Lesona mo Suesuega e Faia i le Aiga
Helamana 10–16 (Iunite 23)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O le otootoga lenei o aoaoga faavae ma mataupu faavae sa aoaoina e tagata o le vasega a o latou suesueina le Helamana 10–16 (iunite 23) e le o fuafuaina ia aoaoina o se vaega o lau lesona. O le lesona e te aoaoina atu e taulai atu lava i na o nai aoaoga ma mataupu faavae. Mulimuli i uunaiga a le Agaga Paia a o e manatunatu i manaoga o tagata o le vasega.
Aso 1 (Helamana 10)
Helamana 10 na tuuina atu ai i tagata o le vasega se avanoa e aoao atili ai i le malosi faaleagaga o Nifae. E ala mai i ana faataitaiga, ua aoaoina ai e tagata o le vasega o le mafaufau loloto i mea a le Atua e saunia ai i tatou e maua faaaliga. Ua latou aoaoina foi e tuuina mai e le Alii ia i tatou faamanuiaga ma tiutetauave pe a tatou faamuamua Lona finagalo nai lo o tatou loto. Ina ua faamuamua e Nifae le finagalo o le Alii nai lo ia, sa faasafua mai e le Alii ia te ia mana o faamauga.
Aso 2 (Helamana 11–12)
O le suesueina o le 14 tausaga o le talafaasolopito o sa Nfiae, ua aoaoina ai e tagata o le vasega e faapea, e ala atu i le lotomaualalo ma le salamo e mafai ai ona tatou aloese mai le faamaualuga ma le faaumatiaga. Afai tatou te le faaeteete, o lo tatou manuia e mafai ona taitai atu ai i tatou e faagalo le Alii. Sa aoao mai e Nifae e faapea, ina ia mafai ona fesoasoani i tagata e aloese mai lenei mea sese, e aoai ai e le Alii ia Ona tagata ina ia faaosofia i latou e manatua o Ia.
Aso 3 (Helamana 13–14)
O Samuelu, o se perofeta sa Lamana, sa ia faaalia mai o perofeta e saunoa mai i savali e tuu e le Atua i totonu o o latou loto. I le suesueina o ana lapataiga faaperofeta, ua aoaoina ai e tagata o le vasega afai tatou te teena saunoaga a perofeta a le Alii, o le a tatou oo i le le fiafia ma le faanoanoa. Sa apoapoai atu Samuelu i tagata ia talitonu ia Iesu Keriso ma molimau atu e tuuina mai e le Alii ni faailoga ma mea ofoofogia e fesoasoani ai i tagata ia talitonu ia te Ia.
Aso 4 (Helamana 15–16)
Ona sa matuai faamanuiaina e le Alii ia sa Nifae, sa taumafai ai Samuelu e fesoasoani ia i latou ia malamalama i faamasinoga a le Atua latou te faafeagai pe afai latou te le salamo. Mai lenei mea, ua aoao ai e tagata o le vasega, afai e le talitonu tagata ae ua uma ona latou maua le atoatoaga o le talalelei, o le a latou maua se tausalaga sili atu. Mai tali a sa Nifae ia Samuelu, ua aoaoina ai e tagata o le vasega a tatou filifili e teena molimau a le Alii, ua tatou faatagaina Satani e uumau i o tatou loto.
Faatomuaga
I le Helamana 10–16 o tiute o perofeta i le folafolaina atu o le salamo o loo faamamafaina mai ai. I le aluga o le vaiaso lenei, sa maua ai se tagata o le vasega se avanoa e suesue ai le faamaoni o perofeta o Nifae ma Samuelu le sa Lamana. Sa maua uma e nei tamalii ni faaaliga faaleagaga ma sa i ai le pule e talai atu ai i sa Nifae lē usiusitai. E ui lava i le lotomaaa o tagata, ae sa folafola atu e nei tamalii le salamo. Sa laua aoao atu o le fiafia e maua lea i le ola i mataupu faavae sa faailoa mai e Iesu Keriso, ae le o le faia o mea leaga.
Fautuaga mo le Aoaoga
Helamana 10–16
Sa tala’i atu ma le faamaoni Helamana ma Samuelu i tagata
Fai atu i tagata o le vasega pe na latou oo i se tulaga e faapea o le lagolagoina o tulaga faatauaina o loo aoaoina mai i le tamaitusi o le Mo Le Malosi o le Autalavou o le a le masani ai a latou. Atonu e te fai atu i ni nai tagata o le vasega e faasoa atu o latou aafiaga ma faamatala e uiga i o latou lagona ma mea sa aoaoina ai.
Tau atu i tagata o le vasega o le Helamana 10–16 o loo tuuina mai ai ni faataitaiga o ni tamalii se toalua o e sa tutu atu mo tulaga faatauaina a le Alii e ui lava ina sa le masani ai tagata. Fai atu i tagata o le vasega e mafaufau po o a mea e mafai ona latou aoao mai i faataitaiga a Nifae ma Samuelu le sa Lamana e mafai ona fesoasoani ia i latou i ni tulaga talitutusa faapena.
Tusi le siata lenei i luga o le laupapa po o luga o se fasipepa.
Tulaga talitutusa i le va o Nifae ma Samuelu le sa Lamana | ||
---|---|---|
Nifae (Helamana 10:1–5, 12, 15–16) |
Samuelu (Helamana 13:1–6; 16:1–2) |
Fai atu i tagata o le vaega e suesue i fuaiupu ua lisiina i le siata, ma vaavaai mo ni tulaga e talitutusa ai i le va o Nifae ma Samuelu. Fai atu i ni tagata o le vasega e lisi nei tulaga talitutusa i se avanoa e le o tusia ai se mea i luga o le siata. O le lisi e ono aofia ai vaega nei: teena e tagata; faalogo i le siufofoga o le Alii; mulimuli i faatonuga a le Alii i le taimi lava lena; tautala atu i mea sa tuu e le Alii i totonu o o laua loto; lapatai atu ia sa Nifae afai latou te le salamo, o le a faaumatia i latou; sa puipuia e le mana o le Atua ina ia mafai ona la tuuina atu Lana savali.
A uma ona lisi e tagata o le vasega ia tulaga e talitutusa ai ua latou mauaina, fai atu i se tasi e faitau leotele le Helamana 10:4. Ona fai atu lea o fesili nei:
-
O a nisi o mafuaaga tatau o le le faavaivai o Nifae?
-
Na faapefea foi ona faaalia e Samuelu le le faavaivai? E mafai faapefea ona tatou atinaeina se le faavaivai faapena?
Fai atu i se tagata e faitau atu i le vasega le saunoaga lenei a Elder Neal A. Maxwell o le Korama a Aposetolo e Toasefululua, lea ua ia aoao mai ai le ala e mafai ona tatou atinaeina ai lenei uiga:
“Afai tatou te taulai atu ia Iesu ma Lana galuega, o le a faateleina lo tatou olioli ma lo tatou malosi e tumau ai. … E lei saili atu ma le manatu faapito Nifae mo lona ‘lava ola,’ ae na ia saili atu e fai le finagalo o le Atua. O le mea lea na ia maua ai le malosi faaopoopo ma le atoatoa lea na mafai ai ona ia tauivi ma le filiga ma le le faavaivai. Na iloa e Nifae le itu e faasaga i ai: agai i le Atua” (If Thou Endure It Well [1996], 116).
Fesili atu:
-
E tusa ai ma le saunoaga a Elder Maxwell, o le a se mea e mafai ona tatou faia e auauna atu ai ma le maelega e le faavaivaia?
-
O a fuaitau i le Helamana 10:4 o faaalia ai o Nifae sa “faasaga atu i le Atua,” po o se isi faaupuga, sa taula’i atu i le faia o le finagalo o le Atua?
-
O a fuaitau i le Helamana 13:3–5 o faaalia ai sa faamuamua e Samuelu le finagalo o le Atua nai lo lona lava loto?
-
O a ni upumoni e mafai ona tatou aoaoina mai aafiaga o Nifae ma Samuelu? (O se tasi o tali e mafai ona atagia ai se upumoni ua aoaoina e tagata o le vasega i a latou suesuega patino i le vaiaso lenei o le: E tuuina mai e le Alii ia i tatou ni faamanuiaga ma tiutetauave pe a tatou faamuamua ia Lona finagalo nai lo o tatou lava loto.)
Faitau le tala lenei, sa faamatalaina e Elder Dallin H. Oaks o le Korama a Aposetolo e Toasefululua, e uiga i se teineitiiti e 12-tausaga o lē sa faamuamuaina le finagalo o le Alii nai lo lona lava loto:
“E le mafai ona tatou maua le faatuatua moni i le Alii e aunoa foi ma le i ai o le faalagolago atoa atu i le finagalo o le Alii ma i le taimi a le Alii. A tatou maua lena ituaiga o faatuatua ma faalagolago i le Alii, ua tatou maua le puipuiga moni i o tatou olaga. …
Sa ou faitau e uiga i se tamaitai talavou o lē sa faaaogaina lena ituaiga o faatuatua ma le faalagolago. Mo le tele o masina sa ma’i tigaina ai lona tina. Mulimuli ane, sa faapotopoto ai e le tamā faamaoni le fanau i talaane o le moega [o le tina] ma fai atu ia i latou e faatofa i lo latou tina ona ua lata ina maliu o ia. Sa tetee le afafine e sefululua tausaga le matua.
‘“Tama, ou te le manao e oti lo’u tina. Sa ou i ai faatasi ma ia i le falemai … mo le ono masina; ua fia ma faafia … ona e tuuina atu ni faamanuiaga ia te ia, ma sa matuu ese atu ai ona tiga ma moe filemu ai. Ou te manao e tuu ou lima i luga o lo’u tina ma faamalolo o ia.’
“O le tamā, o Elder Heber J. Grant lea, sa fai atu i le fanau na ia lagona i lona loto ua oo mai le taimi o lo latou tina. Sa o ese atu tamaiti, ae tootuli ifo o ia i autafa o lona toalua. Mulimuli ane, sa ia ta’ua ai lana tatalo: ‘Sa ou ta’u atu i le Alii ou te faafetaia le i ai o ona aao i le ola [ma le] i le oti. … Ae sa ou ta’u atu i le Alii sa le ia te a’u le malosi e tuu atu ai lo’u toalua e oti ma faapea ona aafia ai le faatuatua o la’u fanau laiti.’ Sa ia augani atu i le Alii e tuu atu i lona afafine ‘se malamalama e faapea o lona manatu ma lona finagalo ua tatau ona maliu lona tina.’
“I totonu o se itula ae maliu loa le tina. Ina ua toe valaau atu Elder Grant i le fanau e toe o mai i totonu o le potu ma ta’u atu ia i latou, sa amata ona tagi aueue lona atalii laitiiti e ono tausaga le matua [na igoa ia Heber]. Sa fusi mai o ia e le tuafafine e sefululua tausaga le matua ma fai atu: ‘Aua e te tagi, Heber; talu ona tatou o atu i fafo o lenei potu, sa fai mai le leo o le Alii mai le lagi ia te a’u, O le maliu o lou tina ia faia ai le finagalo o le Alii’ (Bryant S. Hinckley, Heber J. Grant: Highlights in the Life of a Great Leader, Salt Lake City: Deseret Book Co., 1951, pp. 243–44).
“A tatou maua lena ituaiga o faatuatua ma le faalagolago sa faaalia e lena tamaitai talavou, tatou te maua le malosiaga e lagolago ai i tatou i soo se mea taua lava e tupu i o tatou olaga” (“Faatuatua i le Alii o Iesu Keriso,” Liahona, Iulai 1994, 100).
Fesili atu:
-
O le a le mea sa fesoasoani ia Peresitene Heber J. Grant ma lona aiga e faamuamua ai le finagalo o le Alii nai lo o latou lava loto?
-
Pe sa oo ia te oe se aafiaga lea sa manaomia ai le tuuina o lou faatuatua i le Atua ma faamuamua Lona finagalo nai lo lou lava loto? (Mafaufau e fai atu i nisi o tagata o le vasega e faasoa atu o latou aafiaga i le vasega. Faamanatu atu ia i latou e le tatau ona latou faasoaina atu soo se mea e patino tele pe le faalauaiteleina.)
Faamautinoa atu i tagata o le vasega, a tuu atu lo tatou faatuatuaga i le Atua ma faamuamua Lona finagalo nai lo o tatou loto, o le a Ia lagolagoina i tatou i taimi faigata.
Faamatala atu o se vaega taua o le talaiga a Nifae o le fesoasoani lea i tagata ia manatua le Atua ma salamo i a latou agasala. Ae peitai, sa faaauau pea ona faamaaa o latou loto ma lē mananao e faasa’o atu i latou.
Vaevae le vasega i ni vaega se lua. Fai atu i le tasi vaega e faitau le Helamana 10:15–18; 11:3–10 ae o le isi vaega e faitau le Helamana 11:30–37; 12:1–3. (Atonu e te manao e tusi nei mau i luga o le laupapa.) Fai atu i vaega taitasi e saunia e talanoaina ni mafuaaga sa aoaiina ai e le Alii ia Ona tagata. Atonu e ono ta’ua e tagata o le vasega ni nai mafuaaga eseese, ae ia mautinoa latou te faailoa mai e faapea e aoai e le Alii ia Ona tagata ina ia faaosofia ai i latou e manatua o Ia.
-
O le a le ituaiga o aoaiga na faaaogaina e le Alii e faagauai mai ai tagata?
-
E tusa ai ma le Helamana 12:3, e toatele tagata e le manatua le Alii seiiloga lava Na te aoaia i latou. Aisea e faapena ai?
Fai atu i se tagata o le vasega e faitau leotele le Helamana 15:3.
-
E faapefea ona avea aoaiga a le Alii ma se faailoaga o le alofa?
Fai atu i tagata o le vasega e faasoa atu a latou tali i le galuega lona 5 i le aso lona 2 o le vaiaso nei. Atonu e te manao e toe ta’u atu e ala atu i le lotomaualalo ma le salamo, e mafai ai ona tatou aloese mai le faamaualuga ma le faatamaiaga ma afai tatou te le faaeteete, o lo tatou manuia e mafai ona taitai atu ai i tatou e faagalo le Alii.
Iunite e Sosoo Ai (3 Nifae 1–11)
O le isi galuega e sosoo ai a tagata o le vasega, o le a latou faitau ai e uiga i le nuu atoa o sa Nifae sa faapotopoto e faasagatau atu i le au faomea a Katianetona i se taua tele. Na faapefea ona mafai e sa Nifae ona faatoilalo le au faomea amioleaga? O le a faitau ai foi tagata o le vasega e uiga i se faatamaiaga tele sa tupu i Amerika i le taimi o le maliu o Iesu Keriso i Ierusalema. I le pouliuli, sa faalogoina ai e tagata le siufofoga o Iesu Keriso. Ona afio ifo ai lea o le Faaola ma auauna atu o ia lava ia i latou. Fai atu i tagata o le vasega e mafaufau pe o a ni o latou lagona pe ana faapea sa latou i ai iina.