Lesona 86: Alema 25–26

Lesona 86

Alema 25–26

Faatomuaga

Ina ua mavae le faaumatiaina o le aai o Amonaea, na tele isi taua na tauina e sa Lamana ma sa Nifae ma na tutulia ma sosola. Ina ua mavae le tele o mafatiaga, o le toatele o sa Lamana na faataatitia i lalo a latou auupega o le taua, salamo, ma auai faatasi ma Aneti-Nifae-Liae. A o faaiuina e atalii e toafa a Mosaea ma a latou soa la latou misiona e 14 tausaga i totonu o sa Lamana, na vivii atu Amona i le Alii ma faailoa atu le agaga faafetai mo le faamanuiaga o le avea ai ma meafaigaluega i aao o le Alii ina ia aumaia le talalelei i tagata sa Lamana.

Fautuaga mo le Aoaoga

Alema 25:1–12

O valoaga a Apinati ma Alema ua faataunuuina

A o lei amataina le vasega, kopi le siata lea i luga o le laupapa:

Valoaga	Faataunuuina o le Valoaga
Alema 9:12. O le a le valoaga a Alema i le nuu o Amonaea?	Alema 25:1–2 (tagai foi i le Alema 16:2–3, 9–11)
Mosaea 17:14–19. O le a le mea na valoia e Apinati o le a tupu i fanau a le Tupu o Noa ma ana faitaulaga?	Alema 25:4–9

Tusi le upu faalagolago i luga o le laupapa. Fai atu i tamaiti e tau mai nisi o tagata tatou te faalagolago i ai. (O tali e ono aofia ai le Alii, perofeta, matua, faiaoga, ma faiaoga o taaloga.) Fesili atu i tamaiti:

Aisea e faigofie ai le faalagolago atu i nisi tagata nai lo isi?
Mai tagata uma lava o i le lalolagi i lenei vaitaimi, o ai e pito i sili ona faigofie ona e faalagolago atu i ai?

Tau atu i tamaiti o le Alema 25 o loo i ai se faamaoniga o le a faataunuuina lava upu a le Alii i Ana perofeta. Faamalamalama atu o le a faaaogaina e tamaiti le siata o i luga o le laupapa e suesue ai ni valoaga se lua mai perofeta o le Tusi a Mamona ma le faataunuuina o na valoaga. Fai i tamaiti e kopi le siata i totonu o a latou api o le vasega po o api talaaga mo le suesueina o tusitusiga paia. I le koluma muamua, tuu atu ia i latou e tusi ia tali o fesili, e faaaoga ai mau faasino o loo tuuina atu. I le koluma lona lua, tuu atu ia i latou e tusi e uiga i le faataunuuina o valoaga. Valaaulia ni nai tamaiti e lipoti mea sa latou mauaina.

Valaaulia se tamaitiiti aoga e faitau leotele le Alema 25:11–12. Fai i le vasega atoa e mulimuli i le faitauga, tagai i le mea na fai atu ai Mamona na tupu i upu a Apinati. Atonu e te manao e fautuaina tamaiti aoga e faailoga le fasifuaitau “ua faamaonia lava nei upu” i le fuaiupu e 12.

O le a le uiga o le fasifuaitau “ua faamaonia lava nei upu”?

Atonu e te manao e fautuaina tamaiti e tusi le MF&F 1:38 i totonu o a latou tusitusiga paia i talaane o le Alema 25:12. Valaaulia se tamaitiiti aoga e faitau leotele le Mataupu Faavae ma Feagaiga 1:38. Fai i le vasega e mulimuli i le faitauga, vaavaai mo se fasifuaitau e tutusa ma le fasifuaitau “ua faamaonia lava nei upu”. (“O le a faataunuuina lava.”)

O le a se mea ua tatou aoao mai le Alema 25:1–12 e uiga i valoaga ma folafolaga na faia e perofeta? (Tusi le upu moni lenei i luga o le laupapa: O le a faataunuuina uma lava ia upu musuia a perofeta.)

Faailoa atu o faataitaiga o loo i le siata, ua faaalia mai ai o le a faataunuuina lava ia lapataiga a perofeta i tagata amioleaga. Ua faasoaina mai foi e perofeta ni folafolaga mo i latou o e liliu atu i le Alii. O le a faataunuuina foi nei folafolaga. Ina ia fesoasoani i tamaiti aoga ia iloa le faatatauga o lenei mataupu faavae i o latou olaga, faitau le faamatalaga lenei mai le Au Peresitene Sili mai le Mo Le Malosi o le Autalavou. Fai i tamaiti aoga e faalogologo i folafolaga mo i latou o e tausia ia tulaga faatonuina o loo i le tamaitusi.

“O tulaga faatonuina i lenei tamaitusi o le a fesoasoani ia te outou i filifiliga taua o loo outou faia i le taimi nei ma [filifiliga] o le a faia i le lumanai. Matou te folafola atu a outou tausia feagaiga na outou osia atoa ai ma nei tulaga faatonuina, o le a faamanuiaina outou i le mafutaga ma le Agaga Paia, o le a tuputupu ae malosi atili lo outou faatuatua ma molimau, ma o le a outou olioli i le fiafia faateleina” (Mo le Malosia o le Autalavou [tamaitusi, 2011], ii).

O le a se mea na folafola atu e le Au Peresitene Sili?
O ana fea na e vaaia ai le faataunuuina o nei folafolaga?

Alema 25:13–17

O le toatele o sa Lamana na salamo ma faatasi atu i tagata Aneti-Nifae-Liae

Fai i se tamaitiiti aoga e faitau leotele le Alema 25:13–14. Fai i le vasega e mulimuli i le faitauga, vaavaai po o le a le mea na faia e le toatele o sa Lamana ina ua uma ona latou iloaina e le mafai ona latou faatoilaloina sa Nifae.

O le a se mea o faagaeetia ai oe e uiga i gaoioiga a sa Lamana?

Fai i tamaiti e faitau le leoa le Alema 25:17 , vaavaai po o a ni lagona o atalii o Mosaea e uiga i le tulaga manuia sa latou mauaina i totonu o sa Lamana.

O faapefea ona avea le faamanuiaina o atalii o Mosaea ma se faataitaiga o le faamaoniaina o afioga a le Alii? (Afai o manaomia e tamaiti se fesoasoani i le taliina o lenei fesili, faasino i latou i le Mosaea 28:5–7 ma le Alema 17:11.)

Alema 26

Ua olioli Amona i le i ai o le alofa mutimutivale o le Alii ia te ia ma ona uso faapea foi ma tagata sa Lamana.

Faaali atu ni meafaigaluega (e pei o se samala, se mea vili fao, se palaea, se peni po o se penitala, se pulumu vali fale, se selaulu, se komepiuta, ma se mea fai musika). Faamatala atu o se isi upu mo le punaoa o le meafaigaluega.

O a nisi mea e mafai ai e se tagata e i ai se tomai po o se tusiata ona faia e faaaoga ai se meafaigaluega sao?
O le a sou manatu o le uiga mo se tagata o le avea ai ma se meafaigaluega i aao o le Alii?

Valaaulia ni nai tamaiti aoga e feauauai i le faitauina leotele mai o le Alema 26:1–5, 12. Fai i le vasega e faailoa mai ni auala na avea ai Amona ma ana uo faifeautalai o ni meafaigaluega i aao o le Atua.

O le a se mea na faataunuuina e le Alli e ala atu ia Amona ma ana uo faifeautalai?
E faapefea ona e toe faamatalaina le Alema 26:12? O faapefea ona avea le faamatalaga a Amona i lenei mau e faatatau lea i le avea ai ma se meafaigaluega i aao o le Alii?

Valaaulia ia tamaiti aoga e faitau le leoa le Alema 26:11, 13, 16, vaavaai mo taimi uma lava e faaali mai le upu olioli. Atonu e te manao e fautua atu i tamaiti aoga e faailoga ia upu nei i totonu o a latou tusitusiga paia. Fai i se tamaitiiti aoga e faitau leotele le Alema 26:13–16, mai fai i le vasega e tagai mo ni mafuaaga na tauina mai e Amona e uiga i lona olioli.

Aisea na olioli ai Amona?
O a ni mataupu faavae e mafai ona tatou aoaoina mai nei fuaiupu? (Atonu e mafai ona tau mai e tamaiti aoga le tele o mataupu faavae eseese. O lenei mataupu faavae e ono avea ma se aotelega o o latou manatu faaalia: Tatou te lagonaina le olioli a o tatou auauna atu ma le faamaoni i le Alii ma Ana fanau. Atonu e te manao e tusi le mataupu faavae lenei i luga o le laupapa.)
Aisea tou te manatu ai tatou te lagonaina le olioli pe a tatou i ai i le galuega a le Alii?

Tusi ia mau faasino ma fesili nei i luga o le laupapa. (Fuafua e tusiina ao lei amataina le vasega.) Vaevae tamaiti e fai paga. Fai i paga taitasi e filifili ma faitau se tasi o fasifuaitau ma talanoa i tali o le fesili e faatatau i ai.

Alema 26:17–20. O a ituaiga tagata sa i ai Amona ma ona uso ao lei liua i latou?

Alema 26:23–25. E tusa ai ma mea sa tauina atu e sa Nifae ia Amona ma ona uso, na faapei sa Lamana a o lei liua i latou?

Tuu atu se taimi mo nai tamaiti e faamalamalama mai a latou tali i fesili nei. Valaaulia ia tamaiti e faitau le leoa le Alema 26:23–29, matau ni faafitauli na feagai ai ma Amona ma ona uso i la latou auaunaga i le Alii ma sa Lamana.

O fea o nei faafitauli e te manatu o ono feagai ai ma faifeautalai i le asō?
E tusa ai ma le Alema 26:27, 30, o le a se mea na musuiaina Amona ma ana uo faifeautalai e faaauau le galuega? (O le faamafanafanaga ma folafolaga mai le Alii ma se manaoga ina ia “avea ai i tatou ma ala e faaolaoina ai ni nai agaga.”)

Fai i tamaiti aoga e faitau le leoa le Alema 26:31–34, vaavaai mo nisi o taunuuga o le galuega a atalii a Mosaea. A lava loa le taimi latou te suesue ai, valaaulia i latou e faasoa mai mea ua latou mauaina.

Fai i se tamaitiiti aoga e faitau leotele le Alema 26:35–37. Fai i le vasega e mulimuli i le faitauga, mafaufau i mafuaaga na latou maua ai le olioli i le agalelei o le Atua.

O a ni savali o loo outou vaaia i nei fuaiupu?

Faasino atu o se tasi o le tele o savali i nei fuaiupu e faapea e alofa mutimutivale le Alii i tagata uma o e salamo ma talitonu i Lona suafa. Ina ia fesoasoani i tamaiti ia lagona le upu moni ma le taua o lenei mataupu faavae, faitau le faamatalaga lenei mai ia Peresitene Boyd K. Packer o le Korama a Aposetolo e Toasefululua:

Ata

Peresitene Boyd K. Packer

“O tusi na maua mai i e na faia ni sese matuia. Ua latou fesili mai, ‘Pe mafai ea ona faamagaloina au?’

“O le tali o le ioe!

“Ua aoao mai le talalelei ia i tatou, o le mapusaga mai tiga ma le agasala e mafai ona e ala i le salamo. E leai se amio, leai se tuinanau, leai se fouvalega, leai se solitulafono, leai se agasala e le aofia ai i le folafolaga o le faamagaloga atoatoa, se vagana ai ni nai tagata toaitiiti o e ua filifili le malaia ina ua uma ona maua se malamalama atoatoa” (“O Le Taeao Pupula o le Faamagaloga,” Liahona, Ian. 1996, 22).

Molimau atu i le mana o le Togiola e faatagaina ai le faamagaloga o agasala, laitiiti pe tele, mo i latou o e faatuatua ia Iesu Keriso ma salamo. Molimau atu foi i le olioli lea e oo mai i o tatou olaga pe a tatou galulue e avea o ni meafaigaluega i aao o le Alii.

Manatu Faaopoopo Faafaiaoga

Alema 26:1-37. “Mafuaaga o le olioli”

Ina ia fesoasoani i tamaiti ia malamalama i le oliloli lea e oo mai mai le salamo ma le faamagaloga, faitau i le tala lenei na faamatalaina e Peresitene President Boyd K. Packer o le Korama a Aposetolo e Toasefululua:

“Ia Aperila 1847, na taitai atu ai e Polika Iaga le vaega muamua o paionia mai Winter Quarters. I lena lava taimi e tasi, i le afe onoselau maila i le itu i sisifo i lalo atu o Mauga o Sierra Nevada i totonu o le Vanu o Sacramento, sa i ai le au malaga a Donner.

“Na latou pagatia ai i se taumalulu mata’utia i le malosi o le kiona i lalo ifo o mauga. E toetoe ina le talitonuina pe afai na i ai se tasi na ola i aso ma vaiaso ma masina o le fia aai ma le mafatia e le mafaamatalaina.

“Sa faatasi ma i latou se tama e sefululima tausaga o Ioane Perini. I le po o le aso 24 o Aperila, na savali atu ai o ia i le Faatoaga a Ioanesone. I tausaga mulimuli ane na tusia ai e Ioane:

“‘O le po na matou taunuu atu ai i le Faatoaga a Ioanesone, ma o le taimi muamua na ou vaai atu ai i le faatoaga, o le taeao po lava. Sa lelei le tau, sa ufitia le laueleele i le mutia lanumeamata, na tausani mai manulele i luga o laau, ma ua taunuu le malaga. Sa faigata ona ou talitonu o loo ou ola pea.

“‘O le vaaiga lea na ou vaaia i lena taeao sa pei o se ata pue i lou mafaufau. O le tele o mea na tutupu ua o ese mai lou manatuaina, ae sa mafai lava ona ou vaaia pea le tolauapiga e latalata i le Faatoaga a Ioanesone.’ [“Manatuaga a Paionia,” Lei faasalalauina, e pei ona sii mai i le“The Americanization of Utah,” PBS television broadcast.]

“O le taimi muamua sa ou le malamalama i lana faamatalaga faapea ‘o le tele o mea na tutupu ua faagaloina.’ E mafai faapefea ona aveese mai lona mafaufau le tele o masina na feagai ai ma puapuaga ma le faanoanoa? E mafai faapefea ona suia lena taumalulu matautia e se taeao pupula e tasi?

“I le mafaufau atili i ai, na ou manatu ai e le o se mea faigata ona malamalama i ai. Ua ou iloa ni mea faapena na tutupu foi i ni tagata ou te iloa. Ua ou vaaia se tasi na faaaluina se taumalulu umi o le nofosala ma le fia ‘ai faaleagaga lea na aveesea i le taeao o le faamagaloga.

“Ina ua oo mai le taeao, na latou iloa ai le mea lenei:

“‘Faauta, o ia le ua salamo i ana agasala, o ia lava lea ua faamagaloina, ma o A’u o le Alii, e le toe manatuaina lava i latou’ [MF&F 58:42]” (“O Le Taeao Pupula o le Faamagaloga,” Liahona, Ian. 1996, 22).

A uma ona faitauina le tala lenei, fai i tamaiti e faamatala atu se taimi sa latou vaaia ai le oo mai o le olioli i le olaga o se tagata ua salamo. (Toe faamanatu atu i tamaiti aoga e le manaomia lo latou faasoa maia o se mea e patino pe le faalauaiteleina.)