Lesona 72

Alema 5:37–62

Faatomuaga

Ao faaauau pea ona talai atu Alema i Saraemila, na ia lapataia tagata faapea o le filifiliga e mulimuli pe tetee i ana upu o le a i ai ni taunuuga matautia. Na faatusatusa foi e Alema ia Iesu Keriso i se leoleo mamoe lelei lea e valaau atu ia i latou ma naunau e toe aumai i latou i lana lafu. Na ia fautua atu i tagata ina ia salamo ma aloese mai mea le mama o le lalolagi ina ia mafai ona latou mautofi i le malo o le lagi.

Fautuaga mo le Aoaoga

Alema 5:37–42, 53–62

Na lapataia e Alema tagata amioleaga ma valaaulia tagata uma e faalogo i le siufofoga o le Leoleo Mamoe Lelei

O Iesu o loo Siiina se Tamai Mamoe na Leiloa

Faaali atu le ata o Iesu o loo Siina se Tamai Mamoe na Leiloa (Tusi Ata o le Talalelei [2009], nu. 64).

• O a ni auala o avea ai le Faaola ma Leoleo Mamoe Lelei?

A uma ona tali mai ni nai tamaiti aoga, faitau le faamatalaga lenei mai ia Peresitene Ezra Taft Benson:

“I le vaitaimi o Iesu, na lauiloa le leoleo mamoe Palesitina i lana puipuiga o ana mamoe. E le pei o leoleo mamoe i ona po nei, ae e masani lava ona muamua i luma le leoleo mamoe i lana lafu mamoe. Na te taitai i latou. E silafia e leoleo mamoe mamoe taitasi o lana lafu, ma e tofu lava le mamoe ma lona igoa. E iloa foi e mamoe lona leo ma faatuatuaina o ia, ma e le mulimuli lava i se tagata ese. O lea, pe a valaauina, ona mulimuli lea o i latou ia te ia. (Tagai Ioane 10:14, 16.) …

“Na faaaogaina e Iesu lea faataitaiga o ona aso, e tau atu ai o Ia lava le Leoleo Mamoe Lelei, le Leoleo Mamoe Moni . Ona o Lona alofa mutimutivale i Ona uso ma Ona tuafafine, ua Ia ofoina atu ai Lona ola mo i latou” (“O Se Valaau I Le Perisitua: ‘Ia Fafaga I Au Mamoe,’” Liahona, Iulai 1983, 74; tagai foi John R. Lasater, “O Leoleo Mamoe O Isaraelu,” Liahona, Iulai 1988, 74–75).

Fesoasoani i tamaiti aoga ina ia manatua le talaaga o le Alema e 5 e ala i faamatala atu faapea na alu atu Alema e talai i le nuu o Saraemila, o e na pei o ni “mamoe ua leai se leoleo mamoe” (Alema 5:37). Fai atu i tamaiti aoga e toe mafaufau i luitau na feagai ma le nuu o Saraemila ma le mea na uunaia ai i latou e Alema e fai. Atonu e te manao e toe faamanatu nisi o mau autu mai le lesona ua te’a, e pei o le Alema 5:14–20, e fesoasoani ai i tamaiti aoga ina ia manatua nisi o mea o lenei talaaga. Ia faamautinoa o malamalama ia tamaiti aoga i le tulaga pagatia na i ai le nuu o Saraemila ona o lo latou amioleaga (tagai i le Alema 7:3).

Fai i ni tamaiti aoga se toalua pe toatolu e auauai i le faitauina leotele mai o le Alema 5:37–42. Fai i le vasega e vaavaai i ni auala e mafai ai e se tagata ona iloa pe o ia o se tasi o mamoe a le Faaola. A uma ona faasoa mai e tamaiti aoga mea sa latou mauaina, fai atu ia fesili nei:

• E faapefea ona faapei tagata o mamoe o loo manaomia se leoleo mamoe?

• E tusa ai ma le Alema 5:37–38, e faapefea ona faaalia e le Leoleo Mamoe Lelei Lona alofa ma le popole mo le mamoe? (E faaauau pea ona ia valaauina i latou i Lona lava igoa.)

• E tusa ai ma le Alema 5:41, e faapefea ona tatou iloa pe ua tatou faalogo i le siufofoga o le Leoleo Mamoe Lelei?

• O a nisi o galuega e ono faailoa mai ai o loo mulimuli se tagata i le Leoleo Mamoe Lelei?

A maea ona tali mai ia tamaiti aoga, fai i se tamaitiiti aoga e faitau mai le faamatalaga lenei mai ia Peresitene Ezra Taft Benson, o le sa faamatalaina mai ia alii ma tamaitai o e na tuuto atu e mulimuli ia Iesu Keriso. (Atonu e te manao e saunia se kopi o lenei faamatalaga mo tamaiti taitasi.)

“Afai ua e filifili e mulimuli ia Keriso, ua e filifili ina ia suia oe. …

“O alii [ma tamaitai] ua sui mo Keriso o le a taitaia e Keriso. …

“O o latou loto e tusa lea ma Lona finagalo. (Tagai i le Ioane 5:30.)

“Latou te faia pea lava o mea e lelei i le Alii. (Tagai i le Ioane 8:29.)

“E le gata o le a latou oti mo le Alii, ae o le mea e sili atu le taua latou te mananao e ola mo Ia.

“E te ulu atu i o latou fale, ma o ata i luga o o latou puipui, o tusi i luga o o latou fatatusi, o musika e faalogoina, o a latou upu ma gaoioiga ua faaalia mai ai o i latou o ni Kerisiano.

“Latou te tutu o ni molimau a le Atua i taimi uma ma i mea uma, ma i nofoaga uma. (Tagai i le Mosaea 18:9.)

“E i ai Keriso i o latou mafaufau, a o latou vaai atu ia te Ia i mafaufauga uma (Tagai i leMF&F 6:36.)

“E i ai Keriso i o latou loto a o tuuina lo latou alofaaga ia te Ia e faavavau. (Tagai Alema 37:36).

“Toeitiiti lava o vaiaso uma latou te aai ai ma feinu i le faamanatuga ma faafouina se molimau i lo latou Tama Faavavau o le a latou naunau e tauave i o latou luga le suafa o Lona Alo, manatua pea o Ia, ma tausi Ana poloaiga. (Tagai i le Moro. 4:3.)” (“Born of God,” Ensign, Nov. 1985, 5, 6–7).

Fai i tamaiti aoga e faitau le leoa le Alema 5:53–56, ma sailiili i uiga ma galuega lea e faigata ai mo se tasi ona faalogoina le siufofoga o le Faaola. A mavae ni nai minute, fai i ni nai tamaiti aoga e tusi i luga o le laupapa ni mea sa latou mauaina. Tuu atu latou e tusiina a latou tali ina ia mafai ona latou faatumuina le laupapa i le mea e mafai ai. Fai atu ia i latou e faaopoopo nisi uiga po o ni faatinoga ua latou vaaia ma ua faigata ai ona faalogoina le siufofoga o le Faaola. (Atonu o tali a tamaiti aoga e ono aofia ai le tuuese (le amanaiaina) o aoaoga a le Atua, faamaualuga, manatu tau lava na o ia, tuu atu o tatou loto i luga o oa ma mea faalelalolagi, mafaufau ua sili atu lo tatou lelei nai lo isi, sauaina o e amiotonu, po o le fuli atu o o tatou tua i e matitiva ma e ua le tagolima. Atonu e te manao e taulai atu le vaaiga a tamaiti aoga i le upu o loo ta’ua soo mai e Alema o le tausisi, ma faamamafa atu na tausisi pea ia le nuu o Saraemila i nei amioga ma uiga leaga.)

Tape se vaega o tali a tamaiti aoga ae faaavanoa le ogatotonu o le laupapa e tusitusi ai. I lena avanoa, tusi ai mulimuli i le siufofoga a le Leoleo Mamoe Lelei.

Valaaulia se tamaitiiti aoga e faitau leotele mai le Alema 5:57. Fai i le vasega e faailoa mai ni fuaitau o loo aoao mai le auala e tatau ona tatou taulimaina ai ni aafiaga leaga. (“O ese mai i e amioleaga,” “ma ia outou tuese,” ma “aua nei pai atu ia latou mea le mama.”) Atonu e te manao e fautua atu i tamaiti aoga e faailoga nei fasi fuaitau i totonu o latou tusitusiga paia. Faailoa atu o loo faamamafa mai e nei fasi fuaitau le manaomia o le aloese mai soo se mea e ono faaleagaina ai pe faatamaia ai i tatou faaleagaga. Ina ia fesoasoani i tamaiti aoga e talatalanoa i le auala e mafai ai ona latou o ese mai i faafitauli, aloese mai aafiaga amioleaga, ma mulimuli ai i le siufofoga o le Leleo Mamoe Lelei, ia fai atu ni fesili e pei o fesili nei:

• O le a se mea e mafai ona faia e se talavou o le Au Paia o Aso e Gata Ai ina ia aluese mai ai i le amioleaga? (Ina ia faamalosia ia tali a tamaiti aoga, mafaufau e faasoa atu se faataitaiga lelei sa e vaaia i se tasi o tamaiti aoga o lau vasega. Atonu e te manao e valaaulia ni tamaiti aoga e faasoa mai ni faataitaiga lelei sa latou vaaia i le tasi ma le isi.)

• E tusa ai ma le Alema 5:56–57, o a ni taunuuga o le tausisia o le amioleaga? (Afai tatou te tausisi i le amioleaga, o le a le mafai ona tatou lagonaina le siufofoga o le Leoleo Mamoe Lelei ma o le a le faitauina faatasi i tatou ma e amiotonu.)

Afai e lava se taimi, tuu atu i tamaiti aoga ni nai minute e mafaufau ai i fesili nei. Atonu e te manao latou te taliina le fesili i totonu o api o le vasega po o api talaaga mo suesuega o tusitusiga paia.

• O le a se mea e finagalo le Alii e te faia e talia lelei ai Lana valaaulia e sau ia te Ia? (Atonu o le a e fautuaina atu o le tali e mafai ona avea o se mea latou te lagona ai se manaoga ina ia faia se mea sili atu ona lelei, pe o se mea e manaomia ona latou faamutaina.

Fai i tamaiti aoga e faitau le leoa le Alema 5:58–62, ma tagai mo ni faamanuiaga na folafola atu ia i latou o e na potopoto faatasi ma le Alii ma Lona nuu. (Atonu e te manao e fautuaina tamaiti aoga e faailoga ia faamanuiaga nei i totonu o a latou tusitusiga paia.

• E faapefea ona e tuuina atu se aotelega o faamanuiaga a le Alii ia i latou o e faalogo i Lona siufofoga? (E ui e ono fautuaina mai e tamaiti aoga ni mataupu faavae eseese, ia faamautinoa latou te malamalama afai tatou te mulimuli i le siufofoga a le Alii [le Leoleo Mamoe Lelei], o le a faapotopotoina i tatou i Lona malo. Atonu e te manao e tusi le mataupu faavae lenei i luga o le laupapa.)

• O a ni amioga masani na e atinaeina na fesoasoani ia te oe e faalogo ai i le siufofoga a le Leoleo Mamoe Lelei?

• O faapefea ona fesoasoani nei amioga masani ia te oe e aloese mai ai i nisi o faatosinaga amioleaga o loo lisiina atu i luga o le laupapa?

Molimau atu afai tatou te faalogo i afioga a le Faaola, o le a lavea i tatou i le au amiotonu o e o le a potopoto faatasi i le malo o le Alii.

Alema 5:43–52

Ua faataunuuina e Alema lona tiutetauave o le talai atu o le salamo

Fai i tamaiti aoga e lisi mai ia sane (senses) faaletino e lima (vaai, faalogo, pa’i, sogisoigi, ma le tofo). Fuafua e aumai ni mea faitino o le a mafai ai e tamaiti aoga ona faaaoga nei sane.

• O le a se mea sa e aoaoina mai i ou sane taitasi nei e lima?

• E i ai se auala e iloa ai pe aoao ai se mea e aunoa ma le faaaogaina o ou sane e lima?

Valaaulia ni nai tamaiti aoga e feauauai i le faitauina leotele mai o le Alema 5:44–48. Fai i le vasega e tagai i le mea na fai mai ai Alema sa ia iloaina ma le auala na ia iloa ai.

• E tusa ai ma le Alema 5:48, o le a le mea na silafia e Alema?

• O le a se tala a Alema o le pogai o lana molimau?

• O le a le mea na faia e Alema na mafua ai ona maua lenei molimau mai le Agaga Paia?

• E mafai faapefea e le tatalo ma le anapogi ona fesoasoani ia i tatou i le mauaina po o le faamalosia o se molimau i le talalelei?

• O anafea na e lagona ai ua faamalosia lau molimau e ala i le tatalo po o le anapogi?

Molimau atu e mafai ona tatou iloaina mo i tatou lava, e ala i le Agaga Paia, o Iesu Keriso o le Faaola o tagata. Ina ia faamamafaina le taua o le sailia ma le mauaina o se molimau patino o Iesu Keriso o le Faaola o tagata, faitau le faamatalaga lenei mai ia Elder M. Russell Ballard o le Korama a Aposetolo e Toasefululua:

Elder M. Russell Ballard

“O molimau taitoatasi, ma faaletagata lava ia o le moni o le talalelei, aemaise le soifua paia ma le galuega a le Alii o Iesu Keriso, e taua mo lo tatou ola faavavau. … I nisi faaupuga, o le ola faavavau ua tautino mai i lo tatou malamalama taitoatasi e uiga i lo tatou Tama oi le Lagi ma Lona Alo Paia. E le lava le na o le iloa o i la’ua. E tatau ona i ai se tomai faaleagaga o le tagata lava ia tatou te taula ai. E maua mai lea i le sailia i le ala ogaoga e tasi ma le mata’itu lea e sailia ai e se tagata fiaai ana meaai” (“Talisua I Le La’o’ai A Le Alii,” Liahona, Iulai 1996, 91).

Tuu atu i tamaiti aoga se taimi e tusi ai a latou tali i le fesili lenei. Uunaia foi i latou e tusi i lalo mea sa latou faia na maua ai pe na faamalosia ai a latou molimau e uiga ia Iesu Keriso. Uunaia i latou e faataunuu a latou sini, e tusa lava pe alu ai le “tele o aso” (Alema 5:46).

• O anafea na e lagona ai ua molimau atu le Agaga Paia ia te oe o Iesu Keriso o le Faaola o le lalolagi?

Uunaia le faaaogaaga

Sa aoao mai Peresitene Thomas S. Monson faapea, “O le sini [o aoaoga faaletalalelei] o le uunaia lea o tagata taitoatasi e mafaufau, lagona, ona faia lea o se mea e uiga i le ola ai i mataupu faavae o le talalelei” (i le Conference Report, Oke. 1970, 107). Ao e aoao atu ia mataupu faavae o le talalelei i tamaiti aoga, valaaulia i latou e mulimuli i musumusuga a le Agaga Paia i le sailia o ni auala e mafai ona faaleleia ai o latou uiga ma faamalosia ai lo latou faatuatua ia Iesu Keriso.

Fai i tamaiti aoga e faitau le leoa le Alema 5:49–52, ma vaavaai po o a ni mea na tau atu e Alema i tagata e manaomia ona latou faia e saunia ai ina ia mautofi i le malo o le lagi.

• Aisea e taua ai le salamo i le ulufale atu i le malo o le Atua?

Ina ia fesoasoani i tamaiti aoga e faaaoga ia aoaoga a Alema e uiga i le saunia e ulu atu i le malo o le Atua, fai atu i se tamaitiiti aoga e faitau mai le faamatalaga lenei mai ia Elder Dallin H. Oaks o le Korama a Aposetolo e Toasefululua:

“E faapefea pe afai o taeao le aso e afio mai ai o Ia? Afai sa tatou iloa o taeao le aso tatou te faafetaia’i ai i le Alii—e ala i lo tatou faafuasei, po o Lona tu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni mea o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le tatou faia?

“Afai tatou te faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua?” (“Sauniuniga mo le Afio Mai Faalua,” Ensign po o le Liahona, Me 2004, 8).

Faaiu i le tuuina atu i tamaiti aoga o se taimi e mafaufau ai i mea e manaomia ona suia i o latou olaga e saunia ai e fetaiai ma le Faaola ma ulufale atu i Lona malo. Valaaulia i latou e tusi o latou manatu ma lagona ina ia mafai ona latou toe faitauina o latou manatu i se taimi mulimuli ane ma toe faamanatu atu ina ia mulimuli e ala i musumusuga sa latou mauaina.

Tala ma Faamatalaga o Talaaga

Alema 5:46–47 . “O le agaga o faaaliga”

Na vaai Alema i se agelu, peitai na ia molimau mai i le Alema 5:46–47 o lana molimau e uiga i le misiona togiola a Iesu Keriso sa faamalosia e ala i le Agaga Paia, ina ua mavae le tele o le anapogi ma le tatalo. Na saunoa mai Peresitene Heber J. Grant, “E toatele alii na fai mai: ‘Pe ana mafai lava ona ou vaai i se agelu, pe ana mafai lava ona ou faalogo i se agelu o folafola mai se mea, o le a mafai e lena mea ona ou faamaoni i aso uma o lou ola!’ Sa lei i ai se aafiaga i luga o nei alii o [Lamana ma Lemuelu] lea e lei auauna atu i le Alii, ma o le a leai se aafiaga i lenei vaitaimi” (i le Conference Report, Ape. 1924, 159).

Na faamalamalama mai e Peresitene Iosefa Filitia Samita le mafuaaga na sili atu ai ona malosi le molimau a le Agaga Paia nai lo se asiasiga mai se agelu:

“O Keriso … na folafola mai o faaaliga tatou te ono maua … mai se asiasiga o se agelu, o se tagata toetu e i ai se tino, o le a leai se lagona … lea tatou te mauaina mai e ala i se faaaliga mai le Agaga Paia. O asiasiga faaletagata lava ia e ono mou atu ao faagasolo pea le taimi, peitai o le taitaiga a le Agaga Paia ua toe faafouina ma faaauau pea, i lea aso ma lea aso, i lea tausaga ma lea tausaga, pe a tatou ola agavaa i ai” (Doctrines of Salvation, ed. Bruce R. McConkie, 3 volu. [1954–56], 1:44).

O le faamatalaga lenei mai le Faamaoni i le Faatuatua ua faamatala mai ai le auala e maua ai le liua moni:

“O le liua o se faagasologa, e le o se mea e tupu i se taimi e tasi. E te liua ona o se taunuuga o au taumafaiga amiotonu e mulimuli i le Faaola. O nei taumafaiga e aofia ai le faaaogaina o le faatuatua i a Iesu Keriso, salamo i agasala, papatiso, mauaina o le meaalofa a le Agaga Paia, ma le tumau i le faatuatua e oo i le iuga.

“E ui lava o le liliuga e ofoofogia ma suia ai olaga, ae o se vavega e le leoa. O asiasiga a agelu ma isi mea matautia e tutupu, e le aumaia ai le liliuga. E oo lava ia Alema na vaai i se agelu, na liliu ina ua uma ona faia ‘anapogi ma tatalo i aso e tele’ mo se molimau o le mea moni (Alema 5:46). Ma o Paulo, o le na vaai i le Faaola toetu, na aoao mai ‘e leai foi se tasi na te mafaia ona ta’ua o Iesu o le Alii, ua na o le Agaga Paia’ (1 Korinito 12:3)” (Faamaoni i le Faatuatua: O Se Tusitaiala o le Talalelei [2004], 95).

Alema 5:57. “Ia outou o ese mai i e amioleaga, ma ia outou tuese”

Sa talanoaina e Elder David R. Stone o le Fitugafulu ia auala sa faaaogaina ai metotia i le fausiaina o le Malumalu o Manhattan Niu Ioka sa aumaia ai se faataitaiga o le auala e aveesea ai se tasi mai i faatosinaga o le lalolagi:

“Ua toatele naua tagata o le lalolagi ua foliga ia Papelonia o anamua e ala i le savavali i o latou lava ala, ma mulimuli atu i se atua ‘o lona foliga ua tusa ma foliga o le lalolagi’ [MF&F 1:16 ].

“O se tasi o luitau sili lava o le a tatou feagai ai o le mafai lea ona ola i lena lalolagi ae i se isi itu, ia le avea ai ma se tasi o lena lalolagi. E tatau ona tatou fausiaina Siona i le totonugalemu o Papelonia. …

“O lo’u aofia ai i le fausiaina o le Malumalu o Manhattan, na ou maua ai le avanoa ou te i ai i totonu o le malumalu i le tele o taimi a o lei faapaiaina. E manaia le nofonofo ai i totonu o le potu selesitila, ma i ai iina i le filemu atoatoa, e aunoa ma se pao e tasi e lagona atu mai auala pisi o Niu Ioka. E faapefea ona matuai filemu ma faaaloalo i totonu o lena malumalu, ae ua na o ni iata le mamao mai le vevesi ma le pisi o le taulaga tele?

“O le tali na i ai i le mamanuina o le malumalu. Na fausia le malumalu i totonu o puipui o se fale na i ai lava, ma o puipui pito i totonu o le malumalu na sosoo laiti. O le auala lena na faatapulaa ai e le malumalu (Siona) ia aafiaga o Papelonia, po o le lalolagi i fafo.

“Atonu o loo i ai se lesona iina mo i tatou. E mafai ona tatou fausia se Siona moni ia i tatou lava, e ala i le faatapulaaina o le mamao e mafai ai e Papelonia ona faatosinaina i o tatou olaga.

“Po o fea lava tatou te i ai, po o fea foi le nuu tatou te nonofo ai, e mafai ona tatou fausia la tatou lava Siona e ala i mataupu faavae o le malo selesitila, ma taumafai pea ina ia avea ma e loto mama. …

“E le tatau ona avea i tatou o ni papeti i lima o tu ma aga o atunuu ma taimi. E mafai ona tatou lototetele ma e mafai ona [tatou] savavali i ala o le Alii, ma mulimuli i Ona tulaga aao” (“Siona i le Totonugalemu o Papelonia,” Ensign po o le Liahona, Me 2006, 90–93).