Lesona 146
Eteru 4–5
Faatomuaga
Na poloaiina e le Alii ia Moronae e faamaufaailogaina faamaumauga o faaaliga o le uso o Iareto, ma faamalamalama atu o nei tusitusiga o le a faaalia pe a maua e tagata le faatuatua e pei o le uso o Iareto. Na vavalo Moronae o le a molimauina e molimau e toatolu le moni a’ia’i o le Tusi a Mamona i aso e gata ai.
Fautuaga mo le Aoaoga
Eteru 4:1–7
Ua faamaumau ma faamaufaaailogaina e Moronae le tala atoa o le faaaliga a le uso o Iareto
Valaaulia tamaiti aoga e mafaufau i se mea faitino e pito sili ona taua ia i latou po o o latou aiga ma atonu e latou te mananao e puipuia mai le oo i ai o tamaiti laiti. Mo se faataitaiga, atonu e te manao e faaali pe faamatala se mea e taua ia te oe.
-
Aisea o le a e le manao ai e taulimaina e se tamaitiiti lena mea faitino?
-
O a mea o le a manaomia ona aoao pe faia e se tamaitiiti ae e te le i faatuatuaina o ia i lena mea faitino?
Faamalamalama atu o upumoni o le talalelei e taua i le Alii. Ua Ia finagalo e faasoaina uma mai ia i tatou, peitai, e Na te faatali seia tatou saunia e mauaina i latou. A o suesue e tamaiti aoga le Eteru 4 i le aluga o lenei lesona, fautuaina i latou e vaavaai mo mataupu faavae e mafai ona fesoasoani ia i latou e saunia ai e maua upumoni mai le Alii.
Valaaulia se tamaitiiti aoga e faitau le Eteru 4:1–5, ma fai atu i le vasega e vaavaai mo mea na poloaiina ai e le Alii ia Moronae ia faamaumau ma faamaufaaailogaina.
-
O le a le mea sa poloaiina ai Moronae e “faamaufaaailogaina”?
Faamalamalama atu na aofia e Moronae faamaumauga o le uso o Iareto i le mea e masani ona faaigoaina o le vaega ua faamaufaaailogaina o le Tusi a Mamona. (Atonu e te manao e faaali le siata ua faaautuina o Punavai o le Tusi a Mamona, lea o loo maua i le faaopoopoga i le faaiuga o lenei tusi lesona.)
-
Na faapefea ona faamatalaina e Moronae mea sa vaaia e le uso o Iareto? (Tagai Eteru 4:4.)
Ina ia fesoasoani i tamaiti aoga e aoao atili e uiga i le mea na faaalia e le Alii i le uso o Iareto, valaaulia i latou e faitau leleoa le Eteru 3:25–26 ma le 2 Nifae 27:8–10. Ona fesili atu lea o fesili nei:
-
E tusa ai ma le Eteru 3:25–26, o a mea na faaali atu e le Alii i le uso o Iareto?
-
E tusa ai ma le 2 Nifae 27:10, o a mea o loo i ai i le vaega ua faamaufaaailogaina o le Tusi a Mamona?
Valaaulia se tamaitiiti aoga e faitau leotele le Eteru 4:6–7. Fai atu i le vasega e mulimuli i le faitauga ma faailoa le tulaga e tatau ona i ai ao le i faailoaina faaaliga na tuuina atu i le uso o Iareto. Atonu e te manao e fautuaina tamaiti aoga e faailoga mea ua latou maua i a latou tusitusiga paia.
-
O a tulaga na e mauaina?
-
O a mataupu faavae e uiga i le mauaina o faaaliga e mafai ona tatou aoao ai mai lenei fuaitau? (Fesoasoani i tamaiti aoga ia iloa a o tatou salamo ma faatinoina le faatuatua ia Iesu Keriso, e mafai ona tatou maua faaaliga faaopoopo.
-
Aisea e te manatu ai e manaomia ona tatou salamo ma mama ina ia maua faaaliga faaopoopo?
Ina ia fesoasoani i tamaiti aoga ia malamalama i le uiga o le “faaaoga ai le faatuatua … e pei ona faia e le uso o Iareto” (Eteru 4:7), valaaulia i latou e lisi i a latou api e tusi ai faamatalaga po o api talaaga mo le suesueina o tusitusiga paia le tele o auala e mafai ona latou manatua na faaalia ai e le uso o Iareto le faatuatua i le Alii. Atonu e te manao e fautua i latou e iloilo le Eteru 1–3 a o latou tuufaatasia o latou lisi. Pe a lava le taimi na latou mafaufau loloto ma tusitusi ai, valaaulia ni nai tamaiti aoga e faitau nisi o faataitaiga ua latou lisiina ma ia faamalamalama pe aisea ua faafiafiaina ai i latou e na faataitaiga.
Faamanatu i tamaiti aoga le mea faitino taua na latou mafaufau i ai i le amataga o le lesona ma le tulaga o le a latou faatuatuaina ai ma se tamaitiiti. Molimau i lena lava ala, e manaomia e le Alii Ana fanau ina ia ola ai i tulaga patino ao le i faaalia e Ia upumoni uma ia i latou. Na te moomia i tatou e faatino lo tatou sauniuniga faaleagaga ma le faatuatua.
Eteru 4:8–19
Ua aoao mai e le Alii le mea e tatau ona tatou faia ia maua ai nisi faaaliga
U’u i luga se fasi ieie. Faamalamalama sa aoaoina e le Alii mataupu faavae lea e mafai ona fesoasoani ia i tatou ia maua faaaliga. Ina ua Ia aoaoina nei mataupu faavae, sa Ia fa’atatauina i se veli. O se veli o se pupuni po o se fasi ieie lea e faaaoga e ufi ai pe nana ai se mea.
Valaaulia tamaiti aoga e faitau leleoa le Eteru 4:15 ma sue le fasifuaitau o loo aofia ai le upu veli.
-
O le a le ituaiga o veli na fa’atatau i ai le Alii? (O se “veli o le le talitonu.”) E faapefea ona avea le le talitonu e pei o se veli?
-
O le uiga o le upu saeia o le sasae pe vavaeina. O le a lou manatu i le uiga o le “saeia [le] veli o le le talitonu”?
Valaaulia se tamaitiiti aoga se toatasi e faitau leotele le Eteru 4:8, o le isi e faitau leotele le Eteru 4:11, ma le isi e faitau leotele le Eteru 4:15. Fai atu i le vasega e mulimuli i le faitauga ma faailoa mea e mafai ona taofia ai i tatou mai le mauaina o faaaliga ma mea e mafai ona fesoasoani ia i tatou ia “saeia [le] veli o le le talitonu” ma mauaina le tele atu o faaaliga.
-
O le a sou manatu i le uiga o le “finau tetee i le afioga a le Alii”? (Eteru 4:8).
-
E tusa ai ma Eteru 4:8, o a taunuuga e feagai mai tatou pe a tatou finau tetee i le afioga a le Alii?
-
E tusa ai ma Eteru 4:11, o le a se faamanuiaga se tasi ua tatou mauaina pe a tatou talitonu i afioga a le Alii?
Tusi le faamatalaga e lei uma lenei i luga o le laupapa:
Pe a tatou talitonu i afioga a le Alii, …
Fai atu i tamaiti aoga e faauma lenei faamatalaga e tusa ma mea sa latou aoaoina i nei fuaiupu. E ui atonu o le a eseese tali a tamaiti aoga, ia mautinoa ua latou faailoa le mataupu faavae lenei: Pe a tatou talitonu i afioga a le Alii, o le a faamanuiaina i tatou i faaaliga sili atu. Tusi lenei mataupu faavae i le laupapa. Atonu e te manao foi e fautuaina tamaiti aoga e tusi i a latou tusitusiga paia i talaane o Eteru 4:11.
Ina ia fesoasoani i tamaiti aoga ia malamalama i lenei mataupu faavae, fesili atu:
-
Aisea e te manatu ai e manaomia ona tatou talitonu i upumoni ua tatou mauaina ao le i tuuina mai e le Alii nisi [upu moni]?
Fai atu i se tamaitiiti aoga e tusi i luga o le laupapa faataitaiga o loo i lalo o le faatinoina o le faatuatua i afioga a le Alii: suesuegina o le tagata lava ia o tusitusiga paia; mulimuli i musumusuga mai le Agaga Paia; mulimuli i taitai o le Ekalesia o le lotoifale; suesueina o tusitusiga paia i le lotu ma le seminare; mulimuli i upu a perofeta o aso e gata ai.
Valaaulia tamaiti aoga e mafaufau loloto pe faapefea i le faatinoina o le talitonu i afioga a le Alii i se tasi o auala nei ona taitaiina ai i latou ia maua faaaliga e tele. Fautuaina ni nai tamaiti aoga e faasoa mea na latou aafia ai.
Toe tagai i le faataitaiga sa tusia i le laupapa. Fai i tamaiti aoga e mafaufau i na faataitaiga ao latou mafaufau loloto leleoa pe na lelei lo latou faaalia o lo latou talitonu i afioga a le Atua. Fautua atu mo faataitaiga taitasi, latou te fuaina i latou i se fua o le 1 e oo i le 10, faatasi ai ma le fuaina i le 10 o lona uiga ua faatatau le faataitaiga i se mea ua sili ona lelei ua latou faia. Valaaulia tamaiti aoga e tusi i api e tusi ai faamatalaga po o api talaaga mo le suesueina o tusitusiga paia se auala se tasi e mafai ona latou faaalia ai le faatuatua sili atu i taiala sa latou mauaina mai le Alii. Faasoa lau molimau i le mataupu faavae sa e tusia i le laupapa, ma fautuaina tamaiti aoga e mulimuli i a latou sini sa latou tusiaina.
Tape le fasifuaitau “talitonu i afioga a le Alii” mai le laupapa. Faamanino atu na aoaoina e le Alii mataupu faavae faaopoopo e uiga i le mauaina o faaaliga. Fai atu i tamaiti aoga e faitau leleoa le Eteru 4:13–15, ma saili mo isi mea e mafai ona latou faia ina ia maua ai faaaliga mai le Alii.
Pe a lava le taimi na faitau ai tamaiti aoga, fai atu ia i latou e fautuaina mai auala e faauma ai le faamatalaga. O tali e mafai ona aofia ai mataupu faavae nei: Pe a tatou o mai i le Alii, o le a faamanuia i tatou e le Alii faatasi ai ma faaaliga faaopoopo. Pe a tatou tatalo ma le faamaualalo, o le a faamanuiaina i tatou e le Alii ma se faaaliga faaopoopo.
Ina ia fesoasoani i tamaiti aoga ia malamalama lelei i nei mataupu faavae, mafaufau e fesili atu fesili nei:
-
O le a le uiga o le o mai i le Alii ia te oe? (O tali e mafai ona aofia ai le suesueina o Ana afioga, liliu atu o o tatou loto ia te Ia, salamo, ma mulimuli ma usiusitai ia te Ia.)
-
O le a le uiga o le i ai o se loto momomo ma se agaga salamo? (Ia lotomaualalo, salamo, ma talia gofie le finagalo o le Alii.) Aisea e manaomia ai nei uiga a o tatou tatalo mo faaaliga faifai pea mai le Alii?
Valaaulia tamaiti aoga e mafaufau pe faapefea ona mafai e i latou ona faaaofia nei mataupu faavae i o latou taumafaiga ia maua faaaliga.
Otooto le Eteru 4:17–19 e ala i le faamalamalamaina na folafolaina e le Alii o le oo mai o le Tusi a Mamona o le a avea ma se faailoga ua amataina le galuega o aso e gata ai a le Atua. Na Ia tauanauina tagata uma ia salamo ma o mai ia te Ia.
Eteru 5
Na folafolaina e Moronae o le a vaai ma molimauina e molimau e toatolu ia papatusi
U’u i luga le ata o Iosefa Samita o loo Faaliliuina le Tusi a Mamona (Tusi Ata o le Talalelei [2009], nu. 92). Valaaulia se tamaitiiti aoga e faitau leotele le Eteru 5:1–3. Fai i le vasega e mulimuli i le faitauga ma vaavaai faalemafaufau pe na faapei le faaliliuina e Iosefa Samita o le Tusi a Mamona ma iloa na faatatau le tusiaina o lenei fautuaga ia te ia e Moronae i le silia ma le 1,400 tausaga na muamua atu.
-
O le a le saunoaga a Moronae e uiga i papatusi na ia “faamaufaaailogaina”?
-
E tusa ai ma Eteru 5:2–3, o a avanoa na mafai na faia e Iosefa i papatusi?
Fai i tamaiti aoga e faalau mai igoa O Le Mau A Molimau e Toatolu o le Tusi a Mamona ma manatunatu i a latou aafiaga. (Afai e manaomia e tamaiti aoga le fesoasoani, valaaulia i latou e faitau “O Le Mau A Molimau e Toatolu” i le pito i luma o le Tusi a Mamona.) Atonu e te faamalamalama atu o le faaopoopoga i Mau A Molimau e Toatolu, na molimauina e isi le moni o papatusi auro, e aofia ai sui o le Aiga Atua (tagai Eteru 5:4), Moronae (tagai Eteru 5:6), Iosefa Samita, ma Mau A Molimau e Toavalu.
-
O a auala e mafai ai ona avea oe ma se molimau o le Tusi a Mamona, e tusa lava pe e te le i vaaia papatusi? E faapefea e lau molimau o le Tusi a Mamona ona uunaia isi tagata?
Ina ia faaiuina lenei lesona, fai atu i nai tamaiti aoga e faasoa o latou molimau i le Tusi a Mamona.
Tala ma Faamatalaga o Talaaga
Eteru 5. O Le Mau a Molimau e Toatolu
Sa saunoa Peresitene James E. Faust o le Au Peresitene Sili:
“Ina ua avea ma se alii talavou o le Perisitua Arona, na ou mauaina ai le uluai faamautuina o mau maoae a molimau e toatolu e faatatau i le Tusi a Mamona. O la’u peresitene o le siteki o Peresitene Henry D. Moyle, ma o lona tama o James H. Moyle. I le taimi o le taumafanafana, e asiasi atu ai le Uso o James H. Moyle i lona aiga, ma e tapuai faatasi o ia ma i matou i la matou uarota toalaiti i le itu i saute i sasae o le Vanu o Sate Leki.
“I se tasi Aso Sa, na fetufaai ma iai e le Uso o James H. Moyle se mea e tasi tulaga ese na oo ia te ia. I le avea ai ma se alii talavou sa ia alu atu ai i le Iunivesite o Michigan e suesue ai i tulafono. A o ia faamae’aina ana aoaoga, sa ta’u atu e lona tama ia te ia faapea o Tavita Uitimera, o se tasi o molimau o le Tusi a Mamona, o loo soifua pea. Na fautua atu le tama i le atalii ina ia afe i lana malaga lea e toe foi mai ai i le Aai o Sate Leki e asiasi ia Tavita Uitimera la te fesagai ai. O le faamoemoega o le Uso o Moyle o le fesili atu lea ia te ia e uiga i lana molimau e faatatau i papatusi auro ma le Tusi a Mamona.
“I le taimi o lena asiasiga sa faapea atu ai le Uso o Moyle ia Tavita Uitimera: ‘Alii e, o oe o se toeaina matua, ae o a’u o se alii talavou. Sa ou suesue e uiga i lau mau i le avea ai ma se tasi o molimau o le Tusi a Mamona. Faamolemole tau mai ia te au mea moni e uiga i lau mau o se tasi o molimau o le Tusi a Mamona.’ Ona ta’u atu lea e Tavita Uitimera i lenei alii talavou: ‘Ioe, sa ou uuina ia papatusi auro i o’u lima, ma sa faaali mai ia i matou e se agelu. O la’u molimau e faatatau i le Tusi a Mamona e moni.’ Sa le toe avea Tavita Uitimera ma se tagata o le Ekalesia, ae na te le’i teenaina ai lana molimau i le asiasiga a le agelu, o le taulimaina o le papatusi auro, po o le moni o le Tusi a Mamona. O le faalogoina i o’u lava taliga o lenei mea ofoofogia na tupu mai laugutu o le Uso o Moyle sa i ai se aafiaga malosi i la’u molimau tuputupua’e. O le faalogo atu i ai, na ou lagonaina ai o sa’u matafaioi le taitonu i ai (“O Se Molimau Tuputupua’e,” Liahona, Ian. 2001, 69).
Na saunoa mai Peresitene Henry B. Eyring o le Au Peresitene Sili:
“E lei teenaina lava e molimau e toatolu la latou mau e uiga i le Tusi a Mamona. Latou te lei mafaia aua sa latou iloa e moni. Sa latou faia ni osigataulaga ma feagai ma faigata e sili atu nai lo mea ua iloa e le toatele o tagata. Na tuuina atu foi e Oliva Kaotui lena lava molimau i le paia o le pogai o le Tusi a Mamona a o taoto o ia ua tali oti. … … Sa latou faaauau pea ona faamautuina le mea na latou vaai ma faalogo i ai i lena aafiaga ofoofogia, i le gasologa o vaitaimi uumi o le o ese mai le Ekalesia ma Iosefa, sa faateteleina ai le malosi o le latou molimau” (“O Se Molimau Malosi i le Misiona a le Perofeta o Iosefa,” Ensignpo o leLiahona,Nov. 2003, 90).