មេរៀនទី 106
លេហេមិន 1–2
សេចក្តីផ្ដើម
ក្រោយពីពេហូរ៉ានបានស្លាប់ទៅ ការទាស់ទែងគ្នាបានកើតឡើងនៅក្នុងចំណោមពួកសាសន៍នីហ្វៃ ទាក់ទងនឹងបញ្ហាថាតើនរណាគួរធ្វើជាមេចៅក្រមបន្ទាប់ ។ កូនប្រុសរបស់គាត់ ពេហូរ៉ាន ត្រូវបានតែងតាំងដោយសំឡេងរបស់ប្រជាជន ។ ទោះជាយ៉ាងណាក្ដី មេចៅក្រមថ្មីនេះត្រូវបានធ្វើឃាតដោយគិសគូមេន ដែលបានចួលរួមចំណែកនៃបក្សព័ន្ធសម្ងាត់ ។ ដោយឆ្លៀតឱកាសពេលកំពុងមានការទាស់ទែងគ្នា និងការបែងចែកគ្នានេះ ពួកសាសន៍លេមិនបានឈ្លានពានយករដ្ឋធានីសារ៉ាហិមឡាបាន ។ សាសន៍នីហ្វៃបានដណ្ដើមយកដែនដីសារ៉ាហិមឡាមកវិញ ហើយគិសគូមេនត្រូវបានគេសម្លាប់ ខណៈប៉ុនប៉ងសម្លាប់ហេលេមិន ( ជាកូនប្រុសរបស់ហេលេមិន ) ជាមេចៅក្រមថ្មី ។
យោបល់សម្រាប់ការបង្រៀន
លេហេមិន 1
ការទាស់ទែងគ្នាបានបំបែកសាសន៍នីហ្វៃ ហើយធ្វើឲ្យសាសន៍លេមិនឈ្លានពានយកសារ៉ាហិមឡាបាន
មុនចាប់ផ្ដើមថ្នាក់ សូមសរសេរប្រយោគខាងក្រោមនៅលើក្ដារខៀន ៖
ហេលេមិន 1:1–4 ។ តើអ្វីទៅដែលបណ្ដាលឲ្យមានការទាស់ទែងគ្នា និងការបែកបាក់នៅក្នុងចំណោមប្រជាជនសាសន៍នីហ្វៃ ?
លេហេមិន 1:5–8 ។ តើនរណាត្រូវបានតែងតាំងជាមេចៅក្រម ហើយតើបងប្អូនប្រុសទាំងពីររបស់គាត់មានប្រតិកម្មយ៉ាងណាដែរ ?
ដើម្បីចាប់ផ្ដើមមេរៀននេះ សូមឲ្យសិស្សរៀបរាប់ពីភាពខុសគ្នារវាង ការពិភាក្សាពីបញ្ហាមួយ និងការទាស់ទែងគ្នាអំពីបញ្ហាមួយ ។ ប្រសិនបើសិស្សត្រូវការជំនួយដើម្បីយល់ពីភាពខុសគ្នាចំពោះចំណុចទាំងពីរនេះ សូមឲ្យពួកគេគិតពីស្ថានភាពដូចមានខាងក្រោម ហើយរកមើលថាស្ថានភាពមួយណាដែលជាឧទាហរណ៍នៃការទាស់ទែងគ្នា ។ ( ពួកគេគួរយល់នៅក្នុងស្ថានភាពទីពីរ និងទីបី ) ។
-
ការពន្យល់ពីគោលជំហររបស់អ្នកតាមរយៈការបញ្ចុះបញ្ចូល និងការពិតដ៏រួសរាយ
-
ការបង្ហាញការមិនគោរពដល់បុគ្គលម្នាក់ ដែលមានទស្សនខុសពីអ្នក
-
ការមានអារម្មណ៍ថា ការយកឈ្នះលើការប្រកែកគ្នាមួយវាសំខាន់ជាងសុខុមាលភាពរបស់មនុស្សម្នាក់ទៀត
សូមឲ្យសិស្សរកមើលគ្រោះថ្នាក់នៃការទាស់ទែងគ្នា នៅពេលពួកគេសិក្សា ហេលេមិន 1 ។ សូមលើកទឹកចិត្តពួកគេឲ្យគិតរៀងៗខ្លួនពីរបៀបដែលការទាស់ទែងគ្នាអាចកើតមានច្បាស់នៅក្នុងជីវិតរបស់ពួកគេ ។
សូមឲ្យសិស្សអានបទគម្ពីរដែលអ្នកបានសរសេរនៅលើក្ដារខៀនដោយស្ងៀមស្ងាត់ ដោយរកមើលចម្លើយចំពោះសំណួរដែលត្រូវគ្នា ។ សូមអញ្ជើញពួកគេឲ្យរៀបរាប់ពីអ្វីដែលពួកគេរកឃើញ ។
សូមគូសផ្លូវមួយនៅលើក្ដារខៀន ហើយសរសេរពាក្យ ការទាស់ទែងគ្នានៅលើវា ។
សូមពន្យល់ថា ការទាស់ទែងគ្នាប្រៀបដូចជាផ្លូវមួយដែលនាំទៅរកអំពើបាប និងលទ្ធផលអវិជ្ជមានផ្សេងទៀត ។ សូមឲ្យសិស្សម្នាក់អាន ហេលេមិន1:9 ឮៗ ។
សូមឲ្យសិស្សក្នុងថ្នាក់រកមើលថាតើនៅទីបញ្ចប់ការទាស់ទែងគ្នាក្នុងចំណោមពួកសាសន៍នីហ្វៃបានដឹកនាំទៅរកអ្វី ។ ( ឃាតកម្ម ) ។ សូមសរសេរពាក្យ ឃាតកម្ម នៅលើក្ដារខៀន នៅលើរូបផ្លូវដែលអ្នកបានគូស ។
សូមឲ្យសិស្សអាន ហេលេមិន 1:10–12 ដោយស្ងៀមស្ងាត់ ដោយរកមើលអ្វីដែលគិសគូមេន និងអ្នកទាំងឡាយដែលបានបញ្ជូនគាត់ទៅបានធ្វើ ដើម្បីបិទបាំងរឿងឃាតកម្មដែលគាត់បានប្រព្រឹត្ត ។
-
ហេតុអ្វីបានជាគិសគូមេន និងបក្សពួកគាត់ចង់លាក់ការសម្ងាត់ពីសកម្មភាពរបស់ពួកគេ ?
-
តើមានឧទាហរណ៍អ្វីខ្លះពីមនុស្សសម័យទំនើបមួយចំនួនដែលកំពុងព្យាយាមរក្សាសកម្មភាពដ៏មិនសុចរិតរបស់គេជាការសម្ងាត់នោះ ? ( ចម្លើយអាចរួមមានការកុហកឪពុកម្ដាយ ឬនៅក្នុងការសម្ភាសន៍ជាមួយនឹងប៊ីស្សព ឬប្រធានសាខា ) ។
-
ហេតុអ្វីបានជាវាមិនមែនជាការឆ្លាតវៃដើម្បីជួយនរណាម្នាក់ឲ្យបិទបាំងអំពើបាបរបស់ខ្លួននោះ ?
សូមឲ្យសិស្សម្នាក់អាន ហេលេមិន 1:18–21 ឮៗ ។ សូមឲ្យសិស្សផ្សេងទៀតមើលតាម ហើយរកមើលនូវលទ្ធផលផ្សេងទៀតនៃការទាស់ទែងគ្នារបស់សាសន៍នីហ្វៃ ។ នៅពេលសិស្សរៀបរាប់ពីអ្វីដែលពួកគេរកឃើញ សូមសរសេរចម្លើយរបស់ពួកគេនៅកន្លែងណាមួយនៅលើរូបផ្លូវនៅលើក្ដារខៀន ។ អ្នកក៏អាចឲ្យពួកគេផ្ដល់យោបល់ និងសរសេរពីលទ្ធផលផ្សេងទៀតនៃការទាស់ទែងគ្នាដែលពួកគេបានឃើញ ។
សូមសង្ខេប ហេលេមិន 1:22–30 ដោយពន្យល់ថា ក្រោយពីសាសន៍លេមិនបានកាន់កាប់ដែនដីសារ៉ាហិមឡា កងទ័ពសាសន៍នីហ្វៃបានយកឈ្នះលើពួកគេនៅក្នុងសង្គ្រាមមួយដែលមានមនុស្សជាច្រើនបានស្លាប់ ។
សូមឲ្យសិស្សសង្ខេបគោលការណ៍មួយស្ដីពីការទាស់ទែងគ្នាដែលពួកគេបានរៀនពីការសិក្សា ហេលេមិន 1 ។ គោលការណ៍មួយដែលសិស្សអាចរកឃើញគឺថា ការទាស់ទែងគ្នាធ្វើឲ្យយើងងាយនឹងរងឥទ្ធិពលពីមារសត្រូវ ។ អ្នកអាចសរសេរគោលការណ៍នេះនៅលើក្ដារខៀន ។
ដើម្បីជួយសិស្សឲ្យយល់ពីគោលការណ៍នេះកាន់តែច្បាស់ និងអនុវត្តវានៅក្នុងជីវិតរបស់ពួកគេ សូមគិតពីការសួរសំណួរមួយចំនួនដូចមានខាងក្រោម ៖
-
ប្រសិនបើយុវនារីម្នាក់បានឈ្លោះគ្នានឹងឪពុកម្ដាយរបស់នាងអំពីមិត្តភក្ដិរបស់នាង តើវាអាចប៉ះពាល់ដល់ឥរិយាបថរបស់នាងចំពោះការណែនាំរបស់ឪពុកម្ដាយរបស់នាងនៅក្នុងផ្នែកផ្សេងទៀតនៃជីវិតនាងដោយរបៀបណា ?
-
ប្រសិនបើបងប្អូនបានឈ្លោះគ្នា តើអាកប្បកិរិយារបស់ពួកគេអាចជះឥទ្ធិពលដល់ទំនាក់ទំនងរយៈពេលយូររបស់ពួកគេដោយរបៀបណា ? តើវាអាចប៉ះពាល់ដល់គ្រួសារទាំងមូលដោយរបៀបណា ?
-
តើការទាស់ទែងគ្នានៅក្នុងវួដ ឬសាខាមួយអាចធ្វើឲ្យសមាជិកនៃសាសនាចក្រងាយនឹងរងការវាយប្រហារពីសាតាំងខ្លាំងជាងមុនដោយរបៀបណា ?
-
ប្រសិនបើយុវជនម្នាក់ខឹងនឹងនរណាម្នាក់នៅក្នុងកូរ៉ុមបព្វជិតភាពរបស់គាត់ តើអារម្មណ៍របស់គាត់អាចជះឥទ្ធិពលដល់សកម្មភាពរបស់គាត់នៅក្នុងសាសនាចក្រដោយរបៀបណា ? តើវាអាចជះឥទ្ធិពលដល់ការមកព្រះវិហាររបស់គាត់ដោយរបៀបណា ?
-
តើអារម្មណ៍ទាស់ទែងគ្នាអាចធ្វើឲ្យយើងទន់ខ្សោយបែបណា នៅពេលយើងជួបនឹងសេចក្តីល្បួង ?
សូមឲ្យសិស្សផ្ដល់យោបល់ពីស្ថានភាពផ្សេងទៀតដែលការទាស់ទែងគ្នាអាចធ្វើឲ្យយើងទន់ខ្សោយ ហើយងាយរងនឹងការល្បួងរបស់មារសត្រូវ ។
សូមឲ្យសិស្សមានពេលគិតពីរឿងមួយចំនួនក្នុងជីវិតរបស់គេដែលពួកគេអាចមានអារម្មណ៍ទាស់ទែងគ្នា ។ សូមឲ្យពួកគេរកមើលសកម្មភាពជាក់លាក់មួយដែលពួកគេអាចធ្វើដើម្បីចៀសវាងពីឥរិយាបថទាស់ទែងគ្នា ។
ហេលេមិន 2
ហេលេមិនក្លាយជាមេចៅក្រម ហើយអ្នកបម្រើរបស់គាត់រារាំងគិសគូមេនកុំឲ្យសម្លាប់គាត់បាន
-
ហេតុអ្វីបានជាវាប្រសើរជាងក្នុងការសម្អាតភាពរញ៉េរញ៉ៃមួយជាជាងបិទបាំងវា ?
-
ហេតុអ្វីបានជាមនុស្សម្នាក់ចង់បិទបាំងអ្វីមួយដែលគេបានធ្វើ ?
សូមឲ្យសិស្សអាន ហេលេមិន 2:3–4 និង គ. និង ស. 58:43 ដោយស្ងៀមស្ងាត់ ។
-
យោងតាមខគម្ពីរទាំងនេះ តើមានភាពខុសគ្នាយ៉ាងណារវាងរបៀបដែលព្រះអម្ចាស់សព្វព្រះហឫទ័យឲ្យយើងដោះស្រាយអំពើបាប និងរបៀបដែលពួកចោរកាឌីអានតុនដោះស្រាយអំពើបាប ?
សូមពន្យល់ថានៅក្នុង ហេលេមិន 2 យើងបានអានពីការប៉ុនប៉ងសម្លាប់ហេលេមិនរបស់គិសគូមេន ដែលជាមេចៅក្រមបន្ទាប់ ។ សូមឲ្យសិស្សស្រមៃថា ពួកគេជាអ្នកកាសែតដែលត្រូវចាត់តាំងឲ្យរាយការណ៍ពីការប៉ុនប៉ងសម្លាប់មេចៅក្រមនោះ ។ សូមឲ្យពួកគេអាន ហេលេមិន 2:2–9 ជាមួយនឹងដៃគូម្នាក់ ហើយសរសេរចំណងជើងមួយដើម្បីសង្ខេបអ្វីដែលបានកើតឡើង ។ សូមឲ្យសិស្សបីបួននាក់អានចំណងជើងរបស់គេដល់សិស្សក្នុងថ្នាក់ ។
សូមឲ្យសិស្សអាន ហេលេមិន 2:10–11ដោយស្ងៀមស្ងាត់ ដោយរកមើលសកម្មភាពដែលហេលេមិនបានធ្វើប្រឆាំងនឹងពួកចោរកាឌីអានតុន ។ សូមឲ្យសិស្សម្នាក់សង្ខេបខគម្ពីរទាំងនេះ ។
សូមពន្យល់ថា ក្រុមរបស់កាឌីអានតុនគឺជាគំរូមួយនៃបក្សពួកសម្ងាត់មួយ ។ សូមឲ្យសិស្សម្នាក់អាន ហេលេមិន 2:12–14 ឮៗ ។ សូមឲ្យសិស្សក្នុងថ្នាក់រកមើលពីឥទ្ធិពលដែលបក្សពួកសម្ងាត់បានមានលើប្រជាជននីហ្វៃ ។
-
តើយើងអាចរៀនអ្វីខ្លះពីខគម្ពីរទាំងនេះស្ដីពីគ្រោះថ្នាក់នៃបក្សព័ន្ធសម្ងាត់ ? ( នៅពេលសិស្សឆ្លើយ សូមប្រាកដថាសេចក្ដីពិតដូចតទៅនេះត្រូវបានបញ្ជាក់យ៉ាងច្បាស់ ៖ បក្សព័ន្ធសម្ងាត់អាចដឹកនាំទៅរកការបំផ្លិចបំផ្លាញនៃសង្គមទាំងឡាយ ។ អ្នកអាចពន្យល់ថា បន្ថែមលើការនាំមកនូវសេចក្តីបំផ្លិចបំផ្លាញនៃសាសន៍នីហ្វៃ បក្សព័ន្ធសម្ងាត់បានដឹកនាំទៅរកសេចក្តីបំផ្លិចបំផ្លាញនៃសាសន៍យ៉ារេឌ ជាប្រជាជនដែលសិស្សនឹងអាននៅក្នុងគម្ពីរអេធើរ សូមមើល អេធើរ 8:20–21 ) ) ។
សូមអានសេចក្ដីថ្លែងការណ៍ខាងក្រោមដោយអែលឌើរ អិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ ។ សូមឲ្យសិស្សស្ដាប់រកមើលឧទាហរណ៍នៃបក្សព័ន្ធសម្ងាត់នាសព្វថ្ងៃនេះ ៖
« ព្រះគម្ពីរមរមនបង្រៀនថា បក្សព័ន្ធសម្ងាត់ដែលបានទាក់ទិននឹងបទឧក្រិដ្ឋធ្វើឲ្យមានបញ្ហាដ៏ធ្ងន់ធ្ងរមួយ មិនត្រឹមតែចំពោះបុគ្គលម្នាក់ៗ និងក្រុមគ្រួសារប៉ុណ្ណោះទេ តែចំពោះប្រជាជាតិទាំងមូលផងដែរ ។ ក្នុងចំណោមបក្សព័ន្ធសម្ងាត់បច្ចុប្បន្នមានដូចជា ក្រុមក្មេងពាល ការជួញដូរគ្រឿងញៀន និងក្រុមឧក្រិដ្ឋជនដែលបានបង្កើតឡើង ។ …
« បើសិនជាយើងមិនបានប្រុងប្រយត្ន័ទេ នោះបក្សព័ន្ធសម្ងាត់សព្វថ្ងៃនេះអាចមានអំណាច និងឥទ្ធិពលយ៉ាងលឿននិងពេញលេញដូចដែលពួកវាបានធ្វើនៅក្នុងសម័យកាលព្រះគម្ពីរមរមនដូច្នោះដែរ » ។ …
« … [ អារក្ស ] ប្រើបក្សព័ន្ធសម្ងាត់ រួមទាំងក្រុមក្មេងពាលផងដែរ ‹ ពីតំណមួយទៅតំណមួយ តាមការណ៍ដែលវាអាចក្ដាប់យកចិត្តនៃកូនចៅមនុស្ស › ។ [ ហេលេមិន 6:30 ។ ] បំណងរបស់វាគឺដើម្បីបំផ្លាញបុគ្គលម្នាក់ៗ ក្រុមគ្រួសារ សហគមន៍ និងជាតិសាសន៍ទាំងអស់ ។ [ សូមមើល នីហ្វៃទី 29:9 ។ ] មានពេលមួយ វាមានជោគជ័យក្នុងជំនាន់នៃព្រះគម្ពីរមរមន ។ ហើយវាមានជោគជ័យខ្លាំងណាស់នាសព្វថ្ងៃនេះ ។ នេះជាមូលហេតុដែលវាសំខាន់សម្រាប់យើង … ដើម្បីឈរឲ្យរឹងមាំសម្រាប់សេចក្ដីពិត និងការត្រឹមត្រូវដោយការធ្វើអ្វីដែលយើងអាចធ្វើបាន ដើម្បីរក្សាសហគមន៍របស់យើងឲ្យមានសុវត្ថិភាព » ( « Standing for Truth and Right » Ensign ខែ វិច្ឆិកា ឆ្នាំ 1997 ទំព័រ 38 ) ។
សូមឲ្យសិស្សសញ្ជឹងគិតពីរបៀបដែលពួកគេអាចអនុវត្តតាមការបង្រៀនរបស់អែលឌើរ បាឡឺដ ។ សូមឲ្យពួកគេសរសេរនៅក្នុងកំណត់ហេតុសិក្សាព្រះគម្ពីរ ឬ សៀវភៅសរសេរក្នុងថ្នាក់របស់ពួកគេអំពីអ្វីដែលពួកគេនឹងធ្វើដើម្បីចៀសវាងពីបក្សព័ន្ធសម្ងាត់គ្រប់រូបភាព និងអ្វីដែលពួកគេនឹងធ្វើដើម្បី « ឈរឲ្យរឹងមាំសម្រាប់សេចក្ដីពិត និងការត្រឹមត្រូវ » នៅក្នុងសហគមន៍របស់ពួកគេ ។
វិចារណកថា និង ព័ត៌មានសាច់រឿង
ហេលេមិន 1:1–21 ។ ការទាស់ទែងគ្នានាំឲ្យមានការបំផ្លិចបំផ្លាញ
គម្ពីរហេលេមិនប្រាប់ពីគ្រានៃអំពើទុច្ចរិតដ៏ធំមួយក្នុងចំណោមសាសន៍នីហ្វៃ ។ ពួកចោរកាឌីអានតុនបានរីកធំឡើង ហើយប្រជាជនបានជួបនឹងវដ្ដនៃអំពើទុច្ចរិត សេចក្តីបំផ្លិចបំផ្លាញ និងការប្រែចិត្ត គឺដើម្បីតែត្រឡប់ទៅរកអំពើទុច្ចរិតវិញប៉ុណ្ណោះ ។ បញ្ហាទាំងនេះបានចាប់ផ្ដើមដោយការទាស់ទែងគ្នា ដូចដែលបានរៀបរាប់នៅក្នុងជំពូកទីមួយនៃគម្ពីរហេលេមិន ។ មនុស្សខ្លះគិតថាការទាស់ទែងគ្នាគឺជាអំពើបាបដ៏តូចតាចមួយ ។ ទោះជាយ៉ាងណាក្ដី សេចក្ដីថ្លែងការណ៍ពីរដោយព្យាការីថ្ងៃចុងក្រោយបានបញ្ជាក់ពីភាពធ្ងន់ធ្ងរនៃអំពើបាបមានខ្លឹមសារដូចតទៅនេះ ៖
ប្រធាន ជែមស៍ អ៊ី ហ្វោស្ត នៃគណៈប្រធានទីមួយបានព្រមានថា « នៅពេលមានការទាស់ទែងគ្នា ព្រះវិញ្ញាណនៃព្រះអម្ចាស់នឹងចាកចេញ មិនថាអ្នកណាខុសនោះទេ » ( « What I Want My Son to Know before He Leaves on His Mission » Ensign ខែ ឧសភា ឆ្នាំ 1996 ទំព័រ 41 ) ។
អែលឌើរ យ៉ូសែប ប៊ី វ៉ឺតលីន នៃកូរ៉ុមនៃពួកសាវកដប់ពីរនាក់បានព្រមានថា ៖ « អំពើបាបនៃអំពើពុករលួយ ភាពមិនស្មោះត្រង់ ការលំបាក ការទាស់ទែងគ្នា និងអំពើអាក្រក់ផ្សេងទៀតក្នុងពិភពលោកនេះមិនមែនកើតឡើងដោយចៃដន្យនោះទេ ។ ពួកវាជាភស្ដុតាងនៃការឃោសនាដ៏ឥតបង្អង់របស់សាតាំង និងអ្នកដែលដើរតាមវា ។ វាប្រើឧបករណ៍ និងគ្រឿងសម្ភារគ្រប់ប្រភេទដែលវាមានដើម្បីបញ្ឆោត ពង្វក់ និងដឹកនាំទៅរកផ្លូវខុស » ( « Deep Roots » Ensign ខែ វិច្ឆិកា ឆ្នាំ 1994 ទំព័រ 76 ) ។
ផ្ទុយពីឥទ្ធិពលដ៏បំផ្លិចបំផ្លាញនៃការទាស់ទែងគ្នា ប្រធាន ហិនរី ប៊ី អាវរិង នៃគណៈប្រធានទីមួយបានបញ្ជាក់ពីសាមគ្គីភាព និងសន្តិភាពដែលព្រះវិញ្ញាណនៃព្រះអម្ចាស់បាននាំមក ៖
« កន្លែងណាដែលមនុស្សមានព្រះវិញ្ញាណនៅជាមួយនឹងគេ នោះជាកន្លែងដែលយើងអាចមានសុភមង្គល ។ ព្រះវិញ្ញាណដាក់ទីបន្ទាល់នៃសេចក្តីពិតនៅក្នុងដួងចិត្តយើង ដែលរួបរួមអ្នកទាំងឡាយណាដែលចែកចាយទីបន្ទាល់នោះ ។ ព្រះវិញ្ញាណនៃព្រះមិនដែលបង្កើតការទាស់ទែងគ្នានោះទេ ( សូមមើល នីហ្វៃទី 3 11:29 ) ។ ព្រះវិញ្ញាណមិនដែលបង្កើតអារម្មណ៍នៃការខុសគ្នារវាងមនុស្សដែលដឹកនាំទៅរកការលំបាកនោះទេ ( សូមមើល យ៉ូសែប អេហ្វ ស៊្មីធ Gospel Doctrine ការកែសម្រួលលើកទី 13 [ ឆ្នាំ 1963 ] ទំព័រ 131 ) ។ ព្រះវិញ្ញាណនាំទៅរកសេចក្តីសុខសាន្តផ្ទាល់ខ្លួន និងអារម្មណ៍នៃការរួបរួមមួយជាមួយនឹងអ្នកដទៃ ។ ព្រះវិញ្ញាណបង្រួបបង្រួមព្រលឹងទាំងឡាយ ។ គ្រួសារដ៏មានសាមគ្គីភាព សាសនាចក្រដែលរួបរួមមួយ និងពិភពលោកមួយដែលមានសន្ដិភាពគឺអាស្រ័យលើមនុស្សដែលចេះរួបរួមគ្នា » ( « That We May Be One » Ensign ខែ ឧសភា ឆ្នាំ 1998 ទំព័រ 67 ) ។