ke nau kumi hono fakamatalaʻi ʻe ʻAlamā hono uesia ia ʻe he Tuʻi ko Noá mo hono kakaí. Kole ki ha kau akó ke nau lipooti ʻa e meʻa ne nau maʻú.
-
Ko e hā ʻoku akoʻi ʻe he ongo kupuʻi lea ko e “ʻefihia ʻi ha tauhelé” mo e “haʻi ʻaki ʻa e ngaahi haʻi ʻo e angahalá” fekauʻaki mo e nunuʻa ʻo e angahalá?
-
Ko e hā ʻoku ʻaonga ai ke tau fakatokangaʻi ʻa e ngaahi ivi takiekinamālohi naʻá ne taki kitautolu ke faiangahala ʻi he kuo hilí?
-
Ka hili ʻetau fakatomalá, ko e hā ʻe mahuʻinga ai ke tau manatuʻi hono “fakamamahi” ʻo e fakatomalá?
Kole ki ha taha ako ke ne lau leʻo lahi ʻa e Mōsaia 23:13. Fakamahino ange ʻa e faleʻi ʻa ʻAlamā ke tau “tuʻu maʻu ʻi he tauʻatāina ʻa ia kuo fakatauʻatāinaʻi ʻaki ʻa kimoutolú.”
-
ʻOku fakaʻaongaʻi fēfē ʻa e faleʻi ko ʻení ki he founga ʻo e fakatomalá? (Tokoni ke mahino ki he kau akó ko hono fakatauʻatāinaʻi pē kitautolu ʻe he ʻEikí mei he angahalá pea tau aʻusia ʻa e tauʻatāina ʻo e fakamolemolé, kuo pau ke tau fai ha ngaahi fili māʻoniʻoni ke tauhi maʻu ʻa e tauʻatāina ko iá.)
Fakaafeʻi ʻa e kau akó ke nau fakatolotolo fakalongolongo ʻi he Mōsaia 23:14–18, ʻo kumi ha niʻihi ʻo e ngaahi meʻa naʻe akoʻi ʻe ʻAlamā ke fai ʻe he kakaí ke nau tauhi maʻu ai ʻenau tauʻatāiná. Kole ki ha kau ako tokosiʻi ke nau lipooti ʻa e meʻa ne nau maʻú.
Fakaafeʻi ha tokotaha ako ke ne lau leʻo lahi ʻa e Mōsaia 23:19–20. Kole ki he kalasí ke nau talaatu ʻa e kupuʻi lea ʻokú ne fakahaaʻi naʻe tāpuakiʻi ʻe he ʻEikí ʻa e kakaí ʻi he taimi ne nau fili ai ke moʻui māʻoniʻoní (“tuʻumālie lahi”).
-
ʻE founga fēfē haʻo fakamatalaʻi nounou ʻa e meʻa ne ke ako ʻi he meʻa ne foua ʻe ʻAlamā mo hono kakaí? (ʻI he ngaahi moʻoní kotoa, ʻe ala pehē ʻe he kau akó ko e taimi ʻoku tau fakatomala ai mo fili ke moʻui māʻoniʻoní, ʻe tāpuakiʻi kitautolu ʻe he ʻEikí mo fakatauʻatāinaʻi kitautolu mei he ngaahi haʻi ʻo e angahalá.)
-
Ko e fē ha taimi ne ke fakatokangaʻi ai hono fakahoko ʻo e tefitoʻi moʻoni ko ʻení ʻi hoʻo moʻuí pe ʻi he moʻui ʻa ha mēmipa ʻo e fāmilí? (Fakamanatu ki he kau akó ʻoku ʻikai fie maʻu ke nau vahevahe ha aʻusia ʻoku fuʻu fakafoʻituitui pe fakatāutaha.)
Mōsaia 23:21—29
ʻOku ʻomi ʻe ha kau tau ʻa e kau Leimaná mo e kau taulaʻeiki faiangahala ʻa Noá ʻa ʻAlamā mo hono kakaí ʻo tuku pōpulá.
Ke mahino ki he kau akó kuo pau ke foua ʻe kinautolu ʻoku māʻoniʻoní ʻa e faingataʻá, kole ki he kau akó ke nau fakakaukau ki ha taimi ʻi heʻenau moʻuí ne nau tatau ai mo e lea naʻe fai ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku fie maʻu ʻa e siviʻí … ʻo aʻu ai pē ki he taimi ʻokú ke moʻui ai ʻi ha tuʻunga taau, moʻui māʻoniʻoni pea mo talangofua ki he ngaahi fekau ʻa e ʻOtuá. Ko e taimi ʻoku hangē ʻoku lele lelei ʻa e meʻa kotoa peé, ko e taimi ia ʻoku faʻa taulōfuʻu mai ai ʻa e ngaahi faingataʻá ʻi ha ngaahi tūkunga kehekehe” (“Trust in the Lord,” Ensign, Nov. 1995, 16).
Kole ki he kau akó ke nau fakatotolo ʻi he Mōsaia 23:21–22 ke nau ʻilo ʻa e ʻuhinga ʻe fakangofua ai ʻe he ʻEikí ʻa kinautolu ʻoku fili ke moʻui māʻoniʻoní ke nau foua ʻa e ngaahi faingataʻá mo e mamahí. ʻI he taimi ʻe lipooti mai ai ʻe he kau akó ʻa e meʻa ne nau maʻú, tokoni ke mahino kiate kinautolu ʻe feinga ʻa e ʻEikí ke siviʻi ʻetau kātakí mo ʻetau tuí ke tokoniʻi kitautolu ke fakatupulaki ʻetau falala kiate Iá.
Fakaafeʻi ʻa e kau akó ke nau hiki ʻa e ongo fehuʻi ko ʻení ʻi heʻenau tohinoa ki he ako folofolá pe pepa akó. Kole ange ke nau fakakaukau loto ki he ongo fehuʻí ni ʻi heʻenau ako ʻa e toenga ʻo e Mōsaia 23. ʻOku ʻikai totonu ke nau hiki ʻenau talí kae ʻoua kuó ke talaange ke nau fai ia ʻamui ange ʻi he lēsoní.
-
Ko e hā ha ngaahi faingataʻa ʻokú ke foua he taimí ni?
-
ʻE lava fēfē ke ke tui mo falala ki he ʻOtuá he lolotonga e taimi hoʻo faingataʻaʻiá?
Kole ki he kau akó ke nau lau ʻa e Mōsaia 23:23–29. Fakaafeʻi ke nau kumi ha ngaahi founga naʻe ʻahiʻahiʻi ai ʻa ʻAlamā mo hono kakaí pea mo e meʻa naʻa nau fai ke fakahaaʻi ai ʻenau falala ki he ʻOtuá.
-
ʻE tokoni fēfē ʻa e lotú mo e muimui ʻi he faleʻi ʻa e palōfitá he lolotonga ʻo e faingataʻá? (Te nau lava ʻo tokoni ke fakalahi ʻetau kātakí mo ʻetau tuí. Te nau toe lava foki ʻo tokoni ke tau mau ha ivi, fakahā fakatāutaha, nonga, pea mo ha loto lahi koeʻuhí ke tau lava ʻo kātakiʻi hotau ngaahi ʻahiʻahí pe maʻu ha fakatauʻatāina mei ai.)
Mōsaia 23:30–24:25
Naʻe tofanga ʻa ʻAlamā mo hono kakaí he fakatangá, ka naʻe fakamaʻamaʻa ʻe he ʻEikí ʻenau ngaahi kavengá mo fakatauʻatāinaʻi kinautolu ʻi ha founga fakaofo
Ke tokoniʻi ke mahino ki he kau akó ʻa e vā fetuʻutaki ʻa ʻAmulone mo e kau Leimaná mo honau tuʻí, fakamatalaʻi nounou ʻa e Mōsaia 23:30–39 mo e 24:1–7. Fakamatalaʻi ange ko ʻAmuloné ko e taki ia ʻo e kau taulaʻeiki faiangahala ʻa e Tuʻi ko Noá, ʻa ia naʻa nau kapusi ʻa ʻAlamā ʻi heʻene poupouʻi ʻa ʻApinetaí. Ne kau ʻa ʻAmulone, fakataha mo e kau taulaʻeiki faiangahala kehé pea mo honau uaifi Leimaná ki he kau Leimaná. Naʻe maʻu ʻe ʻAmulone ʻa e falala ʻa e tuʻi Leimaná, ʻo ne fakanofo ia ko e pule ki he kau Nīfai kotoa ʻi he fonua ko Heilamí, kau ai mo e kakai ʻo ʻAlamaá.
Fakaafeʻi ha taha ako ki muʻa ʻi he kalasí, pea kole ange ke ne tui ha ngeʻesi kato āfei. (ʻE fie maʻu ʻe he taha akó ʻene ngaahi folofolá.) ʻEke ange ki he taha akó pe ʻe faingofua fēfē ke ne tui e ngeʻesi kato āfeí he toenga ʻo e ʻahó. Fakaafeʻi ʻa e taha ako ko ʻení ke ne lau leʻo lahi ʻa e Mōsaia 24:8–11. Ko e taimi kotoa pē ʻe lau ai ʻe he taha akó ha meʻa naʻe hoko ko ha faingataʻa kia ʻAlamā mo hono kakaí, faʻo ha foʻi maka pe ha meʻa mamafa ki he loto kato āfeí. Ko e ʻene ʻosi pē hono lau ʻe he taha akó, ʻeke ange pe ʻe faingofua fēfē ke ne tui ʻa e kato āfei kuo fonú ʻi he toenga ʻo e ʻahó. (ʻOku totonu ke kei tuʻu pē ʻi muʻa ʻa e taha akó mo tui ʻa e kato āfeí kae ʻoua kuo talaange ke tangutu.) ʻEke ki he kalasí:
-
Ko e hā ʻe ala fakafofongaʻi ʻe he ngaahi foʻi maka pe ngaahi meʻa mamafa ʻi he loto kato āfeí ʻi hoʻo moʻuí?
-
ʻOku uesia fēfē kitautolu ʻe he faʻahinga kavenga mafasia pehení?
Kole ki ha taha ako ke ne lau leʻo lahi ʻa e Mōsaia 24:10–12. Fakaafeʻi ʻa e kalasí ke nau kumi ʻa e ngaahi meʻa naʻe fai ʻe he kakai ʻo ʻAlamaá ke nau maʻu ai ha tokoni ʻi heʻenau ngaahi kavenga mafasiá. Fakaafeʻi ʻa e kau akó ke nau fakamatalaʻi ʻa e meʻa ne nau maʻú.
-
ʻE tokoni fēfē kitautolu ʻe he lotú he taimi ʻoku ʻi ai ai haʻatau ngaahi kavenga mafasia faingataʻá?
-
Ko e taimi ʻoku tau foua ai e ngaahi ʻahiʻahí, ko e hā ʻe ongo fakafiemālie ai ke ʻiloʻi ʻoku ʻafioʻi ʻe he ʻOtuá “ʻa e ngaahi fakakaukau [hotau] lotó”?
Fakaafeʻi ʻa e kau akó ke nau lau ʻa e Mōsaia 24:13–15 ke ʻilo pe ko e hā naʻe hoko ki he kakai ʻo ʻAlamaá ʻi heʻenau kei lotu ke maʻu ha tokoní.
-
Ko e hā naʻe talaʻofa ʻe he ʻEikí ke fai maʻá e kakai ʻo ʻAlamaá? (ʻI he tali mai ʻa e kau akó, te ke lava ʻo fehuʻi ki ha taha pe toko ua kehe ke na hiki hake e tafaʻaki ki lalo ʻo e kato āfeí ke fakamaʻamaʻa e kavenga ʻa e taha ako ʻokú ne āfeí—ko hono fakataipe ia ʻo e founga ʻe lava ke fakamaʻamaʻa ai ʻe he ʻEikí ʻetau ngaahi kavengá.) ʻOku fekauʻaki fēfē ʻa e talaʻofa ko ʻení mo e fuakava naʻa nau fai ʻi he Ngaahi Vai ʻo Molomoná? (Vakai, Mōsaia 18:8–10.)
-
Ko e hā ʻoku tokoni ai ke ʻilo ʻoku ʻikai ke faʻa toʻo vave maʻu pē ʻe he ʻEikí ʻa ʻetau ngaahi kavengá pe ko ʻetau ngaahi faingataʻaʻiá?
-
Ko e hā te tau lava ʻo ako mei he meʻa naʻe fai ʻe ʻAlamā mo hono kakaí ki honau ngaahi faingataʻaʻiá?
-
Ko e fē ha taimi naʻá ke ongoʻi ai kuo foaki atu ʻe he ʻEikí ha ivi ke ke kātekina ha ʻahiʻahi pe ke fuesia ha kavenga?
Fakaafeʻi ʻa e kau akó ke nau lau fakalongolongo ʻa e Mōsaia 24:16–17, 21. Kole ange ke nau kumi ha ngaahi foʻi lea mo ha ngaahi kupuʻi lea ʻoku nau fakamatalaʻi lahi ange ʻa e founga ne tali ʻaki honau ngaahi ʻahiʻahí pea mo e founga hono tokoniʻi kinautolu ʻe he ʻEikí. Fakaafeʻi ha tokotaha ako ʻe taha pe toko ua ke na fakamatalaʻi ʻi heʻena lea pē ʻakinaua ha faʻahinga fekauʻaki ʻoku nau fakatokangaʻi ʻi he ngaahi ngāue ʻa e kakaí mo e ngaahi ngāue ʻa e ʻEikí. Hiki ʻa e tefitoʻi moʻoni ko ʻení ʻi he palakipoé: Ko e taimi ʻoku tau ongongofua lelei ai ki he finangalo ʻo e ʻEikí, te Ne fakamālohia kitautolu pea mo fakatauʻatāinaʻi mei hotau ngaahi faingataʻá ʻi Hono taimi pē ʻOʻona.
Fakaafeʻi ʻa e toko taha ako ʻi muʻa he kalasí ke tuku ki lalo ʻa e kato āfeí. Kole ange ke ne fakamatalaʻi pe ʻoku ongo fēfē ke tauʻatāina mei he kavengá. Fakaafeʻi ʻa e taha ako tatau ke ne lau ʻa e Mōsaia 24:21–22. Mahalo naʻa fie maʻu ke ke kole ki he taha akó ke ne vahevahe ʻa ʻene mahino ki he meʻa ne fai ʻe he kakaí ʻi he ongo veesi ko ʻení.
Fakamatalaʻi nounou ʻa e Mōsaia 24:18–25 ʻaki haʻo fakamatalaʻi ange naʻe lava ʻa ʻAlamā mo hono kakaí ʻo hola koeʻuhí he naʻe ʻai ʻe he ʻEikí ke mohe maʻu e kau Leimaná. Naʻe toki taki leva ʻe he ʻEikí ʻa ʻAlamā mo hono kakaí ki Seilahemala, ʻo talitali fiefia ai kinautolu ʻe he Tuʻi Ko Mōsaiá. Naʻe ʻoatu ʻe ʻAlamā mo hono kakaí “ʻa ʻenau fakafetaʻi ki he ʻOtuá,” ʻi heʻenau ʻilo “naʻe ʻikai faʻa fakahaofi ʻa kinautolu ʻe ha taha tuku kehe ʻa e ʻEiki ko honau ʻOtuá pē” (Mōsaia 24:21; vakai foki, Mōsaia 25:16).
ʻI heʻenau fakatātā ʻoku tuʻu ai ʻa e vakai fakalūkufua ki he ngaahi fononga ʻi he Mōsaia 7–24, ʻai ke tā ai ʻe he kau akó ha foʻi tao mei he fonua ko Heilamí ki he fonua ko Seilahemalá. Fakahinohinoʻi ke nau fakahingoa ʻa e fononga ko ʻení “ko e hola ʻa e kakai ʻo ʻAlamaá.”
Fakaafeʻi ʻa e kau akó ke nau hiki ʻenau tali ki he ongo fehuʻi ne nau hiki he konga ki muʻa ʻo e lēsoní ʻi heʻenau tohinoa ki he ako folofolá. Kole ange ke nau fakakaukau ki honau ngaahi ʻahiʻahí mo e founga te nau lava ai ʻo ngāue ʻaki ʻenau tuí mo falala ki he ʻOtuá ke tokoni ke nau kātakí. Fai ange hoʻo fakamoʻoní, kapau te tau fakavaivai ʻi he faʻa kātaki ki he finangalo ʻo e ʻEikí, te Ne fakaivia kitautolu mo fakatauʻatāinaʻi mei hotau ngaahi ʻahiʻahí ʻi Hono taimi pē ʻOʻona. Mahalo te ke fie maʻu ke fakaafeʻi ʻa e kau akó ke nau fakamatalaʻi e ngaahi sīpinga ʻo hano fakaivia kinautolu ʻe he ʻEikí ʻi honau ngaahi faingataʻá.
Ngaahi Fakamatala Fakamahino mo e Puipuituʻá
Mōsaia 21–24. Fakafehoanaki e nofo pōpula ʻa e kakai ʻo Limihaí mo e nofo pōpula ʻa e kakai ʻo ʻAlamaá
|
Kakai ʻo Limihaí |
Kakai ʻo ʻAlamaá |
|---|---|
|
Naʻe tuku pōpula kinautolu hili ha lingitoto lahi fau (vakai, Mōsaia 21:5–13). |
Naʻe tuku pōpula kinautolu ka naʻe ʻikai ha lingitoto (vakai, Mōsaia 23:35–38). |
|
Naʻe fakatuotuai ʻa e ʻEikí ke fakafanongo ki heʻenau ngaahi tangí koeʻuhí ko ʻenau faiangahalá (vakai, Mōsaia 21:15). |
Naʻe tali vave ʻe he ʻEikí ʻenau ngaahi lotú (vakai, Mōsaia 23:10–13). |
|
Naʻe fakamaʻamaʻa ʻenau ngaahi kavengá koeʻuhí he naʻe fakamolū ʻe he ʻEikí e loto ʻo e kau Leimaná (vakai, Mōsaia 21:15). |
Naʻe fakamālohia kinautolu ʻe he ʻEikí ke faingofua ʻenau lava ʻo fuesia ʻenau ngaahi kavengá ʻo maʻamaʻa (vakai, Mōsaia 24:14–15). |
|
Ne fakakaukauʻi ʻe Kitione ha palani ke hola ai (vakai, Mōsaia 21:36; 22:1–9). |
Naʻe folofola ʻange ʻa e ʻEikí kiate kinautolu, “Mou fiefia, he ʻi he ʻapongipongí, te u fakahaofi ʻa kimoutolu mei he nofo pōpulá” (Mōsaia 24:16). |
|
Naʻa nau ʻai ʻa e kau leʻó ke nau konā (vakai, Mōsaia 22:10). |
Naʻe ʻai ʻe he ʻEikí ke mohe ʻa e kau leʻó (vakai, Mōsaia 24:19). |
Mōsaia 23:21. ʻE lava fēfē ke hoko ʻo ʻaonga kiate kitautolu hotau ngaahi faingataʻá?
Neongo naʻe ʻosi fakatomala mo faivelenga ʻa e kakai ne nau muimui ʻia ʻAlamaá, ka naʻe tuku kinautolu ʻe he ʻEikí ke kiʻi fakamoʻulaloaʻi fakataimi ʻe he kau Leimaná ke siviʻi ʻenau faʻa kātakí mo ʻenau tuí.
Naʻe akoʻi ʻe ʻEletā ʻOasoni F. Uitenei ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku akoʻi kitautolu ʻe he meʻa kotoa pē ʻoku tau fouá ha ngaahi lēsoni mahuʻinga:
“‘ʻOku ʻikai ha mamahi ia te tau tofanga ai, pe ha faingataʻa te tau aʻusia ʻoku taʻeʻaonga. ʻOku hoko ia ko hotau akoʻi, mo tau fakatupulaki ai ʻa e ngaahi ʻulungaanga ko ʻeni ko e kātakí, tuí, loto-toʻá, mo e loto fakatōkilaló. ʻOku hanga ʻe he ngaahi mamahi ʻoku tau aʻusiá mo e ngaahi meʻa kotoa ko ia ʻoku tau kātakiʻí ʻo toe ʻohake hotau ngaahi ʻulungāngá ke lelei ange, fakamaʻa ʻa hotau lotó, fakatupulekina ʻa hotau laumālié, mo ngaohi kitautolu ke tau toe angavaivai mo angaʻofa ange, pea tau toe moʻui taau ange mo feʻunga ke ui ko e fānau ʻa e ʻOtuá … ʻoku fakafou ʻi he mamahí, faingataʻá, ongosiá pea mo e ʻahiʻahí ʻa hono akoʻi kitautolu ʻi he māmaní pea mo ia te ne ʻai kitautolu ke tau hoko ʻo tatau ange mo ʻetau Tamai mo e Faʻē ʻi hēvaní” (ʻi he Spencer W. Kimball, Faith Precedes the Miracle [1972], 98.)
Naʻe toe fakamatalaʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá hono mahuʻinga mo hono taumuʻa ʻo e ngaahi faingataʻá:
“Ko e taimi ʻoku ʻikai tupu ai ʻa e ngaahi faingataʻa ko iá mei hoʻomou talangataʻá, ʻoku nau hoko ko ha fakamoʻoni ʻoku ongoʻi ʻe he ʻEikí kuó ke mateuteu ke tupulaki lahi ange (vakai, Lea Fakatātā 3:11–12). Kuó Ne ʻoatu ai ha ngaahi meʻa ke mou aʻusia ke ne fakaʻaiʻai ʻa e tupulakí, mahinó, pea mo e ʻmanavaofa ko ia ʻokú ne fakaleleiʻi koe ki ho monūʻia taʻengatá. ʻOku fie maʻu ke mou mateuteu ke lava ʻo ʻave kimoutolu mei homou tuʻunga he taimi ní ki he feituʻu ʻokú Ne finangalo ke mou ʻi aí, pea ʻoku meimei ke hoko ai ha ongoʻi taʻefiemālie mo ha mamahi” (“Trust in the Lord,” Ensign, Nov. 1995, 16–17).
Mōsaia 24:15–16. ʻE uesia fēfē ʻe heʻetau tōʻonga fakakaukaú ʻa ʻetau tupulaki fakafoʻituituí tuʻunga he ngaahi faingataʻá?
Naʻe poupouʻi kitautolu ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau fakafalala ki he ʻEikí ʻi he taimi ʻoku tau fehangahangai ai mo e ngaahi faingataʻá:
“ʻOku tokanga ʻa e ʻEikí ki hoʻo tupulaki mo fakalakalaka fakafoʻituituí. ʻOku vave ange ʻa e meʻa ko iá ʻi he taimi ʻokú ke loto fiemālie ai ke tuku ke Ne taki koe ʻi he tupulaki kotoa pē ʻokú ke aʻusia, tatau ai pē pe naʻá ke saiʻia ai ʻi he kamataʻangá pe ʻikai. Ko e taimi ʻokú ke falala ai ki he ʻEikí, ʻi he taimi ʻokú ke loto fiemālie ai ke tukutaha ho lotó mo ho ʻatamaí ki Hono finangaló, ʻi he taimi ʻokú ke kole ai ke tataki koe ʻe he Laumālié ke fai Hono fingangaló, ʻoku fakapapauʻi atu ʻa e fiefia lahi taha ʻi he fonongá pea mo e lavameʻa lahi taha mei he aʻusia ʻo e moʻui fakamatelié. Kapau te ke fehuʻia ʻa e meʻa kotoa pē ʻoku kole atu ke ke fai, pe fakafepaki ʻi he meʻa kotoa pē ʻoku taʻe fakafiemālié, ʻokú ke ʻai ke toe faingataʻa ange ki he ʻEikí ke Ne tāpuakiʻi koe” (“Finding Joy in Life,” Ensign, May 1996, 25).