សេចក្តីផ្តើមនៃសៀវភៅណែនាំការសិក្សាព្រះគម្ពីរមរមនសម្រាប់គ្រូបង្រៀន ថ្នាក់សិក្ខាសាលា

សេចក្តីផ្តើមនៃ សៀវភៅណែនាំការសិក្សាព្រះគម្ពីរមរមនសម្រាប់គ្រូបង្រៀន ថ្នាក់សិក្ខាសាលា

គោលបំណងរបស់យើង

គោលបំណងរបស់ថ្នាក់សិក្ខាសាលា និង ថ្នាក់វិទ្យាស្ថានសាសនា ៖

« គោលបំណងរបស់យើង គឺដើម្បីជួយយុវវ័យ និង មជ្ឈិមវ័យវ័យក្មេងឲ្យយល់ និងពឹងផ្អែកលើការបង្រៀន និងដង្វាយធួនរបស់ព្រះយេស៊ូវគ្រីស្ទ ឲ្យមានភាពសក្តិសមសម្រាប់ពរជ័យទាំងឡាយនៃព្រះវិហារបរិសុទ្ធ ហើយរៀបចំខ្លួនពួកគេ ក្រុមគ្រួសារពួកគេ និងអ្នកដទៃទៀត សម្រាប់ជីវិតដ៏នៅអស់កល្បជានិច្ច ជាមួយនឹងព្រះវរបិតារបស់ពួកគេដែលគង់នៅឋានសួគ៌ » ។

ដើម្បីសម្រេចគោលបំណងរបស់យើង យើងបង្រៀនសិស្សអំពីគោលលទ្ធិ និងគោលការណ៍ទាំងឡាយនៃដំណឹងល្អ ដូចដែលមាននៅក្នុងព្រះគម្ពីរ និងពាក្យសម្តីរបស់ព្យាការីទាំងឡាយ ។គោលលទ្ធិ និង គោលការណ៍ទាំងនេះ គឺត្រូវបានបង្រៀនតាមរបៀបមួយដែលដឹកនាំឲ្យមានការយល់ដឹង និង ការស្អាងឡើង ។យើងជួយសិស្សទាំងឡាយឲ្យបំពេញតួនាទីរបស់ពួកគេនៅក្នុងដំណើរការនៃការរៀនសូត្រ និង រៀបចំពួកគេឲ្យបង្រៀនដំណឹងល្អដល់អ្នកដទៃទៀត ។

ដើម្បីជួយសម្រេចបានគោលបំណងទាំងនេះ អ្នកនិងសិស្សដែលអ្នកបង្រៀនត្រូវបានលើកទឹកចិត្តឲ្យសហការធ្វើតាមមូលដ្ឋានគ្រឹះនៃការបង្រៀន និងការរៀនដំណឹងល្អ នៅពេលអ្នកសិក្សាព្រះគម្ពីររួមគ្នាដូចខាងក្រោម ៖

បង្រៀន និង រៀនសូត្រដោយព្រះវិញ្ញាណ ។
បង្កើតបរិយាកាសរៀនសូត្រដែលពោរពេញដោយសេចក្តីស្រឡាញ់ ការគោរព និង មានគោលបំណង ។
សិក្សាព្រះគម្ពីររាល់ថ្ងៃ និង អានមេរៀននៃវគ្គសិក្សា ។( តារាងសម្រាប់តាមដានការអានព្រះគម្ពីរ អាចរកឃើញនៅក្នុងសេចក្ដីបន្ថែមនៅចុងបញ្ចប់នៃសៀវភៅណែនាំនេះ ។ )
យល់ពីបរិបទ និងមាតិកានៃព្រះគម្ពីរ និងពាក្យសម្តីរបស់ព្យាការីទាំងឡាយ ។
ស្គាល់ យល់ ដឹងពីសេចក្តីពិត និងសារៈសំខាន់ ហើយអនុវត្តគោលលទ្ធិ និងគោលការណ៍ទាំងឡាយនៃដំណឹងល្អ ។
ពន្យល់ ចែកចាយ និង ថ្លែងទីបន្ទាល់អំពីគោលលទ្ធិ និងគោលការណ៍ទាំងឡាយនៃដំណឹងល្អ ។
ចេះស្ទាត់នូវវគ្គបទគម្ពីរសំខាន់ៗ និង គោលលទ្ធិគ្រឹះទាំងឡាយ ។

សៀវភៅណែនាំសម្រាប់គ្រូបង្រៀននេះ បានរៀបចំឡើងដើម្បីជួយដល់អ្នកឲ្យទទួលបានជោគជ័យក្នុងការសម្រេចនូវគោលបំណងទាំងនេះ ។

ការរៀបចំមេរៀន

ព្រះអម្ចាស់បានបញ្ជាដល់អស់អ្នកណាដែលបង្រៀនដំណឹងល្អរបស់ទ្រង់ឲ្យ « ត្រូវបង្រៀនគោលការណ៍ទាំងឡាយនៃដំណឹងល្អរបស់យើង ដែលមាននៅក្នុងព្រះគម្ពីរប៊ីប និងព្រះគម្ពីរមរមនគឺជាភាពពោរពេញនៃដំណឹងល្អ » ( គ. និង ស. 42:12 ) ។ ទ្រង់បានណែនាំបន្ថែមទៀតថា សេចក្ដីពិតទាំងនេះគួរត្រូវបានបង្រៀនដូចជា « ត្រូវបានដឹកនាំពីព្រះវិញ្ញាណ » ដែល « ត្រូវបានប្រទាន … ដោយពាក្យអធិស្ឋាននៃសេចក្ដីជំនឿ » ( គ. និង ស. 42:13–14 ) ។ នៅពេលអ្នករៀបចំមេរៀននីមួយៗ សូមស្វែងរកការដឹកនាំពីព្រះវិញ្ញាណប្រកបដោយការអធិស្ឋានដើម្បីជួយអ្នកឲ្យយល់ពីព្រះគម្ពីរ និងគោលលទ្ធិនានា និងគោលការណ៍ទាំងឡាយដែលមាន ។ ដូចគ្នាផងដែរ សូមធ្វើការតាមការបំផុសគំនិតពីព្រះវិញ្ញាណ នៅពេលធ្វើគម្រោងជួយដល់សិស្សរបស់អ្នកឲ្យយល់ពីព្រះគម្ពីរ ត្រូវបានបង្រៀនដោយព្រះវិញ្ញាណបរិសុទ្ធ និងមានបំណងចង់អនុវត្តអ្វីដែលពួកគេបានរៀន ។

នៅក្នុងវគ្គសិក្សានេះ ព្រះគម្ពីរមរមនគឺជាអត្ថបទដ៏សំខាន់របស់អ្នក នៅពេលអ្នករៀបចំបង្រៀន ។ សូមសិក្សាជំពូក ឬខគម្ពីរទាំងឡាយដែលអ្នកនឹងបង្រៀនប្រកបដោយការអធិស្ឋាន ។ សូមព្យាយាមយល់បរិបទ និងអត្ថបទនៃបណ្តុំបទគម្ពីរ រួមមានខ្សែរឿង ប្រជាជន ទីកន្លែង និងហេតុការណ៍ ។ នៅពេលអ្នកដឹងពីពីបរិបទ និងអត្ថបទនៃបណ្តុំបទគម្ពីរនីមួយៗហើយ សូមស្វែងរកគោលលទ្ធិ និងគោលការណ៍ដែលវាមាន ហើយសម្រេចថាតើសេចក្ដីពិតមួយណាដែលសំខាន់បំផុតសម្រាប់សិស្សរបស់អ្នកដើម្បីយល់ និងអនុវត្តតាមវា ។ នៅពេលអ្នកបានរកឃើញអ្វីដែលអ្នកត្រូវផ្ដោតអារម្មណ៍លើហើយ អ្នកអាចសម្រេចថាតើវិធី របៀបដោះស្រាយ និងសកម្មភាពណាមួយដែលនឹងសមបំផុតដើម្បីជួយដល់សិស្សរបស់អ្នកក្នុងការរៀនសូត្រ និងអនុវត្តនូវសេចក្ដីពិតដ៏ពិសិដ្ឋទាំងឡាយដែលមាននៅក្នុងព្រះគម្ពីរ ។

សៀវភៅណែនាំនេះត្រូវបានរចនាឡើងដើម្បីជួយដល់អ្នកនៅក្នុងដំណើរការនេះ ។ សូមរំឭកមេរៀនដោយប្រុងប្រយ័ត្ន ចំពោះអ្វីដែលទាក់ទងទៅនឹងបណ្តុំបទគម្ពីរដែលអ្នកនឹងបង្រៀន ។ អ្នកអាចជ្រើសរើសប្រើគំនិតដែលបានផ្តល់ឲ្យសម្រាប់បណ្តុំបទគម្ពីរទាំងអស់ ឬខ្លះៗ ឬអ្នកអាចបត់បែនគំនិតបង្រៀនទៅតាមតម្រូវការ និងកាលៈទេសៈនៃសិស្សដែលអ្នកបង្រៀន ។ នៅពេលអ្នកគិតពីរបៀបដើម្បីបត់បនមេរៀននេះ សូមប្រាកដថានឹងធ្វើតាមការប្រឹក្សាពីអែលឌើរ ដាល្លិន អេក អូក នៃកូរ៉ុមនៃពួកសាវកដប់ពីរនាក់ ៖

« តាមដែលខ្ញុំបានឮប្រធាន ផាកកឺ បានបង្រៀនជាញឹកញាប់ថា ដំបូង យើងត្រូវទទួលយកជាដំបូងសិន ហើយបន្ទាប់មក សម្របធ្វើតាម ។ ប្រសិនបើយើងគ្រោងមេរៀនដែលមាននៅក្នុងសៀវភៅដោយយកចិត្តទុកដាក់មុននឹងយើងបង្រៀននោះ យើងអាចធ្វើតាមព្រះវិញ្ញាណដើម្បីសម្របតាមវាបាន » ( « A Panel Discussion with Elder Dallin H. Oaks » [ ការចាក់ផ្សាយតាមផ្កាយរណបនៃថ្នាក់សិក្ខាសាលា និងថ្នាក់វិទ្យាស្ថាននៃសាសនា នៅថ្ងៃទី 7 ខែ សីហា ឆ្នាំ 2012 ], 6, si.lds.org ) ។

នៅពេលអ្នករៀបចំបង្រៀន សូមចងចាំពីសិស្សដែលត្រូវការជំនួយជាពិសេស ។ សូមសម្របសកម្មភាព និងការរំពឹងទុកនានាដើម្បីជួយដល់ពួកគេឲ្យទទួលបានជោគជ័យ ។ ទំនាក់ទំនងជាមួយនឹងឪពុកម្ដាយ និងអ្នកដឹកនាំដែលនឹងជួយអ្នកឲ្យដឹងពីតម្រូវការរបស់សិស្ស ហើយជួយអ្នកឲ្យបានជោគជ័យក្នុងការផ្ដល់នូវបទពិសោធន៍ដ៏មានន័យ និងជួយដល់ពួកគេ ។

រូបភាព

គ្រូបង្រៀនរៀបចំជាមួយនឹងព្រះគម្ពីរ និងសៀវភៅណែនាំ

ការប្រើសៀវភៅណែនាំការសិក្សាសម្រាប់គ្រូបង្រៀនប្រចាំថ្ងៃ

រូបភាព

ឧទាហរណ៍នៃការប្រើសៀវភៅណែនាំរបស់គ្រូបង្រៀន

សេចក្ដីផ្ដើមនៃគម្ពីរ

សេចក្ដីផ្ដើមនៃគម្ពីរនឹងផ្ដល់នូវទិដ្ឋភាពទូទៅនៃគម្ពីរនីមួយៗនៅក្នុងព្រះគម្ពីរមរមន ។ នៅក្នុងចំណោមរឿងផ្សេងទៀត ពួកគេនឹងពន្យល់ពីអ្នកដែលសរសេរគម្ពីរនេះ វារៀបរាប់ពីគោលបំណងក្នុងការសរសេររបស់អ្នកសរសេរ ហើយវាផ្ដល់នូវសេចក្ដីសង្ខេបនៃអត្ថបទនៃគម្ពីរនីមួយៗ ។

រូបភាព

គំរូនៃការប្រើសៀវភៅណែនាំរបស់គ្រូបង្រៀន

សេចក្ដីផ្ដើមនៃបណ្តុំបទគម្ពីរ

សេចក្ដីផ្ដើមនៃបណ្តុំបទគម្ពីរផ្ដល់នូវទិដ្ឋភាពទូទៅដ៏ខ្លីមួយនៃបរិបទ និងមាតិកានៃបណ្តុំបទគម្ពីរសម្រាប់មេរៀននីមួយៗ ។

ការផ្ដុំខគម្ពីរ និងសេចក្ដីសង្ខេបពីបរិបទ

បណ្ដុំបទគម្ពីរ ជាញឹកញាប់ត្រូវបានចែកចេញជាផ្នែក ឬក្រុមតូចៗនៃខគម្ពីរ ដែលមានការផ្លាស់ប្ដូរនៃប្រធានបទ ឬសកម្មភាព ។ សេចក្ដីយោងនៃក្រុមខគម្ពីរនីមួយៗត្រូវបានបន្តដោយសេចក្ដីសង្ខេបដ៏ខ្លីនៃហេតុការណ៍ ឬការបង្រៀននៅក្នុងក្រុមនៃខគម្ពីរនោះ ។

ជំនួយក្នុងការបង្រៀន

ជំនួយក្នុងការបង្រៀននឹងពន្យល់ពីគោលការណ៍ និងវិធីបង្រៀនដំណឹងល្អនានា ។ វាអាចជួយដល់អ្នកនៅក្នុងការខិតខំដើម្បីកែលម្អក្នុងនាមជាគ្រូបង្រៀនម្នាក់ ។

តួសេចក្តីនៃមេរៀន

តួសេចក្តីនៃមេរៀននេះ រួមមានការដឹកនាំសម្រាប់អ្នក នៅពេលអ្នកសិក្សា និងបង្រៀន ។ វាផ្ដល់នូវគំនិតក្នុងការបង្រៀន រួមមានសំណួរ សកម្មភាព សម្ដីដកស្រង់ ឌីយ៉ាក្រាម និងតារាងនានា ។

គោលលទ្ធិ និង គោលការណ៍ទាំងឡាយ

នៅពេលគោលលទ្ធិ និងគោលការណ៍ទាំងឡាយលេចចេញមកពីការសិក្សានៃវគ្គព្រះគម្ពីរ វាបញ្ជាក់ជាអក្សរក្រាស់ខ្មៅដើម្បីជួយដល់អ្នកឲ្យរកឃើញ និងបញ្ជាក់ន័យដល់វានៅក្នុងការពិភាក្សារបស់អ្នកជាមួយនឹងសិស្ស ។

រូបភាព

រូបភាពនៃអ្នកដឹកនាំសាសនាចក្រ និងហេតុការណ៍នានាពីព្រះគម្ពីរ តំណាងឲ្យជំនួយដែលអ្នកអាចបង្ហាញឲ្យឃើញ ប្រសិនបើវាមាន នៅពេលអ្នកបង្រៀន ។

រូបភាព

គំរូនៃការប្រើសៀវភៅណែនាំរបស់គ្រូបង្រៀន

ចំណេះចំណានខគម្ពីរ

វគ្គចំណេះចំណានខគម្ពីរទាំង 25 ដែលមាននៅក្នុងព្រះគម្ពីរមរមនត្រូវបានគូសបញ្ជាក់នៅក្នុងបរិបទនៃមេរៀនដែលវាលេចឡើង ។ មេរៀនទាំងនេះនីមួយៗក៏រួមមាននូវគំនិតក្នុងការបង្រៀនសម្រាប់វគ្គនីមួយៗដែរ ។ ដើម្បីជួយអ្នកឲ្យមានភាពខ្ជាប់ខ្ជួននៅក្នុងការបង្រៀនចំណេះចំណានខគម្ពីរ នោះមានសកម្មភាពក្នុងការរំឭកចំណេះចំណានខគម្ពីរធ្វើឡើងនៅក្នុងសៀវភៅណែនាំនេះ ។ សម្រាប់គំនិតក្នុងការបង្រៀនចំណេះចំណានខគម្ពីរបន្ថែម សូមមើលក្នុងសេចក្ដីបន្ថែមនៅចុងបញ្ចប់នៃសៀវភៅណែនាំនេះ ។

ចន្លោះជួរឈរ

ចន្លោះជួរឈរអាចត្រូវបានប្រើសម្រាប់ការរៀបចំមេរៀន រួមមានការសរសេរកត់ចំណាំ គោលការណ៍ បទពិសោធន៍ ឬគំនិតផ្សេងទៀត នៅពេលអ្នកទទួលបានការបំផុសគំនិតពីព្រះវិញ្ញាណបរិសុទ្ធ ។

វិចារណកថា និង ព័ត៌មានសាច់រឿង

សម្ដីដកស្រង់ និងការពន្យល់បន្ថែមត្រូវបានផ្ដល់នៅចុងបញ្ចប់នៃមេរៀនមួយចំនួន ដើម្បីផ្ដល់ដល់អ្នកនូវការយល់ដឹងបន្ថែមនៃគោលគំនិតជាក់លាក់នានា ឬវគ្គព្រះគម្ពីរ ។ សូមប្រើប្រាស់ព័ត៌មាននៅក្នុងផ្នែកនេះដើម្បីរៀបចំឆ្លើយនឹងសំណួរ ឬផ្ដល់នូវការយល់ដឹងបន្ថែម នៅពេលអ្នកបង្រៀន ។

គំនិតបន្ថែមសម្រាប់ការបង្រៀន

គំនិតបន្ថែមសម្រាប់ការបង្រៀន មាននៅចុងបញ្ចប់នៃមេរៀនមួយចំនួន ។ វានឹងផ្ដល់នូវយោបល់សម្រាប់ការបង្រៀនគោលលទ្ធិ និងគោលការណ៍ដែលមិនអាចរកឃើញ ឬបញ្ជាក់ន័យនៅក្នុងតួសេចក្តីនៃមេរៀននេះ ។ វាក៏ផ្ដល់នូវយោបល់អំពីការប្រើប្រព័ន្ធផ្សព្វផ្សាយ ដូចជាការចាក់វីដេអូ ជាដើម ។

កម្មវិធីសិក្សាថ្នាក់សិក្ខាសាលាប្រចាំថ្ងៃ ( ម៉ោងចេញផ្សាយ និងម៉ោងព្រឹកព្រលឹម )

សៀវភៅណែនាំនេះរួមមានមូលដ្ឋានគ្រឹះដូចខាងក្រោមសម្រាប់គ្រូបង្រៀនថ្នាក់សិក្ខាសាលាប្រចាំថ្ងៃ ៖ មេរៀនប្រចាំថ្ងៃសម្រាប់គ្រូបង្រៀនចំនួន 160 មេរៀន ជំនួយដល់ការបង្រៀន និងធនធានក្នុងការបង្រៀនចំណេះចំណានខគម្ពីរ និងគោលលទ្ធិគ្រឹះទាំងឡាយ ។

មេរៀនប្រចាំថ្ងៃសម្រាប់គ្រូបង្រៀន

ទម្រង់នៃមេរៀន

មេរៀននីមួយៗនៅក្នុងក្នុងសៀវភៅណែនាំនេះ ផ្ដោតលើបណ្តុំបទគម្ពីរជាជាងផ្តោតទៅលើគំនិត គោលលទ្ធិ ឬ គោលការណ៍ពិសេសណាមួយ ។ទម្រង់បែបនេះនឹងជួយដល់អ្នក និងសិស្សរបស់អ្នកឲ្យសិក្សាព្រះគម្ពីរតាមលំដាប់លំដោយ និងពិភាក្សាពីគោលលទ្ធិ និងគោលការណ៍ នៅពេលវាលេចឡើងនៅក្នុងបរិបទព្រះគម្ពីរ ។ នៅពេលសិស្សរៀនពីបរិបទដែលមានគោលលទ្ធិ ឬ គោលការណ៍មួយ នោះការយល់ដឹងពីសេចក្ដីពិតនោះអាចត្រូវបានធ្វើឲ្យស៊ីជម្រៅបន្ថែមទៀត ។ លើសពីនេះ សិស្សនឹងអាចឃើញ ហើយយល់កាន់តែច្បាស់ពីវិសាលភាពដ៏ពេញលេញនៃសារលិខិតដែលត្រូវបានបំផុសដោយអ្នកសរសេរព្រះគម្ពីរ ដែលមានបំណងដើម្បីផ្ដល់ឲ្យ ។ ការបង្រៀនព្រះគម្ពីរតាមរបៀបនេះ ក៏នឹងជួយដល់សិស្សឲ្យរៀនពីរបៀបដើម្បីរក និងអនុវត្តសេចក្ដីពិតដ៏អស់កល្បនៅក្នុងការសិក្សាព្រះគម្ពីរផ្ទាល់ខ្លួនផងដែរ ។

នៅក្នុងមេរៀននីមួយៗ នឹងមិនមានផ្នែកនៃបណ្តុំបទគម្ពីរទាំងអស់ត្រូវបញ្ជាក់នោះទេ ។ ផ្នែកខ្លះមានការយកចិត្តទុកដាក់តិចជាង ដោយសារវាមិនសូវជាស្នូលនៃសារលិខិតទាំងអស់ពីអ្នកសរសេរដ៏បំផុសគិត ឬ ដោយសារវាអាចមិនសូវអនុវត្តចំពោះយុវវ័យ ។ អ្នកមានទំនួលខុសត្រូវក្នុងការសម្របសម្ភារមេរៀនទាំងនេះ ស្របតាមតម្រូវការ និងចំណាប់អារម្មណ៍របស់សិស្សដែលអ្នកបង្រៀន ។ អ្នកអាចសម្របគំនិតក្នុងមេរៀនដែលមាននៅក្នុងសៀវភៅណែនាំនេះ ដើម្បីធ្វើការសង្កត់ធ្ងន់ទៅលើគោលលទ្ធិ ឬគោលការណ៍ច្បាស់លាស់ណាមួយ លើសពីអ្វីដែលបានផ្តល់ឲ្យនៅក្នុងជំនួយមេរៀននេះ ឬជ្រើសរើសគូសបញ្ជាក់បន្តិចបន្តួចលើវគ្គបណ្តុំបទគម្ពីរដែលត្រូវបានបង្កើតឡើងមានភាពស៊ីជម្រៅនៅក្នុងសៀវភៅនេះ ។ សូមស្វែងរកការដឹកនាំពីព្រះវិញ្ញាណបរិសុទ្ធដើម្បីជួយដល់អ្នកឲ្យធ្វើការសម្របតាម នៅពេលអ្នករៀបចំបង្រៀន ។

គោលលទ្ធិ និង គោលការណ៍ទាំងឡាយ

នៅក្នុងតួសេចក្តីនៃមេរៀននីមួយៗ អ្នកនឹងឃើញថា គោលលទ្ធិ និងគោលការណ៍គន្លឹះមួយចំនួនត្រូវបានបញ្ជាក់ជាអក្សរក្រាស់ខ្មៅដិត ។ គោលលទ្ធិ និងគោលការណ៍ទាំងនេះត្រូវបានរកឃើញនៅក្នុងកម្មវិធីសិក្សាដោយសារ (1) វាឆ្លុះបញ្ចាំងពីសារលិខិតដ៏សំខាន់នៃបណ្ដុំបទគម្ពីរ (2) វាអាចអនុវត្តបានជាពិសេសចំពោះតម្រូវការ និងកាលៈទេសៈរបស់សិស្ស ឬ (3) វាគឺជាគន្លឹះនៃសេចក្ដីពិតដែលអាចជួយសិស្សឲ្យយល់ស៊ីជម្រៅពីទំនាក់ទំនងរបស់គេជាមួយនឹងព្រះអម្ចាស់ ។ សូមប្រយត័្នថា ព្រះគម្ពីរមរមនបង្រៀនពីសេចក្ដីពិតជាច្រើនលើសពីអ្វីដែលបានមាននៅក្នុងកម្មវិធីសិក្សានេះ ។ ប្រធាន ប៊យដ៍ ឃេ. ផាកកឺ បានបង្រៀនថា ព្រះគម្ពីររួមមាននូវ « ការបន្សំដ៏មិនចេះចប់នៃសេចក្ដីពិតដែលនឹងស៊ីគ្នានឹងតម្រូវការរបស់បុគ្គលគ្រប់រូបនៅក្នុងគ្រប់ស្ថានភាព » ( « The Great Plan of Happiness” [CES Symposium on the Doctrine and Covenants/Church History ថ្ងៃទី 10 ខែ សីហា ឆ្នាំ 1993 ], ទំព័រ 2, si.lds.org ) ។

នៅពេលអ្នកបង្រៀន សូមផ្ដល់ដល់សិស្សនូវឱកាសជាបន្ដបន្ទាប់ឲ្យរកមើលគោលលទ្ធិ និងគោលការណ៍នានានៅក្នុងព្រះគម្ពីរ ។ នៅពេលសិស្សបង្ហាញនូវសេចក្ដីពិតដែលពួកគេរកឃើញ ជាញឹកញាប់ នោះពួកគេអាចប្រើពាក្យដែលខុសពីរបៀបដែលគោលលទ្ធិ ឬគោលការណ៍នានាបានចែងនៅក្នុងសៀវភៅណែនាំនេះ ។ ពួកគេក៏អាចរកឃើញនូវសេចក្ដីពិតដែលមិនមាននៅក្នុងគម្រោងនៃមេរៀននេះដែរ ។ សូមប្រយត័្នកុំនិយាយថា ចម្លើយរបស់សិស្សខុស ដោយសារតែពាក្យដែលពួកគេប្រើនោះខុសពីពាក្យដែលបានប្រើនៅក្នុងសៀវភៅណែនាំនេះ ឬដោយសារពួកគេរកឃើញសេចក្ដីពិតមួយដែលមិនមាននៅក្នុងកម្មវិធីសិក្សានេះឡើយ ។ ទោះជាយ៉ាងណាក្ដី ប្រសិនបើប្រយោគដែលសិស្សនិយាយខុសគោលលទ្ធិ នោះវាជាភារកិច្ចរបស់អ្នកដើម្បីជួយដល់សិស្សដោយរាបទាបក្នុងការកែតម្រូវប្រយោគរបស់គេ ជាមួយបរិយាកាសនៃសេចក្ដីស្រឡាញ់ និងទំនុកចិត្ត ។ ដោយការធ្វើដូច្នោះ អាចផ្ដល់នូវបទពិសោធន៍រៀនសូត្រដ៏សំខាន់មួយដល់សិស្សនៅក្នុងថ្នាក់របស់អ្នក ។

ល្បឿន

សៀវភៅណែនាំនេះរួមមានមេរៀនប្រចាំថ្ងៃសម្រាប់ថ្នាក់សិក្ខាសាលាចំនួន 160 មេរៀន ដែលអាចបណ្តាលឲ្យមានការអាក់ខានចំពោះកាលវិភាគសាលារៀន និងសហគមន៍ ហើយក៏មានពេលទំនេរខ្លះសម្រាប់រំឭកបរិបទនៃព្រះគម្ពីរឡើងវិញ ឬសូត្រចំណេះចំណានខគម្ពីរ ។ អ្នកអាចសម្របសម្រួលមេរៀននេះ និងល្បឿននៃមេរៀនតាមពេលវេលាដែលអ្នកមានដើម្បីបង្រៀនវគ្គសិក្សានេះ ។ ( សូមមើលសេចក្ដីបន្ថែមនៅចុងបញ្ចប់នៃសៀវភៅណែនាំនេះសម្រាប់ការណែនាំអំពីគំរូនៃល្បឿនបង្រៀន ។ )

កិច្ចការជំនួសអវត្តមាន

សៀវភៅមគ្គុទេសន៍ការសិក្សានៃព្រះគម្ពីរមរមនសម្រាប់សិស្សថ្នាក់សិក្ខាសាលាសិក្សានៅផ្ទះ អាចត្រូវប្រើនៅក្នុងកម្មវិធីថ្នាក់សិក្ខាសាលាប្រចាំថ្ងៃ ជាធនធានមួយដើម្បីផ្ដល់ដល់សិស្សនូវកិច្ចការជំនួសអវត្តមាន ។ មេរៀននៅក្នុងសៀវភៅមគ្គុទេសន៍ការសិក្សាសម្រាប់សិស្សសិក្សានៅផ្ទះស្របគ្នាទៅនឹងអ្វីដែលមាននៅក្នុងសៀវភៅសិក្សានេះ ។ សិស្សដែលមានអវត្តមានច្រើន អាចដាក់ឲ្យធ្វើការនេះពីសៀវភៅមគ្គុទេសន៍ការសិក្សាដែលស្របគ្នាទៅនឹងបរិបទដែលពួកគេបានខកខានមិនបានរៀននៅក្នុងថ្នាក់ ។ កិច្ចការនោះអាចបោះពុម្ពចេញពីគេហទំព័រ ស&វ ដូច្នេះអ្នកមិនចាំបាច់ចែកសៀវភៅទាំងមូលដល់សិស្សដែលត្រូវធ្វើកិច្ចការជំនួសអវត្តមាននោះទេ ។ ព័ត៌មានបន្ថែមទាក់ទងទៅនឹង សៀវភៅមគ្គុទេសន៍ការសិក្សានៃព្រះគម្ពីរមរមនសម្រាប់សិស្សថ្នាក់សិក្ខាសាលាសិក្សានៅផ្ទះ ត្រូវបានផ្ដល់នៅក្នុងផ្នែកដែលមានចំណងជើងថា « កម្មវិធីថ្នាក់សិក្ខាសាលាសិក្សានៅផ្ទះ » ។

ជំនួយក្នុងការបង្រៀន

ជំនួយក្នុងការបង្រៀនមាននៅរឹមទំព័រនៃសៀវភៅណែនាំនេះ ។ ជំនួយក្នុងការបង្រៀនទាំងនេះជួយពន្យល់ និងបង្ហាញពីរបៀបដែលអ្នក និងសិស្សដែលអ្នកបង្រៀនអាចអនុវត្តគោលគ្រឹះនៃការបង្រៀន និងការរៀនសូត្រដំណឹងល្អនៅក្នុងការសិក្សារបស់អ្នកអំពីព្រះគម្ពីរមរមន ។ វាក៏ផ្ដល់នូវយោបល់នានាអំពីរបៀបដើម្បីប្រើវិធីបង្រៀន ជំនាញ និងដំណោះស្រាយបង្រៀនផ្សេងៗដោយមានប្រសិទ្ធភាពផងដែរ ។ នៅពេលអ្នកយល់ពីគោលការណ៍ដែលមាននៅក្នុងជំនួយក្នុងការបង្រៀននេះហើយ សូមរកមើលរបៀបដើម្បីអនុវត្ត និងធ្វើវាជាប្រចាំនៅក្នុងការបង្រៀនរបស់អ្នក ។

ចំណេះចំណានខគម្ពីរ និងគោលលទ្ធិគ្រឹះ

ដើម្បីជួយសិស្សឲ្យទទួលយកបានសេចក្ដីពិតដ៏អស់កល្បជានិច្ច និងដើម្បីបង្កើនទំនុកចិត្តរបស់គេក្នុងការរៀនសូត្រ និងការបង្រៀនពីព្រះគម្ពីរ ថ្នាក់សិក្ខាសាលា និងថ្នាក់វិទ្យាស្ថាននៃសាសនា (ស&វ) បានជ្រើសរើសវគ្គព្រះគម្ពីរមួយចំនួនសម្រាប់សិស្សរៀនឲ្យចងចាំអំឡុងពេលរៀននៅក្នុងវគ្គនេះ ។ បន្ថែមលើនេះ បញ្ជីនៃគោលលទ្ធិគ្រឹះក៏រួមបញ្ចូលដើម្បីបញ្ជាក់ពីគោលលទ្ធិគន្លឹះ ដែលសិស្សត្រូវយល់ ជឿ និងរស់នៅតាមពេញបួនឆ្នាំនៅក្នុងថ្នាក់សិក្ខាសាលានេះ និងសម្រាប់ពេញមួយជីវិតរបស់គេ ។ សៀវភៅណែនាំសម្រាប់វគ្គសិក្សានីមួយៗត្រូវបានរៀបចំដើម្បីបញ្ជាក់ពីគោលលទ្ធិគ្រឹះ នៅពេលវាបង្ហាញ អំឡុងពេលការសិក្សាជាស៊េរីរបស់សិស្សក្នុងព្រះគម្ពីរនេះ ។ វគ្គចំណេះចំណានខគម្ពីរជាច្រើនត្រូវបានជ្រើសរើសដោយមានគោលលទ្ធិគ្រឹះនៅក្នុងគំនិត ដូច្នោះនៅពេលអ្នកបង្រៀនវគ្គចំណេះចំណានខគម្ពីរដល់សិស្ស អ្នកនឹងបង្រៀនគោលលទ្ធិគ្រឹះផងដែរ ។

នៅពេលបុគ្គលទាំងឡាយទទួលបានសេចក្តីពិតដ៏អស់កល្បជានិច្ចនៅក្នុងគំនិត និងដួងចិត្តរបស់គេហើយ នោះព្រះវិញ្ញាណបរិសុទ្ធនឹងនាំសេចក្តីពិតទាំងនេះឲ្យចងចាំ នៅពេលដែលចាំបាច់ និងផ្តល់ភាពក្លាហានដល់គេដើម្បីធ្វើសកម្មភាពក្នុងសេចក្តីជំនឿ ( សូមមើល យ៉ូហាន 14:26 ) ។ប្រធាន ហាវើដ ដបុលយូ ហឹនធើរ បានបង្រៀន ៖

« ខ្ញុំសូមលើកទឹកចិត្តអ្នកយ៉ាងម៉ឺងមាត់ ឲ្យប្រើបា្រស់ព្រះគម្ពីរនៅក្នុងការបង្រៀនរបស់អ្នក ហើយធ្វើអ្វីគ្រប់យ៉ាងឲ្យអស់ពីលទ្ធភាពរបស់អ្នកដើម្បីជួយសិស្សទាំងឡាយឲ្យប្រើប្រាស់ព្រះគម្ពីរ និងចូលចិត្តប្រើប្រាស់ព្រះគម្ពីរ ។ ខ្ញុំចង់ឲ្យយុវវ័យវ័យក្មេងរបស់យើងមានទំនុកចិត្តលើព្រះគម្ពីរ ។ …

« … យើងចង់ឲ្យសិស្សមានទំនុកចិត្តលើអានុភាព និងសេចក្តីពិតនៃព្រះគម្ពីរ មានទំនុកចិត្តដែលព្រះវរបិតាសួគ៌របស់គេកំពុងមានព្រះបន្ទូលពិតប្រាកដទៅកាន់ពួកគេតាមរយៈព្រះគម្ពីរ ហើយទំនុកចិត្តថាពួកគេអាចងាកទៅអានព្រះគម្ពីរ ហើយរកចម្លើយចំពោះបញ្ហាទាំងឡាយ និងការអធិស្ឋានរបស់គេ ។ …

« … យើងសង្ឃឹមថា គ្មានសិស្សណាម្នាក់របស់អ្នកនឹងចាកចេញពីថ្នាក់របស់អ្នកដោយការភ័យខ្លាច ឬ ខ្មាស់អៀន ឬ អាម៉ាស់មុខឡើយ ដោយថាពួកគេមិនអាចរកឃើញជំនួយដែលពួកគេត្រូវការ ដោយសារតែពួកគេមិនដឹងពីព្រះគម្ពីរគ្រប់គ្រាន់ល្មម ដើម្បីរកឃើញខគម្ពីរត្រឹមត្រូវនោះឡើយ » ( « Eternal Investments » [ សុន្ទរកថាថ្លែងទៅកាន់អ្នកអប់រំសាសនា CES នៅថ្ងៃទី 10 ខែ កុម្ភៈ ឆ្នាំ 1989], 2, si.lds.org) ។

សូមមើលសេចក្ដីបន្ថែមនៅចុងបញ្ចប់នៃសៀវភៅណែនាំនេះសម្រាប់ព័ត៌មានបន្ថែមអំពីចំណេះចំណានខគម្ពីរ និងគោលលទ្ធិគ្រឹះនានា ។

ការប្រើមេរៀនសិក្សានៅផ្ទះ

រូបភាព

គំរូនៃការប្រើសៀវភៅណែនាំរបស់គ្រូបង្រៀន

សេចក្ដីសង្ខេបនៃមេរៀនរបស់សិស្ស

សេចក្ដីសង្ខេបនេះនឹងជួយអ្នកឲ្យស្គាល់បរិបទ និងគោលលទ្ធិ ហើយគោលការណ៍ទាំងឡាយ ដែលសិស្សបានសិក្សាក្នុងមួយសប្ដាហ៍នៅក្នុងសៀវភៅមគ្គុទេសន៍ការសិក្សារបស់សិស្ស ។

សេចក្ដីផ្ដើមនៃមេរៀន

សេចក្ដីផ្ដើមចំពោះមេរៀននេះ នឹងជួយអ្នកឲ្យស្គាល់ពីផ្នែកខ្លះៗនៃបណ្តុំបទគម្ពីរមួយណា ដែលនឹងត្រូវប្រើសង្កត់បញ្ជាក់នៅក្នុងមេរៀននេះ ។

តួសេចក្តីនៃមេរៀន

តួសេចក្តីនៃមេរៀននេះ ផ្តល់នូវការដឹកនាំសម្រាប់អ្នក នៅពេលអ្នកសិក្សា និងបង្រៀន ។ វាផ្ដល់នូវគំនិតក្នុងការបង្រៀន រួមមានសំណួរ សកម្មភាព សម្ដីដកស្រង់ ឌីយ៉ាក្រាម និងតារាងនានា ។

រូបភាព

គំរូនៃការប្រើសៀវភៅណែនាំរបស់គ្រូបង្រៀន

ការផ្ដុំខគម្ពីរ និងសេចក្ដីសង្ខេបពីបរិបទ

ខគម្ពីរត្រូវបានចាប់ជាក្រុម យោងតាមការផ្លាស់ប្ដូរនៅក្នុងបរិបទ ឬអត្ថបទដែលមានពេញមួយបណ្តុំបទគម្ពីរ ។ សេចក្ដីយោងនៃក្រុមខគម្ពីរនីមួយៗត្រូវបានបន្តដោយសេចក្ដីសង្ខេបដ៏ខ្លីនៃហេតុការណ៍ ឬការបង្រៀននៅក្នុងក្រុមនៃខគម្ពីរនោះ ។

គោលលទ្ធិ និង គោលការណ៍ទាំងឡាយ

នៅពេលគោលលទ្ធិ និងគោលការណ៍ទាំងឡាយលេចចេញមកដោយឯកឯងពីការសិក្សានៃបទព្រះគម្ពីរ វាគូសបញ្ជាក់ជាអក្សរខ្មៅដិតដើម្បីជួយអ្នកឲ្យរកឃើញ និងបញ្ជាក់ន័យដល់វានៅក្នុងការពិភាក្សារបស់អ្នកជាមួយនឹងសិស្ស ។

សេចក្ដីផ្ដើមចំពោះមេរៀនបន្ទាប់

កថាខណ្ឌចុងក្រោយនៃមេរៀននីមួយៗនឹងផ្ដល់ជាតម្រុយមួយសម្រាប់មេរៀនបន្ទាប់ ។ សូមចែកចាយកថាខណ្ឌនេះជាមួយនឹងសិស្សរបស់អ្នក នៅពេលធ្វើសេចក្ដីសន្និដ្ឋានពីមេរៀននីមួយៗ ដើម្បីជួយពួកគេឲ្យរំពឹងមើលទៅការសិក្សាបទគម្ពីរនៅសប្ដាហ៍ក្រោយ ។

កម្មវិធីថ្នាក់សិក្ខាសាលាសិក្សានៅផ្ទះ

កម្មវិធីថ្នាក់សិក្សានៅផ្ទះនឹងអនុញ្ញាតឲ្យសិស្សទទួលបានពិន្ទុនៅក្នុងថ្នាក់សិក្ខាសាលាដោយការបញ្ចប់មេរៀនផ្ទាល់ខ្លួននៅផ្ទះ ជាជាងការមករៀននៅក្នុងថ្នាក់រាល់ថ្ងៃ ។ មេរៀនទាំងនេះមាននៅក្នុងសៀវភៅណែនាំមួយទៀតដែលហៅថា សៀវភៅមគ្គុទេសន៍ការសិក្សានៃព្រះគម្ពីរមរមនសម្រាប់សិស្សថ្នាក់សិក្ខាសាលាសិក្សានៅផ្ទះ ។ មួយសប្ដាហ៍ម្ដង សិស្សនឹងជួបជាមួយនឹងគ្រូណែនាំថ្នាក់សិក្ខាសាលាដើម្បីប្រគល់កិច្ចការរបស់គេ និងចូលរួមនៅក្នុងថ្នាក់រៀន ។ សៀវភៅមគ្គុទេសន៍ការសិក្សារបស់សិស្ស និងមេរៀនក្នុងថ្នាក់ប្រចាំសប្ដាហ៍ត្រូវបានពន្យល់បន្ថែមទៀតដូចខាងក្រោម ។

សៀវភៅមគ្គុទេសន៍ការសិក្សាសម្រាប់សិស្សសិក្សានៅផ្ទះ

សៀវភៅមគ្គុទេសន៍ការសិក្សានៃព្រះគម្ពីរមរមនសម្រាប់សិស្សថ្នាក់សិក្ខាសាលាសិក្សានៅផ្ទះ ត្រូវបានរៀបចំឡើងដើម្បីជួយសិស្សសិក្សានៅផ្ទះឲ្យទទួលបាននូវបទពិសោធន៍នៅក្នុងការសិក្សាព្រះគម្ពីរមរមនដែលស្រដៀងគ្នាទៅនឹងសិស្សថ្នាក់សិក្ខាសាលាដែលមករៀនប្រចាំថ្ងៃ ។ ហេតុដូច្នេះហើយ ល្បឿននៃសៀវភៅមគ្គុទេសន៍ការសិក្សារបស់សិស្ស ក៏ដូចជាគោលលទ្ធិ និងគោលការណ៍ដែលវាគូសបញ្ជាក់លើនោះក៏លឿនប្រហែលគ្នាទៅនឹងអ្វីដែលនៅក្នុងសៀវភៅណែនាំនេះដែរ ។ សៀវភៅមគ្គុទេសន៍ការសិក្សារបស់សិស្សក៏រួមមាននូវការណែនាំអំពីចំណេះចំណានខគម្ពីរដែរ ។ វគ្គចំណេះចំណានខគម្ពីរ ត្រូវបានលើកឡើងនៅក្នុងបរិបទ នៅពេលវាលេចឡើងនៅក្នុងអត្ថបទព្រះគម្ពីរ ។ សកម្មភាពបន្ថែមត្រូវបានផ្ដល់នៅចុងបញ្ចប់នៃមេរៀនដែលលើកឡើងពីវគ្គនោះ ។

រាល់សប្ដាហ៍ សិស្សថ្នាក់សិក្ខាសាលាសិក្សានៅផ្ទះ ត្រូវបញ្ចប់មេរៀនបួនពីសៀវភៅមគ្គុទេសន៍ការសិក្សារបស់សិស្ស ហើយចូលរួមនៅក្នុងថ្នាក់ប្រចាំសប្ដាហ៍ដែលបង្រៀនដោយគ្រូថ្នាក់សិក្ខាសាលារបស់គេ ។ សិស្សបំពេញកិច្ចការមួយចំនួនពីសៀវភៅមគ្គុទេសន៍ការសិក្សានៅក្នុងសៀវភៅកំណត់ហេតុការសិក្សាព្រះគម្ពីររបស់គេ ។ សិស្សគួរមានសៀវភៅកំណត់ហេតុការសិក្សាព្រះគម្ពីរពីរ ដើម្បីឲ្យពួកគេអាចទុកមួយជាមួយនឹងគ្រូបង្រៀន ហើយបន្ដធ្វើការនៅក្នុងសៀវភៅមួយទៀត ។ នៅពេលសិស្សជួបនឹងគ្រូបង្រៀនរបស់គេរាល់សប្ដាហ៍ សៀវភៅកំណត់ហេតុមួយត្រូវដាក់ឲ្យគ្រូបង្រៀននៅផ្ទះ ហើយមួយទៀតត្រូវឲ្យទៅសិស្សវិញ ដើម្បីប្រើសម្រាប់មេរៀននៅសប្ដាហ៍ក្រោយទៀត ។ ( ឧទាហរណ៍ ក្នុងមួយសប្ដាហ៍ សិស្សបញ្ចប់កិច្ចការនៅក្នុងសៀវភៅកំណត់ហេតុការសិក្សាទីមួយ ។ បន្ទាប់មក សិស្សយកសៀវភៅនេះទៅឲ្យគ្រូនៅក្នុងថ្នាក់ ។ នៅសប្ដាហ៍ក្រោយ សិស្សបញ្ចប់កិច្ចការនៅក្នុងសៀវភៅកំណត់ហេតុការសិក្សាទីពីរ ។ នៅពេលសិស្សឲ្យសៀវភៅកំណត់ហេតុការសិក្សាទីពីរទៅគ្រូ នោះគ្រូបង្រៀនត្រូវឲ្យសៀវភៅកំណត់ហេតុការសិក្សាទីមួយមកវិញ ។ ពេលនោះសិស្សនឹងប្រើសៀវភៅកំណត់ហេតុការសិក្សាទីមួយដើម្បីធ្វើកិច្ចការនៅសប្ដាហ៍ក្រោយទៀត )។

សិស្សថ្នាក់សិក្ខាសាលាទាំងអស់ត្រូវបានលើកទឹកចិត្តឲ្យសិក្សាព្រះគម្ពីរប្រចាំថ្ងៃ ហើយអានមេរៀននានា ប៉ុន្ដែសិស្សសិក្សានៅផ្ទះគួរយល់ថា ពួកគេត្រូវបានរំពឹងឲ្យចំណាយពេលបន្ថែមពី 30 ទៅ 40 នាទីសម្រាប់មេរៀននីមួយនៅក្នុងមេរៀនទាំងបួនសម្រាប់ការសិក្សានៅផ្ទះនៅក្នុងជំពូកនីមួយៗ និងចូលរួមនៅក្នុងថ្នាក់សិក្សានៅផ្ទះប្រចាំសប្ដាហ៍ ។

មេរៀនសម្រាប់គ្រូបង្រៀនសិក្សានៅផ្ទះប្រចាំសប្ដាហ៍

ជំពូកនីមួយៗនៅក្នុង សៀវភៅមគ្គុទេសន៍ការសិក្សានៃព្រះគម្ពីរមរមនសម្រាប់សិស្សថ្នាក់សិក្ខាសាលានៅផ្ទះ មាននូវមេរៀនប្រាំនៅក្នុងសៀវភៅណែនាំសម្រាប់គ្រូបង្រៀនប្រចាំថ្ងៃ ។ នៅចុងបញ្ចប់នៃមេរៀននីមួយៗនៃមេរៀនទាំងប្រាំ នៅក្នុងសៀវភៅណែនាំនេះ អ្នកនឹងរកឃើញនូវមេរៀនសម្រាប់គ្រូបង្រៀននៅផ្ទះប្រចាំសប្ដាហ៍ ។ មេរៀនសិក្សានៅផ្ទះនឹងជួយសិស្សឲ្យរំឭក យល់កាន់តែស៊ីជម្រៅ ហើយអនុវត្តគោលលទ្ធិ និងគោលការណ៍នានាដែលពួកគេបានរៀន នៅពេលពួកគេបានបញ្ចប់មេរៀននៅក្នុងសៀវភៅមគ្គុទេសន៍ការសិក្សារបស់សិស្សក្នុងមួយសប្ដាហ៍នេះ ។ មេរៀនទាំងនេះក៏មាននូវសេចក្ដីពិតបន្ថែមលើសពីអ្វីដែលមាននៅក្នុងសៀវភៅមគ្គុទេសន៍ការសិក្សារបស់សិស្សទៅទៀត ។ ( សម្រាប់ជំនួយនៅក្នុងការគ្រោងកាលវិភាគមេរៀនរបស់អ្នក សូមមើលការណែនាំល្បឿនសម្រាប់គ្រូបង្រៀនការសិក្សានៅផ្ទះនៅក្នុងសេចក្ដីបន្ថែមនៅចុងបញ្ចប់នៃសៀវភៅណែនាំនេះ )។

ក្នុងនាមជាគ្រូបង្រៀនការសិក្សានៅផ្ទះ អ្នកគួរមានការយល់ដឹងទូទៅមួយអំពីអ្វីដែលសិស្សរបស់អ្នកកំពុងសិក្សានៅផ្ទះរាល់សប្ដាហ៍ ដើម្បីឲ្យអ្នកអាចឆ្លើយទៅនឹងសំណួរ និងបង្កើតនូវការពិភាក្សាដ៏មានន័យនៅពេលអ្នកជួបនឹងពួកគេ ។ សូមឲ្យសិស្សយកព្រះគម្ពីរ សៀវភៅកំណត់ហេតុការសិក្សាព្រះគម្ពីរ និងសៀវភៅមគ្គុទេសន៍ការសិក្សារបស់សិស្សមកកាន់ថ្នាក់ប្រចាំសប្ដាហ៍ ដើម្បីឲ្យពួកគេអាចបើកវានៅពេលរៀន ។ សូមសម្របមេរៀនតាមតម្រូវការរបស់សិស្សដែលអ្នកបង្រៀន និងស្របតាមការដឹកនាំពីព្រះវិញ្ញាណបរិសុទ្ធ ។ អ្នកក៏អាចបើកទៅមេរៀនប្រចាំថ្ងៃសម្រាប់គ្រូបង្រៀននៅក្នុងសៀវភៅណែនាំនេះ នៅពេលអ្នករៀបចំបង្រៀនបានដែរ ។ ការសិក្សាក្នុងជំនួយខាងការបង្រៀន និងវិធីបង្រៀនដែលប្រើនៅក្នុងមេរៀនប្រចាំថ្ងៃ អាចជួយពង្រឹងអ្នកក្នុងការបង្រៀនប្រចាំសប្ដាហ៍របស់អ្នក ។ សូមត្រៀមបំពេញតម្រូវការជាពិសេសនានាដល់សិស្សដែលអ្នកបង្រៀន ។ ឧទាហរណ៍ ប្រសិនបើសិស្សម្នាក់ពិបាកសរសេរ សូមឲ្យគាត់ប្រើប្រដាប់ថតសំឡេង ឬហៅគំនិតរបស់គេដល់សមាជិកគ្រួសារ ឬមិត្តម្នាក់ដែលអាចសរសេរចម្លើយរបស់គេឲ្យបាន ។

នៅចុងបញ្ចប់នៃមេរៀនប្រចាំសប្ដាហ៍នីមួយៗ សូមប្រមូលសៀវភៅកំណត់ហេតុការសិក្សាព្រះគម្ពីររបស់សិស្ស និងលើកទឹកចិត្តពួកគេឲ្យបន្ដសិក្សា ។ សូមចែកសៀវភៅកំណត់ហេតុការសិក្សាព្រះគម្ពីរដល់គេសម្រាប់កិច្ចការនៅសប្ដាហ៍ក្រោយ ។ ដោយសារតែកម្រិតនៃពេលវេលា អ្នកមិនអាចបន្ថែមសេចក្ដីបញ្ជាក់ដល់ចំណេះចំណានខគម្ពីរនៅក្នុងមេរៀនប្រចាំសប្ដាហ៍របស់អ្នកបានឡើយ ។ នៅពេលអ្នកអានកិច្ចការនៅក្នុងសៀវភៅកំណត់ហេតុការសិក្សាព្រះគម្ពីររបស់សិស្ស សូមឆ្លើយតបទៅនឹងកិច្ចការរបស់គេតាមពេលដោយការសរសេរកំណត់ចំណាំតូចមួយ ឬផ្ដល់យោបល់នាពេលក្រោយនៅពេលអ្នកជួបពួកគេ ។ អ្នកក៏អាចរករបៀបផ្សេងទៀតដើម្បីបង្ហាញនូវការគាំទ្រ និងផ្ដល់យោបល់កែតម្រូវដ៏មានប្រយោជន៍ ។ ការណ៍នេះនឹងជួយដល់សិស្សឲ្យដឹងថា អ្នកយកចិត្តទុកដាក់អំពីកិច្ចការរបស់គេ ហើយនឹងជួយជម្រុញដល់ពួកគេឲ្យខ្លាំងក្នុងកិច្ចការរបស់គេ ។

ធនធានដទៃទៀត

គ្រូបង្រៀនអាចមើលគេហទំព័ររបស់ថ្នាក់សិក្ខាសាលា និងថ្នាក់វិទ្យាស្ថានសាសនា ( si.lds.org ) រកជំនួយនៅក្នុងការរៀបចំមេរៀន និងទទួលបានគំនិតបន្ថែមសម្រាប់ការបង្រៀនថែមទៀត ។ ធនធានខាងក្រោមនេះមាននៅក្នុងអ៊ិនធើណិត តាមរយៈអ្នកដឹកនាំរបស់អ្នក តាមរយៈមជ្ឈមណ្ឌលចែកចាយនៃសាសនាចក្រក្នុងស្រុក និងតាមរយៈហាងតាមអ៊ិនធើណិតនៃសាសនាចក្រ ( store.lds.org ) ៖

រូបភាព
គម្រប ឌី.វី.ឌី

ធនធានឌី. វី. ឌី. សោតទស្សន៍នៃថ្នាក់សិក្ខាសាលា
រូបភាព
គម្របសៀវភៅ

សៀវភៅរូបភាពដំណឹងល្អ
រូបភាព
គម្របកំណត់ហេតុ

កំណត់ហេតុការសិក្សាព្រះគម្ពីរ
រូបភាព
ការកត់ចំណាំក្នុងសៀវភៅ

វត្ថុដាក់ចំណាំក្នុងសៀវភៅថ្នាក់សិក្ខាសាលា ( ដែលរួមមាននូវកាលសម័យ និងបញ្ជីនៃសេចក្ដីយោងចំណេះចំណានខគម្ពីរ និងពាក្យគន្លឹះទាំងឡាយ )
រូបភាព
ប័ណ្ណគំរូ

ប័ណ្ណចំណេះចំណានខគម្ពីរ
រូបភាព
គម្របសៀវភៅ

ពិតចំពោះសេចក្តីជំនឿ ៖ ឯកសារយោងដំណឹងល្អ
រូបភាព
គម្របកូនសៀវភៅ

ដើម្បីកម្លាំងនៃយុវជន
រូបភាព
គម្របប័ណ្ណប្រកាស

ប័ណ្ណប្រកាសពេលវេលា