Lesona 60
Mosaea 15–17
Faatomuaga
A o faaauau pea ona talai atu Apinati i le Tupu o Noa ma ana faitaulaga, sa ia molimau atu i le matafaioi a Iesu Keriso o le Togiola. O se tasi o faitaulaga a Noa, o Alema, na talitonu ia Apinati. Na tuliese e le Tupu o Noa ia Alema mai lona maota ma faatonuina ana auauna e fasioti ia te ia, peitai na sola Alema ma tusia ia aoaoga na ia faalogo ai mai ia Apinati. Ina ua uma ona tuuina atu e Apinati le feau na auina atu o ia e le Alii e avatu, na faamata’uina o ia e le Tupu o Noa ma ana faitaulaga o le a fasiotia o ia pe afai na te le toe faafoia ana upu. O le musu e faafitia lana molimau, o lea na “mafatia o ia i le oti i le afi” ma “faamau e ia le moni o ana upu i lona maliu” (Mosaea 17:20).
Fautuaga mo le Aoaoga
Mosaea 15–16
Ua aoao atu Apinati e uiga i le matafaioi a Iesu Keriso o le Togiola
Tuu i tamaiti ni minute se lua e sue ai upu o le a togiola, togiolaina, na togiolaina, ma le togiola i le Mosaea 15–16. Atonu e te manao e fautuaina tamaiti e maka upu na. Faamatala a oo ina ta’u faafia ia ituaiga eseese o le upu lava e tasi i se poloka mau, e mafai ona ona avea o se faailo e taua le upu i le savali a lē na tusia. Fautuaina tamaiti e matau ia aoaoga a Apinati e uiga i le togiolaina i le lesona o le aso.
Ina ia fesoasoani i tamaiti ia malamalama i le matafaioi a Iesu Keriso o le Togiola, tusi le ata lea i luga o le laupapa:
Faasino i le ata ua tusia “Tagata Ua Molia,” ma fai i tamaiti e mafaufau faapea ua latou faia se solitulafono. Ua faasalaina i latou e totogi se sala tele e fai ma faasalaga, ae e leai se ala faaletulafono ma se ala faamaoni e mafai ai ona latou aloese mai lo latou totogiina o le sala. Fesili i tamaiti pe o le a so latou lagona i lo latou feagai ai ma lena faasalaga. Ona fai lea i ai e mafaufau ua sau se tagata o le aiga po o se uo ofo mai na te totogia le sala mo i latou.
-
O le a sou lagona i lena tagata?
Faamatala o le totogi o le sala, o le a togiola ai e le tagata o le aiga po o se uo i latou mai lo latou faasalaga. O le upu togiola o lona uiga o le faamatuu mai se aitalafu po o le faasaloto mai e ala i le totogiina o se tau. Atonu e te manao e fautuaina tamaiti e tusi ia faauigaga nei i autafa o se tasi o fuaiupu i le Mosaea 15 o loo i ai se ta’uga o le upu togiola.
Tusi le tatou i lalo o le Tagata ua Molia. Tusi le Faamasinoga tonu i lalo o le Faasalaga. Faamatala talu ai ona ua tatou agasala ma solia tulafono a le Atua, o lea ua tatau ai ona faasalaina i tatou. I se isi faaupuga, e tatau ona tatou faataunuuina le faamasinoga tonu. Faasoa atu le saunoaga lenei a Elder Richard G. Scott o le Korama a Aposetolo e Toasefululua.
“O le faamasinoga tonu … e manaomia ai le faamalieina o tulafono uma na lepetia. A e usitai i tulafono a le Atua, e faamanuiaina oe, peitai e leai se togi faaopoopo e maua, e mafai ona faasaoina e faamalie ai le tulafono na e solia. Afai e le foiaina, e mafai e tulafono ua lepetia ona afua ai faanoanoa o le olaga, ma taofia ai oe mai le toe foi atu i le Atua” (“E Mafai e le Togiola Ona Faamautu Lou Filemu ma le Fiafia,” Ensign po o le Liahona, Nov. 2006,41- 42).
-
E tusa ai ma le saunoaga a Elder Scott, o a ni taunuuga o le solia o tulafono a le Atua?
A maua e tamaiti ia taunuuga o le solia o tulafono a le Atua, tape le upu Sala mai le laupapa, tusi ai le Faanoanoa ma le Tapunia mai le afioaga o le Atua. Ia faitau lemu e tamaiti le Mosaea 15:1, 8–9. Atonu e te manao e fai ia fesili nei e fesoasoani ai ia latou malamalama i nisi o aoaoga faavae o i ai i na fuaiupu.
-
O le upuaioiga e faasino i se tagata e sau i le va o ni tagata se toalua po o se vaega o tagata e fesoasoani ina ia faaleleia —i se isi faaupuga, ia femalilieai o le tasi ma le isi. O le a le uiga o le faaupuga, na afio mai Iesu Keriso e “faia se aioiga” mo i tatou?
-
O le upu betwixt o lona uiga o le va. O le a le uiga o le tu o le Faaola “i le va o i [tatou] ma le faamasinotonu”?
Fesoasoani i tamaiti ia malamalama e manaomia e le faamasinotonu ona faasalaina i tatou mo a tatou agasala. E le aveesea e le Faaola le manaoga o le faamasinotonu; e tu o Ia i le va o i tatou ma le faamsinotonu e faamalie le manaoga o le faamasinotonu e ala i le tauaveina o le faasalaga mo i tatou. Ua uma ona Ia totogiina le tau e togiolaina ai i tatou—ina ia aveesea ai i tatou mai le faasalaga. Tuu se ata o le Faaola i luga o le laupapa (pei o le ata na e faaulutala o le Alii o Iesu Keriso [64001]) i le va o le tagata ua molia ma le faasalaga.
Fai i tamaiti e faitau lemu le Mosaea 15:5–7, mafaufau i le tau na totogi e Iesu Keriso e togiola ai i latou—e tu ai i lo latou va ma le manaoga o le faamasinotonu.
Tusi le faamatalaga lenei i luga o le laupapa:
|
I latou e filifili ina ia togiolaina |
I latou e mumusu e togiolaina |
|---|---|
Vaelua le vasega. Fai i le afa o tamaiti e sue le Mosaea 15:11–12, ma vaavaai mo uiga o tagata e filifili ia togiolaina. Fai i le isi afa o le vasega e sue le Mosaea 16:2–5, 12, ma vaavaai mo uiga o tagata e mumusu e togiolaina. A maea ua lava se taimi, ona fai lea i le vaega muamua e faasoa mai mea sa latou mauaina.
-
E tusa ai ma le Mosaea 15:11–12, o le a togiolaina mai a latou agasala? (Ia mautinoa e malamalama tamaiti o Iesu Keriso e faamalieina le manaoga o le faamasinotonu mo i latou e faalogo ma usitai i upu a perofeta, talitonu i Lona mana togiola, ma salamo i a latou agasala.)
Faamatala o le tau na totogi e le Faaola o se meaalofa patino lea mo soo se tasi e filifili ia agavaa mo le togiolaina e ala i le salamo ma taumafai e tausi poloaiga ma a latou feagaiga ma le Alii.
Ina ia faamamafa le natura patino o le Togiola, tofi se tamaitiiti e faitau leotele le Mosaea 15:10. Ona tata’i lea o tamaiti i le fasifuaitau “o le a silasila o ia i ana fanau” i le fuaiupu lena. Atonu e te manao e fautuaina e maka le fasifuaitau lea. Faamatala o le fuaiupu lea, o le upu fanau i tamaiti.
-
O anafea na tatou aoao ai e uiga i le avea ai ma “fanau a Keriso”? (Faamanatu i tamaiti ia upu a le Tupu o Peniamina e uiga i lenei mataupu, o loo maua i le Mosaea 5. Tagai foi i le Lesona 55.)
Atonu e te manao e fautuaina tamaiti e tuu i latou lava i le mau lea Mosaea 15:10 e ala i le tusia o o latou igoa e sui ai le fuaitau “ana fanau.” Valaaulia i latou e manatunatu loloto mo sina minute po o le a le uiga o lenei mea ia i latou.
-
E uunaia faapefea e lenei aoaoga lou malamalama e uiga i le Togiola?
Fai i tamaiti na faitaua le Mosaea 16:2–5, 12 e faasoa mai mea sa latou mauaina e uiga ia i latou o e mumusu e togiolaina. Ina ia faamamafa le ogaoga o le musu e togiolaina, fai i tamaiti uma e faitau lemu le Mosaea 16:5.
-
O le a le mea e tupu i le ata o i luga o le laupapa pe a faifai pea le agasala a le tagata ua molia ma musu e salamo? (A tali mai tamaiti, aveese le ata o Iesu Keriso mai le ata. E mafai ona e faamamafa atu mo se tagata faapena, e “pei lava e leai se togiola na faia.”)
Valaaulia tamaiti e faitau le Mataupu Faavae ma Feagaiga 19:16–17 e iloa ai le mea o le a tupu ia i latou e mumusu e salamo ma talia le togiola a le Faaola. Atonu e te manao e fautuaina tamaiti e tusi le MF&F 19:16–17 i a latou mau i autafa o le Mosaea 16:5.
Toe tuu le ata o le Faaola i lona tulaga i luga o le laupapa.
-
O a upumoni na e aoaoina i le aso e uiga i le Togiola?
A uma ona tali mai tamaiti i lenei fesili, faamatala e le gata i aoaoga na tuu mai e le Faaola e togiolaina i tatou mai le faasalaga mo a tatou agasala, ae na aoao mai foi e Apinati e togiolaina i tatou e le Faaola mai le oti. Fai i ni nai tamaiti e feauauai i le faitauina mai le Mosaea 16:6–11. Faasoa atu lau molimau faapea ona o le Togiola a Iesu Keriso, o le a toetutu ai tagata uma. Atonu foi e te manao e ta’u atu o le a toetutu i latou o e amiotonu i le fiafia.
Valaaulia tamaiti e tusi i a latou api talaaga mo le suesueina o tusitusiga paia po o api o le vasega, e uiga i o latou lagona mo le Togiola ma pe o le a se mea latou te faia ina ia mafai ai ona maua le togiola ua Ia ofoina mai.
Mosaea 17
Na talitonu Alema ia Apinati ma sa tuliese ai o ia; ua susunuina Apinati
Fesili atu i tamaiti:
-
Pe ua e vaai i se tagata o tu atu mo le mea tonu i le taimi na faigata ai ona latou faia? O le a le mea na tupu?
Faaali le ata o Apinati i luma o le Tupu o Noa (62042; Tusi Ata o le Talalelei [2009], no. 75). Aotele le Mosaea 17:1–6 i le faamatala atu ina ua maea le savali a Apinati, sa taumafai se faitaulaga e igoa ia Alema e faatalitonu le tupu faapea, e moni mea na tautala atu ai Apinati ma e tatau ona faasaoloto o ia. Sa tuliese e le tupu ia Alema ma ia auina atu ana auauna e fasioti ia te ia. Sa lafi Alema ma tusia upu a Apinati. Ina ua mavae aso e tolu, sa faasalaina e le tupu ma ana faitaulaga ia Apinati i le oti.
Fai paga ia tamaiti. Fai i ai e suesue ma a latou paga ia mau nei: Mosaea 17:7–10, e uiga i filifiliga a Apinati, ma le Mosaea 17:11–12, e uiga i filifiliga a le Tupu o Noa. Fai i ai e faatusatusa ia filifiliga a Apinati ma filifiliga a le Tupu o Noa. Fai foi i ai e talanoaina ia fesili nei. (Atonu e te manao e tusi fesili nei i luga o le laupapa.)
-
Aisea na aafia ai le Tupu o Noa i upu a Apinati? (Tagai Mosaea 17:11.) Na faapefea ona uunaia e faitaulaga a le Tupu o Noa o ia? (tagai Mosaea 17:12–13.)
-
O a ni lesona e mafai ona tatou aoao mai le faataitaiga a Apinati? (O se tasi o tali e mafai ona tuuina mai e tamaiti o le e mafai ona tatou faamaoni i le Atua i tulaga uma.)
Afai e mafai, avatu i tamaiti se kopi o le saunoaga lea a Peresitene Gordon B. Hinckley:
“Ia outou lototetele—e tutu atu mo le mea tonu. Ua tatou ola i se vaitau o le faaloloto.… I tulaga tatou te fetaiai ai i aso taitasi ma faigata, tatou te iloa le mea e sa’o. … E tatau ona tatou atiina ae le malosi e mulimuli ai i o tatou talitonuga maumaututu” (“Building Your Tabernacle,” Ensign, Nov. 1992, 52).
Atonu e te manao e valaaulia tamaiti e tusi le O le a ou faamaoni i le Atua i tulaga uma i a latou tusitusiga paia i autafa o le Mosaea 17:9–12. Tatai tamaiti i upu mulimuli a Apinati, o loo maua i le Mosaea 17:19—“Le Atua e, talia maia lo’u agaga.” Ona fai lea i se tamaitiiti e faitau leotele le Mosaea 17:20.
-
O le a se mea ua uunaia ai oe e uiga i upu faaiu a Apinati?
Fai i tamaiti e tali le fesili lea i totonu o a latou api talaaga mo le suesueina o le talalelei.
-
O le a se mea o le a e faia ia faamaoni ai i le Atua i tulaga uma?
A maea ua lava se taimi, tofi ni tamaiti e faasoa mai mea sa latou tusia. Fesli foi pe i ai se tamaitiiti e fia manao e faasoa mai pe o le a le uiga o le talalelei ia te ia, ae po o le a foi se mea na latou faia i le taimi ua te’a e faamaoni ai i le Alii i taimi faigata. Faauma i lau molimau.
Tala ma Faamatalaga o Talaaga
Mosaea 15:9. Faamasinoga Tonu ma le Alofa Mutimutivale
Na aoao mai e Elder Richard G. Scott o le Korama a Aposetolo e Toasefululua i tatou e uiga i le moni o le faamasinotonu ma le faamanuiaga o le alofa mutimutivale:
“Tatou te faia uma lava mea sese i le olaga. E afua ai ona lepetia tulafono e faavavau. O le faamasinoga tonu o le itu lena o le fuafuaga o le fiafia a le Tama o i le lagi, e faatumau ai le faatulagaina lelei. E pei o se kalave i se a’e papa, e i ai pea lava. O se uo pe afai e tausisia tulafono e faavavau. E tali atu i lou tiga pe afai e le amanaiaina. O le faamasinoga tonu e faamaonia ai o le a e mauaina faamanuiaga o lou taui ona o le usitai i tulafono a le Atua. O le faamasinoga tonu foi e manaomia, le faamalieina o tulafono uma na solia. A e usitai i tulafono a le Atua, e faamanuiaina oe, peitai e leai se totogi faaopoopo e maua, e mafai ona faasaoina e faamalie ai le tulafono na e solia. Afai e le foiaina, e mafai e tulafono ua solia ona afua ai le faanoanoa o le olaga, ma taofia oe mai le toe foi atu i le Atua. Na o le soifuaga o aoaoga, aemaise o le Togiola a Iesu Keriso e mafai ona tatalaina oe mai lenei tulaga faalumaina.
“E mafai ona faamalieina le poloaiga o le faamasinoga tonu mo tulafono ua solia, e ala i le alofa mutimutivale, lea e maua i lou salamo pea lava pea ma le usitai i poloaiga a le Atua. O lena salamo ma le usiusitai e matua manaomia lava mo le Togiola ina ia faatino atoa ai lana vavega i lou olaga. E mafai e le Togiola ona totogi uma au aitalafu taitasi i le faamasinoga tonu, ma tuuina atu le faamagaloga e ala i le alofa mutimutivale i lou salamo. E ala i le Togiola e mafai ai ona e ola i se lalolagi lea e faamautinoa ai e le faamasinoga tonu faapea o le a tumau pea ia te oe mea sa e ausia ona o lou usiusitai. E ala foi i Lona alofa mutimutivale, e mafai ai ona e foia taunuuga o tulafono ua lepetia.” (“E Mafai e le Togiola Ona Faamautu Lou Filemu ma le Fiafia,” Ensign po o le Liahona, Nov. 2006, 41–42).