Doktrina e Besëlidhje 49

Hyrje

Liman Kopli, një i kthyer në besim në Kishë, dëshironte që misionarët t’ia predikonin ungjillin anëtarëve të grupit të tij të mëparshëm fetar, shejkërve. Megjithatë, ai vazhdoi të mbante disa prej bindjeve të rreme të asaj feje. Lidhur me bindjet e mbetura të Limanit, Jozef Smithi i kërkoi Zotit më 7 maj 1831 dhe mori zbulesën që tani shënohet te Doktrina e Besëlidhje 49.

Sugjerime për Mësimdhënien

Doktrina e Besëlidhje 49:1–4

Zoti i thërret Sidni Rigdonin, Parli P. Pratin dhe Liman Koplin që t’u predikojnë shejkërve

Përpara orës mësimore, bëni një kurth për një majmun ose vizatoni ilustrimin shoqërues në tabelë. Që ta krijoni një kurth për majmunin, gjeni një kuti me një kapak. Sigurojeni kapakun e kutisë dhe prisni një hapje në njërën anë të kutisë, aq të madhe sa një student të mund të futë një dorë të hapur, por jo një grusht. Vendosni një copë frute ose një top brenda kutisë.

Pyetini studentët nëse e dinë se si ta kapin një majmun. (Nëse e dinë metodën vijuese, ftojini ata t’ia shpjegojnë atë pjesës tjetër të klasës. Nëse e keni ndërtuar një kurth, ju gjithashtu mund të ftoni një student të tregojë se si bëhet kapja.) Sugjeroni që një mënyrë për ta kapur në kurth një majmun është ta vendosni një send të dëshiruar në një enë, e cila ka një vrimë aq të madhe sa majmuni mund ta futë dorën përmes saj. Kur majmuni e kap sendin, ai nuk është në gjendje ta heqë grushtin ngaqë ka kapur një send shumë të madh për t’u futur përmes vrimës. Prej vendosmërisë së tyre për ta mbajtur sendin, disa majmunë do ta lejojnë vetveten të kapen.

Ftojini studentët të lexojnë në heshtje hyrjen e seksionit te Doktrina e Besëlidhje 49 dhe të kërkojnë mënyrat që situata e përshkruar është e ngjashme me kurthin për majmunin. Pasi studentët të vënë në dukje se Liman Kopli e pati të vështirë të hiqte dorë prej disa bindjeve të shejkërve, kërkojuni studentëve të renditin disa prej bindjeve të shejkërve.

Ndërsa studentët përgjigjen, shkruajini përgjigjet e tyre në tabelë, siç tregohet më poshtë. Mos e përfshini kolonën me kreun “Doktrina e Zotit”. Ju do ta shtoni atë kolonë më vonë në mësim.

Bindjet e Shejkërve	Doktrina e Zotit
Ardhja e Dytë e Krishtit kishte ndodhur tashmë.	DeB 49:5–8
Krishti ishte shfaqur në formën e një gruaje të quajtur En Li.	DeB 49:22–25
Pagëzimi me anë të ujit nuk quhej thelbësor.	DeB 49:11–14
Ata e mohonin martesën dhe besonin në të jetuarin e një jete të beqarisë tërësore (heqjes dorë nga martesa dhe marrëdhëniet seksuale).	DeB 49:15–17
Disa shejkëra e ndalonin ngrënien e mishit.	DeB 49:18–21

Nëse studentët janë kureshtarë rreth emrit shejkër, shpjegoni se anëtarët e Shoqatës së Bashkuar të Besimtarëve në Shfaqjen e Dytë të Krishtit zakonisht u quajtën shejkëra për shkak të mënyrës së tyre të adhurimit, e cila përfshinte tundjen e trupave të tyre ndërkohë që këndonin, kërcenin dhe përplasnin duart sipas muzikës.

Ftojeni një student të lexojë me zë të lartë Doktrinën e Besëlidhjet 49:1–4. Vëreni klasën ta ndjekë duke kërkuar atë që Zoti zbuloi rreth shejkërve.

Si i përshkroi Zoti shejkërat? (Shih vargun 2.)
Si mendoni, çfarë do të thotë të “dëshirojnë ta dinë të vërtetën pjesërisht, por jo të gjithën”? (Ata i pranonin disa nga mësimet e Perëndisë, por i shpërfillnin ose i mohonin të tjerat.)
Në çfarë mënyrash anëtarë të Kishës mund të kenë qëndrime të ngjashme sot?

Shkruani në tabelë fjalinë e paplotë vijuese: Të qenit të drejtë përpara Zotit përfshin …

Pyetini studentët se si do ta plotësonin këtë parim, nisur nga fjalët e Zotit në vargun 2. Ndërsa përgjigjen studentët, plotësoni parimin në tabelë: Të qenit të drejtë përpara Zotit përfshin dëshirën për të marrë të gjithë të vërtetën që e ka zbuluar Ai. Ju mund të doni të sugjeroni që studentët ta shkruajnë këtë parim në shkrimet e tyre të shenjta pranë vargut 2. Vini në dukje që, nëse dëshirojmë me zell ta dimë të vërtetën, ne gjithashtu dëshirojmë të jetojmë sipas të vërtetës.

Përse i nevojitej Liman Koplit këshilla në vargun 2? Si mund të jetë ky parim i dobishëm për ne?
Çfarë bekimesh mund të humbasë një njeri kur zgjedh të pranojë vetëm pjesë të së vërtetës?

Rikthehuni te kurthi për majmunin. Ftojini studentët të renditin disa kurthe që mund t’i çojnë njerëzit drejt mohimit të disa prej mësimeve të Perëndisë – veprimeve dhe qëndrimeve tek të cilat mbahen njerëzit, që i bëjnë ata të mos jenë të drejtë përpara Zotit. (Disa shembuj mund të përfshijnë arsyetimin e një zakoni shkatërrues, dëgjimin e muzikës që e largon Shpirtin, pjesëmarrjen në veprimtari ditën e diel që janë të papërshtatshme për Shabatin, parapëlqimin e mësimeve dhe filozofive të botës kundrejt mësimeve të Perëndisë dhe mospranimin e urdhërimit për t’i falur të tjerët.)

Cilat janë disa pasoja të mbajtjes së këtyre veprimeve dhe qëndrimeve? Si është kjo e ngjashme me një kurth?

Ftojini studentët të marrin parasysh atë prej së cilës mund t’iu nevojitet të heqin dorë, me qëllim që t’i marrin të gjitha bekimet që Ati Qiellor i ka si qëllim për ta. Merreni parasysh t’i ftoni të caktojnë një synim që të heqin dorë nga diçka që po i mban larg të qenit të drejtë përpara Zotit.

Doktrina e Besëlidhje 49:5–28

Zoti e korrigjon doktrinën e rreme të shejkërve dhe i urdhëron shërbëtorët e Tij t’i ftojnë ata të pendohen dhe të pagëzohen

Kujtojini studentët se Zoti i urdhëroi Liman Koplin, Sidni Rigdonin dhe Parli P. Pratin t’ua predikonin ungjillin shejkërve (shih DeB 49:1–4). Shpjegoni se përpara marrjes së këtij urdhri, Liman Kopli kishte qenë “i shqetësuar që disa prej pleqve duhej të shkonin te vëllezërit e tij të mëparshëm [shejkërat] dhe të predikonin ungjillin” (Histories, Vëllimi 2: Assigned Histories, 1831–1847, vëll. 2 i serisë së Historive të The Joseph Smith Papers [2012], f. 37). Kur këta pleq shkuan te shejkërat, ua lexuan atyre me zë të lartë zbulesën te Doktrina e Besëlidhje 49.

Në tabelë, kopjoni kolonën e dytë të tabelës që u përmend më herët në këtë mësim.

Ndajeni klasën në pesë grupe. Caktojini secilit grup një nga fragmentet e shkrimeve të shenjta që i keni shkruar në tabelë. (Nëse keni një klasë të vogël, ndajini fragmentet midis studentëve dhe diskutojini ato të gjitha si klasë.) Vërini studentët të lexojnë në heshtje fragmentet e caktuara atyre duke kërkuar doktrina dhe parime që i korrigjojnë bindjet e rreme të shejkërve.

Kur studentët të kenë pasur kohë t’i studiojnë këto fragmente të shkrimeve të shenjta, ftojini ata të diskutojnë pyetjet vijuese në grupet e tyre dhe të përgatiten për t’ia thënë përgjigjet e tyre klasës.

Cilat doktrina dhe parime kishin nevojë t’i kuptonin shejkërat dhe Liman Kopli?
Si shpjegohen këto të vërteta në vargjet që ju janë caktuar?

Kur grupet të kenë pasur kohë të mjaftueshme për t’i lexuar dhe diskutuar fragmentet që iu caktohen, ftojeni një student nga secili grup që t’iu përgjigjet këtyre pyetjeve për të gjithë klasën. Ju mund të doni të sugjeroni që studentët t’i shenjojnë fragmentet që iu mësojnë të vërtetat që i kanë përcaktuar.

Studentët duhet të përcaktojnë doktrinat dhe parimet vijuese. (Vini re që këtyre të vërtetave iu vihen numra që të përputhen me listën e bindjeve të rreme në tabelë.) Ndërsa studentët i përmendin këto të vërteta, merreni parasysh të bëni pyetje pasuese që të nxitni diskutim të mëtejshëm.

Te Doktrina e Besëlidhje 49:7 studentët duhet të përcaktojnë doktrinën vijuese: Askush përveç Perëndisë nuk e di se kur do të ndodhë Ardhja e Dytë.
Te Doktrina e Besëlidhje 49:22–25 një parim që studentët mund ta përcaktojnë është sa vijon: Nëse i dimë shenjat e Ardhjes së Dytë, ne nuk do të mashtrohemi nga shpallje të rreme.
- Cilat janë disa nga shenjat e përmendura në vargjet 23–25? (Ju mund të doni të shpjegoni se emri Jakob në vargun 24 i drejtohet shtëpisë së Izraelit.) Në çfarë mënyrash i keni parë këto shenja në kohën tonë?
Te Doktrina e Besëlidhje 49:11–14 studentët duhet të përcaktojnë doktrinën vijuese: Jezu Krishti i ka urdhëruar shërbëtorët e Tij t’u bëjnë thirrje njerëzve të besojnë tek Ai, të pendohen, të pagëzohen dhe të marrin dhuratën e Frymës së Shenjtë.
- Përse jeni mirënjohës që ju jeni pagëzuar dhe që e keni marrë dhuratën e Frymës së Shenjtë? Përse mezi prisni t’i ndihmoni njerëzit e tjerë që t’i marrin këto ordinanca?
Te Doktrina e Besëlidhje 49:15–17 studentët duhet të përcaktojnë një ose më shumë nga doktrinat vijuese: Martesa midis një burri dhe një gruaje shugurohet nga Perëndia dhe bashkëshortët e bashkëshortet urdhërohen që të jenë një dhe të kenë fëmijë. Mund t’ju nevojitet të shpjegoni frazën “që toka të mund të përmbushë qëllimin e krijimit të saj; dhe që ajo të mund të mbushet me morinë e njerëzve”. Ky fragment na mëson se një qëllim i krijimit të tokës ishte që të siguronte një vend ku fëmijët e Perëndisë të mund të jetonin si familje.
- Çfarë qëllimesh përmbush martesa midis një burri dhe një gruaje në planin e Atit Qiellor?
- Si është të “ndal[uarit që] të martoheni” në kundërshtim me planin e Atit Qiellor?
- Sipas vargut 16, Perëndia e miraton martesën tradicionale midis një burri dhe një gruaje. Cilat janë disa mënyra se si njerëzit përpiqen ta përqeshin apo shkatërrojnë martesën tradicionale?
- Çfarë mund të bëjnë të rinjtë dhe të rejat tani për t’u përgatitur për martesën çelestiale?
Te Doktrina e Besëlidhje 49:18–21 studentët duhet të përcaktojnë doktrinën vijuese: Zoti i ka siguruar kafshët e tokës për përdorimin tonë. (Ju mund të keni nevojë të shpjegoni se fjala veshje do të thotë rroba për t’u veshur.)
- Çfarë paralajmërimi gjendet te vargu 21? Si mendoni, përse Zoti nuk është i kënaqur me ata që i vrasin kafshët pa qenë e nevojshme?

Shpjegoni se shejkërat dhe Liman Kopli nuk e ndoqën këshillën e Zotit. Shejkërat nuk e pranuan mesazhin e misionarëve dhe Liman Kopli u kthye tek bindjet e tij të mëparshme dhe u largua nga Kisha.

Mbylleni duke i kërkuar një studenti të lexojë me zë të lartë Doktrinën e Besëlidhjet 49:26–28. Vëreni klasën ta ndjekë duke kërkuar këshillën dhe premtimet e Zotit. (Ju mund të keni nevojë të shpjegoni se fjala praparoja i drejtohet dikujt që e mbron dikë tjetër nga pas.)

Ftojini studentët t’i lexojnë përsëri këto vargje në heshtje dhe të mendojnë rreth mënyrës se si këshilla dhe premtimet e Zotin gjejnë zbatim tek ata individualisht. Jepni dëshminë tuaj për bekimet që vijnë kur i kërkojmë mësimet e Zotit dhe i ndjekim ato.

Komente dhe Informacion për Rrethanat

Doktrina e Besëlidhje 49:2. Dëshira që “ta dinë të vërtetën pjesërisht”

Plaku Glen L. Peis, i Të Shtatëdhjetëve, foli për rrezikun e bindjes së pjesshme ndaj këshillës profetike:

“Ka disa prej anëtarëve tanë që praktikojnë bindje të përzgjedhur. Një profet nuk është dikush që paraqet një larmi të së vërtetës nga e cila ne jemi të lirë të përzgjedhim atë që duam. Megjithatë, disa anëtarë bëhen kritikues dhe sugjerojnë që profeti duhet ta ndryshojë menynë. Një profet nuk bën një anketë për të parë se në ç’drejtim po fryn era e opinionit publik. Ai na zbulon vullnetin e Zotit. Bota është plot kisha në shkatërrim, të cilat i janë dorëzuar opinionit publik dhe janë bërë më të përkushtuara ndaj përkëdheljes së veshëve të anëtarëve të tyre sesa bindjes ndaj ligjeve të Perëndisë.

Në vitin 1831 disa të kthyer në besim dëshironin të sillnin me vete disa nga bindjet e tyre të mëparshme në Kishë. Problemi ynë sot është me anëtarët që duken shumë të cenueshëm ndaj prirjeve në shoqëri (dhe gishtave tregues që i ndjekin ata) dhe dëshirojnë që Kisha ta ndryshojë pozitën e saj për t’iu përshtatur atyre. Bari doktrinor në anën tjetër të gardhit u duket shumë i gjelbër atyre.

Këshilla e Zotit në vitin 1831 është domethënëse sot: ‘Vini re, unë ju them se ata dëshirojnë ta dinë të vërtetën pjesërisht, por jo të gjithën, sepse ata s’janë të drejtë përpara meje dhe duhet patjetër të pendohen’. (DeB 49:2.)

Ne duhet ta pranojmë të vërtetën e plotë – madje të gjithë të vërtetën – të ‘v[eshim] gjithë armatimin e Perëndisë’ (Efesianëve 6:11) dhe t’i futemi punës për ndërtimin e mbretërisë. Secili prej nesh mund ta pyesë veten: ‘A jam një ndihmues pozitiv në ndërtimin e mbretërisë në ditën tonë të kësaj periudhe ungjillore të plotësisë së kohëve?’” (“Follow the Prophet”, Ensign, maj 1989, f. 26–27).

Doktrina e Besëlidhje 49:7. “Orën dhe ditën askush s’e di”

Ju mund të doni të lexoni thënien vijuese nga Profeti Jozef Smith, duke i paralajmëruar ata që shpallin se e dinë kohën e Ardhjes së Dytë të Shpëtimtarit: “Jezu Krishti asnjëherë nuk ia zbuloi ndonjë njeriu kohën e saktë se kur do të vinte [shih Mateu 24:36; DeB 49:7]. Shkoni dhe lexoni Shkrimet e Shenjta dhe nuk mund të gjeni asgjë që detajon orën e saktë se kur do të vijë Ai; dhe të gjithë ata që e thonë atë janë mësues të rremë” (Mësimet e Presidentëve të Kishës: Jozef Smithi [2009], f. 268).

Doktrina e Besëlidhje 49:15–17. “Martesa shugurohet nga Perëndia”

Presidenti Gordon B. Hinkli e lavdëroi martesën midis një burri dhe një gruaje në thënien vijuese:

“Ç’gjë e mrekullueshme është martesa sipas planit të Atit tonë të Amshuar, një plan i siguruar sipas urtësisë së Tij hyjnore për lumturinë dhe sigurinë e fëmijëve të Tij dhe për vazhdimësinë e racës. …

Presidenti Jozef F. Smith dikur shpalli se ‘as[një burrë] nuk mund të shpëtohet dhe ekzaltohet në mbretërinë e Perëndisë pa gruan dhe asnjë grua nuk mund të arrijë përsosmërinë dhe ekzaltimin në mbretërinë e Perëndisë, e vetme. … Perëndia krijoi martesën në fillim. Ai e krijoi njeriun sipas vetë shëmbëlltyrës dhe pamjes së Tij, burrin dhe gruan; dhe në krijimin e tyre ishte caktuar se ata duhet të ishin të bashkuar në lidhjet e shenjta të martesës, dhe asnjëri nuk është i përsosur pa tjetrin.’ (Në Conference Report, prill 1913, f. 118.)

Sigurisht, askush që i lexon shkrimet e shenjta, si të lashta edhe moderne, nuk mund të dyshojë për konceptin hyjnor të martesës. Ndjenjat më të ëmbla të jetës, forcat shtytëse më bujare dhe më të kënaqshme të zemrës njerëzore, gjejnë shprehje në një martesë që qëndron e pastër dhe e panjollosur mbi ligësinë e botës.

Një martesë e tillë, unë besoj, është dëshira – dëshira e shpresuar, e dëshiruar dhe e kërkuar në lutje – e burrave dhe grave kudo” (“What God Hath Joined Together”, Ensign, maj 1991, f. 71).

Siç shprehet në deklaratën vijuese, Kisha e Jezu Krishtit e Shenjtorëve të Ditëve të Mëvonshme nuk e lejon martesën brenda së njëjtës gjini:

“Kisha ka një standard të vetëm, të pandryshueshëm të moralshmërisë seksuale: marrëdhëniet intime janë siç duhet vetëm midis një bashkëshorti e një bashkëshorteje të bashkuar brenda lidhjeve të martesës.

Kundërshtimi i Kishës ndaj martesave brenda së njëjtës gjini as nuk krijon, as nuk lejon ndonjë lloj armiqësie kundrejt burrave dhe grave homoseksualë. Mbrojtja e martesës midis një burri dhe një gruaje nuk e ndikon detyrimin e krishterë të anëtarëve të Kishës për dashuri, mirësi dhe humanizëm kundrejt të gjithë njerëzve. … Ne mund të shprehim dashuri dhe miqësi të sinqertë për një pjesëtar të familjes ose një shok homoseksual pa e pranuar praktikën e homoseksualitetit apo ndonjë ripërkufizim të martesës” (“The Divine Institution of Marriage”, mormonnewsroom.org).

Presidenti Gordon B. Hinkli na mësoi:

“Njerëzit pyesin për qëndrimin tonë ndaj atyre që e konsiderojnë veten të ashtuquajtur gej dhe lezbike. Përgjigjja ime është se ne i duam ata si bij dhe bija të Perëndisë. Ata mund të kenë disa prirje që janë të fuqishme dhe që mund të jenë të vështira për t’u kontrolluar. Shumica e njerëzve kanë prirje të një lloji apo një tjetri në periudha të ndryshme. Nëse nuk veprojnë sipas këtyre prirjeve, atëherë ata mund të shkojnë përpara siç bëjnë të gjithë anëtarët e tjerë të Kishës. Nëse i shkelin ligjin e dëlirësisë dhe standardet morale të Kishës, atëherë ata i nënshtrohen disiplinës së Kishës, sikurse i nënshtrohen të tjerët” (“What Are People Asking about Us?”, Ensign, nëntor 1998, f. 71).

Doktrina e Besëlidhje 49:18–21. Kafshët sigurohen “për përdorimin e njeriut”

Presidenti Bojd K. Paker, i Kuorumit të Dymbëdhjetë Apostujve, dha mësim:

“Të rinj, mësoni të përdorni maturi dhe mendim praktik lidhur me çështjet e shëndetit dhe të ushqyerit, dhe veçanërisht në përdorimin e ilaçeve. Shmangni të qenit të ekzagjeruar ose fanatikë, apo bërjen një maniak.

Për shembull, Fjala e Urtësisë na këshillon ta hamë mishin me pakicë (shih DeB 89:12). Që dikush të mos bëhet i ekzagjeruar, ne na është thënë në një zbulesë tjetër që ‘kushdo që urdhëron të [mos hahet mish] nuk shugurohet nga Perëndia’ (DeB 49:18)” (“The Word of Wisdom: The Principle and the Promises”, Ensign, maj 1996, f. 18).