Mësimi 93: Doktrina e Besëlidhje 88:70–117

Mësimi 93

Doktrina e Besëlidhje 88:70–117

Hyrje

Ky është mësimi i tretë i katër mësimeve nga Doktrina e Besëlidhje 88. Pjesa e zbulesës në të cilën do të përqendrohet mësimi, u dha në një konferencë të priftërinjve të lartë më 27–28 dhjetor 1832. Në të Zoti i udhëzoi pleqtë e Kishës që ta mësonin njëri-tjetrin dhe të përgatiteshin për të shërbyer si misionarë. Zoti gjithashtu na mësoi lidhur me shenjat e Ardhjes së Dytë, rendin e përgjithshëm në të cilin do të ringjallen të gjithë njerëzit dhe disa prej ngjarjeve që do ta rrethojnë betejën përfundimtare me Satanin.

Sugjerime për Mësimdhënien

Doktrina e Besëlidhje 88:70–117

Zoti i urdhëron pleqtë e Kishës që të përgatiten për shërbesën e tyre dhe zbulon ngjarjet përreth Ardhjes së Tij të Dytë

Ftojeni një student të dalë përpara klasës dhe t’i mësojë një studenti tjetër mënyrën se si ta bëjë një detyrë të thjeshtë, të tillë si lidhjen e një kravate (ose një detyrë tjetër që studenti i dytë nuk di se si ta bëjë). Kërkojuni studentëve ta ngrenë dorën nëse kanë ndihmuar t’ia mësojnë një mësim apo një aftësi një njeriu tjetër kohët e fundit. Kërkojuni disa studentëve të përshkruajnë atë që e dhanë mësim. Më pas diskutoni për pyetjet vijuese:

Çfarë mësuat nga përgatitja për të dhënë mësim dhe nga të mësuarit e dikujt tjetër?
Përse mendoni se ne shpesh mësojmë më shumë nga përgatitja për të dhënë mësim, sesa kur na jepet mësim nga të tjerët?

Kujtojini studentët se Zoti ia dha zbulesën te Doktrina e Besëlidhje 88 një grupi të mbajtësve të priftërisë, të cilët ishin lutur të dinin vullnetin e Zotit lidhur me ngritjen e Sionit. Në këtë zbulesë, Zoti iu referua këtij grupi të mbajtësve të priftërisë si “punëtorët e parë në këtë mbretëri të fundit” (shih DeB 88:70, 74) dhe i urdhëroi të organizonin e të frekuentonin një shkollë për ta përgatitur vetveten që të predikonin ungjillin mes kombeve të tokës (shih DeB 88:74, 84, 127).

Ftojeni një student ta lexojë me zë të lartë Doktrinën e Besëlidhjet 88:73–76. Vëreni klasën ta ndjekë, duke kërkuar atë që Zoti i urdhëroi këta mbajtës të priftërisë të bënin për t’u përgatitur që t’iu jepnin mësim të tjerëve.

Çfarë u urdhëruan të bënin këta “punëtorë [të] parë” për t’u përgatitur që t’iu jepnin mësim të tjerëve si misionarë? (Ju mund të doni t’i kërkoni një studenti që të veprojë si shkrues dhe t’i shkruajë përgjigjet e studentëve në tabelë.)
Çfarë mund të bënim që të “organizohe[shim]”, “përgatite[shim]” dhe “shenjtërohe[shim]” për t’u bërë më të efektshëm në shpërndarjen e ungjillit?
Si ndikon të qenit të pastruar nga mëkati në aftësinë tonë për ta shpërndarë ungjillin?

Ftojeni një student ta lexojë me zë të lartë Doktrinën e Besëlidhjet 88:77–80. Vëreni klasën ta ndjekë, duke kërkuar atë që Zoti i urdhëroi këta mbajtës të priftërisë të bënin kur mblidheshin së bashku. Kërkojuni studentëve të raportojnë atë që gjetën.

Çfarë u premtoi Zoti atyre që japin mësim me zell? (Se hiri i Tij do të jetë me ta dhe se ata do të mësohen në mënyrë më të përsosur në gjithçka që iu nevojitej të kuptonin për sa i përket mbretërisë së Perëndisë.)
Çfarë do të thotë që “hiri [i Zotit] do të jetë me ju” (DeB 88:78)? (Zoti do të na ndihmojë kur përpiqemi me zell ta japim mësim dhe ta mësojmë për veten tonë ungjillin.)
Nga ajo që mësuat te vargjet 77–78, si do ta shprehnit një parim rreth mësimdhënies? (Studentët mund të përcaktojnë një mori parimesh, përfshirë sa vijon: Ndërsa i japim mësim njëri-tjetrit me zell, Zoti do të na ndihmojë t’i kuptojmë të vërtetat e Tij në mënyrë më të përsosur. Nëpërmjet të mësuarit të njëri-tjetrit, ne mund të përgatitemi për të folur për ungjillin me të tjerët. Ju mund të doni t’i shkruani këto parime në tabelë duke përdorur fjalët e studentëve.)
Në çfarë mënyrash ju ka ndihmuar mësimdhënia e ungjillit të tjerëve që ta kuptoni më mirë atë?
Sipas vargut 79, çfarë temash të tjera janë të rëndësishme për ne që t’i kuptojmë? Në ç’mënyrë mund të na ndihmojë të fituarit e një njohurie të tillë, të gjerë, që t’ua mësojmë të tjerëve ungjillin?

Për t’i ndihmuar studentët ta ndiejnë rëndësinë e parimeve që përcaktuan më lart, dhe t’i vënë në jetë ato, caktoni grupe me nga katër studentë që t’i përgatitin dhe t’ua mësojnë mësimet e vogla vijuese pjesëtarëve të grupit të tyre. Kërkojuni dy studentëve në secilin grup të punojnë së bashku për t’u përgatitur që të japin mësim Doktrinën e Besëlidhjet 88:81–86 dhe kërkojuni dy studentëve të tjerë të punojnë së bashku për t’u përgatitur që të japin mësim Doktrinën e Besëlidhjet 88:87–98. Bëni kopje të udhëzimeve vijuese për secilin grup. Kërkojuni atyre që t’i lexojnë udhëzimet dhe vargjet e shkrimeve të shenjta deri në fund dhe më pas të vendosin se si do ta japin secilin mësim të shkurtër. (Nxitini që të dy studentët në secilën dyshe që të marrin pjesë në mësimdhënien.) Shpjegoni se secila dyshe do të ketë rreth pesë minuta kohë për t’u përgatitur dhe rreth shtatë minuta për të dhënë mësim. Pasi studentët të kenë pasur kohë të mjaftueshme për t’u përgatitur, ftojini dyshet e caktuara për Doktrinën e Besëlidhjet 88:81–86 që t’iu japin mësim studentëve të tjerë në grupet e tyre. Më pas kërkojuni studentëve të shkëmbejnë rolet dhe ftojini dyshet e caktuara për Doktrinën e Besëlidhjet 88:87–98 të japin mësim. (Shënim: Nëse e parapëlqeni, ju mund të zgjidhni t’i jepni mësimet e shkurtra vetë, në vend që t’u kërkoni studentëve që t’i japin mësim njëri-tjetrit.)

Mësimi i Shkurtër 1: Doktrina e Besëlidhje 88:81–86

Fillojeni mësimin tuaj me pyetjen vijuese:

Kur keni qenë mirënjohës ngaqë dikush ju paralajmëroi rreth diçkaje? (Ju mund të doni edhe të tregoni për një përvojë.)

Ftojeni një student ta lexojë me zë të lartë Doktrinën e Besëlidhjet 88:81–83. Vërini të tjerët të kërkojnë atë që Zoti na e mësoi rreth paralajmërimeve. Ftojini ata të raportojnë atë që gjetën. Më pas bëni pyetjet vijuese:

Çfarë do të thotë që jemi paralajmëruar? (Ne na janë mësuar të vërtetat e ungjillit të rivendosur të Jezu Krishtit.)
Çfarë të vërtete mund të mësojmë nga këto vargje? (Ata, të cilëve iu jepni mësim, mund të përdorin fjalë të ndryshme, por duhet të përcaktojnë një parim të ngjashëm me sa vijon: Ngaqë jemi paralajmëruar nëpërmjet mesazhit të ungjillit, Zoti pret që ne t’i paralajmërojmë të afërmit tanë. Ju mund të doni të sugjeroni që studentët ta shenjojnë këtë parim te vargu 81.)

Përmblidheni Doktrinën e Besëlidhjet 88:84–85 duke shpjeguar se Zoti i udhëzoi mbajtësit e priftërisë, të cilët ishin të pranishëm kur Jozef Smithi e mori këtë zbulesë, që të punonin me zell për ta përgatitur veten dhe shenjtorët që t’u shpëtonin gjykimeve të ardhshme, që i presin të ligjtë.

Ftojeni një student ta lexojë me zë të lartë Doktrinën e Besëlidhjet 88:86. Vëreni grupin tuaj të kërkojë se si duhet të jetojmë kur përgatitemi për ta shpërndarë ungjillin. Kërkojuni atyre të raportojnë atë që gjetën.

Çfarë do të thotë “mos u përzieni në mëkat”? Si mund të zbatohet ky udhëzim në jetën tuaj kur përgatiteni që të merrni ordinancat e tempullit, që të shërbeni në një mision kohëplotë ose që të martoheni e të keni familje?

Për t’i ndihmuar studentët të mendojnë se si përzierja e tyre me mëkatin mund të ndikonte në aftësinë e tyre për të dëshmuar për të vërtetën, lexojeni thënien vijuese nga Plaku Xhefri R. Holland, i Kuorumit të Dymbëdhjetë Apostujve:

“Asnjë misionar nuk mund t’i ftojë të tjerët të pendohen për shkelje seksuale, gjuhë përdhosëse apo për shikimin e pornografisë nëse nuk është penduar vetë më parë që i ka bërë këto gjëra. Ju nuk mund ta bëni këtë! Shpirti nuk do të jetë me ju dhe fjalët do t’ju ngecin në grykë ndërkohë që i thoni. Ju nuk mund të shtegtoni nëpër ato që Lehi i quajti ‘shtigje të ndaluara’ [1 Nefi 8:28] dhe të prisni që t’i drejtoni të tjerët për te ‘shtegu i ngushtë dhe i ngushtuar’ [2 Nefi 31:18] – nuk mund të bëhet” (“Ne Jemi të Gjithë të Rekrutuar”, Ensign ose Liahona, nëntor 2011, f. 45).

Ju mund të doni të jepni dëshminë tuaj për rëndësinë e të qëndruarit të pastër me qëllim që të jeni të efektshëm në shpërndarjen e ungjillit. Nxitini ata, të cilëve po iu jepni mësim, që të përpiqen të jenë të pastër nga përzierja me mëkatin.

Mësimi i Shkurtër 2: Doktrina e Besëlidhje 88:87–98

Pyetini ata, të cilëve po iu jepni mësim nëse e kanë dëgjuar ndonjëherë dikë të japë një dëshmi të fuqishme. Ftojini ta përshkruajnë dëshminë dhe mënyrën se si u ndien kur e dëgjuan atë.

Ftojeni një student ta lexojë me zë të lartë Doktrinën e Besëlidhjet 88:87–91. Vërini studentët, të cilëve po iu jepni mësim, të kërkojnë shembuj dëshmish të fuqishme. Pasi të lexojnë, bëni pyetjen vijuese:

Përpara Ardhjes së Dytë të Zotit, çfarë lloj dëshmish do t’i ndjekin dëshmitë e misionarëve?

Ftojini studentët, të cilëve po iu jepni mësim, ta lexojnë në heshtje Doktrinën e Besëlidhjet 88:92 dhe të kërkojnë atë që engjëjt e qiellit do të thonë gjatë kësaj kohe përpara Ardhjes së Dytë. Kërkojuni atyre të raportojnë atë që gjetën. Tregojuni atyre se termi Dhëndri i referohet Jezu Krishtit.

Përse është e rëndësishme që të jemi të përgatitur për Ardhjen e Dytë të Zotit?

Ftojeni një student ta lexojë me zë të lartë Doktrinën e Besëlidhjet 88:95–98. Vërini studentët, të cilëve po iu jepni mësim, që të kërkojnë dy grupe të ndryshëm njerëzish, të cilët do të ngrihen lart për t’u takuar me Shpëtimtarin kur Ai të vijë. Më pas bëni pyetjen vijuese:

Cilët do të ngrihen lart për t’u takuar me Jezu Krishtit kur Ai të vijë? (Shenjtorët e Tij që janë gjallë dhe shenjtorët e Tij që kanë vdekur. Ju mund të doni të sugjeroni që studentët, të cilëve po iu jepni mësim, t’i shenjojnë në këto vargje fjalët ose frazat që na mësojnë të vërtetën vijuese: Të drejtët do të ngrihen për ta takuar Krishtin kur Ai të vijë.)

Vërini ata, të cilëve po iu jepni mësim, ta shqyrtojnë Doktrinën e Besëlidhjet 88:98 dhe të kërkojnë fjalë ose fraza që i përshkruajnë grupet e shenjtorëve, të cilët do të marrin pjesë në ardhjen e Zotit. Më pas bëni pyetjen vijuese:

Cilat fjalë ose fraza gjetët? (Ju gjithashtu mund të doni të shpjegoni se fraza “frytet e para” iu referohet shenjtorëve të drejtë që do të vijnë në Ringjalljen e Parë.)

Shprehni se si e përfytyroni që do të ndiheni të jeni pjesë e Ardhjes së Dytë, siç u përshkrua në këto vargje.

Pasi grupet e studentëve t’i kenë dhënë mësim njëri-tjetrit, bëjani pyetjen vijuese të gjithë klasës:

Çfarë mësimesh ju bënë përshtypje në diskutimin tuaj rreth Doktrinës e Besëlidhjeve 88:81–98?

Përmblidheni Doktrinën e Besëlidhjet 88:97–107 duke shpjeguar që Zoti zbuloi se të vdekurit do të ringjallen sipas rendit të tyre të drejtësisë. Ata që ringjallen të parët, do të trashëgojnë mbretërinë çelestiale (shih DeB 88:97–98). Ata që ringjallen të dytët, do të trashëgojnë mbretërinë terrestriale (shih DeB 88:99). Ata që do të trashëgojnë mbretërinë telestiale, do të ringjallen pas Mijëvjeçarit (shih DeB 88:100–101). Më së fundi, ata që “mbeten … të fëlliqur” – ata që kanë jetuar në tokë dhe janë bërë bij të humbjes – do të ringjallen dhe flaken në errësirën e jashtme (shih DeB 88:102). Në fund të njëmijë vjetëve të paqes, të njohura si Mijëvjeçari, Satani dhe pasuesit e tij do të vijnë në betejë kundër popullit të Perëndisë, të udhëhequr nga Mikaeli (ose Adami). Satani dhe pasuesit e tij do të munden dhe do të flaken në errësirën e jashtme.

Tregoni me gisht parimin vijues në tabelë: “Ndërsa e mësojmë njëri-tjetrin me zell, Zoti do të na ndihmojë t’i kuptojmë të vërtetat e Tij në mënyrë më të përsosur”. Më pas bëni pyetjen vijuese:

Si u thellua kuptueshmëria juaj për Doktrinën e Besëlidhjet 88:81–86 ose 88:87–98, kur ia mësuat ato fragmente dikujt tjetër sot?

Nxitini studentët të gjejnë mundësi për t’ua mësuar ungjillin të tjerëve. Dëshmoni për bekimet që do të marrin ngaqë e bëjnë këtë.

Komente dhe Informacion për Rrethanat

Doktrina e Besëlidhje 88:73–76. “Unë do ta përshpejtoj veprën time”

Në tetor të vitit 2012, pak kohë pasi Presidenti Tomas S. Monson shpalli se mosha misionare për të rinjtë dhe të rejat do të ulej, Plaku Xhefri R. Holland, i Kuorumit të Dymbëdhjetë Apostujve, shpjegoi se kjo shpallje ishte një shembull që Perëndia po e përshpejton veprën e Tij:

“Perëndia po e përshpejton veprën e Tij. Dhe Ai ka nevojë për gjithnjë e më shumë misionarë të gatshëm e të denjë që të përhapin dritën e të vërtetën dhe shpresën e shpëtimin e ungjillit të Jezu Krishtit në një botë shpesh të errët e të frikshme. …

… Kjo shpallje … nuk është rreth jush. Është rreth mesazhit të ëmbël e të pastër që po ju kërkohet ta mbartni” (në “Church Lowers Age Requirement for Missionary Service”, Church News, 6 tetor 2012, ldschurchnews.com).

Doktrina e Besëlidhje 88:81–82. Paralajmërimi i të afërmve tanë

Presidenti Henri B. Ajring, i Presidencës së Parë, shpjegoi detyrën tonë si anëtarë të Kishës për të folur për ungjillin me të tjerët:

“Detyra për ta paralajmëruar të afërmin tonë bie mbi të gjithë ne që e kemi pranuar besëlidhjen e pagëzimit. Ne duhet të flasim me miqtë dhe të afërmit tanë joanëtarë rreth ungjillit. Qëllimi ynë është t’i ftojmë ata që të mësohen nga misionarët kohëplotë, të cilët thirren dhe veçohen për të dhënë mësim. …

… Ne duhet … t’i ftojmë me anë të dëshmisë. Dashuria dhe shembulli do ta hapin udhën. Por ne akoma duhet ta hapim gojën dhe ta japim dëshminë. …

Ndoshta disave prej nesh mund t’u duket e vështirë që të besojnë se kemi aq dashuri apo që jeta jonë është aq e mirë, ose që fuqia jonë për të dëshmuar është e mjaftueshme sa që të pranohen ftesat tona drejtuar të afërmve tanë. Por Zoti e dinte se mund të ndiheshim në atë mënyrë. Dëgjojini fjalët e Tij inkurajuese, të cilat Ai udhëzoi që të vendoseshin në fillim të Doktrinës e Besëlidhjeve, kur Ai na e dha detyrën tonë: ‘Dhe zëri i paralajmërimit do të shkojë te gjithë njerëzit prej gojës së dishepujve të mi, të cilët i kam zgjedhur në këto ditë të fundit’ (DeB 1:4).

Dhe më pas, dëgjojeni përshkrimin e Tij për cilësitë e atyre dishepujve – neve: ‘Gjërat e dobëta të botës do të vijnë dhe do të dërrmojnë gjërat e fuqishme dhe të forta’ (DeB 1:19).

Dhe më pas: ‘Që plotësia e ungjillit tim të mund t’u shpallet nga të dobëtit dhe të thjeshtët fundeve të botës’ (DeB 1:23).

Dhe më pas, sërish: ‘Dhe meqenëse janë të përulur, të mund të bëhen të fortë e të bekohen nga lart’ (DeB 1:28).

Kjo siguri iu dha misionarëve të parë në Kishë dhe misionarëve sot. Por na jepet edhe ne të gjithëve. Ne duhet të kemi besim se mund të kemi mjaft dashuri dhe se ungjilli e ka prekur jetën tonë aq sa ftesa jonë për të zgjedhur, mund të dëgjohet sikurse të vinte nga Mësuesi, ftesa e të cilit ajo është” (“A Voice of Warning”, Ensign, nëntor 1998, f. 33–35).

Doktrina e Besëlidhje 88:117. Kuvendet solemne

Midis janarit dhe majit të vitit 1836, një numër mbledhjesh u mbajtën në Kirtland. Disa nga këto mbledhje ishin kuvende solemne. Kuvendet solemne janë mbledhje të veçanta, të dallueshme nga mbledhjet e tjera të Kishës. Gjatë javës së 27 marsit 1836, kuvende solemne u mbajtën si pjesë e përkushtimit të Tempullit të Kirtlandit dhe një tjetër kuvend solemn u mbajt tri ditë më vonë më 30 mars 1836. Një tjetër kuvend solemn u mbajt rreth një vit më vonë më 6 prill 1837.

Plaku Dejvid B. Heit, i Kuorumit të Dymbëdhjetë Apostujve, dha mësim:

“Një kuvend solemn, sikurse e nënkupton emri, shënon një rast të shenjtë, të matur dhe plot nderim kur shenjtorët mblidhen nën drejtimin e Presidencës së Parë. Kuvendet solemne përdoren për tri qëllime: përkushtimin e tempujve, udhëzimin e veçantë të udhëheqësve të priftërisë dhe mbështetjen e një Presidenti të ri të Kishës” (“Solemn Assemblies”, Ensign, nëntor 1994, f. 14).

Robert J. Normani, ish-drejtor i Institutit të Fesë në Tuson, shpjegoi:

“Kuvendet solemne mbahen për ta rritur shpirtmërinë e shenjtorëve dhe për t’u dhënë theks të shtuar rëndësisë së qëllimit të kuvendit. Profeti Jozef Smith tha: ‘Ne duhet t’i kemi të gjitha gjërat të përgatitura dhe ta thërresim kuvendin tonë solemn, sikurse na ka urdhëruar Zoti, që të mund të jemi në gjendje ta përmbushim veprën e Tij të madhërishme dhe ajo duhet të bëhet sipas vetë mënyrës së Perëndisë. Shtëpia e Zotit duhet të përgatitet dhe kuvendi solemn të thirret e të organizohet brenda saj, në përputhje me rregullin e shtëpisë së Perëndisë.’ (Teachings of the Prophet Joseph Smith, përzgj. Joseph Fielding Smith, Salt Lake City: Deseret Book Co., 1938, f. 91.)

Hibër C. Kimballi i shënoi udhëzimet e Profetit drejtuar pleqve përpara asaj mbledhjeje solemne: ‘Ne ishim urdhëruar që ta përgatitnim veten tonë për një kuvend solemn. Së fundi koha mbërriti për këtë kuvend që të mblidhej; përpara së cilës Profeti Jozef i këshilloi pleqtë që t’i jepnin solemnitet mendjes së tyre, duke e larguar çdo ligjësi prej tyre, në mendim, fjalë e veprim, dhe që ta lejonin zemrën e tyre të bëhej e shenjtëruar, sepse ata nuk nevojitej të prisnin një bekim nga Perëndia pa qenë të përgatitur siç duhet për të, ngaqë Fryma e Shenjtë nuk do të banonte në tempuj jo të shenjtë.’ (Orson F. Whitney, Life of Heber C. Kimball, bot. i 3-të, Salt Lake City: Bookcraft, 1967, f. 91.)

Ky kuvend solemn i shumëpritur u mbajt në Tempullin e Kirtlandit më 30 mars 1836, tri ditë pas përkushtimit të tij. Në atë kuvend, u mblodhën treqind vëllezër e morën disa nga ordinancat e ungjillit dhe Profeti Jozef Smith i vendosi në rregull kuorumet e ndryshme të Kishës. (Shih History of the Church, 2:430–33; DeB 88:139–141; 109:35.) Një vit më vonë, më 6 prill 1837, një kuvend tjetër solemn u thirr për të festuar përvjetorin e Kishës dhe për t’i organizuar më tej kuorumet e priftërisë” (Robert J. Norman, “I Have a Question”, Ensign, dhjetor 1988, f. 53).