Mësimi 13

Doktrina e Besëlidhje 4

Hyrje

Kjo zbulesë, e dhënë në shkurt të vitit 1829 Jozef Smith Plakut, babait të Profetit, ishte e para e disa zbulesave të hershme, të dhëna individëve që dëshironin ta ndihmonin Zotin në veprën e Tij (shih edhe DeB 11–12; 14–16; 25). Në të, Jozef Smith Plaku u thirr për të punuar në shërbimin e Perëndisë. Përveç kësaj, Zoti përmblodhi cilësitë dhe vetitë kyçe për ata që i shërbejnë Atij.

Sugjerime për Mësimdhënien

Doktrina e Besëlidhje 4:1–3

Jozef Smith Plaku thirret për të punuar në shërbim të Perëndisë

Filloni duke iu kërkuar studentëve të përsiatin pyetjen vijuese:

• A keni ndier ndonjëherë një dëshirë që t’i shërbeni Perëndisë dhe donit të dinit vullnetin e Tij lidhur me mënyrën se si mund të ndihmonit sa më mirë në bërjen e veprës së Tij?

Shpjegoni që babai i Jozef Smithit ndjeu një dëshirë të tillë, por nuk dinte se çfarë donte Zoti që të bënte ai. Në shkurt të vitit 1829, Jozef Smith Plaku dhe bashkëshortja e tij, Lusi, e vizituan birin e tyre, Jozef Smith të Riun, në Harmoni të Pensilvanisë. Gjatë asaj vizite Jozef Smith i Riu mori një zbulesë në përgjigje të pyetjes së babait të tij. Doktrina e Besëlidhje 4 është përgjigjja e Zotit, në të cilën Ai përmbledh cilësitë që Ai pret nga ata që ndihmojnë në veprën e Tij.

Kujtojuni studentëve se në kohën e kësaj zbulese, Kisha nuk ishte organizuar ende dhe priftëria nuk ishte rivendosur ende. Ftojini studentët të lexojnë në heshtje Doktrinën e Besëlidhjet 4:1 duke kërkuar mënyrën se si Zoti e përshkroi Rivendosjen që sa po fillonte të shpalosej.

• Cilën fjalë përdori Zoti për të përshkruar Rivendosjen e ungjillit në ditët e mëvonshme?

• Në ç’mënyra ishte “e mrekullueshme” Rivendosja e ungjillit?

Ftojeni një student të lexojë me zë të lartë Doktrinën e Besëlidhjet 4:2. Vëreni klasën ta ndjekë duke kërkuar atë që Zoti ua kërkon atyre që hyjnë në shërbimin e Tij. (Ju mund të doni të shpjegoni se fjala hyjnë do të thotë fillojnë.)

• Sipas këtij vargu, çfarë pret Zoti nga ata që i shërbejnë Atij?

• Çfarë do të thotë ta bëni diçka “me gjithë zemrën, fuqinë, mendjen dhe forcën tuaj”?

Për t’i ndihmuar studentët që ta kuptojnë më mirë këtë frazë, kërkojuni të përshkruajnë çfarë veprimesh ose vetish mund të presin që t’i shohin te një njeri që po përpiqet t’i shërbejë Perëndisë me gjithë zemrën, fuqinë, mendjen dhe forcën e tij ose të saj. Ju gjithashtu mund të dëshironi t’i ftoni ata të japin shembuj për njerëz që ata e dinë se i shërbejnë Zotit në këtë mënyrë.

Shkruajeni në tabelë thënien e paplotë vijuese: Nëse i shërbejmë Perëndisë me gjithë zemrën, fuqinë, mendjen dhe forcën tonë, .

Për t’i ndihmuar studentët të përcaktojnë një parim të mësuar te Doktrina e Besëlidhje 4:2, bëni pyetjet vijuese:

• Sipas Doktrinës e Besëlidhjeve 4:2, çfarë bekimi vjen nga të shërbyerit Perëndisë “me gjithë zemrën, fuqinë, mendjen dhe forcën [tonë]”? (Teksa studentët përgjigjen, kërkojini njërit prej tyre ta plotësojë thënien në tabelë. Duhet të jetë diçka e ngjashme me sa vijon: Nëse i shërbejmë Perëndisë me gjithë zemrën, fuqinë, mendjen dhe forcën tonë, ne mund të qëndrojmë të pafaj përpara Tij në ditën e fundit. Ju mund të doni të sugjeroni që studentët ta shenjojnë këtë frazë në shkrimet e tyre të shenjta.)

• Si mendoni, përse shërbimi ndaj Zotit me gjithë zemrën, fuqinë, mendjen dhe forcën tonë do të na lejojë të qëndrojmë të pafaj përpara Perëndisë?

Nxitini studentët të përsiatin për çfarë mund të ndiejnë nëse qëndrojnë në praninë e Perëndisë dhe janë “të pafaj”. Ju mund të dëshironi t’u kërkoni një ose dy studentëve të shprehin mendimet e tyre.

Ftojeni një student të lexojë me zë të lartë Doktrinën e Besëlidhjet 4:3. Vërini studentët ta ndjekin duke kërkuar një veti që u nevojitet individëve me qëllim që ta ndihmojnë Zotin në veprën e Tij.

• Çfarë vetie i nevojitet një njeriu që ta ketë, me qëllim që ta ndihmojë Zotin në veprën e Tij? (Dëshirë për t’i shërbyer Perëndisë.)

Ju mund të dëshironi të shpjegoni se disa njerëz e marrin parasysh Doktrinën e Besëlidhjet 4 vetëm si një thirrje për shërbim misionar kohëplotë. Megjithatë, babai i Jozef Smithit, të cilit iu dha kjo zbulesë, nuk po thirrej si misionar kohëplotë. Ai e ndoqi, megjithatë, këshillën te Doktrina e Besëlidhje 4:2–3 gjatë gjithë jetës së tij, duke shërbyer me zotim kudo dhe kurdo që u thirr. Ai ishte një nga Tetë Dëshmitarët e Librit të Mormonit dhe një nga të parët që u pagëzuan kur Kisha u organizua zyrtarisht më 6 prill 1830. Ai shërbeu edhe si Patriarku i parë i Kishës dhe si Këshilltar Ndihmues i Presidencës së Parë.

Këshilla e dhënë në këtë seksion mund të gjejë zbatim te të gjithë ata që dëshirojnë t’i shërbejnë Zotit dhe te mënyrat e shumta sipas të cilave mund ta ngremë mbretërinë e Perëndisë.

• Përveç shërbimit misionar kohëplotë, cilat janë disa mënyra sipas të cilave mund ta ndihmojmë Zotin në veprën e Tij?

Për t’u dhënë studentëve ide se si ata mund të veprojnë sipas dëshirës së tyre për të ndihmuar tani në veprën e Zotit, ftojeni një anëtar të klasës të lexojë me zë të lartë thënien vijuese nga broshura Për Forcën e Rinisë:

“Disa nga shërbimet më të rëndësishme që ju mund të jepni, do të jenë brenda shtëpisë suaj. Ju gjithashtu mund të shërbeni në detyrat tuaja në Kishë, shkollë dhe komunitet. Ju mund të shërbeni duke bërë punën në tempull dhe punën për historinë familjare. Ju mund të shërbeni duke ndarë ungjillin me të tjerët tani dhe si një misionar me kohë të plotë në të ardhmen. Shpesh shërbimi më kuptimplotë shprehet përmes veprimeve të thjeshta e të përditshme të mirësisë. Kërkoni çdo ditë udhëheqjen e Frymës së Shenjtë për të ditur se kujt t’i shërbeni dhe se si të ndihmoni për të plotësuar nevojat e tyre. Ndiqni shembullin e Shpëtimtarit ndërsa u shërbeni të tjerëve” (Për Forcën e Rinisë [broshurë, 2011], f. 32).

Ftojini studentët të shkruajnë në fletoret e klasës ose ditarët e tyre të studimit të shkrimeve të shenjta për një mënyrë të veçantë se si ata dëshirojnë ta ndihmojnë Zotin në veprën e Tij në këtë kohë në jetën e tyre.

Doktrina e Besëlidhje 4:4

Fusha është gati për t’u korrur

Nëse është e mundur, sillni në klasë një mostër të vogël të një drithi. Nëse asnjë nuk është i gjindshëm, tregojuni studentëve një fotografi të një fushe me drithë ose vizatoni një figurë të thjeshtë të një kalliri gruri në tabelë. Shpjegoni që drithërat, të tilla si gruri ose elbi, e ndryshojnë ngjyrën kur rriten. Kur gruri është i njomë, ai është i gjelbër, por kur piqet ai bëhet me ngjyrë të verdhë të zbehtë. Kur gruri është gati për t’u korrur, ai shpesh përshkruhet si i “bardhë”.

Shkruani fjalët vijuese në tabelë: fushë, korr, drapër. Ftojeni një student të lexojë me zë të lartë Doktrinën e Besëlidhjet 4:4. Përpara se ai ose ajo të lexojë, shpjegoni se në këtë varg, Zoti i krahason njerëzit e botës me një fushë drithi. Vëreni klasën ta ndjekë duke kërkuar mënyrën se si Zoti e përshkruan fushën (ose njerëzit e botës).

• Çfarë thotë Zoti rreth fushës së Tij (ose njerëzve të botës)?

• Çfarë mendoni se është kuptimi i frazës “fusha është e bardhë gati për t’u korrur”? (Njerëzit e botës përgatiten për t’u mbledhur te Zoti dhe Kisha e Tij.)

Pyesni nëse ndonjëri mund ta shpjegojë se çfarë është një drapër dhe se për çfarë përdoret. (Një drapër është një thikë e përkulur që përdoret për korrjen e drithërave. Ju mund të dëshironi të vizatoni një figurë të thjeshtë të një drapri në tabelë.)

• Çfarë mendoni se do të thotë ta shtyni draprin tuaj me gjithë fuqinë tuaj? (Të punoni me zell për t’i sjellë të tjerët te Jezu Krishti.)

• Sipas Doktrinës e Besëlidhjeve 4:4, çfarë bekimi vjen nga të punuarit me zell për t’i sjellë të tjerët te Jezu Krishti? (Studentët mund të përdorin fjalë të ndryshme, por sigurohuni që të përcaktojnë të vërtetën vijuese: Kur punojmë me zell për t’i sjellë të tjerët te Jezu Krishti, ne gjithashtu mund të marrim shpëtim për veten tonë. Ju mund të dëshironi ta shkruani këtë parim në tabelë.)

• Si na ndihmon që edhe ne të vijmë te Jezu Krishti, të ndihmuarit e të tjerëve që të vijnë tek Ai?

Të treguarit e ideve

Kur studentët japin ide dhe tregojnë përvoja domethënëse, ata mund t’i forcojnë dëshmitë dhe kuptueshmërinë e tyre për të vërtetat e ungjillit. Teksa japin dëshmi, Fryma e Shenjtë mund t’i udhëheqë ata drejt një sigurie më të thellë për të vërtetat, për të cilat po dëshmojnë. Si mësuesit edhe studentët duhet të kenë mundësi për të treguar idetë e tyre lidhur me doktrinat dhe parimet e ungjillit.

Për t’i ndihmuar studentët që t’i forcojnë dëshmitë e tyre për këtë parim, ftojini disa prej tyre që të japin shembuj se si janë ndier më pranë Atit Qiellor dhe Jezu Krishtit, ndërkohë që kanë punuar për t’i ndihmuar të tjerët të vijnë tek Ata. Ju gjithashtu mund të doni të tregoni vetë përvojën ose dëshminë tuaj për këtë parim.

Doktrina e Besëlidhje 4:5–7

Zoti përmbledh cilësitë dhe vetitë kyçe për t’i shërbyer Atij

Kërkojuni studentëve të përmendin disa profesione. Zgjidhni një ose dy prej profesioneve që përmendin dhe kërkojuni të përcaktojnë cilësitë dhe vetitë e domosdoshme që do t’i nevojiteshin dikujt, me qëllim që të dilte me sukses në atë profesion. Ftojini studentët të lexojnë në heshtje Doktrinën e Besëlidhjet 4:5–6 duke kërkuar vetitë që e cilësojnë një njeri për të ndihmuar në veprën e Zotit. (Ju mund të dëshironi ta ftoni një student për t’i renditur këto veti në tabelë, ndërkohë që klasa i përcakton ato. Ju gjithashtu mund të dëshironi të sugjeroni që studentët t’i shenjojnë ato në shkrimet e tyre të shenjta.)

Ftojeni një student të lexojë me zë të lartë Doktrinën e Besëlidhjet 4:6. Vëreni klasën ta ndjekë duke vënë në dukje veti shtesë që Zoti i këshillon shërbëtorët e Tij për t’i “kujt[uar]”. (Ju mund të dëshironi t’i kërkoni një studenti t’i shkruajë këto veti në tabelë, pranë atyre nga vargu 5.)

Kërkojuni studentëve të përcaktojnë një të vërtetë nga vargjet 5–6 rreth asaj që na lejon të bëjmë zhvillimi i vetive hyjnore. Studentët mund të përdorin fjalë të ndryshme, por ata duhet të përcaktojnë të vërtetën vijuese: Përpjekjet tona për të zhvilluar veti hyjnore do të na ndihmojnë që të cilësohemi për të ndihmuar në veprën e Zotit. (Ju mund të dëshironi ta shkruani këtë parim në tabelë. Ju mund të sugjeroni gjithashtu që studentët ta shkruajnë atë në shkrimet e tyre të shenjta pranë Doktrinës e Besëlidhjeve 4:5–6.)

• Si mund të na ndihmojë zhvillimi i secilës veti te vargjet 5–6 që të jemi më të efektshëm për të ndihmuar në veprën e Zotit?

• Cilat nga vetitë e renditura në këto vargje do të dëshironit t’i zhvillonit më tërësisht? Përse?

Kërkojini një studenti të lexojë me zë të lartë Doktrinën e Besëlidhjet 4:7, ndërkohë që klasa heton për mënyrën se si mund t’i kërkojmë dhe zhvillojmë këto veti.

• Çfarë do të thotë të “kërkoni” dhe të “trokisni”?

• Si mendoni se lutja mund të na ndihmojë që të zhvillojmë veti hyjnore?

Për ta mbyllur mësimin, ju mund të dëshironi t’i ftoni studentët që të dëshmojnë për bekimet që kanë marrë, teksa kanë ndihmuar në veprën e Zotit.

Komente dhe Informacion për Rrethanat

Doktrina e Besëlidhje 4. Udhëzim atyre që dëshirojnë të shërbejnë në Kishë

Presidenti Jozef Filding Smith, i Presidencës së Parë, shpalli:

“[Doktrina e Besëlidhje 4] është shumë e shkurtër, vetëm shtatë vargje, por përmban këshillë dhe udhëzim të mjaftueshëm për një jetë të tërë studimi. Askush nuk e ka arritur akoma zotërimin e saj. Nuk kishte për qëllim të ishte një zbulesë vetjake për Jozef Smithin, por që të ishte përfituese për të gjithë ata që dëshirojnë të hyjnë në shërbim të Perëndisë. Është një zbulesë për çdo anëtar të Kishës, veçanërisht të gjithë ata që mbajnë Priftërinë. Ndoshta nuk ka asnjë zbulesë tjetër në të gjitha shkrimet tona të shenjta, e cila mishëron udhëzim më të madh lidhur me mënyrën e cilësimit të anëtarëve të Kishës për shërbimin e Perëndisë, dhe në një formë të tillë të përmbledhur, se sa kjo zbulesë. Ajo është po aq e gjerë, aq e lartë dhe aq e thellë sa përjetësia. Asnjë plak i Kishës nuk cilësohet për të dhënë mësim në Kishë ose për t’ia çuar mesazhin e Shpëtimit botës, derisa ai ta ketë përfshirë brenda vetes, të paktën pjesërisht, këtë udhëzim të dërguar nga qielli” (Church History and Modern Revelation, 2 vëll. [1953], 1:35).

Ide Shtesë për Mësimdhënien

Doktrina e Besëlidhje 4:5–7. Zhvillimi i vetive hyjnore

Veprimtaria vijuese mund t’i ndihmojë studentët të përsiatin për vetitë hyjnore që tashmë i kanë dhe për ato që dëshirojnë t’i fitojnë. Jepini secilit student një kopje të vetëvlerësimit vijues, ose paraqiteni atë në tabelë. Ftojini studentët ta lexojnë në heshtje secilin zë të vlerësimit, të vendosni se sa e vërtetë është për ta secila thënie dhe të zgjedhin përgjigjen më të përshtatshme nga kyçi i përgjigjes. Ftojini ata t’i shkruajnë përgjigjet e tyre në fletoret e klasës ose ditarët e tyre të studimit të shkrimeve të shenjta apo në kopjet e tyre individuale të vlerësimit. Kujtojini ata se rritja shpirtërore është një proces i përshkallëzuar, kështu që ata duhet të presin që ta vlerësojnë veten e tyre më mirë në disa zëra se sa në të tjerët.

Pasi të kenë pasur kohë të mjaftueshme, merrni parasysh t’u kërkoni disa studentëve që të tregojnë atë që kanë mësuar nga kjo veprimtari. Kërkojuni studentëve të shkruajnë një ose dy fjali rreth njërës veti që do të dëshironin ta zhvillonin më tërësisht.

Kyçi i Përgjigjes

1 = kurrë 2 = nganjëherë 3 = shpesh 4 = pothuajse gjithmonë 5 = gjithmonë

Besimi

1. ____ Unë besoj tek Ati Qiellor dhe Jezu Krishti.

2. ____ Unë e mirëbesoj Atin Qiellor aq sa ta pranoj vullnetin e Tij dhe të bëj çfarëdo që Ai kërkon.

3. ____ Unë e kam besimin e nevojshëm që më ndihmon të bëj që gjëra të mira të ndodhin në jetën time dhe në jetën e të tjerëve.

4. ____ Unë kam mjaft besim te Jezu Krishti që të marr përgjigje për lutjet e mia.

Shpresa

1. ____ Një nga dëshirat e mia më të mëdha është të trashëgoj jetë të përjetshme në mbretërinë çelestiale të Perëndisë.

2. ____ Unë ndihem plot paqe dhe optimizëm rreth së ardhmes.

3. ____ Unë besoj vendosmërisht se një ditë do të banoj me Perëndinë dhe do të bëhem si Ai.

Dashuria Hyjnore dhe Dashuria

1. ____ Unë ndiej një dëshirë të sinqertë për mirëqenien dhe lumturinë e përjetshme të njerëzve të tjerë.

2. ____ Kur lutem, unë kërkoj për dashuri hyjnore – dashurinë e pastër të Krishtit.

3. ____ Unë përpiqem t’i ndihmoj njerëzit e tjerë kur ata po hasin vështirësi ose shkurajim.

4. ____ Unë kërkoj mundësi për t’u shërbyer njerëzve të tjerë.

Me Syrin Drejtuar te Lavdia e Perëndisë

1. ____ Unë i përqendroj përpjekjet e mia te gjërat e Perëndisë në vend të gjërave të botës.

2. ____ Unë i përqendroj mendimet e mia te gjërat e Perëndisë në vend të gjërave të botës.

3. ____ Unë bëj gjëra të mira ngaqë e dua Perëndinë dhe jo ngaqë dëshiroj t’iu bëj përshtypje të tjerëve.

Virtyti

1. ____ Unë jam i pastër dhe i kulluar në zemër.

2. ____ Unë jam i besueshëm – unë bëj atë që them se do ta bëj.

3. ____ Unë përqendrohem në mendime të drejta, lartësuese dhe i largoj nga mendja ime mendimet e padobishme.

4. ____ Unë pendohem për mëkatet e mia dhe përpiqem t’i kapërcej dobësitë e mia.

Dituria

1. ____ Unë ndihem vetëbesues në kuptueshmërinë time për doktrinat dhe parimet e ungjillit.

2. ____ Unë i studioj shkrimet e shenjta çdo ditë.

3. ____ Unë marr dituri dhe udhërrëfim nëpërmjet Shpirtit.

Vetëkontrolli

1. ____ Unë e jetoj Fjalën e Urtësisë, siç përmblidhet te DeB 89.

2. ____ Unë e kontrolloj atë që mendoj, them dhe bëj, edhe në situata të ndera ose nervozuese.

3. ____ Unë i baraspeshoj me sukses detyrat e shkollës, kohën me familjen, thirrjet e Kishës dhe jetën shoqërore.

Durimi

1. ____ Unë kam durim me veten time dhe mbështetem te Zoti, ndërkohë që punoj për t’i mposhtur dobësitë e mia.

2. ____ Unë kam durim me gabimet dhe dobësitë e të tjerëve.

3. ____ Unë i përballoj problemet dhe sfidat me qetësi e shpresë.

Mirësia Vëllazërore

1. ____ Unë jam i mirë me të tjerët, edhe kur ata mund të mos e meritojnë atë.

2. ____ Unë them gjëra pozitive rreth të tjerëve.

3. ____ Unë tregoj vëmendje ndaj ndjenjave të të tjerëve.

Perëndishmëria

1. ____ Unë e di se Ati Qiellor jeton dhe dëshiroj të jem si Ai.

2. ____ Unë përpiqem të jem si Ati Qiellor dhe Jezu Krishti në gjithçka që mendoj, them dhe bëj.

Përulësia

1. ____ Unë jam sinqerisht mirënjohës për bekimet që marr nga Ati Qiellor.

2. ____ Lutjet e mia janë të çiltra dhe domethënëse.

3. ____ Unë e vlerësoj këshillën dhe udhërrëfim nga udhëheqësit, mësuesit dhe prindërit e mi.

4. ____ Unë përpiqem t’i nënshtrohem vullnetit të Atit Qiellor, cilido qoftë ai.

Zelli

1. ____ Unë punoj me efektshmëri, edhe kur nuk jam nën shtytje ose nën mbikëqyrje të afërt.

2. ____ Unë i përqendroj përpjekjet e mia te gjërat më të rëndësishme.

3. ____ Unë punoj shumë derisa një punë mbarohet me sukses.