Lēsoni 160
Molonai 10:8–26, 30–34
Talateú
Hili hono akoʻi e founga ke maʻu ai ha fakamoʻoni ki he moʻoni ʻo e meʻa kotoa pē ʻo fakafou ʻi he Laumālie Māʻoniʻoní, ne naʻinaʻi ai ʻa Molonai kiate kinautolu te nau lau ʻa ʻene ngaahi leá ke nau maʻu pea ʻiloʻi ʻa e ngaahi meʻafoaki fakalaumālié. Ne fakaʻosi ʻa e lekooti ʻa Molonaí ʻaki ʻene naʻinaʻi ki he kakai kotoa pē ke nau haʻu kia Sīsū Kalaisi, pīkitai ki he meʻafoaki lelei kotoa ʻokú Ne foakí, pea hoko ʻo haohaoa ʻiate Ia.
Ngaahi Fokotuʻu ki hono Akoʻí
Molonai 10:8–26
ʻOku akoʻi ʻe Molonai ʻo kau ki he ngahi meʻafoaki ʻo e Laumālié mo honau taumuʻa ʻi he ngāue ʻa e ʻEikí
Fakaafeʻi e kau akó ke nau fakakaukau ki ha taimi ne tokoniʻi ai kinautolu ʻe he Tamai Hēvaní ke nau fai ha meʻa ne ʻikai te nau mei lava ʻo fai ʻiate kinautolu pē. Kole ki he kau akó ke nau lau fakalongolongo ʻa e Molonai 10:8 , ʻo kumi e kupuʻi lea ʻokú ne fakamatalaʻi e ngaahi meʻa ʻoku malava fakalaumālie pe ngaahi tāpuaki ʻoku foaki ʻe he ʻOtuá ki he kau faivelengá (“ngaahi meʻaʻofa ʻa e ʻOtuá”). Fakamatalaʻi ange ʻoku tau faʻa ui ʻa e ngaahi meʻafoaki ko ʻení ko e ngaahi meʻafoaki ʻo e Laumālié pe ngaahi meʻafoaki fakalaumālie.
-
Fakatatau mo e Molonai 10:8, ko e hā ʻoku foaki ai ʻe he ʻOtuá e ngaahi meʻafoaki ʻo e Laumālié ki Heʻene fānaú? (Hili e tali ʻa e kau akó, tohi ʻa e foʻi moʻoni ko ʻení ʻi he palakipoé: ʻOku foaki ʻe he ʻOtuá e ngaahi meʻafoaki ʻo e Laumālié ke ʻaonga ki Heʻene fānaú. Mahalo naʻa fie maʻu ke ke fakamatalaʻi ʻoku ʻuhinga ʻa e ʻaongá heni ke tāpuakiʻi pe tokoniʻi.)
Kole ange ki he kau akó ke lau fakalongolongo ʻa e Molonai 10:9–16 , kumi ʻa e ngaahi meʻaʻofa ʻa e ʻOtuá kuo fakamatalaʻi ʻe Molonai ʻi he ngaahi veesi ko ʻení. Mahalo naʻa fie maʻu ke fokotuʻu ange ki he kau akó ke nau fakaʻilongaʻi ʻa e meʻa ne nau ʻiló.
-
Ko e hā ha fē ʻa e ngaahi meʻafoaki ʻo e Laumālié naʻá ke ʻilo ʻi he ngaahi veesi ko ʻení? (Mahalo naʻa fie maʻu ke ke tohi ʻenau ngaahi talí ʻi he palakipoé ʻi he taimi te nau tali atu aí.)
-
Ko e hā ha ngaahi sīpinga ʻo e ngaahi meʻafoaki ko ʻení kuó ke mamata ai ʻi he Siasí?
-
Ko e fē ha taimi kuó ke mamata ai kuo maʻu ʻe ha kakai ha ngaahi tāpuaki koeʻuhí kuo ngāue ʻaki ʻe ha niʻihi kehe ʻa ʻenau ngaahi meʻafoaki fakalaumālié? (Mahalo naʻa fie maʻu ke ke mateuteu ke vahevahe ha sīpinga kuó ke mamata ai.)
-
ʻE ʻaonga fēfē ʻa e ngaahi meʻafoaki ʻo e laumālié ki he taha ʻokú ne maʻu kinautolu?
Fakaafeʻi ha tokotaha ako ke ne lau leʻolahi ʻa e Molonai 10:19, 24. Kole ki he kalasí ke nau muimui, mo kumi ha meʻa ʻokú ne fakafeʻatungiaʻi ʻa hono maʻu mo ʻiloʻi e ngaahi meʻafoaki fakalaumālié.
-
Ko e hā ha fakafeʻātungia ki hono maʻu mo ʻilo e ngaahi meʻafoaki fakalaumālie naʻá ke ʻilo?
-
ʻOkú ke pehē ko e hā e ʻuhinga ʻoku ʻikai ʻilo pe maʻu ai e mālohi mo e ngaahi meʻafoaki ʻa e ʻOtuá ʻe he kakai ʻoku ʻi he tuʻunga taʻetuí?
Fakaafeʻi ʻa e kau akó ke nau lau fakalongolongo ʻa e Molonai 10:25–26, kumi ʻa e meʻa ʻe hoko kiate kinautolu ʻoku nau fakafisingaʻi ʻa e ngaahi meʻafoaki moe mālohi ʻo e ʻOtuá. Kole ke nau lipooti ʻa e meʻa ʻoku nau ʻiló.
Fakaafeʻi ha niʻihi ʻo e kau akó ke nau lau leʻolahi ʻa e Molonai 10:20–23. Kole ki he kalasí ke nau muimui, pea kumi ha ngaahi tāpuaki ʻoku maʻu mei he tuí, ʻamanaki leleí, mo e manavaʻofá. (Kimuʻa pea lau ʻe he kau akó, te ke lava ʻo fakamatala ange ʻoku ʻuhinga ʻa e kupuʻi lea “ʻoku totonu ʻiate aú” ʻi he Molonai 10:23 ki he ngaahi meʻa ʻoku fenāpasi mo e finangalo ʻo e ʻOtuá.)
-
Ko e hā ha ngaahi tāpuaki ne akoʻi ʻe Molonai ʻe maʻu ʻe kinautolu ʻoku tui, ʻamanaki lelei mo manavaʻofá?
Hiki ʻa e tefitoʻi moʻoni ko ʻení ʻi he palakipoé ʻi he tali lolotonga e tali ko ia ʻa e kau akó: Kapau te tau tui, te tau lava ʻo fai ʻa e meʻa ʻoku finangalo ʻa e Fakamoʻuí ke tau faí. Mahalo naʻa fie maʻu ke ke fokotuʻu ange ke nau fakaʻilongaʻi e tefitoʻi moʻoni ko ʻení ʻi he Molonai 10:23.
-
ʻOkú ke pehē ko e hā nai e fekauʻaki ʻa e ongo tefitoʻi moʻoni he palakipoé? (Kapau te tau tui, ʻe foaki mai ʻe he ʻOtuá e ngaahi meʻafoaki ʻoku tau fie maʻú ke fakahoko e ngāue ʻokú Ne finangalo ke tau fakahokó.)
-
ʻE tokoni fēfē ʻetau ʻilo e ongo tefitoʻi moʻoni ko ʻení he taimí ni pea ʻi he kahaʻú?
Hiki e ngaahi fakamatala taʻe-kakato ko ʻení ʻi he palakipoé: Ke tokoni ke mahino ki he kau akó ʻa e founga kuo fakahoko pe lava ke fakahoko ai e palōmesi ʻi he Molonai 10:23 ʻi heʻenau moʻuí, ʻoange ha miniti siʻi ke nau fakafonu ai ha taha ʻo e ngaahi fakamatalá ʻi heʻenau pepa akó pe tohinoa ki he ako folofolá:
Ne u aʻusia e palōmesi ʻi he Molonai 10:23 ʻi he taimi…
ʻE lava ke tokoni mai ʻa e palōmesi ʻi he Molonai 10:23 ʻi he taimi …
Hili ha taimi feʻunga, fakaafeʻi e kau akó ke nau vahevahe ʻa e meʻa kuo nau tohí mo hanau hoa.
Molonai 10:30–34
ʻOku fakaafeʻi ʻe Molonai e taha kotoa ke haʻu kia Kalaisi pea hoko ʻo haohaoa ʻiate Ia
Tohiʻi e foʻi lea ko e Haohaoa he palakipoé. Tohiʻi ʻi lalo ʻa e Malava pe ʻikai malava?
Fakaafeʻi e kau akó ke vahevahe ʻenau fakakaukau fekauʻaki mo e fehuʻi ʻi he palakipoé. Hili hano aleaʻi taimi nounou, kole ange ki ha tokotaha ako ke ne lau leʻolahi ʻa e 3 Nīfai 12:48.
-
Ko e hā ne pehē ʻe he Fakamoʻuí ko e taumuʻa taupotu tahá ia kiate kitautolu takitaha? (Ke hoko ʻo haohaoa.) ʻE lava fēfē ke hoko ʻeni?
Hili hono vahevahe mai ʻe he kau akó ʻa ʻenau fakakaukaú, fakaafeʻi ha tokotaha ako ke ne lau e fakamatala ko ʻeni ʻa Palesiteni Sēmisi E. Fausi ʻo e Kau Palesitenisī ʻUluakí:
“Ko e haohaoá ko ha taumuʻa taʻengata ia. Neongo he ʻikai lava ke tau haohaoa ʻi he moʻui fakamatelié, ka ko ha fekau ke tau feinga ki ai, pea ʻi he Fakaleleí, te tau lava ke fai ia” (“This Is Our Day,” Ensign, May 1999, 19).
Fakamatalaʻi ange neongo he ʻikai lava ke maʻu e haohaoá ʻi he moʻui ni, ka ʻe faifai pē pea tau hoko ʻo haohaoa. Ne akoʻi ʻe Molonai ʻa e meʻa te tau lava ke fai ke haohaoa ai ʻi he Fakalelei ʻa Sīsū Kalaisí. Hiki ha tatau ʻo e saati ko ʻení ʻi he palakipoé, kae ʻoua naʻa hiki e ngaahi tali ʻoku haʻi atú.
|
Ko e hā kuo pau ke u faí … |
Ko e hā ʻoku talaʻofa mai ʻe he ʻOtuá … |
|---|---|
|
(ʻE lava ke kau ʻi he ngaahi talí ʻa e pau ke tau haʻu kia Sīsū Kalaisi; fekumi mo maʻu ʻa e ngaahi meʻafoaki leleí; fakaʻehiʻehi mei he ngaahi meʻafoaki ʻoku koví mo e ngaahi meʻa taʻemaʻá; fakafisi mei anga taʻe-māʻoniʻoni kotoa pē; pea ʻofa ki he ʻOtuá ʻaki hotau ivi, ʻatamai mo e mālohí kotoa.) |
(ʻE lava ke kau ʻi he ngaahi talí, te Ne fakahoko ʻEne ngaahi fuakavá; ʻe feʻunga ʻa ʻEne ʻaloʻofá maʻatautolu; te tau hoko ʻo haohaoa ʻia Sīsū Kalaisi; te tau maʻu e ʻaloʻofa ʻa e ʻOtuá; ʻe fakamāʻoniʻoniʻi kitautolu pea maʻu ha fakamolemole ʻo ʻetau ngaahi angahalá; pea te tau hoko ʻo māʻoniʻoni, ʻo taʻe-ha-mele.) |
Kole ki he kau akó ke nau kumi ʻi he Molonai 10:30–33 ha ngaahi kupuʻi lea ʻokú ne fakamatalaʻi ʻa e meʻa kuo pau ke tau faí mo e meʻa ʻoku talaʻofa mai e ʻOtuá te Ne fai ke tokoniʻi kitautolu ke tau hoko ʻo maʻa mo haohaoá. Fakaafeʻi ha tokotaha ako ke ne hiki e ngaahi tali ʻa e kau akó ʻi he ʻotu totonu ʻi he sātí. Fakamahino ange ko e foʻi lea ʻaloʻofá ʻoku ʻuhinga ia ki he tokoni fakalangi mo e fakamālohia ʻoku tau maʻu koeʻuhí ko e Fakalelei ʻa Kalaisí.
-
Ko e hā ha sētesi te ke tohiʻi ʻi lalo he saati ko ʻení ke fakamatalaʻi fakanounou e meʻa ʻoku akoʻi ʻe Molonai ʻo kau ki he hoko ʻo maʻa mo haohaoá? (ʻE lava ke fakaʻaongaʻi ʻe he kau akó ha ngaahi fakalea kehekehe, ka ʻoku totonu ke fakahaaʻi heʻenau ngaahi talí ʻa e foʻi moʻoni ko ʻení: ʻI heʻetau haʻu kia Sīsū Kalaisí, ʻe lava ke fakamaʻa mo fakahaohaoaʻi ai kitautolu ʻi Heʻene Fakaleleí.)
Kapau ʻe lava, ʻoange ki he kau akó ha tatau ʻo e lea ko ʻeni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi ha tokotaha ako ke ne lau leʻolahi ʻa e leá kae muimui pē ʻa e toenga ʻo e kalasí. Kimuʻa pea lau ia ʻe he tokotaha akó, poupouʻi e kalasí ke nau fakafanongo lelei, ʻo fakakaukau ki he meʻa te nau lava ʻo fai ke haʻu kia Sīsū Kalaisi tuʻunga ʻi heʻenau ako ʻo e Tohi ʻa Molomoná he taʻu ní.
“Ko e kole fakaʻosi mo fakaloloma ʻa e maka-tuʻu-loto ʻo ʻetau tui fakalotú pea mo e tohi totonu taha kuo faifai ange pea tohí ke ʻoua naʻa tau ala ki he meʻa taʻe-maʻá; ke tau māʻoniʻoni mo taʻe ha mele; ke tau haohaoa. Pea ʻe toki lava pē ke hoko mai ʻa e haohaoa ko iá ʻi he taʻataʻa ʻo e Lami naʻá ne fuesia ʻetau ngaahi faingataʻaʻiá mo e mamahí, ʻa e Lami ko ia ne fakalaveaʻi maʻa ʻetau ngaahi maumau fonó pea fakamamahiʻi ko ʻetau ngaahi angahalá, ʻa e Lami ne fehiʻanekinaʻi, fakamamahiʻi, ka ne ʻikai ke tau mahuʻingaʻia aí (vakai, Mōsaia 14). …
“Ko e haohaoa—ʻi he taʻataʻa ʻo e lamí. Ko e meʻa ia ʻoku kōlenga mai ʻe he tohi ní” (“A Standard unto My People” [address to CES religious educators, Aug. 9, 1994], 13–14, si.lds.org).
Kole ki he kau akó ke nau feinga ke ʻiloʻi ʻa e ngaahi kupuʻi lea ʻi he Molonai 10:32–33 ʻa ia ʻokú ne fakamamafaʻi te tau toki lava pē ʻo haohaoa “ʻia Kalaisi,” pe ʻi he mālohi fai fakamaʻa mo e ʻaloʻofa ʻo ʻEne Fakaleleí.
-
Ko e hā ʻoku tau fie maʻu ai ʻa e Fakalelei ʻa Sīsū Kalaisí ke tau maʻa mo haohaoá?
-
Ko e hā ha ngaahi kupuʻi lea ʻi he Molonai 10:32–33 ʻokú ke ʻilo ʻokú ne poupouʻi koe ʻi hoʻo feinga ke maʻa pea mo e taumuʻa taʻengata ʻo e haohaoá?
Fakaafeʻi e kau akó ke nau fili ha taha pe ua ʻo e ngaahi kupuʻi lea mei he ʻotu ʻuluaki ʻo e saati ʻi he palakipoé. ʻOange kiate kinautolu ha kiʻi taimi ke nau tohi ai ʻi heʻenau pepa akó pe tohinoa ako folofolá ha ngaahi fakakaukau pe ongo ʻoku nau maʻu ki he founga te nau lava ke toe lelei ange ai ʻi he ngaahi tafaʻaki ko ʻení.
Fakaʻosi e lēsoni ko ʻení ʻaki haʻo lau ki he kalasí e Molonai 10:34. Kole ki he kau akó ke nau muimui, pea kumi ha fakamoʻoni ne tui pea maʻu ʻe Molonai e ʻamanaki lelei ʻia Sīsū Kalaisi. Hili ʻenau lipooti e meʻa ne nau ʻiló, fakaafeʻi e kau akó ke tohi ha ngaahi fakakaukau pe ongo ʻoku nau maʻu ʻi hono fakaʻosi ko ia ʻo hono ako e Tohi ʻa Molomoná he taʻu ní. Fakakaukau ke fakaafeʻi e kau akó ke nau vahevahe mo e kalasí e meʻa ne nau tohí mo e kalasí. Fakamoʻoni ki he ngaahi tāpuaki kuo talaʻofa mai ʻe he Tamai Hēvaní ʻo kapau te nau haʻu kia Sīsū Kalaisi ʻaki e muimui ki Heʻene ngaahi akonakí pea tui ki Heʻene Fakaleleí. Fakalotolahiʻi e kau akó ke nau ʻai ke hoko hono ako e Tohi ʻa Molomoná ko ha meʻa te nau fai ʻi heʻenau moʻui kotoa.
Toe Fakamanatu ʻa Molonai
Tuku ha taimi ke tokoniʻi ai e kau akó ʻi hono fakamanatu e tohi ʻa Molonaí. Kole ange ke nau fakakaukau ki he meʻa ne nau ako mei he tohí ni, ʻi he seminelí pea mo ʻenau ako folofola fakatāutahá fakatouʻosi. ʻO ka fie maʻu, fakaafeʻi kinautolu ke nau fakamanatu nounou ha niʻihi ʻo e ngaahi fakamatala nounou ʻo e ngaahi vahe ʻi he tohi ʻa Molonaí. Hili ha taimi feʻunga, pea fakaafeʻi ha niʻihi ʻo e kau akó ke nau vahevahe ha meʻa mei he tohi ʻa Molonaí naʻá ne ueʻi fakalaumālie kinautolu pe tokoni ke nau maʻu ha tui lahi ange kia Sīsū Kalaisi.
Ngaahi Fakamatala Fakamahino mo e Puipuituʻá
Molonai 10:8–19. Ngaahi Meʻafoaki ʻo e Laumālié
Naʻe fakamatala ʻe ʻEletā Pulusi R. Makongikī ʻo kau ki he ngaahi taumuʻa mo e ngaahi ʻuhinga ke maʻu ai ha ngaahi meʻafoaki fakalaumālié:
“[Ko e taumuʻa ʻo e ngaahi meʻafoaki fakalaumālié] ke fakamāmaʻi, fakalotolahiʻi, mo langa hake ʻa e kau angatonú koeʻuhí ke nau lava ʻo maʻu ʻa e melinó ʻi heʻenau moʻuí pea ke tataki ʻa kinautolu ki he moʻui taʻengatá ʻi he maama ka hoko maí. ʻOku fakamoʻoniʻi ʻe he ngaahi meʻafoaki fakalaumālié ʻa e faka-ʻOtua ʻo e ngāue ʻa e ʻEikí; pea ko e feituʻu ʻoku ʻikai ke ʻiloʻi ai iá, ʻoku ʻikai ko e Siasi mo e puleʻanga ia ʻo e ʻOtuá. Kuo palōmesi he ʻikai lava ke toʻo atu ʻa e ngaahi meʻafoaki fakalaumālié mei māmani tuku kehe pē ʻi he taʻetuí (Molonai 10:19), ka ʻi he taimi ʻe hoko mai ai ʻa e ʻaho ʻo e fakahaohaoá pea maʻu ʻe he kāingalotú honau hākeakiʻí, he ʻikai ke toe fie maʻu kinautolu. Hangē ko hono fakalea ʻe Paulá, ‘ʻO ka hokosia ʻa ia ʻoku haohaoá, ʻe mole atu ʻa ia ʻoku fakakonga peé.’ (1 Kolinitō 13:10)
“ʻOku ʻi ai e ʻamanaki ke fekumi e kakai faivelengá ki he ngaahi meʻafoaki ʻo e Laumālié ʻaki honau lotó kotoa. ʻOku nau ʻholi lahi ki he ngaahi foaki fungani leleí’ (1 Kolinitō 12:31; T. & F. 46:8), ke ‘holi ki he ngaahi foaki fakalaumālié’ (1 Kolinitō 14:1), ‘ke kole ki he ʻOtuá, ʻa ia ʻokú ne foaki ʻo lahí.’T. & F. 46:7; Mātiu. 7:7–8). ʻOku foaki ki he niʻihi ʻa e meʻafoaki ʻe taha; ‘ki he niʻihi ke nau maʻu ʻa e ngaahi meʻafoaki ko iá kotoa pē, koeʻuhí ke ʻi ai ha ʻulu, koeʻuhí ke ʻaonga ki he kāingalotú kotoa pē.’ (T. & F. 46:29.)” ((Mormon Doctrine, 2nd ed. [1966], 314).
Ne akoʻi ʻe ʻEletā Māvini J. ʻEsitoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
“ʻOku hangē kiate au, ko e taha ʻo e ngaahi meʻa fakamamahi taha ʻo e moʻuí, ʻa e taimi ko ia ʻoku pehē ai ʻe ha tokotaha ʻoku ʻikai hano talēniti pe ngaahi meʻafoakí. …
“ʻOku tau maʻu e foʻi moʻoni ko ʻení mei he Tokāteline mo e Ngaahi Fuakava 46:11–12: ‘He ʻoku ʻikai ke foaki ʻa e meʻa-foaki kotoa pē ki he tangata kotoa pē; he ʻoku lahi ʻa e ngaahi meʻa-foakí, pea ʻoku foaki ha meʻa-foaki ki he tangata taki taha ʻi he Laumālie ʻo e ʻOtuá.’
“‘ʻOku foaki ki he niʻihi ʻa e meʻa-foaki ʻe taha, pea ki he niʻihi ʻa e meʻa-foaki kehe, koeʻuhí ke ʻaonga ia ki he kakai kotoa pē.’
“Kuo foaki mai ʻe he ʻOtuá kiate kitautolu takitaha ha talēniti makehe ʻe taha pe lahi ange. … ʻOku ʻatautolu leva ke tau fekumi pea fakatupulaki ʻa e ngaahi meʻafoaki kuo foaki mai ʻe he ʻOtuá. …
“ʻOku moʻui ʻa e ʻOtuá. ʻOkú Ne tāpuakiʻi kitautolu ʻaki ha ngaahi meʻafoaki. ʻI heʻetau fakatupulaki [mo] pea vahevahe e ngaahi meʻafoaki kuo ʻomi ʻe he ʻOtuá pea ʻinasi ʻi he lelei ʻo e ngaahi meʻafoaki ʻo kinautolu ʻoku tau feohí, ʻe lava [leva] ke hoko ʻa e māmaní ko ha feituʻu lelei ange pea lava ke ngaʻunu ke vave ange e ngāue ʻa e ʻOtuá kimuʻa” (“There Are Many Gifts,” Ensign, Nov. 1987, 20, 23).
Molonai 10:22. “ʻOku tupu ʻa e loto foʻí koeʻuhí ko e angahalá”
Ne vahevahe ʻe Palesiteni ʻEselā Tafu Penisoni ʻa e fakakaukau ko ʻeníi ʻo kau ki he fie maʻu ko ia ke fai lelei ke hao mei he loto-foʻí:
“ʻOku tau lau ʻi he Tohi ʻa Molomoná ʻoku ‘tupu ʻa e loto-foʻí koeʻuhí ko e angahalá.’ (Molonai 10:22.) Naʻe pehē ʻe ʻĒpalahame Lingikoni, ‘Ko e taimi ʻoku ou fai lelei aí, ʻoku ou ongoʻi sai, pea ko e taimi ʻoku ou fai kovi aí, ʻoku ou ongoʻi taʻeoliʻia.’ ʻOku hanga ʻe he angahalá ʻo tuku hifo ha tangata ke loto mamahi mo loto-foʻi. Neongo ʻe fiefia fakataimi ha tangata ʻi he angahalá, ka ko hono ikuʻangá ko e loto mamahi. ʻKuo teʻeki ai hoko ʻa e faiangahalá ko e fiefia.’ ( ʻAlamā 41:10.) ʻOku fakatupu ʻe he faiangahalá ʻa e fetōʻaki mo e ʻOtuá pea ʻoku fakamamahi ki he laumālié. Ko ia ai, ʻe lelei ki ha tangata ke ne vakaiʻi pe ʻokú ne uouangataha mo e ngaahi fono kotoa ʻa e ʻOtuá. ʻOku ʻomi ʻe hono tauhi ʻo e fono takitaha ha tāpuaki pau. ʻOku ʻomi ʻe he fono taki taha kuo maumauʻí ha fakamamahi pau. ʻOku totonu ke omi ʻa kinautolu ʻoku mafasia he loto-foʻí ki he ʻEikí, he ʻoku faingofua ʻa ʻEne haʻamongá pea maʻamaʻa ʻa Ene kavengá. (Vakai, Mātiu 11:28–30.)” (“Do Not Despair,” Ensign, Oct. 1986, 2).
Molonai 10:34. Ko e lea tuku ʻa Molonaí
Ne vahevahe ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he ngaahi lea fakaʻosi ʻa Molonai ʻi he Tohi ʻa Molomoná:
Haohaoá. Anga Māʻoniʻoní. ʻUlungaanga mo e konisēnisi taʻe hano mele. Ko e ngaahi meʻá ni kotoa ne fou mai ʻi he ʻaloʻofa ʻa Kalaisí, ʻa ia ʻokú ne fakamaʻa otau kofú, fakamāʻoniʻoniʻi hotua laumālié, fakahaofi kitautolu mei he maté, pea toe fakafoki kitautolu ki hotau tupuʻanga fakalangí.
“Ne fakamoʻoniʻi ʻe Molonai ʻi he fakaʻosi ʻo ʻene moʻuí ʻa ʻene tui taʻeueʻia ʻi ha huhuʻi fakalangi pehē. …
“Ko ia ai ne fakaʻosi ʻaki e Tohi ʻa Molomoná, ʻa e talaʻofa ʻa Molonai ʻo e Toetuʻu Māʻoniʻoní. [Vakai, Fakahā 14:6.] ʻOku feʻunga pē ia, he ko e fakamoʻoni toputapu ko ʻení—ʻa ia ne hiki ʻe he kau palōfitá, ʻoatu ia ʻe he kau ʻāngeló, maluʻi ʻe he ʻOtuá—ʻoku lea ia ʻo hangē ‘ko ha taha ʻoku kalanga mei he maté,’ pea naʻinaʻi ki he taha kotoa ke haʻu kia Kalaisi pea hoko ʻo haohaoa ʻiate Ia, ʻa ia ko hono tumutumú ko hono aʻusia ʻa e haohaoa ʻo e nāunau fakasilesitialé” (Christ and the New Covenant: The Messianic Message of the Book of Mormon [1997], 339).