នីហ្វៃទី 3 28

សេចក្តីផ្ដើម

នៅពេលព្រះយេស៊ូវគ្រីស្ទបានសួរដល់ពួកសាវកសាសន៍នីហ្វៃទាំងដប់ពីររបស់ទ្រង់ម្ដងម្នាក់ៗអំពីអ្វីដែលពួកលោកចង់បានពីទ្រង់ មានប្រាំបួននាក់បានស្នើសុំឲ្យត្រឡប់ទៅកាន់ទ្រង់កាន់តែលឿន នៅពេលការបម្រើរបស់ពួកគេនៅលើផែនដីបានបញ្ចប់ ។ បីនាក់បានសុំនៅបន្ដនៅលើផែនដីដើម្បីនាំព្រលឹងទាំងឡាយមកកាន់ទ្រង់រហូតដល់ការយាងមកជាលើកទីពីររបស់ទ្រង់ ។ ព្រះអម្ចាស់បានធ្វើតាមបំណងដ៏សុចរិតទាំងពីរនោះ ។ មរមនបានផ្ដល់សេចក្ដីលម្អិតខ្លះអំពីការបម្រើរបស់សាសន៍នីហ្វៃបីរូប ហើយលោកក៏បានចែកចាយអ្វីដែលព្រះអម្ចាស់បានបើកសម្ដែងដល់លោកអំពីការផ្លាស់ប្ដូរខាងរាងកាយនៃសាសន៍នីហ្វៃទាំងបីរូបបានមាន ដើម្បីឲ្យពួកលោកនៅតែបន្ដនៅលើផែនដី ។

យោបល់ទំាងឡាយសម្រាប់ការបង្រៀន

នីហ្វៃទី 3 28:1–11

ព្រះយេស៊ូវគ្រីស្ទប្រទានតាមបំណងរបស់ពួកសិស្សសាសន៍នីហ្វៃរបស់ទ្រង់

សូមឲ្យសិស្សសញ្ជឹងគិតពីរបៀបដែលពួកគេនឹងឆ្លើយតប ប្រសិនបើព្រះយេស៊ូវគ្រីស្ទបានមកជួបពួកគេហើយសួរថា « តើអ្នកចង់បានប្រាថ្នាអ្វីពីយើង » ? សូមឲ្យពួកគេសរសេរចម្លើយរបស់ពួកគេនៅក្នុងសៀវភៅកំណត់ហេតុការសិក្សាព្រះគម្ពីរ ឬ ក្នុងសៀវភៅសរសេរ ។ សូមឲ្យពួកគេមានឱកាសចែកចាយអ្វីដែលពួកគេបានសរសេរ ប្រសិនបើពួកគេមានអារម្មណ៍ថាចង់ ធ្វើដូច្នោះ ។

សូមឲ្យសិស្សអាន នីហ្វៃទី 3 28:1–3 ដោយស្ងៀមស្ងាត់ ដោយរកមើលចម្លើយរបស់ពួកសិស្សប្រាំបួនរូបសាសន៍នីហ្វៃ នៅពេលព្រះអម្ចាស់បានសួរពួកលោកនូវសំណួរនេះ ។ បន្ទាប់ពីសិស្សរៀបរាប់ពីអ្វីដែលពួកគេបានរៀនហើយ សូមសួរ ៖

តើព្រះអង្គសង្គ្រោះមានអារម្មណ៍យ៉ាងណាអំពីបំណងរបស់ពួកសិស្សទាំងប្រាំបួននេះ ?

សូមឲ្យសិស្សអាន នីហ្វៃទី 328:4–9 ដោយស្ងៀមស្ងាត់ ដោយរកមើលអ្វីដែលពួកសិស្សទាំងបីចង់បានពីព្រះអង្គសង្គ្រោះ ។ សូមឲ្យសិស្សរៀបរាប់ពីអ្វីដែលពួកគេរកឃើញ ។ ( វាអាចជួយក្នុងការនាំចំណាប់អារម្មណ៍របស់សិស្សទៅមើលប្រយោគខាងក្រោមនៅក្នុង នីហ្វៃទី 3 28:9 ៖ « អ្នករាល់គ្នាប្រាថ្នាចង់នាំព្រលឹងមនុស្សមករកយើង » )។

តើព្រះអង្គសង្គ្រោះមានអារម្មណ៍យ៉ាងណាអំពីបំណងរបស់ពួកសិស្សទាំងបីនេះ ?
យោងតាម នីហ្វៃទី 3 28:8–9 តើព្រះអង្គសង្គ្រោះបានសន្យាអ្វីខ្លះដល់ សាសន៍នីហ្វៃទាំងបី ដើម្បីឲ្យបំណងដ៏សុចរិតរបស់ពួកលោកអាចបានសម្រេច ?

ចៀសវាងការទស្សន៍ទាយអំពីសាសន៍នីហ្វៃទាំងបី

មនុស្សជាច្រើនបានឮរឿងអំពីដំណើររបស់សាសន៍នីហ្វៃទាំងបី ។ ជំនួសឲ្យការចែកចាយរឿងទាំងនេះ សូមបង្រៀនអ្វីដែលត្រូវបានបង្រៀននៅក្នុងព្រះគម្ពីរ ។ សូមចាំពីប្រយោគរបស់ មរមនដែលលោកបានមានប្រសាសន៍ថា សាសន៍នីហ្វៃទាំងបីនឹងមកក្នុងចំណោមពួកសាសន៍ដទៃ និងពួកសាសន៍យូដា ដែលនឹង « ពុំស្គាល់ពួកគេឡើយ » ( នីហ្វៃទី 3 28:27–28 ) ។ សូមចាកចេញពីការពិភាក្សារឿង ឬព័ត៌មានផ្សេងទៀតដែលមិនមាននៅក្នុងប្រភពដែលសាសនាចក្របានអនុម័ត ។

សូមឲ្យសិស្សម្នាក់អាន នីហ្វៃទី 3 28:10 ឮៗ ហើយសូមឲ្យសិស្សក្នុងថ្នាក់រកមើលនូវពរជ័យដែលព្រះអម្ចាស់បានសន្យានឹងពួកសាសន៍នីហ្វៃទាំងបីរូប ។

តើព្រះអម្ចាស់បានសន្យាអ្វីខ្លះនឹងពួកសាសន៍នីហ្វៃទាំងបីរូប ? តើនៅពេលណាដែលអ្នកបានឃើញការបម្រើដល់អ្នកដទៃនាំទៅរកសេចក្ដីអំណរ ?
តើយើងអាចរៀនអ្វីខ្លះអំពីព្រះអម្ចាស់នៅក្នុងនីហ្វៃទី 3 28:1–10 ? ( ចម្លើយរបស់សិស្សចំពោះសំណួរនេះអាចរួមមាន ព្រះអម្ចាស់ប្រទានពរដល់យើងស្របតាមបំណងដ៏សុចរិតរបស់យើង និងថា ព្រះអម្ចាស់សព្វព្រះទ័យ នៅពេលយើងមានបំណងជួយដល់អ្នកដទៃឲ្យមករកទ្រង់ )។

ដើម្បីជួយសិស្សឲ្យយល់ពីសារៈសំខាន់នៃបំណងដ៏សុចរិត សូមអានសេចក្ដីថ្លែងការណ៍ខាងក្រោម ៖

អែលឌើរ នែល អេ ម៉ាក់ស្វែលក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា ៖

« អ្វីដែលយើងប្រាថ្នាចង់បានរយៈពេលជាយូរ គឺជាអ្វីដែលយើងនឹងក្លាយជានៅទីបញ្ចប់ និងអ្វីដែលយើងនឹងទទួលបាននៅក្នុងភាពអស់កល្ប ។ …

« ហេតុដូច្នេះហើយ បំណងដ៏សុចរិតត្រូវតែមានឥតឈប់ឈរ »( « According to the Desire of [Our] Hearts » Ensign ខែ វិច្ឆិកា ឆ្នាំ 1996 ទំព័រ 21–22 ) ។

ប្រធាន ព្រិកហាំ យ៉ង់ បានបង្រៀន ៖

« បុរស និងស្ដ្រី ដែលប្រាថ្នាចង់បានកន្លែងនៅក្នុងនគរសេឡេស្ទាលនឹងឃើញថា ពួកគេត្រូវធ្វើសង្គ្រាមជាមួយនឹងសត្រូវនៃសេចក្ដីសុចរិតទាំងឡាយរាល់ថ្ងៃ » ( « Remarks » Deseret News ថ្ងៃទី 28 ខែ ធ្នូ ឆ្នាំ 1864 ទំព័រ 98 ) ។

តើអ្នកគិតថា ហេតុអ្វីបានជាយើងត្រូវធ្វើសង្គ្រាមរាល់ថ្ងៃដើម្បីឲ្យបំណងដ៏សុចរិតរបស់យើងអាចទៅបានសម្រេចនោះ ?
តើនៅពេលណាដែលអ្នកមានអារម្មណ៍ថា ព្រះអម្ចាស់បានប្រទានពរដល់អ្នក ដោយសារតែបំណងដ៏សុចរិតរបស់អ្នក ?

សូមឲ្យសិស្សមើលបំណងដែលពួកគេបានសរសេរនៅពេលចាប់ផ្ដើមថ្នាក់ ។ សូមឲ្យពួកគេសរសេរប្រយោគពីរបីអំពីអ្វីដែលពួកគេនឹងចាប់ផ្ដើមធ្វើនៅថ្ងៃនេះដើម្បីធ្វើឲ្យប្រាកដថា បំណងដ៏សុចរិតទាំងនោះអាចនឹងបានសម្រេច ។

នីហ្វៃទី 3 28:12–35

មរមនបានរៀបរាប់ការបម្រើរបស់ សាសន៍នីហ្វៃទាំងបីរូប

សូមឲ្យសិស្សម្នាក់អាន នីហ្វៃទី 3 28:12–16 ឮៗ ។ សូមឲ្យសិស្សក្នុងថ្នាក់មើលតាម ដោយរកមើលអ្វីដែលបានកើតឡើងដល់សិស្សសាសន៍នីហ្វៃ ក្រោយពីព្រះអង្គសង្គ្រោះបានចាកចេញពីពួកលោក ។ សូមពន្យល់ថា ពួកសិស្សបានជួបនឹងការប្រែរូប— ការផ្លាស់ប្ដូរបណ្ដោះអាសន្នចំពោះរាងកាយរបស់ពួកលោក ។

យោងតាម នីហ្វៃទី 3 28:15 តើអ្វីជាមូលហេតុមួយដែលពួកសិស្សត្រូវតែប្រែរូប ? ( ដើម្បីឲ្យ « ពួកគេអាចឃើញការណ៍ទាំងឡាយនៃព្រះបាន » ។ )

សូមពន្យល់ថា ដោយការចាប់ផ្ដើមជាមួយនឹង នីហ្វៃទី 3 28:17 យើងនឹងអានការរៀបរាប់របស់ មរមនអំពីការបម្រើរបស់ពួកសាសន៍នីហ្វៃទាំងបី ។ សូមឲ្យសិស្សអាន នីហ្វៃទី 3 28:17 ដោយស្ងៀមស្ងាត់ ដោយរកមើលអ្វីដែលមរមនមិនបានដឹងអំពីលក្ខខណ្ឌនៃរាងកាយរបស់ពួកសាសន៍នីហ្វៃទាំងបី នៅពេលលោកបានសរសេរពីដំណើររឿងនេះ ។ ( អ្នកអាចប្រាប់សិស្សថា នៅពេលក្រោយក្នុងមេរៀននេះ ពួកគេនឹងរៀនបន្ថែមទៀតអំពីការផ្លាស់ប្ដូរដែលពួកសាសន៍នីហ្វៃទាំងបីបានជួប ) ។

សូមឲ្យសិស្សពីរបីនាក់ប្ដូរវេនគ្នាអានឮៗពី នីហ្វៃទី 3 28:18–23 ។ សូមឲ្យសិស្សក្នុងថ្នាក់មើលតាម ដោយរកមើលពីរបៀបដែលព្រះអម្ចាស់បានប្រទានពរដល់ពួកសាសន៍នីហ្វៃទាំងបី ដើម្បីឲ្យពួកលោកអាចបន្ដបំណងដ៏សុចរិតរបស់ពួកលោក ។

តើសាសន៍នីហ្វៃទាំងបីបានធ្វើអ្វីខ្លះដើម្បីបំពេញតាមបំណងរបស់គេក្នុងការនាំអ្នកដទៃមកកាន់ព្រះអង្គសង្គ្រោះ ?
តើព្រះអម្ចាស់បានប្រទានពរយ៉ាងណាដល់ពួកលោក ដើម្បីអាចសម្រេចបំណងរបស់ពួកលោកបាន ?

សូមឲ្យសិស្សអាន នីហ្វៃទី 3 28:25–32 ដោយស្ងៀមស្ងាត់ ដោយរកមើលប្រជាជនដែលទទួលបានប្រយោជន៍ ហើយដែលនឹងទទួលបានប្រយោជន៍ពីការបម្រើរបស់សាសន៍នីហ្វៃទាំងបីនេះ ។ អ្នកអាចស្នើថា សិស្សគួរគូសចំណាំអ្វីដែលពួកគេរកឃើញ ។ ( សូមចំណាំថា នីហ្វៃទី 3 28:27–28 បង្ហាញពីមូលហេតុមួយដែលយើងគួរប្រុងប្រយ័ត្នអំពីការជឿ និងការចែកចាយរឿងពីមនុស្សដែលអះអាងថាបានជួបនឹងសាសន៍នីហ្វៃទាំងបីនេះ ៖ មរមនលោកបានមានប្រសាសន៍ថា នៅក្នុងចំណោមប្រជាជនដែលពួកសាសន៍នីហ្វៃទាំងបីបានបម្រើ « នឹងពុំស្គាល់ពួកគេឡើយ » ) ។

នីហ្វៃទី 3 28:36–40

មរមនរៀនអំពីលក្ខណៈនៃការប្រែរូប

សូមសួរសិស្សថា តើពួកគេធ្លាប់មានសំណួរមួយអំពីដំណឹងល្អ ឬថាតើពួកគេធ្លាប់អានអ្វីមួយនៅក្នុងព្រះគម្ពីរដែលពួកគេមិនយល់ដែរឬទេ ។ សូមរំឮកពួកគេថា នៅពេលមរមនបានសរសេរអំពីការប្រែរូបជាលើកដំបូងអំពីពួកសាសន៍នីហ្វៃទាំងបី លោកបានមានប្រសាសន៍ថា លោកមិនបានយល់ច្បាស់ពីការផ្លាស់ប្ដូរនៃលក្ខខណ្ឌរូបកាយរបស់ពួកគេក្នុងពេលពួកគេបម្រើនៅលើផែនដីឡើយ ( សូមមើល នីហ្វៃទី 3 28:17 ) ។

តើជាធម្មតាអ្នកនឹងទៅរកអ្នកណា នៅពេលអ្នកមានសំណួរអំពីដំណឹងល្អ ឬអំពីវគ្គព្រះគម្ពីរនោះ ? ហេតុអ្វី ?

សូមឲ្យសិស្សអាន នីហ្វៃទី 3 28:36–37 ដោយស្ងៀមស្ងាត់ ដើម្បីស្វែងរកអ្វីដែលមរមនបានធ្វើដើម្បីស្វែងរកចម្លើយចំពោះសំណួររបស់លោក ។

តើគោលការណ៍អ្វីដែលយើងអាចរៀនពីមរមនអំពីរបៀបដើម្បីទទួលបានការយល់ដឹងបន្ថែមទៀត ? ( ទោះបីជាសិស្សអាចមានចម្លើយខុសគ្នាក្ដី សូមប្រាកដថា ពួកគេរកឃើញគោលការណ៍ដូចតទៅនេះ៖ នៅពេលយើងខ្វះការយល់ដឹង យើងគួរសូមដល់ព្រះវរបិតា នោះយើងនឹងទទួលបានការដឹកនាំ ) ។
តើឧទាហរណ៍អ្វីខ្លះដែលបង្ហាញពីគោលការណ៍នេះ ?
តើស្ថានភាពណាខ្លះដែលយើងអាចត្រូវសុំដល់ព្រះវរបិតាសួគ៌សម្រាប់ការយល់ដឹងបន្ថែមទៀត ?

សូមអានសេចក្ដីថ្លែងការណ៍ខាងក្រោមដែល ប្រធាន ស្ពែនស៊ើរ ដបុលយូ ឃឹមបឹល បញ្ជាក់ពីកាលៈទេសៈមួយចំនួនដែលយើងគួរអធិស្ឋានសុំជំនួយ ៖

រូបភាព

ប្រធាន ស្ពែនស៊ើរ ដបុលយូ ឃឹមបឹល

« យើងម្នាក់ៗត្រូវការជំនួយពីទ្រង់ជាខ្លាំង នៅពេលយើងស្វែងរកដើម្បីសិក្សាពីសេចក្ដីពិតនៃដំណឹងល្អ ហើយបន្ទាប់មករស់នៅតាមវា នៅពេលយើងស្វែងរកជំនួយពីទ្រង់នៅក្នុងការសម្រេចចិត្តដ៏សំខាន់នៅក្នុងជីវិតរបស់យើង ការសម្រេចចិត្តដែលទាក់ទងនឹងការរៀនសូត្រ អាពាហ៍ពិពាហ៍ ការងារ កន្លែងរស់នៅ ការចិញ្ចឹមគ្រួសារ ការបម្រើដល់គ្នាទៅវិញទៅមកនៅក្នុងកិច្ចការនៃព្រះអម្ចាស់ និងការស្វែងរកការអភ័យទោសពីទ្រង់ និងការណែនាំបន្ត និងការការពារនៅក្នុងគ្រប់ការណ៍ដែលយើងធ្វើ ។ បញ្ជីនៃតម្រូវការរបស់យើងវែង ហើយពិត និងស្មោះត្រង់ ។ …

« ក្រោយពីការអធិស្ឋានដ៏យូរមក ខ្ញុំស្គាល់ពីសេចក្ដីស្រឡាញ់ និងអំណាច ព្រមទាំងកម្លាំងដែលមកពីការអធិស្ឋានដ៏ស្មោះត្រង់ ហើយនិងដោយស្មោះស្ម័គ្រ ។ ខ្ញុំដឹងពីការត្រៀមរួចជាស្រេចរបស់ ព្រះវរបិតាយើងដើម្បីជួយយើងនៅក្នុងជីវិតរមែងស្លាប់របស់យើង ដើម្បីបង្រៀនយើង ដឹកនាំយើង ណែនាំយើង ។ ហេតុដូច្នេះហើយ ដោយសេចក្ដីស្រឡាញ់ដ៏ធំ ព្រះអង្គសង្គ្រោះរបស់យើងបានមានបន្ទូលថា ‹ អ្វីដែលយើងប្រាប់ដល់មនុស្សម្នាក់យ៉ាងណា នោះយើងប្រាប់ដល់មនុស្សទាំងអស់យ៉ាងនោះដែរ ចូរអធិស្ឋានជានិច្ច › ។ ( គ. និង ស. 93:49 ។ ) »( « Pray Always » Ensign ខែ តុលា ឆ្នាំ 1981 ទំព័រ 3, 6 ) ។

តើអ្នកអាចបង្កើនសេចក្ដីជំនឿរបស់អ្នកទៅលើអំណាចនៃការអធិស្ឋានដោយរបៀបណា ? តើនៅពេលណាដែលអ្នក និងគ្រួសាររបស់អ្នកទទួលបានចម្លើយចំពោះការអធិស្ឋានរបស់អ្នក ?

សូមលើកទឹកចិត្តសិស្សឲ្យទៅរកព្រះវរបិតាសួគ៌នៅក្នុងការអធិស្ឋាន នៅពេលពួកគេស្វែងរកការយល់ដឹងពីដំណឹងល្អ និងពេលជួបនឹងឧបសគ្គទាំងឡាយនៃជីវិត ។ សូមធ្វើទីបន្ទាល់អំពីពរជ័យដែលបានមកដល់ក្នុងជីវិតរបស់អ្នក នៅពេលអ្នកបាននាំយកឧបសគ្គ និងសំណួរទាំងឡាយទៅកាន់ព្រះវរបិតាសួគ៌ ។

សូមពន្យល់ថា បទពិសោធន៍នៃការផ្លាស់ប្ដូរដែលពួកសាសន៍នីហ្វៃបីរូបនោះមាន ត្រូវបានហៅថា ការប្រែរូប ។ អ្នកបម្រើដ៏ស្មោះត្រង់របស់ព្រះអម្ចាស់ខ្លះត្រូវបានប្រែរូបដើម្បីពួកគេអាចបន្ដការបម្រើរបស់ពួកគេនៅលើផែនដី ។ នៅពេលមរមនបានបន្ដសួរអំពីការផ្លាស់ប្ដូរនេះ លោកបានរៀនអំពីលក្ខណៈនៃមនុស្សដែលបានប្រែរូប ។

សូមសរសេរ មនុស្សដែលបានប្រែរូប នៅលើក្ដារខៀន ។ សូមឲ្យសិស្សម្នាក់អាន នីហ្វៃទី 3 28:37–38 ឮៗ ។ សូមឲ្យសិស្សក្នុងថ្នាក់មើលតាម ដោយរកមើលអ្វីដែលលោកមរមនបានរៀនអំពីការផ្លាស់ប្ដូរដែលបានកើតឡើងនៅក្នុងរាងកាយនៃពួកសាសន៍នីហ្វៃទាំងបីនោះ ។

តើមរមនបានរៀនអ្វីខ្លះអំពីមនុស្សដែលបានប្រែរូប ? ( សូមឲ្យសិស្សម្នាក់ធ្វើជាអ្នកសរសេរ ហើយសរសេរនូវចម្លើយរបស់សិស្សផ្សេងទៀតនៅលើក្ដារខៀន ។ ចម្លើយគួររួមមានថា មនុស្សដែលបានប្រែរូបមិនបាន « ភ្លក់នូវសេចក្ដីស្លាប់ » ថាពួកគេមិនមានអារម្មណ៍ឈឺចាប់ ហើយថាពួកគេមិនបានជួបនឹងទុក្ខសោក លើកលែងតែទុក្ខសោកដែលពួកគេមានដោយសារតែអំពើបាបនៃមនុស្សលោកប៉ុណ្ណោះ )។
ហេតុអ្វីបានជាការផ្លាស់ប្ដូររូបកាយរបស់ពួកគេគឺជារឿងដ៏ចាំបាច់ ? ( អ្នកអាចឲ្យសិ្សសរំឭកឡើងវិញក្នុង នីហ្វៃទី 3 28:6–7 ។ ការផ្លាស់ប្ដូរនេះចាំបាច់ ដើម្បីពួកគេអាចបំពេញបំណងដ៏សុចរិតរបស់គេដើម្បីបន្ដនៅលើផែនដី និងបន្ដនាំព្រលឹងមកកាន់ព្រះគ្រីស្ទរហូតដល់ការយាងមកជាលើកទីពីររបស់ព្រះអង្គសង្គ្រោះ ) ។

សូមឲ្យសិស្សអាន នីហ្វៃទី 328:39–40 ដោយស្ងៀមស្ងាត់ ដោយរកមើលព័ត៌មានបន្ថែមទៀតពីមនុស្សដែលបានប្រែរូប ។ នៅពេលសិស្សរៀបរាប់ សូមឲ្យអ្នកសរសេរផ្សេងទៀតសរសេរការរកឃើញរបស់គេនៅលើក្ដារខៀន ។ ( ចម្លើយអាចរួមមានថា មនុស្សដែលបានប្រែរូបមិនអាចត្រូវបានល្បួងដោយសាតាំងឡើយ ថាពួកគេត្រូវបានបន្សុទ្ធ និងបរិសុទ្ធ ហើយថា « អំណាចនៅលើផែនដី [ មិនអាច ] មានអំណាចលើពួកគេឡើយ » ។ ) អ្នកគួរពន្យល់ថា ទោះបីជាមនុស្សដែលបានប្រែរូបមិនត្រូវរងការឈឺចាប់នៃការស្លាប់ក្ដី ពួកគេមិនត្រូវបានប្រោសឲ្យរស់ឡើងវិញនោះឡើយ ។ ពួកគេនឹងមិនទទួលបាន « ការផ្លាស់ប្ដូរដ៏ធំ » នោះឡើយរហូតដល់ថ្ងៃនៃការជំនុំជម្រះ នៅពេលពួកគេនឹងត្រូវផ្លាស់ប្ដូរពីភាពរមែងស្លាប់ទៅអមតភាពភ្លាមៗ— « តែក្នុងមួយពព្រិចភ្នែក » ( សូមមើល នីហ្វៃទី 3 28:8, 40 ) ។

សូមបញ្ចប់ដោយការធ្វើទីបន្ទាល់អំពីគោលការណ៍ និងគោលលទ្ធិដែលបានពិភាក្សានៅក្នុងថ្នាក់ ។ សូមឲ្យសិស្សធ្វើសកម្មភាពតាមការបំផុសគំនិតដែលពួកគេបានទទួលពីព្រះវិញ្ញាណ ។

វិចារណកថា និង ព័ត៌មានសាច់រឿង

នីហ្វៃទី 3 28 ។ ការប្រែរូប និងការផ្លាស់ប្ដូរ

ពួកសាសន៍នីហ្វៃទាំងបីត្រូវបានប្រែរូប និងផ្លាស់ប្ដូរ ។

ការប្រែរូប ដែលត្រូវបានលើកឡើងនៅក្នុង នីហ្វៃទី 3 28:13–17 គឺជា « លក្ខខណ្ឌនៃបុគ្គលដែលបានផ្លាស់ប្ដូរជាបណ្ដោះអាសន្ននៅក្នុងរូបកាយ និងនៅក្រៅរូបកាយ— ដែលត្រូវបានលើកឡើងទៅក្នុងកម្រិតខាងវិញ្ញាណដ៏ខ្ពស់មួយ— ដើម្បីឲ្យពួកគេអាចតស៊ូនឹងវត្តមាន និងសិរីល្អនៃរាងកាយនៃស្ថានសួគ៌ » ( សេចក្ដីណែនាំដល់បទគម្ពីរទាំងឡាយ « ការប្រែរូប » scriptures.lds.org សូមមើលផងដែរ គ. និង ស. 67:11; ម៉ូសេ 1:11) ។ ព្រះគម្ពីរប្រាប់ពីមនុស្សដែលត្រូវបានប្រែរូប រួមមានម៉ូសេ ( សូមមើល ម៉ូសេ 1:9–11); ព្រះយេស៊ូវគ្រីស្ទ, ពេត្រុស, យ៉ាកុប និងយ៉ូហាន ( សូមមើល ម៉ាថាយ 17:1–8) និង យ៉ូសែប ស៊្មីធ ( សូមមើល យ៉ូសែប ស្ម៊ីធ--ប្រវត្តិ— 1:14–20) ។

ពួកអ្នកដែលបានផ្លាស់ប្រែរូបគឺជា « ជនទាំងឡាយណាដែលបានផ្លាស់ប្រែ ដើម្បីកុំឲ្យស្គាល់ការឈឺចាប់ ឬសេចក្តីស្លាប់ ដរាបដល់ការរស់ឡើងវិញទៅរកអមតភាព » ( សេចក្ដីណែនាំដល់បទគម្ពីរទាំងឡាយ « ពួកអ្នកដែលបានផ្លាស់ប្រែរូប » scriptures.lds.org សូមមើលផងដែរ នីហ្វៃទី 3 28:7–9, 20–22, 37–40) ។ គោលបំណងរបស់ពួកគេគឺដើម្បីនាំព្រលឹងទាំងឡាយមករកព្រះគ្រីស្ទ ( សូមមើល នីហ្វៃទី 3 28:9) ។ ព្រះគម្ពីររួមមានដំណើររឿងនៃមនុស្សដែលត្រូវបានផ្លាស់ប្ដូរ រួមមានអេណុស ( សូមមើល លោកុប្បត្តិ 5:24; ហេព្រើរ 11:5), ម៉ូសេ ( សូមមើល អាលម៉ា 45:19) អេលីយ៉ា ( សូមមើល របាក្សត្រទី 2 2:11) និង យ៉ូហានជាទីសំណព្វ ( សូមមើល យ៉ូហាន 21:22–23; គ. និង ស. 7) ។