Doktrina e Besëlidhje 24–29:30 (Njësia 7)

Materiali Përgatitor për Mësuesin e Studimit në Shtëpi

Përmbledhja e Mësimeve të Studimit të Përditshëm në Shtëpi

Përmbledhja vijuese e ngjarjeve, doktrinave dhe parimeve për të cilat studentët mësuan ndërsa studiuan Doktrinën e Besëlidhjet 24–29:30 (njësia 7), nuk ka për qëllim të jepet si pjesë e mësimit tuaj. Mësimi që ju jepni, përqendrohet vetëm te disa nga këto doktrina dhe parime. Ndiqni nxitjet e Shpirtit të Shenjtë teksa i mbani parasysh nevojat e studentëve tuaj.

Dita 1 (Doktrina e Besëlidhje 24–26)

Nëpërmjet këshillës që Zoti i dha Jozef Smithit dhe Oliver Kaudërit për reagimin ndaj sprovave, studentët mësuan se ne duhet të jemi të durueshëm dhe t’i durojmë mjerimet tona ngaqë Zoti është me ne. Teksa studentët studiuan këshillën e Zotit dhënë Ema Smithit rreth rolit të saj në Kishë, ata përcaktuan disa parime dhe zgjodhën që të përqendroheshin tek njëri prej tyre, për të cilin menduan se do të gjente zbatim në vetë jetën e tyre. Së fundi, studentët studiuan shpalljen e Zotit se të gjitha gjërat në Kishë duhet të bëhen nëpërmjet miratimit të përbashkët dhe morën në shqyrtim se si mund t’i përmbushnin zotimet e tyre për t’i mbështetur ata të cilët janë thirrur e mbështetur për të shërbyer në lagjet ose degët e tyre.

Dita 2 (Doktrina e Besëlidhje 27)

Teksa studentët studiuan Doktrinën e Besëlidhjet 27, ata mësuan se ndërsa marrim sakramentin, ne duhet të kujtojmë flijimin shlyes të Jezu Krishtit. Ata gjithashtu mësuan se ne po jetojmë në periudhën ungjillore të plotësisë së kohëve, e cila mbledh së bashku të gjithë çelësat e ungjillit, ordinancat dhe të vërtetat e periudhave të kaluara ungjillore. Me qëllim që t’i bëjmë ballë ligësisë në kohën tonë, studentët u nxitën të merrnin mbi vete të gjithë armatimin e Perëndisë.

Dita 3 (Doktrina e Besëlidhje 28)

Nga këshilla e Shpëtimtarit dhënë Oliver Kaudërit, studentët mësuan se në Kishën e Jezu Krishtit, anëtarët individualë nuk mund të marrin zbulesë për të udhëzuar dikë që kryeson mbi ta dhe se vetëm Presidenti i Kishës do të marrë zbulesë për të gjithë Kishën. Megjithatë, ne mund të marrim zbulesë për vetë përfitimin tonë dhe për të na ndihmuar në thirrjet dhe detyrat që na jepen. Studentët gjithashtu mësuan se udhëheqësit e Kishës kanë përgjegjësi për t’i korrigjuar ata që po i udhëheqin të tjerët në udhë të gabuar dhe që në Kishën e Jezu Krishtit, të gjitha gjërat duhet të bëhen me rregull.

Dita 4 (Doktrina e Besëlidhje 29:1–30)

Nga udhëzimi i Shpëtimtarit rreth Ardhjes së Dytë dhe ngjarjeve që e pasojnë Mijëvjeçarin, studentët mësuan se ata që vijnë te Shpëtimtari, do të përgatiten për sprovat dhe vështirësitë e ditëve të fundit dhe do të marrin jetë të përjetshme. Ky mësim gjithashtu i ndihmoi studentët të kuptojnë se ngaqë Jezu Krishti shleu për mëkatet tona dhe është avokati ynë me Atin, ne mund të gëzohemi në zemrat tona dhe të ngazëllehemi.

Hyrje

Ky mësim u jep studentëve një mundësi për ta thelluar kuptueshmërinë e tyre për rëndësinë e veshjes së të gjithë armatimit të Perëndisë. Teksa studentët mësojnë rreth secilës pjesë të armatimit të Perëndisë, ata do të kenë mundësi të vlerësojnë forcën e armatimit të tyre dhe të bëjnë ndryshime siç nxiten nga Fryma e Shenjtë.

Sugjerime për Mësimdhënien

Doktrina e Besëlidhje 27:15–18

Zoti e urdhëron popullin e Tij që të veshë gjithë armatimin e Perëndisë

Sillni disa lloje pajisjesh mbrojtëse në klasë, të tilla si pajisje mbrojtëse sportive, syze sigurie, doreza mjekësore, një helmetë ndërtuesish ose një jelek mbrojtës. Kërkojuni studentëve të shpjegojnë qëllimin e pajisjes dhe mënyrën se si vepron ajo për ta mbrojtur personin që e vesh atë. Shpjegoni se, ndërkohë që këto gjëra na mbrojnë fizikisht, Zoti dha këshilla për të na mbrojtur shpirtërisht.

Ftojeni një student të lexojë me zë të lartë Doktrinën e Besëlidhjet 27:15. Vëreni klasën ta ndjekë, duke kërkuar atë që Zoti tha se duhet ta bëjmë për të qenë të mbrojtur shpirtërisht.

Çfarë nevojitet të bëjmë me qëllim që të mbrohemi shpirtërisht?
Sipas këtij vargu, çfarë u premtoi Zoti atyre që e veshin të gjithë armatimin e Perëndisë?

Shkruajeni parimin vijues në tabelë: Nëse e veshim të gjithë armatimin e Perëndisë, ne do të jemi në gjendje t’i bëjmë ballë së keqes.

Si mendoni ju, përse është e rëndësishme që ta veshim të gjithë armatimin e Perëndisë dhe jo vetëm një pjesë të tij?

Ftojeni një student të lexojë me zë të lartë Doktrinën e Besëlidhjet 27:16–18. Kërkojini klasës ta ndjekë dhe të përcaktojë çdo pjesë të armatimit shpirtëror që na nevojitet ta veshim, që të jemi në gjendje t’i bëjmë ballë ligësisë. Ftojeni një student të shërbejë si shkrues dhe renditini (ose vizatojini) pjesët e armatimit në tabelë ndërkohë që klasa i përcakton ato. (Ju mund të doni të vini në dukje që edhe Apostulli Pal dha mësim rreth gjithë armatimit të Perëndisë [shih Efesianëve 6:11–17].)

Për t’i ndihmuar studentët të kuptojnë rëndësinë e mbrojtjes shpirtërore të përshkruar në këto vargje, ndajeni klasën në grupe të vogla dhe caktojini secilit grup një prej pjesëve të armaturës. Jepini secilit grup një kopje të thënies vijuese nga Presidenti Harold B. Li dhe informacionin e pyetjet vijuese që kanë lidhje me pjesën e armaturës që iu caktua atyre. Ftojini studentët të punojnë brenda grupeve të tyre për t’iu përgjigjur pyetjeve rreth pjesëve të armaturës që iu caktuan atyre dhe për të qenë të përgatitur që t’ia thonë përgjigjet e tyre klasës.

“Ne kemi katër pjesë të trupit që Apostulli Pal tha se [janë] pjesët më të cenueshme nga fuqitë e errësirës. Ijët, që simbolizojnë virtytin, dëlirësinë. Zemra që simbolizon sjelljen tonë. Këmbët tona [që simbolizojnë] synimet ose objektivat në jetë dhe së fundi, koka jonë [që simbolizon] mendimet tona” (Harold B. Lee, Feet Shod with the Preparation of the Gospel of Peace, Brigham Young University Speeches of the Year [9 nëntor 1954], f. 2).

“Duke patur në ije brezin e së vërtetës” (shih DeB 27:15–16):

Presidenti Li tha: “Ija është ajo pjesë e trupit mes brinjës së poshtme dhe kërdhokullës në të cilën do të dalloni se janë organet jetësore që kanë të bëjnë me riprodhimin” (Feet Shod, f. 2). Të [kesh] në ije do të thotë të lidhësh fort me një brez.

Përse mendoni se Satani e sulmon pastërtinë, virtytin dhe dëlirësinë tonë?
Si mendoni ju, përse të diturit e standardeve të Perëndisë për moralshmërinë mund të na ndihmojnë të qëndrojmë të pastër, të virtytshëm e të dëlirë?

Studimi i shkrimeve të shenjta na ndihmon ta kemi të vërtetën dhe ndihmon në mbrojtjen e së vërtetës dhe të dëlirësisë.

“Parzmor[ja] e drejtësisë” (DeB 27:16):

Sipas Presidentit Li, çfarë mbron parzmorja?
Në ç’mënyrë mendoni se drejtësia e zemrës sonë (dëshirat tona) ndikon në aftësinë tonë për t’i luftuar betejat tona shpirtërore?

“Duke mbathur këmbët me gatishmërinë e ungjillit të paqes” (DeB 27:16):

T’i keni këmbët tuaja të “mbathur[a]” do të thotë të vishni këpucë ose mbrojtje për këmbët tuaja.

Sipas Presidentit Li, çfarë përfaqësojnë këmbët tona?
Si i sulmon Satani qëllimet dhe synimet tona në jetë?
Çfarë na ka dhënë Perëndia për t’u “kapur”, me qëllim që të na ndihmojë t’i lëvizim këmbët tona përgjatë shtegut të jetës drejt synimeve tona? (Shih 1 Nefi 8:24.)
Si mund të na ndihmojë përqendrimi te synime dhe qëllime të drejta që ta mposhtim tundimin?

“Mburoj[a] e besimit” (DeB 27:17):

Çfarë mendoni se do të thotë të “shuani të gjitha shigjetat [tundimet] e zjarrta të të ligut”?
Si ju ka ruajtur dhe mbrojtur besimi juaj?

“Përkrenar[ja] e shpëtimit” (DeB 27:18):

Sipas Presidentit Li, çfarë mbrohet kur koka jonë mbulohet?
Përse është e rëndësishme t’i mbrojmë mendimet tona?
Si i sulmon Satani mendimet tona?
Çfarë gjërash të posaçme mund të bëjmë për t’i mbrojtur mendimet tona?

“Shpat[a] e Shpirtit tim” (DeB 27:18):

Si mund të na ndihmojë Shpirti për t’i mposhtur sulmet e Satanit?
Çfarë epërsie na jep të pasurit e Shpirtit në luftën tonë kundër së ligës?
Si na ndihmon fjala e Perëndisë për ta përdorur shpatën e Shpirtit?
Çfarë mund të bëni për ta ftuar më shumë Shpirtin në jetën tuaj?

Pasi studentët t’i kenë raportuar përgjigjet e tyre, lexoni thënien vijuese nga Plaku M. Rasëll Ballard, i Kuorumit të Dymbëdhjetë Apostujve, dhe kërkojuni studentëve të dëgjojnë për mënyrën se si ne e veshim dhe e forcojmë armatimin e Perëndisë:

“Më pëlqen të mendoj për këtë armatim shpirtëror jo si një copë metali i ngurtë, i shkrirë për t’iu përshtatur trupit, por më shumë si një parzmore me zinxhirë. Parzmorja me zinxhirë përbëhet nga qindra copëza të vogla hekuri të lidhura së bashku për t’i lejuar përdoruesit përkulshmëri më të madhe pa e humbur mbrojtjen. E them këtë ngaqë ka qenë përvoja ime se nuk ka ndonjë gjë të madhe dhe të madhërishme që ne mund të bëjmë për ta armatosur veten tonë shpirtërisht. Fuqia e vërtetë shpirtërore qëndron në veprime të shumta më të vogla, që gërshetohen së bashku në një strukturë të një fortifikimi shpirtëror që të mbron dhe të ruan nga të gjitha të ligat” (“Be Strong in the Lord”, Ensign, korrik 2004, f. 8).

Cilat janë disa veprime të vogla që, të ndërthurura në forcën e tyre, do të na ndihmojnë të mbrohemi kundër tundimit dhe së ligës?

Ftojini studentët të shohin sërish te rreshtat hapës të Doktrinës e Besëlidhjeve 27:15.

Çfarë qëndrimi duhet të kemi kur veshim armatimin e Perëndisë? (Ne duhet të “gëzoh[emi] në zemrat [tona] e ngazëlleh[emi]”.) Përse duhet ta kemi këtë qëndrim?
Rreth cilit fragment të zotërimit të shkrimit të shenjtë mësuat këtë javë, që gjithashtu na këshillon të gëzohemi në zemrat tona dhe të ngazëllehemi? (DeB 25:13. Merreni parasysh që t’i ftoni studentët ta përsëritin së bashku ose ta thonë atë përmendsh.)
Si mund të na mbrojë nga Satani ndjekja e urdhrit te Doktrina e Besëlidhje 25:13 për t’u kapur te besëlidhjet tona me Atin Qiellor?

Kërkojuni studentëve të marrin në shqyrtim atë që kanë mësuar në mësimin e sotëm dhe ftojini të zgjedhin një gjë të veçantë që mund të bëjnë për ta veshur më mirë armatimin e Perëndisë. Nxitini ta shkruajnë atë që do të bëjnë në një fletë letre, së cilës ata mund t’i referohen shpesh si një kujtues i zotimit të tyre.

Për ta përfunduar këtë mësim, ftojini disa studentë të ndajnë dëshminë e tyre për të vërtetat e mësuara në mësim.

Njësia Tjetër (Doktrina e Besëlidhje 29:31–50; 30–35)

Sa fëmijë të Atit Qiellor u zbuan nga qielli në jetën paratokësore? Përse u zbuan ata? Çfarë do të thotë “t’i shkelin [shtypin] kombet”? Në njësinë tjetër, studentët do të mësojnë përgjigjet e këtyre pyetjeve. Ata gjithashtu do të mësojnë rreth anëtarëve të hershëm të Kishës, të cilët u thirrën “t’i shkelin [shtypin] kombet me anë të fuqisë së Shpirtit” (DeB 35:13).