Lesona 17
1 Nifae 16
Faatomuaga
I le mae’a ai ona tuia o latou loto i upu a Nifae, na faamaulaloina e Lamana ma Lemuelu i laua lava i luma o le Alii. Na faaauau e le aiga la latou malaga i le vao, ma sa faamanuiaina i latou e le Alii e ala i le Liahona, lea na Ia taitaia ai i latou i la latou malaga. A o latou faimalaga, na latou feagai ma faigata, e aofia ai le gau o le aufana a Nifae, lea na avea ma auala sili mo le mauaina o meaai. O le toatele o le aiga —e oo lava ia Liae—na amata ona muimui faasaga i le Alii. Na aoaia e Nifae ona uso mo le faitioina o ia, fausia se aufana fou, ma saili atu i le fautuaga a lona tama, e tusa ai ma le mea e tatau ona alu atu e tutuli ai.
Fautuaga mo le Aoaoga
1 Nifae 16:1–6
Ua tali atu Nifae i le muimui a ona uso
Fai atu i tamaiti aoga e manatunatu e uiga i se taimi na aoaiina ai i latou mo le faia o se mea sese, ma le auala na latou tali atu ai. Ona fai atu lea i se tamaitiiti aoga e faitau leotele le 1 Nifae 16:1. A o le’i faitauina, valaaulia le vasega e faalogologo mo tali a Lamana ma Lemuelu i aoaoga a Nifae. Faamanatu i tamaiti aoga na aoao atu Nifae faapea, o tagata amioleaga o le a vavaeeseina mai tagata amiotonu ma tuli esea mai le afioaga o le Atua (tagai i le 1 Nifae 15:33–36).
Valaaulia tamaiti aoga e faitau lemu le 1 Nifae 16:2. Atonu e te manao e fautua atu e makaina le faaupuga na faaaogaina e Nifae e faamatala ai le auala e tali atu ai nisi tagata i le faalogo ai i le upu moni, pe afai latou te le o ola ai.
-
O le a sou manatu o le uiga o le faapea “e ave e tagata ua sala le upumoni o se mea faigata?” O le a sou manatu o le uiga o le faaupuga “e tuia ai i latou i le totonugalemu lava”?
-
O a nisi o auala atonu tatou te tali atu ai, pe afai ua faigata ona tatou tatalia se upumoni?
Valaaulia tamaiti aoga e faitau lemu le 1 Nifae 16:3–4. Atonu e te manao e fautuaina i latou e makaina le upu afai ma le ona i le fuaiupu 3. Uunai i latou e vaavaai mo le fautuaga na tuuina atu e Nifae i ona uso, e tusa ai ma le auala e tatau ona latou tali atu ai i “mea faigata” na ia fai atu ai. Valaaulia se tamaitiiti aoga e faamalamalama i a latou lava upu le mea na aoao atu e Nifae i ona uso.
-
E tusa ai ma le 1 Nifae 16:5, na faapefea ona tali atu uso o Nifae i ana faatonuga?
-
O le a le mea ua fautua mai e le 1 Nifae 16:5 e uiga i le auala e tatau ona tatou tali atu ai, pe a “tuia ai i [tatou] i le totonugalemu lava” e le upumoni?
1 Nifae 16:7–33
Ua taitaiina e le Alii le aiga o Liae e ala i le Liahona
Valaaulia se tamaitiiti aoga e faitau leotele le 1 Nifae 16:9–10. Faapipii i luga le ata O Le Liahona (62041; Tusi Ata O Le Talalelei [2009], nu. 68). Faasino i le faauigaga a le tusiata o le Liahona
-
O a auala e te manatu ai o sea ituaiga meaalofa sa fesoasoani tele ia Liae ma lona aiga i lo latou tulaga na i ai?
Valaaulia ni nai tamaiti aoga e feauauai i le faitauina leotele mai o le 1 Nifae 16:16–19.
-
Na faapefea ona aoga le Liahona i le aiga o Liae?
-
Ina ua mae’a ona maua e le aiga o Liae le Liahona, pe sa faigofie ea la latou malaga, pe sa faigata? O le a le mea ua faamatala mai e Nifae i le 1 Nifae 16:17–19 e lagolagoina ai lau tali?
-
Aisea e te manatu ai o tagata amiotonu, e pei o Liae ma Nifae, i nisi taimi e feagai ai ma tofotofoga? (Atonu e te manao e faamalamalama atu faapea o le tele o tofotofoga tatou te faafeagai, e le faapea o taui mo filifiliga sese. Peitai ane, o ia tulaga o avanoa e aoao ma tuputupua’e ai, o se vaega o la tatou malaga i le olga faitino.)
Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo Faiaoga Seminare).
Valaaulia le afa o le vasega e sailiili le leoa le 1 Nifae 16:20–22, i le sailiaina o le auala na tali atu ai nisi o le aiga o Liae i le tofotofoga o le gausia o le aufana a Nifae. Valaaulia le isi afa o le vasega e sailiili le 1 Nifae 16:23–25, 30–32, i le sailiaina o le tali a Nifae i lenei tofotofoga, ma pe na faapefea ona aafia ai lona aiga. A uma ona lipoti mai vaega taitasi i mea na latou mauaina, fesili atu faapea:
-
O le a se mea e mafai ona tatou aoaoina mai i le faatusatusaina o nei tali e lua i le tofotofoga lava e tasi?
-
Aisea e taua ai le faapea na alu atu Nifae i lona tama mo se taitaiga, e ui lava sa muimui Liae? O a mataupu faavae e mafai ona tatou aoaoina mai lenei mea, ina ia faatatau i o tatou olaga? (Atonu e te manao e faamalamalama atu faapea, i le alu atu ai ia Liae mo le taitaiga, na faaalia ai e Nifae lona faaaloalo ia te ia, ma fesoasoani ai e faamanatu ia te ia e liliu atu i le Alii. O le saili atu i fautuaga mai matua ma taitai perisitua, e ui lava i o latou le atoatoa, o se auala o le faamamaluina o i latou ma le faatinoina o le faatuatua i le Alii.)
-
O a mataupu faavae faaopoopo e mafai ona tatou aoaoina mai le tali e Nifae i faigata na feagai ma lona aiga? (A o faasoa mai e tamaiti aoga o latou manatu, ia mautinoa ua faamamafa atu faapea afai tatou te faia mea uma e mafai ona tatou faia, ma saili atu foi i le taitaiga a le Alii, ona Ia fesoasoani mai lea ia i tatou i o tatou faigata.)
Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo le Faiaoga Seminare).
Fai i se tamaitiiti aoga e faitau leotele le 1 Nifae 16:26–29. Valaaulia le vasega e vaavaai mo auiliiliga e uiga i le auala na faaaogaina ai e le Alii le Liahona e taitai ai le aiga o Liae. Ina ia fesoasoani i tamaiti aoga e malamalama ma faaaoga mea ua aoao mai e nei fuaiupu e uiga i le mauaina o le taitaiga a le Alii, fai atu fesili nei:
-
O le a le eseesega i le va o le mulimuli i le taitaiga a le Alii ma le le manatu i ai, ma le mulimuli i le taitaiga a le Alii ma le faatuatua ma le filiga?
Valaaulia tamaiti aoga e faitau le leoa le 1 Nifae 16:29, Alema 37:6–7, ma le Alema 37:38–41, ma vaavaai mo mataupu faavae ua aoaoina mai i mau uma e tolu.
-
O le a le mataupu faavae ua aoao mai i nei mau e tolu? (Ia mautinoa ua malamalama tamaiti aoga faapea e ala i auala faatauvaa, e mafai e le Alii ona faataunuu ai mea tetele. Atonu e te manao e tusi lenei mataupu faavae i luga o le laupapa.)
-
E tusa ai ma nei fuaiupu, o a “ala faatauvaa” ua saunia e le Alii ina ia tuuina mai ai ia i tatou le taitaiga?
Tusi fesili nei i luga o le laupapa, ma ia faamanino atu o fesili taitasi o loo i ai se upu, po o se faaupuga o loo misi. (Atonu e te manao e faia lenei gaoioiga a o le i amataina le vasega.)
-
O a ni auala se lua pe tolu faapea … e tutusa ai ma le Liahona?
-
O a nisi o mea atonu e mafua ai ona misi ia i tatou savali taua mai ia … ?
-
O anafea na faamanuiaina ai oe e ala i le mulimuli atu i le taitaiga a … ?
Vaevae le vasega i vaega se tolu, ma ia i ai se taitai mo vaega taitasi. Tuu atu i taitai taitasi se kopi o se tasi o nei galuega fai, lea o le a suesue ai e la latou vaega se “ala faatauvaa” lea e faaaogaina e le Alii e taitai ai i tatou. (Afai e toatele la outou vasega, atonu e te manao e vaevae tamaiti aoga i le sili atu i le tolu vaega, ina ia faaitiitia ai le tetele o vaega. Afai e te faia lena mea, o le a manaomia lou tuuina atu i le tasi po o le sili atu o vaega, le galuega lava e tasi.)
Vaega 1: O se Faamanuiaga Faapeteriaka
Faitau atu i le vaega le faamatalaga lenei mai ia Peresitene Thomas S. Monson:
“O le Alii lava e tasi lea na saunia le Liahona mo Liae, ua ia saunia mo oe ma a’u i aso nei se meaalofa lē taatele ma taua e aumaia le taitaiga i o tatou olaga, e faailoa ai ala faigata i lo tatou saogalemu—e le o se ala i se nuu folafolaina, ao lo tatou aiga i le lagi. O le meaalofa la o loo ou faasino i ai, o lou faamanuiaga faapeteriaka lea. …
E le tatau ona gaugau faalelei lou faamanuiaga ma teuina.E le tatau ona faavaa pe faaali foi i tagata.Ae, e tatau ona faitauina.E tatau ona e auau i ai.E tatau ona mulimuli i ai. O lou faamanuiaga faapeteriaka e fesoasoani ia te oe i po pogisa.Na te taitaia oe mai mea matautia o le olaga. … O lou faamanuiaga faapeteriaka o se Liahona patino lea ia te oe lava e faasino ai lou ala ma taitai ai oe” (“O Lou Faamanuiaga Faapeteriaka: O Se Liahona o le Malamalama,” Liahona, Ian. 1987, 65–67).
Ia faafetaui fesili o loo i luga o le laupapa, ina ia faatatau i faamanuiaga faapeteriaka. I le avea ai o se vaega, talanoa i na fesili. Tofi se tagata se toatasi i la outou vaega e faasoa mai i le vaega o totoe o le vasega, mea na aoaoina e la outou vaega. Ia valaaulia foi se tagata mai la outou vaega e faasoa mai sona ia lava aafiaga mai le fesili e 3.
Vaega 2: O Tusitusiga Paia ma Saunoaga a Perofeta o Aso e Gata Ai
Faitau atu i le vaega le faamatalaga lenei mai ia Elder W. Rolfe Kerr o le Fitugafulu:
“E mafai ona avea afioga a Keriso ma Liahona mo i tatou taitoatasi, e faasino mai ia i tatou le ala. Aua nei o tatou faapaie ona o le faigofie o le ala. Ia tatou tuuina ma le faatuatua ia afioga a Keriso i totonu o o tatou mafaufau ma loto, e pei ona tusia i tusitusiga paia ma e pei foi ona fofogaina mai e perofeta soifua, tagata vaai ma talifaaaliga. Ia tatou faatuatua ma maelega i le fiafia ai i afioga a Keriso, aua o afioga a Keriso o le a avea ma o tatou Liahona faaleagaga, latou te tau mai ia i tatou mea e tatau ona tatou faia” (“O Afioga a Keriso—O La Tatou Liahona Faaleagaga” Ensign po o le Liahona, Me 2004, 37).
Ia faafetaui fesili o i luga o le laupapa ina ia faatatau i tusitusiga paia ma saunoaga a perofeta o aso e gata ai. I le avea ai o se vaega, talanoa i na fesili. Tofi se tagata se toatasi i la outou vaega e faasoa mai i le isi vaega o le vasega, mea na aoaoina e la outou vaega. Ia valaaulia foi se tasi mai la outou vaega e faasoa mai ona aafiaga mai le fesili lona 3.
Vaega 3: O Le Agaga Paia
Faitau i le vaega le faamatalaga lenei mai ia Elder David A. Bednar o le Korama a Aposetolo e Toasefululua:
“A o tatou taumafai ina ia ogatasi o tatou uiga faaalia ma faatinoga ma le amiotonu, ona avea lea o le Agaga Paia mo i tatou i aso nei, e faapei ona faia e le Liahona mo Liae ma lona aiga i o latou taimi. O mea tonu lava na mafai ai ona galue le Liahona mo Liae, o le a faapena foi ona valaaulia ai le Agaga Paia i o tatou olaga. O mea tonu foi na mafua ai ona le galue le Liahona i ona po anamua, o le a faapea foi ona tatou aveesea ai i tatou lava mai le Agaga Paia i ona po nei” (“Ina ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 30).
Faafetaui fesili o i le laupapa ina ia faatatau i le Agaga Paia. I le avea ai o se vaega, talanoa i na fesili. Tofi se tagata e toatasi i la outou vaega e faasoa mai i le isi vaega o le vasega mea na aoaoina e la outou vaega. Ia valaaulia foi se tasi mai la outou vaega e faasoa mai ona aafiaga mai le fesili e 3.
Faaaliga mo le Faiaoga: A uma le ono po o le valu minute, fai atu i vaega taitasi e aoao atu i le vasega mea na latou aoaoina mai la latou talanoaga. Atonu foi e te manao e valaaulia tamaiti aoga e tusi i totonu o a latou api talaaga mo le suesueina o tusitusiga paia, po o api e tusi ai faamatalaga i le vasega, e uiga i se taimi na taitaiina ai i latou e le Alii e ala i ala faatauvaa. Ia mafaufau e faamatala atu e uiga i se taimi na e mauaina ai le taitaiga mai le Alii e ala i ala faatauvaa.
Tala ma Faamatalaga o Talaaga
1 Nifae 16:10. O se Liahona tau le tagata lava ia
Sa faatusaina e Peresitene Spencer W. Kimball o tatou lagona loloto i le Liahona:
“E ao ona outou iloaina o loo ia te outou se mea e faapei o le tapasa, faapei o le Liahona, i totonu ia te outou. O tamaiti taitasi ua tuuina atu i ai lena mea. Pe a valu tausaga le matua, ua ia iloa le lelei mai le leaga, pe afai sa lelei ona aoaoina o ia e ona matua. Afai na te le amanaiaina le Liahona ua faapea ona i ai i totonu ia te ia, atonu o le a le lagonaina e ia o musumusu atu ia te ia. Ae, afai tatou te manatuaina faapea o i tatou taitoatasi ua i ai le mea e taitaiina o ia e faia le mea sa’o, o lo tatou vaa o le a le sese lava lona alavaa, ma o le a le oo mai le mafatia, ma o fulu a u o le a le gausia, ma o aiga o le a le fetagisi i le fiaaai—pe afai tatou te faalogo atu i taitaiga a a tatou Liahona, lea ua tatou taua o lagona loloto” (“Our Own Liahona,” Ensign,Nov. 1976, 79).