Gaoioiga o Mau Tauloto

Faatomuaga

E tuuina mai e lenei vaega ni manatu e mafai ona faaaoga e fesoasoani ai i tamaiti aoga i le taulotoina o fuaitau o mau autu. Ao e fesoasoani atu ma faamalosiau tamaiti aoga e atiina ae matata nei, o loo e fesoasoani ia te i latou ia faalagolago i le tagata lava ia i o latou suesuega o tusitusiga paia. E mafai ona faaaoga e tamaiti aoga tomai faatauloto nei i o latou olaga ia faigofie ai ona sailia, malamalama, faaaoga, ma taulotoina fuaitau i totonu o tusitusiga paia. O metotia faafaiaoga mo elemene taitasi o mau tauloto o loo lisiina i lalo. O le faaaogaina o ituaiga eseese o nei gaoioiga e fesoasoani ai i tamaiti aoga ia faamanuiaina atili i le taulotoina o mau fuaitau.

Gaoioiga e Fesoasoani i Tamaiti Aoga Sailia Fuaitau o Mau Tauloto

Faailogaina o Fuaitau

O le makaina o fuaitau o mau tauloto e mafai ona fesoasoani ai i tamaiti aoga e manatua ai nei fuaitau ma sili atu ona vave le sailia. Manatunatu e fautuaina tamaiti aoga e makaina fuaitau autu nei i ā latou tusitusiga paia i se auala e ese ai mai i isi fuaitau ua latou makaina.

Iloaina o Tusi

O le taulotoina o igoa ma le faasologa o tusi i le Tusi a Mamona e mafai ona fesoasoani i tamaiti aoga ia sili atu ona vave le sailia o fuaitau o mau tauloto. O faataitaiga nei o gaoioiga e mafai ona fesoasoani i tamaiti aoga e faamasani ai ma tusi i totonu o le Tusi a Mamona:

Saili le Faasologa o Anotusi — Fesoasoani i tamaiti aoga e su’e le faasologa o le anotusi i le Tusi a Mamona, o loo faaulutalaina “O Igoa ma le Faasologa o Tusi i le Tusi a Mamona.”
Usu se Pese — Aoao atu i tamaiti aoga le pese “O Tusi i le Tusi a Mamona ” (Tusipese ā Tamaiti, 119). Ia pepese soo ai i le aluga o le tausaga ina ia fesoasoani ia i latou e manatua ai igoa ma le faasologa o tusi i le Tusi a Mamona.
Faaaoga Mata’itusi Muamua — Tusi mataitusi muamua o tusi i le Tusi a Mamona i luga o le laupapa (1N, 2N, I, E, ma faasolo ai lava). Tuu atu i tamaiti aoga e faataitai le tauina o igoa o tusi e talafeagai ma mataitusi taitasi. Toe fai ma toe fai lenei gaoioiga seia mafai ona latou faaleoina igoa o tusi mai i o latou manatuaga.
Suega Tusi — Fa’alau se tusi e tasi o loo iai se fuaitau o mau tauloto, ma tuuina atu i tamaiti aoga e tatala ā latou tusitusiga paia i soo se itulau i lena tusi. Taimi pe o lea le umi e sueina ai e le vasega atoa tusi taitasi. E mafai ona fai soo lenei gaoioiga ina ia mafai ona atamamai tamaiti aoga i le manatuaina ma le sueina o tusi i le Tusi a Mamona.

Manatuaina o Mau ma Anotusi

Ao aoaoina e tamaiti aoga le mea e maua ai ma anotusi o fuaitau o mau tauloto, o le ā fesoasoani le Agaga Paia ia te i latou e manatua mau faasino pe ā manaomia (tagai le Ioane14:26). Upu taua poo fasifuaitau, e pei o le “O le ou alu ma fai” (1 Nifae 3:7) ma “saoloto e filifili” (2 Nifae 2:27) e fesoasoani i tamaiti aoga ia manatua ai le anotusi ma aoaoga faaleaoaoga faavae o fuaitau taitasi. O metotia nei e mafai ona fesoasoani i tamaiti aoga e faafesootai mau tauloto faasino ma latou anotusi o upu autu. (Atonu e te manao e tuuese gaoioiga e aofia ai le faatautava, tuuga, po o le tuu taimiina mo se taimi mulimuli ane i le tausaga, pea maea ona faaali mai e tamaiti aoga ua latou iloa le mea e maua ai fuaitau o mau tauloto. O na ituaiga gaoioiga o lea fesoasoani e faamalosia mea na latou aoaoina.)

Faasino Upu ma Upu Autu — Fautuaina tamaiti aoga e tauloto faasino upu ma upu autu o fuaitau o mau tauloto taitasi o loo lisiina i luga o kata o mau tauloto. (Kata o mau tauloto e mafai ona okaina i le initoneti i le store.lds.org. E mafai foi ona tuuina atu i tamaiti aoga e fatuina ā latou lava seti o kata o mau tauloto.) Tuu atu i tamaiti aoga le taimi e aoao ai kata ma sana soa ona fai lea e le isi le suega ā le isi. Fautuaina tamaiti aoga ia faaoaina i auala la te aoao faatasi ai ma suesueina ai e le tasi le isi. Ao atili ai lo latou atamamai i fuaitau o mau tauloto, atonu e te valaaulia i latou e faaaoga faaataataga e aofia ai talaaga po o le faaaogaina o aoaoga faavae ma mataupu faavae mai fuaitau. O le tagata o loo suesueina e mafai ona tali gutu mai pe tusitusi foi.
Kata o Mau Tauloto — O lenei gaoioiga e mafai ona faaaoga e faailoa ai pe iloilo ai se seti o fuaitau o mau tauloto. Fili se fuainumera o kata o mau tauloto, ma saunia e tufatufa atu i au tamaiti aoga. (Faamautinoa ua tele au kopi o kata taitasi ina ia tutusa fuaitau o mau tauloto e maua e le toatele o tamaiti aoga. Atonu e te manao e lava kata mo tamaiti taitasi ina ia lua pe tolu fuaitau eseese e maua.) Tufa atu i le vasega. Tuu atu se taimi i tamaiti e suesue ai le fuaitau o mau tauloto, faasino upu, o upu taua, faamatalaga o le talaaga, aoaoga faavae po o le mataupu faavae, ma le manatu i le faaaogaina o loo i luga o le kata taitasi. Faalau atu ni faaataataga mai kata (mo se faataitaiga, o upu mai fuaitau o mau tauloto po o upu autu, talaaga, aoaoga faavae po o mataupu faavae, po o le faaaogaina). O tamaiti e iai le kata fesootai e tatau ona tulai ma faaleoina leo tele le faasino upu o mau tauloto.
Suega Mau — Faaaoga faaataataga e fesoasoani ai i tamaiti aoga e faataitai ai le vave ona su’eina fuaitau i a latou tusitusiga paia. Mo faaataataga, e mafai ona e faaaogaina upu autu, faamatalaga o talaaga, aoaoga faavae ma mataupu faavae, ma manatu mo le faaaogaina mai kata o mau tauloto. E mafai foi ona fai lava e oe au lava faaataataga. O gaoioiga o suega mau lea e mili ai tamaiti aoga e sue fuaitau e mafai ona fesoasoani ia i latou e naunau e auai i le aoaoina o fuaitau o mau tauloto. Pe ā faaaogaina gaoioiga o suega mau e fesoasoani i mau tauloto, ia faia i se auala e le faamanualia ai lagona o seisi pe faatiga i le Agaga. Fesoasoani i tamaiti e aloese mai le le faaaloalo i le faaaogaina o latou tusitusiga paia po o le tele o le manatu faatautava. Faapena ona mafaufau e tauva tamaiti agai i se tulaga faatonuina nai agai i le isi. Mo se faataitaiga, e mafai ona mili tamaiti aoga ma le faiaoga, pe e te tuu atu e tauva poo lea se pasene o le vasega e mauaina se fuaitau patino i se taimi faatulagaina.
Suega Tala — Tuu atu ni faaataataga e ala i le faia o ni tala e faailoa ai le talafeagai o fuaitau o mau tauloto i le olaga o aso uma. Mo se faataitaiga, o se faaataataga mo le 1 Nifae 3:7, e mafai ona e faapea atu, “E iloa e Ioane ua poloaiina e le Alii ia alii talavou uma e faataunuu se misiona, ae ua ia popole o lea avea lona matamuli ma mea e le mafai ai ona lelei lana auaunaga. Ona ia manatua lea le ala na tali ai Nifae i le misiona faigata o le aumaia o papatusi apamemea. Ua faamalosia Ioane o lea saunia e le Alii se auala mo ia e avea ai ma se faifeautalai talenia.” Āo faalogologo tamaiti i tala, tuu atu ia i latou e saili fuaitau o mau tauloto i ā latou tusitusiga paia.
Suega Puupuu ma Suega — Tuu atu le avanoa i tamaiti aoga e suesue ai lo latou manatuaga i fuaitau o mau tauloto. O faaataataga e mafai na aofia ai upu autu poo mau faasino, upusii mai fuaitau, po o tala e faailoa ai upumoni o loo aoaoina i fuaitau. O suega puupuu ma suega e mafai ona tuu gutu atu, i luga o le laupapa, po o i luga o pepa. Ā maea ona faia se suega puupuu po o le suega, mafaufau e tuufaatasi tamaiti e maualuluga ā latou togi ma tamaiti e maualalalo ā latou togi. O le tamaitiiti aoga e maualuga lona togi e mafai ona fai ma faiaoga e fesoasoani i tamaiti aoga e maualalalo ā latou togi e aoao ma faaleleia ai. O se vaega o lenei taumafaiga, e mafai ai foi ona faatuina se sini e le paga ina ia ausia se togi tuufaatasi maualuga atu i le isi suega. Mafaufau e fatuina se siata poo se laupapa puletini e faalauiloa ai sini ā tamaiti aoga ma amanaiaina ai lo latou taumafaiga.

Gaoioiga e Fesoasoani i Tamaiti Aoga ia Malamalama i Fuaitau o Mau Tauloto

Faauigaga o Upu ma Fasifuaitau

Faauigaga o upu ma fasifuaitau i totonu o fuaitau o mau tauloto (po o le fesoasoani i tamaiti e faamatala mai le uiga) o lea fesoasoani i tamaiti e malamalama ai i le uiga o le fuaitau atoa. Afai e faigata ona malamalama i aoaoga faavae ma mataupu faavae i se fuaitau, atonu e te manao e fautuaina tamaiti aoga e tusia nei faauigaga i a latou tusitusiga paia. Iloilo uiga o upu ma fasifuaitau ao e iloiloina fuaitau o mau tauloto.

Iloaina o Talaaga

O le iloaina o le talaaga o se fuaitau o tusitusiga paia e mafai ona fesoasoani e malamalama atili ai tamaiti aoga i le uiga o le fuaitau. O talaaga e aofia ai faamatalaga e uiga i le o saunoa i ai ma o ai ma pe aisea, le nofoaga o le fuaitau (talafaasolopito, aganuu, ma le siosiomaga), ma le fesili poo le tulaga na malu ae ai le anotusi o le fuaitau o tusitusiga paia. Mo se faataitaiga, o le talaaga o 1 Nifae 3:7 e aofia ai le faamaoniga faapea na fesiligia Nifae e lona tama, o Liae, o le sa avea ma se perofeta, e toefoi atu i Ierusalema e faasaoina papatusi apamemea. O le iloaina o lenei faamatalaga e mafai ona fesoasoani i tamaiti aoga e malamalama atili ai i le uiga na ala ai ona faapea mai Nifae, “O lea ou alu ma faia mea ua poloaiina ai au e le Alii.” Ao e aoaoina atu lesona ma faaaofia fuaitau o mau tauloto, faamamafa le talaaga o loo siomia ai na fuaitau. O gaoioiga faaopoopo e pei o lena o loo i lalo o lea fesoasoani foi i tamaiti aoga e malamalama ai i fuaitau autu.

Iloaina o Talaaga — Tusi ulutala nei i le pito i luga o le laupapa: Lauga, Au Matamata, Faamoemoega, Isi Fesoasoaniga Aoga. Vaevae le vasega i kulupu, ma tofi atu se fuaitau o mau tauloto i kulupu taitasi. Valaaulia i latou e su’e le talaaga o le latou fuaitau ua tuuina atu e ala i le faailoaina o faamatalaga e fetaui ma ulutala i luga o le laupapa. Tuu atu ia latou tusia mea ua latou mauaina i le laupapa. Ona fai atu lea i kulupu taitasi e faamatala le talaaga o le latou fuaitau na tuuina atu ma pe faapefea e lenei faamatalaga ona aafia ai lo latou malamalamaaga i upumoni i fuaitau taitasi. Ina ia faaopoopo seisi taimi i lenei gaoioiga, atonu e te manao e luiina le vasega e mate mai faasino mau o tusitusiga paia e faavae i faamatalaga i luga o le laupapa ao lei faamatalaina mai e kulupu taitasi mea ua latou tusia.

Iloiloina

Iloiloina e aofia ai le iloaina o aoaoga faavae ma mataupu faavae o loo maua i totonu o fuaitau o tusitusiga paia. E aofia ai foi le fesoasoani i tamaiti ia malamalama pe faapefea ona aoga nei upumoni ia i latou. E mafai e nei mea ona taitaiina atu i le loloto o le faaaogaina o aoaoga faavae ma mataupu faavae i o latou olaga. O le gaoioiga o mulimuli mai e mafai ona fesoasoani i tamaiti e iloilo ai fuaitau o mau tauloto:

Tusi Faaataataga — Ao faasolo ina masani lelei tamaiti aoga i fuaitau o mau tauloto, valaaulia i latou e fatuina ni fesili, ata, poo isi faaataataga e faaalia ai aoaoga faavae ma mataupu faavae o loo aoaoina i le fuaitau. E mafai ona faaaoga e fesiligia ai le vasega.

Faamalamalamaina

O le tuuina atu i tamaiti e faamalamalama fuaitau o mau e faaloloto ai lo latou malamalamaaga ma faaleleia lo latou gafatia e aoao atu ai aoaoga faavae ma mataupu faavae mai tusitusiga paia. O metotia nei e lua e mafai ona fesoasoani i tamaiti aoga e aoao ai e faamalamalamaina fuaitau o mau tauloto:

Upu ma Fuaitau Autu — Valaaulia tamaiti aoga e faitau le fuaitau o mau tauloto e tasi nao i latou ma faailoa se upu po o se fuaitau e latou te manatu e faapitoa lona taua i le uiga o le fuaitau. Ona valaaulia lea o se tamaitiiti e faitau le fuaitau i le vasega ma tuu atu le faamamafa i le upu poo le fuaitau ua ia filifilia. Fai atu i le tamaitiiti aoga e faamatala pe aisea ua taua ai le upu po o le fuaitau ia malamalama ai i le fuaitau. Valaaulia ni nai tamaiti e faia le mea e tasi. Atonu e filifili e tamaiti aoga upu eseese poo fasifuaitau mo le fuaitau lea e tasi. Ao faalogo i ai le vasega i manatu eseese nei, o lea mafai ona mauaina se malamalamaaga loloto o le fuaitau.
Saunia se Faigalotu — Tuu atu le avanoa i tamaiti aoga e faaaoga ai fuaitau o mau tauloto ao latou tapena ma faatino faigalotu i le amataga o le vasega. Fesoasoani ia i latou ia saunia e aotele le talaaga, faamalamalama aoaoga faavae ma mataupu faavae, faasoa mai aafiaga anoa poo faataitaiga, ma molimau i aoaoga faavae ma mataupu faavae i totonu o le fuaitau. Atonu foi e te fautuaina tamaiti aoga e mafaufau e faaaoga se lesona faatino e faamatala ai manatu o loo i le fuaitau.

Faalogoina o le Taua o Aoaoga Faavae ma Mataupu Faavae

Fesoasoani i tamaiti ia malamalama ma maua se molimau faaleagaga o aoaoga faavae ma mataupu faavae o loo aoaoina i fuaitau o mau tauloto. Na faamatalaina e Elder Robert D. Hales, “O se faiaoga moni, afai loa ua na aoaoina atu mea moni [o le talalelei ] … , ua na aveina atu tamaiti aoga i se laasaga sili atu ia mauaina se molimau faaleagaga ma le malamalamaaga i o latou loto lea na te aumaia le galueaiina ma le faia” (“Teaching by Faith” [saunoaga i faiaoga o aoaoga faalelotu CES, Fep.1, 2002], 5, si.lds.org). Afai e lagonaina e tamaiti aoga le upumoni, faatauaina, ma le naunautai o se aoaoga faavae po o se mataupu faavae e ala i uunaiga o le Agaga Paia, o le ā faatupulaia lo latou naunau e faaaogaina na upumoni i o latou olaga. E mafai ona fesoasoani faiaoga i tamaiti e valaaulia ma faafailele nei lagona o le Agaga Paia e ala i le tuuina atu ia i latou o avanoa e faasoa ai aafiaga na latou iai i le soifua ai i mataupu faavae o le talalelei o loo maua i fuaitau o mau tauloto. O le a fesoasoani lea i tamaiti aoga e malamalama atili ai i upumoni o loo aoaoina i totonu o fuaitau o mau tauloto ma faamautinoa ua tusia nei upumoni i loto o tamaiti. O le gaoioiga nei o le a fesoasoani i tamaiti ia lagona le taua o aoaoga faavae ma mataupu faavae sa aoaoina e fuaitau o mau tauloto:

Faalogologo mo Fuaitau o Mau — Valaaulia tamaiti e faalogologo mo fuaitau o mau tauloto i lauga ma lesona i le lotu, i lauga o konafesi aoao, ma i talanoaga ma aiga ma uo. Valaaulia i nisi taimi ia tamaiti e lipoti poo ā fuaitau ua latou faalogo i ai, pe faapefea ona faaaogaina fuaitau, o ā upumoni na aoaoina, ma o ā aafiaga na latou maua poo isi foi i upumoni na aoaoina. Vaavaai mo avanoa e molimau atu ai (ma valaaulia tamaiti aoga e molimau atu) i upumoni na aoaoina e fuaitau o mau tauloto.

Gaoioiga e Fesoasoani i Tamaiti Aoga e Faaaoga ai Fuaitau o Mau Tauloto

Aoao atu

O fuaitau o mau tauloto ma Aoaoga Faavae Autu na atiinaeina faatasi ma fuafuaina ma se faamoemoega mo le manuia o tamaiti aoga. (O fuaitau o mau tauloto ua faaalia atoa i le tusiga o Aoaoga Faavae Autu.) Pe ā aoao tamaiti ma faaleoina mai aoaoga faavae ma mataupu faavae o loo i totonu o fuaitau o mau tauloto, o le ā latou aoaoina foi ma faaleoina Aoaoga Faavae Autu. Ma ā’o aoao tamaiti e faaleoina Aoaoga Faavae Autu ia latou lava upu, atonu e latou te famoemoe i fuaitau o mau tauloto ua taulotoina e fesoasoani ia i latou. O le tuuina atu o le avanoa i tamaiti e aoao atu ai aoaoga faavae ma mataupu faavae o le talalelei e ala i le faaaogaina o fuaitau o mau tauloto e mafai ona faateleina ai lo latou toafimalie ia i latou lava ma le latou malamalama i tusitusiga paia. Pe ā aoao atu ma molimau e tamaiti aoga ia aoaoga faavae ma mataupu faavae o loo maua i fuaitau o mau tauloto, e mafai foi ona latou faamalosia o latou molimau. Fautuaina tamaiti aoga e faaaoga fuaitau o mau tauloto e aoao atu ai ma faamalamalama ai le talalelei i totonu o le vasega ma talanoaga ma uo, aiga, ma isi.

Tuu Atu se Savali — Tofi tamaiti e saunia ni tautalaga e 3- i le 5-minute poo lesona e faatatau i fuaitau o mau tauloto. Tuu atu ia latou saunia i le vasega po o i le fale. E faaopoopo i fuaitau o mau tauloto, e mafai ona latou faaaogaina isi punaoa e fesoasoani ia i latou e sauniuni ai, e pei o kata o mau tauloto, Topical Guide, le Taiala i Tusitusiga Paia, po o le Faamaoni i le Faatuatua: O Se Tusitaiala o le Talalelei. O tautalaga poo lesona taitasi e ao ona aofia ai se faatomuaga, le fuaitau o mau tauloto, o se tala e uiga i ai po o se faataitaiga o le mataupu faavae na aoaoina, ma le molimau ā le tamaitiiti aoga. E mafai e tamaiti ona ofo e tuuina atu ā latou savali i le vasega, i se latou afiafi faaleaiga, po o i le latou kolama po o vasega o se vaega o le latou Tiute i le Atua po o taumafaiga o le Alualu i Luma O le Tagata Lava Ia. Afai e tuuina atu e tamaiti aoga ā latou tautalaga po o lesona i fafo atu o le vasega, mafaufau e valaaulia i latou e lipoti atu o latou aafiaga.
Tala Faatino a Faifeautalai — Saunia se fuainumera o kata o i ai ni fesili atonu o le a fesiligia e se tagata sailiili o le a mafai ona taliina faatasi ai ma le fesoasoani ā fuaitau o mau tauloto (mo se faataitaiga, “O le ā le talitonuga o tagata o le tou ekalesia e uiga ia Iesu Keriso?”). Valaaulia paga o tamaiti aoga e taliina se fesili e filifilia mai i kata. Ina ia fesoasoani i tamaiti aoga ia malamalama atonu e faapefea ona taliina e faifeautalai fesili talitutusa, e mafai ona e fautuaina ni nai metotia faafaiaoga aoga, e pei o (1) tauina atu o le talaaga o le fuaitau o mau, (2) faamalamalamaina o se aoaoga faavae po o se mataupu faavae, (3) fesiliina atu ni fesili e iloa ai poo malamalama i latou o loo latou aoaoina pe o talitonu i mea ua aoaoina atu, (4) faasoaina atu o aafiaga ma molimau, ma (5) valaaulia i latou o loo latou aoaoina e galulue i le upumoni na aoaoina atu. Fai atu i le vasega e tuuina mai lagona i mea na latou fiafia i ai e uiga i auala na taliina ai e soa taitasi ā latou fesili.
Molimau — Valaaulia tamaiti e vaavaai i fuaitau o mau tauloto ma filifili se tasi o iai se aoaoga faavae po o se mataupu faavae e mafai ona latou molimau i ai. Valaaulia i latou e molimau i le upumoni ua latou filifilia ma faasoa mai aafiaga na ala ai ona mafai ona molimau i ai. Ao faasoa mai molimau ā tamaiti aoga, o le a faamautinoa e le Agaga Paia le moni o aoaoga faavae poo mataupu faavae lea o loo latou molimauina. O ā latou molimau foi e ono musuia ai isi e galulue i le faatuatua.

Manatua: O avanoa mo tamaiti e faasoa ai ā latou molimau e tatau ona ofo mai. E le tatau lava ona faamalosia tamaiti aoga e faasoa atu ā latou molimau po o le faia foi ia latou lagona ai le tatau ona faailoa atu se malamalama latou te le o lagonaina o ia i latou. Ma le isi, o nisi tamaiti e mumusu e faasoa atu ā latou molimau aua o loo faaseseina o latou mafaufau e tatau ona latou amata i le “Ou te manao e fai la’u molimau …” po o le na faailoaina o le molimau e tatau ona i ai faatasi ma se faailoaina faalelagona. Fesoasoani i tamaiti ia malamalama pe a latou molimau atu, e mafai ona faigofie ona faasoa aoaoga faavae po o se mataupu faavae ua latou iloa e moni. O le faasoaina o se molimau e mafai ona faigofie e pei o le fai atu “Ou te molimau i le moni o nei mea” po o le “Ou te iloa e moni lenei mea” po o le “Ou te talitonu i ai ma lou loto atoa.”

Ola

O le fautuaina o auala e mafai ai e tamaiti aoga ona faaaoga aoaoga faavae ma mataupu faavae o loo i totonu o fuaitau o mau (po o le valaaulia o tamaiti aoga e manatunatu i ni auala) e tuuina atu ai le avanoa ia i latou e aoao ai e ala i le faatinoina o le faatuatua. Na saunoa mai Elder David A. Bednar o le Korama a Aposetolo e Toasefululua faapea:

“O se tagata aoao na te faaaogaina le saolotoga e ala i le galue e faatino e tusa ai ma mataupu faavae sao, e tatalaina lona loto i le Agaga Paia ma valaaulia Ana aoaoga, o le mana molimau, ma molimau faamaonia. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia.Ua i ai i totonu o le faamaoni ma le tumau o a tatou faatinoga e musuia i le faatuatua lea tatou te faailoa atu ai i lo tatou Tama Faalelagi ma Lona Alo, o Iesu Keriso, lo tatou naunautaiga ia aoao ma maua ia faatonuga mai le Agaga Paia.” (“Saili e Aoao e Ala i le Faatuatua,” Liahona, Set. 2007, 64).

Tuu le avanoa i tamaiti aoga e faasoa ai ma molimauina o latou aafiaga na latou maua i le faaaogaina o aoaoga faavae ma mataupu faavae. O se tasi lea o auala e faamalosiau ai tamaiti e faaaoga fuaitau o mau tauloto i o latou olaga:

Faatutu Sini — E faatatau i le vaega o le faaaogaina o i kata o fuaitau o mau tauloto, valaaulia tamaiti e faatutu ni sini faapitoa ia sili ai ona ola ai i mataupu faavae o loo maua i fuaitau o mau tauloto. Tuu atu ia i latou e tusi i lalo a latou sini i se fasipepa e latou te feaveaiina o se faamanatu. Pe ā talafeagai ai, valaaulia tamaiti aoga e lipoti mai i ā latou faamanuiaga.

Gaoioiga e Fesoasoani i Tamaiti Aoga e Taulotoina ai Fuaitau o Mau Tauloto

Taulotoina

O le taulotoina o fuaitau o mau e mafai ona faalolotoina ai le malamalamaaga ma faateleina ai le gafatia o tamaiti e aoao atu ai le talalelei. Pe ā tauloto e tamaiti aoga ia mau, e mafai ona toe aumaia e le Agaga Paia fasifuaitau ma manatu i o latou manatuaga i taimi e manaomia ai (tagai Ioane 14:26; MF&F 11:21). Manatua ia fetuunai gaoioiga mo le taulotoina i gafatia o au tamaiti aoga. Na faamalosiauina e Elder Richard G. Scott o le Korama ā le Toasefululua le taulotoina o mau ina ua ia saunoa mai:

“E mafai ona oo mai se mana maoae mai le taulotoina o mau. O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia.” (“O Le Mana o Tusitusiga Paia,” Ensign po o le Liahona, Nov. 2011, 6).

O gaoioiga taitasi nei e mafai ona toe fai ma toe fai i nai aso i le amataga poo le faaiuga o vasega e fesoasoani ai i tamaiti ia ausia se manatuaga umi:

Tuuga Upu e Tasi — Ia lu’iina le vasega e faimai se fuaitau o mau tauloto e tasi le upu ā le tamaitiiti i le taimi. Mo se faataitaiga, pe ā fesoasoani i tamaiti e tauloto le Alema 39:9, o le tamaitiiti muamua e fai mai le upu nei, ona fai atu lea o le tamaitiiti lona lua lo’u o le tamaitiiti lona tolu e fai mai atalii, ma faaauau ai lava seia maea le fuaiupu atoa. Ia taimiina le vasega, ma ia tele ni avanoa e tuuina atu ia i latou e ausia ai se taimi faamoemoeina. Ao e faaauauina le faia o lenei gaoioiga, mafaufau e fesiitai le faasologa o tamaiti ina ia eseese ai upu latou te tauina mai.
Mataitusi Muamua — Tusi i le laupapa mataitusi muamua o upu taitasi i se fuaitau o mau tauloto. Ia tusi i le mataitusi ao tou faitauina faatasi o se vasega le mau, ao faaaogaina o latou tusitusiga paia pe ā manaomia. Toe fai lenei gaoioiga seia mautinoa e tamaiti lo latou gafatia e faaleoina se fuaitau i le nao fesoasoaniga o mataitusi muamua. Atonu e te manao e titina ese nai mataitusi i taimi taitasi e faaleoina ai e tamaiti le fuaitau. O le ā faateleina malie le lu’iina seia mafai ona faaauau ona faaleoina e tamaiti le fuaitau e aunoa ma le faaaogaina o mataitusi muamua.
Paso o Pepa Faasolo o I Ai Upu — Ia tusia, pe tuu atu i tamaiti e tusi, upu o le fuaitau o se mau tauloto i luga o se pepa ua faalainaina. Otioti fasi pepa, e aunoa ma le otiina o laina o iai mau. Otiina faapuupuu nisi laina pepa e tuu iai nao nai upu o le fuaitau i luga. Faafefiloi pepa faasolo o i ai upu ma tuu atu i paga po o kulupu laiti o tamaiti aoga. Luiina tamaiti e faatulaga pepa faasolo o i ai upu i le faasologa, ao faaaogaina ā latou tusitusiga paia o se taiala. Tuu atu ia i latou e faataitai seia latou le toe manaomia le faaaogaina o tusitusiga paia. Ā maea, fai atu ia i latou e faaleoina leotele le fuaitau. E mafai foi ona taimiina tamaiti ia iloa ai po o ai le kulupu na mafai ona vave atu ona sao le faatulagaina o pepa faasolo o i ai upu. Pe e mafai ona e taimiina le vasega atoa e iloa ai poo le ā le umi e faia uma ai e kulupu uma le paso (ā maea le kulupu muamua, fesoasoani i kulupu tuai).