Mësimi 60
Doktrina e Besëlidhje 56
Hyrje
Ezra Thajri u caktua të jetonte e punonte, së bashku me Jozef Smith Plakun, në fermën e Frederik G. Uilliamit në Kirtland të Ohajos. Vëllai Thajr gjithashtu ndihmoi që të paguante për një pjesë të borxhit për pronësinë e tokës. Në fillim të qershorit 1831 ai dhe Tomas B. Marshi u thirrën në një mision për në Misuri (shih DeB 52:22). Për shkak të krenarisë dhe egoizmit, Vëllai Thajr ishte i papërgatitur që të largohej me Vëllanë Marsh. Në zbulesën e shënuar te Doktrina e Besëlidhje 56, e marrë më 15 qershor, Zoti ia anuloi thirrjen Vëllait Thajr dhe caktoi një shoqërues të ri për Vëllanë Marsh. Zoti paralajmëroi kundër krenarisë dhe i mësoi shenjtorët që Ai ka ruajtur më shumë bekime për ta sesa tokë dhe para.
Sugjerime për Mësimdhënien
Doktrina e Besëlidhje 56:1–13
Zoti ia anulon thirrjen e misionit Ezra Thajrit dhe e paralajmëron atë të pendohet
Pyetini studentët nëse njohin dikë që hoqi dorë nga diçka e rëndësishme me qëllim që t’i bindej njërit nga urdhërimet e Zotit. (Shembujt mund të përfshijnë dikë që sakrifikoi për t’u bashkuar me Kishën, për të shkuar në një mision apo për t’iu bindur standardeve të caktuara të Kishës.) Ftojini disa studentë të tregojnë shembujt e tyre.
Shpjegoni se në qershorin e vitit 1831 Zoti e thirri Ezra Thajrin që të shërbente një mision në Misuri me Tomas B. Marshin. Shqetësimet e Vëllait Thajr lidhur me pronën dhe paratë, e bënë atë të ishte i papërgatitur që të largohej kur Vëllai Marsh ishte gati, kështu që Vëllai Marsh shkoi te Jozef Smithi që ta pyeste se çfarë të bënte. Kur Profeti i kërkoi Zotit, Zoti iu përgjigj atij me zbulesën e shënuar te Doktrina e Besëlidhje 56.
Ftojeni një student të lexojë me zë të lartë Doktrinën e Besëlidhjet 56:1–2. Vëreni klasën ta ndjekë duke kërkuar atë që Zoti tha rreth atyre që nuk pranojnë t’u binden urdhërimeve të Tij.
-
Çfarë tha Zoti rreth atyre njerëzve që nuk pranojnë t’u binden urdhërimeve të Tij?
Shkruajeni në tabelë thënien e paplotë vijuese: Që të shpëtohemi, ne duhet …
Ftojini studentët ta plotësojnë thënien sipas vargut 2. Studentët mund të përdorin fjalë të ndryshme, por ata duhet të përcaktojnë parimin vijues: Që të shpëtohemi, ne duhet ta marrim kryqin tonë, ta ndjekim Shpëtimtarin dhe t’i zbatojmë urdhërimet e Tij. (Plotësojeni parimin në tabelë.)
-
Si mendoni, çfarë do të thotë ta “marr[im] kryqin [tonë]”? (Për t’i ndihmuar studentët ta kuptojnë këtë frazë, ju mund të doni t’i ftoni ata që të lexojnë Përkthimin prej Joseph Smith-it të Mateut 16:24, që gjendet te Mateu 16:24, poshtëshënimi e në Biblën në anglisht.)
-
Çfarë urdhërimesh ka dhënë Zoti, të cilat kërkojnë që ju ta merrni kryqin tuaj dhe të bëni sakrifica që të jeni të bindur? (Disa shembuj mund të gjenden te broshura Për Forcën e Rinisë.)
-
Çfarë bekimesh keni marrë ose do t’i merrni ngaqë zgjidhni të jeni të bindur?
Pyesni në çfarë mënyrash njerëzit në shembujt vijues mund t’i kishin marrë kryqet e tyre dhe t’u bindeshin urdhërimeve të Zotit:
-
Një i ri po i afrohet moshës kur do të jetë në gjendje të shërbejë në një mision. Ai shqetësohet rreth gjithçkaje që do të lërë pas kur ai shërben.
-
Një e re e di se rinia në lagjen e saj do të vizitojë tempullin pas pak muajsh, por ajo nuk e ka një rekomandim tempulli. Ka diçka në jetën e saj pikërisht tani që do ta pengojë atë prej marrjes së një rekomandimi.
Shpjegoni që, nëse zgjedhim të mos e marrim kryqin tonë, ne mund t’i humbasim mundësitë për t’i bekuar të tjerët dhe për të marrë bekime për veten tonë. Ftojeni një student të lexojë me zë të lartë Doktrinën e Besëlidhjet 56:3–5. Vëreni klasën të kërkojë atë që ndodhi ngaqë Ezra Thajri nuk ishte gati që të shkonte në Misuri. Përpara se të lexojnë studentët, ju mund të doni të shpjegoni se fjala anuloj do të thotë të marrësh mbrapsht ose të heqësh.
-
Çfarë humbi Ezra Thajri ngaqë nuk ishte gati të shkonte? (Ai e humbi mundësinë e tij për të shërbyer në mision, si edhe për të marrë bekimet që do të kishin rrjedhur.)
-
Sipas vargut 4, çfarë mund të bëjë Zoti me urdhërimet që i jep Ai? (Studentët duhet të përcaktojnë parimin vijues: Zoti mund ta japë një urdhërim ose ta anulojë një urdhërim siç e sheh Ai të përshtatshme.)
Kërkojuni studentëve nëse mund të mendojnë për shembuj nga shkrimet e shenjta ose historia e Kishës për Zotin duke dhënë dhe më pas duke e anuluar një urdhër. Sa vijojnë janë pak shembuj:
-
Pasi Zoti i ofroi një ligj më të lartë Moisiut dhe popullit të tij, fëmijët e Izraelit ngritën krye dhe filluan të adhuronin një viç të artë. Atëherë Zoti u dha atyre një ligj më të ulët. (Shih Eksodi 32–34; Përkthimi prej Joseph Smith-it, Eksodi 34:1–2; DeB 84:23–27.)
-
Gjatë shërbesës të Shpëtimtarit në vdekshmëri, Ai i dërgoi Apostujt vetëm te pjesëtarët e shtëpisë së Izraelit (shih Mateu 10:5). Pak kohë pas Ringjalljes së Shpëtimtarit, Ai u tha Apostujve që t’ua predikonin ungjillin njerëzve të të gjitha kombeve (shih Mateu 28:19).
-
Në këtë periudhë ungjillore, Zoti i urdhëroi disa nga shenjtorët e hershëm të praktikonin martesën me më shumë se një grua. Profeti Jozef Smith dhe shumë nga udhëheqësit e tjerë të Kishës e patën të vështirë këtë urdhërim, por ata iu bindën atij. Pasi mori zbulesë, Presidenti Uillford Udraf nxori Manifestin, i cili u pranua nga Kisha si autoritar dhe detyrues më 6 tetor 1890. Kjo çoi në përfundimin në Kishë të praktikës së martesës me më shumë se një grua (shih Deklarata Zyrtare 1).
Përmblidheni Doktrinën e Besëlidhjet 56:6–7 duke shpjeguar se Zoti gjithashtu i ndryshoi thirrjet e misionit për Sila J. Grifinin dhe Njull Najtin. Kujtojini studentët se, për shkak të vështirësive të shkaktuara nga Liman Kopli në Tomson të Ohajos, shenjtorët e Kollsvillit u drejtuan që të lëviznin për në Misuri. Ata i kërkuan Profetit Jozef Smith nëse mund ta bënin lëvizjen me Njull Najtin duke i udhëhequr, siç i kishte udhëhequr që kur u larguan nga Kollsvilli. Njull Najti ishte thirrur që të shërbente me Sila J. Grifinin përpara këtyre vështirësive (shih DeB 52:32), kështu që Zoti e drejtoi Silla J. Grifinin që të zinte vendin e Ezra Thajrit si shoqëruesi i Tomas B. Marshit dhe Njull Najtin të qëndronte me shenjtorët e Kollsvillit.
Ftojeni një student të lexojë me zë të lartë Doktrinën e Besëlidhjet 56:8–11. Vëreni klasën ta ndjekë duke kërkuar atë që Zoti e urdhëroi Ezra Thajrin të bënte pasi u anulua thirrja e tij e misionit.
-
Çfarë tha Zoti se do të ndodhte nëse Ezra Thajri pendohej? Çfarë do të ndodhte nëse ai nuk pendohej?
Shpjegoni se Ezra zgjodhi të pendohej dhe shtatë muaj më vonë ai u thirr përsëri të shërbente si misionar me Tomas B. Marshin (shih DeB 75:31).
Doktrina e Besëlidhje 56:14–20
Zoti i paralajmëron shenjtorët kundër lakmisë dhe zemrave krenare
Kërkojuni studentëve të përfytyrojnë sikur kanë një shok që ka mëkatuar dhe ndihet keq. Shoku vjen tek ata dhe pyet: “Çfarë nevojitet të bëj që të pendohem?” Jepuni studentëve kohë për të përsiatur dhe për t’u përgjigjur. Pasi të përgjigjen, ftojeni një student të lexojë me zë të lartë Doktrinën e Besëlidhjet 56:14–15. Vëreni klasën ta ndjekë duke kërkuar sjelljet dhe veprimet që i pengojnë mëkatet tona për të marrë falje ose për t’u falur.
-
Sipas Doktrinës e Besëlidhjeve 56:14–15 cilat sjellje ose veprime i bëjnë mëkatet tona të mos marrin falje ose të mos falen?
-
Çfarë mendoni se do të thotë fraza “të këshilloni sipas mënyrave tuaja”? Çfarë sugjeron fraza “zemrat tuaja nuk kënaqen”? (Ajo nënkupton moskënaqjen me atë që keni.)
-
Çfarë mund të mësojmë nga vargjet 14 e 15 rreth asaj që është e nevojshme me qëllim që të pendohemi dhe të marrim falje? (Studentët mund të përcaktojnë një larmi parimesh, por sigurohuni të theksoni të vërtetën vijuese: Pendimi përfshin bindjen ndaj këshillës së Zotit dhe largimin prej dëshirave të padrejta. Ju mund të dëshironi t’i ftoni studentët ta shkruajnë këtë të vërtetë në shkrimet e tyre të shenjta pranë Doktrinës e Besëlidhjeve 56:14–15.)
-
Përse janë bindja dhe largimi prej padrejtësisë të domosdoshme në pendimin e vërtetë?
Shpjegoni se pendimi nuk është thjesht rreth ndjekjes së një renditjeje hapash, por kërkon një ndryshim të plotë të zemrës – një zotim për t’iu bindur Zotit dhe një largim nga gjithë padrejtësia. Kur u mor kjo zbulesë, duket se egoizmi dhe krenaria e Ezra Thajrit po e pengonin atë që t’i bindej këshillës së Zotit.
-
Si mund ta ndikojë krenaria e një personi aftësinë e tij ose të saj për të pasur një zemër të penduar?
Ftojini studentët të lexojnë me një partner Doktrinën e Besëlidhjet 56:16–17. Vëreni njërin partner të kërkojë mënyrën se si një zemër e papenduar mund të shfaqet tek dikush që është i pasur. Vëreni partnerin tjetër të kërkojë mënyrën se si një zemër e papenduar mund të shfaqet te dikush që është i varfër. Ju mund të sugjeroni që ata ta shenjojnë atë që gjejnë. Vërini studentët t’ua shpjegojnë atë që zbuluan partnerëve të tyre dhe më pas të diskutojnë së bashku pyetjet vijuese (ju mund të dëshironi t’i shkruani ato në tabelë):
-
Çfarë ngjashmërish mund të shihni në zemrat e papenduara të të pasurve si edhe të të varfërve?
-
Përse mund të jetë lakmia një tipar i përbashkët si tek të pasurit ashtu edhe tek të varfrit?
Kërkojuni studentëve të përsiatin se kur mund t’i kenë parë këto lloj sjelljesh të shfaqen në jetën e tyre ose në jetën e njerëzve që ata i njohin.
Ftojeni një student të lexojë me zë të lartë Doktrinën e Besëlidhjet 56:18. Vëreni klasën ta ndjekë duke kërkuar fjalët që përshkruajnë zemrat e atyre që do të bekohen.
-
Sipas vargut 18, si duhet të jenë zemrat tona? Çfarë do të thotë të kesh një zemër të thyer? Çfarë do të thotë të kesh një shpirt të penduar? (Këto terma nënkuptojnë përulësi dhe nënshtrim ndaj Zotit.)
-
Nëse zemrat tona kanë qenë lakmitare ose krenare, si mund të ndryshojmë?
Ftojini studentët të vazhdojnë të lexojnë me partnerët e tyre Doktrinën e Besëlidhjet 56:19–20. Vërini të kërkojnë bekimet që Zoti u premtoi atyre që kanë zemra të përulura. Ju mund të sugjeroni që ta shenjojnë atë që gjejnë.
Shkruajeni në tabelë thënien e paplotë vijuese: Ata që kanë zemra të përulura, do të …
-
Sipas vargjeve 18–20, cilat bekime e plotësojnë fjalinë në tabelë? (Ndërkohë që studentët i përcaktojnë bekimet e përmendura në këto vargje, shkruajini ato në tabelë. Ju mund të keni nevojë të shpjegoni se fjala shpërblim u drejtohet përfitimeve për veprimet e mira dhe ndëshkimit për veprimet e padrejta.)
Shpjegoni se sipas ligjit të përkushtimit, pjesa e dhënë një individi ose një familjeje në përputhje me rrethanat e tyre, u quajt një “trashëgimi” (DeB 57:7). Ka mundësi që gjatë zbatimit të hershëm të këtij ligji, disa shenjtorë, sikurse Ezra Thajri, u shqetësuan shumë rreth marrjes së “trashëgimisë” së tyre.
Shkruajini fjalët Trashëgimia Ime pranë bekimeve të renditura në tabelë.
-
Nga ato që kemi renditur, si do t’i përmblidhnit bekimet që Zoti i ka ruajtur për ata që kanë zemra të përulura? (Studentët mund të përdorin fjalë të ndryshme, por ata duhet të përcaktojnë parimin vijues: Ata që kanë zemra të përulura, do të trashëgojnë tokën.)
-
Si krahasohen bekimet e përshkruara në vargjet 18–20 me pronësinë dhe paratë për të cilat Ezra Thajri dhe shenjtorët e tjerë të hershëm mund të kenë qenë të shqetësuar?
Dëshmoni për bekimet ose “trashëgiminë” që Zoti ka në ruajtje për ne kur ia mohojmë vetvetes padrejtësinë dhe zotohemi që t’i ndjekim urdhërimet e Tij.
Komente dhe Informacion për Rrethanat
Doktrina e Besëlidhje 56:2. Marrja e kryqit tonë dhe ndjekja e Zotit si misionarë
Presidenti Ezra Taft Benson foli për atë që pritet nga djemtë e rinj për të sakrifikuar gjithçka që është e nevojshme për të shërbyer në një mision:
“Lidhur me shërbimin e një misioni, Presidenti [Spenser W.] Kimball ka thënë: ‘Sa egoiste dhe e pamend do të ishte për një të ri duke u rritur drejt pjekurisë, që ta harxhojë kohën e vet duke u përgatitur për punën dhe zanatin e jetës së tij dhe të mos ketë dëshirë t’i shërbejë Krijuesit të tij në këtë gjë, shërbimin më të rëndësishëm në botë’ (seminar për Përfaqësuesit Krahinorë, 30 shtator 1977). …
Të rinj, kjo thënie e Presidentit Kimball duhet të jetë motoja juaj vetjake: ‘Çdo mashkull shdm, i cili është i denjë dhe i aftë, duhet të përmbushë një mision’ (Ensign, maj 1974, f. 87). Ne ju kërkojmë që ta bëni sakrificën. E quajmë të tillë ngaqë dëshirojmë një emër më të mirë për të. Ajo është një investim. Përfshihuni në këtë gjë, shërbimin më të madh në botë. Mos i bëni bisht përgjegjësisë. Mos kundërshtoni me ndërgjegje. Ne ju ftojmë të bashkoheni me ushtrinë … që po shtohet në numër çdo ditë. Detyra juaj do të jetë t’i shpallni botës mesazhin e Rivendosjes. Dijeni se keni mirëbesimin dhe dashurinë tonë. Ne presim që ju ta kryeni atë mision” (“This Is a Day of Sacrifice”, Ensign, maj 1979, f. 33).
Doktrina e Besëlidhje 56:4. Zoti urdhëron dhe anulon
Presidenti Bojd K. Paker, i Kuorumit të Dymbëdhjetë Apostujve, dha ide rreth mënyrës se si Zoti nganjëherë e ndryshon drejtimin e dhënë Kishës. Presidenti Paker i nxiti anëtarët që të mirëbesojnë në procesin e zbulesës së dhënë Apostujve dhe t’i pranojnë ndryshimet në praktikat e procedurat kur ato zbulohen:
“Ndryshimet në organizim ose procedura janë një dëshmi që zbulesa është e vazhdueshme. Ndërkohë që doktrinat mbeten të pandryshuara, metodat ose procedurat nuk mbeten. …
Plani i ungjillit u zbulua rresht pas rreshti, parim pas parimi, pak këtu dhe pak atje. Dhe vazhdon: ‘Ne besojmë se Ai përsëri do të zbulojë shumë gjëra të mëdha dhe të rëndësishme lidhur me Mbretërinë e Perëndisë’. (Nenet e Besimit 1:9.)
Do të bëhen ndryshime në të ardhmen sikurse u bënë në të shkuarën. Nëse Vëllezërit bëjnë ndryshime ose i kundërshtojnë ato, varet tërësisht nga udhëzimet që ata i marrin nëpërmjet kanaleve të zbulesës, të cilat u themeluan që në fillim.
Doktrinat do të mbeten të përcaktuara, të përjetshme; organizimi, programet dhe procedurat do të ndryshohen siç drejtohet nga Ai kisha e të cilit kjo është. …
Dhe në përfundim, ajo që jepet vjen ngaqë Zoti e ka thënë atë, ‘qoftë nëpërmjet zërit [të Tij] apo nëpërmjet zërit të shërbëtorëve të [Tij] është njësoj’. (DeB 1:38.) Ne e njohim zërin e Tij kur Ai flet” (“Revelation in a Changing World”, Ensign, nëntor 1989, f. 15, 16).
Doktrina e Besëlidhje 56:14–15. Të falemi për mëkatin
Plaku D. Tod Kristoferson, i Kuorumit të Dymbëdhjetë Apostujve, theksoi rezultatet e të përjetuarit të një ndryshimi të plotë të zemrës nëpërmjet pendimit:
“Pendimi kërkon seriozitet në qëllim dhe gatishmëri për të këmbëngulur, madje edhe përmes dhembjes. Përpjekjet për të krijuar një listë të hapave të veçantë për pendim, mund të jenë të dobishme për disa, por kjo gjithashtu mund të çojë në një trajtim mekanik e formal, pa ndjenjë ose ndryshim të vërtetë. Pendimi i vërtetë nuk është sipërfaqësor. …
Me besim te Shëlbuesi i mëshirshëm dhe fuqia e Tij, dëshpërimi i mundshëm kthehet në shpresë. Ndryshojnë pikërisht zemra dhe dëshirat e dikujt dhe, mëkati dikur tërheqës, bëhet gjithnjë e më i neveritshëm. Një vendosmëri e fortë për të hequr dorë e braktisur mëkatin dhe për të ndrequr sa më plotësisht që mundet dëmin që ka shkaktuar, zhvillohet tani në atë zemër të re. Kjo vendosmëri shpejt piqet për t’u bërë një besëlidhje e bindjes ndaj Perëndisë. Me vendosjen e asaj besëlidhjeje, Fryma e Shenjtë, lajmëtari i hirit hyjnor, do të sjellë lehtësim dhe falje” (“Dhurata Hyjnore e Pendimit”, Ensign ose Liahona, nëntor 2011, f. 40).
Doktrina e Besëlidhje 56:19. Zoti do të sjellë shpërblim për të përulurin në zemër
Thënia vijuese nga Plaku Jozef B. Uirthlin, i Kuorumit të Dymbëdhjetë Apostujve, na mëson parimin e dëmshpërblimit, i cili përfshihet në premtimin e shpërblimit nga Shpëtimtari:
“Zoti i dëmshpërblen besnikët për çdo humbje. Ajo që u merret atyre që e duan Zotin, do t’iu shtohet atyre sipas mënyrës së Tij. Edhe pse mund të mos vijnë në kohën që e dëshirojmë, besnikët do ta dinë se çdo lot i sotëm, do të rikthehet më së fundi njëqindfish me lot gëzimi dhe mirënjohjeje” (“Le të Ndodhë Ç’të Ndodhë, Duaje Atë”, Ensign ose Liahona, nëntor 2008, f. 27, 28).