Faatomuaga i Le Tusi a Mamona
Aisea e suesue ai lenei tusi?
A o suesueina e tamaiti aoga lenei tusi, o le a latou aoaoina lesona taua mai ia Mamona, o se soo o Iesu Keriso na soifua i le faatuatua e ui lava na siomia i lona olaga atoa e “se vaaiga faaauau pea o le amioleaga ma mea inosia” (Mamona 2:18). O le a faamanuiaina foi tamaiti aoga mai le suesueina o upu a Moronae, o le na molimau mai i tagata faitau o aso e gata ai faapea “Ua faaali mai outou ia te au e Iesu Keriso, ma ua ou iloa a outou mea o fai” (Mamona 8:35). A o faitau e tamaiti aoga le faatafunaga na oo mai ona o le amioleaga o sa Nifae, o le a latou aoaoina le taua o le ola e tusa ai ma poloaiga ma feagaiga o le talalelei a Iesu Keriso.
O ai na tusiaina lenei tusi?
Na tusia e Mamona ia mataupu muamua e fitu o lenei tusi o se faamatalaga puupuu o le amioleaga ma taua i totonu o sa Nifae ma sa Lamana i ona aso. Na ia faia foi se tala atoa o mea na tutupu mai lona taimi i luga o papatusi lapopoa a Nifae (tagai Mamona 2:18; 5:9). Ina ua tusa ma le 10 tausaga o Mamona, na tuuina atu e le tausi talafaamaumau o Amorona ia te ia e tauaveina le tiutetauave mo talafaamaumau paia pe a matua o ia. Na tatau ona ia faamaumauina mea uma na ia vaaia e faatatau i le nuu (tagai Mamona 1:4). I le 15 o tausaga o Mamona, na “asiasi mai ai le Alii ia te au, ma sa ou tofo ma ou iloa ai le agalelei o Iesu” (Mamona 1:15). I lena lava tausaga, na tofia ai Mamona e sa Nifae e taitai a latou autau (tagai Mamona 2:1). I le usiusitai ai i le fautuaga a Amorona, na ia maua ai mulimuli ane papatusi lapopoa a Nifae ma amata loa ona fai lana talafaamaumau. Na ia faapupuuina foi papatusi lapopoa a Nifae, lea na aofia ai tusitusiga mai perofeta ma tausi talafaamaumau mai ia Liae e oo mai ia Amorona, ma sa tuu ai ia papatusi laiti a Nifae i totonu o lena otootoga. Ina ua lata ina uma lona soifua, na natia e Mamona talafaamaumau uma i le Mauga o Kumora, se’i vagana ai ni nai papatusi laiti na ia tuuina i lona atalii o Moronae (tagai Mamona 6:6). Ona ia taitaiina lea o sa Nifae i la latou taua matautia mulimuli ma sa Lamana. A o le’i maliu Mamona, na ia faatonuina Moronae e faamae’a lana talafaamaumau. Na faaopoopo e Moronae upu o loo maua ai mataupu e 8–9 o lenei tusi.
O ai na tusi i ai lenei tusi ma aisea foi?
Na tusi atu Mamona i Nuuese ma tagata o le aiga o Isaraelu i aso e gata ai, ma le manao e “faatauanauina outou uma [o] tuluiga o le lalolagi ia outou salamo ma sauni e tutu i luma o le nofoa-faamasino o Keriso” (Mamona 3:22). A o faaiuina e Moronae le tusi a lona tama, na ia lauga sao atu lava ia i latou o le a faitau i ana upu. Na ia lapataia i latou i taunuuga o a latou agasala ma valaaulia i latou e “o mai i le Alii ma o [latou] loto atoa” (Mamona 9:27).
O anafea ma o fea na tusia ai?
Pei lava na tusia e Mamona ia mataupu 1–7 o lenei tusi i le va o le T.A. 345 ma le T.A. 401 (tagai Mamona 2:15–17; 8:5–6). Na ia faaiuina ana tusitusiga ina ua mavae le taua mulimuli i le va o sa Nifae ma sa Lamana i Kumora i le T.A. 385 (tagai Mamona 6:10–15; 7:1). Atonu na tusia e Moronae ia tusiga i mataupu 8–9 i le va o tausaga T.A. 401 ma le T.A. 421, a o ia fealualuai solo “mo le puipuia o [lona] ola” (tagai Mamona 8:4–6; Moronae 1:1–3).
O a nisi o vaaiga uigaese o lenei tusi?
O lenei tusi ua faamatalaina le faataunuuina o valoaga a Nifae, Alema, Samuelu le sa Lamana, ma Iesu Keriso e uiga i le faatafunaga o sa Nifae (tagai 1 Nifae 12:19; Alema 45:9–14; Helamana 13:8–10; 3 Nifae 27:32). Na taua e Mamona nisi o ana tusitusiga o “la’u talafaamaumau e faatatau i le faaumatiaga o ou tagata” (Mamona 6:1). Na ia faaalia o le pau o sa Nifae o se taunuuga o a latou amioleaga (tagai Mamona 4:12; 6:15–18).
Otootoga
Mamona 1 Na poloaiina e Amorona ia Mamona e tausia se talafaamaumau o le nuu i ona aso. Na manumalo sa Nifae ia sa Lamana i le taua. Ua manumalo le amioleaga i le laueleele uma, ua le toe galulue soo e toatolu sa Nifae i le nuu, ma ua le toe i ai ia meaalofa a le Agaga. Ae ui i lea, o Mamona na “asiasia e le Alii.”
Mamona 2–3 Na tofia e sa Nifae ia Mamona e taitai a latou autau. Na ia taitaia i latou i taua ma sa Lamana i le silia ma le 30 tausaga. E ui lava i le faaumatiaga matautia ma le puapuagatia, ae na mumusu sa Nifae e salamo. Ua aumaia e Mamona ia papatusi a Nifae mai se mauga ua ta’ua o Semi ma amata ai lana talafaamaumau. Ina ua mavae ni nai manumalo, ua amata ona viia e le nuu lo latou lava malosi ma faia ni tautoga e taui ma sui ia sa Lamana. Ua musu Mamona e toe taitai i latou. Ua ia tusi e faatauanau tagata uma i aso e gata ai ia saunia e tutu i luma o le nofoa faamasino o Keriso.
Mamona 4 Ua le toe taitaia e Mamona, ua faaauau pea e autau a sa Nifae ona tau ma sa Lamana. Ua faitau afe ua fasiotia i le pelu i itu uma e lua. Ua sili atu le amioleaga o fanau a Liae nai lo se isi lava taimi i lo latou talafaasolopito, ma ua amata ona manumalo sa Lamana ia sa Nifae. Ua ia Mamona le tiutetauave o le tausia o talafaamaumau a sa Nifae ma ua ia aumaia talafaamaumau mai le mauga o Semi i se mauga e igoa o Kumora.
Mamona 5–7 Ua toe amata e Mamona ona taitaia autau a sa Nifae, e ui lava ua ia iloa o le a faaumatia i latou. Ua ia valoia le oo mai o le Tusi a Mamona Ua ia faapotopotoina sa Nifae i Kumora mo le taua mulimuli ma sa Lamana. Ina ua maea le taua, ua ia tagiaue i le faatafunaga o lona nuu. Ua tusi Mamona e faatauanau fanau a sa Lamana ia talitonu ia Iesu Keriso ma ia papatisoina.
Mamona 8–9 Ina ua mavae le maliu o Mamona, ua faaauau e Moronae talafaamaumau. Ua ia valoia le oo mai o le Tusi a Mamona e ala mai le mana o le Atua i se aso o le le talitonu ma le amioleaga. Ua ia molimau ia Iesu Keriso ma aoao mai o vavega ma faailoga e o mai faatasi ma le faatuatua ia te Ia. Ua ia uunaia i latou e faitau i ana upu e o mai i le Alii ma ia faasaoina.