មេរៀនទី 1
តួនាទីរបស់សិស្ស
សេចក្តីផ្ដើម
គោលបំណងនៃមេរៀននេះ គឺដើម្បីជួយដល់សិស្សទាំងអស់ឲ្យបំពេញតាមតួនាទីរបស់ពួកគេ នៅក្នុងការរៀនសូត្រពីដំណឹងល្អ ។ ពេលខ្លះ សិស្សគិតថា ទំនួលខុសត្រូវក្នុងការរៀនសូត្ររបស់ខ្លួន អាស្រ័យតែលើគ្រូបង្រៀនប៉ុណ្ណោះ ។ ប្រធាន ហិនរី ប៊ី អាវរិង នៃគណៈប្រធានទីមួយ បានមានប្រសាសន៍អំពីតម្រូវការទាំងសិស្ស និង គ្រូបង្រៀន ដើម្បីស្វែងរកការណែនាំពីព្រះវិញ្ញាណបរិសុទ្ធ ។
« បញ្ហា និងការល្បួងទាំងឡាយដែលសិស្សរបស់យើងបានជួបប្រទះ គ្រាន់តែក្នុងរយៈពេលប្រាំឆ្នាំកន្លងទៅមានលក្ខណៈស្រាលជាងឆ្ងាយណាស់ បើប្រៀបធៀបទៅនឹងអ្វីដែលយើងមើលឃើញនាពេលបច្ចុប្បន្ន ហើយវាមានលក្ខណៈកាន់តែពិបាកទៅនៅថ្ងៃអនាគត ។ ខ្ញុំមានអារម្មណ៍ … ថា អ្វីដែលយើងបានធ្វើ និងកំពុងធ្វើ នឹងមិនគ្រប់គ្រាន់នោះទេ ។ យើងត្រូវការព្រះចេស្ដាដ៏អស្ចារ្យជាងនេះ ដើម្បីទាញយកដំណឹងល្អមកចាក់ចូលនៅក្នុងដួងចិត្ត និង ជីវិតនៃកូនសិស្សទាំងឡាយរបស់យើង ។ …
« អ្នកត្រូវតែមានព្រះវិញ្ញាណធ្វើជាដៃគូដ៏ខ្ជាប់ខ្ជួនរបស់អ្នក ដើម្បីបង្រៀនដោយព្រះចេស្ដា ហើយសិស្សរបស់អ្នកនឹងមិនរស់រានខាងវិញ្ញាណបានទេ បើគ្មានព្រះវិញ្ញាណជាដៃគូរបស់ពួកគេ » ( « ព្រះវិញ្ញាណ ត្រូវតែជាដៃគូដ៏ខ្ជាប់ខ្ជួនរបស់យើង » [ សុន្ទរកថាទៅកាន់អ្នកអប់រំសាសនា ផ្នែក CES នៅថ្ងៃទី 7 ខែ កុម្ភៈ ឆ្នាំ 2003 ] ទំព័រ 1 , si.lds.org ) ។
នៅពេលដែលអ្នកបង្រៀនដោយព្រះចេស្ដានៃព្រះវិញ្ញាណបរិសុទ្ធ ហើយជួយសិស្សឲ្យរៀនដោយព្រះចេស្ដាដូចគ្នានោះ អ្នកអាចជួយពួកគេឲ្យក្លាយជាអ្នកផ្លាស់ប្រែចិត្តដ៏ពិត ចំពោះដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញនេះ ។ អ្នកអាចត្រូវការរំឭកគោលការណ៍ដែលបានបង្រៀននៅក្នុងមេរៀននេះជាប្រចាំ ដើម្បីរំឭកសិស្សទាំងអស់ពីទំនួលខុសត្រូវនៅក្នុងថ្នាក់របស់ពួកគេ ។
យោបល់សម្រាប់ការបង្រៀន
ទំនួលខុសត្រូវផ្ទាល់ខ្លួនក្នុងការរៀនដោយការសិក្សា និង ដោយសេចក្ដីជំនឿ
សូមអញ្ជើញសិស្សម្នាក់ឡើងមកខាងមុខថ្នាក់ ។ សូមពន្យល់ថា អ្នកចង់ជួយសិស្សនោះ ឲ្យរឹងមាំខាងរាងកាយខ្លាំងជាងមុន ។ បន្ទាប់មក សូមហៅសិស្សទីពីរម្នាក់ទៀតមកខាងមុខ ហើយធ្វើអាវ៉ង់ប្រាំដង ។
ក្រោយពីសិស្សទីពីរបានធ្វើអាវ៉ង់រួចហើយ សូមសួរទៅសិស្សទីមួយថា ៖
-
តើការធ្វើអាវ៉ង់នោះ បានជួយឲ្យអ្នករឹងមាំជាងមុនដែរឬទេ ?
សូមសួរទៅថ្នាក់ថា ៖
-
តើឧទាហរណ៍នៃការហាត់ប្រាណនេះ ទាក់ទងនឹងការទទួលខុសត្រូវរបស់អ្នកក្នុងការរៀនពីដំណឹងល្អយ៉ាងដូចម្ដេច ? តើនរណាទទួលខុសត្រូវចំពោះការរៀនពីដំណឹងល្អរបស់អ្នក ?
សូមអញ្ជើញសិស្សម្នាក់ឲ្យអានពាគោលលទ្ធិ និង សេចក្ដីសញ្ញា 88:118 ឲ្យឮៗ ។
-
តើអ្នកគិតថា វាមានន័យដូចមេ្ដច ដើម្បី « ស្វែងរកការរៀនសូត្រ … គឺដោយសារការសិក្សា និង ដោយសារសេចក្ដីជំនឿផង » ? ( អ្នកអាចលើកឡើងថាការរៀនសូត្រដោយការការសិក្សា និងដោយសេចក្ដីជំនឿ តម្រូវឲ្យមានការខិតខំរៀងៗខ្លួន ។ )
អែលឌើរ ដេវីឌ អេ បែដណា នៃកូរ៉ុមនៃសាវកដប់ពីរនាក់ បាននិយាយអំពី អត្ថន័យនៃការរៀនដោយសេចក្ដីជំនឿ ។ សូមលើកទឹកចិត្តសិស្សឲ្យសរសេរសម្ដីនេះទុកនៅកន្លែងណាមួយ ( ប្រហែលនៅក្នុងកំណត់ហេតុសិក្សាព្រះគម្ពីរ ឬ សៀវភៅសរសេររបស់ពួកគេ ) ដូច្នេះ ពួកគេអាចមើលវាបានញឹកញាប់ អំឡុងពេលរៀនថ្នាក់សិក្ខាសាលា ៖
« ការរៀនដោយសេចក្ដីជំនឿ តម្រូវឲ្យមានការខំប្រឹងខាងវិញ្ញាណ សតិអារម្មណ៍ និងរាងកាយ ហើយមិនមែនគ្រាន់តែជាការទទួលអំពើនោះទេ ។ … សិស្សម្នាក់ត្រូវតែអនុវត្តសេចក្ដីជំនឿ និងប្រតិបត្តិដើម្បីទទួលបានចំណេះដឹងសម្រាប់ខ្លួនឯងផ្ទាល់ » ( « ស្វែងរកការរៀនសូត្រដោយសេចក្ដីជំនឿ » [ ការថ្លែងទៅកាន់អ្នកអប់រំខាងសាសនា ផ្នែក CES ថ្ងៃទី 3 ខែ កុម្ភៈ ឆ្នាំ 2006 ] ទំព័រ 3, si.lds.org) ។
ការសិក្សាព្រះគម្ពីរផ្ទាល់ខ្លួនប្រចាំថ្ងៃ
សូមពន្យល់ថា ការសិក្សាព្រះគម្ពីរផ្ទាល់ខ្លួនប្រចាំថ្ងៃ គឺជាផ្នែកមួយដ៏សំខាន់នៃការស្វែងរកការរៀនសូត្រដោយសារការសិក្សា និង ដោយសារសេចក្ដីជំនឿ ។
សូមអញ្ជើញសិស្សឲ្យអាន ហេលេមិន 3:29–30 ឲ្យឮៗ ។
-
តើអ្នកគិតថា វាមានភាពខុសគ្នាយ៉ាងណា រវាងការអានព្រះគម្ពីរមិនសូវហ្មត់ចត់ និង « ការកាន់តាមព្រះបន្ទូលនៃព្រះ » ?
-
ដោយយោងតាម ខ ដែលយើងទើបតែបានអាន តើពរជ័យអ្វីខ្លះ ដែលបានមកពីការកាន់តាមព្រះបន្ទូលនៃព្រះ ?
-
តើពរជ័យអ្វីផ្សេងទៀត ដែលមកតាមរយៈការសិក្សាព្រះគម្ពីរប្រចាំថ្ងៃ ?
-
តើពេលណាដែលអ្នកទទួលបានពរជ័យនានា តាមរយៈការសិក្សាព្រះគម្ពីរផ្ទាល់ខ្លួនប្រចាំថ្ងៃ ?
នៅពេលដែលសិស្សឆ្លើយសំណួរទាំងនេះ សូមប្រាកដថា ពួកគេយល់ថា ការសិក្សាព្រះគម្ពីរប្រចាំថ្ងៃ ជួយពង្រឹងទីបន្ទាល់របស់យើង អញ្ជើញព្រះវិញ្ញាណបរិសុទ្ធមកក្នុងជីវិតរបស់យើង និង ជួយយើងឲ្យរៀនដំណឹងល្អ ។
សូមអញ្ជើញសិស្សឲ្យឆ្លើយនឹងសំណួរមួយក្នុងចំណោមសំណួរខាងក្រោម នៅក្នុងកំណត់ហេតុសិក្សាព្រះគម្ពីររបស់ពួកគេ ៖
-
តើអ្នកអាចពង្រីកការសិក្សាព្រះគម្ពីរមរមនរបស់អ្នកឆ្នាំនេះបានដោយរបៀបណា ?
-
តើការអានព្រះគម្ពីរមរមន បានជះឥទ្ធិពលដល់អារម្មណ៍របស់អ្នកអំពីព្រះយេស៊ូវគ្រីស្ទ តាមរបៀបណាខ្លះ ?
សូមអញ្ជើញសិស្សឲ្យដាក់គោលដៅមួយ ដើម្បីសិក្សាព្រះគម្ពីរមរមនប្រចាំថ្ងៃក្នុងឆ្នាំនេះ ។ សូមអញ្ជើញពួកគេឲ្យដាក់គោលដៅដើម្បីអានព្រះគម្ពីរមរមនឲ្យចប់ អំឡុងពេលសិក្ខាសាលាឆ្នាំនេះផងដែរ ។ អ្នកអាចផ្តល់ជាយោបល់ឲ្យពួកគេសរសេរទុកនូវគោលដៅទាំងនេះ នៅក្នុងកំណត់ហេតុសិក្សាព្រះគម្ពីររបស់ពួកគេ ។ សូមរំឭកពួកគេថា គោលដៅទាំងនេះ អាចជួយពួកគេជាមួយនឹងតម្រូវការក្នុងកាតព្វកិច្ចចំពោះព្រះ និង ការអភិវឌ្ឍខ្លួន ។
ការរៀនសូត្រដោយព្រះវិញ្ញាណ
សូមចម្លងឌីយ៉ាក្រាមខាងក្រោមដាក់លើក្ដារខៀន ។ សូមលុបពាក្យចេញពីឌីយ៉ាក្រាម ។ អ្នកនឹងសរសេរវា ពេលមេរៀនបោះជំហានទៅមុខ ។
សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា 50:17–18 ឲ្យឮៗ ។
-
យោងតាមខទាំងនេះ តើអ្វីខ្លះដែលព្រះអម្ចាស់ តម្រូវឲ្យគ្រូបង្រៀនដំណឹងល្អត្រូវមាន ? ( ដើម្បីបង្រៀនសេចក្ដីពិត ដោយព្រះចេស្ដានៃព្រះវិញ្ញាណ ) ។
សូមសរសេរ ព្រះវិញ្ញាណបរិសុទ្ធ និង គ្រូបង្រៀន នៅលើឌីយ៉ាក្រាម ដូចដែលបានបង្ហាញនៅខាងលើ ។ សូមចែកចាយគំនិតរបស់អ្នកអំពីការស្វែងរកការណែនាំពីព្រះវិញ្ញាណបរិសុទ្ធ នៅពេលដែលអ្នកបង្រៀន ។ សូមជួយសិស្សឲ្យដឹងថា នៅក្នុងការរៀបចំ និង ការបង្រៀនរបស់អ្នក អ្នកបានខិតខំដោយអស់ពីចិត្តដើម្បីត្រូវបានដឹកនាំដោយព្រះវិញ្ញាណ ។
សុំឲ្យសិស្សដាក់ប្រដាប់សៀតសៀវភៅចំណាំនៅត្រង់ គោលលទ្ធិ និង សេចក្ដីសញ្ញា 50 ( ដោយសារពួកគេនឹងត្រឡប់ទៅវគ្គនេះវិញ នាពេលបន្ដិចទៀត ) ។ សូមឲ្យសិស្សម្នាក់អាន នីហ្វៃទី2 33:1 ឲ្យឮៗ ។
-
តើព្រះវិញ្ញាណបរិសុទ្ធធ្វើអ្វីចំពោះអ្នករៀន នៅពេលដែលដំណឹងល្អត្រូវបានបង្រៀនទៅ ?
សូមពន្យល់ថា ដើម្បីរៀនដំណឹងល្អតាមរបៀបរបស់ព្រះអម្ចាស់ យើងត្រូវតែទទួលយកទំនួលខុសត្រូវដើម្បីរៀន ដោយព្រះចេស្ដានៃព្រះវិញ្ញាណបរិសុទ្ធ ។ សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា 50:19–21 ដោយស្ងាត់ៗ ។
-
តើយើងគួរសរសេរអ្វី នៅជ្រុងក្រោមខាងស្ដាំនៃត្រីកោណនេះ ? ( សរសេរពាក្យ សិស្ស ។ )
-
តើអ្នកគិតថា វាមានន័យយ៉ាងណាដើម្បីទទួលបានសេចក្ដីពិត ដោយព្រះវិញ្ញាណ ?
អ្នកអាចចង់បង្រៀនគោលការណ៍ខ្លះៗ អំពីការស្គាល់ឥទ្ធិពលនៃព្រះវិញ្ញាណបរិសុទ្ធ ។ សូមជួយសិស្សឲ្យយល់ថា ជាធម្មតា ព្រះវិញ្ញាណទាក់ទងជាមួយនឹងយើងយ៉ាងស្ងៀមស្ងាត់ តាមរយៈអារម្មណ៍របស់យើង និង នៅក្នុងគំនិតរបស់យើង ( សូមមើល នីហ្វៃទី1 17:45; គ. និង ស. 8:2–3 ) ។ ព្រះវិញ្ញាណបរិសុទ្ធ ក៏នាំអារម្មណ៍នៃសេចក្ដីស្រឡាញ់ ភាពរីករាយ សេចក្ដីសុខសាន្ដ ភាពអត់ធ្មត់ ការបន្ទាបខ្លួន សុភាពរាបសា សេចក្ដីជំនឿ និង សេចក្ដីសង្ឃឹមមកដល់យើងដែរ ( សូមមើល កាឡាទី 5:22–23; គ. និង ស. 11:12 ) ។
-
តើអ្នកអាចធ្វើអ្វីបាននៅក្នុងថ្នាក់សិក្ខាសាលា ដើម្បីរៀបចំខ្លួនអ្នករៀនដោយព្រះវិញ្ញាណ ?
នៅផ្នែកនៃការពិភាក្សានេះ សូមជួយសិស្សឲ្យយល់ថា របៀបសំខាន់មួយដើម្បីរៀនដោយព្រះវិញ្ញាណ គឺត្រូវមានឆន្ទៈដើម្បីចែកចាយទីបន្ទាល់យើងជាមួយគ្នាទៅវិញទៅមក ។ សូមអានប្រសាសន៍ខាងក្រោមដោយ អែលឌើរ រីឆាដ ជី ស្កត នៃកូរ៉ុមនៃពួកសាវកដប់ពីរនាក់ ៖
« នៅពេលសិស្សនិយាយពីសេចក្ដីពិត [ សេចក្ដីពិតទាំងនេះ ] ត្រូវបានបញ្ជាក់នៅក្នុងដួងចិត្តរបស់ពួកគេ ហើយពង្រឹងទីបន្ទាល់ផ្ទាល់ខ្លួនរបស់ពួកគេ » ( « ដើម្បីយល់ និង រស់នៅតាមសេចក្ដីពិត » [ សុន្ទរកថាទៅកាន់អ្នកអប់រំខាងសាសនា ផ្នែក CES ថ្ងៃទី 4 ខែ កុម្ភៈ ឆ្នាំ 2005 ] ទំព័រ 3, si.lds.org) ។
សូមរំឭកសិស្សថា កម្មវិធីកាតព្វកិច្ចចំពោះព្រះ និង ការអភិវឌ្ឍខ្លួន រួមមានការស្នើសុំដើម្បីធ្វើការចែកចាយសេចក្ដីពិតនៃដំណឹងល្អជាមួយនឹងអ្នកដទៃទៀត ។ សូមលើកទឹកចិត្តពួកគេ ឲ្យចែកចាយបទពិសោធន៍របស់ពួកគេនៅក្នុងថ្នាក់សិក្ខាសាលា នៅក្នុងកូរ៉ុម ឬ ការប្រជុំក្នុងថ្នាក់នានា និងនៅក្នុងការសន្ទនាជាមួយនឹងសមាជិកគ្រួសារ និង មិត្តភក្ដិរបស់ពួកគេ ។ សូមបញ្ជាក់យ៉ាងហ្មត់ចត់ថា នៅពេលពួកគេខិតខំប្រឹងប្រែងដើម្បីពន្យល់ ចែកចាយ និងថ្លែងទីបន្ទាល់ពីសេចក្ដីពិតនៃដំណឹងល្អ នោះព្រះនឹងបង្កើនសមត្ថភាពរបស់ពួកគេដើម្បីពិភាក្សាដំណឹងល្អជាមួយនឹងអ្នកដទៃទៀត ។
សូមត្រឡប់ទៅឌីយ៉ាក្រាមនៅលើក្ដារខៀនម្តងទៀត ។ សុំឲ្យសិស្សម្នាក់អាន គោលលទ្ធិ និង សេចក្ដីសញ្ញា 50:14, 22 ឲ្យឮ ៗ ។
-
តើខទាំងនេះ សង្ខេបពីតួនាទីនៃព្រះវិញ្ញាណបរិសុទ្ធ គ្រូបង្រៀន និង ការសិក្សាដំណឹងល្អរបស់សិស្ស ដោយរបៀបណា ? ( អ្នកអាចពន្យល់ថា ព្រះវិញ្ញាណបរិសុទ្ធ ដែលត្រូវបានហៅថាជា ព្រះវិញ្ញាណ និង ព្រះដ៏ជាជំនួយផងដែរ នៅក្នុងវគ្គនេះ នឹងបង្រៀនពីសេចក្ដីពិត ។ គ្រូបង្រៀន គឺត្រូវបង្រៀនដោយព្រះចេស្ដានៃព្រះវិញ្ញាណ ហើយសិស្សត្រូវរៀនដោយព្រះចេស្ដាដូចគ្នា ។ )
-
តើនឹងមានអ្វីកើតឡើង នៅពេលដែលសិស្សម្នាក់រៀន ដោយព្រះវិញ្ញាណ ហើយគ្រូបង្រៀនដោយព្រះវិញ្ញាណ ? ( អ្នកអាចត្រូវការពន្យល់ថា ស្អាងឡើង មានន័យថា កសាងឡើង ពង្រឹង បំភ្លឺ ឬ ពង្រីក ។ )
នៅក្នុងព្រះគម្ពីរមរមន អេណុស និង អាលម៉ា គឺជាគំរូនៃមនុស្សដែលបានរៀនដោយព្រះវិញ្ញាណ ។ សុំឲ្យសិស្សអាន អេណុស 1:4–10 និង អាលម៉ា 5:45–47 ដោយស្ងាត់ៗ ។ ( អ្នកអាចសរសេរ ខយោងទាំងនេះនៅលើក្ដារខៀន ) ។ បន្ទាប់មកសួរថា ៖
-
តើអេណុស ( ឬ អាលម៉ា ) បានធ្វើអ្វីខ្លះដើម្បីរៀនដោយព្រះវិញ្ញាណ ?
-
តើព្រះវិញ្ញាណបានធ្វើអ្វី សម្រាប់អេណុស ( ឬ អាលម៉ា ) ?
សូមអញ្ជើញសិស្សម្នាក់ ឲ្យអានប្រសាសន៍ខាងក្រោមដោយ អែលឌើរ បែដណា ៖
« យើងគួរតែចងចាំជានិច្ចថា ព្រះវិញ្ញាណបរិសុទ្ធ គឺជាគ្រូបង្រៀនដែល តាមរយៈការអញ្ជើញដោយត្រឹមត្រូវ អាចចូលមកក្នុងដួងចិត្តរបស់អ្នករៀនបាន » ( « ស្វែងរកការរៀនសូត្រដោយសារសេចក្ដីជំនឿ » 4 ) ។
-
តើអ្វីដែលយើងបានរៀនរួចហើយ ដែលពាក់ព័ន្ធចំពោះការទទួលខុសត្រូវផ្ទាល់ខ្លួនរបស់អ្នក ក្នុងនាមជាសមាជិកម្នាក់នៅក្នុងថ្នាក់នេះ ដោយរបៀបណា ? ( នៅពេលដែលសិស្សឆ្លើយសំណួរ សូមប្រាកដថា ពួកគេយល់ថា នៅពេលដែលយើងបើកដួងចិត្តរបស់យើង ហើយសួរដល់ព្រះដោយសេចក្ដីជំនឿ នោះព្រះវិញ្ញាណបរិសុទ្ធនឹងជួយយើងឲ្យយល់ពីសេចក្ដីពិតនៃដំណឹងល្អ ។ )
ដើម្បីជួយសិស្សពិចារណាពីរបៀប ដែលពួកគេអាចជួយគ្នាទៅវិញទៅមក ឲ្យរៀនដោយព្រះវិញ្ញាណ សូមសួរថា ៖
-
តើសកម្មភាពណាខ្លះ ដែលយើងអាចធ្វើ ដើម្បីនឹងជួយអញ្ជើញព្រះវិញ្ញាណមកគង់នៅក្នុងថ្នាក់រៀនរបស់យើង ? ( ចម្លើយអាចរួមមាន ការច្រៀងចម្រៀងបើក ការយកព្រះគម្ពីរមកថ្នាក់ ហើយប្រើព្រះគម្ពីរប្រចាំថ្ងៃ ការមានឆន្ទៈឆ្លើយសំណួរ និង ចែកចាយបទពិសោធន៍ ការអធិស្ឋានសម្រាប់គ្នាទៅវិញទៅមក និង ការសុំការណែនាំពីព្រះវិញ្ញាណបរិសុទ្ធ ) ។
ដើម្បីជួយសិស្សយល់ថា សកម្មភាពអវិជ្ជមានខ្លះ ក៏អាចមានឥទ្ធិពលលើថ្នាក់ទាំងមូលផងដែរ សូមសួរថា ៖
-
តើឥរិយាបថ ឬ អាកប្បកិរិយាបែបណាខ្លះ ដែលរារាំងព្រះវិញ្ញាណមិនឲ្យមកគង់នៅក្នុងថ្នាក់សិក្ខាសាលា ?
សូមអញ្ជើញសិស្សឲ្យពិចារណា ពីតម្លៃនៃការមានព្រះវិញ្ញាណបរិសុទ្ធក្នុងនាមជាគ្រូបង្រៀនរបស់ពួកគេ ។
-
តើមានពេលវេលាណាខ្លះដែលអ្នកមានបទពិសោធន៍ ថាព្រះវិញ្ញាណដើរតួនាទីរបស់ទ្រង់ជាគ្រូបង្រៀនមួយអង្គ ?
សូមបញ្ចប់ដោយការអញ្ជើញសិស្សឲ្យរៀនដោយសារការសិក្សា និង សេចក្ដីជំនឿ នៅពេលពួកគេសិក្សាព្រះគម្ពីរមរមននៅក្នុងថ្នាក់សិក្ខាសាលាក្នុងឆ្នាំនេះ ។ អ្នកអាចធ្វើការតាមដានជាមួយនឹងសិស្ស ពេញមួយឆ្នាំ ដើម្បីលើកទឹកចិត្តពួកគេឲ្យបន្ដនៅក្នុងកិច្ចការនេះ ។
វិចារណកថា និង ព័ត៌មានសាច់រឿង
ការសិក្សាព្រះគម្ពីរប្រចាំថ្ងៃ
« ព្យាការីថ្ងៃចុងក្រោយ បានប្រឹក្សាយើងឲ្យសិក្សាព្រះគម្ពីររាល់ថ្ងៃ ទាំងដោយផ្ទាល់ខ្លួន និង ជាមួយនឹងគ្រួសាររបស់យើង ។ ពួកលោក លើកទឹកចិត្តយើងដូចជា នីហ្វៃ បានលើកទឹកចិត្តដល់បងប្អូនប្រុសរបស់លោក ឲ្យប្រដូចបទគម្ពីរទៅនឹងខ្លួនយើង ចូរស្វែងរករបៀបទាំងឡាយ ដែលជាដំណើររឿងពិសិដ្ឋក្នុងជំនាន់បុរាណ អនុវត្តក្នុងជីវិតរបស់យើងសព្វថ្ងៃនេះ (សូមមើល នីហ្វៃទី 1 19:23-24) ។ ពួកលោកបានទូន្មានដល់យើងថា ‹ ស្ទង់មើលគម្ពីរ › (យ៉ូហាន 5:39) និង ‹ ទទួលទាននូវព្រះបន្ទូលនៃព្រះគ្រីស្ទ › (នីហ្វៃទី 2 32:3) ។
« អ្នកនឹងទទួលបានប្រយោជន៍យ៉ាងខ្លាំង ដោយការធ្វើតាមការប្រឹក្សានេះ ។ ការសិក្សាព្រះគម្ពីរដ៏ជ្រាលជ្រៅជាប្រចាំថ្ងៃ ជួយអ្នកឲ្យទទួលបានការខ្សឹបប្រាប់នៃព្រះវិញ្ញាណបរិសុទ្ធ ។ វាជួយកសាងសេចក្ដីជំនឿរបស់អ្នក ធ្វើឲ្យអ្នកមាំមួនប្រឆាំងនឹងការល្បួង និង ជួយអ្នកឲ្យខិតជិតទៅព្រះវរបិតាសួគ៌ារបស់អ្នក និង ព្រះរាជបុត្រាដ៏ស្ងួនភ្ងារបស់ទ្រង់ ។
« អភិវឌ្ឍគម្រោងសម្រាប់ការសិក្សាព្រះគម្ពីរផ្ទាល់ខ្លួនអ្នក ។ សូមញែកពេលមួយចំនួនរៀងរាល់ថ្ងៃ ដាក់សម្រាប់សិក្សាព្រះគម្ពីរ ។ អំឡុងពេលនោះ សូមអានដោយប្រុងប្រយ័ត្ន ដោយយកចិត្តទុកដាក់ទៅនឹងការបំផុសនៃព្រះវិញ្ញាណ ។ ចូរសុំដល់ព្រះវរបិតាសួគ៌ារបស់អ្នក ឲ្យជួយអ្នកដឹងពីអ្វីដែលទ្រង់នឹងចង់ឲ្យអ្នករៀន និង ធ្វើ ។
« បន្ដអានព្រះគម្ពីរ ជាពិសេសព្រះគម្ពីរមរមន ពេញមួយជីវិតរបស់អ្នក ។ អ្នកនឹងរកឃើញជាថ្មីនូវរតនសម្បត្តិនៃព្រះគម្ពីរម្ដងហើយម្ដងទៀត ដោយរកឃើញន័យថ្មី និង ការអនុវត្តថ្មីពីក្នុងព្រះគម្ពីរ នៅពេលអ្នកសិក្សាវានៅដំណាក់កាលផ្សេងៗគ្នានៅក្នុងជីវិត » (ពិតចំពោះសេចក្ដីជំនឿ ៖ ឯកសារយោងដំណឹងល្អ [ ឆ្នាំ 2004 ] « បទគម្ពីរ » ទំព័រ 98 ) ។
ប្រធាន ហិនរី ប៊ី អាវរិង នៃគណៈប្រធានទីមួយបានមានប្រសាសន៍ ៖
« ប្រសិនបើយើងធ្វើឲ្យមានទម្លាប់មិនហ្មត់ចត់នៅក្នុងការសិក្សាព្រះគម្ពីររបស់យើង នោះយើងនឹងមានទម្លាប់មិនហ្មត់ចត់នៅក្នុងការអធិស្ឋានរបស់យើងផងដែរ ។
យើងមិនអាចឈប់អធិស្ឋានបានទេ បើខ្វះគោលបំណង នោះការអធិស្ឋានរបស់យើង នឹងក្លាយជាច្រំដែលៗ ដូចគ្រឿងម៉ាស៊ីន ។ ដួងចិត្តរបស់យើង មិនអាចយកចេញពីព្រះមួយអង្គដែលយើងមិនស្គាល់នោះទេ ហើយព្រះគម្ពីរ និង ពាក្យសម្ដីរបស់ព្យាការីដែលនៅរស់ អាចជួយយើងឲ្យស្គាល់ទ្រង់ » ( « ការអធិស្ឋាន » Ensign ខែ វិចិ្ឆកា ឆ្នាំ 2001 ទំព័រ 17 ) ។
នីហ្វៃទី២ ៣៣:១ ។ សូមបើកដួងចិត្តរបស់យើងចំពោះព្រះវិញ្ញាណបរិសុទ្ធ
នៅផ្នែកមួយនៃការពិភាក្សារបស់អ្នកលើ នីហ្វៃទី 2 33:1 សូមគិតពីការអាននូវប្រសាសន៍ខាងក្រោមដោយ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ ៖
« នីហ្វៃបង្រៀនយើង ‹ ដ្បិតកាលណាមនុស្សមួយនិយាយ ដោយព្រះចេស្ដានៃព្រះវិញ្ញាណបរិសុទ្ធ នោះព្រះចេស្ដានៃព្រះវិញ្ញាណបរិសុទ្ធ នឹងនាំ [ សារលិខិត ] ចូលទៅក្នុងចិត្តនៃកូនចៅមនុស្ស › (នីហ្វៃទី 2 33:1) ។ សូមកត់ចំណាំពីរបៀបដែលព្រះចេស្ដានៃព្រះវិញ្ញាណនាំសារលិខិត ទៅដល់ ប៉ុន្ដែមិនមែនចាំបាច់ ទៅក្នុង ដួងចិត្តនោះទេ ។ គ្រូបង្រៀនម្នាក់អាចពន្យល់ បង្ហាញ បញ្ចុះបញ្ចូល និង ថ្លែងទីបន្ទាល់ និង ធ្វើដូច្នោះដោយមានព្រះចេស្ដានៃព្រះវិញ្ញាណដ៏អស្ចារ្យ និង ដោយមានប្រសិទ្ធភាព ។ ទីបំផុត ទោះយ៉ាងណាក្ដី អត្ថន័យនៃសារលិខិតមួយ និង សាក្សីនៃព្រះវិញ្ញាណបរិសុទ្ធ បានទម្លុះចូលទៅក្នុងដួងចិត្ត បើសិនជាអ្នកទទួលអនុញ្ញាតឲ្យវាចូលទៅបាន ។…
« អ្នករៀនម្នាក់ ដែលអនុវត្តសិទ្ធិជ្រើសរើសដោយសកម្មភាព ស្របតាមគោលការណ៍ត្រឹមត្រូវ គឺបើកដួងចិត្តរបស់ខ្លួនឲ្យព្រះវិញ្ញាណបរិសុទ្ធ ហើយអញ្ជើញការបង្រៀន ព្រះចេស្ដានៃការថ្លែងទីបន្ទាល់ និង សាក្សីបញ្ជាក់របស់ទ្រង់ » ( « ស្វែងរកការរៀនសូត្រដោយសេចក្ដីជំនឿ » [ ការថ្លែងទៅកាន់អ្នកអប់រំខាងសាសនា ផ្នែក CES ថ្ងៃទី 3 ខែ កុម្ភៈ ឆ្នាំ 2006 ], 1, 3, si.lds.org) ។