Laipelí
Lēsoni 123: 3 Nīfai 13

Lēsoni 123

3 Nīfai 13

Talateú

Ne hoko atu e malanga ʻa e Fakamoʻuí ʻi he temipalé ʻi he fonua ko Mahú. Naʻá Ne fakatokanga ki he kakaí fekauʻaki mo e mālualoí pea akoʻi kinautolu ke fai e ngaahi ngāue ʻo e māʻoniʻoní ke fakahoifua ki he Tamai Hēvaní. Naʻá Ne fakahinohinoʻi foki ʻa e kakaí ke nau tānaki e ngaahi koloa ʻo e langí pea tataki ʻEne kau ākongá ke nau fuofua kumi ki he puleʻanga ʻo e ʻOtuá kimuʻa ʻi heʻenau ngaahi meʻa fakamāmaní.

Ngaahi Fokotuʻu ki hono Akoʻí

3 Nīfai 13:1–18

Naʻe fakatokanga e Fakamoʻuí ki he kau Nīfaí fekauʻaki mo e mālualoí pea akoʻi kinautolu ke nau fai e ngaahi ngāue ʻo e māʻoniʻoní ke fakahōifua ki he Tamai Hēvaní

Kimuʻa pea fai e kalasí, teuteu ha laʻipepa tufa ʻo e ngaahi sivi ko ʻení pea ʻai ha ngaahi tatau ki he tokotaha ako takitaha. Kapau ʻoku ʻikai malava ia, te ke lava ʻo ʻoatu e siví ʻaki hano lau leʻo lahi pe hiki ʻi he palakipoé.

  1. ʻOku ou foaki (fakahaaʻi ʻo e mateaki fakalotu pe ngāue tokoni ki he niʻihi kehé) koeʻuhí:

    1. ʻOku totonu ke u fai ia.

    2. ʻOku ou ʻofa ki he ʻEikí pea fiefia ʻi hono tokoniʻi e niʻihi kehé.

    3. ʻOku ou fie maʻu ke fakakaukau lelei mai e niʻihi kehé kiate au.

  2. ʻOku ou lotu koeʻuhí:

    1. ʻOku ou fie maʻu ke u lava ʻo talaange ki heʻeku mātuá pe ko ʻeku pīsopé “ʻio” ʻi heʻenau ʻeke mai pe ʻoku ou lotú.

    2. Ko e konga pē ia ʻo ʻeku ngāue fakaʻahó.

    3. ʻOku ou fie fetuʻutaki mo ʻeku Tamai Hēvaní.

  3. ʻOku ou ʻaukai koeʻuhí:

    1. ʻOku tokoni mai ʻa e ʻaukaí ke u ofi ange ki he ʻEikí.

    2. ʻE pehē ʻe he niʻihi kehé ʻoku ou vaivai kapau he ʻikai ke u fai ia.

    3. Ne talamai heʻeku mātuʻá ʻoku totonu ke u fai ia.

Ke kamata ʻa e lēsoní, kole ki he kau akó ke nau fakakakato ʻa e siví (tatau ai pē ʻi he laʻipepa tufá pe ʻi he pepa akó pe tohinoa ako folofolá) ʻaki hono fakahaaʻi pe ko e kupuʻi lea fē ʻokú ne fakamatalaʻi lelei ʻenau taumuʻa pe ʻuhinga ki hono fai ʻo e foakí, lotú mo e ʻaukaí. Fakapapauʻi ki he kau akó he ʻikai ke ke kole ange ke vahevahe ʻenau talí mo e niʻihi kehé. Hili hono fakakakato ʻe he kau akó e siví, fakamahinoʻi ko e ngaahi tali ʻoku malava fakahoko ki hono fai ʻo e foakí, lotú mo e ʻaukaí ʻokú ne fakahaaʻi mai e ngaahi ʻuhinga ʻoku tau maʻu ki hono fai ʻo e ngaahi meʻá ni pe ngaahi ʻekitivitī kehe ʻo e ongoongoleleí (mahalo te tau fai kinautolu, hangē ko ʻení, ko ha fatongia pe ngafa ke fakafiefiaʻi e niʻihi kehé pe fakahōifua ki he Tamai Hēvaní).

  • ʻOku mahuʻinga nai e ʻuhinga ʻoku tau fai ai e ngāue ʻo e māʻoniʻoní? Ko hā hono ʻuhingá?

Tohi e ngaahi taumuʻa ko ʻení mo hono ngaahi folofolá ʻi he palakipoé (mahalo te ke fie maʻu ke fai ʻeni kimuʻa pea fai e kalasí):

Foakí: 3 Nīfai 13:1–4

Lotú: 3 Nīfai 13:5–6

ʻAukaí: 3 Nīfai 13:16–18

Fakamatalaʻi ʻoku ʻi he 3 Nīfai 13 e founga ʻoku hokohoko atu ai hono fakahinohino ʻe Sīsū Kalaisi ʻa e kau Nīfaí ʻi he temipalé pea akoʻi kinautolu kau ki he mahuʻinga ʻo ha ʻuhinga ʻa ha taha ki hono fai ʻo e foakí, lotú mo e ʻaukaí.

Fakaafeʻi e kau akó ke nau fili ha taha ʻo e ngaahi tefito ʻe tolu ʻoku hiki atu ʻi he palakipoé. Kole kiate kinautolu ke lau fakalongolongo e potufolofola ʻokú na fekauʻakí, pea fekumi ki he tali ki he ngaahi fehuʻi ko ʻení (mahalo te ke fie maʻu ke hiki e ngaahi fehuʻi ko ʻení ʻi he palakipoé):

  • Ko e hā e faʻahinga ʻuhinga ne fakatokanga ki ai e ʻEikí ʻi heʻetau fai e ʻekitivitī ko ʻení?

  • Ko e hā e founga ne pehē ʻe he ʻEikí ʻoku totonu ke tau fai ʻaki e ʻekitivitī ko ʻení?

Kimuʻa pea kamata e kau akó, mahalo ʻe tokoni ke fakamatalaʻi e mālualoí ko ha taha ʻoku fakaʻalingalelei pe lea ʻaki e meʻa kehe kae fai e meʻa kehe.

Fakafeʻi ha kau ako ke nau vahevahe e ngaahi tali ne nau maʻu ki he fehuʻi ʻe ua ko ʻení. (Mei heʻenau fekumí, ʻoku totonu ke ʻilo ʻe he kau akó ne fakatokanga ʻa e ʻEikí kau ki hono fai e ngaahi ngāue ʻo e māʻoniʻoní ke mamata ki ai e tangatá mo akoʻi ʻoku totonu ke tau fai e ngaahi ngāue ʻo e māʻoniʻoní ke fakahōifua ki heʻetau Tamai Hēvaní.) Ke tokoni ki he kau akó ke fakakaukau lahi ange pea mo moʻui ʻaki e ngaahi akonaki ʻa e Fakamoʻuí, fai ʻa e ngaahi fehuʻi koʻení:

  • ʻE tokoni pe uesia fēfē ʻe heʻetau ʻuhinga ki hono fai ʻo e ngaahi ngāue ʻa e māʻoniʻoní e founga ʻoku tau fai ai kinautolú?

  • Ko e hā ha ngaahi ʻuhinga māʻoniʻoni te ne ueʻi ha tokotaha ke ne fai ha foaki, lotu pe ʻaukai ʻi he liló?

Hiki ʻeni ʻi he palakipoé: Kapau te tau fai e ngaahi ngāue ʻo e māʻoniʻoní ke fakahōifua ki he Tamai Hēvaní …

  • Fakatatau ki he 3 Nīfai 13:4, 6, 18, ko e hā e tāpuaki ʻe maʻu ʻe kinautolu ʻoku nau fai e ngaahi ngāue ʻo e māʻoniʻoní ke fakahōifua ki he Tamai Hēvaní? (ʻI he tali mai ʻe he kau akó, fakakakato e fakamatala ko ʻení ʻi he palakipoé: Kapau te tau fai e ngaahi ngāue ʻo e māʻoniʻoni ke fakahōifua ki he Tamai Hēvaní, te Ne fakapaleʻi tauʻatāina kitautolu.)

Fakaafeʻi e kau akó ke kiʻi vakaiʻi ʻenau siví pea vakavakaiʻi ʻenau ʻuhinga ki hono fai ʻo e foakí, lotú mo e ʻaukaí. Fakalotolahiʻi kinautolu ke nau fakakaukau ki ha founga te nau moʻui ʻaki ai e ngaahi akonaki ʻa e Fakamoʻuí ke fakatupulaki ʻenau ʻuhinga ki hono fai ʻo e ngaahi meʻá ni pe ngaahi ʻekitivitī kehe hangē ko e ako folofolá, totongi vahehongofulú, maʻu lotú, pea mo hono maʻu ʻo e sākalamēnití.

3 Nīfai 13:19–24

Naʻe akonakiʻi ʻe Sīsū Kalaisi ʻa e kakaí ke nau tānaki e ngaahi koloa ʻi he langí

Hiki ʻa e ongo kupuʻi lea ko ʻení ʻi he palakipoé: Ngaahi Koloa ʻo e Māmaní mo e Ngaahi Koloa ʻo e Langí. Fakaafeʻi e kau akó ke nau aleaʻi e fehuʻi ko ʻení mo hano hoa:

  • Ko e hā ha niʻihi ʻo ha ngaahi sīpinga ʻo e ngaahi koloa ʻo e māmaní mo e ngaahi koloa ʻo e langí?

Hili hono maʻu ʻe he kau akó ha taimi ke aleaʻi mo honau hoá e fehuʻi ko ʻení, mahalo te ke kole ki ha niʻihi ke vahevahe ʻenau ngaahi talí mo e kalasí. Fakakaukau ke fakamatalaʻi ha sīpinga mei hoʻo moʻuí ʻo ha koloa ʻi he māmaní (te ke lava ʻo fakaʻaliʻali haʻo koloa) pea mo ha sīpinga ʻo ha koloa ʻi he langí (mahalo te ke fakaʻaliʻali ha tā ho fāmilí pe talanoa ki he mahuʻinga ʻo hoʻo fakamoʻoní). Fakaafeʻi ha tokotaha ako ke ne lau leʻo lahi e 3 Nīfai 13:19–23. Kole ki he kalasí ke nau muimui ʻi hono laú pea ʻai ke ʻilo e akonaki ne fai ʻe he Fakamoʻuí kau ki he fekumi ki he ngaahi koloa ʻo e māmaní mo e ngaahi koloa ʻo e langí.

  • Fakatatau ki he 3 Nīfai 13:19–20, ʻoku kehekehe fēfē ʻa e ngaahi koloa ʻo e māmaní mei he ngaahi koloa ʻo e langí?

  • ʻE fakahohaʻasi fēfē ʻe heʻetau fekumi ki he ngaahi koloa ʻo e māmaní ʻetau fekumi ki he ngaahi koloa ʻo e langí? (Mahalo te ke fie maʻu ke fakamahino ne ʻikai akoʻi ʻe he Fakamoʻuí ʻoku kovi ʻa e paʻangá mo e ngaahi koloa fakamāmaní; ka naʻá Ne fakamamafaʻi e mahuʻinga ʻo hono tuku hotau lotó ʻi he ngaahi koloa ʻo e langí ʻe tolongá.)

  • ʻOkú ke pehē ko e hā e ʻuhinga ʻo e kupuʻi lea “kapau … ʻoku lelei ho matá” 3 Nīfai 13:22? Te ke fakahaaʻi fēfē e mateakí ʻi hono tokonaki e ngaahi koloa ʻi he langí?

Fakaafeʻi ha tokotaha ako ke ne tohiʻi e foʻi lea ʻOtua ʻi ha laʻipepa pea tuku ia ʻi ha tafaʻaki ʻe taha ʻo e loki akó. Fakaafeʻi ha tokotaha ako ʻe taha ke tohiʻi e foʻi lea Fakamāmani ʻi ha laʻi pepa pea tuku ia ʻi he tafaʻaki ʻe taha ʻo e loki akó. Kole ki he tokotaha ako hono tolú ke tuʻu ʻi muʻa ʻi he kalasí pea hanga ki he laʻi pepa ʻoku tohi ai e ʻOtuá. Hokó, ʻai e tokotaha akó ke tafoki ʻo hanga ki he laʻi pepa ʻoku tohi ai e Fakamāmaní. Fakaafeʻi e tokotaha akó ke feinga ke ne hanga ki he ongo laʻi pepá ʻi he taimi tatau. Kole ki he kalasí ke nau lau fakalongolongo e 3 Nīfai 13:24 pea fakakaukau ki he fekauʻaki ʻa e veesi ko ʻení mo e feinga ʻa e tokotaha akó ke hanga ki he ongo laʻi pepá he taimi tatau. Fakamatalaʻi ʻoku fakafofongaʻi ʻe he foʻi lea koloá ʻa e fakamāmaní pe tuʻumālié.

  • ʻOku tatau fēfē ʻa e fekumi ki he ʻOtuá mo e koloá mo e feinga ke hanga fakatouʻosi ki he ongo tafaʻakí he taimi tataú?

  • Ko e hā ha ngaahi sīpinga ʻo e feinga ke ngāue maʻá e ʻOtuá mo e koloá ʻi he taimi tataú?

Fakaafeʻi e kalasí ke nau tuʻu ʻo hanga ki he laʻi pepa ʻoku tohi ai e ʻOtuá.

  • Ko e hā ʻoku mahuʻinga ai kiate koe ke hoko e ʻOtuá ko ho ʻeikí?

  • Fakatatau ki he folofola ʻa e Fakamoʻuí ʻi he 3 Nīfai 13:24, te ke tala fēfē ko ho ʻeikí e ʻOtuá? (Neongo ʻe lahi ha ngaahi tali ʻa e kau akó ʻe tonu, fakapapauʻi ʻoku nau ʻilo ʻa e tefitoʻi moʻoni ko ʻení: Ke hoko e ʻOtuá ko hotau ʻeikí, kuo pau ke tau ʻofa mo ngāue maʻá Na ʻo lahi ange ʻi he ngaahi meʻa ʻo e māmaní.)

Lolotonga e kei tuʻu ʻa e kau akó, lau e ngaahi sīpinga ʻi laló pea kole ke nau hanga ki he tafaʻaki ʻo e loki akó ʻoku nau pehē ʻoku ngāue ki ai e tokotahá—ʻOtuá pe Fakamāmaní (koloá). Kole ki he kau akó ke nau fakamatalaʻi e ʻuhinga ne nau fili ai ke hanga ki he tafaʻaki ko iá. (Mahalo te ke fie maʻu ke fakafeʻungaʻi e ngaahi sīpingá ke tatau mo e ngaahi tuʻunga mo e manako ʻa e kau ako ʻokú ke akoʻí.)

  1. Ne fakafisingaʻi ʻe ha talavou ha ngāue te ne fie maʻu ke nofo mei heʻene ngaahi fakataha he Sāpaté kae fili ha ngāue totongi siʻisiʻi ange ʻoku ʻikai fie maʻu ke nofo mei heʻene ngaahi fakatahá.

  2. Ko ha finemui ʻoku toutou hanu ki heʻene mātuʻá ʻi haʻane fie maʻu ha ngaahi vala foʻou. Ko e vala naʻá ne fie maʻu ke fakataú ʻoku mamafa ange ia he meʻa ʻe lava ke fakatau ʻe hono fāmilí.

  3. ʻOku totongi maʻu pē ʻe ha talavou ʻene vahehongofulú ʻaki e paʻanga ʻokú ne maʻu mei heʻene ngāué. Neongo iá, ʻokú ne fakaʻaongaʻi kotoa ʻene toenga vahé ke fakatau ha ngaahi meʻa fakafiefia kau ai ha ngaahi faiva pe hiva taʻe taau, pea ʻikai fakahaofi ha paʻanga ki ha ngāue fakafaifekau pe ako.

  4. Ko ha finemui ʻokú ne fakaʻaongaʻi ha konga ʻo ʻene vahé ke fakatau ha ngaahi meʻaʻofa iiki ke fakahaaʻi ʻaki ʻene ʻofa ki he niʻihi kehé.

Hili ʻa e ʻekitivitií, fakaafeʻi ʻa e kau akó ke nau tangutu pea fai ange e ngaahi fehuʻi ko ʻení:

  • Makatuʻunga mei hoʻo aʻusiá, ko e hā ʻoku faingataʻa ai ke ʻofa mo ngāue maʻu pē maʻá e ʻOtuá ʻi he ngaahi meʻa ʻo e māmaní? Ko e hā ʻoku lelei ai e ngāue ke fakamuʻomuʻa e ʻOtuá?

3 Nīfai 13:25–34

Ne tataki ʻe he Fakamoʻuí ʻa e kau ākonga ʻe toko hongofulu mā uá ke nau fekumi ki he puleʻanga ʻo e ʻOtuá kimuʻa ʻi heʻenau ngaahi fie maʻu fakamāmaní

Fakamatala fakanounouʻi e 3 Nīfai 13:25–31 ʻaki hono talaange ki he kau akó ne fakahinohinoʻi ʻe Sīsū Kalaisi ʻEne kau ākonga ʻe toko hongofulu mā ua ke ʻoua te nau hohaʻa ki heʻenau ngaahi fie maʻu fakamāmani ki he meʻakaí mo e valá. Fakamahinoʻi neongo ne fakataumuʻa e ngaahi akonaki ko ʻení ki he kau ākonga ʻe toko hongofulu mā uá, ʻoku malava ke ʻaonga e ngaahi tefitoʻi moʻoní fakalūkufua he ʻahó ni. Fakaafeʻi ha tokotaha ako ke ne lau leʻo lahi e 3 Nīfai 13:32–33 Kole ki he kalasí ke nau muimui ʻi hono laú pea ʻai ke ʻilo e founga ne fakanonga ai ʻe he Fakamoʻuí ʻEne kau ākongá kau ki he ngaahi fie maʻu fakamāmaní.

  • ʻOku tokoni fēfē kiate kitautolu ʻa hono ʻilo ʻoku ʻafioʻi ʻe he ʻOtuá ʻetau fie maʻú?

  • Fakatatau ki he 3 Nīfai 13:33, ko e hā ne talaʻofa ʻe Sīsū Kalaisi kiate kinautolu ʻoku nau fakamuʻomuʻa e ʻOtuá mo Hono puleʻangá ʻi heʻenau moʻuí? (Neongo ʻe founga kehekehe e tali ʻa e kau akó, fakapapauʻi ʻoku nau ʻilo ʻa e tefitoʻi moʻoni ko ʻení: Kapau te tau fuofua kumi ki he puleʻanga ʻo e ʻOtuá, te Ne tokoni ke maʻu ʻetau fie maʻú. Mahalo te ke fie maʻu ke hiki ʻa e tefitoʻi moʻoni ko ʻení ʻi he palakipoé.)

  • Te ke ongoʻi fēfē ʻi hano fakamuʻomuʻa ʻe hao kaungāmeʻa ofi pe mēmipa ʻo e fāmilí e meʻa ʻokú ke saiʻia aí mo fie maʻú ʻiate ia? Ko e hā e meʻa ʻoku tau talaange ki he Tamai Hēvaní mo e Fakamoʻuí ʻi heʻetau fakamuʻomuʻa Kinaua ʻi heʻetau ngaahi fie maʻu fakamāmaní mo e meʻa ʻoku tau saiʻia aí?

Fakaafeʻi e kau akó ke nau tohi ʻi he pepa akó pe tohinoa ako folofolá ha taumuʻa kau ki ha meʻa ʻe taha te nau lava ʻo fai ke fakamuʻomuʻa kakato ange e ʻOtuá ʻi heʻenau moʻuí. Mahalo te ke fie maʻu ke fakaʻosi ʻaki e lēsoní hono fakahoko hoʻo fakamoʻoní kau ki he ngaahi tāpuaki kuó ke aʻusia ʻi hoʻo feinga ke fakamuʻomuʻa e ʻOtuá mo Hono puleʻangá ʻi hoʻo moʻuí.