Mësimi 19
Joseph Smith – Historia 1:68–75; Doktrina e Besëlidhje 13
Hyrje
Më 5 maj 1829, Jozef Smithi dhe Oliver Kaudëri shkuan në pyllin pranë fermës së Jozefit në Harmoni të Pensilvanisë, që t’i kërkonin Zotit, pas përkthimit të një fragmenti në Librin e Mormonit që theksonte rëndësinë e ordinancës së pagëzimit. Ndërsa po luteshin, atyre iu shfaq Gjon Pagëzori si një personazh i ringjallur. Ai u dha atyre Priftërinë Aarone, i udhëzoi që të pagëzonin njëri-tjetrin në lumin Saskehana aty pranë dhe më pas i udhëzoi që të shuguronin njëri-tjetrin në Priftërinë Aarone. Fjalët e Gjonit drejtuar Jozef Smithit dhe Oliver Kaudërit shënohen te Doktrina e Besëlidhje 13. Pas pagëzimit të tyre, Jozefi dhe Oliveri u mbushën me Frymën e Shenjtë dhe përjetuan bekime të mëdha.
Sugjerime për Mësimdhënien
Joseph Smith – Historia 1:68–72; Doktrina e Besëlidhje 13
Gjon Pagëzori u jep Priftërinë Aarone Jozef Smithit dhe Oliver Kaudërit
Shkruajini pyetjet vijuese në tabelë përpara fillimit të orës mësimore ose i jepni ato në një fletushkë për secilin student (mos përfshini përgjigjet). Teksa studentët vijnë në klasë, ftojini ata t’u përgjigjen pyetjeve në një copë letër ose në fletushkat e tyre. Po të jetë nevoja, sugjeroni që ata të përdorin Udhëzuesin për Shkrimet e Shenjta te kombinimi tresh (shih “Priftëri Aarone”) për të gjetur përgjigjet e duhura. Ju mund të dëshironi të pritni derisa studentët t’i kenë shënuar përgjigjet e tyre, përpara se ta filloni takimin tuaj shpirtëror.
-
Ku mund të mësojmë në shkrimet e shenjta rreth rivendosjes së Priftërisë Aarone?
-
Në ç’datë u rivendos Priftëria Aarone?
-
Si quhej engjëlli që e rivendosi Priftërinë Aarone në tokë duke ia dhënë atë Jozef Smithit dhe Oliver Kaudërit?
-
Si iu dha atyre Priftëria Aarone?
-
Ç’gjë tjetër premtoi engjëlli se do të merrnin Jozefi dhe Oliveri? Nga cilët do ta merrnin atë?
(Përgjigjet: 1) Joseph Smith – Historia ose Doktrina e Besëlidhje 13; 2) 15 maj 1829 [shih Joseph Smith – Historia 1:72]; 3) Gjon Pagëzori [shih Joseph Smith – Historia 1:72]; 4) Me anë të vënies së duarve [shih Joseph Smith – Historia 1:68, 71]; 5) Gjon Pagëzori u tha se ata më vonë do të merrnin Priftërinë Melkizedeke nga Apostujt Pjetër, Jakob e Gjon [shih Joseph Smith – Historia 1:72].)
Pas takimit shpirtëror, kërkojuni studentëve që të tregojnë përgjigjet e tyre për pyetjen e parë. Pasi t’i jenë përgjigjur kësaj pyetje siç duhet, caktojini studentët të punojnë në çifte dhe të kontrollojnë përgjigjet e tyre për pyetjet e tjera. Udhëzojini të përdorin Joseph Smith – Historinë 1:68–72 dhe përshkrimin nga Oliver Kaudëri që pason Joseph Smith – Historinë. Ju mund të dëshironi të ecni nëpër klasë që t’i ndihmoni studentët të gjejnë përgjigjet e duhura.
Pas një kohe të mjaftueshme, rishikoni përgjigjet së bashku si klasë. Teksa i shikoni këto përgjigje së bashku, ndihmojini studentët që të përcaktojnë e kuptojnë doktrinat vijuese: Gjon Pagëzori rivendosi Priftërinë Aarone në tokë (shih Joseph Smith – Historia 1:72). Priftëria jepet me anë të vënies së duarve (shih Joseph Smith – Historia 1:68, 71). Gjithashtu, ndërkohë që rishikoni përgjigjet e studentëve, shpjegoni se Jozef Smithi dhe Oliver Kaudëri e morën Priftërinë Melkizedeke nga Pjetri, Jakobi e Gjoni më vonë në maj të 1829-ës (shih Larry C. Porter, “The Restoration of the Aaronic and Melchizedek Priesthoods”, Ensign, dhjetor 1996, f. 30–47).
Ftojeni një student të lexojë me zë të lartë Joseph Smith – Historinë 1:68. Vëreni klasën ta ndjekë duke kërkuar atë që po bënin Jozefi dhe Oliveri, që i bëri ta pyesnin Zotin rreth pagëzimit për heqjen e mëkateve.
-
Sipas këtij vargu, çfarë i bëri Jozefin dhe Oliverin që të kërkonin rreth pagëzimit për heqjen e mëkateve? (Ata po përkthenin Librin e Mormonit dhe hasën mësime lidhur me pagëzimin për heqjen e mëkateve.)
Vini në dukje se rivendosja e Priftërisë Aarone është kaq e rëndësishme sa fjalët e Gjon Pagëzorit u përfshinë te Doktrina e Besëlidhje si seksioni 13. Ftojeni një student të lexojë me zë të lartë Doktrinën e Besëlidhjet 13. Vëreni klasën ta ndjekë dhe të përcaktojë se si rivendosja e Priftërisë Aarone i dha përgjigje lutjes së Jozefit dhe Oliverit për të ditur më shumë rreth pagëzimit për heqjen e mëkateve.
-
Në çfarë mënyrash rivendosja e Priftërisë Aarone i dha përgjigje lutjes së Jozefit dhe Oliverit për të ditur më shumë lidhur me pagëzimin për heqjen e mëkateve?
Në tabelë, vizatoni një figurë të thjeshtë të një dere me një vrimë çelësi.
-
Cili është qëllimi i një dere? (Ndërsa studentët e diskutojnë këtë pyetje, ndihmojini të kuptojnë se një derë qëndron në hapjen e një udhe kalimi drejt një vendndodhjeje tjetër. Përveç kësaj, një derë mund të na mbajë jashtë ose të na lejojë të hyjmë brenda.)
Tregojuni studentëve një komplet çelësash (ose vizatoni një figurë të thjeshtë të një çelësi në tabelë) dhe bëni pyetjen vijuese:
-
Si lidhet një çelës me funksionin e një dere? (Një çelës e hap ose mbyll një derë. Kur e përdorim një çelës për ta hapur një derë, ai bën të mundur që ne të kalojmë përmes dhe të përjetojmë atë që është në anën tjetër.)
Shpjegoni se Zoti i përdor çelësat si një simbol për të përfaqësuar autoritetin e priftërisë, i cili shkyç ose hap për ne udhën që të marrim mundësi dhe bekime të përjetshme. Ftojini studentët të kërkojnë Doktrinën e Besëlidhjet 13:1 duke parë për çelësat që lidhen me Priftërinë Aarone. Ju mund të dëshironi të sugjeroni që studentët t’i shenjojnë këto fraza në shkrimet e tyre të shenjta teksa i gjejnë ato.
-
Cilët çelësa, tha Gjon Pagëzori, mban Priftëria Aarone? (Priftëria Aarone mban çelësat e shërbesës së engjëjve, të ungjillit të pendimit dhe të pagëzimit me anë të zhytjes për heqjen e mëkateve. Ju mund të dëshironi të ftoni një student për ta shkruar këtë thënie në tabelë nën figurën e derës.)
Për t’i ndihmuar studentët që t’i kuptojnë më mirë këta çelësa të Priftërisë Aarone dhe bekimet që çelësat i bëjnë të gjindshme për anëtarët e Kishës, ftojeni një student të lexojë me zë të lartë shpjegimin vijues nga Plaku Dallin H. Ouks, i Kuorumit të Dymbëdhjetë Apostujve. (Merrni parasysh që të bëni një kopje të vogël të kësaj thënieje për secilin student që ta mbajë brenda shkrimeve të tij ose të saj të shenjta.)
“Çfarë do të thotë që Priftëria Aarone mban [çelësin e] ‘ungjillit të pendimit e të pagëzimit dhe të heqjes së mëkateve’? Kuptimi gjendet në ordinancën e pagëzimit dhe në sakramentin. Pagëzimi është për heqjen e mëkateve dhe sakramenti është një ripërtëritje e besëlidhjeve dhe bekimeve të pagëzimit. Që të dyja duhet të paraprihen nga pendimi. …
Askush nga [ne] nuk ka jetuar pa mëkat që nga pagëzimi [ynë]. Pa disa masa për pastrimin e mëtejshëm pas pagëzimit tonë, secili prej nesh është i humbur prej gjërave shpirtërore. …
Ne urdhërohemi të pendohemi për mëkatet tona dhe të vijmë te Zoti me një zemër të thyer e një shpirt të penduar dhe të marrim sakramentin në përputhje me besëlidhjet e tij. Kur ne i ripërtërijmë besëlidhjet tona të pagëzimit në këtë mënyrë, Zoti e ripërtërin ndikimin pastrues të pagëzimit tonë. …
Ne nuk mund ta mbivlerësojmë rëndësinë e Priftërisë Aarone në këtë gjë. Gjithë këto hapa jetësorë, që lidhen me heqjen e mëkateve, kryhen nëpërmjet ordinancës shpëtuese të pagëzimit dhe ordinancës ripërtëritëse të sakramentit. Këto ordinanca, që të dyja, kryhen nga mbajtës të Priftërisë Aarone nën drejtimin e këshillit të peshkopit, të cilët ushtrojnë çelësat e ungjillit të pendimit e të pagëzimit dhe të heqjes së mëkateve” (“The Aaronic Priesthood and the Sacrament”, Ensign, nëntor 1998, f. 37–38).
-
Si na ndihmojnë çelësat e Priftërisë Aarone që të marrim bekimet e Shlyerjes së Jezu Krishtit?
-
Sipas Plakut Ouks, kush i drejton çelësat e ungjillit të pendimit e të pagëzimit në secilën lagje?
Për t’i ndihmuar studentët të kuptojnë më mirë çelësin e shërbesës së engjëjve, ftojeni një student të lexojë shpjegimin vijues nga Plaku Ouks:
“Si një mbajtës i ri [në moshë] i Priftërisë Aarone, nuk mendova se do të shihja një engjëll dhe pyesja veten se çfarë lidhje kishin shfaqje të tilla me Priftërinë Aarone.
Por shërbesa e engjëjve mund të jetë edhe e padukshme. Mesazhet engjëllore mund të jepen nga një zë apo thjesht nga mendimet ose ndjenjat e komunikuara mendjes” (“The Aaronic Priesthood and the Sacrament”, f. 39).
Ftojeni një student të vijë përpara klasës dhe të ngrejë lart figurën I Ri Duke u Pagëzuar (Libri i Figurave Artistike të Ungjillit [2009], nr. 103; shih edhe LDS.org) dhe Bekimi i Sakramentit (nr. 107), nëse janë në dispozicion.
-
Si mund t’i ndikojë mendimet ose veprimet tuaja të kuptuarit e çelësave të Priftërisë Aarone kur ju e përgatitni, administroni ose e merrni sakramentin çdo javë?
Ftojini të rejat në klasë të tregojnë ndjenjat e tyre rreth Priftërisë Aarone dhe bekimeve që ajo sjell në jetën e tyre. Gjithashtu mund të dëshironi të tregoni përse ju vetë e vlerësoni rivendosjen e Priftërisë Aarone.
Joseph Smith – Historia 1:73–75
Jozef Smithi dhe Oliver Kaudëri përjetojnë bekime të mëdha pas pagëzimeve të tyre
Ftojeni një student të lexojë me zë të lartë Joseph Smith – Historinë 1:73. Kërkojini klasës ta ndjekë dhe të përcaktojë fjalë dhe fraza që përshkruajnë atë që Jozefi dhe Oliveri përjetuan pasi u pagëzuan. Ju mund të dëshironi të sugjeroni që studentët t’i shenjojnë këto fjalë dhe fraza në shkrimet e tyre të shenjta.
-
Çfarë ra mbi Jozefin dhe Oliverin pasi u pagëzuan?
Ngaqë Jozefi dhe Oliveri nuk e kishin marrë ende dhuratën e Frymës së Shenjtë, ajo që përjetuan në këtë rast ishte fuqia e Frymës së Shenjtë. Jozefi dhe Oliveri do ta merrnin Priftërinë Melkizedeke për dhënien e dhuratës së Frymës së Shenjtë në një kohë të mëvonshme (shih Joseph Smith – Historia 1:70; shih edhe Udhëzuesin për Shkrimet e Shenjta, “Frymë e Shenjtë”, scriptures.lds.org).
Ftojeni një student të lexojë me zë të lartë Joseph Smith – Historinë 1:74. Vëreni klasën ta ndjekë duke kërkuar një bekim të veçantë që Jozefi dhe Oliveri e morën nëpërmjet fuqisë së Frymës së Shenjtë. Pasi studentët të kenë raportuar atë që kanë gjetur, shkruani në tabelë doktrinën vijuese: Fryma e Shenjtë na ndihmon të kuptojmë domethënien dhe qëllimin e shkrimeve të shenjta.
-
Si mendoni, përse kemi nevojë që Fryma e Shenjtë të na ndihmojë të kuptojmë shkrimet e shenjta?
-
Kur ju ka ndihmuar Fryma e Shenjtë ta kuptoni “domethënien dhe qëllimin e vërtetë” të shkrimeve të shenjta?
Ftojini studentët të harxhojnë pak minuta duke shkruar në fletoret e klasës ose ditarët e tyre të studimit të shkrimeve të shenjta rreth asaj që do të bëjnë për ta ftuar ndihmën e Frymës së Shenjtë ndërkohë që studiojnë shkrimet e shenjta.
Komente dhe Informacion për Rrethanat
Joseph Smith – Historia 1:74. Të pasurit e Shpirtit të Shenjtë kur studioni shkrimet e shenjta
Plaku Dallin H. Ouks, i Kuorumit të Dymbëdhjetë Apostujve, komentoi lidhur me domosdoshmërinë për ta pasur Shpirtin me ne, ndërkohë që studiojmë shkrimet e shenjta:
“Nëse i kërkojmë dhe i pranojmë zbulesën dhe frymëzimin për të na e zgjeruar kuptueshmërinë tonë për shkrimet e shenjta, ne do të kuptojmë një plotësim të premtimit të frymëzuar të Nefit, që ata që kërkojnë me zell, do t’i kenë ‘misteret e Perëndisë [të] shpalos[ura] nëpërmjet fuqisë së Frymës së Shenjtë’ (1 Nefi 10:19).
… Shumë prej gjërave të tjera, të përmendura në shkrimet e shenjta, mund të kuptohen vetëm nëpërmjet frymëzimit të Frymës së Shenjtë. Me fjalët e Apostullit Pal: ‘Gjërat e Perëndisë nuk i njeh asnjë njeri, përveçse ai që ka Shpirtin e Perëndisë’ (PJS, 1 Kor. 2:11). …
Jozef Smithi dhe Oliver Kaudëri dhanë shembullin për këtë periudhë ungjillore. Pas pagëzimit të tyre, ata u mbushën me Frymën e Shenjtë. Më pas, sikurse shpjegoi Jozefi në historinë e tij vetjake: ‘Me mendjet tona të ndriçuara tashmë, ne filluam t’i kishim shkrimet e shenjta të qarta për të kuptuarin tonë dhe kuptimi e qëllimi i vërtetë i shumë prej pjesëve të tyre më të mistershme na u zbuluan në një mënyrë që ne kurrë nuk mund ta arrinim më parë, as kurrë më parë nuk e kishim menduar’ (JS–H 1:74). …
Sikurse Pali i tha Timoteut, ‘i gjithë Shkrimi është i frymëzuar nga Perëndia’ (2 Timoteut 3:16; shih edhe 2 Pjetër 1:21). Kjo do të thotë që, me qëllim që ta kuptojmë shkrimin e shenjtë, mendja jonë ka nevojë të ndriçohet nga Shpirti i Zotit” (“Scripture Reading and Revelation”, Ensign, janar 1995, f. 7, 9).
Doktrina e Besëlidhje 13:1. Çfarë nënkuptohet nga shprehja që bijtë e Levit i ofrojnë një ofertë Zotit?
Profeti Jozef Smith dha shpjegimin vijues për flijimin që do të ofrohet nga bijtë e Levit:
“Në përgjithësi hamendësohet se flijimi u hoq tërësisht kur Flijimi i Madh [d.m.th. flijimi i Zotit Jezus] u ofrua dhe se nuk do të jetë e nevojshme për ordinancën e flijimit në të ardhmen; por ata që e shpallin këtë, sigurisht nuk i njohin mirë detyrat, privilegjet dhe autoritetin e priftërisë, ose Profetët.
Ofrimi i flijimit gjithmonë ka qenë i lidhur dhe formon një pjesë të detyrave të Priftërisë. Ai filloi me Priftërinë dhe do të vazhdohet deri pas ardhjes së Krishtit, nga brezi në brez. …
Këto flijime, sikurse çdo ordinancë që i përket Priftërisë, kur Tempulli i Zotit do të ngrihet dhe bijtë e Levit do të pastrohen, do të rivendosen e ndiqen tërësisht në të gjitha fuqitë, shtrirjet dhe bekimet e tyre. Kjo gjithmonë ekzistoi dhe gjithmonë do të ekzistojë kur fuqitë e Priftërisë Melkizedeke të shfaqen në mënyrë të mjaftueshme; përndryshe si do të mund të bëhej të ndodhte rivendosja e të gjitha gjërave të thëna nga Profetët e shenjtë? Nuk duhet të kuptohet se ligji i Moisiut do të vendoset përsëri me të gjitha ritet dhe larminë e ceremonive të tij; kjo nuk është thënë kurrë nga Profetët; por ato gjëra, të cilat ekzistonin përpara kohës së Moisiut, domethënë, flijimi, do të vazhdohen” (History of the Church, 4:211–212).
Presidenti Jozef Filding Smith shpjegoi më tej:
“Ne jetojmë në periudhën ungjillore të plotësisë së kohëve, në të cilën të gjitha gjërat duhet të mblidhen dhe të gjitha gjërat duhet të rivendosen që nga fillimi. Madje kjo tokë duhet të rivendoset në gjendjen që mbizotëronte përpara shkeljes së Adamit. Tani, në natyrën e gjërave, ligji i flijimit do të duhet të rivendoset, ose të gjitha gjërat që u shpallën nga Zoti nuk do të rivendoseshin. Do të jetë e nevojshme, si rrjedhim, për bijtë e Levit, të cilët i ofruan në lashtësi flijimet e gjakut në Izrael, që ta ofrojnë një flijim të tillë sërish për ta përmbushur e plotësuar këtë ordinancë në këtë periudhë ungjillore. Flijimi me anë të derdhjes së gjakut u fillua në ditët e Adamit dhe, për shkak të domosdoshmërisë, do të duhet të rivendoset.
Flijimi i kafshëve do të bëhet për ta përmbushur rivendosjen kur, tempulli për të cilin flitet, të ndërtohet; në fillim të mijëvjeçarit, ose në rivendosjen, flijimet e gjakut do të kryhen për aq kohë sa të përmbushet plotësia e rivendosjes në këtë periudhë ungjillore. Pas kësaj, flijimi do të jetë i një lloji tjetër” (Doctrines of Salvation, bot. Bruce R. McConkie [1956], 3:94).
Doktrina e Besëlidhje 13:1. Një shpjegim për çelësat
Plaku Brus R. Mek-Konki shpjegoi se zbulesat e Perëndisë iu referohen çelësave në dy mënyra:
“Dy përdorimet e ndryshme të fjalës çelësa gjenden në zbulesat. Njëri i referohet fuqive drejtuese me anë të të cilave qeverisen Kisha ose mbretëria dhe të gjitha organizatat e saj, çelësat e mbretërisë duke qenë fuqitë e kryesimit. Përdorimi tjetër i referohet mjeteve të siguruara, me anë të të cilave diçka zbulohet, nxirret në pah ose bëhet e shfaqur” (Mormon Doctrine, bot. i 2-të [1966], f. 409–410).
Doktrina e Besëlidhje 13:1. Çelësi i shërbesës së engjëjve
Plaku Dallin H. Ouks, i Kuorumit të Dymbëdhjetë Apostujve, ofroi këndvështrimin vijues për çelësin e shërbesës së engjëjve:
“Në një mënyrë të lidhur ngushtë, këto ordinanca të Priftërisë Aarone janë gjithashtu jetike për shërbesën e engjëjve.
‘Fjala “engjëll” përdoret në shkrimet e shenjta për cilëndo qenie qiellore që mbart mesazhin e Perëndisë’ (George Q. Cannon, Gospel Truth, përzgj. Jerreld L. Newquist [1987], f. 54). Shkrimet e shenjta përmendin raste të shumta ku një engjëll u shfaq personalisht. …
Por shërbesa e engjëjve mund të jetë edhe e padukshme. Mesazhet engjëllore mund të jepen nga një zë apo thjesht nga mendimet ose ndjenjat e komunikuara në mendje. …
… Komunikimet më engjëllore ndihen ose dëgjohen në vend që të shihen.
Si e mban Priftëria Aarone çelësin e shërbesës së engjëjve? Përgjigjja është e njëjtë si edhe për Shpirtin e Zotit.
Në përgjithësi, bekimet e shoqërimit dhe të komunikimit shpirtëror janë në dispozicion të vetëm atyre që janë të pastër. Siç u shpjegua më parë, nëpërmjet ordinancave të Priftërisë Aarone të pagëzimit dhe sakramentit, ne pastrohemi nga mëkatet tona dhe na premtohet që, nëse i mbajmë besëlidhjet tona, do të kemi gjithmonë Shpirtin e Tij me ne. Unë besoj se ai premtim jo vetëm që i referohet Frymës së Shenjtë, por edhe shërbesës së engjëjve, sepse ‘engjëjt flasin nëpërmjet fuqisë së Frymës së Shenjtë; prandaj, ata flasin fjalët e Krishtit’ (2 Nefi 32:3). Prandaj është që, ata që mbajnë Priftërinë Aarone, hapin derën për të gjithë anëtarët e Kishës, që e marrin me denjësi sakramentin, që të gëzojnë shoqërimin e Shpirtit të Zotit dhe të shërbesës së engjëjve. …
Priftëria Aarone mban çelësat e ‘ungjillit të pendimit e të pagëzimit dhe të heqjes së mëkateve’ (DeB 84:27). Fuqia pastruese e Shlyerjes së Shpëtimtarit tonë ripërtërihet për ne kur e marrim sakramentin. Premtimi që ne ‘të ke[mi] gjithmonë Shpirtin e tij me [ne]’ (DeB 20:77) është thelbësor për shpirtmërinë tonë. Ordinancat e Priftërisë Aarone janë jetësore për të gjithë këtë” (“The Aaronic Priesthood and the Sacrament”, Ensign, nëntor 1998, f. 38–40).
Doktrina e Besëlidhje 13:1. Shërbesa e engjëjve
Presidenti Gordon B. Hinkli e shpjegoi shërbesën e engjëjve në këtë mënyrë:
“Kur Uillford Udrafi, një burrë që kishte jetuar shumë vite dhe pati shumë përvoja, ishte Presidenti i Kishës, ai u tha djemve të Priftërisë Aarone: ‘Dëshiroj të ngulis tek ju faktin se nuk ka ndonjë ndryshim nëse një burrë është një Prift apo një Apostull, nëse ai e lartëson thirrjen e tij. Një Prift mban çelësat e shërbesës së engjëjve,’ tha ai. ‘Kurrë në jetën time, si Apostull, si I Shtatëdhjetë apo si Plak, nuk kam pasur ndonjëherë më shumë mbrojtje nga Zoti sesa kur mbaja detyrën e një Prifti.’ (Millennial Star, 53:629.)
Mendoni për të, vëllezërit e mi të rinj, të dashur. Kjo priftëri, të cilën e mbani, mbart me vete çelësat e shërbesës së engjëjve. Kjo do të thotë, siç e interpretoj unë, se, nëse jetoni të denjë për priftërinë, ju keni të drejtën që të merrni e të gëzoni pikërisht fuqinë e qenieve qiellore për t’ju udhërrëfyer, për t’ju mbrojtur, për t’ju bekuar. Cili djalë, nëse është i matur, nuk do ta mirëpriste këtë bekim të mrekullueshëm?” (“The Priesthood of Aaron”, Ensign, nëntor 1982, f. 45).