មេរៀនទី 133 ៖ នីហ្វៃទី 3 27

មេរៀនទី 133

នីហ្វៃ ទី 3 27

សេចក្តីផ្ដើម

ក្រោយពីកិច្ចការបម្រើរបស់ព្រះអង្គសង្គ្រោះនៅក្នុងចំណោមពួកសាសន៍នីហ្វៃមិនយូរប៉ុន្មាន ពួកដប់ពីរដែលត្រូវបានហៅថ្មីថាជាពួកសាវកសាសន៍នីហ្វៃបានជួបប្រជុំគ្នានៅក្នុងការអធិស្ឋាន និងការតមអាហារដ៏ខ្លាំងក្លាមួយ ។ ព្រះយេស៊ូវគ្រីស្ទបានលេចឡើងចំពោះពួកគេ ហើយបានឆ្លើយតបនឹងសំណួរដែលពាក់ព័ន្ធនឹងឈ្មោះដែលពួកគេដាក់សម្រាប់សាសនាចក្រ ។ ទ្រង់បានបង្រៀនពួកគេអំពីដំណឹងល្អរបស់ទ្រង់ និងបានបញ្ជាពួកគេឲ្យក្លាយដូចជាទ្រង់ ។

យោបល់ទំាងឡាយសម្រាប់ការបង្រៀន

នីហ្វៃទី 3 27:1–12

ព្រះយេស៊ូវគ្រីស្ទបង្រៀនដល់ពួកសាវកដប់ពីរនាក់ថា សាសនាចក្ររបស់ទ្រង់គួរដាក់តាមព្រះនាមរបស់ទ្រង់

សូមបំបែកសិស្សទៅជាបី ឬបួនក្រុម ។ ប្រសិនបើអ្នកមានសិស្សតិច សូមឲ្យសិស្សធ្វើការរៀងៗខ្លួន ។ សូមឲ្យក្រុមនីមួយៗ ( ឬ បុគ្គលម្នាក់ៗ ) ស្រមៃថា ពួកគេនឹងចាប់ផ្ដើមក្លិប ឬក្រុមកីឡាថ្មីមួយ ។ សូមឲ្យក្រុមនីមួយៗសម្រេចចិត្តនូវប្រភេទនៃក្លិប ឬក្រុមកីឡាដែលពួកគេនឹងបង្កើត ដូចជាក្លិបវិទ្យាសាស្ដ្រ ឬក្រុមបាល់ទាត់ ហើយបន្ទាប់មក សូមឲ្យពួកគេជ្រើសរើសឈ្មោះមួយសម្រាប់ក្លិបរបស់គេ ។ សូមឲ្យក្រុមនីមួយៗសរសេរឈ្មោះរបស់ពួកគេនៅលើក្រដាសមួយ ។ បន្ទាប់មក សូមប្រមូលក្រដាសពីក្រុមទាំងឡាយ ។ ( សកម្មភាពនេះគួរតែខ្លី ។ វាមិនគួរស៊ីពេល ឬការយកចិត្តទុកដាក់ខ្លាំងជាងលើគោលលទ្ធិ និងគោលការណ៍ទាំងឡាយនៅក្នុង នីហ្វៃទី 3 27 ឡើយ ) ។

សូមអានឮៗនូវឈ្មោះលើក្រដាសនីមួយៗ ។ ក្រោយពីអ្នកអានឈ្មោះរួចហើយ សូមឲ្យសិស្សទាយ ដោយផ្អែកលើឈ្មោះ ប្រភេទនៃក្លិប ឬក្រុមនោះ ។

តើឈ្មោះមួយអាចទាក់ទងទៅនឹងក្លិប និងសមាជិករបស់ក្លិបនោះយ៉ាងណា ?

សូមពន្យល់ថា ភ្លាមៗក្រោយពីការយាងមករបស់ព្រះយេស៊ូវគ្រីស្ទទៅជួបនឹងសាសន៍នីហ្វៃ ពួកសាវកសាសន៍នីហ្វៃទាំងដប់ពីររូបរបស់ទ្រង់បានរួមគ្នាតមអាហារ និងអធិស្ឋាន ( សូមមើល នីហ្វៃទី 327:1 ) ។ សូមឲ្យសិស្សពីរបីនាក់ប្ដូរវេនគ្នាអានឮៗពី នីហ្វៃទី 3 27:2–7 ។ សូមឲ្យសិស្សក្នុងថ្នាក់មើលតាម ដោយរកមើលសំណួររបស់សាវក និងចម្លើយរបស់ព្រះអង្គសង្គ្រោះ ។

តើព្រះអង្គសង្គ្រោះបានមានបន្ទូលយ៉ាងណាអំពីរបៀបដែលត្រូវហៅសាសនាចក្ររបស់ទ្រង់ ?
តើហេតុអ្វីបានជាទ្រង់ដាក់ឈ្មោះសាសនាចក្រតាមព្រះនាមរបស់ទ្រង់ ?

សូមឲ្យសិស្សស្រាវជ្រាវ នីហ្វៃទី 3 27:8–12 ដោយស្ងាត់ៗដោយរកមើលការរៀបរាប់របស់ព្រះអង្គសង្គ្រោះអំពីសាសនាចក្រដ៏ពិតរបស់ទ្រង់ ។ ខណៈពេលដែលពួកគេសិក្សា សូមសរសេរឃ្លាមិនពេញលេញខាងក្រោមនៅលើក្តារខៀន៖

សាសនាចក្រដ៏ពិតរបស់ព្រះយេស៊ូវគ្រីស្ទត្រូវតែ …

ក្រោយពីសិស្សបានមានពេលគ្រប់គ្រាន់សិក្សាខគម្ពីរទាំងនេះហើយ សូមសួរពួកគេពីរបៀបដែលពួកគេនឹងបំពេញប្រយោគនៅលើក្ដារខៀនដោយផ្អែកលើអ្វីដែលពួកគេបានអាន ។ ( សិស្សនឹងអាចរកឃើញនូវសេចក្ដីពិតខាងក្រោមនេះ ៖ សាសនាចក្រដ៏ពិតរបស់ព្រះយេស៊ូវគ្រីស្ទត្រូវតែបានហៅតាមព្រះនាមរបស់ទ្រង់ ហើយត្រូវបានកសាងឡើងលើដំណឹងល្អរបស់ទ្រង់ )។

តើអ្នកគិតថា ហេតុអ្វីបានជាវាសំខាន់ដែលសាសនាក្ររបស់ព្រះអង្គសង្គ្រោះមានព្រះនាមរបស់ទ្រង់ ?
តើអ្នកគិតថា វាមានន័យយ៉ាងណាដែលសាសនាចក្រត្រូវបាន « កសាងឡើងនៅលើដំណឹងល្អ [ របស់ទ្រង់ ] » ? ( នីហ្វៃ ទី 3 27:10 ) ។ អ្នកគិតថា ហេតុអ្វីបានជាវាសំខាន់ដែលសាសនាក្រត្រូវបានកសាងឡើងនៅលើដំណឹងល្អរបស់ទ្រង់ជាជាងលើកិច្ចការរបស់មនុស្ស ?

សូមឲ្យសិស្សបំពេញប្រយោគខាងក្រោមនៅក្នុងសៀវភៅកំណត់ហេតុការសិក្សាព្រះគម្ពីរ ឬ សៀវភៅសរសេរ ៖ « ការក្លាយជាសមាជិកសាសនាចក្រនៃព្រះយេស៊ូវគ្រីស្ទគឺសំខាន់សម្រាប់ខ្ញុំដោយសារ …»

នីហ្វៃទី 3 27:13–22

ព្រះយេស៊ូវគ្រីស្ទផ្ដល់និយមន័យដំណឹងល្អរបស់ទ្រង់ និងបង្រៀនអ្វីដែលយើងត្រូវធ្វើដើម្បីឈរដោយឥតកំហុស នៅចំពោះព្រះភក្ត្រទ្រង់ និងព្រះបិតារបស់ទ្រង់

សូមឲ្យសិស្សគិតអំពីរបៀបដែលពួកគេបានមានអារម្មណ៍ នៅពេលពួកគេត្រូវបានគេចាប់ថាពួកគេបានធ្វើអ្វីមួយខុស ។ ( សូមកុំឲ្យពួកគេចែកចាយបទពិសោធន៍ទាំងនេះ ) ។ បន្ទាប់មក សូមឲ្យពួកគេស្រមៃថាតើការឈរនៅចំពោះព្រះភក្ត្រព្រះអម្ចាស់ដើម្បីកាត់សេចក្ដីមានទិដ្ឋភាពបែបណា ។ សូមលើកទឹកចិត្តពួកគេឲ្យសញ្ជឹងគិតពីសំណួរខាងក្រោម ៖

តើអ្នកនឹងមានអារម្មណ៍យ៉ាងណា នៅពេលអ្នកនៅចំពោះព្រះភក្ត្រព្រះអម្ចាស់ ប្រសិនបើអ្នកមានទោសនោះ ?

សូមពន្យល់ថាពាក្យ ដំណឹងល្អ មានន័យថា « ព័ត៌មានល្អ » ។ សូមឲ្យសិស្សពីរបីនាក់ប្ដូរវេនគ្នាអានឮៗក្នុង នីហ្វៃទី 3 27:13–16 ហើយសូមឲ្យសិស្សរកមើលដំណឹងល្អនៅក្នុងខគម្ពីរទាំងនេះ ។ សូមឲ្យពួកគេគិតផងដែរអំពីរបៀបដែលដំណឹងល្អនេះទាក់ទងនឹងថ្ងៃដែលពួកគេនឹងឈរនៅមុខព្រះដើម្បីកាត់សេចក្ដី ។

ព្រះអង្គសង្គ្រោះបានថ្លែងទីបន្ទាល់ថា ទ្រង់បានមកកាន់ពិភពលោកដើម្បីធ្វើតាមព្រះឆន្ទៈរបស់ព្រះវរបិតារបស់ទ្រង់ ។ យោងតាម នីហ្វៃទី 3 27:14 តើព្រះវរបិតាសួគ៌បានបញ្ជូនព្រះយេស៊ូវគ្រីស្ទមកកាន់ពិភពលោកដើម្បីធ្វើអ្វី ?
ដោយផ្អែកលើ នីហ្វៃទី 3 27:13–14 តើអ្វីគឺជាគ្រឹះនៃដំណឹងល្អ ? ( ទោះបីជាសិស្សអាចប្រើពាក្យខុសគ្នាក្ដី ក៏ពួកគេគួររកឃើញនូវសេចក្ដីពិតខាងក្រោមនេះ ៖ គ្រឹះនៃដំណឹងល្អគឺថា ព្រះយេស៊ូវគ្រីស្ទបានធ្វើតាមព្រះឆន្ទៈរបស់ព្រះបិតាទ្រង់ដើម្បីសម្រេចបានដង្វាយធួន ។ អ្នកអាចសុំឲ្យសិស្សសរសេរសេចក្ដីពិតនេះនៅក្នុងព្រះគម្ពីររបស់គេក្បែរ នីហ្វៃទី 3 27:13–14 ) ។
ដោយសារព្រះអង្គសង្គ្រោះបានបំពេញតាមព្រះឆន្ទៈរបស់ព្រះបិតាទ្រង់ តើនឹងមានអ្វីកើតឡើងដល់មនុស្សលោក? ( យើងនឹងត្រូវបានលើកឡើងនៅចំពោះទ្រង់ដើម្បីកាត់សេចក្ដីតាមកិច្ចការរបស់យើង ។ )

សូមឲ្យសិស្សស្រាវជ្រាវ នីហ្វៃទី 327:16 ដោយស្ងៀមសា្ងត់ ដោយរកមើលកិច្ចការដែលយើងត្រូវធ្វើដើម្បីទទួលបានពរជ័យទាំងឡាយនៃដង្វាយធួន និងរៀបចំសម្រាប់ការកាត់សេចក្ដី ។ សូមឲ្យសិស្សរៀបរាប់ពីអ្វីដែលពួកគេរកឃើញ ។ សុំឲ្យសិស្សសរសេរចម្លើយរបស់ពួកគេនៅលើក្តារខៀន ។

យោងតាមខគម្ពីរនេះ តើពរជ័យអ្វីដែលនឹងកើតមាន ដល់អ្នកដែលប្រែចិត្ត ជ្រមុជទឹក និងកាន់ខ្ជាប់ដរាបដល់ចុងបំផុត ? ( ចម្លើយរបស់សិស្សអាចឆ្លុះបញ្ចាំងអំពីសេចក្ដីពិតខាងក្រោមនេះ ៖ ប្រសិនបើយើងប្រែចិត្ត ជ្រមុជទឹក និងកាន់ខ្ជាប់ដរាបដល់ចុងបំផុត យើងនឹងគ្មានទោសឡើយ នៅពេលយើងឈរនៅចំពោះព្រះដើម្បីកាត់សេចក្ដីនោះ ) ។

សូមឲ្យសិស្សម្នាក់អាន នីហ្វៃទី 3 27:17–19 ឮៗ ។ សូមឲ្យសិស្សក្នុងថ្នាក់មើលតាម ដោយរកមើលអ្វីដែលនឹងកើតឡើងដល់អ្នកណាដែលមិនប្រែចិត្ត ឬស៊ូទ្រាំដល់ទីបញ្ចប់ ។

ចេញពីអ្វីដែលអ្នកបានអាន ហេតុអ្វីបានជាកូនចៅរបស់ព្រះវរបិតាសួគ៌ទាំងអស់ត្រូវ ការដង្វាយធួនរបស់ព្រះយេស៊ូវគ្រីស្ទ ?
តើមានដំណឹងល្អអ្វីសម្រាប់យើង នៅពេលយើងគិតអំពីការឈរនៅចំពោះព្រះភក្ត្រព្រះអម្ចាស់ដើម្បីកាត់សេចក្ដី ?

សូមឲ្យសិស្សម្នាក់អានឮៗនូវសេចក្ដីថ្លែងការណ៍ខាងក្រោមដោយអែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់ ៖

« ‹ ដំណឹងល្អ › [ គឺ ]ថា សេចក្ដីស្លាប់ និងនរក [ អាច ]ត្រូវបានរួចផុត ថាកំហុស និងអំពើបាប[ អាច ]ត្រូវបានយកឈ្នះ ថាមានសេចក្ដីសង្ឃឹម ថាមានជំនួយ ថាការណ៍កំបាំងនឹងត្រូវដោះស្រាយ ថាសត្រូវត្រូវបានបង្រ្កាប ។ ដំណឹងល្អគឺថាផ្នូររបស់ មនុស្សគ្រប់គ្នា [ នឹង ]ត្រូវទទេនៅថ្ងៃមួយ ថាព្រលឹងរបស់មនុស្សគ្រប់គ្នា[ អាច ]បរិសុទ្ធម្ដងទៀត ថាកូនរបស់ព្រះ គ្រប់រូប[ អាច ]ត្រឡប់មកកាន់ព្រះបិតា ដែលបានប្រទានជីវិតដល់ពួកគេម្ដងទៀត » ( « Missionary Work and the Atonement » Ensign ខែ មីនា ឆ្នាំ 2001 ទំព័រ 8, 10 ) ។

សូមឲ្យសិស្សម្នាក់អាន នីហ្វៃទី 3 27:20–21 ឮៗ ហើយសូមឲ្យសិស្សក្នុងថ្នាក់រកមើលការអញ្ជើញរបស់ព្រះអង្គសង្គ្រោះចំពោះយើង ។

តើអ្វីទៅជាការអញ្ជើញរបស់ព្រះអង្គសង្គ្រោះនៅក្នុងខគម្ពីរទាំងនេះ ?

ដើម្បីជួយសិស្សឲ្យគិតអំពីការខិតខំរបស់គេក្នុងការទទួលការអញ្ជើញនេះ សូមឲ្យពួកគេឆ្លើយតបនឹងសំណួរខាងក្រោមនៅក្នុងសៀវភៅកំណត់ហេតុការសិក្សាព្រះគម្ពីរ ឬ សៀវភៅសរសេរ ។ ( អ្នកអាចសរសេរសំណួរនេះនៅលើក្ដារខៀន ឬអានវាយឺតៗដើម្បីឲ្យសិស្សអាចកត់វាបាន )។

ហេតុអ្វីបានជាព្រះអង្គសង្គ្រោះសព្វព្រះទ័យឲ្យអ្នកប្រែចិត្ត ហើយមករកទ្រង់ ?
តើអ្នកទទួលយកការអញ្ជើញរបស់ព្រះអង្គសង្គ្រោះនៅក្នុង នីហ្វៃទី 3 27:20–21 ដោយរបៀបណា ?
តើអ្នកអាចធ្វើអ្វីខ្លះនាថ្ងៃនេះដើម្បីរៀបចំឈរដោយឥតមានកំហុសនៅចំពោះព្រះភក្ដ្រព្រះអម្ចាស់នោះ ?

សូមឲ្យសិស្សម្នាក់អាន គោលលទ្ធិ និង សេចក្តីសញ្ញា 76:40–42 ឮៗ ។ សូមឲ្យសិស្សក្នុងថ្នាក់មើលតាម ដោយរកមើលការយល់ដឹងបន្ថែមទៀតអំពីមូលហេតុដែលដំណឹងល្អគឺជាព័ត៌មានដ៏ល្អមួយ ។ ( អ្នកអាចសុំឲ្យសិស្សសរសេរ គ. និង ស. 76:40–42 នៅក្នុងព្រះគម្ពីររបស់គេក្បែរ នីហ្វៃទី 3 27:13 )។

នៅដើមមេរៀននេះ អ្នកបានសុំឲ្យសិស្សសញ្ជឹងគិតអំពីអារម្មណ៍ដែលពួកគេអាចមាននៅចំពោះព្រះភក្ដ្រព្រះអម្ចាស់ ប្រសិនបើពួកគេមានកំហុស ។ នៅចំណុចនេះនៃមេរៀន សូមឲ្យពួកគេសញ្ជឹងគិតពីអារម្មណ៍ដែលពួកគេអាចមានចំពោះព្រះភក្ត្រព្រះអង្គសង្គ្រោះ ប្រសិនបើពួកគេបានស្អាតបាតតាមរយៈដង្វាយធួនរបស់ទ្រង់ និងដោយការគោរពតាមគោលការណ៍ ព្រះបញ្ញត្តិទាំងឡាយ និងពិធីបរិសុទ្ធនៃដំណឹងល្អ ។

ប្រសិនបើអ្នកអាចនិយាយជាមួយនឹងព្រះអង្គសង្គ្រោះនៅពេលនោះ តើអ្នកនឹងនិយាយអ្វី ?
ដោយផ្អែកលើអ្វីដែលបានសិក្សាថ្ងៃនេះ តើអ្នកនឹងពន្យល់ពីដំណឹងល្អនៃព្រះយេស៊ូវគ្រីស្ទដល់មិត្តដោយរបៀបណា ?

ធ្វើទីបន្ទាល់អំពីព្រះយេស៊ូវគ្រីស្ទ

ដង្វាយធួននៃព្រះយេស៊ូវគ្រីស្ទគឺជាមូលដ្ឋាននៃសេចក្តីពិតដែលគោលលទ្ធិ និងគោលការណ៍ទាំងឡាយនៃដំណឹងល្អទាំងអស់បានស្ថាបនាលើ ។ វាគួរតែជាស្នូលនៃរាល់ការបង្រៀន និងការរៀនសូត្រពីដំណឹងល្អ ។ សូមរកមើលឱកាសដើម្បីធ្វើទីបន្ទាល់ជាញឹកញាប់អំពីព្រះយេស៊ូវគ្រីស្ទ ហើយជួយសិស្សឲ្យបង្កើនសេចក្ដីស្រឡាញ់លើទ្រង់ និងបំណងចង់ក្លាយជាសិស្សដ៏ពិតរបស់ទ្រង់ ។

នីហ្វៃទី 3 27:23–33

ព្រះយេស៊ូវគ្រីស្ទណែនាំពួកសិស្សរបស់ទ្រង់ឲ្យក្លាយដូចជាទ្រង់

សូមសង្ខេប នីហ្វៃទី 327:23–26 ដោយការពន្យល់ថា ព្រះអង្គសង្គ្រោះបានប្រទានការណែនាំដល់ពួកសាវកសាសន៍នីហ្វៃទាំងដប់ពីររបស់ទ្រង់ និងបានបង្រៀនពួកលោកអំពីការទទួលខុសត្រូវរបស់ពួកលោក ។ សូមឲ្យសិស្សអាន នីហ្វៃទី 327:27 ដោយស្ងៀមស្ងាត់ដោយរកមើលព្រះបញ្ញត្តិដែលទ្រង់បានប្រទានដល់ពួកសាវកដើម្បីជួយពួកគេឲ្យបំពេញតួនាទីជាចៅក្រមរបស់ប្រជាជន ។

ហេតុអ្វីបានជាវាសំខាន់សម្រាប់ចៅក្រមរបស់ប្រជាជនដើម្បីក្លាយដូចជាព្រះអង្គសង្គ្រោះ ?

សូមឲ្យសិស្សរំឭក នីហ្វៃទី 327:21 ។

តើព្រះអង្គសង្គ្រោះបានបញ្ជាពួកសិស្សឲ្យធ្វើអ្វី ?
តើអ្វីទៅជាទំនាក់ទំនងរវាងការធ្វើកិច្ចការរបស់ព្រះអង្គសង្គ្រោះ និងការក្លាយដូចជាទ្រង់ ?

នៅពេលសិស្សពិភាក្សាពីសំណួរនេះ សូមសរសេរគោលការណ៍ខាងក្រោមនៅលើក្ដារខៀន ៖ ព្រះអម្ចាស់រំពឹងថាពួកសិស្សរបស់ទ្រង់ធ្វើកិច្ចការរបស់ទ្រង់ ហើយក្លាយដូចជាទ្រង់ ។

តើមានរបៀបណាខ្លះដែលយើងអាចក្លាយដូចជាព្រះអង្គសង្គ្រោះ ? តើមានកិច្ចការណាខ្លះដែលយើងអាចធ្វើ នៅពេលយើងធ្វើតាមគំរូរបស់ទ្រង់ ?
តើអ្នកធ្លាប់ត្រូវបានប្រទានពរ នៅពេលអ្នកបានព្យាយាមធ្វើតាមគំរូរបស់ព្រះអង្គសង្គ្រោះតាមវិធីណាខ្លះ ?

សូមបញ្ចប់មេរៀនដោយធ្វើទីបន្ទាល់អំពីពរជ័យដែលកើតមាន នៅពេលយើងខិតខំដើម្បីក្លាយដូចជាព្រះយេស៊ូវគ្រីស្ទ ។

វិចារណកថា និង ព័ត៌មានសាច់រឿង

នីហ្វៃទី 3 27:8 ។ ឈ្មោះរបស់សាសនាចក្រ

គណៈប្រធានទីមួយបានថ្លែងថា ៖

« ការប្រើឈ្មោះដែលបានបង្ហាញនេះ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ (គ. និង ស. 115:4) គឺជាការណ៍ដ៏សំខាន់ចំពោះការទទួលខុសត្រូវរបស់យើងដើម្បីប្រកាសពីព្រះនាមរបស់ព្រះអង្គសង្គ្រោះទៅកាន់ពិភពលោកទាំងមូល ។ ដោយអនុលោមតាមនេះ យើងសុំស្នើថា នៅពេលយើងសំដៅទៅសាសនាចក្រ នោះយើងប្រើឈ្មោះពេញរបស់សាសនាចក្រពេលណាអាចធ្វើបាន » ( First Presidency letter ថ្ងៃទី 23 ខែ កុម្ភៈ ឆ្នាំ 2001 ) ។

ប្រធាន ហារ៉ូល ប៊ី លី បាន បង្រៀន ថា ៖

« នៅពេលទ្រង់ [ ព្រះអម្ចាស់ ] បានបើកសម្ដែងឈ្មោះដែលសាសនាចក្រត្រូវបានហៅនេះ ទ្រង់បានប្រើការបង្ហាញដ៏គួរឲ្យចាប់អារម្មណ៍មួយចំនួន ។ ទ្រង់បានមានបន្ទូលថា ‹ ដ្បិតសាសនាចក្ររបស់យើងនឹងត្រូវបានហៅថាដូច្នោះ ហើយនៅគ្រាចុងក្រោយបង្អស់ គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ › (គ. និង ស. 115:4 ) ។

« ពាក្យ the ( ជាភាសាអង់គ្លេស ) សំខាន់ ៖ មិនមែនគ្រាន់តែពាក្យ Church of Jesus Christ of Latter-day Saintsសំខាន់នោះទេ ការនិយាយថា ‹ The Church › គឺញែកន័យនៃពាក្យនេះថាជាសាសនាចក្រដ៏ពិតតែមួយគត់នៅលើផែនដីនេះ ។ ទ្រង់មិនបានមានបន្ទូលថាសាសនាចក្រមរមនឡើយ ទ្រង់ក៏មិនបានមានបន្ទូលថាព្រះវិហារ LDS ដែរ ប៉ុន្ដែប្រយោគដ៏ច្បាស់ រឹងមាំ ប្រាកដគឺថា ‹ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ › » ( « The Way to Eternal Life » Ensign ខែ វិច្ឆិកា ឆ្នាំ 1971 ទំព័រ 13 ) ។

នីហ្វៃទី 3 27:13–21 ។ ដំណឹងល្អនៃព្រះយេស៊ូវគ្រីស្ទ

ព្យាការី យ៉ូសែប ស៊្មីធ បានពន្យល់ពីសារលិខិតដ៏សំខាន់នៃដំណឹងល្អនៃព្រះយេស៊ូវគ្រីស្ទ ។

« គោលការណ៍គ្រឹះនៃសាសនារបស់យើង គឺទីបន្ទាល់អំពីពួកសាវក និងពួកព្យាការី អំពីព្រះយេស៊ូវគ្រីស្ទ ថាទ្រង់បានសុគត បានបញ្ចុះ ហើយបានរស់ឡើងវិញម្ដងទៀតនៅថ្ងៃទីបី ហើយបានយាងឡើងទៅស្ថានសួគ៌ ហើយអ្វីៗផ្សេងទៀតទាំងអស់ ដែលទាក់ទងនឹងសាសនារបស់យើង គឺជាសេចក្ដីបន្ថែមទៅលើវាប៉ុណ្ណោះ » (Teachings of Presidents of the Church: Joseph Smith [ ឆ្នាំ 2007 ] ទំព័រ 49) ។

អែលឌើរ រ័សុល អិម ណិលសុន នៃកូរ៉ុមនៃពួកសាវកដប់ពីរនាក់បានបង្រៀនថា ៖

« ពាក្យ ដំណឹងល្អ មានន័យថា ‹ ព័ត៌មានល្អ › ។ ព័ត៌មានល្អគឺជាព្រះអម្ចាស់យេស៊ូវគ្រីស្ទ និងសារនៃសេចក្តីសង្គ្រោះរបស់ទ្រង់ ។ [ សូមមើល Bible Dictionary «Gospels» ទំព័រ 682–683 ]។ ព្រះយេស៊ូវបានប្រៀបធៀបដំណឹងល្អទៅនឹងបេសកកម្មរបស់ទ្រង់ និងការបម្រើរបស់ទ្រង់នៅក្នុងជីវិតរមែងស្លាប់ ។ នៅក្នុងកថាថ្លែងពី គោលបំណង របស់ទ្រង់ ព្រះយេស៊ូវបានមានបន្ទូល ៖

« នេះគឺជាដំណឹងល្អដែលយើងបានប្រទានដល់អ្នករាល់គ្នា—គឺយើងបានមកឯលោកិយនេះដើម្បីធ្វើតាមព្រះហឫទ័យនៃព្រះវរបិតារបស់យើ ពីព្រោះព្រះវរបិតារបស់យើង ទ្រង់បានចាត់ឲ្យយើងមក ។

« ‹ ហើយព្រះវរបិតាយើង ទ្រង់បានចាត់ឲ្យយើងមក ដើម្បីឲ្យយើងអាចត្រូវបានលើកឡើងលើឈើឆ្កាង › [នីហ្វៃទី 3 27:13–14] ។

« បេសកកម្មខាងសាច់ឈាមរបស់ព្រះអង្គសង្គ្រោះដែលយើងដឹងនោះគឺ ដង្វាយធួន ។

« ការបម្រើ ខាងសាច់ឈាមរបស់ព្រះអង្គសង្គ្រោះ រួមមានអ្វីៗផ្សេងទៀតដែលទ្រង់បានធ្វើ— ការបង្រៀនរបស់ទ្រង់ ការបង្ហាញសេចក្ដីស្រឡាញ់ ការយកចិត្តទុកដាក់ដល់ពិធីបរិសុទ្ធ គំរូនៃការអធិស្ឋាន ការខ្ជាប់ខ្ជួន និងការណ៍ផ្សេងទៀត ។ ទ្រង់បានរស់នៅជាគំរូរបស់យើង ដែលទ្រង់ក៏បានប្រៀបធៀបទៅនឹងដំណឹងល្អនៅក្នុងប្រយោគនៃការបង្រៀនរបស់ទ្រង់ដែរ ។ ទ្រង់បានមានបន្ទូលថា ‹ នេះគឺជាដំណឹងល្អរបស់យើង › … ដ្បិតអ្វីៗដែលអ្នករាល់គ្នាបានឃើញយើងធ្វើយ៉ាងណា នោះអ្នកត្រូវធ្វើតាមយ៉ាងនោះដែរ › [នីហ្វៃទី 3 27:21] ។ ហេតុដូច្នេះហើយ សេចក្ដីជំនឿ ការប្រែចិត្ត ពិធីបុណ្យជ្រមុជទឹកដោយទឹក ភ្លើង និងដោយព្រះវិញ្ញាណបរិសុទ្ធ ការប្រមូលផ្ដុំនៃអ្នករើសតាំង និងការតស៊ូដល់ទីបញ្ចប់គឺជាផ្នែកនៃដំណឹងល្អទាំងឡាយ » ( « Senior Missionaries and the Gospel » Ensign ឬ Liahona ខែ វិច្ឆិកា ឆ្នាំ 2004 ទំព័រ 81 ) ។

នីហ្វៃទី 3 27:27 ការក្លាយដូចជាព្រះយេស៊ូវគ្រីស្ទ

ប្រធាន អ៊ែសរ៉ា ថាហ្វ ប៊ែនសឹន បានបង្រៀន ៖

« បុគ្គលនោះគឺជាបុគ្គលឆ្នើមជាងគេ ហើយមានពរ និងអំណរបំផុត ពេលជីវិតរស់នៅស្ទើរតែជិតដូចនឹងគំរូរបស់ព្រះគ្រីស្ទ ។ នេះគ្មានអ្វីទាក់ទងទៅនឹងទ្រព្យសម្បត្តិ អំណាច ឬកិតិ្តនាមនៃពិភពលោកនោះទេ ។ ការសាកល្បងដ៏ពិតតែមួយគត់នៃភាពអស្ចារ្យ ការប្រទានពរខ្លាំង ភាពរីករាយគឺជារបៀបមួយដែលជីវិតមួយអាចក្លាយទៅកាន់តែដូចជាលោកចៅហ្វាយ គឺព្រះយេស៊ូវគ្រីស្ទ ។ ទ្រង់គឺជាផ្លូវដ៏ពិត សេចក្ដីពិតដ៏ពេញលេញ និងជីវិតដ៏បរិបូរណ៍ » ( « Jesus Christ—Gifts and Expectations » [ BYU devotional address ថ្ងៃទី 10 ខែ ធ្នូ ឆ្នាំ 1974 ] 1 speeches.byu.edu ) ។