Faatomuaga i Le a Enosa
Aisea e suesueina ai lenei tusi?
O le tusi a Enosa ua faaalia ai le mana o le Togiola a Iesu Keriso e faamama ai tagata mai le agasala ma faaatoatoaina i latou. Na fagatua Enosa i luma o le Atua i le tatalo malosi, a o le’i faamagaloina ana agasala. Ona ia tatalo ai lea mo le manuia faaleagaga o Sa Nifae ma Sa Lamana, ona faaaluina ai lea o le taimi na totoe o lona olaga e galue ai mo lo latou faaolataga. A o suesueina e tamaiti aoga le tusi a Enosa, e mafai ona latou iloaina ai lesona taua e uiga i le tatalo, salamo, ma faaaliga. E mafai foi ona latou aoao faapea, a o mauaina e tagata taitoatasi faamanuiaga o le Togiola, o le a latou mananao e faasoa atu na faamanuiaga i isi.
O ai na tusia lenei tusi?
O Enosa, o se atalii o Iakopo, ma se atalii o le atalii o Liae ma Sarai, na tusia lenei tusi. Na faamaumauina e Enosa faapea na aoaoina ia e lona tama “I le aoaoga ma le apoapoaiga foi a le Alii” (Enosa 1:1). I le taufaaiuiuga o lona olaga, na tusia ai e Enosa faapea na ia tautino atu “le upumoni ua ia Keriso” i ona aso uma (Enosa 1:26). A o le’i maliu o ia, na tuuina atu e Enosa papatusi laiti a Nifae i lona atalii o Iaroma (tagai i le Iaroma 1:1). Na faaiuina e Enosa lana talafaamaumau e ala i le faapea mai ua ia olioli i le aso o le a ia tu ai i luma o lona Togiola. Na ia tautino mai, “Ona ou vaai ai lea i ona fofoga ma le fiafia, ma o le a fetalai mai o ia ia te a’u: Sau ia ia te a’u, oe ua faamanuiaina, ua i ai se nofoaga ua saunia mo oe i maota o lo’u Tama” (Enosa 1:27).
O ai na faatatau i ai le tusiaina o lenei tusi, ma pe aisea foi?
Ina ua maua e Enosa papatusi laiti mai lona tama, na ia folafola atu o le a ia togitogia ai na o tusitusiga ua ia manatu e sili ona pele, lea e aofia ai aoaoga paia, faaaliga, ma valoaga (tagai i le Iakopo 1:1–4; 7:27). Na iloa e Enosa o lona nuu, o Sa Nifae, o le a au lava ina faaumatia. Na ia tatalo ina ia faasaoina e le Alii se talafaamaumau o Sa Nifae “ina ia mafai ona aumai i se aso o lumanai i sa Lamana, ina atonu e mafai ona aumaia ai i latou i le olataga” (Enosa 1:13).
O anafea, ma o fea na tusia ai?
Na faaiuina e Enosa lana talafaamaumau e ala i le tautino atu faapea e 179 tausaga ua te’a talu ona tuua Ierusalema e Liae (tagai i le Enosa 1:25). O le mea lena ua tusa ai le aso o lana tusitusiga i le va o le toeitiiti 544 TLM. (ina ua faaiu e Iakopo lana talafaamaumau) ma le 421 TLM. Na tusia e Enosa lenei talafaamaumau a o ola ai i le laueleele o Nifae.
O a nisi o vaaiga iloga o lenei tusi?
O le tusi a Enosa ua faailoa mai ai se mamanu lea ua faaalia ai le auala e mafai ai e tagata taitoatasi ona maua faamanuiaga o le Togiola a Iesu Keriso ma faasoa atu na faamanuiaga i isi. Muamua, na aoaoina Enosa i le talalelei a Iesu Keriso (tagai i le Enosa 1:1, 3). O le mea na sosoo ai, na ia iloaina lona manaomia o le Faaola ma sa tatalo atu mo le faamagaloga (tagai i le Enosa 1:2–4). Ona sosoo lea, ina ua mavae le mauaina o se faamagaloga o ana agasala, na ia tatalo ma galue ma le filiga e aumaia isi i le olataga, (tagai i le Enosa 1:5–27). O lenei mamanu o loo aliali mai i le Tusi a Mamona atoa. O faataitaiga e aofia ai Alema (tagai Mosaea 17:1–2; 18:1–2), O Alema le Itiiti ma atalii o Mosaea (tagai i le Mosaea 27–28), ma Lamonae ma lona nuu (tagai i le Alema 18–19).
E le gata i lea, o le tusi a Enosa o le uluai tusi ua faamatalaina ai auiliili le tulaga liliuese o fanau a Lamana ma Lemuelu (tagai i le Enosa 1:20). O loo taua ai foi faapea na “matua toatele lava perofeta” sa i ai i totonu o Sa Nifae, e ui lava o le toatele o Sa Nifae sa avea “o ni tagata ua maaa” o e sa tatau ona uunaia pea lava pea “e taofi ai i latou i le matata’u i le Alii” (Enosa 1:22–23).
Otootoga
Enosa 1:1–8 Ua tatalo Enosa mo se faamagaloga o ana agasala ma ua maua le faamagaloga ona o lona faatuatua ia Iesu Keriso.
Enosa 1:9–18 Ua tatalo Enosa mo Sa Nifae ma Sa Lamana, ma ole atu i le Alii e faasaoina talafaamaumau a Sa Nifae.
Enosa 1:19–24 Ua faamatalaina e Enosa le amioleaga o Sa Lamana ma le natura o le ua maaa o Sa Nifae. O ia ma isi perofeta ua galulue faifai pea mo lo latou olataga.
Enosa 1:25–27 Ua faaiuina e Enosa lana talafaamaumau, ma ua tusitusi e uiga i le faamautinoaga o le ola e faavavau na ia mauaina e ala i lona Faaola.