សកម្មភាពចំណេះចំណានខគម្ពីរ

សេចក្តីផ្ដើម

ផ្នែកនេះផ្ដល់នូវគំនិតខ្លះៗដែលអ្នកអាចប្រើដើម្បីជួយដល់សិស្សនៅក្នុងការទន្ទេញវគ្គខគម្ពីរគន្លឹះៗ ។ នៅពេលអ្នកជួយ និងលើកទឹកចិត្តសិស្សឲ្យអភិវឌ្ឍជំនាញទាំងនេះ អ្នកអាចជួយពួកគេឲ្យក្លាយជាមនុស្សខ្លួនទីពឹងខ្លួននៅក្នុងការសិក្សាព្រះគម្ពីរ ។ សិស្សអាចប្រើជំនាញចំណានទាំងនេះពេញមួយជីវិតរបស់គេដើម្បីរកទីតាំង យល់ អនុវត្ត និងចងចាំខគម្ពីរទាំងនោះបានកាន់តែប្រសើរ ។ គំនិតក្នុងការបង្រៀនសម្រាប់មូលដ្ឋាននៃចំណេះចំណានខគម្ពីរនីមួយៗមានដូចខាងក្រោមនេះ ។ ការប្រើប្រភេទសកម្មភាពទាំងនេះផ្សេងៗជាច្រើនអាចជួយសិស្សឲ្យចងចាំវគ្គខគម្ពីរកាន់តែច្បាស់ឡើង ។

សកម្មភាពដែលជួយសិស្សឲ្យ រកទីតាំង នៃវគ្គចំណេះចំណានខគម្ពីរ

វគ្គដែលគូសចំណាំ

ការគូសចំណាំវគ្គចំណេះចំណានខគម្ពីរអាចជួយសិស្សឲ្យចងចាំវគ្គទាំងនេះ និងរកវាបានដោយងាយស្រួល ។ សូមគិតពីការលើកទឹកចិត្តសិស្សឲ្យគូសចំណាំវគ្គគនឹ្លះទាំងនេះនៅក្នុងព្រះគម្ពីររបស់គេ តាមរបៀបមួយដែលបែងចែកពីខគម្ពីរដទៃនៅពេលពួកគេគូសចំណាំវា ។

ការដឹងពីគម្ពីរទាំងឡាយ

ការទន្ទេញចាំឈ្មោះ និងលំដាប់នៃព្រះគម្ពីរនៅក្នុងព្រះគម្ពីរមរមន អាចជួយសិស្សឲ្យរកទីតាំងនៃវគ្គចំណេះចំណានខគម្ពីរបានយ៉ាងលឿន ។ ខាងក្រោមនេះ គឺជាសកម្មភាពគំរូដែលអាចជួយសិស្សឲ្យស្គាល់ព្រះគម្ពីរនៅក្នុងព្រះគម្ពីរមរមន ។

រកតារាងមាតិកា—ជួយសិស្សឲ្យរកឃើញនូវតារាងមាតិកានៅក្នុងព្រះគម្ពីរមរមន ដែលមានចំណងជើងថា « ឈ្មោះ និងលំដាប់នៃព្រះគម្ពីរនៅក្នុងព្រះគម្ពីរមរមន » ។
ច្រៀងចម្រៀង— បង្រៀនសិស្សនូវចម្រៀង « គម្ពីរនៅក្នុងព្រះគម្ពីរមរមន » ( សៀវភៅចម្រៀងកុមារ ទំព័រ 119 ) ។ សូមឲ្យពួកគេច្រៀងវាម្ដងម្ដាលពេញមួយឆ្នាំ ដើម្បីជួយពួកគេឲ្យចងចាំពីឈ្មោះ និងលំដាប់នៃគម្ពីរនៅក្នុងព្រះគម្ពីរមរមន ។
ប្រើអក្សរដំបូង— សរសេរតួអក្សរដំបូងនៃគម្ពីរនៅក្នុងព្រះគម្ពីរមរមននៅលើក្ដារខៀន ( ន1, ន2, យ, អ ។ល។ ) ។ សូមឲ្យសិស្សអនុវត្តដោយការនិយាយឈ្មោះគម្ពីរដែលស៊ីគ្នា ។ សូមធ្វើសកម្មភាពនេះសាឡើងវិញ រហូតដល់ពួកគេអាចទន្ទេញឈ្មោះនៃគម្ពីរចាំអស់ ។
ការទាយគម្ពីរ—ហៅឈ្មោះគម្ពីរមួយដែលមានវគ្គចំណេះចំណានខគម្ពីរ ហើយសូមឲ្យសិស្សបើកព្រះគម្ពីររបស់គេទៅរកទំព័រណាមួយក៏បាននៅក្នុងគម្ពីរនោះ ។ សូមកំណត់ពេលដែលសិស្សទាំងអស់អាចរកនូវគម្ពីរទាំងនោះ ។ សកម្មភាពនេះអាចធ្វើសាឡើងវិញដើម្បីឲ្យសិស្សកាន់តែចងចាំ និងជំនាញក្នុងការរកគម្ពីរនៅក្នុងព្រះគម្ពីរមរមន ។

ការចាំសេចក្ដីយោង និងមាតិកា

នៅពេលសិស្សរៀនពីទីតាំង និងមាតិកានៃវគ្គចំណេះចំណានខគម្ពីរ នោះព្រះវិញ្ញាណបរិសុទ្ធអាចជួយពួកគេឲ្យចងចាំពីសេចក្ដីយោងព្រះគម្ពីរដែលត្រូវការ ( សូមមើល យ៉ូហាន 14:26 ) ។ ពាក្យ ឬឃ្លាគន្លឹះដូចជា « ខ្ញុំនឹងទៅ ហើយធ្វើ » ( នីហ្វៃទី 1 3:7 ) និង « សិទ្ធិសេរីភាពដើម្បីរើស » ( នីហ្វៃទី 2 2:27 ) អាចជួយសិស្សឲ្យចងចាំមាតិកា និងការបង្រៀនគោលលទ្ធិនៃវគ្គនីមួយៗ ។ វិធីសាស្ដ្រខាងក្រោមនេះអាចជួយសិស្សឲ្យភ្ជាប់សេចក្ដីយោងចំណេះចំណានខគម្ពីរទៅនឹងមាតិកា ឬពាក្យគន្លឹះរបស់វា ។ ( អ្នកអាចចង់ទុកសកម្មភាពដែលទាក់ទងទៅនឹងការប្រកួត ការប្រណាំងប្រជែង ឬការផ្ទៀងនៅពេលក្រោយនៅក្នុងឆ្នាំនេះ ក្រោយពីសិស្សបានបង្ហាញថា ពួកគេដឹងពីកន្លែងនៃវគ្គចំណេះចំណានខគម្ពីរ ។ សកម្មភាពបែបនោះនឹងជួយពង្រឹងអ្វីដែលពួកគេបានរៀន ) ។

សេចក្ដីយោង និងពាក្យគន្លឹះ— សូមលើកទឹកចិត្តសិស្សឲ្យទន្ទេញចាំសេចក្ដីយោង និងពាក្យគន្លឹះនៃវគ្គចំណេះចំណានខគម្ពីរនីមួយៗដែលមាននៅក្នុងកាតចំណេះចំណានខគម្ពីរ ។ ( កាតចំណេះចំណានខគម្ពីរអាចបញ្ជាទិញបានតាមអ៊ិនធើរណិតនៅក្នុង store.lds.org ។ អ្នកក៏អាចឲ្យសិស្សបង្កើតកាតចំណេះចំណានខគម្ពីរដោយខ្លួនគេបានដែរ ) ។ ទុកពេលឲ្យសិស្សសិក្សាពីកាតខគម្ពីរជាមួយនឹងដៃគូ ហើយបន្ទាប់មក សួរគ្នាទៅវិញទៅមក ។ សូមលើកទឹកចិត្តសិស្សឲ្យមានមានភាពច្នៃប្រឌិតក្នុងរបៀបដែលពួកគេសិក្សាជាមួយនឹគ្នា និងពេលសួរសាកល្បងគ្នាទៅវិញទៅមក ។ នៅពេលពួកគេកាន់តែចេះចាំច្បាស់នូវវគ្គចំណេះចំណានខគម្ពីរ នោះអ្នកអាចសុំឲ្យពួកគេប្រើតម្រុយនានា ដែលទាក់ទងទៅនឹងបរិបទ ឬការអនុវត្តគោលលទ្ធិ និងគោលការណ៍នានាពីខគម្ពីរទាំងនោះបាន ។ បុគ្គលដែលត្រូវគេសួរ អាចឆ្លើយក៏បាន ឬសរសេរក៏បាន ។
កាតចំណេះចំណានខគម្ពីរ—សកម្មភាពនេះអាចត្រូវប្រើដើម្បីណែនាំ ឬរំឭកពីវគ្គចំណេះចំណានខគម្ពីរទាំងឡាយ ។ សូមជ្រើសរើសកាតចំណេះចំណានខគម្ពីរមួយចំនួន ហើយរៀបចំចែកវាដល់សិស្សរបស់អ្នក ។ ( សូមប្រាកដថាមានកាតច្រើនជម្រើសដើម្បីឲ្យសិស្សម្នាក់ៗអាចទទួលបានវគ្គចំណេះចំណានខគម្ពីរខុសគ្នា ។ អ្នកក៏អាចមានកាតច្រើនល្មមសម្រាប់សិស្សម្នាក់ៗអាចមានវគ្គខគម្ពីរពីរ ឬបីខុសៗគ្នា ។ ) សូមចែកវាដល់សិស្សក្នុងថ្នាក់ ។ សូមឲ្យសិស្សមានពេលសិក្សាវគ្គចំណេះចំណានខគម្ពីរ សេចក្ដីយោង ពាក្យគន្លឹះ បរិបទ គោលលទ្ធិ ឬគោលការណ៍ និងគំនិតក្នុងការអនុវត្តចំពោះកាតនីមួយៗ ។ សូមលើកឡើងនូវតម្រុយខ្លះៗពីកាតនីមួយៗ ( ឧទាហរណ៍ ពាក្យចេញពីវគ្គចំណេះចំណានខគម្ពីរ ឬពាក្យគន្លឹះ បរិបទ គោលលទ្ធិ ឬគោលការណ៍ ឬការអនុវត្តន៍ ) ។ សិស្សដែលមានកាតដែលត្រូវនឹងតម្រុយនោះ គួរក្រោកឈរ ហើយអានសេចក្ដីយោងចំណេះចំណានខគម្ពីរនោះឮៗ ។
ការទាយព្រះគម្ពីរ— សូមប្រើតម្រុយដើម្បីជួយសិស្សឲ្យអនុវត្តការរកឃើញវគ្គខគម្ពីរនៅក្នុងព្រះគម្ពីររបស់ពួកគេបានលឿន ។ សម្រាប់តម្រុយនានា អ្នកអាចប្រើពាក្យគន្លឹះ បរិបទ គោលលទ្ធិ និងគោលការណ៍នានា និងគំនិតក្នុងការអនុវត្តពីកាតចំណេះចំណានខគម្ពីរ ។ អ្នកក៏អាចប្រើតម្រុយរបស់អ្នកបានដែរ ។ សកម្មភាពទាយព្រះគម្ពីរដែលសិស្សប្រកួតក្នុងការរកទីតាំងវគ្គខគម្ពីរ អាចជួយពួកគេឲ្យចូលរួមនៅក្នុងការរៀនវគ្គចំណេះចំណានខគម្ពីរយ៉ាងសកម្ម ។ នៅពេលប្រើសកម្មភាពសាកល្បងទាយព្រះគម្ពីរដើម្បីជួយដល់ការសិក្សាចំណេះចំណានខគម្ពីរ សូមធ្វើវាតាមរបៀបមួយ ដែលមិនបណ្ដាលឲ្យសិស្សមានអារម្មណ៍ឈឺចាប់ ឬរារាំងព្រះវិញ្ញាណឡើយ ។ សូមជួយសិស្សឲ្យចៀសវាងការមិនគោរពដល់ព្រះគម្ពីរ ឬមានការប្រកួតប្រជែងហួសពេក ។ សូមគិតពីការឲ្យសិស្សប្រកួតតាមស្ដង់ដា ប៉ុន្ដែកុំប្រជែងនឹងសមត្ថភាពរវាងគ្នានិងគ្នា ។ ឧទាហរណ៍ សិស្សអាចប្រកួតប្រជែងនឹងគ្រូបង្រៀន ឬអ្នកអាចសុំឲ្យសិស្សប្រណាំងគ្នារកមើលថា មានប៉ុន្មានភាគរយនៃសិស្សដែលរកវគ្គពិសេសណាមួយក្នុងពេលកំណត់ពិសេសណាមួយ ។
ការសាកល្បងរឿង— សូមផ្ដល់តម្រុយដោយការនិទានរឿង ដែលបង្ហាញពីការទាក់ទងគ្នានៃវគ្គចំណេះចំណានខគម្ពីរចំពោះជីវិតប្រចាំថ្ងៃ ។ ឧទាហរណ៍ ជាតម្រុយសម្រាប់ នីហ្វៃទី 1 3:7 អ្នកអាចនិយាយថា « ចនដឹងថា ព្រះអម្ចាស់បានបញ្ជាដល់យុវជនសក្តិសមទាំងអស់ឲ្យទៅបម្រើបេសកកម្ម ប៉ុន្ដែលោកបារម្ភថា ភាពអៀនខ្មាស់របស់លោកនឹងរារាំងលោកមិនឲ្យបម្រើដោយមានប្រសិទ្ធភាព ។ បន្ទាប់មក លោកចងចាំពីរបៀបដែលនីហ្វៃបានឆ្លើយតបទៅនឹងកិច្ចការដ៏លំបាកក្នុងការទៅរកផ្ទាំងលង្ហិន ។ ចនមានទំនុកចិត្តថា ព្រះអម្ចាស់នឹងប្រទាននូវមធ្យោបាយមួយដល់លោកដើម្បីឲ្យក្លាយជាអ្នកផ្សព្វផ្សាយសាសនាដ៏មានសមត្ថភាពមួយរូប ។ នៅពេលសិស្សស្ដាប់រឿងតំណាលនេះ សូមឲ្យពួកគេរកនូវវគ្គចំណេះចំណានខគម្ពីរដែលទាក់ទងនៅក្នុងព្រះគម្ពីររបស់គេ ។
លំហាត់ និងការប្រឡង— សូមផ្ដល់ឱកាសឲ្យសិស្សសាកសូត្រវគ្គចំណេះចំណានខគម្ពីរ ។ តម្រុយនានាអាចរួមមានពាក្យគន្លឹះ ឬសេចក្ដីយោងព្រះគម្ពីរ សម្ដីដកស្រង់ពីវគ្គខគម្ពីរ ឬរឿងផ្សេងដែលបង្ហាញពីសេចក្ដីពិតដែលបង្រៀននៅក្នុងខគម្ពីរនោះ ។ លំហាត់ និងការប្រឡងអាចធ្វើឡើងដោយផ្ទាល់មាត់ ធ្វើនៅលើក្ដារខៀន ឬនៅលើក្រដាស ។ ក្រោយពីសិស្សបានធ្វើលំហាត់ ឬការប្រឡងហើយ សូមគិតពីការចាប់ដៃគូសិស្សដែលមានពិន្ទុខ្ពស់ជាមួយនឹងសិស្សដែលមានពិន្ទុទាប ។ សិស្សដែលមានពិន្ទុខ្ពស់អាចធ្វើជាគ្រូបង្រៀនម្នាក់ដើម្បីជួយដល់សិស្សដែលមានពិន្ទុទាបឲ្យរៀនសូត្រ និងរីកចម្រើន ។ ជាផ្នែកនៃការខិតខំនេះ ដៃគូសិស្សក៏អាចដាក់គោលដៅដើម្បីទទួលបាននូវពិន្ទុរួមគ្នាខ្ពស់ជាងមុននៅក្នុងការប្រឡងលើកក្រោយ ។ សូមគិតពីការធ្វើតារាងមួយ ឬសរសេរចំណុចគោលបង្ហាញគោលដៅរបស់សិស្ស និងទទួលស្គាល់ការរីកចម្រើនរបស់ពួកគេ ។

សកម្មភាពដែលជួយសិស្សឲ្យ យល់ វគ្គចំណេះចំណានខគម្ពីរ

ការឲ្យនិយមន័យពាក្យ និងឃ្លាទាំងឡាយ

ការឲ្យនិយមន័យពាក្យ និងឃ្លាទាំងឡាយនៅក្នុងវគ្គចំណេះចំណានខគម្ពីរ ( ឬការជួយសិស្សឲ្យស្គាល់និយមន័យវា ) នឹងជួយសិស្សឲ្យយល់ពីអត្ថន័យនៃវគ្គខគម្ពីរទាំងមូល ។ នៅពេលពិបាកយល់និយមន័យពីគោលលទ្ធិ និងគោលការណ៍នានានៅក្នុងខគម្ពីរនេះ អ្នកអាចលើកទឹកចិត្តសិស្សឲ្យសរសេរនិយមន័យទាំងនេះនៅក្នុងព្រះគម្ពីររបស់គេ ។ សូមរំឭកពីអត្ថន័យនៃពាក្យ និងឃ្លា នៅពេលអ្នករំឭកវគ្គចំណេះចំណានខគម្ពីរ ។

ការស្វែងរកបរិបទ

ការស្វែងរកបរិបទនៃវគ្គខគម្ពីរព្រះគម្ពីរ អាចជួយសិស្សឲ្យយល់កាន់តែច្បាស់អំពីអត្ថន័យនៃវគ្គខគម្ពីរនោះ ។ បរិបទរួមបញ្ចូលនូវព័ត៌មានដែលទាក់ទងនឹងអ្នកណានិយាយទៅរកអ្នកណា ហើយមូលហេតុអ្វី វារួមមាននូវទីកន្លែងនៃវគ្គខគម្ពីរ ( ប្រវត្តិសាស្ដ្រ វប្បធម៌ និងភូមិសាស្ដ្រ ) និងសំណួរ ឬស្ថានភាពដែលបរិបទនៃវគ្គព្រះគម្ពីរនោះកើតឡើង ។ ឧទាហរណ៍ បរិបទនៃ នីហ្វៃទី 1 3:7 រួមមានការពិតដែលនីហ្វៃត្រូវបានសុំដោយឪពុកលោកគឺ លីហៃ ដែលជាព្យាការីម្នាក់ ឲ្យត្រឡប់ទៅកាន់ទីក្រុងយេរូសាឡិមវិញ ហើយនាំយកផ្ទាំងលង្ហិនមក ។ ការដឹងពីព័ត៌មាននេះ អាចជួយសិស្សឲ្យយល់កាន់តែច្បាស់ពីមូលហេតុដែលនីហ្វៃនិយាយថា « ខ្ញុំនឹងទៅ ហើយធ្វើនូវអ្វីៗដែលព្រះអម្ចាស់បានបញ្ជា » ។ នៅពេលអ្នកបង្រៀនមេរៀនដែលរួមមានវគ្គចំណេះចំណានខគម្ពីរ សូមសង្កត់ធ្ងន់ពីបរិបទដែលនៅជុំវិញវគ្គខគម្ពីរទាំងនោះ ។ សកម្មភាពបន្ថែមដូចជាសកម្មភាពខាងក្រោមនេះមួយ ក៏អាចជួយសិស្សឲ្យយល់ពីវគ្គខគម្ពីរគន្លឹះទាំងនេះដែរ ។

ការស្វែងរកបរិបទ—សូមសរសេរចំណងជើងខាងក្រោមនេះនៅលើផ្នែកខាងលើនៃក្ដារខៀន ៖ អ្នកឡើងនិយាយ អ្នកមើល គោលបំណង ការយល់ដឹងជំនួយផ្សេងទៀត ។ សូមឲ្យសិស្សធ្វើការជាក្រុម ហើយដាក់កិច្ចការដល់ក្រុមនីមួយៗឲ្យអានវគ្គចំណេះចំណានខគម្ពីរមួយ ។ សូមឲ្យពួកគេរកមើលបរិបទនៃវគ្គកិច្ចការខគម្ពីររបស់គេ ដោយការរកមើលព័ត៌មានដែលសមស្របទៅនឹងចំណងជើងនៅលើក្ដារខៀន ។ សូមឲ្យពួកគេសរសេរអ្វីដែលពួកគេរកឃើញនៅលើក្ដារខៀន ។ បន្ទាប់មក សូមឲ្យក្រុមនីមួយៗពន្យល់ពីបរិបទនៃវគ្គកិច្ចការខគម្ពីររបស់គេ និងរបៀបដែលព័ត៌មាននេះមានឥទ្ធិពលដល់ការយល់ដឹងពីសេចក្ដីពិតនៅក្នុងខគម្ពីរនីមួយៗ ។ ដើម្បីពង្រីកទំហំនៃសកម្មភាពនេះ អ្នកអាចតាំងចិត្តសិស្សឲ្យទស្សន៍ទាយសេចក្ដីយោងចំណេះចំណានខគម្ពីរដោយផ្អែកលើការពិពណ៌នានៅលើក្ដារខៀន មុនពេលក្រុមនីមួយៗពន្យល់ពីអ្វីដែលពួកគេបានសរសេរ ។

ធ្វើការវិភាគ

ការវិភាគទាក់ទងទៅនឹងការស្វែងរកគោលលទ្ធិ និងគោលការណ៍ទាំងឡាយដែលមាននៅក្នុងវគ្គខគម្ពីរ ។ វាក៏រួមមានជំនួយជួយសិស្សឲ្យយល់ពីរបៀបដែលសេចក្ដីពិតទាំងនេះទាក់ទងទៅនឹងពួកគេដែរ ។ ការណ៍នេះអាចនាំទៅរកការអនុវត្តដ៏ជ្រៅជ្រះមួយនៃគោលលទ្ធិ និងគោលការណ៍នានានៅក្នុងជីវិតរបស់ពួកគេ ។ សកម្មភាពខាងក្រោមនេះអាចជួយសិស្សឲ្យវិភាគវគ្គចំណេះចំណានខគម្ពីរបាន ៖

សរសេរតម្រុយ— នៅពេលសិស្សកាន់តែស្គាល់វគ្គចំណេះចំណានខគម្ពីរហើយ សូមឲ្យពួកគេបង្កើតសំណួរ រឿង ឬតម្រុយផ្សេងទៀតដែលបង្ហាញពីគោលលទ្ធិ និងគោលការណ៍នានាដែលបានបង្រៀននៅក្នុងវគ្គខគម្ពីរនោះ ។ ការណ៍ទាំងនេះអាចត្រូវប្រើដើម្បីធ្វើលំហាត់នៅក្នុងថ្នាក់ ។

ការពន្យល់

ការសុំឲ្យសិស្សពន្យល់ពីវគ្គព្រះគម្ពីរ នឹងជួយសិស្សឲ្យយល់កាន់តែស៊ីជម្រៅ និងអភិវឌ្ឍសមត្ថភាពរបស់គេក្នុងការបង្រៀនគោលលទ្ធិ និងគោលការណ៍ពីព្រះគម្ពីរ ។ ខាងក្រោមនេះគឺជាវិធីសាស្ដ្រពីរដែលអាចជួយសិស្សឲ្យរៀនពន្យល់ពីវគ្គចំណេះចំណានខគម្ពីរ ៖

ពាក្យ និងឃ្លាគន្លឹះ— សូមឲ្យសិស្សអានវគ្គចំណេះចំណានខគម្ពីរដូចគ្នាដោយខ្លួនគេ ហើយស្វែងរកពាក្យ ឬឃ្លាមួយដែលពួកគេគិតថា មានន័យសំខាន់ជាពិសេសនៅក្នុងខគម្ពីរនេះ ។ បន្ទាប់មក សូមឲ្យសិស្សម្នាក់អានវគ្គខគម្ពីរនោះដល់សិស្ស ហើយផ្ដល់នូវការបញ្ជាក់ចំពោះពាក្យ ឬឃ្លាដែលគេបានរើស ។ សូមឲ្យសិស្សពន្យល់ពីមូលហេតុដែលពាក្យ ឬឃ្លានេះសំខាន់ដើម្បីយល់ពីខគម្ពីរនេះ ។ សូមឲ្យសិស្សពីរបីនាក់ផ្សេងទៀតធ្វើដូចគ្នានេះដែរ ។ សិស្សអាចរើសពាក្យ ឬឃ្លាខុសគ្នាសម្រាប់វគ្គខគម្ពីរដូចគ្នា ។ នៅពេលសិស្សក្នុងថ្នាក់ឃើញពីទស្សនៈខុសគ្នានេះហើយ ពួកគេអាចទទួលបានការយល់ដឹងពីវគ្គខគម្ពីរនេះកាន់តែច្បាស់ថែមទៀត ។
រៀបចំខ្លួនសម្រាប់ការប្រជុំធម្មនិដ្ឋាន—សូមឲ្យសិស្សមានឱកាសប្រើវគ្គចំណេះចំណានខគម្ពីរ នៅពេលពួកគេរៀបចំ និងនិយាយនៅក្នុងការប្រជុំធម្មនិដ្ឋាននៅពេលចាប់ផ្ដើមថ្នាក់ ។ សូមជួយពួកគេឲ្យរៀបចំសង្ខេបបរិបទ ពន្យល់ពីគោលលទ្ធិ និងគោលការណ៍ ចែកចាយពីបទពិសោធន៍ ឬឧទាហរណ៍ដ៏មានន័យ និងថ្លែងទីបន្ទាល់អំពីគោលលទ្ធិ និងគោលការណ៍នៅក្នុងវគ្គខគម្ពីរនោះ ។ អ្នកក៏អាចណែនាំថា សិស្សគួរគិតពីការប្រើការអនុវត្តន៍ជាក់ស្តែងដើម្បីពន្យល់ពីគំនិតនៅក្នុងខគម្ពីរនេះដែរ ។

ការស្គាល់ពីសារៈសំខាន់នៃគោលលទ្ធិ និងគោលការណ៍ទាំងឡាយ

សូមជួយសិស្សឲ្យយល់ និងទទួលបានសាក្សីខាងវិញ្ញាណនៃគោលលទ្ធិ និងគោលការណ៍ទាំងឡាយដែលបានបង្រៀននៅក្នុងវគ្គចំណេះចំណានខគម្ពីរ ។ អែលឌើរ រ៉ូបឺត ឌី ហែល បានពន្យល់ថា « គ្រូបង្រៀនដ៏ពិតម្នាក់ នៅពេលគាត់បានបង្រៀនពីការពិត [ នៃដំណឹងល្អ ] … នោះគាត់បានជួយ [ សិស្ស ] ឲ្យបោះជំហានទៅមុខមួយឲ្យបោះឆ្ងាយជាងមុន ដើម្បីទទួលបានសាក្សីខាងវិញ្ញាណ និងការយល់ដឹងនៅក្នុងដួងចិត្តរបស់ពួកគេដែលនាំឲ្យមានសកម្មភាព និងការធ្វើការ » ( « Teaching by Faith » [ សុន្ទរកថាទៅកាន់អ្នកអប់រំសាសនា CES ថ្ងៃទី 1 ខែកុម្ភៈ ឆ្នាំ 2002 ] ទំព័រ 5 si.lds.org ) ។នៅពេលសិស្សទទួលអារម្មណ៍ពីសេចក្តីពិត សារៈសំខាន់ និងភាពបន្ទាន់នៃគោលការណ៍ ឬ គោលលទ្ធិតាមរយៈឥទ្ធិពលពីព្រះវិញ្ញណ នោះការតាំងចិត្តដើម្បីអនុវត្តសេចក្តីពិតនោះនៅក្នុងជីវិតរបស់ពួកគេក៏លូតលាស់ឡើងដែរ ។គ្រូបង្រៀនអាចជួយសិស្សឲ្យអញ្ជើញ និងចិញ្ចឹមអារម្មណ៍នៃព្រះវិញ្ញាណបរិសុទ្ធទាំងនេះ ដោយការផ្ដល់ឱកាសដល់ពួកគេឲ្យចែកចាយនូវបទពិសោធន៍ដែលពួកគេបានមាននៅក្នុងការរស់នៅតាមគោលការណ៍នៃដំណឹងល្អ ដែលមាននៅក្នុងវគ្គចំណេះចំណានខគម្ពីរនេះ ។ ការណ៍នេះនឹងជួយសិស្សឲ្យយល់កាន់តែច្បាស់ពីសេចក្ដីពិតដែលបានបង្រៀននៅក្នុងវគ្គចំណេះចំណានខគម្ពីរនេះ ហើយធានាថាសេចក្ដីពិតទាំងនេះត្រូវបានឆ្លាក់ជាប់នៅក្នុងចិត្តរបស់សិស្ស ។ សកម្មភាពខាងក្រោមនេះអាចជួយសិស្សឲ្យមានដឹងពីសារៈសំខាន់នៃគោលលទ្ធិ និងគោលការណ៍ទាំងឡាយដែលមាននៅក្នុងវគ្គចំណេះចំណានខគម្ពីរ ៖

ការស្ដាប់រកវគ្គខគម្ពីរ—អញ្ជើញឲ្យសិស្សស្ដាប់រកនូវវគ្គចំណេះចំណានខគម្ពីរនៅក្នុងការនិយាយ និងមេរៀននានានៅក្នុងសាសនាចក្រ នៅក្នុងការថ្លែងសន្និសីទទូទៅ និងនៅក្នុងការពិភាក្សាជាមួយនឹងគ្រួសារ និងមិត្តទាំងឡាយ ។ សូមឲ្យសិស្សរៀបរាប់ម្ដងម្ដាលពីខគម្ពីរដែលពួកគេបានស្ដាប់ របៀបដែលខគម្ពីរនោះត្រូវបានប្រើ សេចក្ដីពិតដែលវាបង្រៀន និងបទពិសោធន៍ដែលពួកគេ ឬអ្នកដទៃបានទទួលបានពីសេចក្ដីពិតដែលបានបង្រៀននោះ ។ សូមរកមើលឱកាសដើម្បីធ្វើទីបន្ទាល់ ( ហើយសូមឲ្យសិស្សធ្វើទីបន្ទាល់ ) អំពីសេចក្ដីពិតដែលបង្រៀនដោយវគ្គចំណេះចំណានខគម្ពីរនេះ ។

សកម្មភាពដែលជួយសិស្សឲ្យ អនុវត្ត វគ្គចំណេះចំណានខគម្ពីរ

ការបង្រៀន

វគ្គចំណេះចំណានខគម្ពីរ និងគោលលទ្ធិគ្រឹះត្រូវបានបង្កើតឡើងជាមួយគ្នា ហើយមានបំណងដើរទន្ទឹមគ្នាដើម្បីជាប្រយោជន៍ដល់សិស្ស ។ ( វគ្គចំណេះចំណានខគម្ពីរត្រូវបានបង្ហាញនៅក្នុងឯកសារគោលលទ្ធិគ្រឹះ ) ។ នៅពេលសិស្សរៀន និងបង្ហាញពីគោលលទ្ធិ និងគោលការណ៍ដែលមាននៅក្នុងវគ្គចំណេះចំណានខគម្ពីរ នោះពួកគេក៏នឹងអាចរៀន និងបង្ហាញពីគោលលទ្ធិគ្រឹះបានដែរ ។ ហើយនៅពេលសិស្សរៀនដើម្បីបង្ហាញពីគោលលទ្ធិគ្រឹះជាសម្ដីខ្លួនឯងនោះ ពួកគេអាចពឹងលើវគ្គចំណេះចំណានខគម្ពីរដែលទន្ទេញចាំដើម្បីជួយដល់ពួកគេ ។ ការឲ្យសិស្សមានឱកាសបង្រៀនគោលលទ្ធិ និងគោលការណ៍នៃដំណឹងល្អដោយប្រើវគ្គចំណេះចំណានខគម្ពីរ អាចជួយបង្កើនទំនុកចិត្តសិស្សទៅលើខ្លួនគេ និងទៅលើចំណេះដឹងរបស់គេអំពីព្រះគម្ពីរ ។ នៅពេលសិស្សបង្រៀន និងធ្វើទីបន្ទាល់អំពីគោលលទ្ធិ និងគោលការណ៍ដែលមាននៅក្នុងវគ្គចំណេះចំណានខគម្ពីរ នោះពួកគេអាចពង្រឹងទីបន្ទាល់របស់ពួកគេ ។ សូមលើកទឹកចិត្តសិស្សឲ្យប្រើវគ្គចំណេះចំណានខគម្ពីរដើម្បីបង្រៀន និងពន្យល់ដំណឹងល្អនៅក្នុងថ្នាក់ និងក្នុងការសន្ទនាជាមួយនឹងមិត្តភក្ដិ គ្រួសារ និងអ្នកដទៃ ។

ការបង្ហាញសារលិខិត—សូមចាត់ឲ្យសិស្សរៀបចំខ្លួនដើម្បីនិយាយ ឬបង្រៀនពី 3 ទៅ 5 នាទីដោយផ្អែកលើវគ្គចំណេះចំណានខគម្ពីរ ។ សូមឲ្យពួកគេរៀបចំនៅក្នុងថ្នាក់ ឬនៅផ្ទះ ។ បន្ថែមទៅលើវគ្គចំណេះចំណានខគម្ពីរ ពួកគេអាចប្រើធនធានផ្សេងទៀតដើម្បីជួយពួកគេឲ្យរៀបចំ ដូចជាកាតចំណេះចំណានខគម្ពីរ ការណែនាំតាមប្រធានបទ សេចក្ដីណែនាំដល់បទគម្ពីរទាំងឡាយ ឬពិតចំពោះសេចក្ដីជំនឿ ៖ សេចក្ដីយោងនៃដំណឹងល្អ ។ ការនិយាយ ឬមេរៀននីមួយៗគួររួមមាននូវបុព្វប្រយោគ វគ្គចំណេះចំណានខគម្ពីរ ការតំណាលរឿង ឬឧទាហរណ៍ពីគោលការណ៍ដែលបានបង្រៀន និងទីបន្ទាល់របស់សិស្ស ។ សិស្សអាចស័្មគ្រចិត្តនិយាយនៅក្នុងថ្នាក់ នៅក្នុងរាត្រីជួបជុំក្រុមគ្រួសារ ឬដល់កូរ៉ុម ឬថ្នាក់របស់គេជាផ្នែកនៃការធ្វើសៀវភៅកាតព្វកិច្ចចំពោះព្រះ ឬការអភិវឌ្ឍន៍ខ្លួនរបស់ក្រុមយុវនារីរបស់គេ ។ ប្រសិនបើសិស្សធ្វើការនិយាយ ឬបង្រៀនខាងក្រៅថ្នាក់ សូមឲ្យពួកគេរៀបរាប់ពីបទពិសោធន៍របស់គេ ។
ការសម្ដែងជាអ្នកផ្សព្វផ្សាយសាសនា—សូមរៀបចំកាតមួយចំនួនដោយមានសំណួរដែលអ្នករៀនជាមួយនឹងអ្នកផ្សព្វផ្សាយសាសនាអាចសួរ ដែលអាចត្រូវឆ្លើយដោយមានជំនួយពីវគ្គចំណេះចំណានខគម្ពីរ ( ឧទាហរណ៍ « តើសមាជិកនៃសាសនារបស់អ្នកជឿអ្វីខ្លះអំពីព្រះយេស៊ូវគ្រីស្ទ » ? ) សូមអញ្ជើញសិស្សមួយគូឡើងមកខាងមុខថ្នាក់ដើម្បីឆ្លើយនឹងសំណួរដែលជ្រើសរើសពីកាតទាំងនោះ ។ ដើម្បីជួយសិស្សឲ្យយល់ពីរបៀបដែលអ្នកផ្សព្វផ្សាយសាសនាអាចឆ្លើយនឹងសំណួរដូចគ្នានេះ អ្នកអាចបង្រៀនវិធីសាស្ដ្រដ៏មានប្រសិទ្ធភាពក្នុងការបង្រៀនពីរបីដូចជា (1) ការនិយាយពីបរិបទនៃវគ្គខគម្ពីរ (2) ការពន្យល់ពីគោលលទ្ធិ ឬគោលការណ៍មួយ (3) ការសួរសំណួរដើម្បីដឹងថាតើអ្នកដែលពួកគេបង្រៀននោះយល់ ឬជឿដល់អ្វីដែលពួកគេបង្រៀនដែរឬទេ (4) ការចែកចាយបទពិសោធន៍ និងទីបន្ទាល់ ហើយនិង (5) អញ្ជើញអ្នកដែលពួកគេបង្រៀនឲ្យធ្វើសកម្មភាពតាមសេចក្ដីពិតដែលបានបង្រៀននោះ ។ សូមឲ្យសិស្សផ្ដល់នូវមតិយោបល់រិះគន់ចំពោះអ្វីដែលពួកគេចូលចិត្តពីរបៀបដែលដៃគូនីមួយៗបានឆ្លើយតបចំពោះសំណួររបស់គេ ។
ថ្លែងទីបន្ទាល់—អញ្ជើញសិស្សឲ្យអានវគ្គចំណេះចំណានខគម្ពីរ ហើយជ្រើសរើសខគម្ពីរមួយដែលរួមមានគោលលទ្ធិ ឬគោលការណ៍ដែលពួកគេអាចថ្លែងទីបន្ទាល់បាន ។ សូមឲ្យពួកគេធ្វើទីបន្ទាល់អំពីសេចក្តីពិត ដែលពួកគេបានជ្រើសរើស និងចែកចាយបទពិសោធន៍ដែលបាននាំពួកគេឲ្យអាចធ្វើទីបន្ទាល់ពីវាបាន ។ នៅពេលសិស្សចែករំលែកទីបន្ទាល់របស់គេ នោះព្រះវិញ្ញាណបរិសុទ្ធនឹងបញ្ជាក់ពីសេចក្តីពិតនៃគោលលទ្ធិ ឬគោលការណ៍ដែលពួកគេកំពុងធ្វើទីបន្ទាល់នោះ ។ ទីបន្ទាល់របស់គេក៏អាចបំផុសគំនិតដល់អ្នកដទៃឲ្យធ្វើសកម្មភាពដោយសេចក្តីជំនឿបានដែរ ។

កំណត់ចំណាំ ៖ ឱកាសសម្រាប់សិស្សចែកចាយទីបន្ទាល់របស់គេ គួរធ្វើដោយការស្ម័គ្រចិត្ត ។ សិស្សមិនត្រូវបានបង្ខំឲ្យចែកចាយទីបន្ទាល់របស់គេ ឬធ្វើឲ្យមានអារម្មណ៍ថា ពួកគេត្រូវមានចំណេះដឹងត្រឹមត្រូវដែលពួកគេមានអារម្មណ៍ថា ពួកគេមិនមាននោះទេ ។ បន្ថែមលើនេះ សិស្សខ្លះអាចស្ទាក់ស្ទើរនឹងចែកចាយទីបន្ទាល់របស់គេ ដោយសារពួកគេគិតខុសថា ពួកគេត្រូវចាប់ផ្ដើមដោយ « ខ្ញុំចង់ថ្លែងទីបន្ទាល់របស់ខ្ញុំ … » ឬថាការបង្ហាញទីបន្ទាល់របស់គេត្រូវតែប្រកបដោយអារម្មណ៍ទោរទន់ ។ សូមជួយសិស្សឲ្យយល់ថា នៅពេលពួកគេធ្វើទីបន្ទាល់ ពួគគេអាចគ្រាន់តែចែករំលែកនូវគោលលទ្ធិ ឬគោលការណ៍ដែលពួកគេដឹងថា វាពិតប៉ុណ្ណោះ ។ ការចែករំលែកទីបន្ទាល់ អាចធ្វើដោយគ្រាន់តែនិយាយថា « ខ្ញុំជឿថាការណ៍នេះគឺពិត » ឬ « ខ្ញុំដឹងថាវាពិត » ឬ « ខ្ញុំជឿដល់ការណ៍នេះដោយអស់ពីចិត្តខ្ញុំ » ។

ការរស់នៅ

សូមស្នើពីរបៀបដែលសិស្សអាចអនុវត្តនូវគោលលទ្ធិ និងគោលការណ៍ដែលមាននៅក្នុងវគ្គព្រះគម្ពីរ ( ឬសូមឲ្យសិស្សគិតពីរបៀបនានា ) ផ្ដល់ឱកាសឲ្យពួកគេរៀនដោយការអនុវត្តន៍សេចក្ដីជំនឿ ។ អែលឌើរ ដាវីឌ អេ បែដណា នៃកូរ៉ុមនៃពួកសាវកដប់ពីរនាក់បានមានប្រសាសន៍ថា ៖

« អ្នករៀនម្នាក់ដែលអនុវត្តសិទ្ធិជ្រើសរើសដោយការធ្វើសកម្មភាពតាមគោលការណ៍ត្រឹមត្រូវបានបើកដួងចិត្តរបស់គេចំពោះព្រះវិញ្ញាណបរិសុទ្ធ និងអញ្ជើញការបង្រៀនរបស់ទ្រង់ ធ្វើទីបន្ទាល់អំពីព្រះចេស្តា និងបញ្ជាក់ពីទីបន្ទាល់ ។ ការរៀនដោយសេចក្ដីជំនឿតម្រូវឲ្យមានការខិតខំខាងវិញ្ញាណ ស្មារតី និងរាងកាយ ហើយមិនមែនការទទួលដោយអសកម្មនោះទេ ។ « វាគឺនៅក្នុងសេចក្តីស្មោះត្រង់ និងភាពខ្ជាប់ខ្ជួននៃសេចក្តីជំនឿដែលបានបំផុសគំនិតរបស់យើងឲ្យធ្វើសកម្មភាពដែលយើងបង្ហាញចំពោះព្រះវរបិតាសួគ៌ និងព្រះរាជបុត្រារបស់ទ្រង់ ព្រះយេស៊ូវគ្រីស្ទ នូវការស្ម័គ្រចិត្តរបស់យើងដើម្បីរៀន និងទទួលយកការបង្ហាត់បង្រៀនពីព្រះវិញ្ញាណបរិសុទ្ធ » ( « Seek Learning by Faith » Ensign, ខែ កញ្ញា ឆ្នាំ 2007, ទំព័រ 64 ) ។

សូមឲ្យសិស្សមានឱកាសចែកចាយ និងធ្វើទីបន្ទាល់អំពីបទពិសោធន៍ដែលពួកគេបានមានក្នុងការអនុវត្ដគោលលទ្ធិ និងគោលការណ៍ទាំងឡាយ ។ ខាងក្រោមនេះគឺជារបៀបមួយដើម្បីលើកទឹកចិត្តសិស្សឲ្យអនុវត្ដវគ្គចំណេះចំណានខគម្ពីរនៅក្នុងជីវិតរបស់គេ ៖

ការដាក់គោលដៅ—ដោយផ្អែកលើផ្នែកដែលអនុវត្តនៃកាតចំណេះចំណានខគម្ពីរ សូមឲ្យសិស្សដាក់គោលដៅជាក់លាក់ដើម្បីរស់នៅតាមគោលការណ៍ដែលមាននៅក្នុងវគ្គចំណេះចំណានខគម្ពីរនេះបានកាន់តែប្រសើរ ។ សូមឲ្យពួកគេសរសេរគោលដៅរបស់គេនៅលើក្រដាសមួយយកតាមខ្លួនគេដើម្បីរំឭក ។ សូមឲ្យសិស្សរៀបរាប់ពីជោគជ័យរបស់គេនៅពេលមានពេលវេលាសមរម្យ ។

សកម្មភាពដែលជួយសិស្សឲ្យ ទន្ទេញចាំ វគ្គចំណេះចំណានខគម្ពីរ

ការទន្ទេញចាំ

ការទន្ទេញចាំវគ្គព្រះគម្ពីរ អាចពង្រីកការយល់ដឹង និងពង្រឹងសមត្ថភាពរបស់សិស្សក្នុងការបង្រៀនដំណឹងល្អ ។ នៅពេលសិស្សទន្ទេញបទគម្ពីរ នោះព្រះវិញ្ញាណបរិសុទ្ធអាចធ្វើឲ្យពួកគេចាំឃ្លា និងគំនិត នៅពេលដែលពួកគេជួបការពិបាក ( សូមមើល យ៉ូហាន 14:26; គ. និង ស. 11:21 ) ។ សូមចាំថាត្រូវសម្របសកម្មភាពទន្ទេញចាំនេះតាមសមត្ថភាពរបស់សិស្សអ្នក ។ អែលឌើរ រីឆាត ជី. ស្កត នៃកូរ៉ុមនៃពួកសាវកដប់ពីរនាក់បានលើកទឹកចិត្តឲ្យមានការទន្ទេញចាំខគម្ពីរ នៅពេលលោកបានមានប្រសាសន៍ថា ៖

« អំណាចដ៏អស្ចារ្យអាចចេញមកពីការទន្ទេញចាំខគម្ពីរ ។ ការទន្ទេញចាំខគម្ពីរ គឺការបង្កើតនូវមិត្តភាពថ្មីមួយ ។ វាដូចជាការស្វែងរកបុគ្គលថ្មីមួយ ដែលអាចជួយអ្នកក្នុងពេលអាសន្ន ផ្ដល់នូវការបំផុសគំនិត និងការលួងលោម និងជាប្រភពនៃការជម្រុញទឹកចិត្តឲ្យមានការផ្លាស់ប្ដូរចាំបាច់ » ( « The Power of Scripture » Ensign ឬ លីអាហូណា ខែ វិច្ឆិកា ឆ្នាំ 2011, ទំព័រ 6 ) ។

សកម្មភាពខាងក្រោមនីមួយៗអាចធ្វើដដែលៗបីបួនថ្ងៃជាប់ៗគ្នានៅពេលចាប់ផ្ដើមថ្នាក់ ឬពេលបញ្ចប់ដើម្បីជួយសិស្សឲ្យទន្ទេញចាំវាបានយូរ ៖

ការប្រកួតតែមួយពាក្យ— សូមតាំងចិត្តសិស្សឲ្យសូត្រវគ្គចំណេះចំណានខគម្ពីរ តែមួយពាក្យម្នាក់ៗ ម្តងម្នាក់ៗ ។ ឧទាហរណ៍ នៅពេលជួយសិស្សឲ្យទន្ទេញ អាលម៉ា 39:9 សិស្សទីមួយនឹងនិយាយពាក្យ ឥឡូវនេះ សិស្សទីពីរនឹងនិយាយថា ឱកូនប្រុស សិស្សទីបីនិយាយថា របស់ឪពុកអើយ ហើយបន្ដបន្ទាប់រហូតដល់ខគម្ពីរទាំងមូលបញ្ចប់ ។ សូមផ្ទៀងពេលដល់សិស្ស ហើយឲ្យពួកគេមានព្យាយាមធ្វើឲ្យបានច្រើនដងដើម្បីសម្រេចក្នុងពេលកំណត់មួយ ។ នៅពេលអ្នកធ្វើសកម្មភាពនេះសាឡើងវិញ សូមគិតពីការប្ដូរលំដាប់សិស្ស ដើម្បីឲ្យពួកគេអាចនិយាយពាក្យខុសគ្នា ។
អក្សរដំបូង—សរសេរនៅលើក្ដារខៀននូវអក្សរដំបូងនៃពាក្យនីមួយៗនៅក្នុងវគ្គចំណេះចំណានខគម្ពីរ ។ សូមចង្អុលអក្សរ នៅពេលសិស្សថាខគម្ពីរឡើងវិញជាមួយនឹងអ្នក ដោយប្រើព្រះគម្ពីររបស់គេពេលត្រូវការ ។ សូមធ្វើសកម្មភាពនេះឡើងវិញ រហូតដល់សិស្សមានទំនុកចិត្តលើសមត្ថភាពរបស់គេក្នុងការទន្ទេញចាំខគម្ពីរមួយដោយគ្រាន់តែមានជំនួយពីអក្សរដំបូងមួយប៉ុណ្ណោះ ។ អ្នកអាចលុបអក្សរពីរបីរាល់ពេលដែលសិស្សទន្ទេញខគម្ពីរនេះ ។ ការណ៍នេះនឹងបង្កើនការពិបាកបន្ដិចម្ដងៗរហូតដល់សិស្សអាចទន្ទេញចាំខគម្ពីរដោយមិនចាំបាច់ប្រើអក្សរដំបូង ។
ល្បែងតម្រៀបពាក្យ— សរសេរ ឬសូមឲ្យសិស្សសរសេរពាក្យមកពីវគ្គចំណេះចំណានខគម្ពីរនៅលើក្រដាសមួយដែលមានជួរ ។ សូមកាត់ក្រដាសនោះតាមជួរ ដោយទុកជួរខគម្ពីរទាំងមូល ។ សូមកាត់ជួរខ្លះចេញឲ្យខ្លីជាងមុនដើម្បីបញ្ចូលនូវពាក្យពីរបីនៃខគម្ពីរនៅលើក្រដាសនីមួយៗ ។ សូមច្របល់ក្រដាសចូលគ្នា ហើយឲ្យសិស្សធ្វើការជាដៃគូ ឬក្រុមតូចមួយ ។ សូមឲ្យសិស្សតម្រៀបក្រដាសជាជួរតាមលំដាប់ ដោយប្រើព្រះគម្ពីររបស់គេជាអ្នកណែនាំ ។ សូមឲ្យពួកគេធ្វើ រហូតដល់ពួកគេលែងត្រូវការប្រើព្រះគម្ពីររបស់គេ ។ ក្រោយពីពួកគេបានបញ្ចប់ហើយ សូមឲ្យពួកគេទន្ទេញខគម្ពីរនោះឮៗ ។ អ្នកក៏អាចកំណត់ពេលដល់សិស្សដើម្បីដឹងថា តើក្រុមមួយណាអាចរៀបចំពាក្យត្រឹមត្រូវតាមលំដាប់បានលឿនជាងគេបំផុត ។ ឬ អ្នកអាចកំណត់ពេលដល់សិស្សទាំងអស់ដើម្បីដឹងថាតើវាត្រូវការពេលប៉ុន្មានសម្រាប់ក្រុមទាំងអស់បញ្ចប់ល្បែងនេះ ( នៅពេលក្រុមទីមួយបញ្ចប់ សូមឲ្យពួកគេជួយដល់ក្រុមដែលយឺតជាង ) ។